text large_stringlengths 19 330k |
|---|
# lo balfagma'a pe la .ĭéloston. cu poi'i ma'a ka'e pu meckanpe lo ka ni clira fa lo nu ke'a likrokpu'u ja'e su'o fagma'adunra .i lo skepre la'e di'u xanka
## .i lo tcini poi kaipti tu'a lo nu likrokpu'u ka'e se farvi ze'a lo nanca be li so'o no .e nai li so'o no no noi pu jai se jinvi
.i lo bratce fagma'a poi cnita la natmi panka pe la .ĭéloston. ka'e likrokpu'u pu lo poi'i zu'i kanpe lo du'u cabna ke'a .i su'o skepre poi lanli ri'oi stuzi cu jungau fi la'e di'u
.i lo nu lanli lo kunra poi pagbu lo priro'i be su'o fagypu'o cu selja'e lo nu jinvi lo du'u ca su'o purci je nu likrokpu'u cu na'e ziltodi fa lo ka ni glare ku poi'a poi'i zu'i pu meckanpe lo ka ke'a sutra
.i pu za lo nanca be li ji'i vo gei xa ci su'o da vlipa nu likrokpu'u kei sei la .nácynyl.djiĭygrafik. cu xusra se'u, gi'e rinka lo nu lo zvajbi cu desku ku .e lo fagma'ake'a po'e la .ĭéloston ge'u, noi tansi gi'e ganlai lo ki'otre be li ji'i ze no gi'e kuspe pi so'e ri'oi panka
.i ri'oi fagma'a cu raunzu lo ka calbra ku lo nu su'o barda nu ri likrokpu'u ka'e rinka lo nu lo fagypu'o cu tisna lo varxamsi be la terdi
.i lo skepre poi zvati la .arizonak.steit.ĭunivýsitis. pu lanli lo prina po'e ri'oi nu likrokpu'u ku gi'e krici lo du'u ri'oi balfagma'a pu cikybi'o se ba'o lo nu re da flecu lo vifne likro'i lo vautci poi cnita ri'oi fagma'ake'a
.i ku'i to'e ki'u nai lo du'u da'i ri'oi fagma'a cu likrokpu'u se ri'a su'o daspo banli kei, no da ĭancu lo ka xanka ku ca ti .i tu'a lo du'u sutra zmadu fa lo fagma'a pruce lu'u poi lo skepre cu facki cu nibli lo du'u lo ka ni lo sruri be lo fagma'a cu glare cu zilzena ze'a lo nanca be li so'o no kei, .e nai tu'a lo nanca be li so'o no no lu'u noi pu krici fa lo skepre lo du'u ke'a ditcu lo pruce
.i «lu jenca fa lo nu tu'a lo ditcma mutce cu banzu lo nu su'o fagma'a ciste cu kaicne be fi lo ka tolvlile ku lo ka bredi lo ka likrokpu'u li'u» poi'i la .xanas.camlus. sei ri finkansa fi lo skenoi ke'a cusku la .nuĭork.taimyz.
.i sa'u nai, ma fasnu va'o lo nu da'i ri'oi fagma'a cu likrokpu'u ca lo bavlamdei pau nai .i ge jai kaunka lo ka ni barda fa lo nu likrokpu'u, gi cumki fa lo nu ri'oi fagma'a cu cupra lo ckape fagypu'o poi gacri so'o ganra pagbu be lo .usna gi'e tisna la'a lo varxamsi be la terdi
.i lo nu ri'oi fagypu'o cu zvati lo varxamsi ka'e rinka lo nu lo plini cu lenku zenba noi da'i daspo loi jmive be bu'u la terdi kei va'o lo nu na canci poi'a sutra
(to'i la .ilmen. cu fanva fo lo glibau fe tu toi)
# zi'e zei valsi
fagma'adunra likrokpu'u fagma'ake'a vautci ganlai balfagma'a tolvlile skenoi fagypu'o usna
|
# gunma natmi
ni'o lai gunma natmi goi ko'a zi'e no'u la'o gy United Nations gy no'u la'o .a الأمم المتحدة .a no'u la'o jy 聯合國 jy no'u la'o fy Organisation des Nations unies fy no'u la'o ry Организация Объединённых Наций ry no'u la'o sy Organización de las Naciones Unidas sy cu kaurcolnai terganzu tefi'e lonu sidju fi lo kaurcolnai flalu .e lo kaurcolnai ka snura .e lo kaurcolnai nu farvi .e lo remna selcru ra'u .e le terdi panpi ra'u
ni'o le 5 catni bangu pe ko'a cu du le jugbau ku joi le glibau ku joi le sanbau kujoi le rukybau kujoi le rabybau
|
ketytu'a
la ketytu'a to bau le sanbau cu cusku la'o zoi Sudamérica zoi .a la'o zoi Suramérica zoi .i bau le potybau cu cusku la'o zoi América do Sul zoi .i bau le fasybau cu cusku la'o zoi Amérique du Sud zoi toi cu pagbu braplu je snanu pagbu be le bemjoitco
|
ni'o ni'o la tokpono
ni'o la tokpono cu runbau gi'e se finti la'o gy. Sonja Lang .gy. noi kadno banskepre je fanva ku'o de'i li ny. re no no pa .i ty jai ta'i sisku le ka cmarai kei lo'i bangu ni'o le vi paprysfelai cu skicu pi ro le gerna .i le drata cu mulno vlaste
ni'o ti datni papri fi'e la'o gy. blinry .gy. fi'o plijaspu la'o gy. CC0 .gy. fi'o fanva la .samflir. noi la srasu .e la lalxu .e la .piier. sidju
.i zoi .urli. blinry.org/toki-ponacheat-sheet/ .urli. ti urli
ni'o ni'o le selyle'u
ni'o la tokpono cu pilno so zunsna to jy. .e ky. .e ly. .e my. .e py. .e sy. .e ty. .e vy. bu toi .e mu karsna to .a bu .e .e bu .e .i bu .e .o bu .e .u bu toi .i lo satci ba'urtadji cu na vajni
ni'o ni'o le sampu jufra
ni'o zoi ty. li .ty. cmavo fi lo du'u le terbri pamoi cu sepli le selbrisni ni'o zoi ty. soweli li moku. .ty. fo lu le mlatu cu sipna li'u zilfanva
ni'o zoi ty. jan li lape. .ty. fo lu le prenu cu sipna li'u go'i ni'o zoi ty. li .ty. na se cusku .i jo le terbri pamoi valsi cu mibma'o jo nai donma'o
ni'o zoi ty. mi moku .ty. fo lu mi citka li'u zilfanva ni'o zoi ty. sina pona .ty. fo lu do xamgu li'u zilfanva
ni'o ni'o lo ka sorselsmu
ni'o le'e tokpono jufra cu sorselsmu .i do lo nu djuno lo du'u ma kau smuvanbi cu nitcu lo nu jdice lo du'u ma kau smuni .i mu'a so'i valsi cu se smuni za'u da ni'o zoi ty. soweli .ty. fo lu mlatu ja gerku ja drata ke tumla mabru li'u zilfanva
ni'o zoi ty. kili .ty. fo lu grute ja stagi li'u go'i ni'o so'i valsi cu kakne lo ka ce'u dzavla ja skivla ja fasnyvla
ni'o zoi ty. telo .ty fo lu .i lo djacu .i cilmo .i lumci li'u zilfanva ni'o zoi ty. pona .ty. fo lu .i xamgu ja sampu .i cikre li'u go'i
ni'o lo'e tokpono dzavla na se gadri ni'o zoi ty. kili .ty. fo lu lo grute .a le grute li'u go'e
ni'o ni'o le lifri
ni'o zoi ty. e .ty. cmavo fi lo du'u lo lifri cu sepli le drata pagbu be le jufra ni'o zoi ty. soweli li moku e telo. .ty. fo lu le mlatu cu pinxe le djacu li'u zilfanva
ni'o zoi ty. mi telo e soweli. .ty. fo lu mi lumci le mlatu li'u go'i
ni'o ni'o lo nu galfi lo valsi
ni'o lo nu galfi lo valsi se pi'o lo se li'erla'i valsi cu cumki ni'o zoi ty. jan lili .ty. fo lu cmalu remna .a zo verba zilfanva
ni'o zoi ty. tomo mi .ty. fo lu le mi zdani li'u go'i ni'o zoi ty. pilin pona .ty. fo lu xamgu cinmo .a zo gleki go'i
ni'o ni'o le nu natfe
ni'o zoi ty. ala .ty. cmavo lo du'u le li'erla'i valsi cu natfe valsi ni'o zoi ty. mi lape ala. .ty. fo lu mi na sipna li'u zilfanva
ni'o zoi ty. jan ala li toki. .ty. fo lu no prenu cu tavla li'u go'i
ni'o ni'o le preti
ni'o lo nu basygau zoi ty. selbrisni ala selbrisni .ty. le selbrisni cu galfi lo jufra lo preti ni'o zoi ty. sina ken ala ken lape? .ty. fo lu .i xu do kakne lo nu sipna li'u zilfanva
ni'o zoi ty. soweli li wile ala wile moku? .ty. fo lu .i xu le mlatu cu xagji li'u go'i ni'o ji'a lo nu jmina zoi ty. anu seme .ty. le fanmo be lo jufra cu galfi jy lo preti
ni'o zoi ty. sina wile uta e mi anu seme? .ty. fo lu .i xu do djica lo nu cinba mi li'u go'e ni'o zoi ty. selbrisni .ty. .a zoi ty. selbrisni ala .ty. cu danfu lo'e preti
ni'o lo nu basygau zoi ty. seme .ty. le narju'odza cu galfi lo jufra lo sumrei ni'o zoi ty. sina moku e seme? .ty. fo lu .i do citka ma zilfanva
ni'o zoi ty. seme li moku e kili mi? .ty. fo lu .i ma citka le mi grute li'u go'i
ni'o ni'o lo nu galfi lo valsi se pi'o zoi ty. pi .ty.
ni'o zoi ty. pi .ty. cmavo fi lo du'u za'u se li'erla'i valsi cu velcki tu'a su'o li'erla'i valsi ni'o zoi ty. tomo telo nasa .ty. fo lu cizra ke litki kumfa .a lu cizra lumku'a li'u zilfanva
ni'o zoi ty. tomo pi telo nasa .ty. fo lu cizra litki kumfa .a zo barja go'i ni'o zoi ty. jan wawa ala .ty. fo lu no tsali prenu li'u go'i
ni'o zoi ty. jan pi wawa ala .ty. fo lu le ruble prenu li'u go'i
ni'o ni'o lo nu smuvanbi jmina se pi'o zoi ty. la .ty.
ni'o zoi ty. la .ty. cmavo fi lo du'u lo smuvanbi valsi cu sepli lo jufra valsi ni'o zoi ty. mi lape la ale li pona. .ty. fo lu .i fau lo nu mi sipna kei ro da xamgu li'u zilfanva
ni'o ni'o le ditcu
ni'o cumki fa lo nu pilno zoi ty. la .ty. lo nu jmina lo ditcu smuvanbi lo jufra ni'o zoi ty. tenpo ni la mi lape. .ty. fo lu .i mi ca sipna li'u zilfanva
ni'o zoi ty. tenpo kama la mi lape. .ty. fo lu .i mi ba sipna li'u go'i ni'o zoi ty. tenpo pini la mi lape. .ty. fo lu .i mi pu sipna li'u go'i
ni'o ni'o le pluja jufra
ni'o zoi ty. en .ty. cmavo fi lo du'u za'u da terbri pamoi .i le go'i cu li'erla'i ro jmina ke terbri pamoi ni'o zoi ty. lape en moku li suli. .ty. fo lu .i lo nu sipna .e lo cidja cu vajni li'u zilfanva
ni'o si'a zoi ty. li .ty. li'erla'i ro jmina selbrisni ni'o zoi ty. pipi li moku li pakala. .ty. fo lu .i le cinki cu citka gi'e daspo li'u go'e
ni'o si'a zoi ty. e .ty. li'erla'i ro jmina lifri ni'o zoi ty. mi moku e kili e telo. .ty. fo lu .i mi citka lo grute .e lo djacu li'u go'e
ni'o ni'o le no'e ca'irselzau valsi
ni'o le lerfu pamoi pe lo'e no'e ca'irselzau valsi cu ga'elfu .i lo'e no'e ca'irselzau valsi cu roroi galfi po'o lo'e dzavla .i le go'i cu lerfu sampu se pi'o le tokpono selyle'u
ni'o zoi ty. mi jan Kapile. .ty. fo lu .i mi'e .gabri'el. li'u zilfanva ni'o zoi ty. ma Kanata li pona lukin. .ty. fo lu .i le kadnygu'e cu melbi li'u go'i
ni'o zoi ty. mi toki ala e toki Inli. .ty. fo lu .i mi na kakne lo nu tavla fo le glibau li'u go'i ni'o zoi ty. ma tomo Nujoka li suli. .ty. fo lu .i la .nuiork. cu barda li'u go'i
ni'o ni'o le sumtcita
ni'o bu'u lo fanmo be lo'e jufra zoi ty. lon .ty. .e zoi ty. kepeken .ty. .e zoi ty. tawa .ty. .e zoi ty. tan .ty. sumtcita ni'o zoi ty. mi moku lon tomo. .ty. fo lu .i mi citka ne'i le zdani li'u zilfanva
ni'o zoi ty. mi moku kepeken ilo moku .ty. fo lu .i mi citka se pi'o lo forca li'u go'i ni'o zoi ty. sina pona tawa mi. .ty. fo lu .i do mi xamgu .a lu .i mi nelci do li'u go'i
ni'o zoi ty. sina tawa weka tan seme? .ty. fo lu .i do cliva mu'i ma li'u
ni'o ni'o le midnoi
ni'o zoi ty. o .ty. cmavo fi lo du'u lo cusku cu mi'esku lo te cusku ni'o zoi ty. o lukin e ni! .ty. fo lu .i ko catlu ti li'u zilfanva
ni'o zoi ty. o .ty. li'erla'i le cmene be le seldji tersku ni'o zoi ty. jan Malin o, sina pona lukin. .ty. fo lu .i doi .malin. do melbi li'u go'e
ni'o lo nu smusku se pi'o zoi ty. o .ty. lo du'u ma kau seldji tersku .e lo du'u le jufra cu midnoi cu cumki ni'o zoi ty. jan San o tawa tomo sina. .ty. fo lu .i doi .sam. ko klama le do zdani li'u go'e
ni'o ni'o le na'uvla
ni'o lo nu jmina lo na'uvla lo drata le sumji cu cumki ni'o zoi ty. wan .ty. fo lu pa li'u zilfanva
ni'o zoi ty. tu .ty. fo lu re li'u go'i ni'o zoi ty. luka .ty. fo lu mu li'u go'i
ni'o zoi ty. luka luka tu wan .ty. fo lu pa ci li'u go'i
.i .uo dai fa'o
a .i basna valsi
.i kerlo .i tirna .i snazga .i jundi .i se
minde akesi .i to'e cimle danlu .i respa .i banfi
nasa .i cizra .i fenki .i xalbebna .i bebna sike .i cukla .i bolci .i xislu .i nanca
nasin .i tcaci .i tadji .i dargu .i pluta sin .i cnino .i se jmina
sina .i zo do
ala.i li no .i noda
alasa .i kalte .i stagi crepu ali .i li ro .i sormei .i roda .i nu jmive .i munje .i li panono
anpa.i cnita .i cumla .i lacri
ante .i drata .i pu se galfi je se stika je cenba
anu.i zo .a
awen .i renvi .i se ralte .i se bandu .i stali
e.i li'erla'i le jufra lifri
en .i li'erla'i le za'u moi ke terbri pamoi
esun.i zarci .i nu vecnu ijo .i co'e .i dacti .i sidbo
ike.i xlali .i ronsa .i
nalra'a
ilo.i tutci .i zmiku .i minji insa .i midju .i se vasru .i nenri .i zvabi'i .i rango .i stomaxu
jaki .i zandi .i vindu .i te bilma .i to'e jinsa
jan .i remna .i prenu
jelo .i pelxu
jo .i ponse .i bevri .i vasru .i jgari
kala .i finpe .i xamsi danlu
kalama.i bacru .i ba'usku
kama .i darca .i balvi .i klatcu .i te galfi .i se binxo .i snada
kasi.i spati
ken .i kakne .i se curmi .i cumki
kepeke n .i pilno .i sumtcita lo du'u pilno makau
kili.i grute .i stagi .i mledi
kin .i zo je'a .i zo ji'a
kiwen .i rokci .i jinme .i jdari
ko.i kliti .i pulce .i
purmo .i pesxu
kon .i vacri .i pruxi .i kroxo kule .i sorska .i se cintypu'i
kulupu.i cecmu .i kagni .i bende .i natmi .i gugde .i cemci'e
lape .i sipna .i cando
laso.i blari'o
lawa .i stedu .i menli .i jitro .i jatna .i gidva .i klagi'a .i turni
len .i bukpu .i taxfu .i gacri
lete.i lenku .i nalseljukpa li .i cmavo fi lo du'u le terbri pamoi cu sepli le selbrisni
lili .i cmalu .i tordu .i sotmei .i citno
linja.i skori .i kerfa .i cilta lipu .i karda .i pelji .i cukta .i papri .i vreji .i kibypapri
loje .i xunre
lon.i zvati .i zasti .i jetnu
luka .i birka .i xance .i li mu
lukin .i viska .i catlu .i zgana .i sisku .i troci lupa .i vorme .i kevna .i canko
ma .i terdi .i tumla .i nurma
mama .i rirni .i dzena .i finti .i kurji
mani .i jdini .i rupnu .i xandi'i .i se ricfu .i barda cagda'u
meli .i fetsi .i ninmu .i fetspe
mi .i zo mi
mije .i nakni .i nanmu .i nakspe
moku.i pinxe .i citka
moli.i morsi .i bazi morsi
monsi.i trixe
mu .i danlu savru
mun .i lunra .i tarci
musi.i larcu .i zdile
mute .i so'imei .i li reno
namako.i cpina .i se jmina
nanpa .i zo mei .i namcu
nena .i cmana .i batke .i brama'a .i nazbi
ni .i zo ti .i zo ta .i zo tu
nimi.i cmene .i valsi
noka .i jamfu .i tuple .i dizlo
o .i cmavo fi lo du'u lo cusku cu mi'esku lo te cusku
oko.i kanla
olin .i prami .i sinma
ona.i basyvla
open .i aktigau .i cfagau
pakala.i spofu .i se xrani pali .i gunka .i bregau .i zbasu
palisa.i grana
pan .i gurni .i bavmi .i zumri .i rismi .i maxri .i pexfebdja .i nanba
pana.i dunda .i dirce .i
benji .i punji
pi .i cmavo fi lo du'u za'u se li'erla'i valsi cu velcki tu'a su'o li'erla'i valsi
pilin .i risna .i se cinmo
pimeja.i xekri .i manku
pini .i mulbi'o
pipi .i cinki .i manti .i jukni
poka.i janco .i mlana
poki .i vasru .i tanxe .i dakli .i kabri .i dacru pona .i xamgu .i plixau .i xendo .i panpi .i sampu .i zo ki'e
pu .i simsikta le cukta be la'o gy. Toki Pona: The Language of Good .gy.
sama .i mintu .i simsa .i tunba
seli .i fagri .i toknu .i glanejni
selo.i pilka .i skapi .i bartu
seme.i zo ma
sewi .i gapru .i galtu .i censa
sijelo.i xadni .i cutne
sinpin.i flira .i crane
sitelen.i pixra .i se ciska .i
barna
sona .i djuno .i stati .i prije
soweli.i tumla mabru
suli .i barda .i tilju .i clani .i rajycla .i vajni .i makcu
suno.i solri .i gusni .i ka ce'u dirce .i tergu'i
supa .i jubme .i kajna
suwi .i titla .i cimle .i se au'unmo
tan .i lu te ka'a li'u .i zo ki'u
taso.i zo po'o .i zo ku'i
tawa .i lu se ka'a li'u .i zo pi'o .i litru .i muvgau
telo .i djacu .i litki .i cilmo .i djalitki tenpo .i ditcu .i tcika .i mokca .i tcini
toki .i cusku .i vokta'a .i tavla .i pensi .i zo coi tomo .i kumfa .i dinju .i zdani
tu.i li re
unpa.i gletu
uta .i moklu .i ctebi .i xedja
utala .i damba .i talsa .i fapro
walo.i blabi
wan .i pombo .i jonsi'u .i li pa
waso .i se nalci danlu
wawa.i tsali .i sezlacri .i
carmi
weka.i nalzva .i se nalju'i
wile .i bilga .i nitcu .i djica
la .i cmavo fi lo du'u lo smuvanbi valsi cu sepli lo jufra valsi kute |
# la nu la cmalu xirma cu pagre lo rirxe
(to'i la .ilmen. cu fanva fo lo jugbau fu ti fe lo krasi jungo noi se finti la .peŋ.ŭen.cis. toi)
.i lo cmalu xirma jo'u lo ri mamta cu xabju ne'a lo cmalu rirxe .i ra gleki lifri ze'a loi djedi .i je sutra mutce teifle .i ca su'o djedi la mamta cu klacpe la cmalu xirma lo vo'a mlana je cu cusku «lu doi la cmalu xirma do mo'u banro .i do ka'e sidju la mamta lo ka gunka .i .ai ca lo cabdei do bevri lo ti gurni dakli lo cmatca pe lo fardukti rirxe korbi li'u»
.i la cmalu xirma co'i geitce spuda .i ri bekpi bevri lo gurni je fau bo sutytce darca lo cmalu ri'erkoi .i ku'i ri no da se cripu .i lo nu pagre cu se sarcu lo nu klama fo lo djacu .i ku'i na ka'e djuno lo du'u xu kau lo rirxe cu condi .i fau lo nu cuxpei cu galzengau lo stedu je cu viska la pafyfamti nakybakni noi vu nai srasu citka .i la cmalu xirma cu depcau bajra klama je cu reisku «lu doi pafyfamti nakybakni do djuno xu lo du'u xu kau sei na birti lo rirxe cu condi li'u»
.i la pafyfamti nakybakni cu galgau lo ri rajycla je barda xadni je cu cmila cusku «lu na condi .i na condi .i bancu no galtymau be lo mi tu'edzi li'u»
.i la cmalu xirma cu geitce ke bajra xrukla lo ri'erkoi je cu bredi lo ka djacu pagre .i ca lo nu pa re'u gau ku su'o tuple cu zvati lo djacu cu suksa tirna lo nu da bacru «lu doi cmalu xirma ko na dzikla .i lo vi rirxe cu condi sai li'u» .i la cmalu xirma cu dzizengau lo stedu je cu catlu je cu facki lo du'u me la cmalu ricyractu .i ri galgau lo ri melbi rebla fau lo nu lo cukla kanla cu kalri barda ku je junri cusku «lu pu za lo djedi be li re lo mi kamxada cu snuti farlu lo vi rirxe .i je lo djacu cu bevri ra lo zvada'o li'u»
.i la cmalu xirma cu sidbo claxu .i la pafyfamti nakybakni cu xusra lo du'u lo rirxe cu caxno .i la cmalu ricyractu cu xusra lo du'u lo rirxe cu condi .i na djuno lo du'u ma kau kaipti lo ka se zukte .i .ei xrukla te zu'e lo nu reisku fi la mamta .i ba ku lo mamta xirma cu zvada'o viska lo nu la cmalu xirma fau lo nu lo stedu cu dizlo ca'o xrukla je fau bo bevri lo gurni .i jijnu lo du'u ju'o ra co'i se nabmi su'o da .i ca bo kaikla lo ka rinsa ra je reisku .i la cmalu xirma cu klaku jungau la mamta lo du'u ma kau se cusku la pafyfamti nakybakni jo'u la cmalu ricyractu .i la mamta cu drijdikygau la cmalu xirma je cu cusku «lu na vajni .i mi'o kansi'u .ai lo ka klama tu te zu'e lo nu zgana li'u»
.i la cmalu xirma jo'u la mamta za'u re'u mo'u xrukla lo ri'erkoi .i la mamta cu curmi lo nu la cmalu xirma cu djucau cipyzu'e lo rirxe djacu lo ka condi mutce .i la cmalu xirma ca'o capyju'i cipyzu'e je fau lo pu'u poi'a rapli pa nu stapa cu lamli'e pa nu stapa cu pagre lo rirxe .i ŭa dai co'a li'armi ra .i lo rirxe ge nai tai lo ve skicu pe la pafyfamti nakybakni cu condi gi nai tai lo ve skicu pe la cmalu ricyractu cu condi .i lo ka djucau cipyzu'e ku po'o tadji lo ka ka'e djuno
fa'o
|
# gurni
ni'o lo gurni cu tsiju lo srasu gi'e cidja .i fi'o larsmura'a lo spaske lo gurni cu rutrkariopsi jenai tsiju
## ni'o nilcupra
di'e cartu le ni cupra le ralju gurni ja norgru ca'o le 1961moi .e le 2005moi se po'i le 2005moi nilcupra .i lo xrixruba .e lo spatrkinua cu norgru .ije le drata cu gurni.
| Grain | Mg de'i li 2005 | Mg de'i li 1961 | |
| ---------- | --------------- | --------------- | ------------------------------------------------------------------------------------------------------------------------------------------------ |
| zumri | 711,762,871 | 205,004,683 | lo zumri cu jicmu je remna cidja ne'i lo bemtu'a .e lo ketytu'a .e lo frikytu'a .ije le go'i cu cidja lo cange tolcilce danlu ne'i lo terdi |
| maxri | 630,556,602 | 222,357,231 | lo ralju gurni cu cidja ne'i lo citsi tumla |
| rismi | 621,588,528 | 284,654,697 | lo ralju gurni cu cidja ne'i lo midju terdi sefta |
| bavmi | 139,220,431 | 72,411,104 | banro fi'o cpana lo tumla poi ke'a cu nalbanli bo ferti jake dukse lenku lonu banro maxri tepi'o lonu djacu cokcu kei .e lo cange tolcilce danlu |
| sorgus | 59,722,088 | 40,931,625 | lo jicmu gurni cu cidja ne'i lo zdotu'a .e lo frikytu'a .ije le go'i cu cidja lo cange tolcilce danlu ne'i lo terdi |
| cunmi | 30,302,450 | 25,703,968 | lo gurni girzu cu banro ne'i lo zdotu'a .e lo frikytu'a |
| mavji | 24,032,521 | 49,588,769 | pu ralju cidja ne'i lo sicko'ogu'e .ijecabo le go'i cu cidja lo cange tolcilce danlu ne'i lo terdi |
| mraji | 15,202,142 | 35,109,990 | banro ne'i lo lenku tumla |
| xrimraji | 12,962,777 | 0 | ginxre lo maxri .e lo mraji .ije simsa lo mraji |
| xrixruba | 2,127,823 | 2,478,596 | cidja ne'i lo rontu'a .e lo zdotu'a .i terpli vasru la'o gy. pancake gy. .e la'o gy. groat gy. |
| cunmrfonio | 284,578 | 178,483 | banro ne'i lo frikytu'a |
| spatrkinua | 58,443 | 32,435 | tolsau jibni gurni gi'e banro ne'i lo ketygu'e cmana |
## ni'oni'o pinka gi'e sitna selci'a
1. ↑ lo 1961moi cu cerni traji lo ka lo datni cu selfa'i fi'o krasi la'o zoi. FAO zoi.
2. ↑ FAO. ProdSTAT. FAOSTAT. Retrieved on [[26 la gaimast. 2006moi]].
3. ↑ junta lo djacu banro rismi
|
bersa lo fange nerkla : Immigrant's son
|ni'o mi ba lo nu la byrak obamas se cuxna ja'e lo nu binxo le bavlamji ralja'a be lai iunaityd steits cu cusku fi ro ba'u da fe lo du'u o bu ba pa moi lo'i panzi be lo fange nerkla be'o poi ke'a ralja'a .i krinu lo nu mi na pu se jungau fi le se go'i kei fa lo du'u jitfa|
.i so'e prenu cu spuda fi lo nu lu pau la djordj uacyntn li'u preti .i ku'i le lanzu be u bu pu pu zu co'a xabju la vrdjiniys .i la djan noi ke'a patfu be le pafpa'u be u bu cu du le pa dzena ke fange nerkla be me'e zo uacyntn gi'e nerkla de'i li ji'i pa xa mu ze
.i la martn van biuryn ca lo nu verba cu se bangu le bangrnederlanda i ku'i lei dzena be le go'i pu lo nu le go'i cu jbena kei zu lo nanca be li su'o pa no no cu nerkla le bemro tutra
.i la andrus djaksn bersa le mamta e le ju'o ru'e patfu vu'o poi ke'a jbena fo la'o zoi Carrickfergus zoi ca lo nu ri se stuzi la airlynd .i nau se stuzi la berpau be la airlynd
|In the wake of the election of Barack Obama to the presidency of the United States, I told everyone that he'll be the first immigrant's kid to become president. The reason I hadn't heard mention of that is because it's false.|
Most people respond by asking, "What about George Washington?" But his family had settled Virginia early on. Of the Washingtons, his great-grandfather John was the immigrant, arriving in around 1657.
Martin Van Buren grew up speaking Dutch; still his forbears arrived in America over a century before his birth.
It is Andrew Jackson whose mother & purported father were born in Carrickfergus (then in Ireland, now in Northern Ireland). |
la viktor medranos cu finti la'e lu xrula cmana li'u ni'oni'o zasti fa lo cmana ke barda gugde i darno mutce
ni'o le xrula pe'a noblrprinsi po'u la andlaris cu cusku lu ga'icai ko zi dunda lo tadjrbarbikiu smacrkobaiu mi li'u i le selfu cu cusku lu ku'i ga'inaicai io u'u zasti fa lo no smacrkobaiu ne'i le tutra be le nobli li'u
i la andlaris cusku lu i doi le selfu ga'icai ku'i ri'a mo li'u i le selfu cu cusku lu ga'inaicai io u'u lo terbilma cu catra ro lo smacrkobaiu li'u
i le xrula pe'a noblrprinsi cu cusku lu a'a go'i i zu'unai ga'icai ko zi dunda lo skacne xrula joi zumri mi li'u i le selfu cu cusku lu ga'inaicai io je'e go'i li'u
ni'o zi zasti fa lo skacne xrula joi zumri ne'i lo solji kabri co melbi ni'oni'o la viktor medranos cu cfagau le vi se finti de'i li 2011 pi'e 12 pi'e 19 i le vi se finti prula'i bo te galfi zo'u de'i li 2012 pi'e 01 pi'e 03 tcika |
ni'o la melbi ku prenu
.i zvati le zdani
.i zvati le sipna kumfa
.i le zdani ku cmalu
.i ku'i la melbi ku jinvi lo du'u xamgu
ni'o pu sipna
.i ca ku ku'i, la melbi ku na sipna
.i djica lo nu citka kei gi'e klama le citka kumfa
ni'o lu «.u'inai cizra» li'u se cusku la melbi
.i catlu ro da gi'e ku'i viska no ka'e se citka
.i lu «lo se citka ku mo?» li'u preti fi la melbi la melbi
.i ba citka ma?
ni'o ku'i la melbi ku ca tirna — ma?
.i xu voksa?
.i mutce jundi catlu ro da noi pu se catlu
.i ca facki lo du'u pa ractu ku co'a zvati le kumfa
.i le ractu ku bacru zo «coi»
ni'o na jimpe fa la melbi
.i co'a mutce cizra
.i lo du'u lo ractu ku tavla, cu mutce ke mutce cizra
ni'o le ractu ku cusku lu «xu do djica lo nu citka?» li'u
.i la melbi ku cusku lu «go'i .i do xu pu citka ro da?» li'u
ni'o le ractu ku na bacru gi'e na klama gi'e na catlu la melbi
.i ba bo sutra krixa zo «go'i!» gi'e troci lo ka cliva
.i ku'i le ractu ku na mutce sutra
.i pu dukse citka
ni'o le barda prenu ku zukte fi lo nu le cmalu ractu ku na ka'e cliva
.i la melbi ku cusku lu «mi ba citka ma? .i mi djuno» li'u
.i le ractu ku mutce krixa .i ku'i le voksa be la ractu cu cmalu
.i ba bo—
—la melbi ku cliva le zdani gi'e citka lo drata
fa'o
|
# gymbis
.i la gymbis. goi ko'a tivni cfika ke crino je kliti prenu .i rereci da pagbu le se tivni .i le xirma cu se cmene zo pokis. .i le bliku bo stedu prenu cu bradi ko'a
|
la terdi goi ko'a cu cimoi lo'i plini be la solri gi'e terdi lo remna .i ko'a se mluni la lunra .i no drata terdi cu se facki
ni'o la terdi se vacri fi loi trano .e loi kijno .e loi navni
lunra · mluni · plini · solri · tarci · terdi |
lo nu binxo
fi'e la .franz.kafkas.
sei la .xorxes. cu fanva
ni'o pa mo'o
ni'o la .gregor.samsas. ca lo cerni ba lo nu raktu senva cu co'a cikna gi'e facki lo du'u gy bu'u lo ckana cu ba'o binxo lo rigni cinki •i gy vreta lo jdari trixe noi calku tarmi •i gy ca lo nu milxe lafti lo stedu cu viska lo punli je bunre betfu noi te senta fi lo tinsa bargu pagbu •i lo gacri boxfo cu ja'a ru'e cpana renvi gi'e pu'o sakli farlu lo loldi •i lo so'i tuple noi pindi cinla fi'o se karbi lo xadni cu za'a marbi claxu desku ni'o lu ma fasnu ri'i mi sei gy pensi li'u · i na se senva · i lo gy kumfa noi milxe cmalu gi'e ku'i ja'a remna kumfa cu za'o smaji se sruri lo vo slabu bitmu · i lo vrici bukpu mupli to lo nu litru vecnu cu jibri la .samsas. toi cu kuspe cpana lo jubme noi ga'u ke'a dandu fa lo pixra poi gy ke'a pu za katna vimcu lo karni gi'e punji lo melbi ke solji skari greku · i ra jarco lo ninmu poi dasni lo skapi mapku jo'u lo skapi karli gi'e sraji zutse gi'e jgari lo tilju skapi ke birka gacri noi mipri pi ro lo dizlo birka lo zgana
ni'o la .gregor. cu catlu fa'a lo canko •i lo carvi tcima to lo carvi dargu cu se tirna farlu lo jinme kajna be lo canko toi cu rinka lo nu gy mutce badri •i lu .e'e mi ze'a ba sipna sei gy pensi se'u gi'e to'e morji ro lo vi cizra li'u •i ku'i la'e di'u na sai cumki •i gy se tcaci lo nu sipna fau lo nu vreta lo pritu mlana •i ku'i gy va'o lo ca tcini na kakne lo nu gunro ja'e lo nu tai vreta •i gy tsali renro gy lo pritu mlana •i ku'i ro
roi xruti lo ka lanxe cpana lo trixe •i ju'o gy cu pa no no roi troci fau lo nu gasnu lo nu ganlo fa lo kanla te zu'e lo nu na viska lo desku tuple • i gy co'u troci ca lo po'o nu co'a milxe je kandi cortu lo mlana noi gy pu no roi cortu ke'a •i lu doi cevni sei gy pensi mi pu cuxna lo mutce nandu jibri •i litru ca'o lo djedi jo'u lo drata djedi •i lo nu litru vecnu cu mutce zmadu lo nu stali lo ralju briju kei lo ka tatpi rinka •i ji'a sarcu fa lo nu se raktu tu'a lo trene tcika •i lo sanmi cu mabla gi'e nai dikni •i lo nu remna jikca cu ranji cenba gi'e no roi stodi gi'e no roi te stace •i .e'i dapma ro da li'u •i gy ganse lo milxe cpina be lo betfu •i gy masno cpare lo trixe lo stedu fanmo be lo ckana te zu'e lo nu kakne lo nu lafti lo stedu •i gy facki lo du'u lo cpina pagbu cu se gacri lo cmalu je blabi mokca noi gy na djuno lo du'u ma kau krasi ke'a •i gy troci lo nu pencu lo pagbu lo tuple •i ku'i ba zi vimcu lo tuple ki'u lo nu lo nu satre cu rinka lo nu lenku desku ni'o gy cpare xruti lo cfari se zvati · i lu lo nu da clira ke ckana cliva sei gy pensi cu rinka lo nu da binxo lo fenki · i lo remna cu nitcu lo nu sipna · i lo drata ke litru vecnu cu jmive tai tu'a lo nobli turni · i mu'a mi ca lo cerni cu xruti lo zdani te zu'e lo nu ganzu lo se cpedu poi mi pu cpacu · i je lo drata vecnu cu za'o zutse gi'e citka lo cerni sanmi · i ga nai da'i mi troci la'e di'u gi ja'e bo mi se renro fi lo klaji · i ku'i ju'o cu'i la'e di'u traji lo ka xamgu mi · i mi va'o lo nu da'i mi na bilga lo nu sevzi rinju se va'u lo rirni cu da'i pu zu cliva · i da'i mi klama lo ralju gi'e mulno cusku lo mi se jinvi · i da'i ia ra farlu fi lo jubme · i ie cizra
tcaci fa lo nu zutse lo jubme gi'e tavla to'o lo galtu lo se jibri noi cnita zi'e noi ji'a bilga mu'i lo nu lo ralju cu juxre tirna kei lo nu binxo lo mutce jibni •i .o'o lo se pacna cu za'o na mo'u se xaksu •i mi va'o lo nu ca da ponse lo jdini poi banzu lo nu pleji lo se dejni be lo rirni bei lo ralju to za'o renvi fi lo nanca be li mu ji'i xa toi cu ju'o sai pleji •i ca la'e di'u lo banli mokca cu to'e cliva •i .ei mi nau binxo lo sanli ki'u lo nu lo trene cu cliva ti'u li mu li'u ni'o gy catlu lo junla noi rilti se sance gi'e cpana lo se dacru · i lu ue doi cevni sei gy pensi li'u · i tcika fa li xa pi'e ci no · i lo junla xance ca'o surla muvdu lo crane · i tcika fa li pi'e za'u ji'a sai ci no · i tcika fa li pi'e me'i ru'e vo mu · i lu xu lo junla na pu janbe li'u · i to'o lo ckana cu kakne lo nu viska lo nu ba'o drani se punji fi li vo · i la'a ja'a pu janbe · i ku'i xu cumki fa lo nu za'o surla sipna va'o lo savru poi se desku lo nilce · i je'u gy pu na mutce surla sipna · i ku'i ju'o cu'i ja'a mutce condi · i nau zukte ma · i lo balvi lamji trene cu cliva ti'u li ze · i lo nu cpacu ra cu se sarcu lo nu fenki sutra · i lo bukpu mupli cu za'o na se bakfu · i gy mi'u na banzu cikna je bredi · i gy va'o lo ji'a sai nu snada lo nu cpacu lo trene cu na ba rivbi lo nu lo ralju cu sfasa cusku · i ki'u bo ru'a lo se minde nanla pu denpa tu'a lo trene pe ti'u li mu gi'e xa'o gasnu lo nu djuno lo du'u gy na zvati · i lo nanla cu selfu se ponse lo ralju gi'e na virnu gi'e na menli certu · i ma fasnu va'o lo nu gy cusku lo se du'u gy bilma · i ku'i la'e di'u mutce se burna gi'e senpi rinka ki'u lo nu la .gregor. cu bilma no roi lo nanca be li mu be'o poi
ze'a ke'a gy se jibri •i la'a lo ralju cu ba klama lo zdani be gy fi'o kansa lo binra mikce gi'e pante fi lo rirni be gy fe lo nu lo bersa cu tai lazni •i da'i lo ralju cu rivbi ro fapro se cusku lo nu benji lo mikce noi jinvi lo du'u zasti fa lo po'o prane kanro remna noi ku'i se rigni lo nu gunka • i xu ju'o cu'i ra drani tu'a gy • i la .gregor. cu dukse lo ka sipna djica kei lo nu pu ze'u sipna gi'e ku'i se tcini lo banzu zabna gi'e ji'a sai mutce xagji ni'o da ca lo nu gy sutra pensi la'e di'u gi'e na kakne lo nu jdice lo nu cliva lo ckana to ca mi'u jarco fa lo junla li xa pi'e vo mu toi cu na'e darsi darxi lo vorme poi lamji lo stedu pagbu be lo ckana
ni'o lu doi .gregor. sei da cusku to da mamta toi •i tcika fa li xa pi'e vo mu •i .ai dai do co'a litru li'u •i iu titla voksa •i ku'i la .gregor. cu se jenca ca lo nu spuda •i gy tirna da poi li'a voksa gy zi'e noi ku'i mixre vasru to'o lo mutce condi lo se cmoni noi na'e se renvi cortu rinka zi'e noi curmi ca lo cfari lo nu lo valsi cu klina se dirce kei gi'e ku'i daspo vy ca lo nu lo sance cu ranji kei ja'e lo nu na djuno lo du'u xu kau drani tirna •i la .gregor. cu djica lo nu tcila spuda gi'e ciksi ro da •i ku'i va'o lo ca tcini cu cusku di'e po'o •i lu .ai .ai ki'e doi mamta •i mi zi ckana cliva li'u •i la'a ri'a tu'a lo mudri vorme bu'u lo bartu lo nu lo voksa be la .gregor. ba'o cenba cu na se ganse •i lo mamta cu binxo lo surla mu'i lo te spuda gi'e cliva •i ku'i lo drata se lanzu ri'a lo tordu nu casnu cu binxo lo sanji be lo nu ua la .gregor. cu za'o zvati lo zdani • i lo patfu cu ralci je ku'i jdari darxi pa lo mlana vorme • i lu doi
.gregor. doi .gregor. sei py krixa •i ma fasnu li'u •i ba zi bo py za'u re'u troci se pi'o lo zmadu dizlo voksa •i lu doi .gregor. doi .gregor. li'u •i to'o lo drata mlana vorme lo mensi cu to'e cladu pante •i lu doi .gregor. •i xu do bilma •i xu do da nitcu li'u •i la .gregor. cu spuda fa'a lo re mlana fi lu mi bredi li'u •i gy bacru se rai lo ka kurji •i gy denpa ze'u lo clani lo valsi bi'i lo valsi •i gy troci lo nu vimcu ro cizra lo voksa •i lo patfu cu xruti lo cerni sanmi •i ku'i lo mensi cu to'e cladu cusku lu doi .gregor. .e'o sai ko gasnu lo nu kalri li'u •i ku'i la .gregor. cu na sai platu lo nu gasnu lo nu kalri •i je'u gy zanru pensi lo se tcaci poi nu gy gasnu lo nu stela ganlo fa lo vorme zi'e noi gy zukte ke'a ca ge lo nu litru gi ji'a sai lo nu zvati lo zdani ni'o pa mai gy platu lo nu surla cliva lo ckana gi'e binxo lo dasni se cau lo nu da fanza kei gi'e ra'u citka lo cerni sanmi gi'e ba bo pensi lo ro drata ki'u lo nu li'a gy bu'u lo ckana na ba snada lo nu racli jdice da · i gy morji lo du'u pu so'o roi ge milxe cortu ri'a ju'o cu'i lo nu na'e mapti vreta gi facki ca lo nu cliva lo ckana kei lo du'u lo nu cortu cu xanri po'o · i gy kucli lo du'u zgana lo nu lo cabna xanri cu canci · i gy na sai senpi lo du'u lo voksa nu cenba cu na drata lo se bilma be fi lo lenku noi lo litru vecnu cu ta'e jibri bilma
ni'o lo nu renro lo gacri cu frili •i lo nu la .gregor. cu binxo lo milxe punli cu banzu lo nu lo gacri cu farlu •i ku'i lo drata cu nandu ki'u lo nu la .gregor. cu ganra mutce •i gy nitcu lo nu se birka gi'e se xance kei lo nu binxo lo sanli •i ku'i gy ba'i se tuple so'i cmalu noi ru'i vrici
to'e cando zi'e noi gy na kakne lo nu jitro •i va'o lo nu gy djica lo nu polje pa lo tuple zo'u ri pa moi lo binxo be lo sirji •i va'o lo nu gy snada lo nu pilno pa lo tuple lo se djica zo'u ro lo drata cu to'e cando tai lo nu zifre kei fau lo nu desku poi carmi gi'e rinka lo nu cortu •i lu .ei mi na prali claxu stali lo ckana li'u se cusku la .gregor. gy ni'o gy djica lo nu cliva lo ckana co'a tu'a lo dizlo pagbu be lo xadni · i ku'i lo dizlo pagbu noi gy za'o na viska gi'e na kakne lo nu satci se xanri zo'u za'a nandu fa lo nu gasnu lo nu ra muvdu · i lo nu muvdu cu mutce masno · i gy na'e ru'e fengu renro gy lo crane fau lo nu vlipa traji se cau lo nu pensi lo se rinka · i ku'i gy cu srera kanji lo farna gi'e carmi janli lo jamfu fanmo be lo ckana · i lo nu cpina cortu cu ctuca gy lo nu la'a lo sa'e dizlo pagbu be lo xadni be gy ca traji lo ka ganse
ni'o se ja'e la'e di'u gy troci lo nu lebna lo galtu pagbu be lo xadni lo ckana •i gy kurji gasnu lo nu farna lo stedu fa lo korbi be lo ckana • i frili snada • i lo xadni to'e ri'a nai lo nu ganra gi'e tilju cu masno jersi lo stedu fau lo nu carna •i ku'i ca lo nu lo stedu cu dandu bu'u lo vacri re'o nai lo ckana zo'u gy co'a terpa lo nu za'o tai muvdu •i va'o lo nu da'i gy curmi lo nu gy farlu zo'u ju'o sai lo stedu cu se xrani •i .ei li'a gy na ba'e nau binxo lo na'e sanji •i lo nu stali lo ckana cu zmadu fi lo ka se nelci gy ni'o gy tatpi vasxu ba lo nu tai nandu troci · i gy za'o vreta tai lo purci gi'e viska lo cmalu tuple noi za'u re'u simxu lo ka damba se kai
lo ka ju'o cu'i ba'o zenba lo ka vlipa •i gy na troci lo nu gasnu lo nu ra surla kei gi'e ganzu lo kalsa •i gy za'u re'u sevzi cusku lo se du'u .ei gy na stali lo ckana gi'e racli zukte lo nu friti ro da kei lo nu cumki binxo lo to'e rinju be cy •i ku'i ji'a di'i morji lo du'u lo nu mutce to'e xanka pensi cu xamgu zmadu lo nu na'e pacna jdice •i gy gasnu lo nu farna lo kanla fa lo canko •i ku'i uu gy na se prali lo mutce mukti lo cerni brumu jvinu noi mipri lo ji'a sai ragve mlana be lo jarki klaji •i lu xa'o tcika fa li ze sei ca lo nu lo junla cu se sance cu sevzi cusku •i tcika fa li ze •i je za'o tai brumu li'u •i gy ze'i stali lo ka vreta gi'e surla gi'e ruble vasxu •i da'i gy kanpe lo nu lo fatci je tcaci tcini cu xruti to'e canci lo traji smaji ni'o ku'i gy ba sevzi cusku lu .ei mi pu lo nu sance jarco li ze pi'e pa mu cu mo'u cliva lo ckana ta'i ma kau · i ju'o ca la'e di'u da pe lo kagni cu ba ba'o klama ti te zu'e lo nu da te preti mi · i ki'u bo lo kagni cu co'a kalri pu li ze li'u · i gy co'a di'i gasnu lo nu slilu fa lo mulno clani xadni fa'a lo bartu be lo ckana · i va'o lo nu gy curmi lo nu tai farlu zo'u lo stedu noi gy platu lo nu tsali lafti ke'a ca lo nu farlu cu la'a stali lo ka na'e se xrani · i lo xadni trixe cu simlu lo ka jdari · i ju'o ba lifri no xlali ca lo nu farlu lo loldi gacri · i traji nandu fa lo nu kurji lo savru poi ba se cupra zi'e noi la'a rinka lo nu da ze'o ro vorme cu terpa ja do'a nai se raktu · i ku'i .ei troci
ni'o la .gregor. ca lo nu gy xadba balni lo ckana to lo cnino tadji cu se kelci se mau lo nu nandu se troci •i banzu fa lo nu slilu catke toi cu
se sidbo lo du'u mutce frili va'o lo nu da sidju •i lo re vlipa prenu to gy pensi lo patfu jo'u lo selfu nixli toi cu mutce banzu •i po'o da'i da setca lo birka lo cnita be lo bargu trixe ja'e lo nu vimcu gy lo ckana kei gi'e binxo lo korcu ri'a lo junta gi'e sarji lo nu kurji suksa carna bu'u lo loldi noi la'a lo tuple fau lo nu cpana ke'a cu cpacu lo krinu be lo nu zasti •i je'u lo vorme cu ganlo •i se ju ku'i xu .ei cpedu lo nu da sidju • i gy to'e ki'u nai lo nu nitcu cu na snada lo nu rivbi lo nu cisma ri'a lo nu tai te sidbo ni'o gy ca lo nu slilu co zenba lo ka tsali cu ja'a ru'e snada lo nu stali lo lanxe · i gy ba zi bilga lo nu mo'u jdice · i ki'u bo zi lo mentu be li mu ba tcika fa li ze pi'e pa mu · i lo zdani vorme janbe cu nau sance · i lu ju'o da pe lo kagni sei gy sevzi cusku li'u · i gy na'e ru'e dunja ca lo nu lo cmalu tuple cu sutra zenba lo ka dansu · i ro da ze'a smaji · i lu no da gasnu lo nu kalri li'u cu sevzi se cusku la .gregor. noi se cfipu lo na'e racli nu pacna · i ku'i tai lo tcaci lo selfu nixli fau lo nu tinsa stapa cu rarna klama lo vorme gi'e gasnu lo nu kalri · i la .gregor. ca lo nu tirna lo nu co'a rinsa fa lo vitke cu djuno lo du'u ri me ma kau · i ri me lo mi'u krati · i .oi ki'u ma la .gregor. cu se dimna lo nu selfu lo kagni poi bu'u ke'a lo cmalu traji nu na kurji cu zi rinka lo barda traji nu senpi · i xu ro sai lo se jibri cu zukte lo zekri · i xu no lo se jibri cu ge vrude se lacri gi ge traji zungi lo nu na gasnu lo nu da prali lo kagni ze'a lo cerni cacra be li re gi stace se tcini lo nu na kakne lo nu cliva lo ckana · i xu na banzu fa lo nu minde lo cilre lo nu te preti kei
va'o lo nu lo tai nu preti cu sarcu •i xu .ei lo mi'u krati cu klama •i xu .ei jarco fi lo na'e fuzme lanzu fe lo du'u .ei lo po'o nu lo krati cu pajni cu se lacri fi lo nu lanli lo se senpi cuntu •i gy ja'e mau gi lo nu se fanza lo tai se pensi gi lo nu ca'a jdice cu sevzi renro to'o lo ckana se kai pi ro lo ka vlipa •i lo carmi nu janli cu jalge •i ku'i na mutce savru •i lo nu farlu cu milxe se zunti lo loldi gacri •i ji'a lo trixe cu zmadu lo pu se pensi be la .gregor. lo ka pruni •i ja'e bo lo sance cu na cladu gi'e sampu •i lo po'o stedu cu na banzu se kurji gi'e te darxi •i gy gasnu lo nu carna fa lo stedu kei gi'e mosra ri lo loldi gacri mu'i lo nu gy fengu gi'e cortu •i lu da farlu ne'i tu li'u se cusku lo krati bu'u lo zunle lamji kumfa •i la .gregor. cu troci lo nu se xanri lo nu xu kau lo krati cu su'o roi ba lifri lo simsa be lo nau se lifri be gy •i cumki do'a nai •i ku'i lo krati tai lo nu jursa spuda lo gy preti cu tinsa stapa bu'u lo lamji kumfa gi'e gasnu lo nu sance lo ky skapi cutci •i lo mensi to'o lo pritu kumfa te zu'e lo nu kajde la .gregor. cu to'e cladu cusku lu doi .gregor. lo krati ti zvati li'u •i lu mi djuno sei la .gregor. sevzi cusku li'u •i ku'i na darsi lo nu gasnu lo nu tai cladu fa lo voksa ja'e lo nu lo mensi cu kakne lo nu tirna ni'o lu doi .gregor. sei lo patfu to'o lo zunle kumfa cu cusku · i lo io krati cu ba'o klama ti gi'e djica lo nu djuno lo du'u ki'u ma kau do na pu se marce lo pa moi trene · i mi'a na djuno lo du'u .ei mi'a cusku ma kau · i ji'a ti io djica lo nu sirji tavla do · i ja'e bo .e'o ko gasnu lo nu kalri fa lo vorme · i ia ti io ba fraxu fi lo nu kalsa fa lo kumfa li'u
ni'o lu .a'o xamgu djedi doi io nanmu po'u la .samsas. sei lo krati cu xendo zunti li'u •i lu la .gregor. na se tcini lo xamgu sei lo mamta fi lo krati ca lo nu lo patfu cu tavla ca'u lo vorme cu cusku •i na se tcini lo xamgu •i ko krici doi io krati •i ia gy va'o lo drata cu na fliba lo nu se marce lo trene •i lo citno cu pensi no na'e bo lo kagni •i mi na ru'e na'e nelci lo nu gy no roi klama lo bartu ca lo vanci •i gy zvati lo tcadu ze'a lo djedi be li bi gi'e ku'i stali ca ro vanci lo zdani •i gy kansa mi'a lo nu zutse ro'e lo jubme •i gy surla tcidu lo karni gi'a tadni lo trene tcika •i gy se zdile lo nu gunka tu'a lo greku •i mu'a ze'a lo re ji'i ci vanci gy sraku zbasu lo cmalu greku •i do ba manci lo nu ri tai melbi •i ri dandu ne'i tu ne'i lo kumfa •i do ba zi viska ca lo nu la .gregor. cu gasnu lo nu kalri •i je'u mi gleki lo nu do ti zvati doi io krati •i ia mi'a fau lo nu kansa no da cu na snada lo nu la .gregor. cu gasnu lo nu kalri fa lo vorme •i gy xarnu mutce •i ju'o gy na se tcini lo xamgu •i to'e ki'u nai bo ca lo ca cerni gy xusra lo natfe li'u ni'o lu mi zi klama sei la .gregor. cu masno je na'e darsi cusku li'u · i ku'i na'e muvdu te zu'e lo nu na cirko lo valsi pe lo nu tavla · i lu mi ji'a doi io ninmu cu na kakne lo nu ciksi fo lo drata sei lo krati cu cusku · i .a'o na jursa · i ku'i zu'u nai .ei mi xusra lo du'u mi'a poi vecnu cu zabna ja mabla to fancu lo manri toi se funca lo nu sampu bilga lo nu se va'u lo nu vecnu cu ze'i pagre lo milxe nu bilma li'u · i lu .e'e · i e'a pei lo io krati cu klama lo nenri be lo do kumfa sei lo patfu cu na'e surla te preti li'u · i lu nai sei la .gregor cu cusku li'u · i bu'u lo
zunle kumfa cu dunku smaji •i bu'u lo pritu kumfa lo mensi cu co'a klaku ni'o ki'u ma lo mensi cu na klama lo drata prenu · i la'a my pu zi cliva lo ckana gi'e za'o na co'a binxo lo dasni · i ki'u ma my klaku · i xu krinu fa lo nu gy na curmi lo nu klama lo nenri fa lo krati · i xu krinu fa lo nu gy se ckape lo nu co'u se jibri ja'e lo nu lo ralju cu za'u re'u kalte lo rirni lo nu te pleji lo slabu se dejni · i la'e di'u nau na'e sarcu raktu · i la .gregor. cu za'o zvati ti gi'e na sai platu lo nu cliva lo lanzu be gy · i gy nau vreta lo loldi gacri · i no da poi da'i djuno fi lo tcini be gy cu jursa cpedu lo nu gy curmi lo nu klama lo nenri fa lo krati · i ku'i ju'o na cumki fa lo nu la .gregor. mu'i lo tai milxe nu na'e sinma cu gau co'u se jibri · i la .gregor. cu jinvi lo du'u zmadu racli fa lo nu da ge curmi lo nu gy surla gi nai jai gau fanza gy fai lo nu klaku gi'e troci lo nu xlura · i ku'i je'u lo nu na birti cu rinka lo nu lo drata cu fraxu gy lo se tarti · i lu doi io nanmu po'u la .samsas. sei lo krati cu cladu krixa · i ma fasnu · i do se marbi lo do kumfa gi'e spuda lo po'o pa slaka gi'e jursa je ke prali claxu ke'e raktu lo rirni be do gi'e ta'o na'e zukte lo se bilga be do ta'i lo jetnu spaji · i mi krati ge lo rirni be do gi lo ralju be do lo nu cusku di'u · i mi junri lo nu minde cpedu lo klina je cabna ve ciksi · i ue · i mi se spaji · i mi pu jinvi lo du'u do junri je racli nanmu · i do nau simlu lo ka djica lo nu co'a jgira lo cizra rirci · i lo ralcu ca lo ca cerni cu stidi lo cumki ve ciksi be lo nu do lerci · i ra tavla mi lo nu da pu zi co'a lacri do lo nu te pleji lo se vecnu · i je'u mi
na ru'e nupre lo du'u lo tai ve ciksi cu na ka'e jetnu •i ku'i mi nau zgana lo na'e se jimpe nu do xarnu •i mi cirko lo ka djica lo nu mi bandu do •i lo tcini be do na sai traji lo ka snura •i mi pu platu lo nu kansa no da lo nu cusku ro dei •i ku'i mi mu'i lo nu do gasnu lo nu prali claxu xaksu fa mi lo temci cu na viska lo krinu be lo nu lo rirni be do na facki •i lo pu ze'a se gunka be do cu to'e mutce mansa •i •i'a nau na citsi lo nu banli vecnu •i •i'a go'i •i ku'i na zasti fa lo citsi be lo nu na sai vecnu doi io .samsas. •i .ei na zasti li'u ni'o lu ku'i doi io krati sei la .gregor. noi fenki gi'e to'e morji ro drata ri'a lo nu se fanza cu krixa · i mi ba zi gasnu lo nu kalri fa lo vorme · i lo milxe te bilma no'u lo nu cfipu se cinmo cu fanta lo nu mi binxo lo sanli · i mi za'o zvati lo ckana gi'e ku'i nau za'u re'u carmi cikna · i mi zi cliva lo ckana · i .e'o zi denpa · i mi za'o na se tcini lo xamgu poi mi pu krici · i ku'i zenba lo ka xamgu · i ue lo prenu cu ka'e se gunta lo simsa · i mi ca lo purci lamci vanci cu se tcini lo banzu xamgu · i lo rirni be mi cu djuno · i sa'e mi ca lo purci lamji vanci cu xa'o milxe jijnu · i ju'o mi pu simlu fi da · i .u'u ki'u ma mi na pu gasnu lo nu da djuno bu'u lo kagni · i ku'i je'u da ro roi jinvi lo du'u da ba pagre lo te bilma se cau lo nu nitcu lo nu stali · i .e'o doi io krati ko kecti lo rirni be mi · i no da mukti lo nu do pante mi · i mi no roi se tavla fi la'e di'u · i ju'o cu'i do na ba'o tcidu lo ro moi ke se vecnu se cpedu poi mi benji · i .ai mi se marce lo trene pe li bi · i lo surla cacra be li so'u cu ba'o rinka lo nu mi tsali · i ko na denpa stali doi io krati · i
mi mi'u ba zi zvati lo kagni •i .e'o ko gasnu lo nu djuno kei gi'e rinsa se ka'i mi lo ralju li'u ni'o la .gregor. ca lo nu juxre je sutra bacru ro di'u gi'e ja'a ru'e djuno lo du'u xusra ma kau cu ba'o frili zenba lo ka jibni lo se dacru to la'a jalge lo ckana se zajba toi · i gy nau troci lo nu binxo lo sanli fau lo nu se sarji lo se dacru · i je'u gy djica lo nu gasnu lo nu kalri fa lo vorme · i gy stace djica lo nu se viska gi'e tavla lo krati · i gy kucli lo du'u lo drata noi tai djica lo nu viska gy cu ba cusku ma kau ca lo nu zvati gy · i va'o lo nu ra se jenca zo'u la .gregor. na sai fuzme gi'e kakne lo nu surla · i ku'i ji'a va'o lo nu ra rarna frati zo'u gy na te mukti lo nu xanka kei gi'e ji'a sai je'u kakne lo nu sutra gi'e zvati lo trene stuzi ti'u li bi
ni'o pa mai gy cu so'o roi sakli lo xutla se dacru •i ku'i ro mai gy tsali catke gy gi'e stali lo ka sanli •i gy xa'o na sai jundi lo nu cortu lo betfu kei noi ku'i mutce cpina •i ba bo gy curmi lo nu gy farlu lo trixe be lo jibni stizu noi gy jgari lo korbi be ke'a lo cmalu tuple •i gy ta'i la'e di'u cu snada lo nu sevzi jitro •i gy binxo lo smaji te zu'e lo nu tirna lo krati ni'o lu xu do jimpe su'o valsi sei lo krati fo lo rirni cu te preti · i xu tu tarti lo nu mi'o bebna li'u · i lu .uu sai sei lo mamta cu klaku krixa · i ju'o cu'i tu jursa bilma · i je mi'o tu tunta · i ju'i .greten. ju'i .greten. sei my krixa li'u · i lu re'i mamta sei lo mensi to'o lo drata mlana cu cusku li'u · i lo nu tavla simxu cu pagre lo kumfa pe la .gregor. · i lu
.e'i ko klama lo mikce •i la .gregor. cu bilma •i ko sutra lo nu gasnu lo nu lo mikce ti klama •i xu do pu zi tirna lo voksa be la .gregor. li'u •i lu voksa lo danlu li'u cu se cusku lo krati se pi'o lo voksa poi mutce mleca lo se krixa be lo mamta lo ka cladu ni'o lu ju'i .anas. ju'i .anas. sei lo patfu fa'a lo jukpa kumfa pa'o lo rinsa kumfa fau lo nu gasnu lo nu lo xance cu simxu lo ka janli cu cusku · i ko zi gasnu lo nu lo ckiku certu ti klama li'u · i lo re nixli cu bajra fi'o se sance lo skaci pa'o lo rinsa kumfa to ue ta'i ma lo mensi cu snada lo nu tai sutra lo nu binxo lo dasni toi gi'e gasnu lo nu mulno kalri fa lo vorme be lo zdani · i na tirna lo nu da gasnu lo nu ganlo fa lo vorme · i la'a curmi lo nu ri stali lo ka kalri kei tai lo nu ta'e fasnu bu'u lo zdani poi bu'u ke'a lo betri cu fasnu
ni'o ku'i la .gregor. cu ba'o zenba lo ka surla •i .a'u lo gy valsi cu na'e se jimpe to'e ki'u nai lo nu ri simlu fi gy fe lo ka banzu klina •i zmadu lo purci lo ka klina •i ju'o cu'i la'e di'u cu jalge lo nu lo kerlo cu binxo lo se tcaci •i do'a nai da nau krici lo du'u lo xlali cu tcini la .gregor. •i da bredi lo nu sidju •i lo jdice je birti se ckaji be lo pa moi se platu cu pluka gy •i gy za'u re'u cinmo lo ka cmima lo remna cecmu • i gy pacna lo mutce xamgu je spaji jalge be tu'a lo mikce jo'u lo ckiku certu vu'o noi gy na satci ke pensi fendi ke'a •i gy te zu'e lo nu se voksa lo traji cumki klina ca lo ba zi vajni nu tavla cu milxe kafke •i ku'i gy lo nu mutce milxe cu troci ki'u lo nu la'a lo ji'a sai tai savru cu frica lo remna voksa lo ka sance •i gy na lacri gy lo nu kakne lo nu
sanji la'e di'u •i ro da bu'u lo lamji kumfa cu smaji •i ju'o cu'i lo rirni cu kansa lo krati lo nu zutse re'o lo jubme gi'e to'e cladu casnu •i ju'o cu'i ro da lamji lo vorme gi'e tirna ni'o la .gregor. cu masno binxo lo jibni be lo vorme si'u lo stizu · i gy to'e jgari ri gi'e renro gy lo vorme · i gy stali lo ka sanli kei gi'e se sarji vy to lo jipno be lo cmalu tuple cu marji lo snipa toi gi'e ze'i surla bu'u vy mu'i lo nu pu nandu zajba · i ba bo gy co'a pilno lo moklu lo nu gasnu lo nu carna fa lo ckiku noi zvati lo stela · i ui nai za'a gy na se denci sa'e to pilno ma lo nu jgari lo ckiku toi · i ku'i zu'u nai lo xedja cu vlipa li'a · i gy si'u ra cu snada lo nu gasnu lo nu to'e cando fa lo ckiku · i gy na sanji lo nu ju'o gy xrani gy · i lo bunre litki cu cliva lo moklu gi'e flecu lo ckiku gi'e dargu carvi lo loldi
ni'o lu ko tirna sei lo krati bu'u lo lamji kumfa cu cusku •i tu gasnu lo nu carna fa lo ckiku li'u •i la'e di'u cu se smuni lo barda mukti la .gregor. •i ku'i ro da .ei xlura gy •i ji'a sai .ei lo patfu jo'u lo mamta cu go'i •i lu .e'e doi .gregor. sei .ei krixa •i .e'e ko co'e lo stela li'u •i gy fau lo nu te sidbo lo nu ro da cu pacna zgana lo nu gy nandu troci cu carmi jgari lo ckiku se kai ro lo ka tsali poi gy snada lo nu crepu ke'a • i la .gregor. ca'o lo nu lo ckiku cu carna cu dansu sruri lo stela • i gy nau sanli si'u lo po'o moklu •i gy slilu lo se nitcu lo nu dandu lo ckiku kei jo'u lo nu za'u re'u danre fa'a lo nenri se pi'o pi ro lo junta be lo xadni •i lo kinli sance be lo stela noi uo co'a kalri cu rinka lo nu la .gregor. cu mulno cikna •i gy fau lo nu condi vasxu cu sevzi cusku
lu .o'a mi pu na nitcu lo ckiku certu li'u gi'e punji lo stedu lo vorme batke te zu'e lo nu gasnu lo nu mulno kalri fa lo vorme ni'o lo vorme se ja'e lo tadji be lo nu gasnu lo nu kalri cu nau banzu kalri gi'e ku'i za'o mipri la .gregor. · i pa mai .ei gy masno carna lo vorme tanbo · i gy nitcu lo nu mutce kurji kei lo nu na juxre farlu lo trixe be gy bu'u lo vorme be lo kumfa · i gy za'o pensi lo nu ta'i ma kau zukte lo tai nandu kei gi'e na kakne lo nu jundi lo drata · i ca bo gy tirna lo nu lo krati cu cladu bacru zo ua poi sance tai lo nu lo brife cu siclu · i ca bo ji'a gy viska lo nu ky noi traji jibni lo vorme cu gasnu lo nu gacri fa lo xance lo kalri moklu kei gi'e klama lo trixe tai lo nu lo na'e se viska bapli cu ru'i catke ky · i lo mamta noi lo nu lo krati cu zvati cu na pu fanta lo nu ke'a se kerfa lo kluza je sanli cu pa mai catlu lo patfu fau lo nu lo xance cu lamji simxu kei gi'e za'u mai re roi stapa fa'a la .gregor. gi'e farlu lo loldi fau lo nu lo flira cu se mipri lo tatru kei fi'o se midju lo skaci noi preja lo sruri · i lo patfu cu gasnu lo nu ganlo fa lo xance kei fau lo nu kajde frumu kei tai lo nu djica lo nu catke la .gregor. ja'e lo nu xruti lo nenri be lo kumfa · i py senpi catlu lo sruri bu'u lo ralju kumfa · i ba bo py gasnu lo nu gacri fa lo xance lo kanla kei gi'e tai klaku ja'e lo nu lo rotsu cutne cu desku
ni'o la .gregor. cu na klama lo nenri be lo kumfa •i ba'i bo gy se sarji lo midju be lo vorme tanbo poi za'o ganlo ja'e lo nu da ka'e viska lo po'o xadba be lo gy xadni be'o jo'u lo stedu noi salpo gi'e catlu fa'a lo drata •i lo donri cu ba'o zenba lo ka se gusni •i ze'o lo klaji ka'e
viska lo pagbu be lo ragve dinju noi xekri gi'e cimni •i ri spita gi'e se canko lo dikni noi jursa zunti lo crane bitmu •i za'o carvi •i ku'i ru'i nai go'i fa lo barda dirgo lo dertu •i lo palta pe lo cerni sanmi cu so'i mei preja lo jubme ki'u lo nu lo patfu cu jinvi lo du'u lo cerni sanmi cu ralju lo djedi sanmi •i lo nu py tcidu lo vrici karni cu ta'e rinka lo nu lo cerni sanmi cu cacra li so'o •i zvati lo fapro bitmu fa lo pixra be la .gregor. pe lo cedra be lo nu bilni selfu •i ra jvinu lo nu gy dasni lo jatna taxfu gi'e surla cisma fau lo nu lo xance cu cpana lo xarci kei gi'e minde cpedu lo nu sinma lo sanli tadji jo'u lo manfo taxfu •i lo vorme be lo rinsa kumfa cu kalri •i ji'a lo vorme be lo zdani cu kalri •i ja'e bo ka'e viska lo serti tsina jo'u lo fanmo be lo serti poi dargu lo cnita ni'o lu .a'e sei la .gregor. noi prane sanji lo nu gy po'o cu stali lo ka surla cu cusku · i .ai mi zi binxo lo dasni gi'e gasnu lo nu bakfu lo bukpu mupli kei gi'e co'a litru · i .au pei do curmi lo nu mi cliva · i .a'e doi io krati do viska lo nu mi na xarnu gi'e ja'a nelci lo nu gunka · i lo nu litru cu rinka lo nu tatpi · i ku'i mi na kakne lo nu jmive se cau lo nu litru · i do klama ma doi io krati · i xu go'i lo kagni · i xu do ba skicu ro da fo lo fatci · i cumki fa lo nu da ca lo cabna cu na kakne lo nu gunka · i ba bo ku'i da morji lo nu da pu selfu kei gi'e jinvi lo du'u ju'o da ba lo nu bancu lo nabmi cu gunka se kai lo ka fuzme je denmi poi zenba · i mi dejni lo mutce lo ralju · i ia do djuno · i zu'u nai mi kurji lo rirni jo'u lo mensi · i mi se nabmi gi'e ku'i ba snada lo nu bancu · i ku'i ko na gasnu lo nu zenba lo ka nandu · i ko bandu mi
bu'u lo kagni •i ka'u da na prami lo litru vecnu •i da jinvi lo du'u lo litru vecnu cu jerna lo mutce jdini gi'e frili jmive •i •i'a no steci cu mukti lo nu da condi zmadu pensi lo tai mabla se jinvi •i ku'i do doi io krati cu zmadu lo drata se jibri lo ka drani viska lo ro vanci •i je'u .o'e go'i lo mi'u ralju noi ke'a ki'u lo nu ponse lo kagni cu frili cenba lo ka jinvi kei to'e se va'u lo se jibri •i ji'a do djuno lo du'u lo litru vecnu noi ze'a pi so'a lo nanca cu darno lo kagni cu frili binxo lo se gunta be lo nu mabla cusku jo'u lo cunso jo'u lo nu na'e krinu pante •i lo litru vecnu cu na'e sai kakne lo nu sevzi bandu kei ki'u lo nu so'e roi na co'a sanji •i ba bo fau lo nu tatpi gi'e mo'u litru cu ganse fi lo sevzi rectu bu'u lo zdani fe lo jalge be lo na'e se jimpe •i doi io krati .e'o ko na cliva se cau lo nu do cusku lo valsi poi jarco lo nu do jinvi lo du'u mi milxe do'a nai drani li'u ni'o ku'i lo krati cu ba'o carna ca lo pa moi valsi pe la .gregor. · i ky ga'u lo janco noi suksa to'e cando cu nau catlu la .gregor. gi'e frumu fau lo nu lo ctebi cu cmana tarmi · i ky na ze'i ji'a sai cando ca lo nu la .gregor. cu tavla · i ky se cau lo nu sisti lo nu catlu gy cu sakli fa'a lo vorme · i ku'i masno go'i tai lo nu da mipri to'e curmi lo nu ky cliva lo kumfa · i ky nau zvati lo rinsa kumfa · i lo nu tai suksa vimcu lo jamfu lo ralju kumfa cu stidi lo si'o lo jamfu cnita cu jelca · i ky bu'u lo rinsa kumfa cu gasnu lo nu preja fa lo pritu birka fa'a lo serti tai lo nu bu'u ri lo nu snura poi bancu be lo rarna cu denpa
ni'o la .gregor. cu jimpe lo du'u .ei gy na sai curmi lo nu lo krati cu cliva fau lo nu ky tai cinmo se tcini •i la'e di'u cu ckape lo nu gy se jibri bu'u lo kagni •i lo rirni cu na drani jimpe ro la'e di'u •i ra ze'u lo nanca cu binxo lo birti be lo du'u la .gregor. cu snura se jibri bu'u lo kagni co'u lo jmive fanmo •i ji'a lo cabna raktu cu rinka lo nu ra na pensi lo balvi •i ku'i la .gregor. ja'a pensi lo balvi •i .ei gasnu lo nu lo krati cu stali gi'e surla gi'e se xlura gi'e ro mai se trina •i lo balvi pe la .gregor. jo'u lo lanzu cu fancu la'e di'u •i .au lo mensi ti zvati •i my to'e bebna •i my xa'o klaku ca lo nu la .gregor. cu za'o surla vreta lo trixe •i ju'o lo krati noi mutce nelci lo ninmu cu da'i se xlura my •i da'i my gasnu lo nu ganlo fa lo vorme be lo zdani •i da'i my bu'u lo rinsa kumfa cu snada lo nu gasnu lo nu ky co'u terpa •i ku'i lo mensi ti na zvati •i je la .gregor. cu bilga lo nu zukte ni'o gy se cau lo nu pensi lo muvdu se kakne poi za'o na se slabu ku'o jo'u lo nu la'a lo gy valsi cu na pu se jimpe cu cliva lo vorme tanbo gi'e sakli pa'o lo kalri · i gy platu lo nu klama lo krati noi fenki jgari lo tsina garna lo re xance · i ku'i gy fau lo nu sisku lo sarji cu zi farlu lo so'i cmalu tuple gi'e milxe krixa · i ba zi bo gy pa re'u lo ca cerni cu ganse lo xadni zabna · i lo cmalu tuple cu cpana lo jdari loldi gi'e prane tinbe fi'o gleki zgana gy · i ji'a sai lo cmalu tuple cu troci lo nu bevri gy lo se djica be gy · i la .gregor. cu nau krici lo du'u lo stodi danfu be ro lo xlali cu jibni · i gy ri'a lo rinju nu muvdu cu slilu gi'e stali lo loldi ne'a je ca'u lo mamta · i ca bo my noi simlu lo ka jinru lo
sevzi se pensi cu plipe lo galtu fau lo nu ge lo birka cu preja gi lo degji cu mutce sepli simxu kei gi'e krixa lu ko sidju •i .e'o sai ko sidju li'u •i my ralte lo stedu lo ka salpo kei tai lo nu my djica lo nu zabna zmadu viska la .gregor. •i ku'i my fi'o natfe la'e di'u cu sutra klama lo trixe •i my to'e morji lo du'u ti'a my lo jubme cu se cpana lo sanmi palta •i my ca lo nu to'e cliva lo jubme cu sutra zutse ri tai lo nu fenki •i my simlu lo ka na sanji lo nu re'o my lo ckafi pe lo vreta patxu cu flecu farlu lo loldi gacri ni'o lu doi mamta doi mamta li'u cu se cusku la .gregor. se pi'o lo to'e cladu voksa · i gy catlu my gi'e ze'i to'e morji lo krati gi'e ku'i na snada lo nu rivbi ca lo nu viska lo ckafi poi ca'o farlu kei lo nu gasnu lo nu so'o roi kalri ce'o mulno fa lo xedja lo kunti · i lo mamta ca lo nu viska gy cu za'u re'u krixa gi'e bajra cliva lo jubme gi'e farlu lo birka be lo patfu noi bajra fa'a my · i ku'i la .gregor. cu nau claxu lo temci poi ze'a ke'a jundi lo rirni · i lo krati cu xa'o zvati lo serti · i ky fau lo nu lo flira jipno cu cpana lo garna cu ro re'u catlu · i la .gregor. cu to'e jabre te zu'e lo nu birti traji kavbu ky · i ju'o lo krati cu smadi da · i ky pa roi plipe ga'u so'i te serti gi'e canci · i ku'i bacru zo ii noi se tirna ve'a pi ro lo serti · i ui nai za'a lo nu lo krati cu bajra cliva cu mulno cfipu lo patfu noi pu ve karbi surla · i lo patfu se ba'i lo nu jersi lo krati gi'a na zunti lo nu la .gregor. cu jersi cu jgari fi lo pritu xance fe lo grana pe lo krati zi'e noi ky pu to'e lebna ke'a jo'u lo mapku jo'u lo kosta lo stizu · i py jgari fi lo zunle xance fe lo barda karni poi cpana
lo jubme •i py fau lo nu tikpa lo loldi gi'e pilno lo grana jo'u lo karni cu co'a gasnu lo nu klama fa la .gregor. fa'a lo trixe lo gy kumfa •i no da jalge lo nu la .gregor. cu pikci •i ji'a na se jimpe •i lo nu gy cumla gasnu lo nu carna fa lo stedu cu na fanta lo nu lo patfu cu vlipa zenba tikpa ni'o lo mamta cu ze'o gasnu lo nu kalri fa lo canko to'e ki'u nai lo lenku tcima · i my salpo fa'a lo bartu gi'e gasnu lo nu gacri fa lo xance lo flira · i lo vacri cu vlipa flecu lo kumfa lo serti lo klaji · i lo canko murta cu vofli · i desku fa lo karni poi cpana lo jubme · i lo boxfo cu vofli sakli lo loldi · i lo patfu cu na sisti lo nu gunta gy gi'e fenki siclu · i ku'i la .gregor. cu za'o na certu lo ka cadzu fa'a lo trixe · i je'u gy mutce masno muvdu · i la .gregor. va'o lo nu da'i kakne lo nu carna cu da'i ba zi zvati lo gy kumfa · i ku'i gy terpa lo nu lo patfu cu fengu lo nu gy masno carna · i ro roi ckape fa lo nu morsi darxi fo lo trixe .a lo stedu · i ro mai no drata danfu cu zasti · i gy dunku sanji lo nu gy fau lo nu cadzu fa'a lo trixe cu na kakne lo ji'a sai nu ralte lo farna · i gy fau lo nu ru'i terpa ke mlana catlu lo patfu cu co'a carna se kai lo ka sutra poi traji cumki zi'e noi je'u ka mutce masno · i ju'o cu'i lo patfu cu zgana lo nu gy vrude djica · i py ge po'o nai na zunti lo nu troci gi ji'a so'o roi sazri gy to'o lo darno se pi'o lo jipno be lo grana lo nu gy carna
ni'o .au lo patfu cu co'u fanza siclu •i la'e di'u rinka lo nu la .gregor. cu mulno to'e jundi •i gy ca lo nu na'e ru'e mo'u carna gi'e ru'i tirna lo se siclu cu srera gi'e milxe xruti carna •i uo ui lo stedu cu nau crane lo vorme •i ku'i za'a lo xadni cu dukse lo ka ganra kei lo nu pagre •i li'a lo patfu va'o lo ca cinmo tcini cu na sai te sidbo fi lo nu gasnu lo nu kalri fa lo drata ke vorme tanbo te zu'e lo nu friti la .gregor. lo banzu canlu •i stodi sidbo fa lo po'o nu .ei la .gregor. cu nenri lo gy kumfa rai lo ka sutra •i ji'a py va'o no da cu da'i curmi lo pluja se zukte poi la .gregor. cu nitcu ke'a lo nu sanli binxo gi'e tai pagre lo vorme •i py catke la .gregor. fa'a lo crane fau lo nu savru zenba kei tai no da zunti •i nau na sance ti'a la .gregor. tai lo nu lo po'o patfu cu se voksa •i nau na xalbo •i la .gregor. cu setca gy lo vorme •i ju ma kau fasnu •i pa lo xadni mlana cu se lafti •i gy kruca lo kevna be lo vorme •i lo mlana be gy cu mulno se xrani •i lo blabi vorme cu se barna lo rigni •i gy rinju gi'e na kakne lo nu muvdu se cau lo nu da sidju •i lo cmalu tuple pe lo pa mlana cu dandu bu'u lo vacri gi'e desku •i lo me lo drata mlana moi cu stali lo ka cortu se danre bu'u lo loldi •i lo patfu cu tsali catke fa'a lo trixe •i la'e di'u va'o lo cabna cu rinka lo nu la .gregor. cu fatci surla •i gy binxo lo condi nenri be lo kumfa fau lo nu carmi ke ciblu cirko •i lo vorme cu gau ganlo se pi'o lo grana •i ba bo uo smaji
ni'o re mo'o
ni'o co'u lo co'a vanci la .gregor. cu condi sipna tai lo nu cirko lo ka sanji •i la'a gy va'o lo ji'a sai nu da'i na se fanza cu ba zi da'i binxo lo cikna •i ki'u bo gy ganse lo nu gy banzu se cikre je surla •i ku'i lo nu gy binxo lo cikna cu simlu fi gy fe lo ka se rinka lo nu sutra stapa jo'u lo sance be lo nu da ralci gasnu lo nu ganlo fa lo vorme be lo rinsa kumfa •i lo dikca gusni pe to'o lo klaji cu va je vu kandi se minra lo kumfa drudi jo'u lo galtu pagbu be lo nilce •i ku'i lo dizlo noi la .gregor. ke'a zvati cu manku •i gy fau lo nu juxre pencu fi lo te ganse noi gy nau cilre lo nu gy te vamji cu masno cpare lo loldi lo vorme te zu'e lo nu zgana lo nu ma kau pu fasnu bu'u vy •i lo zunle mlana be gy cu simsa lo pa mei je clani ke kanro ve xrani noi to'e pluka lacpu gy gi'e rinka lo nu gy bilga lo nu na'e lanxe cadzu fi lo re linji be lo tuple be gy •i za'a pa lo cmalu tuple cu jursa se xrani ca lo cerni fasnu to lo nu pa po'o tuple cu se xrani cu na ru'e simlu lo ka censa makfa toi gi'e jmive claxu se lacpu •i gy ca lo nu to'e cliva lo vorme cu sanji lo nu da poi ke'a gy xlura ke'a cu panci lo ka'e se citka •i ti se zvati lo baktu poi culno lo titla ladru poi lo spisa be lo nanba cu fulta ke'a •i gy na ru'e klaku fi lo nu gleki •i ki'u bo gy nau xagji se mau lo nu no'a ca lo cerni •i gy zi setca lo stedu lo ladru fe'e co'u na'e ru'e bo lo gapru be lo kanla •i ku'i gy ba zi vimcu ra fau lo nu badri •i ge po'o nai lo nu citka cu nandu gy ri'a tu'a lo ralci ke zunle mlana to gy kakne lo nu citka kei va'o lo po'o nu pi ro lo xadni cu nandu vasxu sidju toi gi ji'a
lo ladru noi pu ro roi traji lo ka pluka gy zi'e noi la'a lo mensi mu'i la'e di'u cu bevri cu nau na pluka gy •i gy fau lo nu na ru'e se rigni cu cliva lo baktu gi'e cpare xruti lo midju be lo kumfa ni'o bu'u lo ralju kumfa sei la .gregor. pa'o lo fenra be lo vorme cu viska se'u lo gapci te gusni cu cikna · i lo patfu ca lo ca tcika cu ta'e voksa tcidu se va'u lo mamta gi'e su'o roi go'i se va'u lo ji'a mensi vau lo vanci karni · i ku'i no sance cu nau se tirna · i ju'o cu'i lo tai tcaci poi nu cladu voksa tcidu zi'e noi lo mensi cu ro roi xatra skicu cu mulno se cirko ca lo purci lamji temci · i ro da ca'o smaji ru'u gy to'e ki'u nai lo nu ju'o lo zdani cu na kunti · i lu ua lo lanzu cu surla jmive sei la .gregor. cu sevzi cusku li'u · i gy ca lo nu stodi catlu lo manku poi crane gy cu mutce jgira lo nu pu kakne lo nu dunda fi lo rirni jo'u lo mensi fe lo nu xabju lo tai melbi zdani · i ku'i ma ba fasnu va'o lo nu da'i lo cabna cu betri fanmo lo nu surla jo'u lo nu se xamgu jo'u lo nu se mansa · i la .gregor. te zu'e lo nu na pensi lo simsa cu cuxna lo nu co'a muvdu gi'e ru'i cpare fi ro da ve'a lo kumfa
ni'o pa roi lo clani ke nicte murse lo cmalu te sepli cu binxo lo kalri bu'u pa lo mlana vorme .e ba bo lo drata •i lo re te sepli cu zi xruti lo ka ganlo •i la'a da nitcu lo nu klama lo nenri kei gi'e ku'i mutce senpi • i ba bo la .gregor. cu zvati lo crane be lo vorme be lo ralju kumfa fau lo nu ba'o jdice lo nu gasnu lo nu klama fa lo senpi vitke lo nenri •i gy djica lo nu do'a nai facki lo du'u ra mo kau •i ku'i lo vorme cu na za'u re'u binxo lo kalri •i la .gregor. cu prali claxu denpa •i ca lo pu cerni
ca lo nu lo vorme cu stela ganlo zo'u ro da djica lo nu klama lo nenri be lo gy kumfa •i nau ku ca lo nu ge gy ba'o gasnu lo nu kalri fa lo vorme gi ju'o lo drata vorme cu gau binxo lo kalri ca lo donri zo'u no da ti klama •i ji'a lo ckiku cu ba'o se setca fi lo stela to'o lo bartu ni'o ca lo lerci nicte lo te gusni cu gau binxo lo cando bu'u lo ralju kumfa · i nau frili fa lo nu birti lo du'u lo rirni jo'u lo mensi cu ze'a pu ca'o stali · i ki'u bo kakne lo nu prane tirna lo nu lo ci mei cu nau ralci cadzu cliva · i ja'o la'a no da co'u lo balvi lamji cerni cu ba klama lo nenri be lo kumfa pe la .gregor. · i gy kakne lo nu pilno lo mutce temci lo nu pensi se cau lo nu da fanza kei lo nu ta'i ma kau za'u re'u ganzu lo gy nu jmive · i ku'i lo galtu drudi kumfa noi simlu lo ka kunti zi'e noi gy bilga lo nu ca'o vreta lo loldi be ke'a cu se terpa gy · i gy fliba lo nu facki lo du'u ma kau rinka la'e di'u · i ki'u bo gy pu xabju lo kumfa ze'a lo nanca be li mu · i gy fau lo nu xadba na'e sanji gi'e milxe ckeji cu sutra klama lo cnita be lo sfofa · i lo calku cu milxe se tagji · i je na kakne lo nu lafti lo stedu · i ku'i gy zi mutce kufra gi'e xenru lo po'o nu lo xadni be gy cu dukse lo ka ganra kei lo nu mulno cnita lo sfofa
ni'o gy ti stali ze'a pi ro lo nicte •i gy pagbu pagre ri fau lo nu jinru lo nu xadba sipna noi lo nu xagji cu so'i roi suksa lebna gy ke'a •i je pagbu pagre fau lo nu jbini lo raktu jo'u lo cfipu se pacna •i ro la'e di'u bevri gy lo nu jinvi lo du'u .e'i gy nau surla tarti gi'e gasnu si'u lo nu lo lanzu cu mutce xendo kei lo nu ly renvi lo fanza poi la .gregor. fau lo cabna se tcini cu na kakne lo nu rivbi lo nu cupra ke'a
ni'o ca lo clira cerni ca lo za'o na ru'e nicte zo'u la .gregor. kakne lo nu cipra fi lo pu zi se jdice •i lo mensi noi na'e ru'e mulno dasni cu gasnu lo nu kalri fa lo vorme be lo rinsa kumfa kei gi'e kucli catlu lo nenri •i my na'e zi facki tu'a gy •i ku'i my ca lo nu facki lo du'u gy cnita lo sfofa to .o'u nai ia gy zvati da •i ju'o na vofli cliva toi cu tai terpa ja'e lo nu my fau lo nu na kakne lo nu sevzi jitro cu gasnu to'o lo bartu lo nu xruti ganlo fa lo vorme •i ku'i my tai lo nu xenru cu zi za'u re'u gasnu lo nu kalri kei gi'e ralci cadzu klama lo nenri tai lo nu gy jursa bilma gi'a fange •i la .gregor. cu ba'o gasnu lo nu crane fa lo stedu fe'e co'u lo na ru'e korbi be lo sfofa kei gi'e zgana my •i .a'u xu my ba sanji lo nu gy na lebna lo ladru gi'e co'e ki'u nai lo nu claxu lo nu xagji •i xu my ba bevri lo drata cidja poi mapti zmadu •i va'o lo nu da'i my na sevzi sanji zo'u la .gregor. cu cuxna ge lo nu gy binxo lo morsi ri'a lo nu xagji gi nai lo nu gy gasnu lo nu my jundi la'e di'u •i to'e mu'i nai bo gy mutce djica lo nu cliva lo cnita be lo sfofa gi'e renro gy lo jamfu be lo mensi gi'e pikci my lo nu my bevri lo xamgu be fi lo ka se citka •i ku'i lo mensi cu se spaji zgana lo culno baktu noi pi so'u lo ladru cu ba'o farlu lo sruri be ke'a •i my lafti lebna lo baktu lo loldi se pi'o ge nai lo xance gi lo bukpu gi'e bevri lo baktu lo bartu •i la .gregor. cu mutce kucli lo du'u my ba basti bevri ma kau kei gi'e vrici sruma •i gy na smadi lo du'u lo xendo mensi cu ca'a zukte ma kau •i my te zu'e lo nu cipra lo ka ma kau kukte ce'u kei gy cu bevri lo so'i te cuxna noi preja punji ke'a lo to'e cnino karni •i lo xadba fusra stagi •i lo bongu noi festi lo vanci sanmi gi'e se sruri lo blabi sanso noi ba'o
binxo lo jdari •i lo so'o makcu ke se vanju grute jo'u lo so'o narge •i lo cirla noi la .gregor. pu za lo djedi be li re cu skicu ke'a fo lo ka na'e ka'e se citka •i lo nanba spisa •i lo drata ke nanba spisa noi se cpana lo matne jo'u lo silna •i ji'a my jmina lo bi'u nai baktu noi la'a co'a lo cabna cu se dimna la .gregor. zi'e noi vasru lo djacu •i my mu'i lo nu xendo gi'e djuno lo du'u la .gregor. na ba citka ca'u my cu zi cliva gi'e ji'a sai pilno lo ckiku te zu'e lo nu la .gregor. cu sanji lo nu gy kakne lo nu tai surla se kai lo ka se djica •i lo cmalu tuple be la .gregor. cu xanka ca lo nu binxo lo jibni be lo nu citka •i za'a lo ve xrani cu ba'o mo'u kanro binxo •i ki'u bo gy ganse no sai lo fanza •i gy manci gi'e pensi lo nu gy pu za lo masti cu xrani katna lo degji noi pu zi lo djedi be li re cu za'o mutce cortu •i lu xu mi nau mleca ganse sei gy pensi li'u ni'o gy carmi sakci lo cirla noi pu zi traji lo ka vlipa trina gy · i gy fau lo nu lo kanla cu klaku lo dirgo lo ka gleki cu porsi je sutra citka lo cirla jo'u lo stagi jo'u lo sanso · i zu'u nai lo vifne cidja cu na kukte gy · i ji'a sai gy na kakne lo nu renvi lo panci be ra kei gi'e gasnu lo nu milxe darno fa lo se citka se djica · i lo mensi za ba lo nu gy mo'u citka gi'e stali lo ka vreta lo mintu diklo cu gasnu fi'o se sinxa lo nu .e'i gy cliva kei lo nu masno carna fa lo ckiku · i la'e di'u rinka lo nu gy se jenca kei to'e ri'a nai lo nu gy xa'o xadba sipna · i gy sutra lo nu mipri ni'a lo sfofa · i ku'i nandu gy fa lo nu stali lo cnita be lo sfofa ze'a lo ji'a sai tordu temci poi lo mensi cu zvati lo kumfa · i ki'u bo ri'a lo mutce
cidja lo betfu cu milxe punli •i je bo gy ja'a ru'e kakne lo nu vasxu ve'i lo cmalu canlu •i gy fau lo so'o nu na kakne lo nu vasxu cu viska se pi'o lo milxe punli kanla lo nu lo mensi noi se xanri no da pe la'e di'u cu vimcu se pi'o lo burcu ge po'o nai lo te vimcu gi ji'a lo cidja poi la .gregor. na pu pencu zi'e noi simlu lo ka xa'o na ka'e se pilno •i my sutra renro ro da lo nenri be lo baktu noi my pilno lo mudri gacri lo nu by ganlo •i ba bo my bevri ro da lo bartu •i la .gregor. ba lo nu my carna cu zi cliva lo cnita be lo sfofa gi'e tisna gi'e preja ni'o ta'i la'e di'u la .gregor. cu ta'e te dunda lo djedi cidja · i go'i pa roi lo cerni ca lo nu lo rirni jo'u lo selfu nixli cu za'o sipna · i re re'u go'i ba lo midju donri sanmi ki'u lo nu ge lo rirni cu ze'i sipna gi lo mensi cu minde lo selfu nixli lo nu klama da · i ju'o lo rirni na djica lo nu la .gregor. cu binxo lo morsi ri'a lo nu xagji · i ku'i ju'o cu'i na kakne lo nu renvi lo nu facki fi lo citka tcaci be gy fe lo zmadu be lo se cusku be lo mensi · i ju'o cu'i lo mensi cu djica lo nu bandu lo rirni lo cmalu se betri kei mu'i lo nu je'u ry lifri lo banzu
ni'o la .gregor. na djuno lo du'u da cusku ma kau lo mikce jo'u lo ckiku certu te zu'e lo nu gau cliva lo zdani ca lo pa moi cerni •i lo nu no da kakne lo nu jimpe gy cu rinka lo nu no da .e nai ji'a sai lo mensi cu jinvi lo du'u gy ja'a kakne lo nu jimpe lo drata •i gy ca lo nu lo mensi cu zvati lo gy kumfa cu bilga lo nu se mansa lo nu tirna lo nu my so'o roi cu vasxu cmoni gi'e pikci lo censa prenu •i ba ku po'o ca lo nu gy milxe se tcaci ro da to li'a na ka'e jinvi lo du'u gy ba mulno se
tcaci toi zo'u gy su'o roi kavbu lo pinka noi xendo se cupra gi'a simlu lo ka co'e •i lu tu ja'a se kukte ca lo cabna djedi li'u se cusku my ca lo nu la .gregor. cu ba'o mutce citka •i va'o lo fapro noi zenba lo ka cafne zo'u my ta'e na'e ru'e badri cusku lu ro da te vimcu ca lo cabna djedi li'u ni'o la .gregor. cu cpacu no nuzba ta'i lo sirji gi'e ku'i tirna su'o da poi se krasi lo lamji kumfa · i gy ca lo nu pa roi tirna lo voksa cu zi bajra fa'a lo mapti vorme gi'e mulno xadni binxo lo tagji be ri · i ca lo pa moi temci no nu casnu to · i'a mipri toi cu na srana gy tai da · i ze'a lo djedi be li re cu tirna ca lo sanmi lo nu casnu lo du'u .ei da nau tarti ma kau · i ku'i ca lo ji'a jbini be lo sanmi cu casnu lo mintu · i ro roi ku su'o re lo se lanzu cu zvati lo zdani · i ju'o no da djica lo nu kansa no da lo nu zvati · i ji'a na sai cumki fa lo nu curmi lo nu no da zvati lo zdani · i ca lo ba'e pa moi djedi lo selfu nixli noi na mulno klina ri'i la .gregor. fa lo du'u ke'a djuno ma kau lo pu fasnu cu cidni cpana pikci lo mamta lo nu zi co'u se jibri · i ba zi lo cacra be li fi'u vo lo selfu nixli cu cliva fau lo nu lo kanla cu klaku kei gi'e ckire fi lo nu co'u se jibri kei tai tu'a lo xamgu traji se zukte · i lo selfu nixli se cau lo nu da cpedu cu junri nupre lo du'u cusku no da su'o da
ni'o lo mensi jo'u lo mamta cu nau bilga lo nu jukpa •i ku'i la'e di'u na rinka lo mutce se gunka •i ki'u bo da ja'a ru'e citka •i la .gregor. cu so'i roi tirna lo nu da stidi lo nu citka kei lo drata •i ro roi spuda fi lu be'u nai ki'e li'u .a lo simsa •i ju'o cu'i ji'a pinxe no da •i lo mensi cu
preti cusku fi lo patfu fe lo se du'u xu kau djica lo nu pinxe lo birja •i my su'o roi xendo friti lo nu my klama te zu'e lo nu bevri by ti •i lo patfu cu stali lo ka smaji •i lo mensi cu jmina cusku te zu'e lo nu lo patfu na senpi kei lo se du'u zu'u nai my kakne lo nu minde lo vorme ninmu •i ro mai lo patfu cu spuda cusku lo vlipa me zo nai •i ja'e bo na za'o casnu lo cuntu ni'o ca lo pa moi djedi lo patfu cu ciksi fi ge lo mamta gi ji'a lo mensi fe lo jdini tcini jo'u lo se kanpe · i py cu so'o roi cliva lo jubme gi'e lebna lo se papri .a lo notci cukta lo cmalu ke stela tanxe noi py ralte bandu ke'a lo nu lo jdini cuntu be py cu spofu pu za lo nanca be li mu · i gy tirna lo nu py gasnu lo nu kalri fa lo pluja stela gi'e xruti ganlo ba lo nu to'e setca lo se sisku · i lo ve ciksi be fo lo patfu cu pa moi lo pluka se tirna be la .gregor. co'a lo nu rinju · i la .gregor. pu krici lo du'u lo patfu cu ralte no da pe lo spofu cuntu · i zu'u lo patfu na pu cusku da · i je zu'u nai la .gregor. na pu te preti · i ca lo pu cabna la .gregor. cu se raktu lo nu zukte ro cumki lo nu lo lanzu cu zi to'e morji lo jdini betri noi rinka lo nu ro se lanzu cu jinru lo nu mulno to'e pacna · i gy co'a gunka se kai lo ka steci carmi · i gy ze'i lo nicte bi'i cerni cu farvi fi lo sampu se jibri fe lo litru vecnu noi li'a mutce drata kakne lo nu jerna lo jdini zi'e noi lo jibri se snada ta'i lo nu pleji cu zi binxo lo sligu jdini noi kakne lo nu se punji fi lo cpana be lo jubme bu'u lo zdani ca'u lo manci je gleki lanzu · i la'e di'u xamgu temci gi'e na rapli se kai do'a nai lo tai carmi · i ku'i la .gregor. cu jerna lo banzu
be lo nu sarji lo lanzu nu jdini pilno •i ge lo lanzu gi la .gregor. ba'o binxo lo se tcaci be la'e di'u •i da ckire fi lo nu te dunda lo jdini •i gy se pluka lo nu dunda •i ku'i la'e di'u xa'o na dirce lo steci glare •i lo po'o mensi cu za'o cinmo jorne la .gregor. •i gy mipri platu lo nu gasnu lo nu my ca lo balvi lamji nanca cu ve ckule fi lo zgike •i gy na jundi lo barda jdima noi ru'a lanxe se fapro ta'i da •i ki'u bo my noi frica la .gregor. lo ka no'a cu mutce lo ka prami lo zgike kei gi'e cinmo kelci lo jgita •i lo zgike ckule cu se casnu gy jo'u my so'i roi lo nu la .gregor. cu ze'i zvati lo tcadu •i ku'i go'i tai lo nu melbi se senva gi'e na'e ka'e se zukte •i lo rirni na nelci lo nu tirna lo ji'a sai tai sampu kanpe se cusku •i ku'i la .gregor. cu jdice pensi la'e di'u gi'e platu lo nu junri gasnu lo nu djuno kei ca lo xriso jbena nicte ni'o lo tai se pensi noi no da prali fi ke'a va'o lo cabna tcini be gy cu pagre lo stedu be gy ca lo nu gy stali lo lamji be lo vorme gi'e tirna · i gy ri'a lo nu tatpi cu su'o roi na za'o kakne lo nu tirna kei gi'e sevzi darxi lo stedu lo vorme · i ba zi bo ku'i gy xruti lafti lo stedu ki'u lo nu lo ji'a sai cmalu savru noi la'e di'u cupra cu re'o se tirna gi'e rinka lo nu ro da binxo lo smaji · i lu .a'u tu zukte ma li'u cu ba zi se cusku lo patfu fa'a li'a lo vorme · i ba bo ca'o di'a ranji fa lo nu casnu poi pu se dicra
ni'o ta'i la'e di'u la .gregor. cu mulno facki to lo patfu cu ta'e so'i roi ciksi •i ki'u bo ge zu'u py mi'u ze'u pu na sazri lo tai cuntu gi zu'u nai lo mamta cu na jimpe ro da ca lo krefu be fi li pa toi lo du'u to'e ki'u
nai lo betri cu za'o stali fa lo cmalu se ricfu •i lo ve zivle noi pu ca'o na se pencu cu milxe zenba ze'a lo temci •i ji'a lo jdini poi la .gregor. ke'a pu bevri ca ro masti lo zdani to gy ralte lo rupnu be li so'u po'o toi cu na mulno se xaksu gi'e ba'o binxo lo cmalu se zivle •i la .gregor. ti'a lo vorme cu zanru frumu fau lo nu gleki lo nu pensi lo balvi gi'e ralte poi gy na pu se kanpe •i je'u la .gregor. cu pu ka'e pilno lo ve vimcu jdini lo nu ca'o pleji lo se dejni be lo patfu bei lo ralju •i je lo detri be lo nu uo kakne lo nu cliva lo jibri cu da'i zenba lo ka jibni •i ku'i ju'o nau zmadu fi lo ka xamgu kei fa lo nu lo patfu cu pu ganzu ta'i la'e di'u ni'o ku'i lo jdini cu na mulno banzu lo nu lo lanzu cu jmive fi'o sabji lo ve zivle · i ju'o cu'i banzu lo nu sarji lo lanzu ze'a lo nanca be li pa ji'i re do'a · i tu'a li za'u na cumki · i ja'o .ei lo jdini cu na se pencu gi'e se ralte te zu'e lo te nitcu · i .ei lo jmive jdini cu se jerna · i lo patfu cu kanro nanmu gi'e ku'i xa'o to'e citno gi'e na'e gunka ze'a lo nanca be li mu gi'e na mutce lacri py mi'u lo nu tsali · i py ca'o lo nanca be li mu be'o noi zifre temci pa moi lo py troci jo'u ku'i na'e ferti nu jmive cu mutce zenba lo ka plana kei gi'e ja'e bo binxo lo mutce juxre · i mo fa lo to'e citno mamta · i xu my nau bilga lo nu jerna lo jdini · i my bilma lo nu vasxu se nandu · i lo nu my litru lo zdani cu rinka lo nu my tatpi · i my stali ze'a pa lo re djedi lo ka vreta lo sfofa fau lo nu lo canko cu kalri ki'u lo nu se nandu lo nu vasxu · i xu lo ji'a mensi cu bilga lo nu jerna lo jdini · i my za'o verba li pa ze · i da gleki lo nu kakne lo nu sabji my lo jmive tadji poi my lifri co'u lo cabna zi'e noi
nu melbi dasni gi'e sipna mutce gi'e zdani sidju gi'e pagbu su'o cumla se zdile gi'e ra'u kelci lo jgita •i la .gregor. ca lo nu da casnu lo se nitcu poi nu jerna lo jdini cu cliva lo vorme gi'e renro gy lo lenku skapi sfofa noi lamji lo vorme •i mu'i bo gy carmi xunre binxo ri'a lo nu ckeji gi'e badri ni'o so'i roi ku gy ca'o vreta ze'a pi ro lo nicte gi'e na sai sipna gi'e mosra gy lo sfofa skapi ze'a lo cacra be li so'o · i ja gy na randa lo troci nandu poi nu catke lo stizu fe'e co'u lo canko · i ba bo gy cpare lo canko kajna gi'e catlu fau lo nu cpana lo stizu gi'e se sarji lo canko kei pa'o ri gi'e morji lo nu gy tai ma kau cinmo lo ka zifre kei ca ro nu gy ti pu zvati · i gy ca'o lo temci cu jdika lo ka klina viska lo ji'a sai na'e mutce darno · i gy xa'o na kakne lo nu viska lo ragve spita noi lo nu stodi viska ke'a cu pu se dapma gy · i gy va'o lo nu da'i na prane djuno lo du'u gy xabju re'o la .carlotynctras. noi smaji je ku'i midju be lo tcadu be'o klaji cu ka'e jinvi lo du'u gy viska to'o lo canko lo kunti tumla noi lo grusi tsani jo'u lo grusi dertu cu jmaji ke'a se cau lo ka frica simxu · i lo po'o re krefu be lo nu lo jundi mensi cu viska lo nu lo stizu cu cnita lo canko cu banzu lo nu my co'a la'e di'u ba lo nu ganzu lo kumfa cu ro roi punji lo stizu lo cnita be lo canko gi'e ji'a sai gasnu lo nu lo nenri canko cu stali lo ka kalri
ni'o la .gregor. va'o lo nu da'i kakne lo nu tavla lo mensi gi'e ckire my lo se zukte poi my bilga ke'a se va'u gy cu da'i frili zmadu sarji lo nu my selfu gy •i ku'i da'i nai gy dunku la'e di'u •i je'u lo mensi cu
troci lo nu pluka zenba fa lo to'e pluka tcini •i li'a my zenba lo ka frili snada kei fi'o se fancu lo temci •i ku'i ji'a la .gregor. cu zenba lo ka satci pajni lo tcini •i lo nu ji'a sai lo mensi cu klama lo nenri cu betri gy •i ta'e ku my klama lo nenri gi'e zi sirji bajra fa'a lo canko se cau lo nu denpa lo nu gasnu lo nu ganlo fa lo vorme •i la'e di'u na se fanta lo nu lo mensi cu ro roi jundi lo nu bandu ro da lo jvinu be lo kumfa pe la .gregor. •i my se pi'o lo sutra xance cu gasnu lo nu mulno kalri fa lo canko kei tai lo nu my na kakne lo nu vasxu •i my va'o lo ji'a sai nu mutce lenku cu ze'a stali lo crane be lo canko gi'e condi vasxu •i lo savru je nu bajra cu se jenca la .gregor. re roi ro djedi •i gy ze'a pi ro lo temci cu desku ni'a lo sfofa •i gy prane djuno lo du'u da'i my pluka bandu gy ro la'e di'u va'o lo nu da'i my renvi lo nu stali lo kumfa pe la .gregor. fau lo nu lo canko cu ganlo ni'o lo mensi ca lo krefu za lo masti be li ji'i pa ba lo nu la .gregor. cu binxo to no da steci krinu lo nu lo jvinu be gy cu xa'o se manci my toi cu to'e cliva pu lo se kanpe tcika gi'e facki lo du'u la .gregor. cu catlu pa'o lo canko gi'e cando gi'e je'u se terpa · i la .gregor. na'e se spaji lo nu my na klama lo nenri kei ki'u lo nu gy zunti lo nu my kakne lo nu zi gasnu lo nu kalri fa lo canko · i ku'i my ge po'o nai na klama lo nenri gi ji'a xruti gi'e gasnu lo nu ganlo fa lo vorme · i da'i lo fange cu ka'e jinvi lo du'u la .gregor. pu troci lo nu gunta gi'e batci my · i li'a la .gregor. cu zi mipri gy fo lo cnita be lo sfofa · i ku'i gy bilga lo nu denpa co'u lo donri midju lo nu lo mensi cu xruti · i my simlu lo ka
mutce zmadu lo cnano lo ka dunku •i la .gregor. cu sanji ge lo nu lo jvinu be gy cu za'o je ba ca'o na'e se renvi my gi lo nu my nitcu lo nu my sevzi jitro kei lo nu na bajra cliva ca lo nu viska lo ji'a sai cmalu pagbu be lo gy xadni be'o poi preja lo bartu lo cnita be lo sfofa •i gy te zu'e lo nu bandu my lo ji'a tai jvinu cu bevri lo ckana boxfo fau lo nu ri cpana lo trixe be gy kei lo cpana be lo sfofa to gy nitcu lo cacra be li vo lo nu no'a toi gi'e punji lo boxfo ja'e lo nu ge gy mulno se gacri gi lo mensi na kakne fau lo ji'a sai nu korcu kei lo nu viska gy •i lo mensi va'o lo nu da'i jinvi lo du'u lo boxfo na se nitcu cu zifre lo nu vimcu •i ki'u bo li'a la .gregor. na te mukti lo nu gy sepli kei lo pluka •i ku'i my curmi lo nu lo boxfo cu stali •i ji'a la .gregor. cu smadi ganse lo nu my ckire catlu kei ca lo nu gy milxe je kurji lafti lo stedu te zu'e lo nu viska lo nu tai ma kau lo mensi cu frati lo cnino te ganzu ni'o ze'a lo pa moi djedi be li pa vo lo rirni cu na snada lo nu jdice lo nu klama lo nenri be lo kumfa · i la .gregor. cu so'i roi tirna lo nu ra nau zanru lo se gunka be lo mensi to'e ki'u nai lo nu ra pu fengu my lo nu my simlu lo ka juxre · i ge lo patfu gi lo mamta cu su'o roi denpa fi lo crane be lo kumfa pe la .gregor. ca lo nu lo mensi cu ganzu · i my ca lo nu ba'o cliva cu zi bilga lo nu skicu fo lo tcila fe lo nu ma kau jvinu lo kumfa kei jo'u lo nu la .gregor. pu citka ma kau kei jo'u lo nu gy pu tarti ma kau ca lo ca krefu kei jo'u lo nu xu kau ju'o cu'i ganse lo cmalu nu zenba lo ka kanro · i je'u lo mamta cu zi sa'e nai djica lo nu klama lo nenri te zu'e lo nu viska la .gregor. · i ku'i lo patfu jo'u lo mensi cu fanta · i go'i ca lo cfari se pi'o lo racli se darlu noi la .gregor.
cu mutce jundi tirna ke'a gi'e mutce tugni fi ke'a •i ba bo bapli fanta •i lo mamta cu krixa lu ko curmi lo nu mi klama lo nenri gi'e viska la .gregor. uu noi bersa mi •i xu do na jimpe lo du'u .ei mi klama lo nenri gi'e viska gy li'u •i la .gregor. ca lo nu go'i cu jinvi lo du'u ju'o cu'i xamgu fa lo nu lo mamta cu ja'a klama lo nenri •i li'a .ei na co'e ca ro djedi •i ku'i ja'a co'e pa roi ro jeftu •i my mutce zmadu lo mensi lo ka drani jimpe ro da •i lo mensi to'e ki'u nai lo nu virnu cu verba po'o gi'e la'a binxo lo fuzme be lo tai nandu mu'i lo nu cifnu na'e pensi ni'o lo se djica be la .gregor. be'o poi nu viska lo mamta cu ba zi binxo lo fatci · i gy na'e djica se va'u lo rirni lo nu gy jarco gy pa'o lo canko ca lo donri · i ku'i ji'a gy na kakne lo nu mutce cpare lo loldi noi kurfa mitre be li so'u · i gy nandu renvi lo nu cando vreta ze'a lo nicte · i lo ji'a sai cidja cu zi na se gleki gy · i gy te zu'e lo nu se zdile cu co'a se tcica lo nu cpare fi ro da fe lo bitmu jo'u lo drudi · i gy steci nelci lo nu stali lo ka dandu lo drudi · i la'e di'u mutce frica lo nu vreta lo loldi · i zmadu fi lo ka zifre vasxu · i lo xadni cu milxe slilu · i ca lo nu gy jinru lo nu ga'u na'e ru'e gleki se zdile cu cumki fa lo nu ue farlu gi'e janli lo loldi · i ku'i li'a gy nau jitro lo xadni be gy tai lo mutce frica be lo purci · i je na'e xrani gy fa lo ji'a sai tai nu farlu · i lo mensi cu zi sanji lo cnino zdile poi la .gregor. cu facki · i gy ca lo nu cpare cu cliva ti'a gy lo snipa marji sinxa · i my jdice lo nu dunda fi la .gregor. fe lo barda canlu poi gy kakne lo nu cpare ke'a · i .ai my lebna lo nilce poi fanta la'e di'u zi'e no'u ra'u lo se dacru jo'u lo ciska jubme · i my na
kakne lo nu kansa no da la'e di'u kei gi'e ji'a na darsi lo nu cpedu lo nu lo patfu cu sidju •i ju'o lo selfu nixli na'e sidju ki'u lo nu ny noi nanca li ji'i pa xa cu virnu ia renvi co'a lo nu lo pu jukpa cu cliva kei gi'e ku'i cpedu lo nu zifre lo nu gasnu lo nu ru'i ganlo fa lo jukpa kumfa gi'e co'a kalri va'o lo po'o steci sinxa •i ja'o lo mensi cu kakne no na'e bo lo nu se sidju lo mamta ca lo nu lo patfu na zvati •i lo mamta fau lo nu fenki gleki krixa cu binxo lo jibni gi'e ku'i co'a smaji ca'u lo vorme be lo kumfa pe la .gregor. •i lo mensi cu binxo lo birti be lo du'u ro lo nenri be lo kumfa cu te ganzu •i ba bo my curmi lo nu lo mamta cu klama lo nenri •i la .gregor. cu pu sutra lo nu punji lo boxfo lo dizlo zmadu gi'e polje ra so'i da ja'e lo nu je'u simlu lo ka ba'o cunso se renro fi lo sfofa •i la .gregor. cu rivbi ca lo ca krefu lo nu mipri catlu to'o lo cnita be lo boxfo •i gy bredi lo nu na viska ca lo ca krefu lo mamta kei gi'e se mansa lo nu my klama •i lu .e'e ko ti klama • i na se viska li'u se cusku lo mensi noi na'e senpi ke xance gidva lo mamta •i la .gregor. cu tirna lo nu ta'i ma kau lo re ruble ninmu cu gasnu lo nu muvdu fa lo tilju je to'e citno se dacru fi lo stuzi be ri •i lo mensi cu zukte lo barda traji pagbu be lo se gunka se cau lo nu tirna lo te kajde be fi lo mamta noi terpa lo nu lo mensi cu dukse lo ka nandu troci •i lo se gunka cu clani temci •i lo mamta ba lo nu gunka ze'a lo cacra be li ji'i fi'u vo cu xusra lo du'u .ei da curmi lo nu stali fa lo se dacru ti •i ki'u bo pa mai ta dukse lo ka tilju kei gi'e na ba mo'u se muvdu pu lo nu lo patfu cu xruti •i bo re mai na mulno birti lo du'u lo nu vimcu lo nilce cu xamgu la .gregor. •i lo mamta cu jinvi lo
fapro •i lo jvinu be lo lunbe bitmu cu danre lo risna be my •i ki'u ma la .gregor. na ba mintu cinmo •i gy ze'u se tcaci tu'a lo nilce be lo kumfa gi'e ja'o ru'a ba cinmo bu'u lo kunti kumfa lo ka se cliva ni'o lu · i xu na ku li'u cu to'e cladu se cusku lo mamta noi ro roi to'e cladu bacru tai lo nu djica lo nu rivbi lo nu la .gregor. noi my na se slabu lo satci ke mipri diklo cu tirna lo ji'a sai sance be lo voksa be my · i my traji krici lo du'u gy na jimpe lo valsi · i lu xu na ku lo nu vimcu lo nilce cu simlu lo ka jarco lo nu co'u pacna lo nu gy ba zenba lo ka kanro · i xu na simlu lo ka curmi lo nu gy stali lo dimna be gy se cau lo nu kurji · i pe'i xamgu zmadu fa lo nu troci lo nu lo kumfa cu stali lo pu tcini be ri kei te zu'e lo nu la .gregor. ca lo nu xruti ma'a cu to'e cirko ro da lo pu tcini gi'e frili zmadu kakne lo nu to'e morji lo ca temci li'u
ni'o la .gregor. ca lo nu tirna lo valsi pe lo mamta cu sanji lo nu ju'o ge lo nu remna kansa claxu gi lo nu stodi manfo xabju lo lanzu zdani cu rinka lo nu ca'o lo masti be li re lo nu gy menli stati cu binxo lo kalsa •i no drata cu ka'e ve ciksi lo nu gy pu junri djica lo nu lo kumfa cu binxo lo kunti •i xu je'u gy djica lo nu curmi lo nu da galfi lo glare kumfa noi kufra se nilce lo se cerda be fi lo lanzu ku'o lo kevna poi • i'a zu'u gy kakne lo nu cpare ke'a ro da se cau lo zunti zi'e poi ku'i zu'u nai bu'u ke'a gy zi mulno to'e morji lo gy remna purci •i gy pu'o zi to'e morji •i lo po'o voksa be lo mamta be'o noi gy ze'u pu na tirna cu rinka lo nu gy cikna •i .ei no da se vimcu •i .ei ro da stali •i gy
nitcu fau lo nu se tcini lo cabna kei lo xamgu ve xlura be fo lo nilce •i va'o lo nu lo nilce cu fanta lo nu gy fenki cpare fi lo cunso cu na to'e prali gi'e ja'a ja'e prali •i ku'i .u'u lo mensi cu na tugni •i my se cau nai lo nu jerna cu ba'o binxo lo simlu be lo ka certu be ro cuntu poi srana la .gregor. bei lo rirni •i lo se stidi be lo mamta cu banzu mukti fi lo mensi fe lo nu vimcu ge po'o nai lo se dacru jo'u lo ciska jubme vu'o noi my platu ca lo cfari gi ji'a ro nilce poi na me lo sfofa noi traji se nitcu •i li'a lo nu cifnu xarnu jo'u lo nu sevzi lacri poi na'e se kanpe je nandu jerna cu na se steci lo ka catke my fa'a lo nu cpedu minde la'e di'u •i je'u my zgana lo nu la .gregor. cu nitcu lo barda canlu lo nu cpare •i zu'u nai za'a do'a nai lo nilce na ca'o se pilno ni'o ku'i ju'o cu'i vajni fa lo ji'a fadni ke cinmo carmi se tarti be lo citno nixli · i la .greten. cu se xlura fi lo nu curmi lo nu lo tcini be la .gregor. cu zenba lo ka se terpa · i ta'i la'e di'u la .greten. cu ba kakne lo nu zukte se va'u la .gregor. lo zmadu be lo ca se zukte · i no na'e bo la .greten. cu ba darsi lo nu klama lo nenri be lo kumfa poi la .gregor. po'o cu jitro lo kunti bitmu · i ja'o la .greten. na curmi lo nu lo se jdice be gy cu cenba gau lo mamta noi ki'u lo nu dunku cu simlu lo ka na'e snura cinmo ne'i lo vi kumfa · i lo mamta cu zi binxo lo smaji gi'e sidju lo mensi se kai lo ka tsali mulno kei lo nu lebna lo se dacru · i · i'a la .gregor. va'o lo sarcu cu kakne lo nu claxu lo se dacru · i ku'i .ei lo ciska jubme cu stali · i la .gregor. ba lo nu lo ninmu cu cliva lo kumfa fi'o kansa lo se dacru noi sarji ny fau lo nu ny cmoni cu zi to'e setca lo
stedu lo cnita be lo sfofa te zu'e lo nu jdice lo du'u ta'i ma kau gy kakne lo nu zukte pagbu lo cuntu se kai lo ka prije je racli traji cumki • i ku'i .u'u lo mamta cu pa moi lo xruti ca lo nu la .greten. bu'u lo lamji kumfa cu jgari lo se dacru lo birka lo sruri gi'e kansa be no da catke fa'a je to'o gi'e li'a na snada lo nu ve'i ji'a sai gau muvdu fa ra •i ku'i lo mamta cu na se tcaci lo nu viska la .gregor. •i my ka'e binxo lo bilma fi'o fuzme gy •i ja'o la .gregor. cu xruti cpare gi'e terpa binxo lo darno fa'a lo drata fanmo be lo sfofa •i ku'i gy na kakne lo nu rivbi lo nu lo boxfo cu milxe to'e cando bu'u lo crane •i la'e di'u banzu lo nu rinka lo nu lo mamta cu jundi •i my sisti gi'e ze'i stali lo ka smaji •i ba bo my xruti lo ka kansa la .greten.
ni'o la .gregor. cu rapli cusku fi gy fe lo se du'u ge no na'e fadni cu fasnu gi po'o so'o nilce cu gau cenba lo ka zvati •i ku'i gy ba zi randa jinvi lo du'u lo nu lo ninmu cu so'i roi klama da de gi'e ze'i krixa gi'e gasnu lo nu sakli fa lo nilce lo loldi cu rinka lo nu gy ganse lo barda kalsa noi banro to'o ro da •i gy gasnu lo nu to'e preja fa lo stedu jo'u lo tuple •i ku'i gy traji bilga lo nu randa jinvi lo du'u gy na ba renvi la'e di'u lo clani •i ny ca'o gasnu lo nu lo kumfa cu binxo lo kunti •i ny lebna ro lo dirba be gy •i lo se dacru noi ne'i ke'a gy ralte lo katna jo'u lo drata tutci cu xa'o se vimcu •i ny nau ca'o gasnu lo nu binxo lo kluza fa lo ciska jubme noi ba'o se lasna fi lo loldi zi'e noi bu'u ke'a gy zukte lo se bilga ca lo nu tadni lo vecnu larcu kei jo'u lo nu ve ckule fo lo re moi kei jo'u ji'a sai lo nu ve ckule fo lo pa moi •i na banzu fa lo
temci lo nu gy cipra fi lo re ninmu fe lo ka xu kau zukte fi lo nu xendo • i je'u gy na'e ru'e to'e morji lo nu ny zasti • i ki'u bo ny ri'a lo nu tatpi cu smaji gunka •i gy tirna lo po'o nu to'e kinli stapa fi lo jamfu ni'o ja'o gy suksa klama lo bartu · i lo ninmu cu ca zvati lo lamji kumfa gi'e se sarji lo ciska jubme te zu'e lo nu xruti lo nu cnano vasxu · i gy cu vo roi stika lo farna be lo nu muvdu · i gy na birti lo du'u .ei gasnu lo nu snura fa ma kau · i gy viska fi lo kunti bitmu fe lo pixra be lo ninmu poi se taxfu lo skapi · i gy sutra cpare fi lo galtu gi'e co'a tagji lo pixra noi lo blaci pe ke'a cu se rinju gy gi'e gasnu lo nu gy jdika lo ka jelca cortu lo betfu · i lo do'a nai vi pixra noi la .gregor. cu mulno gacri cu ba se lebna no da · i gy gasnu lo nu lo stedu cu se farna lo vorme be lo ralju kumfa te zu'e lo nu zgana lo ninmu ca lo nu ny xruti
ni'o ny na curmi lo nu ny ze'u denpa gi'e zi xruti •i la .greten. cu jgari lo mamta lo birka lo sruri gi'e na ru'e bevri my •i lu .ei mi'o nau lebna ma li'u se cusku la .greten. fau lo nu catlu lo sruri •i ca bo lo nu gy catlu cu kruca lo nu catlu fa la .gregor. noi zvati lo bitmu •i ju'o lo po'o nu lo mamta cu zvati cu rinka lo nu la .greten. cu stali lo ka surla • i gy gasnu lo nu salpo fa lo flira fa'a lo mamta kei te zu'e lo nu fanta lo nu my catlu lo sruri •i gy desku je se jenca cusku lu .e'u mi'o xruti lo ralju kumfa li'u •i la .gregor. cu klina jimpe lo te zukte be fi la .greten. •i ri djica lo nu bevri lo mamta lo snura diklo gi'e ba bo gasnu lo nu la .gregor. cu cliva lo bitmu •i .e'e troci •i la .gregor. cu platu lo nu stali lo ka cpana lo pixra kei gi'e na randa •i gy bredi lo nu plipe lo flira be la .greten.
ni'o ku'i lo mi'u valsi pe la .greten. cu rinka lo nu xanka fa lo mamta noi muvdu lo mlana gi'e viska lo barda je bunre barna lo xrula pixra pelji •i my pu lo nu sanji lo nu tu poi my viska ke'a cu me la .gregor. cu krixa se pi'o lo rufsu je cladu voksa lu doi cevni doi cevni li'u gi'e farlu lo sfofa •i lo birka be my cu preja tai lo nu my randa cliva ro da •i je my stali lo ka cando •i lu .o'i le'o doi .gregor. li'u cu se krixa lo mensi fau lo nu lafti lo ganlo xance gi'e setca catlu •i di'u co'a lo nu binxo cu pa moi lo valsi poi my sirji cusku ke'a gy •i my bajra fa'a lo lamji kumfa te zu'e lo nu sisku lo jikru poi my kakne lo nu pilno ke'a lo nu gasnu lo nu binxo lo cikna fa lo mamta noi na'e sanji • i la .gregor. ji'a cu djica lo nu sidju to lo temci cu ba banzu lo nu gasnu lo nu snura fa lo pixra toi •i ku'i gy snipa lo blaci gi'e bilga lo nu tsali gasnu lo nu na'e jorne •i ba bo gy ji'a bajra fa'a lo lamji kumfa tai lo nu kakne lo nu stidi da lo mensi tai lo nu pu zu co'e •i ku'i gy bilga lo nu stali lo ka trixe my gi'e zukte no da •i la .greten. ca lo nu xruti carna fau lo nu se sruri lo vrici botpi cu se jenca •i pa lo botpi cu farlu lo loldi gi'e porpi •i lo blaci spisa cu xrani la .gregor. lo flira •i lo slami litki cu flecu fi gy •i la .greten. se cau lo nu denpa cu jgari ro botpi poi gy kakne lo nu bevri ke'a •i je gy bajra fa'a lo se zvati be lo mamta •i gy gasnu lo nu ganlo fa lo vorme kei se pi'o lo jumfa •i la .gregor. cu nau sepli lo mamta noi ju'o cu'i pu'o binxo lo morsi fi'o
fuzme gy •i .ei gy na gasnu lo nu kalri fa lo kumfa •i gy na djica lo nu gasnu lo nu cliva fa lo mensi noi .ei stali lo ka kansa lo mamta •i .ei gy nau denpa po'o •i gy dunku lo se zungi jo'u lo raktu gi'e co'a cpare gi'e cpare ro da no'u lo bitmu jo'u lo nilce jo'u lo drudi •i ro mai gy fau lo nu to'e pacna kei ca lo nu lo kumfa co'a mluni gy cu farlu lo midju be lo barda jubme ni'o la .gregor. cu ba zi mutce tatpi vreta · i ro da cando ru'u gy · i ju'o cu'i la'e di'u xamgu sinxa · i lo janbe cu se sance · i li'a lo selfu nixli cu nenri lo jukpa kumfa · i la .greten. cu bilga lo nu gasnu lo nu kalri · i lo patfu cu to'e cliva · i lu ma pu fasnu li'u cu pa moi lo py valsi · i lo jvinu be la .greten. cu to'e mipri ro da · i la .greten. cu spuda cusku se pi'o lo se zunti voksa to ju'o lo flira be gy cu tagji lo cutne be lo patfu toi lu lo mamta cu binxo lo na'e sanji · i ku'i nau xamgu zmadu · i la .gregor. cu binxo lo na'e rinju li'u · i lu mi pu kanpe sei lo patfu cu cusku · i mi pu so'i roi cusku · i ku'i do doi ninmu no roi jundi li'u
ni'o la .gregor. cu co'a sanji lo nu lo patfu cu srera jimpe lo pindi datni pe la .greten. gi'e sruma lo du'u la .gregor. pu zukte lo vlile •i ja'e bo .ei gy troci lo nu gasnu lo nu surla fa lo patfu •i gy te zu'e lo nu ciksi cu ponse ge nai lo temci gi nai lo nu kakne •i gy sutra bajra fa'a lo vorme be lo gy kumfa gi'e binxo lo tagji be ra te zu'e lo nu lo patfu co'a lo nu klama lo nenri be lo rinsa kumfa cu viska ge lo nu la .gregor. cu zabna platu lo nu zi xruti lo gy kumfa gi lo nu na sarcu fa
lo nu bapli lo nu gy xruti klama •i lo nu gasnu lo nu kalri fa lo vorme cu banzu lo nu gy zi canci ni'o ku'i lo patfu na se tcini lo nu ka'e sanji lo tai ralci tcila · i zo .a'a cu se krixa py ca lo nu klama lo nenri kei se pi'o lo tonga poi jarco lo nu py fengu je ca bo gleki · i la .gregor. cu to'e punji lo stedu lo vorme gi'e lafti ra fa'a lo patfu · i gy na pu kanpe lo nu zgana lo nu lo patfu cu simlu ma kau · i je'u gy ze'a pu jundi lo po'o nu cpare ro da kei gi'e sisti lo nu se cinri tai tu'a lo purci lo cuntu poi fasnu bu'u lo drata pagbu be lo zdani · i je'u .ei gy bredi lo nu facki lo du'u lo tcini cu ba'o cenba · i ku'i ia nai xu tu za'o me lo patfu · i xu me lo mi'u nanmu poi ta'e jinru vreta lo ckana ca lo nu la .gregor. cu vecnu litru · i xu me lo mi'u nanmu poi ca lo vanci poi ca ke'a gy xruti cu rinsa gy fau lo nu dasni lo ckana pastu gi'e zutse lo barda stizu gi'e na kakne lo nu binxo lo sanli kei gi'e po'o lafti lo birka fa'a gy fi'o se sinxa lo nu gleki · i xu me lo mi'u nanmu poi ca'o lo rirci ke kampu nu litru ca ga lo re soldei pe lo nanca gi lo traji vajni ke salci detri cu cadzu bu'u la .gregor. bi'i lo mamta vu'o noi masno cadzu ku'o se kai lo ka masno zmadu ji'a sai kei fau lo nu se gacri lo to'e citno kosta gi'e ro roi kurji punji lo cadzu grana zi'e poi ca lo nu djica lo nu cusku da cu so'a roi sanli stali gi'e gasnu lo nu lo kansa cu jmaji lo sruri be ke'a
ni'o ku'i lo patfu cu nau mutce sirji sanli gi'e dasni lo tinsa je blanu je se batke ke manfo taxfu noi simsa lo se dasni be lo banxa ke se minde prenu •i ga'u lo galtu je tinsa karli pe lo kosta cu balni fa lo
jdari ke cnebo pilka •i ni'a lo culno mebri cu pagre fa lo nu cikna je jundi catlu fa lo xekri kanla •i lo blabi kerfa noi pu kalsa cu nau cnici lo ka komcu ke sirji se ganzu fi lo carmi je satci •i py bargu renro lo mapku noi bu'u ke'a cu ba'o jivbu lo solji skari sinxa be la'a lo banxa ku'o lo cpana be lo sfofa pa'o lo kumfa •i py klama la .gregor. fau lo nu se fanza se flira •i lo jipno be lo kosta cu trixe •i lo xance cu nenri lo daski be lo palku ni'o la'a py ji'a sai na djuno lo du'u py ba zukte ma kau · i ku'i py lafti lo jamfu fe'e co'u lo na'e fadni galtu · i la .gregor. cu manci lo nu tai mutce barda fa lo cutci cnita · i ku'i la .gregor. cu na stali lo ka cando · i gy co'a lo pa moi djedi pe lo cnino nu jmive cu djuno lo du'u lo patfu cu jinvi fi gy fe lo du'u mapti fa lo po'o traji jursa · i gy bajra ca'u lo patfu · i gy sisti ca lo nu py sisti · i gy di'a sutra muvdu ca lo nu py muvdu · i tai so'i roi litru lo kumfa se cau lo nu da se jdice fasnu · i la'e di'u na simlu lo ka nu jersi · i ki'u bo masno litru · i la .gregor. cu stali lo loldi mu'i lo nu gy terpa lo nu lo patfu cu jinvi lo du'u steci palci fa lo nu gy cpare lo bitmu .a lo drudi · i zu'u nai la .gregor. bilga lo nu randa jinvi lo du'u gy na ba renvi fi lo mutce fe lo nu bajra · i ki'u bo gy ca lo nu lo patfu cu pa roi stapa cu bilga lo nu gasnu lo ci'i nu muvdu
ni'o gy co'a nandu vasxu •i je'u gy pu ji'a na se fepri lo se lacri •i gy ca lo nu slilu te zu'e lo nu bredi lo nu bajra cu ja'a ru'e ckaji lo ka lo kanla cu kalri •i gy fau lo nu se cfipu cu pensi no cumki poi drata lo
nu bajra •i gy na ru'e to'e morji lo nu gy ka'e pilno lo bitmu noi ku'i je'u se zunti lo nu ke'a se balni lo kojna je jipno culno •i ca bo lo ruble se renro cu farlu lo jibni be gy gi'e gunro lo crane be gy •i ra plise •i lo drata cu zi jersi •i la .gregor. cu cando ri'a lo nu terpa •i lo nu di'a bajra cu na'e te prali ki'u lo nu lo patfu ba'o jdice lo du'u renro gunta ni'o lo patfu cu pu gasnu lo nu culno fa lo daski lo grute noi se krasi lo grute vasru poi cpana lo lamji jubme · i py renro lo plise ce'o lo plise se cau lo nu nau do'a nai satci farna troci · i lo cmalu je xunre plise cu gunro lo loldi tai lo nu se dikca kei gi'e simxu lo ka janli · i pa lo plise noi ruble se renro cu pencu lo trixe be la .gregor. gi'e ku'i sakli se cau lo nu xrani · i ku'i lo drata poi zi jersi cu binxo lo jinru be lo trixe be la .gregor. · i gy djica lo nu di'a binxo lo darno kei tai lo nu da'i lo nu gy cortu cu ba jdika ca lo nu gy cenba lo ka zvati ma kau · i ku'i gy simsa lo dinko se lasna gi'e mulno se cfipu preja · i gy ca lo nu ro re'u catlu cu snada lo nu viska lo nu lo vorme be lo gy kumfa cu binxo lo mulno kalri · i ca'u lo mensi noi krixa cu bajra cliva fa lo mamta noi dasni lo nenri skaci ki'u lo nu lo mensi cu pu gasnu lo nu na'e dasni fa lo mamta te zu'e lo nu sabji lo vacri ca lo nu za'o na'e sanji · i gy viska lo nu lo mamta cu bajra fa'a lo patfu gi'e ca'o ve'a cirko lo to'e se lasna ke nenri skaci gi'e jai se zunti tu'a ri gi'e farlu lo cpana be lo patfu gi'e jgari je tagji py to la .gregor. co'a fliba lo nu viska toi gi'e pikci py fau lo nu lo xance cu kruca simxu ti'a lo stedu kei lo nu py fraxu curmi lo nu la .gregor. cu jmive
ni'o ci mo'o
ni'o lo jursa ve xrani be la .gregor. noi renvi lo nu cortu ze'a lo masti be li za'u pa to lo plise cu stali lo ka jinru lo rectu kei tai tu'a lo se viska se morji ki'u lo nu no da darsi lo nu vimcu toi cu simlu lo ka rinka lo nu morji fa lo ji'a sai patfu lo du'u la .gregor. to'e ki'u nai lo ca badri jo'u rigni tarmi cu cmima lo lanzu gi'e .ei na lifri lo nu da tarti tai lo nu gy bradi •i lo lanzu cu bilga lo nu renvi lo rigni gi'e randa lo funca •i randa po'o •i zu'u la .gregor. ri'a lo ve xrani cu la'a mo'u cirko lo ka certu lo ka muvdu •i gy nitcu tai tu'a lo na'e kakne to'e citno lo clani mentu be li so'o lo nu pagre lo kumfa •i na'e ka'e pensi ji'a sai lo nu cpare lo galtu •i ku'i zu'u nai gy se cnemu fi lo xlali zenba tcini lo banzu se pleji •i ta'e ca lo vanci lo vorme be lo ralju kumfa noi gy co'a jundi zgana pu za lo cacra be li re cu gau binxo lo kalri •i ja'e bo gy fau lo nu vreta bu'u lo gy manku kumfa gi'e na se viska to'o lo ralju kumfa cu kakne lo nu viska lo lanzu lo se gusni jubme gi'e tirna lo nu ra casnu kei fau lo nu ro da curmi no'u va'i lo mulno frica be lo purci tadji ni'o li'a lo ca nu casnu cu na simsa lo pu zu nu casnu poi la .gregor. bu'u lo xotli kumfa cu pu ta'e milxe badri pensi ke'a ca lo nu tatpi vreta lo cilmo milxe ckana · i lo temci cu so'e roi pagre fau lo nu smaji · i lo patfu cu zi binxo lo sipna bu'u lo stizu ba lo vanci sanmi · i lo mamta jo'u lo mensi cu simxu lo ka stidi lo nu smaji · i lo mamta noi salpo ni'a lo gusni cu fenso lo ralci taxfu se va'u lo dasni zarci · i lo
mensi noi pu co'a se jibri lo nu vecnu selfu cu tadni ca lo vanci lo tordu ciska tadji jo'u lo fraso bangu te zu'e lo nu ju'o cu'i ba za cpacu lo xamgu zmadu jibri •i lo patfu cu su'o roi binxo lo cikna •i je tai lo nu na djuno lo du'u pu zi sipna cu cusku fi lo mamta fe lu do mutce fenso ca lo ji'a ca djedi li'u gi'e zi xruti lo ka sipna kei ca lo nu lo mamta jo'u lo mensi cu simxu lo ka ce'u cisma fa'a ce'u ni'o lo patfu mu'i lo klesi be lo nu xarnu cu jdari lo nu vimcu lo manfo taxfu ca lo nu zvati lo zdani · i lo ckana pastu cu na'e se pilno dandu lo genxu ca lo nu lo patfu cu milxe sipna bu'u lo stizu fau lo nu mulno dasni tai lo nu ge ro roi bredi lo nu selfu gi kanpe bu'u lo ji'a sai zdani tu'a lo voksa be lo ralju · i ja'e bo lo manfo taxfu noi ca lo cfari cu xa'o na citno cu co'a binxo lo to'e jinsa to'e ri'a nai lo nu kurji fa lo mamta jo'u lo mensi · i cafne fa lo nu la .gregor. ze'a lo mulno vanci cu catlu lo carmi taxfu noi mulno se barna zi'e noi lo solji skari batke cu ro roi jinsa zi'e noi lo to'e citno nanmu cu dasni be ke'a sipna fau lo nu na'e kufra mutce gi'e ku'i surla
ni'o lo mamta ca lo nu lo junla cu jarco li pa no cu troci lo nu gasnu se pi'o lo na'e cladu voksa lo nu lo patfu cu cikna kei gi'e xlura py lo nu klama lo ckana •i ki'u bo lo cabna cu na me lo jetnu nu sipna poi lo patfu cu nitcu ki'u lo nu py co'a gunka ti'u li xa pe lo cerni •i ku'i py se kai lo ka xarnu poi se ckaji py co'a lo nu se minde cu na sisti lo nu stali ze'a lo zmadu lo ka zvati lo jubme to'e ki'u nai lo nu py ta'e binxo lo sipna •i lo nu nandu troci cu sarcu lo nu xlura py lo nu canja lo
stizu lo ckana •i py to'e mu'i nai lo nu lo mamta jo'u lo mensi cu na sisti lo nu milxe pante ze'a lo cacra be li fi'u vo cu masno se desku lo stedu gi'e ralte lo kanla lo ka ganlo kei gi'e na binxo lo sanli •i lo mamta cu lacpu py lo birka fau lo nu cusku lo xendo valsi •i lo mensi cu cliva lo se gunka te zu'e lo nu sidju lo mamta •i ku'i la'e di'u na se jalge ri'i lo patfu •i py zenba lo ka condi jinru lo stizu •i py ca po'o lo nu lo re ninmu cu jgari py lo cnita be lo janco cu gasnu lo nu kalri fa lo kanla kei gi'e catlu lo mamta jo'u lo mensi gi'e ta'e cusku lu .oi ti nu jmive •i .oi ti tadji lo nu surla ca lo mi ro moi djedi li'u •i py se sarji lo re ninmu gi'e tilju binxo lo sanli tai lo nu py mi'u cu traji lo ka tilju kei lo se bevri be py •i py curmi lo nu lo ninmu cu bevri py lo vorme noi bu'u ke'a py zbasu lo sinxa be lo nu py na nitcu ny gi'e kansa no da lo nu di'a klama •i ca bo lo mamta jo'u lo mensi cu sutra cliva lo te fenso jo'u lo penbi te zu'e lo nu bajra fa'a lo patfu gi'e za'o sidju py ni'o ma pe lo lanzu noi se xaksu lo nu gunka zi'e noi randa lo nu tatpi cu ka'e ponse lo temci poi banzu lo nu kurji la .gregor. · i lo lanzu jdini cu ca'o jdika · i lo selfu nixli cu co'u se jibri · i lo sidju ninmu noi barda mutce gi'e bongu ricfu gi'e se kerfa lo blabi je kalsa cu co'a klama ca lo cerni jo'u lo vanci gi'e gunka lo tilju traji · i lo drata noi se jmina fi lo nu mutce fenso cu se gunka lo mamta · i ji'a sai lo so'o lanzu jemna noi lo mamta jo'u lo mensi cu pu gleki dasni ke'a ca lo nu jikca jmaji jo'u lo nu salci zo'u bilga lo nu vecnu · i la .gregor. cu facki la'e di'u ca lo vanci ra'i lo nu casnu lo jdima poi se cpacu · i ku'i lo traji
se pante cu nu na kakne lo nu cliva lo vi zdani noi dukse lo ka barda kei lo ca tcini •i mu'i bo na djuno lo du'u ta'i ma kau gasnu lo nu muvdu fa la .gregor. •i ku'i la .gregor. cu jimpe lo du'u lo nu jundi gy cu na se steci lo ka fanta lo nu muvdu •i ki'u bo da'i frili fa lo nu bevri gy se pi'o lo mapti tanxe poi se kevna lo re mei te zu'e tu'a lo vacri •i lo pa moi be lo nu fanta lo nu lo lanzu cu canja lo zdani cu nu mulno to'e pacna gi'e si'o lo lanzu cu ba'o se darxi fi lo betri poi dunli no da bu'u lo girzu be lo lanzu jo'u pendo ckini ni'o ro se cpedu be lo munje bei lo pindi prenu cu mulno te mansa fi lo lanzu · i lo patfu cu bevri lo cerni sanmi lo to'e ralju se jibri be lo banxa · i lo mamta cu sevzi friti se va'u lo taxfu be lo fange prenu · i lo mensi noi se minde lo te vecnu cu fa'a je to'o bajra ti'a lo vecnu kajna · i ku'i lo ka tsali pe lo lanzu cu xa'o ba'o se xaksu · i lo trixe ve xrani cu za'u re'u co'a se cortu la .gregor. tai lo nu pu zi se lifri · i ca bo lo mamta jo'u lo mensi ba lo nu gasnu lo nu klama fa lo patfu lo ckana cu xruti gi'e mlana cliva lo se gunka gi'e binxo lo jibni simxu gi'e lamji simxu zutse · i ca bo lo mamta cu jarco fa'a lo kumfa pe la .gregor. gi'e cusku lu ko gasnu lo nu ganlo fa lo vorme doi .greten. li'u · i la .gregor. cu za'u re'u zvati lo manku · i ca bo lo re ninmu cu ne'i nai gasnu lo nu mixre lo ny se klaku kei gi'a po'o stodi catlu lo jubme se cau lo nu klaku
ni'o la .gregor. cu pagre lo nicte jo'u lo donri se cau nai ru'e lo nu sipna •i gy su'o roi pensi lo du'u gy ca lo balvi lamji krefu be lo nu lo
vorme cu binxo lo kalri cu fuzme zukte lo cuntu be lo lanzu tai tu'a lo purci •i za'u re'u to'e canci lo gy menli ba zu lo mutce fa lo ralju jo'u lo krati jo'u lo vecnu se jibri jo'u lo vecnu cilre jo'u lo se minde nanla poi tordu lo ka gusni ku'o jo'u lo re ji'i ci drata kagni pendo jo'u lo nurma xotli selfu jo'u lo se prami je sutra se morji no'u lo te pleji ninmu pe lo mapku zarci zi'e noi gy prami xlura co junri je ku'i masno bo dukse •i ro da cu to'e canci co kansa lo prenu poi fange gi'a xa'o to'e se morji •i ku'i ro da se ba'i lo nu sidju gy .a lo gy lanzu cu bancu lo nu ka'e se pencu •i je la .gregor. ca lo nu da canci cu cinmo lo ka surla ni'o ba la'e di'u gy na bredi lo nu se raktu lo lanzu · i po'o gy cinmo lo ka fengu lo nu mabla se kurji · i gy na kakne lo nu se xanri lo ka'e rinka be lo nu gy xagji · i ku'i gy platu lo nu ta'i ma kau to'e cliva lo sorcu kumfa gi'e lebna lo se djica to'e mu'i nai lo nu na sai xagji · i lo mensi se cau lo nu za'o pensi lo du'u ma kau ka'e kukte la .gregor. cu sutra catke punji ca lo cerni jo'u lo donri midju pu lo nu klama lo zarci kei se pi'o lo jamfu lo cunso cidja lo kumfa pe la .gregor. gi'e ba bo vimcu ca lo vanci se pi'o lo lumci burcu grana va'o lo nu lo cidja cu pu vrusi se zgana gi'a to cafne traji toi na pu se pencu · i lo nu ganzu lo kumfa cu se zukte co sutra traji · i lo dasri be lo se to'e jinsa cu preja lo bitmu · i ro da se zvati lo pulce bolci jo'u lo se to'e jinsa · i la .gregor. ca lo cfari ca lo nu lo mensi cu to'e cliva cu punji gy lo to'e jinsa traji kojna te zu'e lo nu pante fi my ta'i lo nu tai zvati · i ku'i ju'o lo nu da'i gy tai stali ze'a lo jeftu be li so'i cu na rinka lo nu lo mensi cu zenba lo
ka xamgu tarti •i my ji'a viska lo se to'e jinsa gi'e ku'i jdice lo du'u na vimcu ni'o lo mensi se kai lo ka cortu cinmo ganse noi te cnino fi my zi'e noi su'a nau se ckaji ro lo se lanzu cu jundi lo nu .ei steci my po'o fa lo ka kurji lo kumfa pe la .gregor. · i ca da lo mamta cu gasnu lo nu lo kumfa pe la .gregor. cu lifri lo barda nu lumci noi my snada se pi'o lo djacu co klani be li so'o bei lo baktu to ku'i lo ji'a cilmo vanbi cu fanza la .gregor. noi preja je dunku je cando vreta lo sfofa toi · i zi bo ku'i lo mamta cu se sfasa · i lo mensi ca lo nu sanji ca lo vanci lo se cenba be lo kumfa pe la .gregor. cu bajra fau lo nu cinmo condi cortu kei fa'a lo ralju kumfa gi'e porpi lo xamsi be lo se klaku to'e mu'i nai lo nu lo mamta cu galtu xance pikci · i lo rirni to lo patfu cu suksa binxo lo cikna bu'u lo py stizu toi ca lo cfari cu manci zgana se cau lo nu kakne lo nu zukte da · i ba bo ry ji'a co'a cinmo · i lo patfu cu fa'a ri'u pante fi lo mamta fe lo nu na curmi lo nu lo mensi cu kurji lo nu lumci lo kumfa pe la .gregor. · i py fa'a zu'a krixa cusku fi lo mensi fe lo se du'u na curmi lo nu za'u re'u lumci lo kumfa pe la .gregor. · i lo mamta cu troci lo nu bevri fi lo sipna kumfa fe lo patfu noi traji xanka · i ca bo lo mensi noi desku lo nu klaku cu darxi lo jubme lo cmalu ke ganlo xance · i ca bo la .gregor. cu siclu ri'a lo nu curve fengu fi lo nu no da te sidbo fi lo nu gasnu lo nu ganlo fa lo vorme kei te zu'e lo nu bandu gy lo tai jvinu jo'u lo tai savru
ni'o lo mensi noi mutce tatpi lo jibri be my cu xa'o na renvi lo nu kurji la .gregor. tai tu'a lo purci •i ku'i na sarcu fa ga lo nu lo mamta cu basti gi lo nu la .gregor. cu se cliva •i ki'u bo zvati fa lo sidju ninmu • i lo to'e citno ninmu noi lo speni pu binxo lo morsi zi'e noi ju'o lo tsali xadni cu sidju ke'a lo nu renvi lo xlali traji lo clani nu jmive cu na sai se rigni la .gregor. •i sy ny ca da se cau lo nu jetnu kucli cu cunso gasnu lo nu kalri fa lo vorme be lo gy kumfa •i je ca lo nu viska gy noi se spaji zi'e noi to'e mu'i nai lo nu no da jersi cu co'a bajra fa'a je to'o cu stali lo ka sanli gi'e manci fau lo nu lo birka cu kruca simxu •i sy ny co'a la'e di'u cu na cirko lo cumki poi nu gasnu lo nu milxe kalri fa lo vorme kei ca lo cerni jo'u lo vanci te zu'e lo nu catlu lo kumfa pe la .gregor. •i sy ny ca lo cfari cu trina gy fa'a sy ny lo valsi poi la'a sy ny jinvi lo du'u xendo zi'e no'u mu'a lu ko ti klama doi slabu ke kalci ke calku cinki li'u .a lu .u'e ko catlu lo slabu ke kalci ke calku cinki li'u • i la .gregor. cu spuda no da lo tai te trina • i gy cando stali lo se zvati be gy tai lo nu da'i lo vorme cu na kalri •i .au da minde lo sidju ninmu lo nu lumci ca ro djedi lo kumfa kei se ba'i lo nu curmi lo nu sy ny prali claxu fanza gy fi'o djica sy ny •i la .gregor. ca lo pa clira cerni to lo carmi carvi cu darxi lo canko blaci fi'o se sinxa ju'o cu'i lo zi vensa toi ca lo nu lo sidju ninmu cu za'u re'u co'a mabla cusku cu binxo lo tai fengu ja'e lo nu gy carna fa'a sy ny tai lo nu gunta sy ny •i ku'i gy masno je ruble •i lo sidju ninmu se ba'i lo nu binxo lo terpa cu sa'u lafti lo stizu poi zvati lo jibni be lo vorme •i sy ny stali fau lo nu lo moklu cu kalri •i li'a platu lo nu gasnu lo nu ganlo fa lo moklu ca lo po'o nu lo stizu poi se jgari fi lo xance cu mo'u janli lo trixe be la .gregor. •i lu xu na ranji li'u cu preti fi sy ny ca lo nu viska lo nu la .gregor. cu xruti carna •i sy ny surla ke xruti punji lo stizu lo kojna •i la .gregor. cu nau citka ji'i no da •i gy va'o lo po'o nu cunso klama fo lo lamji be lo cidja cu lebna lo spisa te zu'e lo nu kelci sy ne'i lo moklu • i gy ralte sy lo nenri be my ze'u lo cacra be li so'o gi'e so'e roi sputu sy ca lo fanmo •i gy ca lo cfari cu jinvi lo du'u lo nu citka cu se fanta lo nu badri lo tcini be lo kumfa •i ku'i lo se cenba be lo kumfa cu zi se panpi gy •i binxo lo tcaci fa lo nu setca fi lo kumfa fe lo dacti poi na kakne lo nu punji ke'a lo drata se zvati •i nau so'i mei fa lo tai dacti ki'u lo nu pa lo kumfa be lo zdani cu zasni se vecnu fi lo ci vitke •i lo ci junri nanmu to la .gregor. cu zgana to'o lo vorme lo nu ro ci da cu flira se kerfa toi cu jundi lo te ganzu be ge po'o nai lo ra kumfa gi ji'a pi ro lo zdani •i steci jundi lo te ganzu be lo jukpa kumfa •i ra na renvi tu'a lo te pilno claxu dacti jo'u ra'u sai lo to'e jinsa •i ji'a ra ba'o bevri lo barda pagbu be lo ra nilce •i se ki'u bo dukse fa lo so'i dacti poi da na kakne lo nu vecnu ke'a zi'e poi na djica lo nu renro ke'a •i ro lo tai dacti cu gau muvdu lo kumfa pe la .gregor. •i go'i fa lo baktu be lo fagri festi be'o jo'u lo baktu be lo jukpa kumfa festi •i lo sidju ninmu noi ro roi sutra zukte cu renro fi lo gy kumfa fe ro da poi claxu lo te pilno •i zabna funca fa lo nu la .gregor. cu so'e roi viska lo dacti jo'u lo po'o xance poi jgari ri •i ju'o cu'i lo sidju ninmu cu platu lo nu za'u re'u cpacu lo dacti ca lo nu ponse lo temci jo'u lo cumki •i ja ju'o cu'i platu lo nu pa roi renro ro da lo bartu •i ku'i je'u ro da stali lo se
zvati poi da farlu ke'a ca lo nu se renro ku'o gi'a muvdu ri'a lo nu la .gregor. cu muvdu fo lo jbini •i ca lo cfari gy tai zukte bai lo nu no da kunti canlu poi curmi lo nu cpare •i ba bo ku'i gy zenba lo ka se pluka kei to'e mu'i nai lo nu gy ba lo tai nu litru cu morsi tatpi gi'e badri gi'e stali ze'a lo cacra be li so'o lo ka cando ni'o lo vitke cu su'o roi citka lo vanci sanmi bu'u lo ralju kumfa · i se ki'u bo lo vorme cu stali ca su'o vanci lo ka ganlo · i ku'i la .gregor. cu pluka randa lo nu da na gasnu lo nu kalri · i ji'a sai gy ca su'o lo vanci poi ca ke'a lo vorme cu stali lo ka kalri cu na se prali fi la'e di'u gi'e vreta se cau lo nu lo lanzu cu zgana kei lo manku traji kojna be lo kumfa · i ku'i ca lo pa krefu lo sidju ninmu cu snuti curmi lo nu kalri fa lo vorme be lo ralju kumfa · i lo vorme cu stali lo ka kalri ca lo ji'a sai nu ge lo vitke cu to'e cliva gi gau cikna fa lo gusni · i ra zutse lo stuzi poi bu'u ke'a pu citka fa lo patfu jo'u lo mamta jo'u la .gregor. · i ra to'e polje lo boxfo gi'e jgari lo dakfu jo'u lo forca lo xance · i zi bo to'e canci pa'o lo vorme fa lo mamta noi bevri lo palne be lo rectu · i ba bo go'i fa lo mensi noi bevri lo palne be lo patlu · i lo cidja cu danmo dirce · i lo vitke cu salpo ga'u lo crane palne tai lo nu djica lo nu lanli pu lo nu citka · i je'u lo nanmu poi zutse lo midju zi'e noi simlu lo ka traji lo ka catni kei lo ci mei cu katna lo spisa be lo rectu bu'u lo palne te zu'e lo nu cipra lo ka ranti banzu gi'e na nitcu lo nu xruti se benji fi lo jukpa kumfa · i lo nu cipra cu mansa ra · i lo mamta
jo'u lo mensi vu'o noi pu zgana ro da fau lo nu xanka cu co'a cisma gi'e condi vasxu ni'o lo lanzu cu citka bu'u lo jukpa kumfa · i ku'i lo patfu pu lo nu klama lo nenri be lo jukpa kumfa cu klama lo ralju kumfa gi'e pa roi salpo rinsa fau lo nu jgari lo mapku lo xance kei gi'e litru lo sruri be lo jubme · i lo vitke cu binxo lo sanli gi'e to'e cladu bacru da fa'a lo vy creka karli · i vy ca lo nu xa'o kansa no da cu citka fau lo nu na ru'e traji smaji · i la .gregor. cu se cizra lo vrici sance be lo nu citka · i lo nu lo denci cu marxa cu so'i roi se tirna tai lo nu vy djica lo nu jarco fi la .gregor. fe lo nu ge da nitcu lo denci lo nu citka gi lo ji'a sai melbi traji xedja cu na xamgu basti lo denci · i lu ku'i mi na xagji sei la .gregor. fi gy se raktu cusku · i ku'i mi djica lo tai cidja · i .oi lo vitke cu citka · i je mi morsi binxo li'u
ni'o ca lo mi'u vanci cu sance lo jgita noi la .gregor. na morji lo nu tirna ca lo temci •i lo vitke cu xa'o ba'o citka •i lo midju cu to'e setca lo karni gi'e dunda lo papri ro lo re drata •i lo ci mei cu tcidu gi'e sigja vasxu fau lo nu vreta zutse •i vy ca lo nu lo jgita cu co'a se sance cu jundi tirna •i vy binxo lo sanli gi'e smaji klama lo vorme be lo rinsa kumfa •i bu'u lo vorme lo vitke cu stali lo ka cando je sanli gi'e tagji simxu •i ju'o da to'o lo jukpa kumfa cu tirna vy •i ki'u bo lo patfu cu krixa lu xu fanza lo io nanmu fa lo zgike •i ka'e zi sisti lo nu kelci li'u • i lu dukti sei lo midju nanmu cu cusku • i xu lo io citno ninmu cu djica lo nu klama mi'a gi'e kelci bu'u lo vi kumfa noi mutce zmadu fi
lo ka kufra gi'e pluka li'u •i lu li'a go'i li'u cu krixa se cusku lo patfu tai lo nu py mi'u cu kelci lo jgita •i lo nanmu cu xruti lo kumfa gi'e denpa •i ba zi bo to'e cliva fa lo patfu noi bevri lo zbepi ku'o jo'u lo mamta noi bevri lo zgike papri ku'o jo'u lo mensi noi bevri lo jgita •i lo mensi cu surla gasnu lo nu bredi fa lo ro se nitcu be fi lo nu kelci •i lo rirni noi pu no roi zasni vecnu lo kumfa gi'e ja'e bo dukse lo ka clite ri'i lo vitke cu na darsi lo nu zutse lo stizu poi se ponse ry mi'u •i lo patfu cu se sarji lo vorme fau lo nu punji lo pritu xance lo jbini be lo re batke be lo se lasna kosta •i lo mamta cu te friti lo stizu pa lo nanmu • i my curmi lo nu lo stizu cu stali lo se zvati poi lo nanmu cu cunso punji ra ke'a •i se ki'u bo my stali lo ka zutse bu'u lo sepli kojna ni'o lo mensi cu co'a kelci · i lo patfu jo'u lo mamta to'o lo se zvati cu jundi lo xance nu muvdu · i la .gregor. noi se trina lo zgike cu milxe klama lo crane · i lo stedu be gy cu xa'o zvati lo ralju kumfa · i gy ja'a ru'e se cizra lo nu ca lo zi temci cu na clite pensi lo drata · i gy ca lo purci cu jgira lo nu clite pensi · i .ei da'i la'e di'u mi'u cu nau mukti fi gy fe lo nu sevzi mipri · i ki'u bo gy mulno se gacri lo pulce ri'a lo nu lo pulce cu kuspe lo gy kumfa gi'e vofli fa'a ro da ri'a lo cmalu traji nu muvdu · i gy cpana be lo trixe jo'u mlana be'o bevri fi ro da fe lo cilta jo'u lo kerfa jo'u lo cidja festi · i gy dukse lo ka na'e kurji ro da kei lo nu gy gunro lo trixe gi'e lumci mosra gy lo loldi gacri tai lo nu gy pu zukte so'i roi ro djedi · i gy to'e mu'i nai lo tai tcini cu nau na ckeji lo nu muvdu lo crane fo lo jinsa traji loldi be lo ralju kumfa
ni'o zu'u nai no da jundi gy •i lo lanzu cu mulno se cokcu lo zgike be lo jgita •i si'a nai lo vitke noi ca lo cfari fau lo nu lo xance cu nenri lo daski cu dukse jibni lo trixe be lo zbepi pe lo mensi tai lo nu da'i kakne lo nu tcidu lo zgike papri zi'e noi ju'o ru'a tai fanza lo mensi cu zi klama fau lo nu ge xadba voksa tavla gi lo stedu cu salpo kei lo canko noi vy stali ke'a ca lo nu lo patfu cu se raktu zgana vy •i je'u vy mutce simlu lo ka na se mansa fi lo pu se sruma poi nu tirna lo melbi ja zdile zgike be lo jgita •i vy simlu lo ka tatpi lo se tigni gi'e curmi lo nu fanza vy kei mu'i lo po'o nu clite •i lo tadji be lo nu dirce fa'a lo galtu lo sigja danmo pa'o lo moklu jo'u lo nazbi cu sinxa lo nu mutce xanka •i ku'i lo mensi cu tai certu kelci •i lo flira cu salpo fa'a lo mlana • i lo kanla cu jundi je badri jersi lo tonga lerfu • i la .gregor. cu litru lo milxe zmadu •i gy ralte lo stedu lo lamji be lo loldi te zu'e lo nu ju'o cu'i penmi simxu fa lo nu catlu •i .oi xu gy xa'o me lo danlu poi cinmo ri'a lo zgike •i simlu fi gy fe lo ka gy te jarco lo dargu be lo na'e slabu je se djica cidja •i gy jdice lo du'u binxo lo jibni be lo mensi gi'e lacpu fi lo skaci gi'e tai gasnu lo nu my jimpe lo du'u my zifre lo nu klama fi'o kansa lo jgita lo nenri be lo gy kumfa •i ki'u bo no da kakne lo nu cnemu my lo zgike kei tai lo se djica be gy •i gy djica lo nu no roi curmi lo nu my cliva lo gy kumfa kei ze'a do'a nai lo nu gy jmive •i da'i lo to'e melbi tarmi be gy cu pa re'u pilno xamgu •i gy djica lo nu zvati ca pa da lo ro vorme be lo gy kumfa gi'e renro gy lo gunta be gy • i ku'i da'i .ei lo mensi cu stali gy ge nai bai ku gi fi'o djica my • i .ei my lamji be gy zutse lo sfofa gi'e gasnu lo nu salpo fa lo kerlo fa'a gy
* i gy djica lo nu gasnu lo nu my djuno lo du'u ge gy pu jdari platu lo nu benji my lo zgike ckule gi gy ca lo pu zi xriso jbena detri to la'a lo xriso jbena detri cu xa'o purci toi va'o lo nu da'i lo betri na pu kruca lo gy se litru cu da'i cusku fi ro da se cau lo nu se raktu lo te spuda •i da'i lo mensi ba lo nu tirna la'e di'u cu spoja lo cinmo se klaku •i da'i la .gregor. cu lafti gy fa'a lo janco be my gi'e cinba my lo cnebo noi co'a lo nu my se jibri lo zarci cu lunbe se cau lo dasri ja jadni ni'o lu doi io nanmu po'u la .samsas. li'u cu krixa se cusku lo midju nanmu lo patfu · i my jarco se pi'o lo degji se cau lo nu jmina lo valsi kei lo farna be la .gregor. noi masno litru · i lo jgita cu binxo lo smaji · i ca lo cfari lo midju vitke cu cisma fa'a lo ri pendo fau lo nu gasnu lo nu muvdu fa lo stedu · i ba bo ra catlu la .gregor. · i lo patfu cu jinvi lo du'u lo nu gasnu lo nu surla fa lo vitke cu sarcu zmadu lo nu to'e trina la .gregor. · i to'e ki'u nai bo ge vy na sai xanka gi la .gregor. cu simlu lo ka zmadu lo jgita lo ka zdile vy · i py sutra fa'a vy gi'e troci fau lo nu lo birka cu preja kei lo nu catke vy fa'a lo vy kumfa gi'e ca bo rivbi se pi'o lo py xadni lo nu vy kakne lo nu viska la .gregor. · i je'u vy binxo lo milxe fengu be ga lo se tarti be lo patfu gi lo nu co'a sanji lo nu vy se cau lo nu djuno cu pu xabju lo lamji be lo tai me la .gregor. · i vy minde cpedu lo ve ciksi lo patfu gi'e lafti lo birka gi'e na'e surla lacpu lo vy flira kerfa gi'e mutce masno klama fa'a lo tirxe lo vy kumfa · i ca bo lo mensi cu bancu lo nu cfipu poi my farlu ke'a ca lo nu tai suksa sisti tu'a lo zgike · i my frati ba lo nu ze'i jgari lo jgita jo'u lo se jgita lo to'e tinsa xance gi'e ze'i catlu lo zgike papri tai lo nu
za'o kelci •i my punji lo tutci lo tuple be lo mamta noi za'o zutse lo stizu fau lo nu nandu vasxu gi'e vlile se desku lo fepri •i lo mensi cu bajra fa'a lo lamji kumfa noi lo vitke cu sutra zenba lo ka binxo lo jibni be ke'a ri'a lo nu na sisti fa lo patfu •i za'a bai lo certu xance be lo mensi lo ckana gacri jo'u lo kicne cu vofli fa'a lo galtu gi'e se ganzu •i my pu lo nu lo nanmu cu to'e cliva lo kumfa cu mo'u ganzu lo ckana gi'e na'e se zgana klama lo bartu •i lo patfu cu simlu lo ka tai se jitro lo ka xarnu kei ja'e lo nu to'e morji lo nu sinma poi je'u py dejni ke'a lo vitke •i py catke po'o gi'e catke co'u lo nu ca'u lo vorme be lo kumfa lo midju nanmu cu lindi tikpa lo loldi gi'e ta'i dicra lo patfu •i lu ca'e mi gasnu lo nu do djuno sei lo midju nanmu cu cusku be fau lo nu lafti lo xance gi'e catlu sisku lo mamta jo'u lo mensi se'u lo du'u mi mu'i lo rigni tcini poi vanbi lo vi zdani jo'u lo vi lanzu sei ca ku lo midju nanmu fo lo loldi cu jdice sputu se'u cu nau sa'e cliva lo kumfa • i .ai li'a mi pleji no da do tu'a lo djedi poi mi pu xabju ti • i si'a nai mi ba pensi lo du'u xu kau mi na flalu cpedu fi do fe da noi frili se jicmu li'u •i lo midju nanmu cu co'u cusku gi'e catlu lo crane tai lo nu denpa da •i je'u lo re pendo cu zi jmina lo di'e valsi •i lu mi ji'a nau cliva lo kumfa li'u •i ba la'e di'u lo midju nanmu cu jgari lo vorme batke gi'e darxi gasnu lo nu ganlo fa lo vorme ni'o lo patfu cu desku klama gi'e pencu lo vacri lo xance fa'a lo stizu gi'e sevzi curmi lo nu farlu ri · i py simlu lo ka binxo lo bredi be lo tcaci nu ze'i vanci sipna · i ku'i lo nu condi salpo fa lo stedu noi ke'a
dandu tai lo nu no da sarji ke'a cu jarco lo nu py na sai sipna •i la .gregor. cu vreta fau lo nu ro roi smaji kei lo se zvati poi lo vitke pu facki gy ke'a •i ge lo nu gy badri lo nu fliba lo se platu gi ji'a ju'o cu'i lo nu gy ruble ri'a lo nu xagji poi gy lifri ke'a cu fanta lo nu gy muvdu • i gy ji'u terpa lo nu ba zi farlu gy fa lo jursa carvi • i je gy denpa • i gy na se spaji lo ji'a sai sance be lo jgita noi ke'a pa'o lo desku degji be lo mamta cu farlu fi lo tuple be ri gi'e cupra lo cladu savru ni'o lu doi dirba rirni sei lo mensi fau lo nu darxi lo jubme tai lo nu cfari sinxa cu cusku · i ti na ka'e ranji tai ti · i ju'o cu'i do na sanji · i mi ku'i ja'a sanji · i mi na djica ca'u lo vu danlu lo nu bacru lo cmene be lo bruna be mi · i ja'o mi cusku di'e po'o · i .e'i mi'o troci lo nu vimcu tu mi'o · i mi'o pu zukte ro remna cumki lo nu kurji tu gi'e to'e fapro tu · i pe'i no da kakne lo nu sfasa cusku fi mi'o li'u · i lu do pa roi je pa ki'o roi drani li'u cu se cusku lo patfu fa'a lo nenri be ri · i lo mamta noi za'o claxu lo banzu vacri cu co'a to'e cladu kafke fa'a lo xance poi crane lo moklu ku'o fau lo nu fenki frumu se pi'o lo kanla · i lo mensi cu bajra fa'a lo mamta gi'e sarji lo mabru · i lo patfu cu simlu lo ka jinru lo nu pensi · i py ri'a lo valsi pe lo mensi cu sanli zutse · i py kelci lo mapku noi jbini lo palta noi ke'a co'a lo sanmi pe lo vitke cu za'o cpana lo jubme · i py ru'i nai catlu la .gregor. noi ca'o smaji
ni'o lu .e'i mi'o troci lo nu vimcu tu mi'o li'u cu se cusku lo mensi lo po'o patfu •i lo mamta ri'a lo nu kafke cu tirna no da •i lu ba'a tu ba catra lo re do •i da va'o lo nu tai nandu gunka tai lo nu mi'o gunka cu
na kakne lo nu ji'a renvi bu'u lo zdani lo cimni se dunku •i mi ji'a na kakne lo nu za'o renvi li'u •i my co'a tai vlile klaku ja'e lo nu lo se klaku cu farlu lo flira be lo mamta •i lo mensi cu zmiku pilno lo xance lo nu gau sudga ni'o lu doi verba sei lo patfu cu kecti je jimpe cusku · i mi'o kakne lo nu zukte ma li'u
ni'o ku'i lo mensi cu crepu lo janco tai lo sinxa be lo jenca poi ke'a ca lo nu my klaku cu jitro my fi'o dukti lo nu pu darsi •i lu va'o lo nu da'i tu jimpe li'u cu se cusku lo patfu se pi'o lo xadba preti tonga •i lo mensi fau lo nu klaku cu vlile gasnu lo nu muvdu fa lo xance fi'o se sinxa lo nu na kakne lo nu pensi ji'a sai la'e di'u •i lu va'o lo nu da'i tu jimpe li'u cu za'u re'u se cusku lo patfu •i py gasnu lo nu ganlo fa lo kanla kei gi'e gasnu lo nu me py ji'a moi fa lo me lo mensi moi nu birti lo du'u la'e di'u na cumki •i lu va'o la'e di'u cu da'i cumki fa lo nu snada lo nu tugni tu •i ku'i y li'u ni'o lu .e'i tu cliva sei lo mensi cu krixa cusku · i la'e di'u po'o cumki doi patfu · i .ei do cliva po'o lo si'o tu me la .gregor. · i lo nu ze'u krici la'e di'u cu jetnu betri mi'o · i ku'i ta'i ma cumki fa lo nu tu me la .gregor. · i tu va'o lo nu da'i me la .gregor. cu da'i pu zu jimpe lo du'u na cumki fa lo nu kansa fa lo prenu lo tai danlu lo nu jmive · i da'i tu cliva fi'o djica tu · i mi xa'o na se bruna gi'e ku'i kakne lo nu di'a jmive kei gi'e ralte lo virnu se morji · i ku'i lo vi mabla danlu cu jersi mi'o gi'e to'e trina lo vitke gi'e li'a djica lo nu tu binxo lo ponse be
pi ro lo zdani gi'e curmi lo nu mi'o pagre lo nicte bu'u lo klaji •i ju'i patfu sei my suksa krixa •i ii tu za'u re'u co'a co'e li'u •i lo mensi fau lo nu xalni poi mulno na'e se jimpe la .gregor. cu cliva lo ji'a sai mamta gi'e sevzi renro to'o lo stizu tai lo nu rigni mleca fa lo nu cirko lo mamta kei lo nu stali lo jibni be la .gregor. •i lo mensi cu sutra klama lo trixe be lo patfu noi se fanza lo se tarti be gy gi'e binxo lo sanli gi'e lafti lo birka te zu'e lo nu bandu lo mensi ni'o ku'i la .gregor. cu na sai platu lo nu gasnu lo nu da terpa · i steci go'i tu'a lo mensi · i gy co'a carna po'o te zu'e lo nu xruti lo kumfa · i la'e di'u cu jundi trina ki'u lo nu gy se ja'e lo gy bilma tcini cu nitcu fi lo nu tai nandu carna kei fe lo nu pilno lo stedu noi gy so'i roi lafti ke'a gi'e darxi lo loldi ke'a · i gy sisti gi'e catlu lo sruri · i lo gy vrude se platu cu simlu lo ka se jimpe · i lo nu terpa cu pu ze'i zasni · i ro da nau badri je smaji catlu · i lo mamta cu vreta lo stizu fau lo nu lo tuple cu preja gi'e tagji simxu · i lo kanla cu na'e ru'e ganlo ri'a lo nu traji lo ka tatpi · i lo patfu jo'u lo mensi cu lamji simxu zutse · i lo mensi cu ba'o punji lo birka lo sruri be lo cnebo be lo patfu · i lu ju'o cu'i mi nau kakne lo nu carna li'u cu se pensi la .gregor. noi za'u re'u co'a zukte · i gy na kakne lo nu rivbi lo nu tatpi cmoni ri'a lo nu nandu troci · i gy bilga lo nu so'o roi surla
ni'o zu'u nai no da troci lo nu gy sutra •i curmi lo nu gy zukte lo se djica •i gy ca lo nu mo'u carna cu zi co'a xruti klama fo lo sirji •i gy manci lo barda te sepli be gy bei lo kumfa gi'e na jimpe lo du'u ta'i ma
kau fau lo nu tai ruble cu pu zi litru lo mintu dargu se cau lo nu sanji • i gy stodi jundi lo nu sutra litru • i gy ja'a ru'e sanji lo nu no valsi .e no se bacru be lo lanzu cu fanza gy ni'o gy ca lo nu xa'o zvati lo vorme cu gasnu lo nu carna fa lo stedu · i na'e mulno go'i ki'u lo nu gy ganse lo nu lo cnebo cu tinsa binxo · i ku'i gy ja'a viska lo nu no da za'o cenba · i lo po'o mensi cu pu binxo lo sanli · i lo ro moi nu gy catlu cu satre lo mamta noi uo condi sipna
ni'o ba lo nu gy klama lo nenri be lo kumfa cu zi binxo fa lo vorme lo ganlo se pi'o lo ckiku •i lo suksa savru poi se cupra ti'a la .gregor. cu tai se terpa gy ja'e lo nu lo cmalu tuple be gy cu se polje •i me lo mensi fa lo pu tai sutra •i my pu stali lo ka sanli tu kei gi'e denpa gi'e sutra plipe lo crane •i la .gregor. na tirna ji'a sai lo nu my klama •i my krixa zo uo fa'a lo rirni ca lo nu pilno lo ckiku ni'o lu nau mo li'u cu preti fi la .gregor. gy fau lo nu catlu lo sruri va'o lo manku · i gy zi facki lo du'u gy xa'o na kakne lo nu muvdu · i gy na se cizra · i simlu lo ka na'e rarna kei fa lo nu gy co'u lo cabna cu ja'a ze'a kakne lo nu muvdu se pi'o lo cmalu tuple · i ji'a gy lifri lo milxe pluka · i je'u gy cortu pi ro lo xadni · i ku'i lo nu cortu cu simlu lo ka zenba je zenba lo ka ruble kei gi'e mulno canci ca lo fanmo · i gy xa'o ja'a ru'e ganse lo trixe ke fusra plise jo'u lo sruri ve xrani vu'o noi se gacri lo xutla pulce · i gy prami je cinmo pensi lo lanzu be gy · i lo gy se jinvi poi du'u .ei gy canci cu zmadu ji'a sai lo me lo mensi moi lo ka jdice jdari · i gy stali lo tcini poi nu panpi je cando pensi ku'o co'u
lo nu lo junla pe lo galtu dinju cu sance jarco li ci pe lo cerni murse •i gy za'o jmive ca lo nu co'a donri ti'a lo canko blaci •i ba bo fi'o na djica gy ge lo stedu cu farlu lo loldi gi lo nazbi kevna cu te jetce lo ro moi ke vasxu se cmoni ni'o ca lo clira cerni lo sidju ninmu cu to'e cliva to sy ny ri'a lo nu tsali je sutra kei to'e ri'a nai lo nu so'i roi te cpedu lo nu rivbi cu tai darxi lo vorme ja'e lo nu co'a lo nu sy ny to'e cliva cu na'e cumki bu'u pi ro lo zdani fa lo nu da sipna toi gi'e sanji ca lo cfari no na'e fadni ca lo tcaci je tordu nu vitke la .gregor. · i sy ny jinvi lo du'u gy tai cando vreta te zu'e lo nu tcica fi lo nu gy cinmo cortu · i sy ny jinvi lo du'u gy mulno jimpe ro da · i sy ny cu ca'o snuti jgari lo clani burcu lo xance gi'e troci lo nu pilno ra lo nu satre la .gregor. to'o lo vorme · i sy ny cu snada no da ta'i la'e di'u gi'e binxo lo fengu gi'e milxe tunta la .gregor. · i sy ny ca lo nu ba'o gasnu se cau lo nu gy fapro kei lo nu gy muvdu cu jundi gy · i sy ny ca lo nu sanji lo jetnu tcini cu gasnu lo nu mutce kalri fa lo kanla kei gi'e siclu fa'a lo sevzi nenri gi'e ku'i na ze'u stali · i sy ny gasnu lo nu mulno kalri fa lo vorme be lo kumfa kei gi'e cladu voksa krixa fa'a lo manku lu ju'i do'u tu spofu · i vu mulno spofu li'u
ni'o lo speni simxu po'u la .samsas. cu binxo lo zutse be lo ckana gi'e nitcu lo nu bancu lo jenca poi se rinka lo sidju ninmu kei pu lo nu co'a jimpe lo notci be fi sy ny •i ba bo lo nanmu fa'u lo ninmu vu'o po'u la .samsas. cu sutra cliva lo ckana lo vo'a mlana •i lo nanmu po'u la .samsas. cu punji lo ckana gacri lo janco •i lo ninmu po'u la .samsas.
cu dasni lo sipna creka •i tai klama lo nenri be lo kumfa pe la .gregor. • i ca bo binxo lo kalri fa lo ji'a vorme be lo ralju kumfa noi bu'u ke'a cu sipna fa la .greten. co'a lo nu lo vitke cu to'e cliva •i ra mulno dasni tai lo nu na pu sipna •i lo blabi flira be ra cu simlu lo ka jarco lo nu jetnu fa la'e di'u •i lu xu morsi li'u cu se cusku lo ninmu po'u la .samsas. •i ny lafti lo kanla fa'a lo sidju ninmu fau lo nu preti se flira to'e ki'u nai lo nu ny mi'u kakne lo nu cipra lo jetnu •i ji'a sai ny kakne lo nu sanji se cau lo nu cipra lo jetnu •i lu ia sai li'u se cusku lo sidju ninmu noi te zu'e lo nu jarco cu catke lo morsi xadni be la .gregor. se pi'o lo lumci burcu ve'a lo vajni fa'a lo mlana •i lo ninmu po'u la .samsas. cu muvdu tai lo nu da'i djica lo nu dicra lo lumci burcu •i ku'i na dicra •i lu uo sei lo nanmu po'u la .samsas. cu cusku •i mi'o nau kakne lo nu ckire lo cevni li'u •i ny kruca sinxa zukte •i lo ci ninmu cu jersi lo mupli •i la .greten. noi na co'u catlu lo morsi xadni cu cusku lu ua tu cinla •i tu ze'u pu citka no da •i lo cidja cu na'e cenba co'a lo nu dunda kei co'u lo nu lebna li'u •i je'u lo xadni be la .gregor cu mulno plita je sudga •i la'e di'u cu nau se jundi ca lo nu ge ra na se lafti lo cmalu tuple gi no drata cuntu cu trina lo nu catlu ni'o lu doi .greten. ko klama lo mi'a kumfa li'u cu se cusku lo ninmu po'u la .samsas. zi'e noi milxe badri cisma · i la .greten. cu jersi lo rirni fa'a lo sipna kumfa se cau nai lo nu catlu lo morsi xadni · i lo sidju ninmu cu gasnu lo nu ganlo fa lo vorme gi'e mulno kalri fa lo
canko •i lo milxe glare to'e ki'u nai lo nu clira cerni cu kansa lo lenku vacri lo nu mixre •i fanmo lo masti po'u li ci ni'o lo ci vitke cu cliva lo ri kumfa gi'e manci catlu lo sruri fau lo nu sisku lo cerni sanmi · i da to'e morji vy · i lu lo cerni sanmi cu zvati ma li'u cu preti se cusku lo midju nanmu lo sidju ninmu se pi'o lo fengu voksa · i ku'i lo sidju ninmu cu punji lo degji lo moklu gi'e sutra je smaji jarco lo xance sinxa lo nanmu te zu'e lo nu ny klama lo kumfa pe la .gregor. · i ny klama gi'e stali lo ka sanli fau lo nu lo xance cu nenri lo daski be lo ny milxe xaksu kosta · i ny sruri lo morsi xadni bu'u lo mulno se gusni kumfa pe la .gregor.
ni'o lo vorme be lo sipna kumfa cu binxo lo kalri •i je lo nanmu po'u la .samsas. cu to'e canci fau lo nu dasni lo manfo taxfu •i lo speni cu jgari lo birka •i je lo tixnu cu jgari lo drata birka •i ro da milxe klaku •i la .greten. cu so'o roi punji lo flira lo birka be lo patfu •i lu ko zi cliva lo zdani be mi li'u cu se cusku lo nanmu po'u la .samsas. •i ny jarco lo farna be lo vorme se cau lo nu to'e jgari lo ninmu •i lu do djica lo nu cusku ma li'u cu xadba jenca se cusku lo midju nanmu noi milxe tcica cisma •i lo re drata cu ru'i mosra lo xance lo drata xance bu'u lo trixe be lo xadni tai lo nu kanpe lo banli nu damba poi ba te prali ra •i lu mi djica lo nu cusku lo se cusku be mi li'u cu spuda se cusku lo nanmu po'u la .samsas. fau lo nu kansa be lo ninmu be'o klama lo midju vitke •i ri ca lo cfari cu stali gi'e smaji gi'e catlu lo loldi tai lo nu ganzu da lo cnino bu'u lo stedu •i lu ja'o mi'a cliva li'u cu se cusku lo
midju vitke •i ri lafti lo kanla fa'a lo nanmu po'u la .samsas. tai lo nu suksa cumla gi'e cpedu ji'a sai lo nu ny curmi lo nu jdice la'e di'u •i lo nanmu po'u la .samsas. cu so'o roi zanru jarco po'o fau lo nu mutce kalri kanla •i ba bo lo midju vitke cu barda stapa klama lo rinsa kumfa •i lo re pendo cu ze'a pu tirna fau lo nu lo xance cu mulno cando •i ra nau plipe ti'a lo midju vitke tai lo nu terpa lo nu lo nanmu po'u la .samsas. ba purci ra lo ka klama lo nenri be lo rinsa kumfa kei gi'e fanta lo nu ra lamji lo gidva be ra •i bu'u lo rinsa kumfa lo ci mei cu lebna lo mapku lo te dandu gi'e to'e setca lo grana lo grana vasru gi'e smaji ke sinma salpo gi'e cliva lo zdani •i lo nanmu po'u la .samsas. fau lo nu na'e lacri noi claxu lo krino tai lo nu ba se jarco cu klama lo bartu fi'o se kansa lo re ninmu fe lo serti tsina gi'e se sarji lo serti garna gi'e viska lo nu lo ci mei cu masno je ku'i stodi klama lo cnita fo lo clani serti •i lo nanmu bu'u ro loldi cu canci lo trixe be lo kruvi gi'e ba zi za'u re'u to'e canci •i ra ca lo nu zenba lo ka cnita cu jdika lo ka cinri lo lanzu •i lo nanmu po'u la .samsas. jo'u lo re ninmu ca lo nu lo rectu vecnu noi lo se bevri cu cpana lo stedu be ke'a cu binxo lo crane lamji be lo ci nanmu gi'e ba bo kruca ri gi'e za'o klama lo gapru cu cliva lo serti tsina gi'e xruti lo zdani tai lo nu binxo lo na se raktu ni'o lo lanzu cu jdice lo du'u pilno lo donri lo nu surla gi'e pluka litru · i ra ge po'o nai pu jerna lo nu denpa fo lo nu gunka gi ji'a sai traji lo ka nitcu · i ja'e bo ra zutse re'o lo jubme gi'e ciska lo krinu notci
* i lo nanmu po'u la .samsas. cu te notci fo lo ri ralju • i lo ninmu po'u la .samsas. cu go'i fo lo nanmu poi ke'a dunda lo se gunka ra •i la .greten. cu go'i fo lo ponse be lo zarci •i ca lo nu ciska kei lo sidju ninmu cu klama lo nenri te zu'e lo nu cusku lo se du'u sy ny cliva ki'u lo nu mo'u gunka lo me lo cerni moi •i lo ci ciska cu sinxa zanru po'o ca lo cfari se cau lo nu catlu lo gapru •i ra ca lo nu lo sidju ninmu na jarco lo nu cliva cu catlu lo gapru fau lo nu fengu •i lu ma fasnu li'u cu preti se cusku lo nanmu po'u la .samsas. •i lo sidju ninmu cu ca'o stali lo ka sanli lo lamji be lo vorme •i za'a sy ny djica lo nu gasnu lo nu djuno fa lo lanzu fi lo banli se snada •i ku'i da'i sy ny ba zukte la'e di'u va'o lo po'o nu sy ny ve preti lo mulno tcila •i lo cmalu ke strutione pimlu poi na'e ru'e sirji cpana lo sy ny mapku zi'e noi co'a lo nu sy ny co'a selfu cu fanza lo nanmu po'u la .samsas. cu milxe slilu fa'a ro da •i lu do io djica ma li'u cu preti se cusku lo ninmu po'u la .samsas. noi traji lo ka sinma lo sidju ninmu kei lo ro ci da •i lu .u'a sei lo sidju ninmu noi lo nu clite cisma cu fanta lo nu za'o tavla cu cusku • i do na nitcu lo nu se raktu lo nu ta'i ma kau vimcu lo dacti pe lo lamji •i ro da ba'o se cikre li'u •i lo ninmu po'u la .samsas. ge'u jo'u la .greten. cu za'u re'u salpo fa'a lo xatra tai lo nu djica lo nu di'a ciska • i lo nanmu po'u la .samsas. zi'e noi sanji lo nu lo sidju ninmu cu djica lo nu co'a skicu lo ro tcila cu jdice fanta fau lo nu lo xance cu preja •i lo nu sy ny na kakne lo nu gasnu lo nu djuno cu rinka lo nu sy ny morji lo nu sy ny mutce sutra nitcu •i sy ny cinmo cortu krixa lu co'o
ro do li'u gi'e fengu carna gi'e cliva lo zdani fau lo nu jursa darxi gasnu lo nu mulno fa lo vorme ni'o lu .ai ca lo zi nicte tu co'u se jibri li'u cu se cusku lo nanmu po'u la .samsas. · i ku'i ny se spuda ge nai lo speni gi nai lo tixnu ki'u lo nu lo sidju ninmu cu simlu lo ka dicra lo nu panpi poi pu zi se cpacu · i lo re ninmu cu binxo lo sanli gi'e klama lo canko gi'e stali ri fau lo nu simxu lo ka jgari lo birka · i lo nanmu po'u la .samsas. cu zutse carna fa'a lo re ninmu gi'e ze'i smaji zgana ri gi'e ba bo jundi cpedu cusku lu .e'e ko ti klama · i ko to'e morji lo purci gi'e xendo mi li'u · i lo ninmu cu zi tinbe gi'e bajra fa'a lo nanmu po'u la .samsas. gi'e satre gi'e sutra lo nu mo'u ciska lo xatra
ni'o ba la'e di'u lo ci mei cu kansa simxu cliva lo zdani tai lo nu ze'a lo masti be li so'i cu na zukte •i ra klama lo nurma no'u lo bartu be lo tcadu fu lo trene •i lo se trene poi ra po'o zutse ne'i ke'a cu mulno se gusni fi lo glare solri •i ra kufra zvati lo stizu gi'e casnu lo ka'e se kanpe pe lo balvi •i ra jdice lo du'u lo cuntu ca lo nu jibni lanli cu na sai xlali •i lo ci jibri noi je'u ra na pu simxu lo ka te preti ke'a cu mutce xamgu gi'e zabna nupre •i ku'i li'a ju'o lo tcini cu ba zi zenba lo ka xamgu kei lo barda ca lo nu ra cenba lo ka se zdani •i ra djica lo nu muvdu lo cmalu je to'e kargu zmadu zdani poi ku'i zmadu fi lo ka xamgu stuzi zi'e poi ra'u zmadu fi lo ka mapti kei fe lo cabna noi pu se cuxna la .gregor. •i lo nanmu jo'u lo ninmu vu'o po'u la .samsas. ca lo nu tai tavla cu na'e ru'e cabna simxu pensi ca lo nu viska lo tixnu
noi gleki zenba kei lo du'u ri ca lo ro moi temci to'e ri'a nai lo nabmi poi rinka lo nu lo flira cu binxo lo blabi cu ba'o binxo lo vifne je melbi ke citno ninmu •i lo rirni cu ca'o smaji zenba gi'e je'a ru'e sanji jimpe simxu ta'i lo nu catlu •i ra pensi lo nu co'a temci drani lo ka sisku lo xamgu speni •i ra te sinxa lo cnino se senva jo'u lo xamgu te zukte lo du'u lo tixnu ca lo fanmo be lo nu litru cu pa moi lo binxo be lo sanli gi'e gasnu lo nu preja fa lo citno xadni fa'o |
# Jai nu comcohe fa la solpahi
«lu mi za’o citno li’u»
.i «lu mi za’o citno li’u», voi skuna ki fa lo ninmu poi crane mi
.i mi ganse lo nu lo kanla be mi co’a cilmo
・・・
ni’o
mi jibgu’a zai pa laldyremnyzda ku, noi zai ki mi sabji lo cersai je lo donmijysai lo laldo .i so’e lo laldo poi mi di’i jikca ki pu co’u kakne lo ka ce sezykurji poi’o’a se sidju be no da .i so’i ra nanca li za’u 80 .i ba’e ro ra voi su cinri cu lisri lo nunjmive be ki
.i ti ku’i lisri pa ninmu
.i mi ca pa cerni be ca lo prula’i nanca cu pa re’u penmi la .kelmar. (to mi lo ka cmedu’a lo cnino cmene cu zukte lo nunranji be lo nunsivni be ra toi) ku noi ki ca’o masno lo ka nerkla lo citkykumfa poi’o’a pilno be pa se xislu ke cadzu marce
.i la .kelmar. cu cmalu je cu voi lo kerfa be ra cu grusi blabi .i lo flira cu ricfu lo kamcinje je cu se midju pa barda ke genxu nazbi (to fi su da ra na tolsimsa la .ĭubabas. ku ne la .tci’iros. toi) .i na nandu fa lo ka ganse lo nu la .kelmar. cu laldytce .i ku’i mi ba za cilre lo nu je’u ra nanca li 96
.i so’e cerni cu simsa se’e
.i la .kelmar. cu klama pa lo stizu poi sruri lo so’i semzvala’i jubme je co’a zutse
.i «lu lo ckafi li’u», voi ra krixysku ki
.i mi punji pa kabri be lo ckafi lo crane be ra je cu xruti lo ka bregau lo cersai pe lo laldo xabju
.i «lu lo ckafi li’u», voi mi tirna baza lo mentu be li so’u .i mi klama lo stuzi be ra je cu catlu lo nenri be lo kabri
.i «lu ko pundu’a lo ckafi mi li’u», voi ra skuna
.i «lu ta za’o xadba culno lo ckafi li’u», voi mi ciksi je cu degja’o lo kabri
.i ra frumu je cu selfargau pa kerlo mi .i soi’a .emje ra se nandu lo ka tirna
.i mi zvajbizenkla je cu rapsku «lu ta za’o xadba culno lo ckafi li’u» poi’o’a degja’o be lo kabri
.i ra catlu lo kabri je co’a viska lo nu na kunti .i ra pinxe pa tunlylai
.i «lu ko jmina su cnino ckafi .i co’u glare li’u», voi ra skuna ba zi sai ku
.i mi tinbe je ba bo cu xrukla lo jukpyku’a ku noi zvala’i lo citkykumfa .i mi ze’a gunka tau lo cersai
.i «lu xu fi mi ka’e dunda su cmakenka ja su cmatitnanba li’u», (to mi pu’o cilre lo nu lo ka jmina ra’oi -cma- lo cidja valsi cu tcaci ra toi) voi jai se krasi lo zvala’i kumfa
.i mi cladysku «lu na go’i .i tau lo cersai cu cfari ti’u li 8:30 .i ŭu do bilga lo ka ze’i denpa li’u»
.i ca lo nu ra ba zi lo mentu cu rapsku lo preti kei mi jimpe lo nu ra na pu tirna
.i lo nu la .kelmar. cu zvati lo citkykumfa ca lo cerni cu ta’e jai ca nandu fai lo ka je’a surla ca lo nu bregau lo cersai .i lo nu mi sutra cu sarcu je cu ku’i se zunti lo nu di’i nitcu lo ka pundu’a lo ckafi ja cu jmina lo sakta (to ra djica lo nu lo ckafi cu titlytce toi) ja cu ciksi lo nu lo cersai na bredi .i su roi ku ca lo nu mi na sutryrau kei ra co’a so’o roi janlygau lo kabri lo jubme poi’o’a pante
.i to’u lo nu ra zvati cu se jalge lo nu lo nilgunka cu zmadu lo me lo nu na zvati moi
.i ca ro jefydje poi ca ki mi na bilga lo ka jibgu’a ku’o su drata cu fuzme tau lo cersai joi lo donmijysai .i ti’e lo drata na nelci la .kelmar. .i ti’e lo drata cu se fanza tau ra
.i je’u la .kelmar. cu gaje na’o xarnu gi na’o simlu lo kamnalclite ki’u lo nu ra no roi skuna zo ‹.e’o› .i mi’a so’o roi pu troci lo ka ctuca ra tau zo ‹.e’o› .i ku’i mi’a no’e snada .i ra pa ja re roi skuna zo ‹.e’o› je ba bo cu sutra lo ka tolmo’i
.i zu’u nai ra ja’a skuna zo ‹ki’e› ca lo nu mi pundu’a lo ckafi ja lo cersai .i ca lo nu ckirysku cu cisma poi’a je’a melbi je poi’a rinka be lo nu mi ze’i tolmo’i ro nu ra pu na’e clite
.i ku’i na ku la .kelmar. ca ro cerni cu klama lo citkykumfa .i ca su cerni ra zu’ejdi lo ka zvasta lo kumfa pe ra (to mu’a ki’u lo nu cinmo lo ka tatpi toi) .i lo nu go’i ta’e se gleki lo fuzme be tau lo cersai .i «lu ŭi jai frili cerni li’u», voi mi pensku ki
.i zu’u nai mi, ca ro cerni poi ca ki mi tirna lo sance be lo nu la .kelmar. cu masno lo ka cadzynerkla lo citkykumfa noi’o’a voi lo jamfu be ki cu mospe’u lo loldi ja’e lo nu frili mi fa lo ka ce poi’o’a na catlu be lo zvala’i kumfa cu djuno lo nu ra pu’o nerkla, cu (to mi .anji’i toi) pensku ja ba’usku ji’a sai «lu .oi ra ca’o klama li’u»
.i ca pa cerni la .kelmar. cu skuna pa voi mi trajynei ki lo se skuna be ra .i «lu mi nitcu tau lo nanba lo nu lo ckafi cu xagmau sakli li’u»
.i la .kelmar. so’i roi tavla fi lo bersa be ra
.i «lu ra xabju zai lo gapla’i dijysenta .i ra ka’e cnita klama ti .i .e’o ko klamygau ra li’u», voi ta’e skuna su simsa be ki
.i mi zu’ejdi lo ka na jungau ra lo nu gaje ma’a zvati lo mu moi be lo dijysenta gi no drata dijysenta cu gapla’i .i lo xa moi dijysenta na zasti
.i «lu je’e .i .ai mi ba troci li’u», voi mi spusku ki .i va’o su da —sei mi pensku se’u— lo jetnu cu voi lo nu na djuno ki cu xamgymau
.i mi di’i zgana lo nu lo drata jibgu’a be zai lo laldyremnyzda cu se nandu tau la .kelmar. .i pa jibrykansa be mi be’o joi mi ta’e semtavla ca lo nungunde’a lo fasnu pe lo mu moi dijysenta .i ra ze’u fuzme tau lo mu moi pu lo nu mi co’a jibgu’a tau lo laldyremnyzda kei je ja’e bo cu traji lo ka se slabu .i tau la .kelmar. so’o roi menre lo terta’a
.i «lu la .kelmar. ca lo cabdei cerni cu clirytce .oi klama li’u», voi mi pante
.i «lu ŭu li’u», voi spusku ki fa lo jibrykansa be mi poi’o’a deskygau be lo stedu be ra
.i «lu la .kelmar. ca lo cabdei cerni na cliva lo kumfa li’u», voi mi skuna ki
.i «lu zanfu’a do li’u», voi spusku ki fa lo jibrykansa
.i lo ka ma kau ni ce jarco lo ka ce na’e nelci la .kelmar. cu ze’a ru’i se zenba lo jibrykansa
.i «lu mi xebni ri’oi ninmu li’u», voi je’u ra skuna ki ca pa djedi
.i «lu .u’e li’u»
.i mi poi’a tolkina be lo nu la .kelmar. ka’e je so’o roi pu ca’a jai fanza cu nelci je’u ra soi’a .ensa (to se’o soi’a .emje lo nu mi nelci su da poi so’e drata cu simlu lo ka to’e nelci ki cu cafne toi) .i lo nu mi jikca la .kelmar. pu cafnyrau lo nu mi cilre lo nu ke ji’a lo kamxendo je lo kamvrude je lo kamterpa cu menre lo su roi se ckaji be ra .i lo nu da’i ba’e xebni ra cu voi mi no roi pu pensi ki
.i «lu mi nelci ra li’u», voi mi skuna ki .i «lu ra ba’e xendo li’u»
.i lo jibrykansa cu cmila po’o
・・・
ni’o
lo cuntu ze’a tai ranji .i ku’i lo nu mi tirna lo nu la .kelmar. cu stapynerkla lo citkykumfa ca lo cerni cu masno lo ka cafnyjdika
.i ca ru mi ba’o co’a se kufsau lo pu raktu pe la .kelmar. .i ja’e bo mi ca ku, soi’a spaji, cu je’u gleki ca ro nu ra ja’a tolcanci
.i ca pa ca’ibni djedi (to mi no roi pu facki lo nu tai ma kau fasnu toi) la .kelmar. cu ti’e farlu je cu nitcu lo ka se bevri fi lo spita .i ba lo nu ra di’a zvati lo laldyremnyzda kei ra na di’a stuvi’e lo citkykumfa
.i ca lo tolfa’o cu simlu lo ka zabna .i ze’a ba raktycau fa lo cerni —sei mi pensku se’u— .i ku’i ca lo nu mi jimpe lo nu cumki fa lo nu ra no roi ba xruti lo ka cadzu cu co’a jimpe fa mi lo nu mabla je’u .i mi na je’a djica lo nu ra bilma ja xlafri
.i va’o ro da ra ki’u lo nu ra ru’i vreta lo ckana cu co’a citka ke po’o ne’i lo kumfa pe ra
.i pu ku ra kakne lo ka zbasu lo cersai poi’o’a sidjycau .i mi pu bilga ke po’o lo ka punji lo te zbasu lo jubme .i ca ku mi bilga lo ka mulgau lo sanmi je cu bevri ri lo kumfa pe ra
.i lo jeftu be li su pa cu prubi’o .i ca ro lo cerni ba tau lo cersai lo laldykurji cu bevri lo palta pe la .kelmar. mi .i lo palta di’i simlu lo ka no da ce pu’i pencu .i ro lo nanba spisa za’o cpana .i lo donmijysai cu simsa .i ra di’i citka su’e pa smucylai .i mi zo’u mi zenba lo ka fengu lo laldykurji ki’u lo nu ra simlu lo ka na se vajni
.i «lu ju’i do .i la .kelmar. zo’u li’u», voi mi ca pa cerni cu skuna ki pa lo laldykurji .i «lu ra ze’u pu citka no da .i xu na mrobi’o va’o ku li’u»
.i «lu ĭe .i ku’i ma’a na se krali lo ka baplygau .i ma’a kakne ke po’o lo ka friti .i va’o gi ra na djica gi ra na djica li’u», voi spusku ki
.i «lu .y .oi je’e li’u» .i ga’a mi lo laldykurji na trocyrau .i ku’i mi skuna no srana .i «lu .i mi pacna lo nu zi di’a citka li’u»
.i «lu ĭa cu’i li’u»
.i «lu mi djica lo nu ra darca lo ka nanca li 100 li’u», voi skuna ki fa mi, noi’a nunstace
.i «lu ga ja nai do skuna lo simsa gi do na ba se pendo so’i da poi gunka zai ti li’u», voi ra spusku ki je cu cliva lo kumfa
.i mi ze’a sanli fau lo nu lo moklu be mi cu kalri
.i su da zo’u da ka se fanza .i lo ka su de poi drata prenu zo’u ce djica lo nunmorsi be de cu ro va’e lo ka drata da —sei mi pensku se’u—
.i ca lo bavla’i cerni —sei mi ca jdice se’u— mi gasnytoi lo nu gau ba’e mi la .kelmar. cu citka lo cersai .i va’o lo nu lo laldykurji na kakne kei mi bilga lo ka troci .i .ai na ku ki’u tau ba’e mi la .kelmar. cu morsybi’o
.i soi’a jalge mi ca lo bavla’i cerni cu klama poi’o’a bevri be lo cersai lo kumfa pe la .kelmar. .i mi zutsygau mi lo korbi be lo ckana
.i lo sance be lo nu mi punji lo palta lo jubme poi zvala’i lo ckana cu rinka lo nu ra ciknybi’o
.i «lu coi la .kelmar. .i koi zabna cerni li’u», voi mi rinsa poi’a cladu be mu’i lo nu mi djuno lo nu ra se nandu lo ka tirna
.i ba za lo mentu be li 15 mi cliva lo kumfa poi’o’a jgira
.i «lu la .kelmar. pu citka li’u», voi mi skuna ki lo laldykurji ku noi je’a spaji ki fa lo nuzba .i co’a lo nungo’i mi kau fuzme tau lo nu la .kelmar. cu citka
.i ca lo bavla’i cerni ra citka re nanbypanlo spisa .i je ba ku go’i ci spisa .i je ca lo fanmo be lo jeftu ra citka 1,5 nanbypalno
.i ku’i .au na ku do krici lo nu frili fa lo ka citkygau la .kelmar. .i di’i sarcu fa lo nu randygau ra .i «lu fe ba’e pa spisa ko citka .i ko vruga’e po’o li’u» .i ca so’o da na sa’u cumki
.i «lu mi na xagji li’u», voi gaje lo nu xu’asku ki cu cafne gi ro nu mi tirna ki cu sinxa lo nu malfu’a cerni
.i ku’i pu co’a ta’e citka ba’e su da .i xagmau lo purci .i mi co’a kucli lo nu da’i ra ca su balvi di’a kakne lo ka cadzu
.i «lu ra laldytce .i na lakne li’u», voi skuna ki fa pa lo laldykurji
・・・
ni’o
lo prula’i pu fasnu ze’a lo prula’i jeftu be li so’o
.i ca lo cabdei be ti ca lo cerni mi klama lo kumfa be la .kelmar. poi’o’a bevri be lo cersai poi’a simsa be ro drata cerni .i mi punji lo cersai joi lo ckafi lo jubme poi zvala’i lo ckana, soi ta’e ku lo sance be ki cu rinka lo nu la .kelmar. co’a cikna .i ku’i ca lo me ti cerni ra jai nandu fai lo ka ciknygau
.i mi zvajbizenkla je cu zutsygau mi lo korbi be lo ckana
.i la .kelmar. cu suksa lo ka ciknybi’o .i lo kanla co’a ganra kalri
.i «lu ro da cilmo .i ro da cilmo .i ko sidju mi li’u» .i lo voksa cu sinxa lo nunterpytce
.i mi na jimpe .i na ku lo ckana cu cilmo .i xu ra pu malsenva
.i «lu ma fasnu li’u», voi mi retsku ki joi cu gasnytoi lo nu ra dunkyjdika
.i «lu mi malcinmo .i xlafri li’u»
.i mi na djuno lo nu mi skunyĭancu ma kau
.i «lu mi no roi pu kanpe lo nu ba ca su da tai to’e kanro li’u»
.i ze’i smaji fau lo nu mi catlu ra joi cu zenba lo kamxanka
.i «lu mi za’o citno li’u», voi skuna ki fa lo ninmu poi crane mi
.i mi ganse lo nu lo kanla be mi co’a cilmo
.i lo nu ma kau jai tai skuna fai ra cu stidi lo nu lo fanmo cu cabjbi .i lo nu ra xalni ba’o se basti lo nunsmacni poi je’u ba’e zmadu fi lo ka xankyri’a mi .i xu ro moi lo se skuna be la .kelmar.
.i lo kanla be ra cu masno lo ka di’a ganlo
.i xu mi pu’o zgana lo nu pa prenu cu voi lo pruxi be ki cu cliva lo munje be lo jmive ca’u mi
.i mi catlu .i lo cutne za’o muvdu .i ra za’o vasxu
.i xu mi ĭancu lo ka bajra je cu klagau lo laldykurji
.i ku’i la .kelmar. na simlu lo ka cortu .i mi zmadji lo nu da’i ga ja nai ra ba zi morsybi’o gi mi zvasta je cu kansa ra ca lo ro moi mokca be lo nunjmive be ra .i mi to’e djica lo nu ra nonseka morsybi’o ca lo nu mi zvasisku lo ka’e sidju
.i mu’i ru, mi zvasta je cu denpa fau lo nu mi zgana lo vi prenu poi ze’a lo nanca be li 96 pu zvati lo terdi
.i lo nunjmive be ra cu nu ra mo …
.i xu ca ti ra ca’o sipna sa’u
.i ba lo nu mi ze’a lo mentu be li so’o cu viska no sinxa be lo nu na go’i, cu jdice fa mi lo nu na ckape fa lo nu da’i mi barkla je cu xruti lo ka jibgu’a .i poi’o’a dunku be ri’a lo pu zi fasnu mi cliva lo kumfa pe la .kelmar.
.i mi, ki’u lo nu mi na viska su lo laldykurji, cu xrukla lo jukpyku’a je co’a cnicygau .i lo menli be mi cu kunti .i ca pa da mi gaje cinmo no da gi .odvaca lo kambadri .i pu ca lo clira cerni mi xanka so’o cunso .i ca ti ro da ba’o cirko lo kamvajni .i mi ganzu lo palta je cu jinsygau lo gunkysefta .i ku’i mi lifri no da
.i pa lo laldykurji ca tolcanci .i ra menre lo voi mi trajynei ki lo laldykurji .i ra cpedu tau pa djoguro
.i mi pundu’a lo jai se cpedu
.i «lu xu do pu’i vitke la .kelmar. ca lo cabdei li’u», voi mi na’e steci retsku ki
.i «lu na go’i .i .y mo li’u»
.i mi skuski lo nunlifri be mi bei ne’i lo kumfa pe la .kelmar.
.i «lu ŭe ru’e li’u» .i lo laldykurji cu simlu lo ka no’e xanka .i «lu .i ku’i pa jibrykansa be mi ca’o nenri lo kumfa pe ra .i ca ti di’a fadni fa ro da li’u»
.i «lu … ŭa … li’u», voi mi skuna ki fau lo nuncfipu
.i «lu la’a pu malsenva po’o li’u»
.i «lu je’e .i ĭe’o, ba’e mi ku’i terpa li’u», voi mi skuna ki
.i lo laldykurji cu .apta poi’a nundainmojarco
.i mi selfargau mi lo drata farna te zu’e lo nu ra na viska lo pa nonseka kakydirgo poi cpana lo flira be mi
・・・
ni’o
ca ti mi pu zi zvaxru lo zdani je ca cisfi’i dei
.i tau lo donmijysai pu fasnu fau no barda nabmi (to ku’i mi, ri’a lo nu mi se nandytce lo ka mulju’i, cu pa roi setca lo vi’usta cparaga lo ctitci djacybaktu je nai lo festi baktu toi) .i la .kelmar. ca lo nu mi ca lo donmidju cu re re’u nerkla lo kumfa cu pu co’u tarti lo cizra .i ja’e bo mi ca ti birti lo nu ra ba ca lo bavlamdei ku noi ca ki mi za’u re’u klama lo laldyremnyzda cu za’o zvati
.i ku’i lo pu fasnu cu rinka pa da poi vajni .i da nu mi sanjytce lo nu ro djedi cu voi lo nu la .kelmar. cu cliva lo me ti munje ca ki cu cumki .i cizra fa lo nu lo pu fanzytce prenu ca ti voi lo nu ki stali lo ka jmive cu tai vajni mi .i go’i fa lo nu mi ckire lo munje ca ro cerni poi ca ki no da skuna fi mi «lu lo nu do bregau su sanmi tau la .kelmar. cu co’u sarcu li’u»
.i ze’a ma ba ka’e tavla ra .i ze’a ma ba ka’e gasnu lo nu ra gleki ca lo nu ca lo cerni fi ra bevri pa glare je titlytce ckafi
.i .a’o, doi la .kelmar., lo nu lo munje cu cirko tau do cu za’o ba’arno
fa’o
|
# gugdeʼalu
la .gugde-alu. goi ko'a zi'e no'u lu gugde-alu. zei gubyseltru li'u no'u la'o dy Republika e Shqipërisë dy cu ropno gugde gi'e lamji la .tsrnagoras .e la .kosovas .e la .makedonias .e la xesygu'e .
ni'o la tirana ko'a trutca gi'e raltca .
## Links
- Albania.al. Your gateway to information on Albania.
- Government of the Republic of Albania
|
manri febybi'o nejni
ni'o ca le glanejni vimcu befile gapci be'o pruce le marji cu stodi jdika lo kelvo .ijeku'ibo ca lemu'e le marji kelvo cu dunli le marji selylunsa kei le dukse glanejni vimcu cau le kelvo jdika cu seltcu lenu le marji cu lunsa .i le dukse glanejni nitcu cu dunli ko'a .isi'a ca le glanejni jmina befile litki be'o pruce le marji cu stodi zenba lo kelvo .ijeku'ibo ca lemu'e le marji selfebvi kei le dukse glanejni jmina cau le kelvo jdika cu seltcu lenu le marji cu febvi .ije le dukse glanejni nitcu cu dunli ko'a .i ba lenu le mairtcini cu binxo le kelvo cu stodi binxo
ni'o ko'a cu nitcu lenu porpi lo binselxu'i xumki terkruca ca le nunfebvi .a lenu zbasu lo binselxu'i xumki terkruca ca le nunlunsa |
la viktor medranos cu finti la'e lu la viktor zei pemci li'u i zasti fa le pemcrxaiku e le pemcrsenriu e le pemci vrici ni'oni'o 2011.11.30moi
ni'o fa la liazanias le nanmu ca'o citka i daplu nicte
ni'o ra'i le botpi aucai ca pinxe la glog i jbari moklu
ni'o ga'u le jubme la pampkin pais cu zasti i ca'o citka
ni'o le vi pa'arbau cukta ne'i le tanxe cu zeki'omei
ni'o lojbo terjukpa i aucai uacai citka le lojbo cidja
ni'oni'o 2011.12.01moi ni'o zifre tarmi pemci
i ne'i le prulamdei mi pu citka ne'i la kiyn bok palys poi za'e cidjrkoreia i cidjrbulgogi tanxe i zo'odai djabei i mi ca pilno lo skami i nicte i 01.41moi i ba'a citka la bluberis pais
ni'o pemcrlimeriki i citka lo sanmi co bakni i roda cu gletu lo nakni i melbi fa roda ra'i le bu'uzda i roda cu pinji co nukni
ni'oni'o 2011.12.05moi ni'o zifre tarmi pemci
i ne'i le vondei po'u le mudydei mi pu citka ne'i la somom zei gusta to la NAMbrnain toi i mi citka le tadjrtcili xarju je sudga bo nabysko je mlana bo stasu e le rutrxuatrmelo fomsle tcati e le spatrbambu fonmo je rutrpaupau
i ne'i le mlana jubme lo melbi bunre nanmu cu citka lo crino stagrgailani e lo rasyjukpa finpe e lo nabysko ni'oni'o 2011.12.06moi
ni'o pemcrxaiku ni'o le rutni ckafi cu co'a vrusi melbi to burxekri toi
ni'o loi blabli xanto cu cadzu ne'i loi tricu to glagrute toi |
coi lo se jbobau jo'au zantufa xi papipare
i la skaborfe'a ku noi se sanga mi cu gau se vreji
i mi pilno ke ji'a la celt.arp jo'u la ciblon.damr iau ui
i lo selsa'a cu ve skicu lo nu so'o da livgau mi lo jbogu'e
i e'u do te ciksi lo ka vliraitru kei po la gleki fo la'e di'e
i zoizoi
https://mw.lojban.org/papri/The_egocentrism_of_a_Lojban_community
http://guskant.github.io/lojbo/open_letter/open_letter.html
zoi
to la bripre cu ciska fi'o te tavla dei bau la glico fi'o judri zoizoi
https://www.facebook.com/groups/lojban/permalink/10153680669996705/?comment_id=10153742795056705&comment_tracking=%7B%22tn%22%3A%22R%22%7D
zoi toi
i lo nu sanga cu nu pante la'e di'u gi'e ku'i i'i sarji ro lo se livgau be da bei de
i di'e sanga jufra i tu'e
jo'au zantufa
i xu ganse lo skari bo fenra
i racli sai ro zmanei gentai
i se lu'ei mabla mabla li'au
lo pu co'u pendo be mi
i xu ganse lo skari bo fenra
i racli sai ro zmanei gentai
i se lu'ei do co'u lojbo li'au
lo pu co'u pendo be mi
i xu ganse lo skari bo fenra
i racli sai ro zmanei gentai
i se lu'ei mi ca'a cnano li'au
lo pu co'u pendo be mi
i xu ganse lo skari bo fenra
i racli sai ro zmanei gentai
i mi lu'ei dei mi bangu li'au
lo pu co'u pendo be mi
i xu ganse lo skari bo fenra
i racli sai ro zmanei gentai
i mi lu'ei do mi livgau li'au
lo pu co'u pendo be mi
i xu ganse lo skari bo fenra
i racli sai ro zmanei gentai
i mi lu'ei co'o sai do li'au
lo pu co'u pendo be mi
i xu ganse lo skari bo fenra
i racli sai ro zmanei gentai
i ga nai da cripu lo skaborfe'a
gi do di'a pendo be mi
sei no da cripu
tu'u
|
# gugdrsu,omi
ni'o lo gugdrsu,omi goi ko'a zi'e no'u la'e lu .suomis. zei gubyseltru li'u zi'e no'u la'o sy. Republiken Finland .sy. zi'e no'u la'o sy. Suomen tasavalta .sy. berti ropno gugde .i ko'a se jecybau la'o sy. suomi .sy. .e lo bangrsferi .i so'a lo xabju be ko'a cu se bangu lo bangrsuomi .i so'e le go'i cu se verclibau lo bangrsuomi .iku'i lo'e xabju be la nederland. cu se bangu lo bangrsferi
ni'o la .xelsinkis. ko'a trutca gi'e raltca
|
lujvo
ra'i Wikipedia
lo lujvo cu valsi gi'e se pagbu su'o re rafsi ja valsi
ni'o klesi .i loi lujvo cu se klesi vo da no'u lo nerselmidju lujvo jo'u lo barselmidju lujvo jo'u lo jorne lujvo jo'u lo kruca lujvo .i la lojban. vasru ro xai po'u na'ebo lo barselmidju lujvo
|klesi||velski||jbobau mupli||datybau mupli|
|nerselmidju||lo rodbo'e cu klesi lo brode||zo gerzda||zoi .gy. darkroom .gy|
|barselmidju||lo rodbo'e cu klesi lo nalselsku smustedu||zoi .gy. goosefoot .gy (to gunsyjmaspa toi)|
|jorne||lo rodbo'e cu broda joi brode||zo tranydro .e zo bemjoitco||zoi .gy. sleepwalk .gy|
|appositional||lo rodbo'e cu broda gi'e brode||zo catryseljibri||zoi .sy. sordomudo .sy.| |
la viktor medranos cu finti la'e lu lijda terlisri li'u
ni'oni'o mi jbena fi li 1966 pi'e 01 pi'e 12 fo la pilipinas i li 10 pi'e 45 tcika i sanxuandeDIOS zei spita ne'i la pasais zei tcadu i de'i li 1966 pi'e 02 pi'e 06 lo jdaca'i cu likpu'i mi ne'i la imakiulitkonsepcyn zei masyce'u ne'i la batangas zei tcadu i xrisrkatoliki i ji'a mi nelci le mivmu'e ni'o mi mudri since pe'a ne'i le jungo detci'e i ji'a mi nelci le mivmu'e
ni'o la salgrinxilz ckule ne'i la manilias i mi tadni lo xrisrkatoliki i mi tadni la rozaris poi xriso jdaselsku joi bidju nebja'i i ka'u xriso me la mediteicyn i ji'a mi nelci le mivmu'e ni'o se'o le mi ze'u lijda zo'u pruxyjda to me la animizm toi gi'a budjo ne'i le mi verba cedra i za'a re'e ne'i la pilipinas le budjo blixra poi me la maitre,as cu so'imei i ji'a mi nelci le mivmu'e
ni'o mi klama le kadno de'i li 1976 pi'e 06 pi'e 16 i la mykinis ckule i la eringdyn ckule i mi zvati la lulus noi daplu i ca'a pruxyjda gi'a budjo i la eringdyn ponse lo jdaselsku noi xrisrprotestanti su'a i ji'a mi nelci le mivmu'e ni'o midju ckule ne'i la lulus noi daplu i la lyndyn ckule i la stivzdyn ckule i le mi lanzu cu xrisrbaptisti binxo i u'inai mi joi le mi lanzu cu klama le malsi i ji'a mi nelci le mivmu'e
ni'o mi joi le greizbaptist zei malsi prenu cu klama la beikr poi cmana ne'i la uacintyn zei pagbu pe le merko i prenrpilipino verba i lo jdaca'i cu so'umei i e'odai lo jdaca'i cu krici su'a i u'inaidai lo prenrpilipino na nelci lo snime ga'u le cmana i ku'i ba'e mi nelci i ne'i la beikr mi xabju lo barda zdanrcale i ji'a mi nelci le mivmu'e ni'o ne'i la greizbaptist zei malsi ne'i la vankuvr zei tcadu pe la bycys zei pagbu lo jdaca'i cu me la katanus e la pantoxas i prenrpilipino i pe'idai su'a ky e py zo'u lo xriso na xazdo i pe'idai su'a lo xriso na mapti lo xazdo i ky e py mipri pensi i ji'a mi nelci le mivmu'e
ni'o co'a lo 1984moi mo'u lo 1989moi ne'i le bycys zei balcu'e mi cilre lo saske i ku'i le balcu'e cu barda ba'e makfa i ji'a mi nelci le
mivmu'e
ni'o co'a lo 1992moi mo'u lo 1994moi mi xabju la tokios ne'i le ponjo i mi klama lo budjymalsi e lo malsrcinto i re'e vu zasti i le ponjo cu ba'e makfa i ji'a mi nelci le mivmu'e ni'o mi vitke lo drata gugde i ua i'o i'u la balis noi daplu cu xindo ne'i le baxso i le xelso cu xrisrxortodokso i ua i'o i'u ne'i le xelso lo jdaka'i zdani cu zasti ga'u le cmana i ua i'o i'u ne'i la tais lo budjymalsi cu so'imei i ji'a mi nelci le mivmu'e
ni'o ne'i la vankuvr e la lulus noi daplu mi penmi lo xrisrpentekosta e lo xrisrmormoni e lo xrisrdjexovasuitnesi i ku'i u'inai zvati le vu lijda i la'a mi na'e kakne le du'u jimpe lo stici lijda i mi na'e stici prenu i ji'a mi nelci
le mivmu'e
ni'o mi ca'a pruxyjda gi'a budjo i ji'a mi nelci le mivmu'e ni'oni'o la viktor medranos pu co'a vi finti de'i li 2012 pi'e 01 pi'e 16 i le prula'i te galfi zo'u de'i li 2012 pi'e 01 pi'e 16 tcika |
spuda la selckiku no'u la'e di'e i zoizoi https://soundcloud.com/stela-selckiku/la-nu-mi-troci-lo-nu-kufra zoi
i di'e se bacru to mi dragau lo lerpoi sedi'o zoizoi [ ] zoi toi i tu'e
ki'e la selckiku ku noi se bangu la zantufa
i mi ca zi ta'e finti lo selsa'a
i mi ba za ba'a gubgau lo snavei pe la skaborfe'a
i lo zgike cu dunli la skaborofer
i ku'i lo jufra pe la skaborfe'a cu na'e xe fanva
gi'e simsa lo sance be lo jufra pe la skaborofer
ni'o mi pu zu ji'a fanva lo selsa'a no'u la tanbargu seva'u lo tcidu be la oz
i ku'i mi nu'o rejgau
i la'e di'u noi nu fanva cu se zukte pu lo nu finti la zantufa
i ja'o lo jufra cu tinbe lo catni gerna
i ku'i fi'o se pensi la oz lo jufra pe la tanbargu ji'a cu au tinbe la maftufa noi va'i oz zei zantufa
[i] lo jufra noi mi pu zu fanva fu ke'a cu du di'e
i tu'e
da gapru lo tanbargu ga'u vu
i la'e di'u jai te ci'o sanga fi mi
i
da gapru lo tanbargu sei blanu tsani
ije lo selsne be do co'a jai fatci
i
mi ba za cpedu lo pa tarci
gi'e co'a cikna sei ti'a ze'o dilnu
i
loi raktu ba'o runme tai lo titspi
ga'u lo damtu'u vu ku di'o mi
i
da gapru lo tanbargu i lo blanu cipni
cu vofli se ni'i lo nu mi ji'a no'a
tu'u
tu'u
|
# gusni
lo gusni cu nejni .i lo gusni cu ckaji leka boxna ba'e .e leka kantu .i ro da poi kelvo li za'u no cu te gusni
ni'o lo gusni cu traji lo ka sutra .i li ji'i pa se snidu lo nu lo gusni cu klama lo terdi lo lunra .i lo gusni ca'e trefi'usnidu li 299792458
ni'o lo kanla be lo remna cu viska loi gusni poi boxna folo navytre beli 400 bi'i li 800 .i lo nu lo gusni cu se minra lo dacti gi'e janli lo kanla cu jalge lo nu lo remna cu ganse lo skari
ni'o cida se ckaji lo gusni .i ckaji
- 1 mai le ka boxna .e
- 2 mai leka carmi .e
- 3 mai le ka slijga
|
le daplu cu tumla to da'a braplu toi fi'o sruri le xamsi .a le lalxu .a le rirxe .i li ci cu ralju klesi le daplu le ka selcmene le braplu daplu .e le rirxe daplu .e le terdi spoja daplu .i le remna cu zbasu le rutni daplu .i le girzu ckini daplu cu selcmene le plugri .i |
la viktor medranos cu finti la'e lu viktor zei karni li'u
ni'o de'i li 2012 pi'e 01 pi'e 15 li 08 pi'e 08 tcika i ba'o la purlamdei salci ne'i la cabdei mi citka lo salmone e la spagetis e la sentonoRES zei titnanba ni'o de'i li 2012 pi'e 01 pi'e 15 li 04 pi'e 21 tcika i mi pinxe lo tcatrtcai pe la deivid ri,os
ni'o de'i li 2012 pi'e 01 pi'e 14 li 17 pi'e 07 tcika i pamoi snime ne'i le dunra ne'i la lulus poi daplu ni'o de'i li 2012 pi'e 01 pi'e 04 li 12 pi'e 07 tcika i ze'i lo djedi lo gunse cu so'imei semau 100 ri ne'i le tsani i xa'o dunra i se cfipu i le dunra cu mligla zmadu i lo snime ca'a na'e zasti
ni'o de'i li 2012 pi'e 01 pi'e 04 li 11 pi'e 34 tcika i mi citka lo zduriane pesxu nanba e lo rutni ckafi ni'o de'i li 2012 pi'e 01 pi'e 03 li 14 pi'e 59 tcika i mi puzi klama la danis i ne'i le zdani mi citka lo tadjrkari matne jipci joi rismi e lo tsapi bakni joi rismi i kukte
ni'o de'i li 2012 pi'e 01 pi'e 02 li 10 pi'e 34 tcika i cnino nanca ne'i lo stici detci'e ni'o de'i li 2011 pi'e 12 pi'e 30 li 12 pi'e 09 tcika i mi puzi citka lo finpe joi zumri joi rismi ne'i le gusta po'u la mastr xyn bybykybun i kukte i ji'a ra'unai zo'odai ne'i lo drata stuzi lo ponjo prenu po'u la iagitakecis cusku lu ca'a 4moi masti ne'i lo drata detci'e li'u
ni'o de'i li 2011 pi'e 12 pi'e 20 li 06 pi'e 09 tcika i mi puzi citka la bratfyrst sosidj
ni'o de'i li 2011 pi'e 12 pi'e 20 li 02 pi'e 39 tcika i
le ponjo e la uacintyn steit zo'u me le mi tolci'o lisri i me lu la kokonesias li'u gi'e me lu la plastikandiland li'u i xu la pilipinas cu ponjo pe'a i xu me la okinauas zei daplu pe'a ni'o de'i li 2011 pi'e 12 pi'e 20 li 00 pi'e 30 tcika i lo se senva zo'u se'o o'i e'i ua mi nelci le klama be la madagaskar
ni'o de'i li 2011 pi'e 12 pi'e 19 li 12 pi'e 57 tcika i ro'u a'a mi puza viska lo xazdo melbi bo nanmu ne'i le mi klaji i xu tu xazdrtai i le tu karce cu pritu jitro i lo crino kosta cu taxfu tu ni'o de'i li 2011 pi'e 12 pi'e 19 li 12 pi'e 34 tcika i ne'i le cabdei mi puza citka la pampkin pais e lo crino tcati titnanba i i'o pinxe lo rutrprunu jisra noi se vrusi lo vanju
ni'o de'i li 2011 pi'e 12 pi'e 18 li 11 pi'e 44 tcika i puzi vecnu lo slasi tanxe mi i tanxe ri'a lo tolci'o fraso bo pemci cukta to la'o fy Œuvres complètes de P.-J. de
Béranger fy ra'i lo 1853moi toi ni'o de'i li 2011 pi'e 12 pi'e 18 li 11 pi'e 36 tcika i ne'i le purlamdei lo jungrkantoni ninmu cusku lu citka le do pe'a ba'e festi li'u
ni'o de'i li 2011 pi'e 12 pi'e 18 li 11 pi'e 32 tcika i le mi pendo po'u la le,os puzi dunda mi la'e lu la zgana slanydi'u li'u e la'e lu la cikna li'u ni'o de'i li 2011 pi'e 12 pi'e 18 li 11 pi'e 31 tcika i mi puzi penmi lo xazdo nanmu i mi cusku lu ta tolmakcu kulnu li'u to me la primitiv kyltcr toi
ni'o de'i li 2011 pi'e 12 pi'e 18 li 11 pi'e 26 tcika i a'a mi puza citka la puld pork to tadjrbarbikiu xarju toi ni'o de'i li 2011 pi'e 12 pi'e 18 li 06 pi'e 29 tcika i viska le la'o sy Glögg Alkoholfri sy zei botpi ne'i le kajna
ni'o de'i li 2011 pi'e 12 pi'e 18 li 06 pi'e 07 tcika i a'a mi puzi zgana la'e lu la batlstar galiaktikas li'u i sa'e la'e lu lo djacu li'u cu lisri ni'o de'i li 2011 pi'e 12 pi'e 18 li 03 pi'e 55 tcika i ro'o re'e o'u lebna kerfa stedu cpana gi'e xejykre i cavlu'i
ni'o de'i li 2011 pi'e 12 pi'e 17 li 19 pi'e 10 tcika i o'u pinxe la plym drink to rutrprunu selpinxe toi ni'o de'i li 2011 pi'e 12 pi'e 17 li 08 pi'e 16 tcika i au pensi le vu sralo i senva cedra to me la'o gy The Dreamtime gy gi'a me la'o gy The Dreaming gy toi i le kadno cu lenku |
# lo se mànci te màkfa pe la .oz.
sei la'o gy. L. Frank Baum .gy finti
sei la selpa'i cu fanva
## ni'o ni'o pa mo'o lo vilcarbì'e
ni'o la .dorotis. cu xabju lo midju be lo ganra sastu'a pe la .kanzas. fi'o kansa la nakfamti .xenris. ku noi te cange ku'o .e la fetfamti .em. ku noi speni lo te cange .i lo zdani cu cmalu ki'u lo nu lo mudri poi zy ke'a zilzba cu jai sarcu fai lo ka lo carce cu bevri ce'u ve'a lo minli be li so'i .i zy se pagbu lo vo bitmu .e lo loldi .e lo drudi vu'o noi sumji fa lo pa kumfa .i ky vasru lo furtirse se jvinu toknu .e lo kajnyta'e be lo palta be'o .e lo jubme .e lo ci ji'i vo stizu .e lo ckana .i la nakfamti .xenris. jo'u la fetfamti .em. cu ponse lo barda ckana be bu'u pa lo kojna .i je la .dorotis. cu go'i lo cmalu ckana be bu'u lo drata kojna .i zasti fa no sai drusro .e no lolnitku'a po'u na'e bo lo cmalu kevna poi pu te kakpa lo loldi zi'e poi se cmene «lu vilcarbi'e lolnitku'a li'u» noi lo lanzu ka'e klama la'e ke'a va'o lo nu pa lo barda carbi'e cu tolcanci fau lo nu tsali banzu lo nu da'i marxa ro lo dinju pe lo ra ve muvdu .i pluta lo kevna fo lo lolvro be bu'u lo loldi midju be'o poi lo rajyserti cu cnita ve klama lo cmalu je manku kevna
ni'o la .dorotis. ca lo nu sanli bu'u lo zdani vorme gi'e ru'u catlu cu ka'e viska fa'a ro da no na'e bo lo ganra je grusi sastu'a .i je no tricu .e no zdani cu zvati lo ganra je pinta tumla poi kuspe lo korbi be lo tsani bu'u ro lo farna .i lo solri nu glare cu ba'o rinka lo nu lo se plixa tumla cu binxo lo grusi pesxu poi se fenra lo cmalu .i lo srasu ku ji'a sai na crino .i ki'u bo lo solgu'i cu ba'o jelgau lo jipno be lo clani srasu co'u lo nu sy cu skari lo mintu grusi se skari poi se viska bu'u ro da .i pa roi ku lo zdani cu pu se cintypu'i .i ku'i lo solri cu gasnu lo nu lo cinta cu vasru lo varboi .i je lo carvi cu lumci vimcu .i je ca ku lo zdani cu kandi gi'e grusi vau du'i tu'a ro drata
ni'o la .em. ca lo nu klama ti te zu'e lo nu bu'u xabju cu citno je melbi speni .i lo solri jo'u lo brife cu cnegau .ebu ji'a .i crigau lo kanla lo ka carmi kei ja'e lo nu lo kanla cu sampu grusi .i crigau lo molmla .e lo ctebi lo ka xunre kei ja'e lo nu grusi fa vo'e ji'a .i .ebu cinla gi'e ca no roi cisma .i ca lo nu la .dorotis. noi rircau cu pa re'u klama .ebu kei .ebu tai se spaji lo nu cmila pe lo verba ja'e lo nu krixa gi'e da'ergau lo xance lo risna ca ro nu tirna lo gleki voksa be la .dorotis. .i .ebu za'o catlu lo cmalu nixli fau lo nu manci lo nu zasti fa da poi jai mu'i cmila fai ny
ni'o la nakfamti .xenris. cu no roi cmila .i xy to'e lazni gunka co'a lo cerni co'u lo nicte gi'e na djuno lo du'u lo si'o gleki cu mo kau .i xy ji'a cu grusi fe'e co'a lo ri clani xejykre fe'e co'u lo rufsu cutci gi'e se jvinu lo jursa .e lo junri gi'e so'u roi tavla
ni'o du la .totos. fa lo jai gau cmila be fai la .dorotis. .i ty boi dy nurgau lo nu binxo lo grusi dunli be lo drata vanbi .i la .totos. na grusi .i ty cmalu ke xekri gerku gi'e se kerfa lo clani ke silka simlu gi'e se kanla lo cmalu xekri poi gleki kalga'osli bu'u lo re mlana be lo xajmi je cmatce nazbi .i la .totos. cu kelci ze'a lo mulno djedi .i je la .dorotis. cu kelkansa gi'e mutce lo ka se dirba ty
ni'o ku'i ca lo cabdei cu na kelci .i la nakfamti .xenris. cu zutse lo vorme serti gi'e xanka catlu lo tsani noi grusi ba'e zmadu lo fadni .i la .dorotis. cu sanli bu'u lo vorme fau lo nu jgari la .totos. lo birka kei gi'e si'a catlu lo tsani .i la fetfamti .em. ca'o lumci lo palta
ni'o ra'i lo darno berti cu tirna lo dizlo tonga se patcmo pe lo brife .i je la nakfamti .xenris. .e la .dorotis. cu viska lo nu lo srasu cu se krori'a lo jbibi'o vilti'a tai tu'a lo boxna .i ba bo lo kinli nu siclu bu'u lo vacri ra'i lo snanu cu cfari .i je lo re da ca lo nu fa'a catlu cu viska lo cmalu boxna be lo srasu bei ra'i lo di'u farna ku ji'a
ni'o ca bo suksa fa lo nu la nakfamti .xenris. cu sa'irbi'o
ni'o «lu lo vilcarbi'e ti muvdu doi .em. —sei xy fi lo speni cu cladu cusku— .i mi ba kurji lo danlu li'u» .i ba bo bajra fa'a lo ta'ozda noi lo bakni jo'u lo xirma cu se setca fi ke'a
ni'o la fetfamti .em. cu co'u gunka gi'e klama lo vorme .i .ebu ca lo nu ze'i pa re'u catlu cu djuno lo du'u ma kau ckape
ni'o «lu ko sutra doi .dorotis. —sei .ebu krixa— .i ko bajykla lo lolnitku'a li'u»
ni'o la .totos. cu plipe fi lo birka be dy gi'e sezyselmragau ni'a lo ckana .i je lo nixli cu co'a cpacu klama .i la fetfamti .em. fau lo nu terpa mutce cu kargau lo lolvro be bu'u lo loldi gi'e fa'a ni'a cpare lo rajyserti se ka'a lo cmalu je manku kevna .i la .dorotis. cu ro mai kavbu la .totos. gi'e co'a jersi lo fetfamti .i ca lo nu ba'o xadba pagre lo kumfa cu se sance lo cladu savru fa lo brife .i je lo zdani cu tai rufsu slilu ja'e lo nu dy gau co'u sanli gi'e jai suksa fai lo ka tsebi'o lo loldi
ni'o ba bo lo cizra cu fasnu
ni'o lo zdani cu re ji'i ci roi carna gi'e masno lo ka galze'a pa'o lo vacri .i la .dorotis. cu cinmo lo simsa be lo ka galze'a fau lo nu nenri lo vartisyboi
ni'o lo berti fa'u snanu brife cu pensi'u lo stuzi be lo zdani ja'e lo nu zy binxo lo satci midju be lo vilcarbi'e .i bu'u lo midju be lo vilcarbi'e lo vacri cu ta'e bifcau .i ku'i lo barda ni lo brife cu danre bu'u ro lo mlana be lo zdani cu rinka lo nu lo zdani cu zenba je zenba lo ka galtu kei co'u lo nu zvati lo prane galraipau be lo vilcarbi'e .i je stali gy gi'e to'o se bevri ve'a lo minli be li so'i se kai lo ka frili dunli lo nu bevri lo pimlu
ni'o mutce lo ka manku .i je lo brife cu mabla cmoni ru'u la .dorotis. .i ku'i dy co'a sanji lo du'u se marce se frili .i ba lo pa moi be lo su'o mei co nu ru'u carna .e lo pa drata jai ca nu lo zdani cu mutce lo ka mlapau carna cu cinmo lo ka toljursa se sligau tai tu'a lo cifnu pe bu'u lo slicka
ni'o la .totos. na nelci .i bajra ru'u bu'u lo kumfa fau lo nu zvati nu'i ge ca pa da ti nu'u gi ca pa de ta nu'u fau lo nu cladu cmoni .i ku'i la .dorotis. cu smaji zutse lo loldi gi'e denpa te zu'e lo nu zgana lo da'i ba fasnu
ni'o pa roi ku la .totos. cu binxo lo dukse be lo ka jibni lo kalri lolvro kei gi'e pa'o farlu .i pa mai lo cmalu nixli cu jinvi lo du'u ba'o cirko ty .i ku'i ba zi viska lo nu pa lo kerlo cu pagre lo vorme .i ki'u bo lo barda ni danre pe lo vacri cu stogau ty lo ka galtu kei ja'e lo nu na ka'e farlu .i ny cpare fi lo vorme gi'e co'a jgari la .totos. fo lo kerlo gi'e lacpu ty fa'a lo nenri be lo kumfa gi'e ba bo ga'orgau lo lolvro te zu'e lo nu no se jmina snuti ka'e fasnu
ni'o so'i lo cacra cu se fanmo .i je masno fa lo nu la .dorotis. cu binxo lo ka co'u terpa .i ku'i dy cinmo lo ka sepcni mutce .i je lo brife cu tai cladu se sance ja'e lo nu dy na ru'e binxo lo tinynalka'e .i ca lo cfari dy kucli lo du'u xu kau dy ba se marxa ja'e lo so'i spisa va'o lo nu lo zdani cu di'a farlu .i ku'i fau lo nu lo cacra cu se fanmo .e lo nu no xlatce cu fasnu kei dy co'u xanka gi'e jdice lo nu smacni denpa gi'e facki lo du'u lo balvi cu mo kau .i ro mai dy cpare lo desku loldi lo vo'a ckana gi'e vrebi'o lo gapru .i je la .totos. cu jersi gi'e vrebi'o lo jibni be dy
ni'o to'e ki'u nai lo nu lo zdani cu slilu .e lo nu savru se sance fa lo brife kei la .dorotis. cu ba zi ga'orgau lo kanla gi'e sipybi'o
## ni'o ni'o re mo'o lo nu pènmi lo màxpre
ni'o la .dorotis. cu se cikyri'a lo jenca poi tai suksa gi'e tai jursa vau ja'e lo nu da'i la .dorotis. va'o lo nu na cpana lo ranti ckana cu se xrani .i da'i nai lo jenca cu rinka lo nu dy cu barda vasxu gi'e kucli lo du'u ma kau pu fasnu .i je la .totos. cu punji lo ri lenku ke cmalu nazbi lo flira be dy gi'e badri patcmo .i la .dorotis. cu tsebi'o gi'e sajbi'o lo nu ge nai lo zdani cu muvdu gi na'e manku ki'u lo carmi solgu'i cu pagre lo canko fau lo nu culgau lo cmalu kumfa .i dy plipe fi lo ri ckana gi'e bajra fau lo nu la .totos. cu jibni jersi kei gi'e kargau lo vorme
ni'o lo cmalu nixli cu manci krixa gi'e ru'u catlu fau lo nu lo kanla cu banro je banro se ja'e lo nu viska lo tai se manci
ni'o lo vilcarbi'e pu toljursa mutce punji (to ma'i lo vilcarbi'e toi) lo zdani lo midju be lo se manci melbi gugde .i zvati fa lo kukte sastu'a pe lo melbi tricu poi se dandu lo ricfu je kukte grute .i lo foldi be lo mlecai xrula cu zvati ro lo mlana .i je lo cipni pe lo rirci je carmi pimlu cu sanga gi'e na'irsutyvoi ne'i lo tricu .e lo demspa .i va lo tordu milxe da cmalu rirxe gi'e muvdu je mircai pagre lo jbini be lo crino sastu'a gi'e kandi bacru se pi'o lo voksa poi mutce lo ka jai te ckire fi lo cmalu nixli poi xabju ze'a lo tai clani lo sudga je grusi sastu'a
ni'o la .dorotis. ca lo nu ca'o kucli catlu lo cizra joi melbi vanbi cu co'a sanji lo poi fa'a dy klama ku'o gunma be lo cizrai be lo ro prenu poi dy ke'a ba'o viska .i lo prenu cu cmamau lo makcu poi dy ke'a se slabu .i ku'i ji'a na mutce lo ka cmalu .i je'u py simlu lo ka cladu'i la .dorotis. ku noi banro sutra ma'i lo na'asmi verba kei gi'e ku'i jvinu simlu lo ka na'azma dy li so'i
ni'o gunma lo ci nanmu .e lo pa ninmu .i je ro se go'i cu dasni lo cizra .i dasni lo cukla mapku poi konju fi lo cmalu poi gutci li pa lo ni gapru lo stedu ku'o ku'o zi'e pe lo mapku sruri ke cmalu janbe poi jabyselsna lo titla ca lo nu muvdu .i lo mapku pe lo nanmu cu blanu .i je lo mapku pe lo cmalu ninmu cu blabi .i je ny cu dasni lo blabi pastu poi cinje dandu lo janco .i py se barna lo so'i tarci poi carmi bu'u lo solgu'i tai tu'a lo tabjme .i lo nanmu cu dasni lo blanu pe lo mintu selskalei pe lo mapku gi'e dasni lo xamgu se spali cutci poi lo blanu bolci cu jorne ke'a lo jipno .i lo nanmu (to la .dorotis. cu jinvi toi) cu kaijbi lo ka dunli la nakfamti .xenris. lo ka tolci'o .i ki'u bo re lo nanmu cu se xejykre .i ku'i lo cmalu ke tolci'o ninmu cu ju'o sai tolci'o zmadu mutce .i lo flira be ny cu se gacri lo cinje .i lo kerfa be ny cu na ru'e blabi .i je ny cu tinsa nalmli cadzu
ni'o lo bi'u nai prenu ca lo nu jbibi'o lo zdani noi la .dorotis. cu sanli lo ke'a vorme cu klasti gi'e lauble casnu vau tai lo nu terpa lo nu zenba lo ka jibni .i ku'i lo cmalu ke tolci'o ninmu cu klama la .dorotis. gi'e krobi'o rinsa gi'e cusku se pi'o lo titla voksa
ni'o «lu do zanvi'e doi nobli te makfa lo gugde be la maxpre .i mi'a do tai ckire lo nu do ba'o catra la palci termafyfe'i pe la stuna kei .e lo nu tolpifygau lo mi'a se gugde li'u»
ni'o la .dorotis. cu tinju'i lo se cusku fau lo nu se cfipu .i ki'u ma lo cmalu ninmu cu te cmene dy «lu te makfa li'u» gi'e xusra lo du'u dy catra la palci termafyfe'i pe la stuna .i la .dorotis. cu zernalfu'e je nalckape ke cmalu nixli gi'e se bevri lo vilcarbi'e ve'a lo minli be li so'i .i je ze'a pi ro lo nunji'e dy no roi catra da
ni'o ku'i lo cmalu ninmu cu za'a kanpe lo nu dy cu spuda .i se ki'u bo la .dorotis. se cau lo nu denpa cu cusku «lu do mutce lo ka xendo .i ku'i ju'o da se srera .i mi no da catra li'u»
ni'o «lu se ju lo do zdani cu co'e —sei lo cmalu ke tolci'o ninmu fau lo nu cisma cu cusku— .i je la'e di'u mintu .i ko catlu —sei ny fau lo nu degja'o lo kojna be lo zdani cu di'a co'e— .i lo re jamfu be ty cu za'o bancu fi lo cnita be lo mudri bliku li'u»
ni'o la .dorotis. cu catlu gi'e krixa co terpa .i je'u va ku lo cnita be lo kojna be lo barda kamju poi lo zdani cu se sarji ke'a cu krasi lo re jamfu poi dasni lo rijno cutci pe lo kinli crapau
ni'o «lu ii ii —sei la .dorotis. cu terpa krixa be fau lo nu xance jalsimgau— .i ju'o lo zdani pu farlu ta .i .ei mi'o mo li'u»
ni'o «lu no da se bilga —sei lo cmalu ninmu cu nalselra'u cusku— li'u»
ni'o «lu ku'i ta mo —sei la .dorotis. cu retsku— li'u»
ni'o «lu ke'u ta me la palci te makfa pe la stuna —sei lo cmalu ninmu cu spusku— .i se pinfu ro la maxpre ze'a lo nanca be li so'i fau lo nu la maxpre cu selfu ze'a lo nicte jo'u lo donri .i ca ku ro la maxpre cu zifre gi'e ckire do lo nu xagzu'e li'u»
ni'o «lu la maxpre cu mo —sei la .dorotis. cu te preti— li'u»
ni'o «lu my se gugde lo vi gugde pe la stuna ge'u noi la palci termafyfe'i pu turni li'u»
ni'o «lu xu do maxpre —sei la .dorotis. cu retsku— li'u»
ni'o «lu na go'i .i ku'i mi pendo my to'e ki'u nai lo nu mi xabju lo gugde pe la berti .i la maxpre ca lo nu viska lo nu lo te makfa pe la stuna cu morsi cu benji lo notybei mi .i je mi klama zi .i mi'e la te makfa pe la berti li'u»
ni'o «lu ue sai —sei la .dorotis. cu krixa— .i xu do jetnu termafyfe'i li'u»
ni'o «lu je'u go'i —sei lo cmalu ninmu cu spusku— .i ku'i mi vrude termafyfe'i .i je lo prenu mi prami .i mi vlipa mleca la palci termafyfe'i ku poi vi turni .i se va'o nai bo da'i ba'e mi pu tolpifygau lo prenu li'u»
ni'o «lu ku'i mi pu sruma lo du'u ro termafyfe'i cu palci —sei lo nixli noi xadba terpa lo nu jikca lo jetnu termafyfe'i cu cusku— li'u» .i «lu la'e di'u se srera .i pu zasti fa lo vo po'o termafyfe'i bu'u lo mulno gugde pe la .oz .i re boi ty poi xabju la berti fa'u la snanu cu vrude termafyfe'i .i mi djuno lo du'u jetnu kei ki'u lo nu mi me lo vo mei .i lo xabju be la stuna be'o .e lo xabju be la stici cu je'u palci termafyfe'i .i ku'i ca lo cabna poi nu do ba'o catra pa boi ty cu zvati lo mulno gugde pe la .oz. fa pa po'o palci termafyfe'i no'u la xabju be la stici li'u»
ni'o «lu ku'i —sei la .dorotis. ba lo nu ze'i pensi cu cusku— la fetfamti .em. mi pu jungau lo du'u lo ro termafyfe'i cu mrobi'o pu za lo nanca be li so'i so'i li'u»
ni'o «lu la fetfamti .em. cu mo —sei lo cmalu ke tolci'o ninmu cu te preti— li'u»
ni'o «lu .ebu fetfamti mi gi'e xabju la .kanzas. ku noi mi pu klama fi ke'a li'u»
ni'o la termafyfe'i pe la berti cu simlu lo ka ze'a pensi kei fau lo nu lo vo'a stedu cu nitsalpo joi lo nu lo kanla cu se farna lo loldi .i ba bo ty cu fa'a ga'u catlu gi'e cusku «lu mi na djuno lo du'u ma kau stuzi la .kanzas .i ki'u bo mi pu no roi tirna lo nu lo bi'u nai gugde cu te tavla .i ku'i ko mi jungau .i xu ky cu lujyklu gugde li'u»
ni'o «lu ja'a go'i —sei la .dorotis. cu spusku— li'u»
ni'o «lu ja'o la'e di'u krinu .i ia bu'u lo lujyklu gugde no termafyfe'i cu za'o jmive .i je nai su'o mafcre .a su'o mafpli .a su'o te makfa cu go'i .i ku'i lo gugde pe la .oz. pu no roi se lujyklugau .i ki'u bo mi'a sepli pi ro lo ve vimcu be fi lo munje .i se ki'u bo za'o me mi'a fa lo termafyfe'i .e lo te makfa li'u»
ni'o «lu te makfa fa ma —sei la .dorotis. cu retsku— li'u»
ni'o «lu la .oz. cu du la banli te makfa —sei la termafyfe'i fau lo nu laurjdikygau lo voksa ja'e lo nu toncauba'u cu spusku— .i .obu vlipa zei zmadu lo ro mi'a poi gunma .i .obu xabju la ri'ojme tcadu li'u»
ni'o la .dorotis. cu pu'o da'i te preti fi lo se jmina .i ku'i ca ku la maxpre ku noi pu ca'o pu ca'o ne'a smaji sanli cu cladu cmoni gi'e degja'o lo kojna be lo zdani be'o noi la palci termafyfe'i pu ca'o vreta
ni'o «lu mo li'u» se retsku lo cmalu ke tolci'o ninmu noi catlu gi'e co'a cmila .i lo jamfu be lo morsi termafyfe'i cu ba'o mo'u canci .i je no da po'u na'e bo lo rijyska cutci cu ve vimcu
ni'o «lu ty pu tai tolci'o —sei la termafyfe'i pe la berti cu ciksi— ja'e lo nu sutra lo ka sudbi'o bu'u lo solgu'i .i lo cabna cu fanmo ty .i ku'i lo rijno cutci ca me do moi .i je .ei do dasni li'u» .i ty tengau lo birka gi'e lebna lo cutci .i je ba lo nu desygau vimcu lo pulce lo nenri be cy cu dunda cy la .dorotis.
ni'o «lu la termafyfe'i pe la stici pu jgira tu'a lo va cutci —sei pa la maxpre cu cusku— .i je cy cu vasru da poi makfa .i ku'i lo du'u ma kau makfa zo'u: mi'a pu no roi djuno li'u»
ni'o la .dorotis. cu bevri lo cutci lo nenri be lo zdani gi'e punji cy lo jubme .i ba bo dy cu bartu xruti la maxpre gi'e cusku
ni'o «lu mi carmi lo ka djica lo nu xruti lo mi fetfamti .e lo mi nakfamti .i ki'u bo mi birti lo du'u ra xanka tu'a mi .i xu do mi ka'e sidju lo nu mi facki lo du'u ma kau pluta li'u»
ni'o la maxpre joi la termafyfe'i cu catlu simxu gi'e ba bo catlu la .dorotis. gi'e ba bo desygau lo vo'a stedu
ni'o «lu na'e vu bu'u la stuna —sei pa boi my cu cusku— cu barda kutytu'a .i je no da ka'e pagre li'u»
ni'o «lu mintu lo tcini pe bu'u la snanu —sei lo drata cu cusku— .i ki'u bo mi ba'o zvati gi'e ba'o viska .i la snanu cu gugde la vonpre li'u»
ni'o «lu ti'e —sei lo ci moi be lo nanmu cu cusku— mintu bu'u la stici .i je lo va gugde noi la .uinkis. cu xabju cu se turni la palci termafyfe'i pe la stici ge'u ku noi sefygau do va'o lo nu da'i do lampagre li'u»
ni'o la berti cu zdani mi —sei lo tolci'o ninmu cu cusku— .i je se korbi lo mintu ke barda kutytu'a poi sruri lo vi gugde pe la .oz .i uu ru'a doi pe mi dirba do bi'ai xabju kansa mi'a li'u»
ni'o la .dorotis. cu co'a klaku fi la'e di'u .i ki'u bo dy cu cinmo lo ka nonkansa bu'u lo ro vi fange prenu .i lo se klaku be dy cu simlu lo ka drigau la xendo maxpre .i ki'u bo my cu ba zi lebna lo vo'a zbibu'u gi'e si'a co'a klaku .i lo cmalu ke tolci'o ninmu zo'u: ny toldasybi'o lo ri mapku gi'e lanxe cpanygau lo te konju lo vo'a nazbi ca lo nu kancu cusku «lu pa .i re .i ci li'u» se pi'o lo junri voksa .i ba zi bo lo mapku cu binxo lo tanbo noi te ciska se pi'o lo barda je blabi ke bakri lerfu
## KO CuRMI LO NU LA .DoROTIS. CU KLaMA LA RI'oJME TCaDU
li'u»
ni'o lo cmalu ke tolci'o ninmu cu lebna lo tanbo lo ra nazbi gi'e retsku ca lo nu ba'o tcidu lo valsi kei «lu xu do se cmene zo .dorotis. doi dirba li'u»
ni'o «lu go'i —sei lo verba fau lo nu fa'a ga'u catlu gi'e sudgau lo se klaku cu spusku— li'u»
ni'o «lu va'o ku do klama .ei la ri'ojme tcadu .i ju'o cu'i la .oz. do ba sidju li'u»
ni'o «lu ma stuzi lo tcadu —sei la .dorotis. cu retsku— li'u»
ni'o «lu lo prane midju be lo gugde .i se turni la .oz. no'u la banli te makfa poi mi pu tavla do ke'a li'u»
ni'o «lu xu .obu xamgu nanmu —sei lo nixli cu xanka te preti— li'u»
ni'o «lu .obu xamgu te makfa .i lo du'u xu kau nanmu cu na ka'e se djuno mi .i ki'u bo mi no roi viska .obu li'u»
ni'o «lu ta'i ma mi ka'e klama —sei la .dorotis. cu retsku— li'u»
ni'o «lu .e'i do cadzu .i clani nu litru pa'o lo gugde poi su'o roi jai pluka gi'e su'o roi manku joi mabla .i ku'i mi ba pilno ro lo makfa larcu poi mi se slabu ku'o te zu'e lo nu do se bandu fi lo ckape li'u»
ni'o «lu xu na ku do mi klama kansa —sei lo nixli noi pu co'a jinvi lo du'u lo cmalu ke tolci'o ninmu ku po'o pendo cu cpedu cusku— li'u»
ni'o «lu na go'i .i mi na kakne —sei ny spuda— .i ku'i mi do ba cinba .i no da darsi lo nu crogau lo prenu poi ba'o se cinba la termafyfe'i pe la berti li'u»
ni'o ny jbikla la .dorotis. gi'e toljursa cinba dy lo mebri .i tolcanci lo ve pencu be lo nixli bei lo ctebi fa lo pa cukla je carmi barna (to la .dorotis. cu ba za facki toi)
ni'o «lu lo dargu be la ri'ojme tcadu cu se gacri lo pelxu kitybli —sei la termafyfe'i cu cusku— .i se ki'u bo frili fa lo nu tolcri .i ko ca lo nu do tolcliva la .oz. cu na terpa tu'a .obu gi'e cpedu lo ka .obu do sidju .i co'o pe mi dirba li'u»
ni'o lo ci maxpre cu dizlo krobi'o fa'a dy gi'e zandapma dy lo pluka nunli'u gi'e ba bo to'o cadzu pa'o lo tricu .i la termafyfe'i cu xendo ke stedu muvdu fa'a la .dorotis. gi'e ci roi carna fi'o te sanli lo jmati'e gi'e jai suksa fai lo ka canci .i la'e di'u fanza zei mutce la .totos. ku noi fa'a cladu gercmo ca lo nu ba'o canci kei ki'u lo nu ty pu terpa lo nu gercmo ca lo nu la termafyfe'i cu ca'o zvati
ni'o ku'i la .dorotis. ki'u lo nu djuno lo du'u ty termafyfe'i cu kanpe lo nu ty cu canci du'i la'e di'u .i je dy na sai se spaji
## ni'o ni'o ci mo'o lo nu la .dorotis. cu nurgau la cpitepygau
ni'o la .dorotis. ca lo nu no drata cu zvati cu co'a xagji .i ja'e bo dy cu klama lo kajnyta'e gi'e se va'u katna lo nanba noi dy punji lo matne ke'a .i dunda lo pi su'o si'e la .totos. gi'e lebna lo baktu lo kajna gi'e bevri by lo cmalu rirxe gi'e tisygau by lo klina je carmi djacu .i la .totos. cu bajra klama lo tricu gi'e co'a batci fa'a lo cipni poi zutse ty .i la .dorotis. cu klama te zu'e lo nu cpacu la .totos. kei gi'e viska lo tai kukte grute poi dandu lo jimca ku'o ja'e lo nu jajgau lo pi so'u si'e fau lo nu jinvi lo du'u prane lo ka mapti lo nu jmina fi lo cersai
ni'o ba bo dy cu xruti lo zdani .i je ca lo nu ba'o gasnu lo xamgu nu vo'a .e la .totos. cu pinxe lo lenku je klina djacu cu co'a zukte lo ka brebi'o lo nu litru se ka'a la ri'ojme tcadu
ni'o la .dorotis. cu ponse pa po'o taxfu .i ku'i je'u ty jinsa gi'e dandu lo grana be ne'a lo ckana .i ty marji lo gingamu ne lo blabi jo'u blanu kurfa .i je ty. to'e ki'u nai gi lo blanu cu ba'o milxe lo ka kadbi'o gi ja'a melbi taxfu .i lo nixli cu srerivzu'e sezlu'i gi'e dasybi'o lo jinsa gingamu bo taxfu gi'e lasna lo xunblabi solmapku lo stedu be ny .i ny lebna lo cmalu lanka gi'e clugau ly lo nanba pe lo kajnyta'e fau lo nu punji lo blabi bukpu lo gapru .i ba bo ny. fa'a ni'a catlu lo ny. jamfu gi'e sajbi'o lo du'u ma kau ni lo cutci pe ny cu laldo
ni'o «lu ju'o ti na banzu lo clani nunli'u doi .totos. —sei dy cusku— li'u» .i je la .totos. cu fa'a ga'u catlu lo flira be dy te ga'a lo vo'a cmalu ke xekri kanla gi'e desygau lo rebla te zu'e lo nu jarco lo ka djuno lo du'u dy ma kau skudji
ni'o ca bo la .dorotis. cu viska lo nu cpana lo loldi fa lo rijno cutci poi pu se ponse la termafyfe'i pe la stuna
ni'o «lu mi kucli lo du'u xu kau cy mi mapti —sei dy fi la .totos. cu cusku— .i cy mapti ju'o lo barda nu cadzu se pi'o cy .i ki'u bo da'i cy cu no roi selplidu'e li'u»
ni'o dy co'u dasni lo ri tolci'o ke skapi cutci gi'e troci co dasni lo rijno cutci noi mapti zei prane dy tai lo nu da'i cy pu se zbasu te zu'e tu'a dy
ni'o ro mai lafti lo lanka
ni'o «lu ko klama doi .totos. —sei dy cusku— .i mi'o ba klama la ri'ojme tcadu gi'e retsku fi la banli .oz. fe lo se du'u ta'i ma kau xruti la .kanzas. li'u»
ni'o dy ga'orgau lo vorme gi'e telgau gi'e ralci setca lo ckiku lo daski be lo taxfu .i ja'e bo fau lo nu la .totos. cu cikcni ke cadzu jersi cu co'a litru
ni'o so'o da jibni dargu .i ku'i la .dorotis. na nitcu lo clani se ditcu lo nu tolcri lo dargu poi se gacri lo pelxu kitybli .i ba zi lo tordu dy ca'o cadzu sutra fa'a la ri'ojme tcadu fau lo nu lo vo'a rijno cutci cu gleki jabyselsna do'e lo jdari je pelxu ke dargu sefta .i lo solri cu carmi te gusni .i je lo cipni cu titla sanga .i je la .dorotis. cu na sai xlali cinmo du'i lo noi ju'o cu'i do ke'a kanpe ku'o nu lo nixli poi pu jai suksa fai lo ka se vimcu fi lo zdani gugde gi'e se punji fi lo midju be lo fange gugde cu ja'a no'a
ni'o dy se spaji ca lo nu ca'o cadzu kei lo nu lo sruri gugde cu tai melbi .i lo cnici bitmu cu zvati lo re mlana be lo dargu gi'e zilcintypu'i lo kukte blanu .i je ze'o lo bitmu cu foldi lo gurni .e lo te stagi fa lo so'i rau mei .i za'a la maxpre cu certu te cange gi'e kakne lo ka kurji lo barda te crepu .i di'i ru'e ku la .dorotis. cu lampagre lo zdani .i je lo prenu cu barkla te zu'e lo nu catlu dy gi'e krobi'o fa'a dy ca lo nu dy cu lampagre .i ki'u bo ro da djuno lo du'u dy pu tutci lo nu daspo la palci termafyfe'i gi'e sefselfamgau my .i lo zdani pe la maxpre cu cizyselji'u dinju .i ni'i bo zy cu slanu .i je drudi fa lo bolxadba .i ro boi zy cu zilcintypu'i fa lo blanu .i ki'u bo bu'u lo vi gugde pe la stuna lo blanu cu selneirai skari
ni'o ca lo nu co'a vanci noi nu la .dorotis. co'a tatpi lo nu ve'u cadzu kei gi'e co'a kucli lo du'u .ei dy ma kau zvati ze'a lo nicte zo'u: dy tolcliva lo zdani poi nalmli lo ka bramau lo drata .i bu'u lo crino sastu'a be ca'u zy cu dansu fa lo so'i nanmu .e lo so'i ninmu .i lo mu cmalu verba cu kelci se rai lo ka cladu .i je lo prenu cu cmila gi'e sanga .i fau bo lo ne'a jubme cu culno lo kukte grute fa'u narge .e lo pesxu .e lo titnanba .e lo so'i drata ke xamgu cidja
ni'o lo prenu cu xendo rinsa la .dorotis. gi'e friti lo nu dy cu kansa py lo nu vacysai citka .i ki'u bo ti zdani lo pa cmima be lo cfurai be la maxpre ku pe lo gugde .i je lo pendo be cy cu jmaji cy te zu'e lo nu salci lo nu zifre lo ka na selfu la palci termafyfe'i
ni'o la .dorotis. cu citka lo kukte vacysai gi'e se selfu lo ricfu maxpre noi se cmene zo .bok .i ba bo dy cu tsebi'o lo sfofa gi'e catlu lo nu lo prenu cu dansu
ni'o ca lo nu la .bok. cu viska lo rijno cutci pe la .dorotis. cu cusku «lu ju'o ru'a do banli te makfa li'u»
ni'o «lu ki'u ma —sei lo nixli cu retsku— li'u»
ni'o «lu ki'u lo nu do dasni lo rijno cutci gi'e pu catra la palci termafyfe'i .i ji'a lo do taxfu cu vasru lo blabi .i je no na'e bo lo termafyfe'i cu dasni lo blabi li'u»
ni'o «lu lo mi taxfu cu se prina lo blanu jo'u blabi kurfa —sei la .dorotis. fau lo nu xulgau vimcu lo cinje be ty cu cusku— li'u»
ni'o «lu do xendo lo nu dasni ta —sei la .bok. cu cusku— .i blanu fa lo skari pe la maxpre .i je blabi fa lo skari pe lo termafyfe'i .i ja'o mi'a djuno lo du'u do xendo termafyfe'i li'u»
ni'o la .dorotis. cu na djuno lo du'u .ei spuda la'e di'u ma kau .i ki'u bo ro lo prenu cu simlu lo ka jinvi lo du'u dy termafyfe'i .i je dy cu ja'a sai djuno lo du'u sa'u dy fadni ke cmalu nixli gi'e funca klama ri'a lo vilcarbi'e lo cizra gugde
ni'o ca lo nu dy ba'o co'a tatpi lo nu catlu lo nundansu kei la .bok. cu klagi'a dy lo zdani nenri noi bu'u ke'a by dunda fi dy fe lo kumfa poi vasru lo melbi ckana .i lo ckagai cu marji lo blanu bukpu .i je la .dorotis. cu panpi sipna se ru'u cy co'u lo cerni
ni'o dy citka lo ricfu cersai gi'e catlu lo cmalu ke maxpre cifnu noi kelci la .totos. gi'e lacpu lo rebla gi'e ge krixa gi cmila vau tai da poi la .dorotis. cu mutce lo ka se zdile ke'a .i la .totos. cu xamgu cinri lo ro prenu .i ki'u bo py cu pu no roi viska lo gerku
ni'o «lu ma ni darno la ri'ojme tcadu —sei lo nixli cu te preti— li'u»
ni'o «lu mi na djuno —sei la .bok. cu junri spuda— .i ki'u bo mi no roi zvati ty .i xagmau fi lo prenu fa lo nu darno la .oz. va'o lo nu na se cuntu fa py joi .obu .i ku'i clani ve klama la ri'ojme tcadu .i je lo djedi be li so'i ba ditcu .i lo vi gugde cu ricfu gi'e pluka .i ku'i do nitcu lo nu pagre lo rufsu je ckape stuzi pu lo nu do tolcliva lo fanmo be lo do nunli'u li'u»
ni'o la'e di'u milxe se xanka la .dorotis. .i ku'i dy djuno lo du'u no na'e bo la .oz. cu ka'e sidju dy lo nu xruti la .kanzas. .i se mu'i bo dy cu virnu jdice lo du'u na ba tolselfarbi'o
ni'o dy tolrinsa lo pendo be dy gi'e za'u re'u co'a litru lo pelxu kitybli dargu .i ca lo nu ba'o klama ve'a lo minli be li so'i cu jdice lo nu klasti te zu'e lo nu surla .i ja'e bo parkla lo gapru be lo bitmu poi jibni lo klaji ku'o gi'e tsebi'o .i lo barda grufoi cu ragve lo bitmu .i je lo naldarno zo'u dy viska lo cpitepygau noi galtu zvati lo grana te zu'e lo nu fanta lo nu lo cipni cu jbibi'o lo makcu gurni
ni'o la .dorotis. cu cpanygau lo xejni'a lo xance gi'e pensi catlu la cpitepygau .i stedu cy fa lo cmalu dakli noi terse'a lo sudysrasu zi'e noi lo kanla .e lo nazbi .e lo moklu cu pu se cintypu'i te zu'e lo nu sinxa lo flira .i lo tolci'o ke se kilji'o je blanu mapku poi pa la maxpre pu ponse ke'a cu ba'o se punji fi lo gapru be lo stedu be cy .i je lo te zilvi'u be lo prenu cu marji lo blanu taxfu noi ba'o selplidu'e gi'e ba'o kadbi'o ku'o gi'e ji'a terse'a lo sudysrasu .i lo jamfu cu dasni lo tolci'o cutci ne lo blanu jipno (to dunli lo se dasni be lo ro prenu poi xabju lo vi gugde toi) .i je lo bi'u nai prenu cu gau galtu fi lo stani be lo gurni se pi'o lo grana poi pagre lo trixe be py
ni'o ca lo nu la .dorotis. cu ca'o junri catlu lo cizra je se cintypu'i flira be la cpitepygau kei dy se spaji lo nu viska lo nu cy. masno kalgaisligau .i dy ca lo cfari cu jinvi lo du'u ju'o dy srera .i ki'u bo no lo cpitepygau pe la .kanzas. cu su'o roi kalgaisligau .i ku'i nau ku lo prenu cu sedyfarmu'u fa'a dy tai lo te xendo .i ba bo dy nitparkla lo bitmu gi'e cadzu fa'a py fau lo nu la .totos. ru'u lo grana cu bajra gi'e gercmo
ni'o «lu coi —sei la cpitepygau cu sudga voksa cusku— li'u»
ni'o «lu xu do pu tavla —sei lo nixli fau lo nu manci cu retsku— li'u»
ni'o «lu ju'o —sei la cpitepygau cu spuda— .i ma do li'i cabna li'u»
ni'o «lu lo xamgu ki'e do'u —sei la .dorotis. cu clite spusku— .i ma do li'i cabna li'u»
ni'o «lu mi na cinmo lo pluka —sei la cpitepygau fau lo nu cisma cu cusku— .i ki'u bo mutce lo ka tolzdi kei fa lo nu ca ge lo nicte gi lo donri cu tepygau lo korvo li'u»
ni'o «lu xu na kakne lo ka fa'a ni'a klama —sei la .dorotis. cu retsku— li'u»
ni'o «lu na go'i .i ki'u bo lo vi grana cu pagre lo mi trixe .i .e'o va'o gi do vimcu lo grana gi mi mutce lo ka ckire do li'u»
ni'o la .dorotis. cu pejgau lo re birka gi'e viclafti lo prenu lo grana .i ki'u bo py ri'a lo nu terse'a lo sudysrasu cu linto tcemli
ni'o «lu ki'e sai do —sei la cpitepygau ca lo nu ba'o punji fi lo loldi cu cusku— .i mi cinmo lo ka cnino prenu li'u»
ni'o la .dorotis. cu se spaji la'e di'u .i ki'u bo simlu lo ka cizra kei fa lo nu tirna lo nu lo terse'a nanmu cu tavla kei kei .e lo nu viska lo nu ny cu krobi'o rinsa gi'e kansa cadzu pa'a tu'a dy
ni'o «lu do me ma —sei la cpitepygau ca lo nu ba'o pejgau lo sevzi gi'e ba'o ta'irva'u cu retsku— .i je do ma ca'o klama li'u»
ni'o «lu mi se cmene zo .dorotis. —sei lo nixli cu cusku— gi'e ca'o klama la ri'ojme tcadu te zu'e lo nu cpedu fi la banli .oz. fe lo nu xrugau mi la .kanzas. li'u»
ni'o «lu ma stuzi la ri'ojme tcadu —sei te preti— .i ji'a la .oz. cu mo li'u»
ni'o «lu ue xu do na djuno —sei dy se spaji spuda— li'u»
ni'o «lu je'u na go'i .i mi na djuno su'o da .i za'a dai mi terse'a .i se ki'u bo mi na sai se besna —sei badri spusku— li'u»
ni'o «lu ua —sei la .dorotis. cu cusku— .i mi do kecti zei mutce li'u»
ni'o «lu ba'a pei —sei retsku— va'o lo nu mi do kansa lo nu klama la ri'ojme tcadu zo'u: la .oz. cu dunda lo besna mi li'u»
ni'o «lu mi na ka'e djuno —sei dy xrugau— .i ku'i do zifre lo nu kansa mi .i ga nai la .oz. na dunda lo besna do gi no da do to'e prali li'u»
ni'o «lu jetnu —sei la cpitepygau cu cusku— .i je'u —sei cy sivni ra'irgau— mi na se nabmi lo nu lo tuple .e lo birka .e lo xadni vu'o pe mi cu sudysrasu terse'a .i ki'u bo mi na ka'e cortu .i lo nu da'i da stapa pa lo mi jmadegji gi'a tunta mi se pi'o lo jesni cu na vajni .i ki'u bo mi na kakne lo ka ganse .i ku'i mi na djica lo nu lo prenu mi te cmene zo bebna .i je va'o lo nu lo mi stedu cu stodi lo ka culno lo po'o sudysrasu jo'u nai lo besna zo'u: ta'i ma mi ka'e djuno su'o da li'u»
ni'o «lu mi jimpe lo du'u do ma kau cinmo —sei lo cmalu nixli noi je'u kecti cu cusku— .i va'o lo nu do klama kansa mi kei mi ba cpedu fi la .oz. fe lo ka gasnu ro lo jai se kakne be se va'u do li'u»
ni'o «lu ki'e do'u —sei ckire spuda— li'u»
ni'o lo re mei cu xruti lo klaji .i la .dorotis. cu sidju la cpitepygau lo nu ravykla lo bitmu .i je lo re mei cu co'a litru lo pelxu kitybli dargu se ka'a la ri'ojme tcadu
ni'o la .totos. ca lo nuncfa na nelci lo vi ziljmina be lo bende .i ty ru'u lo terse'a nanmu cu sumnyzu'e tai lo nu da'i sruma lo du'u cumki fa lo nu lo ratcu zdani cu zvati lo sudysrasu .i je ty cu so'i roi fe'ucmo tai lo te nalxe'o fa'a la cpitepygau
ni'o «lu ko na se nabmi tu'a la .totos. —sei la .dorotis. fi lo ri cnino pendo cu cusku— .i ty cu no roi batci li'u»
ni'o «lu mi na terpa —sei la cpitepygau cu spuda— .i ty na ka'e crogau lo sudysrasu .i .e'o ko curmi lo nu mi bevri lo va lanka se va'u do .i mi na ba se nabmi .i ki'u bo mi na ka'e tatpi .i .ai mi do jungau fo lo se mipri —sei cy fau lo nu cadzu cu di'a co'e— .i zasti fa pa po'o da poi mi terpa ke'a li'u»
ni'o «lu ma co'e —sei la .dorotis. cu te preti— .i xu lo maxpre te cange poi zbasu do li'u»
ni'o «lu na go'i —sei la cpitepygau cu spusku— .i lo jelca sacki cu co'e li'u»
## ni'o ni'o vo mo'o lo pluta poi pagre lo ricfoi
ni'o ba za lo cacra be li su'o lo pluta cu co'a rufsu .i je lo nu cadzu cu co'a tai nandu ja'e lo nu la cpitepygau cu so'i roi tapfli lo pelxu kitybli noi vi mutce lo ka rufsu .i je'u su'o roi ku ky ba'o porpi gi'o nai ji'a sai mulno se claxu fau lo nu zvati fa lo kunti noi la .totos. cu plipe lo ragve zi'e noi la .dorotis. cu cadzu ru'u ke'a .i la cpitepygau zo'u fau lo nu na se besna cu sirji cadzu ja'e lo nu stapa lo kunti gi'e cpana farlu lo jdari kitybli .i ku'i no roi cortu .i je la .dorotis. cu lafti gi'e sa'irgau cy fau lo nu cy boi dy kansa lo ka gleki cmila lo cy. malfu'a
ni'o lo vi cange cu na sai simsa lo fe'e pu cange lo ka xamgu se kurji .i zasti fa me'i zdani .e me'i grute tricu .i je pa'a gi lo litru cu klama gi lo gugde cu zenba lo ka seldriselji'u
ni'o ca lo dormidju cu tsebi'o ne'a lo cmalu rirxe .i je la .dorotis. cu kargau lo lanka gi'e lebna pi su'o lo nanba .i friti lo pa spisa la cpitepygau .i ku'i cy fapro
ni'o «lu mi no roi xagji —sei cy cusku— .i je zanfu'a mi fa lo nu na go'i kei ki'u lo nu lo mi moklu cu pixra po'o .i va'o lo nu mi sraku my ja'e lo nonselsfe te zu'e lo nu mi ka'e citka zo'u: lo sudysrasu poi mi terse'a ke'a cu muvdu lo bartu .i je da'i la'e di'u cu daspo lo tarmi be lo mi stedu li'u»
ni'o la .dorotis. cu zi viska lo nu la'e di'u jetnu .i se ki'u bo tu'ifru po'o gi'e di'a citka lo nanba
ni'o «lu ko mi jungau da do jo'u lo do te klama —sei la cpitepygau ca lo nu dy cu ba'o citka lo vacysai cu cusku— li'u» .i dy boi cy jungau ro da la .kanzas .e lo nu ro de bu'u grusi .e lo nu lo vilcarbi'e cu bevri dy lo vi cizra gugde pe la .oz.
ni'o la cpitepygau cu ralci tinju'i gi'e cusku «lu mi na jimpe lo du'u mu'i ma kau do djica lo nu cliva lo vi melbi gugde gi'e xruti lo sudga je grusi stuzi poi do ke'a te cmene zo .kanzas. li'u»
ni'o «lu krinu la'e di'u fa lo nu do na se besna —sei lo nixli cu spuda— .i se ja'e nai lo nu ma kau ni lo mi'a zdani cu jadycau gi'e grusi zo'u: mi'a noi rectu je ciblu prenu cu zmanei lo nu xabju zy kei lo ro me lo drata gugde moi va'o ji'a sai lo nu gy. melbi traji .i no stuzi cu simsa lo zdani li'u»
ni'o la cpitepygau cu patyva'u
ni'o «lu li'a mi na jimpe kakne —sei cy cusku— .i va'o lo nu da'i lo do stedu cu terse'a lo sudysrasu tai tu'a lo me mi moi cu la'a xabju fa ro do'o lo melbi stuzi .i je va'o ku la .kanzas. cu se zvati no sai prenu .i zanfu'a la .kanzas. fa lo nu do se besna li'u»
ni'o «lu .au pei do te lisri fi da mi ze'a lo nu ma'a surla —sei lo verba cu retsku— li'u»
ni'o la cpitepygau cu tolzau catlu vy gi'e spusku «lu
ni'o lo mi ba'o nunjmive cu tai tordu ja'e lo nu mi ca'a djuno no da .i mi se zbasu ca lo prulamdei be lo prulamdei .i lo du'u ma kau fasnu bu'u lo munje pu la'e di'u cu na sai se djuno mi .i fu'au ca lo nu lo te cange cu zbasu lo mi stedu kei pa lo pa moi se zukte cu ka pirfi'i lo mi kerlo kei ja'e lo nu mi tirna lo nu ma kau bu'u fasnu .i zvati fa lo ji'a drata maxpre .i lo pa moi se tirna be mi cu nu lo te cange cu cusku «lu do ma jinvi lo vi kerlo li'u»
ni'o «lu ky na cnici —sei lo drata cu cusku— li'u»
ni'o «lu na nabmi —sei lo te cange cu cusku— .i to'e ki'u nai kerlo li'u» noi la'e ke'a je'a jetnu
ni'o «lu ca ku mi finti lo kanla —sei lo te cange cu cusku— li'u» .i tai ku cy pirfi'i lo mi pritu kanla .i je co'a lo nu co'i mulno kei mi catlu .u'e cy .e ro lo sruri be mi fau lo nu mutce lo ka kucli kei ki'u lo nu mi pa re'u viska lo munje
ni'o «lu ta melbi kanla —sei lo maxpre noi ca'o zgana lo te cange cu te notci— .i lo blanu cu ja'a mapti se skari lo kanla li'u»
ni'o «lu .ai mi finti lo drata poi bramau milxe —sei lo te cange cu cusku— li'u» .i ca lo nu lo re moi kanla ba'o se finti kei mi ka'e viska se mau lo purci .i ba bo cy finti lo mi nazbi .e lo mi moklu .i ku'i mi na'e tavla ki'u lo nu ca ku mi na djuno lo du'u ma kau te pilno lo moklu .i mi se zdile lo nu catlu lo nu xai zbasu lo mi birka .e lo mi tuple .i ca lo nu lo mi stedu cu se lasna kei mi jgira mutce ki'u lo nu pe'i mi dunli ro lo drata lo ka remna
ni'o «lu lo vi nanmu ba banzu tepygau lo korvo —sei lo te cange cu cusku— .i se jvinu lo mintu be lo remna li'u»
ni'o «lu ju'o .i ca'a remna —sei lo drata cu cusku— li'u» .i je mi mutce lo ka tugni dy .i lo te cange mi bevri fau lo nu mi jbini lo birka jo'u lo xadni kei gi'e punji fi lo clani grana noi do mi ke'a tolcri .i cy .e lo ri pendo cu ba zi to'o cadzu ja'e lo nu mi nonkansa
ni'o mi na nelci lo nu mi tai nonkansa .i se ki'u bo mi troci lo ka cadzu jersi xai .i ku'i lo mi jamfu na lamji lo loldi .i je mi jai se bapli fai lo ka stali lo grana .i seicni nunjmive ki'u lo nu zasti fa no da poi mi ka'e pensi ke'a ku'o ki'u lo nu mi pu tai zi se zbasu .i so'i korvo je so'i drata cipni cu vofli fa'a ne'i lo gurni foldi .i ku'i zi ca lo nu viska mi cu to'o vofli fau lo nu jinvi lo du'u mi maxpre .i la'e di'u pluka mi gi'e gasnu lo nu mi cinmo lo ka vajni mutce prenu .i ba za bo pa tolci'o korvo cu vofli jbibi'o mi .i je ba lo nu ralci catlu mi cu tsebi'o lo mi janco gi'e cusku di'e
ni'o «lu mi kucli lo du'u xu kau lo te cange pu jinvi lo du'u tcica be mi kakne fau lo nu tai juxre .i ro korvo poi na bebna cu viska lo nu do ke po'o sudysrasu terse'a nanmu li'u» .i ba bo ky cu fa'a ni'a plipe lo mi jamfu gi'e citka ro lo gurni poi ky djica .i lo drata cipni fau lo nu viska lo nu ky na se xrani mi cu klama te zu'e lo nu cy. ji'a citka lo gurni .i ja'e bo ba za lo cmalu lo barda gunma be ky cu sruri mi
ni'o mi pu badri la'e di'u .i ki'u bo jarco lo du'u je'u mi na tai xamgu cpitepygau .i ku'i lo tolci'o korvo cu kufygau mi fau lo nu cusku «lu va'o lo nu do se besna kei do xagdu'i ro drata remna gi'e xagmau su'o boi ry .i lo besna cu selte'i lo ka lo nu da ponse ce'u cu se vamji kei fi'o nalvai lo du'u da korvo gi'i kau remna li'u»
ni'o ca lo nu lo korvo ba'o cliva kei mi pensi la'e di'u gi'e jdice lo du'u .ai troci lo ka cpacu lo besna .i zanfu'a fa lo nu do lampagre gi'e vicycpu mi lo grana .i je lo se cusku be do cu bitygau mi lo du'u la banli .oz. ba dunda lo besna mi ca lo nu mi'o tolcliva la ri'ojme tcadu li'u»
ni'o «lu mi pacna lo nu ja'a co'e kei —sei la .dorotis. cu stace cusku— ki'u lo nu do simlu lo ka djica carmi li'u»
ni'o «lu ie mi ja'a djica —sei la cpitepygau cu xrugau cusku— .i da tai tolkufra lo nu da djuno lo du'u da bebna li'u»
ni'o «lu ja'o —sei lo nixli cu cusku— mi'o klama .e'u li'u» .i je dunda lo lanka la cpitepygau
ni'o fe'e ca ku no bitmu cu jibni lo klaji mlana .i je lo gugde cu rufsu gi'e nalzilplixa .i ca lo nu lo vanci cu jibni cu tolcliva fa lo litru lo barda ricfoi noi bu'u ke'a lo tricu cu barda gi'e zvajbisi'u vau tai ja'e lo nu lo jimca be ty cu pensi'u lo gapru be lo pelxu kitybli dargu .i ni'a lo tricu cu na ru'e manku .i ri'a bo lo jimca cu fanta lo nu lo solgu'i cu nerbi'o .i ku'i lo litru cu na klasti gi'e ca'o klama lo nenri be lo ricfoi
ni'o «lu ga nai lo vi dargu cu nerbi'o gi dy bi'ai barbi'o —sei la cpitepygau cu cusku— .i je ki'u lo nu la ri'ojme tcadu cu se stuzi lo drata fanmo be lo dargu kei mi'o bilga lo ka klama ro da poi dy mi'a da klagi'a li'u»
ni'o «lu da'i ro da la'e di'u djuno —sei la .dorotis. cu cusku— li'u»
ni'o «lu ju'o .i la'e di'u krinu lo nu mi djuno —sei la cpitepygau cu spuda— .i ga nai sarcu lo nu facki kei fa lo nu se besna gi da'i mi no roi cusku de'u li'u»
ni'o ba za lo cacra be li ji'i pa lo gusni cu canci kadbi'o .i je lo litru ca tapflikla ne'i lo manku .i la .dorotis. na sai ka'e viska .i ku'i la .totos. ja'a ka'e go'i .i ki'u bo lo gerku cu certu lo ka viska ne'i lo manku .i je la cpitepygau cu xusra lo du'u cy kakne lo ka viska du'i lo nu co'e ca lo donri .i se mu'i bo dy cu jgari lo birka be cy gi'e snada lo ka xamgu banzu klama
ni'o «lu ko va'o lo nu viska da poi ma'a kakne lo ka sipna bu'u ke'a ze'a lo nicte —sei dy cusku— cu jungau mi .i ki'u bo lo nu cadzu bu'u lo manku cu mutce lo ka to'e se kufra li'u»
ni'o ba za bo la cpitepygau cu klasti
ni'o «lu mi viska lo cmalu cmazda fa'a lo pritu be mi'o —sei cusku— .i zilzba lo tanbo jo'u lo jimca .i .au pei mi'o klama li'u»
ni'o «lu .au ja'ai —sei lo verba cu spuda— .i mi ja'a sai tatpi li'u»
ni'o tai ku la cpitepygau cu gidva pa'o lo tricu co'u lo nu tolyli'a lo cmazda .i je la .dorotis. cu nerkla gi'e tolcri lo ckana poi sudga pezli se zbasu ku'o bu'u pa kojna .i ba zi cpana binxo .i je fau lo nu la .totos. cu mlana jibni cu zi co'a condi sipna .i la cpitepygau noi no roi tatpi cu sanli bu'u lo drata kojna gi'e depyjdari denpa co'u lo cerni
## ni'o ni'o mu mo'o lo nu nurgau la tinci mudypre
ni'o ca lo nu la .dorotis. cu cikybi'o kei lo solgu'i cu ca'a pagre lo tricu .i je la .totos. cu xa'o bartu gi'e ru'u jersi lo cipni jo'u lo ricyractu .i dy tsebi'o gi'e ru'u catlu .i va ku la cpitepygau cu za'o depyjdari sanli bu'u lo kojna gi'e denpa tu'a dy
ni'o «lu .ei ma'a klama gi'e sisku lo djacu —sei dy fi cy cu cusku— li'u»
ni'o «lu do nitcu lo djacu ma —sei cy retsku— li'u»
ni'o «lu lo nu lumci lo mi flira ba tu'a lo pulce be lo pluta kei .e lo nu lo nanba na snipa lo mi galxe li'u»
ni'o «lu ru'a lo nu da rectu cu na'e se kufra da —sei la cpitepygau cu pensi cusku— .i ki'u bo da bilga lo ka sipna gi'e citka gi'e pinxe .i ku'i do se bersa .i je se vamji lo barda raktu fa lo nu kakne lo nu drani pensi li'u»
ni'o lo gunma cu cliva lo cmazda gi'e cadzu pa'o lo tricu co'u lo nu tolcri lo cmalu jinto be lo klina djacu be'o poi bu'u ke'a la .dorotis. cu pinxe gi'e jinru gi'e citka lo cersai .i dy viska lo nu lo nanba ve vimcu pe lo lanka cu na mutce kei gi'e ckire zi'o lo nu la cpitepygau na nitcu lo nu citka su'o da kei ki'u lo nu lo ve vimcu cu ja'a ru'e banzu lo nu dy jo'u la .totos. ka'e citka ca lo cabdei
ni'o dy ca lo nu mo'u citka lo sanmi gi'e pu'o xruti lo pelxu kitybli klaji cu se spaji lo nu tirna lo dizlo se cmoni poi jibni
ni'o «lu ta mo —sei dy toldarsi retsku— li'u»
ni'o «lu mi na ka'e se xanri —sei la cpitepygau cu spuda— .i ku'i ma'a ka'e klama gi'e facki li'u»
ni'o ca zi bo lo drata se cmoni cu se tirna gi'e simlu lo ka se krasi lo trixe be xai .i xy carna gi'e cadzu pa'o lo ricfoi ve'a lo jai ve'a su'o roi stapa .i ca bo la .dorotis. cu viska lo nu da carmi ne'i lo gusni poi pagre lo jbini be lo tricu .i dy bajra fa'a lo stuzi gi'e ba bo suksa klasti fau lo nu se spaji krixa lo cmalu
ni'o pa lo barda tricu cu su'o si'e se katna .i je fau lo nu sanli ne'a ty fau lo nu jgari lo se lafti ka'amru lo re xance zo'u: lo nanmu poi mulno lo ka tinci .i lo stedu .e lo birka .e lo tuple cu jorne lo xadni .i ku'i ny prane lo ka muvdycau kei tai lo nu na sai ka'e muvdu
ni'o la .dorotis. cu catlu ny fau lo nu manci kei .i je la cpitepygau ji'a cu go'i ca lo nu la .totos. cu kinli cmoni gi'e zukte lo ka batci lo tinci tuple kei noi crogau lo ra denci
ni'o «lu xu do pu cmoni —sei la .dorotis. cu retsku— li'u»
ni'o «lu go'i —sei lo tinci nanmu cu spusku— .i mi pu cmoni ze'u lo nanca be li za'u pa se cau lo nu da tirna mi gi'a klama te zu'e lo nu sidju li'u»
ni'o «lu mi do ta'i ma ka'e sidju —sei dy ranti tonga te preti be ki'u lo nu lo badri voksa poi lo nanmu cu se voksa ke'a cu pencu lo ruxse'i be dy— li'u»
ni'o «lu ko cpacu lo ctile lante gi'e ctile sabji lo mi te jorne —sei ny spusku— .i jy tai furtirse se pagbu ja'e lo nu mi na sai ka'e muvgau jy .i mi va'o lo nu te sabji lo ctile cu ba zi di'a se xamgu .i do ba tolcri lo ctile lante lo kajna be ne'i lo mi cmazda li'u»
ni'o la .dorotis. cu zi bajra xruti lo cmazda gi'e tolcri lo ctile lante gi'e ba bo xruti gi'e xanka retsku «lu lo do te jorne ma zvati li'u»
ni'o «lu ko sabji fi lo mi cnebo —sei la tinci mudypre cu spusku— li'u» .i ja'o dy sabji .i je ki'u lo nu furtirse mutce kei la cpitepygau cu co'a jgari lo stedu gi'e toljursa muvgau sy fau lo nu zunle fa'u pritu cargau kei co'u lo nu muvdu zifre .i je ba bo lo nanmu cu kakne lo ka muvgau sy zu'e ny po'o li'u»
ni'o «lu ca ku ko ctile sabji fi lo mi birka —sei ny cusku— li'u» .i la .dorotis. cu sabji .i je la cpitepygau cu toljursa krogau by co'u lo nu xamgu claxu lo furtirse gi'e cnino dunli
ni'o la tinci mudypre cu geicmo gi'e dzize'agau lo ri ka'amru noi my ke'a sa'orgau fo lo tricu
ni'o «lu ti barda se kufra —sei my cusku— .i mi pu jgari lo va ka'amru co'a lo nu mi furtirse selpau .i je mi gleki lo nu ro mai to'e lafti .i ca ku zo'u va'o lo nu do ctile sabji fi lo mi tuple te jorne kei mi di'a se xamgu li'u»
ni'o se ki'u bo xai ctile sabji fi lo tuple co'u lo nu muvdu zifre .i je my cu so'i roi kirsku fi lo nu ba'o se nurgau .i ki'u bo my simlu lo ka mutce lo ka clite .e lo ka ckire
ni'o «lu da'i mi va'o lo nu do na klama cu ze'e va sanli —sei my cusku— .i ja'o ju'o do nurgau lo mi nunjmive .i lo nu do ti zvati cu jalge ma li'u»
ni'o «lu mi'a klama la ri'ojme tcadu te zu'e lo nu penmi la banli .oz. —sei dy spusku— .i je mi'a klasti bu'u lo do cmazda te zu'e lo nu zvati ze'a lo nicte li'u»
ni'o «lu ki'u ma do djica lo nu penmi la .oz. —sei my retsku— li'u»
ni'o «lu .au .obu mi xrugau benji la .kanzas. .i je la cpitepygau cu djica lo nu .obu dunda lo besna cy —sei dy spusku— li'u»
ni'o la tinci mudypre cu simlu lo ka ze'i condi pendi .i ba bo cusku:
ni'o «lu ba'a pei la .oz. cu dunda lo risna mi li'u»
ni'o «lu .y ru'a —sei la .dorotis. cu spusku— .i da'i la'e di'u frili dunli lo nu dunda lo besna la cpitepygau li'u»
ni'o «lu jetnu —sei la tinci mudypre cu spuda— .i ja'o mi ji'a va'o lo nu do curmi lo nu mi kansa do cu klama la ri'ojme tcadu te zu'e lo nu cpedu lo ka la .oz. mi sidju li'u»
ni'o «lu .e'a ko kansa —sei la cpitepygau cu xendo cusku— li'u» .i je la .dorotis. cu jmina cusku lo se du'u da'i gleki lo nu se kansa my .i ja'e bo la tinci mudypre cu vregau lo ri ka'amru lo janco .i je bo xai pagre lo ricfoi co'u lo nu tolcliva lo klaji poi se gacri lo pelxu kitybli
ni'o la tinci mudypre pu cpedu fi la .dorotis. fe lo nu punji lo ctile lante lo lanka pe dy .i «lu .i ki'u bo —sei my cusku— mi va'o lo nu mi zilkavbu lo nuncarvi gi'e za'u re'u furtirfarvi cu ba mutce nitcu lo ctile lanka li'u»
ni'o ja'a zanfu'a fa lo nu lo cnino pendo cu cmibi'o lo bende .i ki'u bo za ba lo nu za'u re'u cfagau lo nunli'u kei by tolcliva lo stuzi noi lo tricu .e lo jimca cu banro lo tai rotsu ja'e lo nu lo litru na ka'e pagre .i ku'i la tinci mudypre cu co'a gunka se pi'o lo ri ka'amru gi'e tai xamgu katna ja'e lo nu ba za ba'o gasnu tu'a lo vorme se va'u lo mulno bende
ni'o la .dorotis. cu ca lo nu by ca'o cadzu cu tai junri pensi ja'e lo nu dy na sanji ca je fe lo nu la cpitepygau cu tapflifa'u fi lo kevna gi'e gunro fa'a lo drata mlana be lo dargu .i je'u cy bilga lo ka cpesku fi dy fe lo nu sidju fi lo nu sa'irbi'o
ni'o «lu ki'u ma do na cadzu ru'u lo kevna —sei la tinci mudypre cu retsku— li'u»
ni'o «lu mi na djuno rau da —sei la cpitepygau cu gleki spuda— .i lo mi stedu cu te setca lo sudysrasu .i la'e di'u krinu lo nu mi klama la .oz. te zu'e lo nu cpedu fi .obu fe tu'a lo besna li'u»
ni'o «lu ua —sei la tinci mudypre cu cusku— .i ku'i je'u lo besna na xagrai lo ro da pe lo munje li'u»
ni'o «lu xu do se besna —sei la cpitepygau cu te preti— li'u»
ni'o «lu na go'i .i lo mi stedu cu kunti mutce —sei la mudypre cu spusku— .i ku'i pu ku mi se besna gi'e se risna ji'a .i ja'o mi fau lo ba'o nu troci tu'a ro lo re mei cu da'i mutce lo ka zmanei lo risna li'u»
ni'o «lu ma krinu la'e di'u —sei la cpitepygau cu retsku— li'u»
ni'o «lu mi ba te lisri fi lo me mi moi do .i je ba bo do djuno li'u»
ni'o tai ku ze'a lo nu xai cadzu pagre lo ricfoi kei la tinci mudypre cu te lisri fi lo di'e lisri
ni'o «lu mi bersa lo mudypre poi katna lo tricu bu'u lo ricfoi gi'e ba bo jibri vecnu lo mudri .i ca lo nu mi binxo lo makcu kei mi ji'a binxo lo mudyka'a .i je ba lo nu lo mi patfu cu mrobi'o kei mi kurji lo mi tolci'o mamta ze'a lo nu my cu jmive .i ba bo mi jdice lo nu mi se ba'i lo nu nonkansa lo nu jmive cu ba spebi'o te zu'e lo nu na binxo lo ka seicni
ni'o pa lo nixli pe la maxpre pu tai melbi ja'e lo nu mi ba za binxo lo ka mutce lo ka prami ny .i ny zu'u nai pu nupre lo nu speni mi ca lo nu mi te pleji lo banzu be lo nu zbasu lo xagmau zdani se va'u ny .i se mu'i bo mi pu zukte lo ka gunka fi'o se camzma ro lo me lo purci moi .i ku'i lo bi'u nai nixli cu xabju fi'o kansa lo tolci'o ninmu poi na djica lo nu vo'a da speni .i ki'u bo ny tai lazni ja'e lo nu djica lo nu lo nixli cu stali gi'e jukpa gi'e nicygau lo zdani .i se mu'i bo lo tolci'o ninmu cu klama la palci termafyfe'i pe la stuna gi'e nupre lo nu dunda lo re lanme .e lo pa bakni va'o lo nu fanta lo nunspe .i ja'e bo la palci termafyfe'i cu malmafpli lo mi ka'amru .i je ca pa djedi poi nu mi xagrai selka'e katna mu'i lo nu djica lo nu cpacu lo cnino zdani .e lo mi speni ca lo cabjbicumrai zo'u: lo ka'amru cu malmu'u gi'e ka'arvi'u lo mi zunle tuple
ni'o ca lo nuncfa la'e di'u simlu lo ka barda malfunca .i ki'u bo mi pu djuno lo du'u lo nanmu poi se tuple pa da cu na ka'e xamgu mutce mudyka'a .i se ki'u bo mi pu klama lo tincyzba gi'e gasnu lo nu ty se va'u mi zbasu lo cnino tuple co tinci .i lo tuple cu xamgu gunka co'a lo nu mi friselsau tu'a ty .i ku'i lo mi selzu'e cu rinka lo nu la palci termafyfe'i pe la stuna cu fengu .i ki'u bo ty pu nupre fi lo bi'u nai tolci'o ninmu fe lo nu mi ba na speni lo melbi ke maxpre nixli .i ca lo nu mi za'u re'u co'a katna kei lo mi ka'amru cu malmu'u gi'e ka'arvi'u lo mi pritu tuple .i za'u re'u ku mi klama lo tincyzba .i je za'u re'u ku ty zbasu se va'u mi lo tuple co tinci .i ba la'e di'u lo se mafpli ka'amru cu ka'arvi'u lo mi birka (to lo pa moi pu tu'a lo re moi toi) .i je by se basti lo tinci birka .i ba bo la palci termafyfe'i cu gasnu lo nu lo ka'amru cu malmu'u gi'e ka'arvi'u lo mi stedu .i ca lo nuncfa mi jinvi lo du'u la'e di'u mi fanmo .i ku'i lo tincyzba cu funca lampagre .i je ty zbasu se va'u mi lo cnino stedu co tinci
ni'o mi pu jinvi lo du'u mi ca ba'o jinga fi la palci termafyfe'i kei gi'e gunka fi'o camzma ro lo me lo purci moi .i ku'i mi pu na te sidbo lo du'u ma kau ni lo mi bradi ka'e palci .i by finti lo cnino tadji be lo nu catra lo mi za'i prami lo melbi ke maxpre nixli kei gi'e za'u re'u gasnu lo nu lo ka'amru cu katna pagre lo mi xadni ja'e lo nu mi zilka'a lo re xadba .i za'u re'u ku lo tincyzba cu sidju mi gi'e zbasu se va'u mi lo xadni co tinci fau lo nu lasna lo mi tinci birka jo'u lo mi tinci tuple jo'u lo mi tinci stedu xy lo cidyterjo'e te zu'e lo nu mi kakne lo ka ru'u muvdu tai lo xagdu'i be lo me lo purci moi .i ku'i ui nai ca ku mi na se besna .i ja'e bo mi ba'o cirko pi ro lo mi ka prami lo bi'u nai maxpre nixli .i je mi pu na se vajni lo du'u xu kau mi spebi'o ny .i ru'a ny za'o xabju fi'o kansa lo laldo ninmu gi'e fau bo denpa lo nu mi klama ny
ni'o «lu lo mi xadni cu pu tai gusycai bu'u lo solgu'i .i ja'e bo mi pu jgira zei mutce xy .i je ca ku na vajni fa lo nu da'i lo mi ka'amru cu malmu'u .i ki'u bo na ka'e katna mi .i zasti fa pa po'o ckape be mi be'o noi nu lo mi cidyterjo'e cu furtirfarvi .i ku'i mi rajgau lo nu mi ralte lo ctile lante pe bu'u lo mi cmazda kei gi'e kurji lo nu mi ca ro nu nitcu cu ctilypu'i mi .i ku'i ca pa djedi poi nu mi mo'ifli lo nu zukte la'e di'u cu suksa zvati fa mi lo carvi vilti'a .i pu lo nu mi pensi lo ckape kei lo mi cidyterjo'e ba'o furtirfarvi .i je mi jai se bapli fai lo ka sanli stali ne'i lo ricfoi je co'u lo nu do klama gi'e sidju mi .i lo xlatce mi pu li'i lifri la'e di'u .i ku'i ze'a lo nanca noi nu mi bu'u sanli cu zifre lo ka pensi lo du'u lo brarai be lo mi nuncri be'o poi mi pu lifri cu nu cirko lo mi risna .i mi ca lo nu ca'o prami cu traji lo ka gleki kei lo ro remna pe lo terdi .i ku'i no prenu poi na se risna cu ka'e prami .i se ki'u bo mi zu'ejdi lo nu mi ba cpedu fi la .oz. fe lo nu dunda pa boi ry mi .i va'o lo nu .obu ja'a co'e kei mi ba xruti lo maxpre nixli gi'e spebi'o ny
ni'o ge la .dorotis. gi la cpitepygau pu ca'o mutce lo ka se cinri lo lisri be la tinci mudypre kei gi'e ca djuno lo du'u ma kau krinu lo nu my tai djica lo nu cpacu lo cnino risna
ni'o «lu to'e ki'u nai ku —sei la cpitepygau cu cusku— zo'u: .ai mi cpedu tu'a lo besna .e nai lo risna .i ki'u bo da'i lo bebna na djuno lo du'u .ei pilno ry ma kau va'o lo nu se risna li'u»
ni'o «lu .ai mi cuxna lo risna —sei la tinci mudypre cu spuda— .i ki'u bo lo nu da se besna cu na se jalge lo nu da gleki .i je lo nu gleki cu xagrai lo ro da pe lo munje li'u»
ni'o la .dorotis. cu cusku no da .i ki'u bo dy cu se cfipu lo du'u ma kau poi me lo re pendo cu drani kei gi'e jdice lo du'u va'o lo nu do'a nai dy ka'e xruti la .kanzas. .e la fetfamti .em. cu na vajni mutce fa lo du'u ji kau gi'e gi la mudypre na se besna gi la cpitepygau na se risna gi lo re da cu cpacu lo se djica
ni'o traji lo ka se xanka dy kei fa lo nu ge lo nanba cu na ru'e ba'o se xaksu gi lo ziljmina sanmi cu jai se jalge lo nu lo lanka cu kunti .i ju'o ge nai la mudypre gi nai la cpitepygau cu su'o roi citka da .i ku'i dy marji ge nai lo tinci gi nai lo sudysrasu .i je na ka'e jmive va'o lo nu na se djasabji
## ni'o ni'o xa mo'o la tolvirnu cinfo
ni'o ze'a ku la .dorotis. .e lo ri kansa cu cadzu pa'o lo denmi ricfoi .i lo klaji cu fe'e za'o se gacri lo pelxu kitybli .i ku'i ky se gacri lo sudbi'o ricyjimca jo'u lo morsi pezli vu'o pe lo tricu .i je lo nu cadzu na sai pluka
ni'o so'u cipni cu zvati lo vi pagbu be lo ricfoi .i ki'u bo lo cipni cu prami lo kunti nurma noi ke'a se solgu'i mutce .i ku'i ca da fa'u de lo dizlo se cmoni be lo danlu poi se mipri lo tricu cu se cmoni .i lo di'u savru cu gasnu lo nu lo risna be lo cmalu nixli cu sutra slilu ki'u lo nu ny na djuno lo du'u ma kau krasi vo'a .i ku'i la .totos. cu djuno gi'e cadzu ne'a la .dorotis. gi'e na spuda fi lo nu cmoni ji'a sai
ni'o «lu ma temci —sei lo verba fi la tinci mudypre cu retsku— fi lo nu ma'a bartu lo ricfoi li'u»
ni'o «lu mi na ka'e djuno —sei te spuda— .i ki'u bo mi pu no roi zvati la ri'ojme tcadu .i ku'i lo mi patfu pu pa roi klama ca lo nu mi nanla .i je py cu cusku lo se du'u ge clani nu litru pa'o lo ckape gugde gi ku'i bu'u lo zmadu be fi lo ka jibni lo tcadu poi la .oz. cu xabju zo'u lo gugde cu melbi .i ku'i mi ze'a lo nu mi tolcau lo mi tinci lante cu na terpa .i je no da ka'e crogau la cpitepygau .i je do zu'u nai bevri bu'u lo mebri lo barna pe lo nuncinba pe la vrude termafyfe'i .i je la'e di'u do bandu lo ckape li'u»
ni'o «lu ku'i la .totos. zo'u —sei lo nixli cu xanka cusku— ma ba bandu ty li'u»
ni'o «lu .ei ma'a jai bandu va'o lo nu ty cu se ckape —sei la tinci mudypre cu spuda— li'u»
ni'o zi ca lo nu my cu tavla kei lo mabla cladu bo selcmo cu sance ra'i lo ricfoi .i je ca lo bavlamji mokca lo barda cinfo cu plipe lo klaji .i cy fau lo nu pa roi darxi fi lo xance cu gasnu lo nu la cpitepygau fau lo nu so'i roi sezycarna cu vofli fa'a lo korbi be lo klaji kei gi'e ba bo darxi la tinci mudypre fi lo kinli jgalu .i ku'i se ri'a lo nu la cinfo cu se spaji kei lo jgalu cu te prina lo tinci no da .i ku'i la mudypre cu farlu lo klaji gi'e muvycau cpana
ni'o la .totos. ku noi cmalu ku'o ca lo cabna noi nu da bradi cu gercmo bajra fa'a la cinfo .i je lo barda danlu ba'o kargau lo moklu te zu'e lo nu batci lo gerku .i ca bo la .dorotis. fau lo nu xanka lo nu da'i la .totos. cu se catra kei .e lo nu na sanji lo ckape cu fa'a ca'u bajra gi'e xancrada'i se rai lo kamtsa gi'e ca bo krixa:
ni'o «lu ko na sai darsi lo nu batci la .totos .i .ei do ckeji lo nu do noi barda danlu cu batci lo uu cmalu gerku li'u»
ni'o «lu mi pu na batci gy —sei la cinfo fau lo nu satre lo ve darxi be fi lo ri nazbi cu cusku— li'u»
ni'o «lu go'i .i ku'i do pu troci —sei dy xrugau— .i do du no na'e bo lo tolvirnu mutce li'u»
ni'o «lu mi djuno —sei la cinfo fau lo nu lo stedu cu ckeji dandu cu cusku— .i mi pu ro roi djuno .i ku'i .ei mi mo kau li'u»
ni'o «lu ju'o mi na djuno .i ue sai do darxi lo terse'a prenu ne mu'u la uu cpitepygau li'u»
ni'o «lu xu terse'a fa cy —sei la cinfo cu retsku be fau lo nu se spaji bei ca lo nu catlu lo nu dy lafti la cpitepygau gi'e sa'irgau fo lo jamfu fau lo nu seltamgau cy lo drani tarmi
ni'o «lu li'a cy terse'a —sei la .dorotis. ku noi za'o fengu cu spuda— li'u»
ni'o «lu la'e di'u krinu lo nu tai frili vofli —sei la cinfo cu te notci— .i pu spaji mi fa lo nu cy cu tai ru'u carna .i xu lo drata ku ji'a terse'a li'u»
ni'o «lu na go'i —sei la .dorotis. cu cusku— .i ri marji lo tinci li'u» .i dy cu sidju la mudypre lo nu di'a sanli
ni'o «lu la'e di'u krinu lo nu ri na ru'e kilcrigau lo mi jgalu —sei la cinfo cu cusku— .i ca lo nu jy. sraku lo tinci kei lo lenku nundesku cu ri'a fa'a ni'a muvdu fo lo mi trixe .i lo va cmalu danlu poi do tai nelci zei mutce cu mo li'u»
ni'o «lu me la .totos. ku noi gerku me mi moi —sei la .dorotis. cu spusku— li'u»
ni'o «lu pau ty marji lo tinci gi'i terse'a —sei la cinfo cu retsku— li'u»
ni'o «lu na gi'e nai .i ty .y .y .y rectu gerku —sei lo nixli cu cusku— li'u»
ni'o «lu ua sai .i ty cinri danlu gi'e simlu lo ka cmalu mutce kei mi pe ca lo nu nau ba'o catlu ty .i no da po'u na'e bo lo tolvirnu be mu'u mi cu su'o mu'ei pensi lo nu batci lo tai cmalu —sei la cinfo cu di'a badri cusku— li'u»
ni'o «lu ki'u ma do tolvirnu —sei la .dorotis. fau lo nu manci catlu lo barda danlu ki'u lo nu cy cu bradu'i lo cmalu xirma cu retsku— li'u»
ni'o «lu na ka'e te djuno —sei la cinfo cu spusku— .i ru'a mi tai jbena .i ro lo drata danlu pe lo ricfoi cu li'a kanpe lo nu mi virnu kei ki'u lo nu lo cinfo bu'u ro da cu jai se jinvi fai lo ka me la noltru be lo danlu .i mi pu cilre lo du'u ca lo nu mi cladu mutce cmoni kei ro lo jmive cu terpa gi'e to'o klama .i ca ro nu mi penmi lo remna kei mi pu mutce lo ka terpa .i ku'i sa'u mi cladu cmoni fa'a ry .i je ry cu ro roi to'o bajra se rai lo ka sutra .i va'o lo nu da'i lo xanto .a lo tirxu .a lo cribe cu su'o roi troci lo ka damba mi zo'u ju'o mi si'a to'o bajra .i mi tai tolvirnu .i ku'i zi sai ca lo nu xai tirna lo nu mi cmoni zo'u ro boi xy cu troci lo ka binxo lo darno be mi .i je li'a mi curmi lo nu xy klama li'u»
ni'o «lu ku'i la'e di'u na drani .i la noltru be lo danlu cu .ei na tolvirnu —sei la cpitepygau cu cusku— li'u»
ni'o «lu mi djuno —sei la cinfo cu spuda be fau lo nu vimcu lo pa se klaku lo kanla se pi'o lo jipno be lo rebla— .i barda se badri gi'e se jalge lo nu mi tolgei lo mi nunjmive .i ku'i ca ro nu ckape kei lo mi risna cu co'a sutra slilu li'u»
ni'o «lu ju'o cu'i do risna bilma —sei la tinci mudypre cu cusku— li'u»
ni'o «lu cumki —sei la cinfo cu cusku— li'u»
ni'o «lu va'o lo nu ja'a co'e kei —sei la tinci mudypre cu di'a co'e— do gleki .ei .i ki'u bo je'urja'o lo du'u do se risna .i mi zo'u mi na se risna .i se ki'u bo mi na ka'e risna bilma li'u»
ni'o «lu ju'o cu'i —sei la cinfo cu pensi cusku— mi va'o lo nu da'i na se risna cu na tolvirnu li'u»
ni'o «lu xu do se besna —sei la cpitepygau cu retsku— li'u»
ni'o «lu ru'a go'i .i mi pu no roi catlu zukte fi lo nu facki —sei la cinfo cu spusku— li'u»
ni'o «lu mi klama la banli .oz. te zu'e lo nu cpedu fi .obu fe lo nu dunda lo besna mi —sei la cpitepygau cu te notci— .i ki'u bo lo mi stedu cu culno lo sudysrasu li'u»
ni'o «lu je mi ba cpedu fi .obu fe lo nu dunda lo risna mi —sei la mudypre cu cusku— li'u»
ni'o «lu je mi ba cpedu fi .obu fe lo nu xrugau benji .i je la .totos. la .kanzas. —sei la .dorotis. cu jmina cusku— li'u»
ni'o «lu xu do sruma lo du'u la .oz. cu ka'e dunda lo kamvirnu mi —sei la tolvirnu cinfo cu retsku— li'u»
ni'o «lu frili dunli lo nu da'i .obu dunda lo besna mi —sei la cpitepygau cu cusku— li'u»
ni'o «lu si'a lo nu da'i dunda lo risna mi —sei la tinci mudypre cu cusku— li'u»
ni'o «lu si'a lo nu da'i xrugau benji mi la .kanzas. —sei la .dorotis. cu cusku— li'u»
ni'o «lu va'o ku mi va'o lo nu do na se nabmi cu klama kansa do —sei la cinfo cu cusku— .i ki'u bo lo mi nunjmive cu sa'u na ka'e se jdari se cau lo nu virnu milxe do'a nai li'u»
ni'o «lu da'i do zankansa —sei la .dorotis. cu spusku— .i ki'u bo do ba sidju fi lo nu dargau lo drata cilce bo danlu .i dy simlu fi mi fe lo ka ce'u do zmadu lo ka tolvirnu kei gi'a nai tepygau zei curmi fau lo nu do tai se frili li'u»
ni'o «lu dy ca'a co'e —sei la cinfo cu cusku— .i ku'i la'e di'u na gasnu lo nu mi zenba lo ka virnu kei lo cmarai .i je mi ze'a lo nu mi djuno lo du'u mi tolvirnu cu ju'o tolgei li'u»
ni'o ja'e bo lo cmalu bende cu za'u re'u co'a litru .i la cinfo cu barda stapa cadzu ne'a la .dorotis. .i la .totos. ca lo nuncfa cu na zanru lo bi'u nai cnino kansa .i ki'u bo ty na ka'e tolmo'i lo du'u ty pu na ru'e se marxa fi'o se jbini lo barda xance be la cinfo .i ku'i ba za lo temci ty zenba lo ka kufra .i je ca ku la .totos. jo'u la tolvirnu cinfo ba'o binxo lo xamgu pedysi'u
ni'o ze'a lo djedi se vimcu cu fasnu fa no se jmina ckape poi zunti lo nu panpi pe lo ra nu litru .i pa roi ku je'u la tinci mudypre cu stapa lo cakcinki poi cpare lo klaji ku'o gi'e catra lo uu cmalu .i la'e di'u gasnu lo nu la tinci mudypre cu badri mutce .i ki'u bo my cu ro roi kurji jundi lo nu na crogau su'o jmive .i je fau lo nu cadzu cu klaku lo so'i kakydirgo pe lo ka badri .e lo ka xenru .i lo bi'u nai kakydirgo cu masno nitmu'u fo lo flira gi'e nitmu'u fo lo cidyterjo'e pe lo xedja noi bu'u ke'a ky furtirfarvi .i ca lo ca nu la .dorotis. cu retsku da ty my kei la tinci mudypre na kakne lo ka kargau lo ri moklu .i ri'a bo lo ra xedja cu simxu lo ka kluza snipa ri'a tu'a lo furtirse .i ty my mutce lo ka terpa la'e di'u kei gi'e muvgau lo birka fa'a la .dorotis. tai so'i da te zu'e lo nu sinxa lo du'u .ei la .dorotis. cu sidju .i ku'i dy na jimpe .i la cinfo ku ji'a se cfipu lo du'u ma kau ca'o malfau .i ku'i la cpitepygau cu lebna lo ctile lante lo lanka pe la .dorotis. gi'e ctilypu'i lo xedja be la mudypre ja'e lo nu ba za lo so'u mokca my di'a kakne lo ka tavla
ni'o «lu ja'o pu nunctu fi mi —sei ty my cusku— lo du'u .ei mi jundi lo du'u mi ma kau stapa .i ki'u bo mi va'o lo nu da'i mi catra lo ziljmina cinki cu ju'o ba za'u re'u fantynalka'e lo nu klaku .i je lo nu klaku cu rinka lo nu lo mi xedja cu furtirfarvi ja'e lo nu mi na ka'e tavla li'u»
ni'o ba bo ty my cadzu se kai lo ka capyju'i mutce kei fau lo nu lo kanla cu catlu lo dargu .i je ca ro nu ty my viska lo cmalu manti poi camgu'a cpare lampagre cu ravystapa te zu'e lo nu na xrani my .i la tinci mudypre cu ja'a djuno lo du'u na se risna kei gi'e se ki'u bo kurji zei mutce lo nu no roi kusru da
ni'o «lu do no'u lo prenu poi se risna —sei my cusku— cu tolcau da poi gidva do ku'o gi'e no roi nitcu lo ka srera .i ku'i mi na se risna .i se ki'u bo mi bilga lo ka jundi mutce .i ca lo nu la .oz. ba'o dunda lo risna mi zo'u: li'a na sarcu fa la'e di'u li'u»
## ni'o ni'o ze mo'o lo nu litru se ka'a la banli .oz.
ni'o lo ro da cu bilga lo ka ginka bu'u lo bartu ca lo ca nicte ni'a lo barda tricu poi nenri lo ricfoi .i ki'u bo no dinju cu jibni .i lo troci cu xamgu ke rotsu gacri co bandu fi lo lunsa .i je la tinci mudypre cu katna fi lo barda derxi se pi'o lo ka'amru .i je la .dorotis. cu zbasu lo banli fagri poi glagau dy gi'e se jalge lo nu dy jdika lo ka seicni .i dy jo'u la .totos. cu citka lo ro moi be lo vo'a nanba .i je ca ku dy na djuno lo du'u lo re mei ba mo kau te zu'e tu'a lo cersai li'u»
ni'o «lu va'o lo nu do djica zo'u —sei la cinfo cu cusku— mi ba nerkla lo ricfoi gi'e catra lo mirli se va'u do .i do ka'e jukpa se pi'o lo fagri (to mukti fa lo nu do zmanei lo se glajukpa cidja toi) gi'e ba bo tolcau lo xamgu mutce cersai li'u»
ni'o «lu .e'o ko na co'e pe'u do'u —sei la mudypre cu cpedu— .i ju'o mi klaku fi lo nu da'i do catra lo uu mirli .i je ba bo lo mi xedja cu za'u re'u furtirfavri li'u»
ni'o ku'i la cinfo cu cliva klama lo nenri be lo ricfoi gi'e tolcri lo sevzi vacysai .i je no da ca su'o da cu djuno lo du'u vy mo kau .i ki'u bo cy na tavla fi ri .i je la cpitepygau cu tolcri lo tricu poi culno lo narge ku'o gi'e clugau lo lanka pe la .dorotis. ny te zu'e lo nu dy ze'u na xagji .i dy jinvi lo du'u la'e di'u zo'u: la cpitepygau cu mutce lo ka xendo gi'e xagypei .i ku'i dy carmi cmila ri'a lo juxre nu cy. lafti lo narge .i lo kicne xance cu tai juxre .i je lo narge cu tai cmalu .i ja'e bo ny poi cy ke'a falcru cu ja'a ru'e se zmamei ny poi cy ke'a punji lo lanka .i ku'i la cpitepygau na se nabmi gi'e na se vajni lo du'u ma kau ditcu lo nu clugau lo lanka .i ki'u bo cumri'a lo nu cy cu stali lo darno be lo fagri .i je cy cu xanka lo nu lo fagyka'u cu zvabi'o lo cy. sudysrasu gi'e jelgau cy .i se mu'i bo stali lo darno be lo fagri gi'e klama lo jibni ca lo po'o pa nu la .dorotis. cu vrebi'o te zu'e lo nu sipna kei kei te zu'e lo nu selgaigau dy lo sudga pezli .i py gasnu lo nu dy. glare je tagji kufra .i je dy. condi sipna co'u lo cerni
ni'o ca lo donri lo nixli cu jirgau lo ri flira lo cmalu ke se cinje cmari'e .i je ba za bo lo ro da cu co'a litru fa'a la ri'ojme tcadu
ni'o lo litru pu'o lifri lo djedi poi ca ke'a so'i da fasnu .i ly ja'a ru'e ba'o cadzu ze'a lo cacra .i ca bo ly. viska lo crane be ly. be'o poi barda fenra poi pagre lo dargu gi'e fendi lo ricfoi bu'u ro lo re mlana .i ganra mutce fenra .i je ca lo nu parkla lo korbi gi'e catlu lo cnita cu viska lo nu mutce lo ka condi ji'a .e lo nu so'i barda je kilselkoi rokci cu zvati lo loldi .i lo re mlana cu tai nitsalpo ja'e lo nu no lo litru ka'e cnita cpare .i ze'a lo mokca cu simlu lo ka nu lo nunli'u cu na ka'e na tolcfa
ni'o «lu .ei ma'a mo —sei la .dorotis. cu tolpacna cusku— li'u»
ni'o «lu mi na te sidbo fi lo cmarai —sei la tinci mudypre cu cusku be fau lo nu la cinfo cu desygau lo ri kalsa ne'okre gi'e pensi simlu— li'u»
ni'o ku'i la cpitepygau cu cusku «lu mi'o na ka'e vofli .i la'e di'u se birti .i ji'a na ka'e cpare fa'a ni'a lo vi barda fenra .i se ki'u bo mi'o ga nai na ka'e ragve plipe gi .ei sisti bu'u lo ca se zvati be mi'o li'u»
ni'o «lu pe'i mi ka'e ragve plipe —sei la tolvirnu cinfo ba lo nu ralci menli bo merli lo nildarno cu cusku li'u»
ni'o «lu va'o ku mi'o na se nabmi —sei la cpitepygau cu spuda— .i ki'u bo do ka'e bevri ro mi'a lo ragve ca pa drata li'u»
ni'o «lu .i'a .i mi ba troci —sei la cinfo cu cusku— .i ma pa moi li'u»
ni'o «lu mi —sei la cpitepygau cu jdice— .i ki'u bo va'o lo nu do facki lo du'u na snada zei kakne lo ka ragve plipe zo'u: la .dorotis. cu mrobi'o .i fa'u la tinci mudypre cu mabla selkevbi'o ri'a tu'a lo ni'a rokci .i ku'i va'o lo nu mi cpana lo do trixe cu na tai nabmi .i ki'u bo lo nu farlu cu na sai crori'a mi li'u»
ni'o «lu mi ji'a mutce lo ka terpa lo nu farlu —sei la tolvirnu cinfo cu cusku— .i ku'i ru'a sarcu fa lo nu troci .i ja'o ko tsebi'o lo mi trixe .i ba ku mi'o troci li'u»
ni'o la cpitepygau cu tsebi'o lo trixe be la cinfo .i je lo barda danlu cu cadzu klama lo korbi be lo brafe'a gi'e dzibi'o
ni'o «lu ki'u ma na ku do bajra gi joi plipe —sei la cpitepygau cu retsku— li'u»
ni'o «lu ki'u lo nu la'e di'u na se tarti mi'a noi cinfo ku'o lo tamsmi —sei spuda— li'u» .i ba bo la cinfo fau lo nu banli plipe cu cecla vofli pagre lo vacri gi'e snura zvabi'o lo ragve .i lo drata cu mutce lo ka gleki lo nu viska lo nu tai frili la cinfo .i je cy ca lo nu la cpitepygau ba'o co'u zutse lo trixe cu za'u re'u plipe lo ragve be lo brafe'a
ni'o la .dorotis. cu jdice lo nu re moi .i se ki'u bo birka jgari la .totos. gi'e cpare lo trixe be la cinfo fau lo nu tagji jgari lo ne'okre lo pa xance .i ca lo bavla'i mokca cu simlu lo ka nu la .dorotis. cu vofli pa'o lo vacri .i je ba zi bo dy pu lo nu ka'e pensi lo fasnu cu snura tolcliva lo ragve .i la cinfo cu ci re'u xruti gi'e lebna la tinci mudypre .i je lo ro da tsebi'o ze'a lo temci te zu'e lo nu la cinfo ka'e surla .i ki'u bo lo barda nunplipe pe cy cu rinka lo nu tolcondi vasxu gi'e ta'irva'u tai tu'a lo barda gerku poi ba'o bajra ze'a lo dukse
ni'o lo gunma cu facki lo du'u lo ricfoi bu'u lo vi mlana cu denmi mutce gi'e manku je badri se jvinu .i ca lo nu la cinfo ba'o surla kei gy co'a litru ve ka'a lo pelxu kitybli dargu fau lo nu smaji kucli lo du'u xu kau ca da tolcliva lo fanmo be lo ricfoi gi'e di'a zvati lo carmi solgu'i .i zengau lo litru lo kamtolkufra fa lo ba za nu tirna lo cizra savru be ra'i lo condi ricfoi .i je la cinfo fi lo drata cu laurblesku lo se du'u lo vi gugde pagbu cu jai bu'u xabju fai la .kalidas.
ni'o «lu la .kalidas. cu mo —sei lo nixli cu retsku— li'u»
ni'o «lu ky cu xlali malda'u .i se xadni lo cribe simsa xadni gi'e se stedu lo tirxu simsa stedu —sei la cinfo cu spusku— gi'e se jgalu da poi tai clani gi'e kinli vau ja'e lo nu ka'e vlika'a mi lo re mei fi'o frili dunli lo nu da'i mi ka'e catra la .totos .i mi mutce lo ka terpa la .kalidas. li'u»
ni'o «lu mi na se spaji lo du'u do go'i —sei la .dorotis. cu spuda— .i ju'o ru'a ky mabla danlu li'u»
ni'o la cinfo cu pu'o spusku ca lo nu suksa fa lo nu tolcliva lo drata brafe'a be lo dargu .i ku'i lo vi brafe'a cu tai ganra gi'e condi vau ja'e lo nu la cinfo cu ba zi sai djuno lo du'u na ka'e plipe lo ragve
ni'o se ki'u bo lo gunma cu tsebi'o te zu'e lo nu pensi lo nu .ei mo kau .i je ba lo junri nu pensi kei la cpitepygau cu cusku
ni'o «lu vi barda tricu gi'e jibni lo brafe'a .i mi'o va'o lo nu la tinci mudypre ka'e katna lo tricu ja'e lo nu farlu lo ragve cu ka'e se frili lo nu ve ka'a cadzu li'u»
ni'o «lu la'e di'u klesi pa moi sidbo —sei la cinfo cu cusku— .i da'i da na ru'e sruma lo du'u nenri lo do stedu fa lo besna .e nai lo sudysrasu li'u»
ni'o la mudypre cu ba zi co'a gunka .i je ka'amru cu tai kinli ja'e lo nu lo tricu cu ba zi jibni lo ka se katna .i ba bo la cinfo cu punji lo ri tsali ke crane tuple lo tricu gi'e catke se rai lo ka vlipa .i lo tricu cu masno lo ka salpo binxo kei gi'e farlu fi'o sance lo lautce lo se ragve fau lo nu lo galraipau jimca cu cpana lo ragve
ni'o lo litru cu co'a ragve klama lo vi cizra cripu ca lo nu lo kinli selcmo cu gasnu lo nu vo'a fa'a ga'u catlu .i je se ri'a lo nu terpa carmi cu viska lo nu lo re barda danlu poi cribe se xadni gi'e tirxu se stedu cu fa'a bajra
ni'o «lu .kalidas. —sei la tolvirnu cinfo fau lo nu co'a tepydesku cu cusku— li'u»
ni'o «lu ko sutra —sei la cpitepygau cu krixa— .i je'u mi'o ragve klama li'u»
ni'o ja'e bo la .dorotis. cu pa moi lo klama fau lo nu birka jgari la .totos .i la tinci mudypre cu se lidne .i la cinfo to'e ki'u nai lo nu je'a terpa cu carna te zu'e lo nu fapro la .kalidas. kei gi'e ba bo cmoni lo tai cladu je mabla ja'e lo nu la .dorotis. cu krixa .e lo nu la cpitepygau cu trixe carna farlu .e lo nu lo ji'a sai tsali malda'u cu klasti gi'e se spaji catlu la cinfo
ni'o ku'i la .kalidas. se ja'e lo nu ge viska lo nu bramau la cinfo gi morji lo du'u ge re mei fa vo'a gi pa mei fa la cinfo cu di'a fa'a bajra .i je la cinfo cu klama lo drata fanmo be lo tricu gi'e carna te zu'e lo nu viska lo nu ky ba zi mo kau .i lo ji'a tsali malda'u se cau lo nu klasti ze'i lo mokca cu co'a co'e ve ka'a lo tricu .i je la cinfo fi la .dorotis. cu cusku:
ni'o «lu mi'o se maldimna .i ki'u bo ju'o ta ba vlika'a mi'o se pi'o lo ra kinli jgalu .i ku'i ko sanli ne'a ti'a mi .i je mi ta ba damba ze'a lo nu mi jmive li'u»
ni'o «lu ko ze'i denpa —sei la cpitepygau cu cladu cusku— li'u» .i cy pu ca'o pensi lo du'u ma kau se zukte xagrai .i ca cpedu fi lo mudypre fe lo nu katna vimcu lo tricu fanmo poi cpana lo vo'a ragve be lo brafe'a .i la tinci mudypre ba zi co'a pilno ri ka'amru .i je ca sai lo nu la .kalidas. cu na ru'e ba'o tolcliva lo tricu fanmo kei lo tricu cu farcu fi'o sance lo lautce fo lo brafe'a fau lo nu bevri lo tolmle je fe'ucmo malda'u .i je ro lo re da cu vlile se marxa bu'u lo kinli rokci be bu'u lo lolraipau
ni'o «lu ja'o —sei la tolvirnu cinfo fau lo nu clani ke co'urdu'u vasxu cu cusku— .i za'a mi'o ba za'o jmive ze'a lo se jmina .i je mi la'e di'u je'a gleki .i ki'u bo ju'o ru'a mutce lo ka to'e se kufra kei fa lo nu na jmive .i lo va danlu mi pu tai tepygau zei mutce ja'e lo nu lo mi risna cu za'o slilu sutra li'u»
ni'o «lu ui nai —sei la tinci mudypre cu badri cusku— .i .au mi se risna lo ka'e slilu li'u»
ni'o lo pu zi selfri cu se jalge lo nu lo litru se mau ro lo purci cu djica lo ka barbi'o lo ricfoi .i tai sutra lo ka cadzu .i ja'e bo la .dorotis. cu binxo lo ka tatpi kei gi'e nitcu lo ka se marce bu'u lo trixe be la cinfo .i mutce lo ka se gleki ly kei fa lo nu lo tricu cu jdika lo ka denmi kei pa'a lo nu ly. zenba lo ka klama ze'a ma kau .i je ca lo dormijba'i cu suksa fa lo nu tolyli'a lo ganra rirxe noi sutra flecu ne'a ca'u ly .i viska lo nu bi'u lo ragve be lo rirxe lo pelxu kitybli dargu cu pagre lo melbi nurma ne lo crino sastu'a poi se barna lo sorskari xrula ku'o fau lo nu pi ro lo dargu cu se korbi lo tricu poi mulno se dandu lo kukte grute .i ly mutce lo ka selpu'a lo ka viska lo bi'u nai kukte gugde noi crane
ni'o «lu ta'i ma mi'o ravykla lo rirxe —sei la .dorotis. cu retsku— li'u»
ni'o «lu frili se zukte —sei la cpitepygau cu spuda— .i la tinci mudypre cu bilga lo ka zbasu lo pinblo se va'u ma'a ja'e lo nu ma'a kakne lo ka fulta se ka'a lo ragve li'u»
ni'o ja'e bo la mudypre cu lebna lo ri ka'amru gi'e co'a katna lo cmalu tricu te zu'e lo nu zbasu lo pinblo .i ca lo nu my ca'o gunka kei la cpitepygau cu tolcri fi lo rirxe korbi fe lo tricu poi culno lo xamgu grute .i la'e di'u pluka la .dorotis. ku noi pu ze'a pi ro lo djedi cu citka no na'e bo lo narge zi'e noi ca jukpa lo banli sanmi lo makcu grute
ni'o ku'i lo nu da zbasu lo pinblo cu se ditcu va'o ji'a sai lo nu da to'e lazni gi'e na'e ta'irbi'o vau du'i tu'a la tinci mudypre .i ca lo nu co'a nicte zo'u: lo nu gunka na mulno .i se ki'u bo tolcri lo se kufra stuzi be ni'a lo tricu be'o noi bu'u ke'a co'u lo cerni cu sipna .i la .dorotis. cu senva la ri'ojme tcadu jo'u la vrude te makfa .oz. ku noi ba za xrugau benji dy lo zdani be dy
## ni'o ni'o bi mo'o lo mrockape ke makpapi foldi
ni'o lo ma'a cmalu bende be lo litru cu cikybi'o ca lo za'u moi cerni fau lo nu di'a se livla gi'e culno lo ka pacna .i je la .dorotis. cu cersai citka tai tu'a lo noltruti'u lo najysmela jo'u lo zirsmela vu'o pe lo tricu poi jibni lo rirxe .i ti'a lo gunma cu zvati fa lo manku ricfoi poi gy ba'o pagre ke'a gi'e ku'i xlafri lo so'i nu se toldarsygau .i ku'i ca'u ku zvati fa lo melbi je se solgu'i gugde poi simlu lo ka xlura fi tu'a la ri'ojme tcadu
ni'o li'a lo ganra rirxe cu ca se ragve lo gunma lo va melbi gugde .i ku'i lo pinblo cu na ru'e mulno .i je ca lo nu la tinci mudypre cu ba'o katna lo su'o se jmina mudyspi gi'e lasna ri lo drata lo mudri pijne kei lo gunma cu bredi lo nu tolsti .i la .dorotis. cu tsebi'o bu'u lo midju be lo pinblo gi'e jgari la .totos. lo birka .i ca lo nu la tolvirnu cinfo cu stapa lo pinblo kei py cu salpo mutce binxo ki'u lo nu cy cu barda gi'e tilju .i ku'i la cpitepygau jo'u la tinci mudypre cu sanli lo drata fanmo te zu'e lo nu stogau by .i je jgari lo clani grana lo xance te pi'o lo nu catke muvgau lo pinblo fu lo djacu
ni'o lo gunma ca lo nuncfa cu xamgu snada .i ku'i ca lo nu tolcliva lo midju be lo rirxe kei lo sutra flecu cu catke lo pinblo fa'a lo dzifle ja'e lo nu darmau je darmau lo klaji pe lo pelxu kitybli .i je lo djacu cu binxo lo ka tai condi kei ja'e lo nu lo clani grana cu na ka'e lamji lo loldi
ni'o «lu ti xlali —sei la tinci mudypre cu cusku— .i ki'u bo mi'o va'o lo nu na snada lo ka tolcliva lo tumla cu ba se bevri fi lo gugde pe la palci termafyfe'i pe la stici .i je ty ba mafxlu mi'o gi'e gasnu lo nu mi'o ty cu selfu li'u»
ni'o «lu se va'o bo mi na te dunda lo besna —sei la cpitepygau cu cusku— li'u»
ni'o «lu si'a mi na te dunda lo ka virnu —sei la tolvirnu cinfo cu cusku— li'u»
ni'o «lu si'a mi na te dunda lo risna —sei la tinci mudypre cu cusku— li'u»
ni'o «lu si'a mi no roi xruti la .kanzas. —sei la .dorotis. cu cusku— li'u»
ni'o «lu .ei sai mi'o tolcliva la ri'ojme tcadu va'o lo nu kakne —sei la cpitepygau cu di'a co'e— li'u» .i catke se kai lo tai ka tsali kei ja'e lo nu lo clani grana cu selvicyjdari fi lo derpesxu pe lo rirxe loldi .i ba bo pu lo nu cy ka'e lacpu vimcu gi'a toljgari kei lo pinblo cu vlile se bevri to'o .i je la uu cpitepygau cu stali fau lo nu jgari lo grana kei lo midju be lo rirxe
ni'o «lu co'o li'u» se krixa cy fa'a lo drata noi mutce lo ka kecti fi lo nu cliva cy .i je'u la tinci mudypre cu co'a klaku gi'e ku'i fu'au morji lo du'u ka'e furtirse kei ja'e lo nu sudgau lo se klaku se pi'o lo jisystota'u pe la .dorotis.
ni'o li'a la'e de'u xlali la cpitepygau
ni'o «lu mi ca selxlamau mi pe lo nu pa re'u penmi la .dorotis. —sei cy pensi— .i pu jorne lo grana be bu'u lo gurni foldi noi bu'u ke'a mi kakne lo ka tepygau lo korvo kei do'a nai .i ku'i ju'o no da prali fi lo nu lo cpitepygau cu jorne lo grana be bu'u lo midju be lo rirxe .i ui nai ba'a mi ro mai ba no roi se besna li'u»
ni'o lo pinblo cu muvdu fa'a lo dzifle .i je la cpitepygau uu cu darno mutce binxo .i ba bo la cinfo cu cusku:
ni'o «lu .ei sai da se zukte fi lo nu nurgau mi'o .i pe'i mi kakne lo ka limna se ka'a lo rirxe korbi gi'e lacpu lo pinblo kei lo nu do tagji jgari lo jipno be lo mi rebla li'u»
ni'o ja'e bo cy cu plipe lo djacu .i je la tinci mudypre cu tagji jgari lo ra rebla .i ba bo la cinfo cu co'a limna klama se rai lo kamvlipa fa'a lo rirxe korbi .i nandu se gunka to'e ki'u nai lo du'u cy tai barda .i ku'i ba za se lacri to'o ne'i lo flecu .i je ba bo la .dorotis. cu jgari lo clani grana pe la tinci mudypre gi'e sidju fi lo nu catke lo pinblo fa'a lo tumla
ni'o lo ro da mutce lo ka tatpi kei ca lo nu tolcliva lo rirxe korbi gi'e te ka'a stapa lo melbi ke crino srasu .i je djuno lo ji'a du'u lo flecu pu bevri vo'a ve'a lo clani lo darno be lo pelxu kitybli dargu noi pluta la ri'ojme tcadu
ni'o «lu .ei mi'o ca mo —sei la tinci mudypre cu retsku be ca lo nu la cinfo cu tsebi'o lo srasu te zu'e lo nu curmi lo nu lo solgu'i cy sudgau— li'u»
ni'o «lu mi'o nitcu lo nu xruti lo dargu ta'i da —sei la .dorotis. cu cusku— li'u»
ni'o «lu xagrai lo se platu fa lo nu cadzu re'o lo rirxe korbi co'u lo nu mi'o di'a zvati lo dargu —sei la cinfo cu te notci— li'u»
ni'o ca lo nu lo gunma ba'o mo'u surla zo'u: la .dorotis. cu lebna lo ri lanka .i je gy co'a co'e re'o lo srasu ri'erkoi fa'a lo dargu poi lo rirxe pu bevri gy ke'a .i melbi gugde .i tolcau lo so'i xrula .e lo so'i grute tricu .e lo so'i solgu'i vu'o poi gekyzengau .i je lo litru va'o lo nu da'i na tai kecti la cpitepygau cu ka'e gleki mutce
ni'o ly cadzu se rai lo kamsutra fau lo nu la .dorotis. cu pa po'o roi klasti te zu'e lo nu crepu lo pa melbi xrula .i je ba lo temci la tinci mudypre cu krixa «lu ko catlu li'u»
ni'o ba ku lo ro da cu catlu lo rirxe gi'e viska lo nu la cpitepygau cu zvati lo ri grana bu'u lo midju be lo djacu fau lo nu simlu lo ka seicni je badri mutce
ni'o «lu ta'i ma mi'o ta ka'e sidju —sei la .dorotis. cu retsku— li'u»
ni'o la cinfo .e la mudypre cu stedu desygau ki'u lo nu na djuno .i se ki'u bo tsebi'o lo ri'erkoi gi'e caucni catlu la cpitepygau co'u lo nu vofli jbibi'o fa lo kiknoia poi ca lo nu viska vo'a cu klasti lo djacu korbi te zu'e lo nu surla
ni'o «lu do me ma gi ju'e klama ma —sei la kiknoia cu retsku— li'u»
ni'o «lu mi'e .dorotis. —sei lo nixli cu spuda— .i je ti mi pendo .i la tinci mudypre .i la tolvirnu cinfo .i mi'a klama la ri'ojme tcadu li'u»
ni'o «lu ti na drani dargu —sei la kiknoia cu cusku be fau lo nu se torni lo ri clani cnebo gi'e kinli catlu lo cizra bende
ni'o «lu mi djuno —sei la .dorotis. cu xrugau— .i ku'i mi'a pu cirko la cpitepygau gi'e kucli lo nu ta'i ma kau cpacu cy li'u»
ni'o «lu cy ma zvati —sei la kiknoia cu retsku— li'u»
ni'o «lu lo va rirxe —sei lo cmalu nixli cu spusku— li'u»
ni'o «lu mi va'o lo nu cy na tai ge barda gi tilju cu cpacu cy se va'u do —sei la kiknoia cu te notci— li'u»
ni'o «lu cy na sai tilju —sei la .dorotis. cu djica cusku— .i ki'u bo cy cu te setca lo sudysrasu .i je va'o lo nu do bevri cy mi'a zo'u: mi'a do ze'e ba tai ckire zei mutce li'u»
ni'o «lu .i'a mi ba troci —sei la kiknoia cu cusku— .i ku'i mi va'o lo nu facki lo du'u tilju dukse cu ba falcru cy lo rirxe li'u»
ni'o ja'e bo lo barda cipni cu mo'i ga'u vofli gi'e voikla ga'u lo djacu lo jai bu'u grana jorne be fai la cpitepygau .i ba bo la kiknoia fi lo ri barda jgalu cu co'a jgari la cpitepygau lo birka gi'e bevri cy lo ga'u vacri je ba bo lo ri'erkoi noi bu'u ke'a la .dorotis. .e la cinfo .e la tinci mudypre .e la .totos. cu zutse
ni'o la cpitepygau ca lo nu sanji lo nu di'a zvati lo ri pendo cu tai gleki ja'e lo nu pamjai ro boi py (to ji'a sai la cinfo .e la .totos. toi) .i je ca lo nu cadzu cu sanga «lu .tolderide'os. li'u» ca ro nu stapa .i tai geicni
ni'o «lu mi pu tai terpa lo nu bi'ai ro roi stali lo rirxe —sei la cpitepygau cu cusku— .i ku'i lo xendo kiknoia mi nurgau .i je mi va'o lo nu ca da mi se besna cu .ai tolcri lo bi'u nai kiknoia gi'e dunda fi cy fe lo nu mi xendo cy li'u»
ni'o «lu na sarcu —sei la kiknoia ku noi vofli jibni kansa cu cusku— .i mi ro roi gleki lo nu sidju lo se raktu .i ku'i nitcu lo nu cliva ca .i ki'u bo lo mi cifnu mi denpa bu'u lo cpizda .i mi pacna lo nu ge do ba tolcri la ri'ojme tcadu gi la .oz. do ba sidju li'u»
ni'o «lu ki'e do —sei la .dorotis. cu spuda— li'u» .i je ba bo la xendo kiknoia cu mo'i ga'u vofli gi'e ba zi bo co'u se viska
ni'o lo gunma cu ca'o cadzu fau lo nu tinju'i lo se sanga be la sorska cipni gi'e catlu lo melbi xrula noi fe'e ca binxo lo tai rotsu ja'e lo nu lo loldi cu se gacri xy .i zvati fa lo barda ke pelxu fa'u blanu fa'u zirpu xrula je ji'a lo barda girzu co fagri xunre makpapi noi tai carmi skari ja'e lo nu na ru'e visnalka'e fa lo kanla be la .dorotis.
ni'o «lu xu ta na melbi —sei lo nixli cu retsku be fau lo nu vasxu lo cpina panci be lo carmi xrula— li'u»
ni'o «lu ru'a ja'a go'i —sei la cpitepygau cu spusku— .i mi ca lo nu se besna cu nelci zenba la'a li'u»
ni'o «lu mi va'o lo .au nu se risna cu prami ta —sei la tinci mudypre cu jmina cusku— li'u»
ni'o «lu mi pu ro roi nelxi lo xrula —sei la cinfo cu cusku— .i xy simlu lo ka tai seldjucau je ruble .i ku'i no lo xrula pe lo ricfoi cu carmi dunli ta li'u»
ni'o lo gunma co'a lampagre lo se jmina je se jmina ke barda makpapi jo'u lo memyme'a zenba be lo drata xrula .i je ba zi zvati lo midju be lo barda makpapi bo foldi .i ka'u misno fatci fa lo du'u va'o lo nu lo tai xrula cu tai so'i mei kei lo panci cu tai tsali ja'e lo nu ro da poi vasxu py cu sipybi'o .i je lo sipna va'o lo nu na to'o se bevri cu ze'e be sipna .i ku'i la .dorotis. na djuno la'e di'u .i je nai dy ka'e darbi'o lo carmi je xunre xrula noi fe'e ro roi ru'u zvati .i ja'e bo lo kanla be dy cu ca'o tilju binxo .i je dy cinmo lo ka nitcu lo nu tsebi'o te zu'e lo nu surla gi'e sipna
ni'o ku'i la tinci mudypre cu na curmi la'e di'u
ni'o «lu .ei mi'o sutra ja'e lo nu xruti lo pelxu kitybli dargu pu lo nu manku —sei ty my cusku— li'u» .i je la cpitepygau cu tugni .i ja'e bo ca'o cadzu co'u lo nu la .dorotis. na za'o ka'e sanli .i lo ri kanla cu ga'orbi'o to'e ki'u nai tu'a dy .i je dy cu tolmo'i lo du'u zvati ma kau kei gi'e farlu lo jbini be lo makpapi fau lo nu condi sipna
ni'o «lu .ei mi'o mo —sei la tinci mudypre cu retsku— li'u»
ni'o «lu va'o lo nu mi stacru ta ti kei ta ba mrobi'o —sei la cinfo cu cusku— .i lo panci be lo xrula cu catra ro mi'o .i mi ja'a ru'e ka'e stogau lo kanla lo ka kalri .i je lo gerku cu xa'o sipna li'u»
ni'o jetnu .i la .totos. pu farlu ne'a lo ri cmalu jitro .i ku'i la cpitepygau .e la tinci mudypre vu'o noi na marji lo rectu cu na se raktu tu'a lo panci be lo xrula
ni'o «lu ko bajra sutra —sei la cpitepygau fi la cinfo cu cusku— gi'e barkla lo vi mrori'a ke xlura foldi se rai lo kamsutra .i mi'o ba bevri lo cmalu nixli .i ku'i va'o lo nu da'i do sipybi'o zo'u: do dukse lo ka barda kei lo nu se bevri li'u»
ni'o ja'e bo la cinfo cu sa'irbi'o gi'e crane bajra se rai lo kamsutra .i ba lo mokca cu co'u se viska
ni'o «lu .e'u mi'o zbasu lo stizu lo mi'o xance gi'e bevri ta —sei la cpitepygau cu cusku— li'u» .i ja'e bo lafti la .totos. gi'e punji lo gerku lo tsetupyzbe be la .dorotis. gi'e ba bo zbasu lo stizu lo vo'a xance poi stizu ku'o jo'u lo vo'a birka poi stizu birka ku'o gi'e bevri lo sipna nixli pa'o lo xrula
ni'o cadzu joi cadzu .i je lo barda lolgai co mrori'a xrula poi sruri cu simlu lo ka se fanmo no da .i lo litru cu jersi lo kruvi be lo rirxe gi'e ro mai penmi lo vo'a pendo no'u la cinfo zi'e noi condi sipna vreta lo jbini be lo makpapi .i lo xrula pu dukse lo ka tsali kei tu'a lo barda mutce danlu .i je dy pu randa ca lo fanmo gi'e farlu lo loldi vi lo cmalu ki lo korbi be lo makpapi foldi be'o noi fe'e co'a ke'a lo kukte srasu cu pre.a lo melbi ke crino foldi ca'u lo litru
ni'o «lu —sei la tinci mudypre cu badri cusku— .i ki'u bo dukse lo ka tilju kei lo nu se lafti .i mi'o nitcu lo nu stagau ta ti ja'e lo nu ze'e sipna gi'e ju'o cu'i senva lo nu ba'o tolcri lo ka virnu ro mai li'u»
ni'o «lu mi kecti —sei la cpitepygau cu cusku— .i la cinfo pu xamgu mutce pendo ma'i lo tai tolvirnu .i ku'i .e'u mi'o di'a klama li'u»
ni'o bevri lo sipna nixli lo melbi stuzi poi jibni lo rirxe zi'e noi lo ni darno lo makpapi foldi cu banzu lo nu fanta lo nu ny cu vasxu lo se jmina ke vindu pe lo xrula .i je bu'u ku toljursa punji ny lo ranti srasu gi'e denpa lo nu lo blebi'e cu cikygau ny
## ni'o ni'o so mo'o la noltrufe'i be lo tumla smacu
ni'o «lu mi'o ca na ka'e darno lo klaji pe lo pelxu kitybli —sei la cpitepygau cu te notci be fau lo nu sanli re'o lo nixli— .i ki'u bo mi'o ba'o na ru'e klama ve'a lo jai ve'a fardukti se bevri be lo rirxe li'u»
ni'o la tinci mudypre cu spuda pu'o lo nu tirna lo dizlo se cmoni .i je my fau lo nu cargau lo stedu kei (to noi melbi se snada va'o tu'a lo cidni toi) cu viska lo nu lo fange danlu cu plipe bajra lo srasu fa'a xai .i je'u dy du lo pelxu cicmlatu .i je la tinci mudypre cu pensi lo du'u ju'o cy cu jersi da kei ki'u lo nu lo kerlo be cy cu vreta jibni lo stedu kei .e lo nu lo moklu cu ganra kalri fau lo nu jarco lo re tolmle denci linji ca lo nu lo xunre kanla cu carmi tai lo fagri bolci .i ca lo nu ca'o jibni binxo kei la tinci mudypre cu viska lo nu ca'u lo danlu cu bajra fa lo cmalu foldi bo smacu kei gi'e djuno to'e ki'u nai lo nu na se risna kei lo du'u toldra fa la cicmlatu lo ka troci lo ka catra lo tai melbi je tolckape danlu
ni'o se ki'u bo la mudypre cu lafti lo ri ka'amru .i je ca lo nu la cicmlatu cu jibni binxo cu sligau sutra darxi cy se ri'a lo nu lo stedu be lo danlu cu klina katna se vimcu fi lo xadni .i je dy cu ganro bu'u lo jamfu be my ja'e lo re spisa
ni'o lo tumla smacu mu'i lo nu ca ba'o se nurgau fi tu'a lo bradi cu klasti .i je fau lo nu klama zei masno la mudypre cu cusku se pi'o lo galto'a ke cmalu voksa di'e
ni'o «lu .i'o ki'e do'u .i ki'e sai .i do nurgau lo mi nunjmive li'u»
ni'o «lu .e'o ko na tavla fi la'e di'u —sei la mudypre cu spusku— .i mi na se besna .i se ki'u bo mi racli jundi lo ro nu da'i da nitcu lo pendo .i ju sai lo da'i pendo cu smacu !po'o li'u»
ni'o «lu le'o smacu po'o —sei lo cmalu danlu cu se fanza krixa— .i je'u mi noltrufe'i .i noltrufe'i lo ro tumla smacu li'u»
ni'o «lu ua je'e —sei la mudypre cu cusku be fau lo nu krorinsa— li'u»
ni'o «lu ki'u ku do ba'o zukte lo banli je ji'a lo se virnu ta'i lo nu nurgau lo mi nunjmive —sei la noltrufe'i cu jmina cusku— li'u»
ni'o ca bo lo so'o smacu cu ca'o fa'a bajra se rai lo sutra se jimte be lo nu lo tuple ka'e bevri sy .i je ca lo nu viska la noltrufe'i cu cladu cusku di'e
ni'o «lu doi ga'i nai noltru mi'a pu jinvi lo du'u do ba se catra .i ta'i ma do snada lo ka renvi tu'a la barda cicmlatu li'u» .i ro lo smacu cu tai dizlo krobi'o fa'a lo cmalu noltrufe'i ja'e lo nu sy na ru'e sanli fi lo stedu
ni'o «lu lo vi xajmi tinci bo nanmu —sei ny spusku— pu catra la cicmlatu gi'e nurgau lo mi nunjmive .i se ki'u bo co'a lo cabna lo ro do cu selfu .ei gi'e tinbe lo cmarai ku ji'a sai li'u»
ni'o «lu mi'a ja'a co'e —sei lo ro smacu cu galto'a krixa kansi'u .i ba bo sy cu preja fa'a ro da .i ki'u bo la .totos. pu ba'o cikybi'o gi'e ca gleki gercmo mu'i lo nu viska lo vi so'i smacu kei gi'e plipe lo midju be lo gunma .i la .totos. pu ro roi prami lo ka jersi lo smacu kei ca lo nu xabju la .kanzas. kei gi'e jinvi lo du'u na nabmi
ni'o ku'i la tinci mudypre cu kavbu lo gerku lo ra birka gi'e tagji jgari ze'a lo nu lausku fi lo smacu fe «lu ko xruti .i ko xruti .i la .totos. do na ba crogau li'u»
ni'o fau ku la smacu noltruni'u cu bargau lo ri stedu lo cnita be lo srasu girzu gi'e retsku se pi'o lo toldarsi voksa «lu xu do birti lo du'u ty mi'a na ba batci li'u»
ni'o «lu mi ba na curmi —sei la mudypre cu cusku— .i se ki'u bo ko na terpa li'u»
ni'o lo smacu cu porci ke cpare xruti .i je la .totos. cu na za'u re'u gercmo .i to'e ki'u nai bo ty cu troci lo ka cliva lo birka be la mudypre kei gi'e bacti da'i my va'o lo nu na drani djuno lo du'u my tinci .i ro mai pa lo brarai be lo smacu cu cusku
ni'o «lu pau mi'a ma do ka'e pleji —sei sy retsku— lo nu do nurgau lo nunji'e be lo mi'a noltruni'u li'u»
ni'o «lu no da poi mi djuno fi ke'a —sei la mudypre cu spusku— li'u» .i ku'i la cpitepygau ku noi pu ca'o pensi troci gi'e ku'i na'e snada ki'u lo nu lo ri stedu cu te setca lo sudysrasu cu cusku zei sutra «lu ua ie se'i .i do ka'e nurgau lo mi'a pendo no'u la tolvirnu cinfo zi'e noi ca'o sipna ne'i lo makpapi ckana li'u»
ni'o «lu ue ii lo cinfo —sei lo cmalu noltruni'u cu krixa— .i ju'o ba'a cy ro mi'a ba citka li'u»
ni'o «lu ie nai —sei la cpitepygau cu jdice cusku— .i lo bi'u nai cinfo cu tolvirnu li'u»
ni'o «lu je'u pei —sei la smacu cu retsku— li'u»
ni'o «lu cy cu xusra la'e di'u —sei la cpitepygau cu spusku— .i je ju'o cy no roi crogau da poi pendo mi'a .i va'o lo nu do mi'a sidju lo nu nurgau cy zo'u: nu'e do cy do ba xendo zei mutce li'u»
ni'o «lu .i'a je'e —sei la noltruni'u cu cusku— .i mi'a do lacri .i ku'i .ei mi'a mo li'u»
ni'o «lu xu zasti fa lo so'i tai smacu poi ke'a do tercme zo noltruni'u gi'e djica lo nu tinbe fi do li'u»
ni'o «lu go'i .i zasti fa lo su'o ki'o mei —sei ny spusku— li'u»
ni'o «lu ko va'o minde lo ro da lo nu klama ti se rai lo kamsutra kei gi'e gasnu lo nu ro vo'e bevri lo clani ke cilta spisa li'u»
ni'o la noltruni'u cu selfarbi'o lo smacu poi jbizva ny gi'e ba zi minde sy lo nu klacpe ro lo drata smacu .i zi sai ba lo nu tirna lo nu minde cu to'o bajra se rai lo kamsutra fa'a ro da
ni'o «lu ca ku zo'u: —sei la cpitepygau fi la tinci mudypre cu cusku— .ei do klama lo tricu be ne'a lo rirxe korbi gi'e zbasu lo marce poi ba bevri la cinfo li'u»
ni'o la mudypre cu ba zi klama lo tricu gi'e co'a gunka .i je ba za zbasu lo marce lo jimca be lo tricu be'o noi vo'a fi ke'a cu katna vimcu ro lo pezli je ro lo jimca jimca .i simla'a lo ro mei lo mudri pijne gi'e zbasu lo vo xislu lo tordu spisa be lo barda ke tricu stani .i tai sutra je xamgu gunka ja'e lo nu ca lo nu lo smacu co'a tolyli'a cu mulno bredi ri fa lo marce
ni'o sy klama fi ro lo se farna .i je so'i ki'o mei fa sy .i lo barda smacu .e lo cmalu smacu .e lo nutli smacu .i je ro boi sy bevri lo spisa be lo cinlysko se pi'o lo moklu .i ca la'e di'u la .dorotis. cu cikybi'o fi'o se sisti lo ka ze'u sipna gi'e kargau lo kanla .i dy mutce lo ka se spaji lo nu dy. vreta lo srasu fau lo nu so'i ki'o smacu cu ne'a sanli gi'e toldarsi catlu dy .i ku'i la cpitepygau cu jungau dy ro da gi'e cusku fau lo nu selfarbi'o lo se sinma ke cmalu me la smacu kei:
ni'o «lu ko curmi lo nu mi do selsaugau la io ga'i nai noltruni'u li'u»
ni'o la .dorotis. cu junri tu'ifru .i je la noltruni'u cu tupkrogau gi'e ba bo binxo lo mutce be lo ka xendo lo cmalu nixli
ni'o la cpitepygau .e la mudypre cu ca co'a lasna lo smacu lo marce lo cilta poi sy pu bevri .i pa lo fanmo be lo cilta cu se jongau fi lo smacu lo cnebo .i je lo drata fanmo cu go'i fi lo marce .i li'a lo marce cu bramau ro lo smacu poi pu'o lacpu my ku'o fo lo pilji be li ki'o .i ku'i lo smacu ca lo nu ro vo'a ba'o se jongau cu se frili lo nu lacpu my .i ca lo nu ji'a sai la cpitepygau jo'u la tinci mudypre cu zutse my kei my se lacpu zei sutra lo cizra ke cmalu xirma fa'a lo jai bu'u sipna be fai la cinfo
ni'o ba lo barda je nandu nu gunka (to ki'u lo nu la cinfo cu tilju toi) cu snada lo ka cpanygau cy lo marce .i ba bo la noltruni'u cu sutra lo ka minde lo ri smacu lo nu tolsti .i ki'u bo ny cu xanka lo nu lo smacu va'o lo nu ze'a lo dukse cu stali lo jbini be lo makpapi cu sipybi'o
ni'o ca lo nuncfa lo cmalu danlu to'e ki'u nai lo nu so'i mei cu ja'a ru'e ka'e lacpu lo tilju se cpana marce .i ku'i la mudypre joi la cpitepygau cu catke fi lo trixe .i je snada zenba .i ba za bo gurgau muvgau la cinfo lo bartu be lo makpapi foldi be'o no'u lo crino foldi noi bu'u ke'a cy ka'e za'u re'u vasxu lo titla je vifne vacri .e nai lo vindu panci be lo xrula
ni'o la .dorotis. cu jbikla te zu'e lo nu penmi kei gi'e xendo kirsku lo smacu lo nu nurgau lo vo'a pendo lo nu mrobi'o .i dy pu binxo lo tai nelci be la cinfo ja'e lo nu gleki lo nu cy ba'o se nurgau
ni'o ba bo lo smacu cu se toljongau fi lo marce gi'e preja klama pa'o lo srasu lo zdani .i la smacu noltruni'u cu ro moi lo cliva
ni'o «lu va'o lo nu ca da do mi'a za'u re'u nitcu zo'u: —sei ny cusku— ko klama lo foldi gi'e krixa .i se va'o bo mi'a do ba tirna gi'e sidju .i co'o li'u»
ni'o «lu co'o —sei lo ro da cu spuda— li'u» .i je la noltruni'u cu to'o bajra .i ca bo la .dorotis. cu tagji jgari la .totos. se va'o nai lo nu ty cu bajri jersi gi'e tepygau ny
ni'o ba ku lo ro da cu tsebi'o ne'a la cinfo co'u lo nu cy cu cikybi'o .i je la cpitepygau fi la .dorotis. cu bevri lo grute pe lo ne'a tricu ge'u noi dy citka ke'a poi vacysai
## ni'o ni'o pa no mo'o lo badypre pe lo bravrogai
ni'o lo naltordu cu temci fi lo nu la tolvirnu cinfo cu cikybi'o .i ri'a bo cy pu ze'u vreta ne'i lo makpapi fau lo nu vasxu lo mrori'a panci .i ku'i cy ca lo nu ca'a kargau lo kanla gi'e gunro te ka'a lo marce cu mutce lo ka gleki lo nu za'o jmive
ni'o «lu mi pu bajra se rai lo kamsutra —sei cy fau lo nu zutse gi'e ta'irva'u cu cusku— .i ku'i lo xrula pu dukse lo ka tsali kei mi .i ta'i ma do snada lo ka vimcu mi li'u»
ni'o ba bo lo drata cu te lisri lo tumla smacu .e lo nu sy cu xendo nurgau cy lo nunmro .i je la tolvirnu cinfo cu cmila gi'e cusku:
ni'o «lu mi pu ro roi jinvi lo du'u mi barda gi'e tsali .i to'e se ki'u bai bo lo tai cmalu dacti be mu'u lo xrula mi na ru'e mrogau .i je lo tai cmalu danlu be mu'u lo smacu cu nurgau lo mi nunji'e .i cizra mutce .i ku'i doi pendo mi'o ca mo .ei li'u»
ni'o «lu .ei mi'o litru co'u lo nu tolcri lo pelxu kitybli dargu —sei la .dorotis. cu cusku— .i je ba bo mi'o ka'e klama la ri'ojme tcadu li'u»
ni'o lo gunma fau lo nu la cinfo cu di'a kanro mulno gi'e di'a cinmo lo ka sevzi cu co'a litru fau lo nu se pluka zei mutce lo nu cadzu lo ranti je crino srasu .i je ba za lo na clani cu tolcliva lo pelxu kitybli dargu gi'e zazu re'u se farna la ri'ojme tcadu ku noi la banli .oz. cu xabju li'u»
ni'o lo dargu cu xutla gi'e xamgu ke bliku se gacri .i je lo gugde cu melbi .i ja'e bo lo litru cu se pluka lo nu cliva lo ricfoi .e lo ri ckape poi ly ke'a pu lifri bu'u lo ra manku ctino .i za'u re'u ku ly viska lo se zbasu bitmu poi se jbini lo dargu .i ku'i by pe vi cu crino se cintypu'i .i je lo zdani poi lo litru cu lampagre zi'e noi za'a lo te cange cu xabju ku ji'a crino se cintypu'i .i ly lampagre lo so'o tai zdani ze'a lo lecydo'i .i je su'o roi ku lo prenu cu klama lo vorme gi'e catlu ly tai lo nu djica lo nu retsku .i ku'i no boi py cu jbibi'o gi'a tavla vau ly .i ki'u bo la cinfo cu duksu lo ka jai se terpa py .i ro lo prenu cu dasni lo kukte ri'ojme crino taxfu .e lo konju mapku noi simsa lo me la maxpre moi
ni'o «lu ja'o ti gugde la .oz. —sei la .dorotis. cu cusku— .i je ju'o mi'o binxo lo jibni be la ri'ojme tcadu li'u»
ni'o «lu ie —sei la cpitepygau cu spuda .i vi ku ro da crino .i ku'i bu'u lo gugde be la maxpre lo blanu cu traji skari .i ku'i lo vi prenu na simlu lo ka xendo dunli la maxpre .i je mi xanka lo nu mi'o ba na tolcri lo stuzi poi mi'o ka'e sipna ze'a lo nicte li'u»
ni'o «lu .au mi citka na'e bo lo grute —sei lo nixli cu cusku— .i je mi birti lo du'u la .totos. cu na ru'e ba'o djacaumro .i je'u mi'o klasti lo se li'erla'i zdani gi'e tavla lo prenu li'u»
ni'o ja'e bo ca lo nu tolcliva lo na'e cmalu cange bo zdani kei la .dorotis. cu virnu klama lo vorme gi'e darxi
ni'o lo ninmu cu kargau vy .i lo ni kalri cu ja'a ru'e banzu lo nu catlu lo bartu .i ny cusku «lu do ma djica doi verba .i je ki'u ma lo va cinfo do kansa li'u»
ni'o «lu mi djica lo nu stali do ze'a lo nicte va'o lo nu do curmi —sei la .dorotis. cu spusku— .i je lo cinfo cu pendo mi gi'e na crogau do va'o lo nu ji'a sai lo mulno munje cu se pleji li'u»
ni'o «lu xu ta tolcilce —sei lo ninmu cu retsku be fau lo nu gasnu lo nu lo vorme cu kalri zenba milxe— li'u»
ni'o «lu ja'a go'i —sei lo nixli cu cusku— .i je ji'a cy banli lo ka tolvirnu .i cy do ba terpa se mau lo nu do cy cu no'a li'u»
ni'o «lu ja'o —sei lo ninmu ba lo nu pensi gi'e za'u re'u catlu la cinfo cu cusku— va'o lo nu jetnu zo'u: .e'a do nerkla .i je mi ba dunda lo vacysai .e lo sipna stuzi li'u»
ni'o ja'e bo lo ro da nerkla lo zdani noi se xabju lo po'o nai ninmu .e lo re verba .e lo nanmu .i lo nanmu pu se crori'a fi lo tuple gi'e ca vreta lo sfofa be bu'u lo kojna .i lo lanzu cu simlu lo ka mutce lo ka se spaji lo nu viska lo tai cizra kansi'u .i je ca lo nu lo ninmu cu ca'o tolcando lo nu bregau lo jubme zo'u: lo nanmu cu retsku:
ni'o «lu ro do ma klama li'u»
ni'o «lu la ri'ojme tcadu —sei la .dorotis. cu cusku— te zu'e lo nu penmi la banli .oz. li'u»
ni'o «lu ua sai —sei lo nanmu cu cladu cusku— .i xu do birti lo du'u la .oz. ba curmi li'u»
ni'o «lu da'i ki'u ma na co'e —sei dy spuda— li'u»
ni'o «lu ti'e .obu cu no roi curmi lo nu da .obu penmi .i mi pu zvati la ri'ojme tcadu so'i roi .i melbi je se manci stuzi .i ku'i mi no roi jai se curmi fai lo ka viska la banli .oz .i je nai mi se slabu su'o jmive prenu poi pu viska .obu li'u»
ni'o «lu xu .obu cu no roi barkla —sei la cpitepygau cu retsku— li'u»
ni'o «lu no roi .i .obu zutse ca ro djedi ne'i lo barda ke nolstizu kumfa pe lo noldi'u .i je lo ji'a sai selfu be .obu bei lo nu bevri lo sanmi .obu cu na viska .obu li'u»
ni'o «lu .obu mo prenu —sei lo nixli cu retsku— li'u»
ni'o «lu nandu fa lo nu djuno la'e di'u —sei lo nanmu cu pensi cusku— .i sa'u nai la .oz. cu banli te makfa gi'e kakne lo ka se tarmi ro se djica .i ja'e bo su'o prenu cu xusra lo du'u .obu vinsmi lo cipni .i je su'o prenu cu xusra lo du'u vinsmi lo xanto .i je su'o prenu cu xusra lo du'u vinsmi lo mlatu .i ga'a su'o drata .obu vinsmi lo melbi crida .a lo burnanba .a lo drata poi .obu se pluka .i ku'i lo du'u ma kau jetnu tarmi la .oz. ca lo nu se tarmi lo sevzi zo'u: no jmive prenu ka'e djuno li'u»
ni'o «lu la'e di'u mutce lo ka cizra —sei la .dorotis. cu cusku— .i ku'i mi'a nitcu lo nu troci ta'i da lo nu viska .obu kei kei se va'o nai lo nu mi'a ba ba'o litru fi'o prali no da li'u»
ni'o «lu mu'i ma do djica lo nu penmi la xlali .oz. —sei lo nanmu cu retsku— li'u»
ni'o «lumi djica lo nu .obu dunda lo besna mi —sei la cpitepygau cu pacna cusku— li'u»
ni'o «lu .o'u .i da'i la .oz. cu se frili —sei lo nanmu cu xusra— .i .obu ponse lo besna se mau lo se nitcu li'u»
ni'o si'a mi djica lo nu .obu dunda lo risna mi —sei la tinci mudypre cu cusku— li'u»
ni'o «lu .obu ba na se raktu —sei lo nanmu cu di'a co'e— .i ki'u bo .obu ponse lo so'i risna pe lo ro nilbra .e lo ro tarmi li'u»
ni'o «lu si'a mi djica lo nu .obu dunda lo kamvirnu mi —sei la tolvirnu cinfo cu cusku— li'u»
ni'o «lu la .oz. cu ralte lo barda patxu pe lo kamvirnu zi'e pe bu'u la nolstizu kumfa —sei lo nanmu cu cusku— zi'e poi se gacri lo solji palta te zu'e lo nu fanta lo nu se tisna .i .obu ba gleki lo nu dunda lo su'o si'e do li'u»
ni'o «lu si'a mi djica lo nu .obu mi xrugau benji la .kanzas. —sei la .dorotis. cu cusku— li'u»
ni'o «lu ma stuzi la .kanzas. —sei lo nanmu cu se spaji retsku— li'u»
ni'o «lu mi na djuno —sei la .dorotis. cu xanka spuda— .i ku'i zdani mi .i je mi birti lo du'u da stuzi ky li'u»
ni'o «lu lakne mutce .i sa'u la .oz. cu kakne ro da .i se ki'u bo ru'a .obu ba tolcri la .kanzas. se va'u do .i ku'i pa mai do nitcu lo nu snada lo ka penmi .obu .i ba nandu .i ki'u bo la banli te makfa cu na djica lo nu penmi su'o da .i .obu ta'e zukte lo se djica be .obu .i ku'i ba'e do ma djica —sei di'a co'e be fau lo nu tavla la .totos. — li'u» .i la .totos. cu po'o desygau lo rebla .i ki'u bo .u'e ty na kakne lo ka tavla
ni'o lo ninmu ca jungau lo drata lo du'u lo vacysai cu bredi .i ja'e bo jmaji lo sruri be lo jubme .i je la .dorotis. cu citka lo kukte mavypesxu .e lo sanmi be lo se jicla sovda .e lo melbi ke blabi nanba gi'e selpu'a lo ka citka .i la cinfo cu citka lo su'o si'e be lo mavypesxu gi'e ku'i nelci na'e mutce fau lo nu cusku lo se du'u marji lo mavji kei .e lo du'u lo mavji cu cidja lo xirma .e nai lo cinfo .i la cpitepygau .e la tinci mudypre cu citka no sai da .i la .totos. cu citka lo so'u si'e pe ro da gi'e gleki lo ka za'u re'u te dunda lo xamgu vacysai
ni'o lo ninmu ca dunda lo ckana poi ka'e sipna ku'o la .dorotis. .i je la .totos. cu vreta re'o dy ze'a lo nu la cinfo cu bandu lo vorme lo nu da'i da dicra dy .i je la cpitepygau .e la tinci mudypre cu sanli bu'u lo kojna gi'e smaji ze'a pi ro lo nicte .i ku'i li'a lo go'i na ka'e sipna
ni'o ca lo bavla'i cerni co'a lo mu'e lo solri cu ba'o galze'a cu co'a litru gi'e ba za bo viska lo melbi ke crino blegu'i pe bu'u lo tsani zi'e poi crane lo litru
ni'o «lu ju'o ru'a tu me la ri'ojme tcadu —sei la .dorotis. cu cusku— li'u»
ni'o ze'a lo nu ca'o fa'a cadzu kei lo crino blegu'i cu zenba je zenba lo ka carmi .i je si'au lo litru cu ro mai jbibi'o lo ka mulno lo ka litru .i to'e ki'u nai bo lerdo'i pu lo nu tolcliva lo barda bitmu poi sruri la tcadu .i by galtu gi'e rotsu gi'e carmi crino skari
ni'o ca'u lo litru bu'u lo fanmo be lo pelxu kitybli dargu cu zvati fa lo barda vrogai noi fe'e ro roi jadni lo ri'ojme poi tai carmi bu'u lo solgu'i ja'e lo nu lo ji'a sai cinta kanla be la cpitepygau ri'a lo nu carmi cu ze'i na ka'e viska
ni'o jibni lo vrogai fa lo janbe .i la .dorotis. cu catke lo batke gi'e tirna lo rijno sance poi se krasi lo nenri .i ba bo lo barda vrogai cu masno lo ka karbi'o slilu .i je lo ro da cu pagre gi'e zvati lo galseldru ke bargu kumfa noi lo ke'a bitmu cu se gacri lo ci'i ri'ojme
ni'o ca'u lo litru cu sanli fa lo cmalu nanmu poi barda dunji'i la maxpre .i dasni zei mulno lo crino fe'e co'a lo stedu fe'e co'u lo jamfu .i je lo ji'a sai pilka cu crino milxe .i zvati lo mlana be ny fa lo barda ke crino tanxe
ni'o ca lo nu ny cu viska la .dorotis. .e lo ri pendo kei lo nanmu cu retsku «lu do djica lo nu mo bu'u la ri'ojme tcadu li'u»
ni'o «lu mi'a pu klama ti te zu'e lo nu penmi la banli .oz. —sei la .dorotis. cu cusku— li'u»
ni'o lo nanmu cu tai se spaji lo di'u te spuda ja'e lo nu tsebi'o te zu'e lo nu pensi
ni'o «lu ba'o nanca li so'i fa lo nu da cpedu lo ka penmi la .oz. —sei ny cusku be fau lo nu se spaji desygau lo stedu— .i .obu tsali gi'e xlatce .i je va'o lo nu do klama te zu'e lo to'e plixau .a lo bebna ja'e lo nu dicra lo prije nunpei be la banli te makfa zo'u: cumki fa lo nu .obu. fengu gi'e daspo ca pa mokca ro do li'u»
ni'o «lu ku'i na bebna selzu'e .i je nai tolprali co'e —sei la cpitepygau cu spusku— .i vajni .i ji'a mi'a ba'o se jungau fi lo du'u la .oz. cu xamgu te makfa li'u»
ni'o «lu .obu ja'a co'e —sei lo crino nanmu cu cusku— .i je .obu prije je xamgu turni la ri'ojme tcadu .i ku'i lo prenu poi na stace gi'a kucli tu'a .obu zo'u: .obu mutce lo ka xlali .i je so'u da ba'o su'o roi darsi lo nu cpedu lo ka viska lo flira be .obu .i .i je la badypre be lo vrogai .i je mi ki'u lo nu do cpedu lo ka penmi la banli .oz. cu bilga lo ka klagi'a do la noldi'u ku pe .obu .i ku'i .ei pa mai do dasybi'o lo vi vistci li'u»
ni'o «lu ki'u ma —sei la .dorotis. cu retsku— li'u»
ni'o «lu ki'u lo nu va'o lo nu da'i do na dasni lo vistci kei lo nu la ri'ojme tcadu cu carmi gi'e banli cu rinka lo nu do na ka'e viska .i lo ji'a sai xabju be la tcadu cu nitcu lo ku dasni lo vistci .i ro boi vy cu se stela ze'a ro nicte je ro donri .i ki'u bo la .oz. pu minde fi la'e di'u ca lo nu la tcadu cu co'a se zbasu .i je mi ponse lo pa ckiku poi ke'a po'o ka'e toltelgau vy li'u»
ni'o kargau lo barda tanxe .i je la .dorotis. cu viska lo nu ty cu culno lo vistci pe ro nilbra je ro tarmi .i ro boi vy vasru lo crino blaci .i la badypre be lo vrogai cu tolcri lo vistci poi da'i prane lo ka mapti la .dorotis. ku'o gi'e punji vy lo kanla be dy .i re solji dasri cu se lasna fi vy gi'e sruri lo trixe be lo stedu be'o noi bu'u ke'a seltelgau se pi'o lo cmalu ckiku poi dandu lo fanmo be lo linsi poi la badypre be lo vrogai cu cnebo dasni .i ca lo nu vy mo'u se lasna kei la .dorotis. va'o lo nu da'i djica lo nu vimcu lo vistci cu na kakne .i ku'i li'a dy na djica lo nu visnalka'e ri'a lo nuncarmi be la ri'ojme tcadu .i se mu'i bo dy cu cusku no da
ni'o ba bo lo crino nanmu cu tolcri lo vistci be se va'u la cpitepygau .e la cinfo je ji'a sai la .totos. ku noi cmalu .i je ro boi vy tagji se telgau se pi'o lo ckiku
ni'o ba bo la badypre be lo vrogai cu dasybi'o lo sevzi vistci gi'e jungau lo drata lo du'u bredi lo nu klagi'a dy la noldi'u .i fau lo nu lebna lo barda ke solji ckiku lo pijne pe lo bitmu cu kargau lo drata vorme .i je lo ro da cu jersi by pa'o lo vorme be lo klaji pe la ri'ojme tcadu
## ni'o ni'o pa pa mo'o lo se manci tcadu pe la .oz.
ni'o to'e ki'u nai lo nu lo kanla cu se bandu tu'a lo crino vistci kei la .dorotis. .e lo ri pendo ca lo cfari cu visnalka'e ri'a lo cargu'i pe lo se manci tcadu .i lo klaji cu jbini lo melbi dinju poi ro ke'a zilzba lo crino marmaro gi'e fe'e ro roi jadni lo carmi ri'ojme .i lo litru cu cadzu lo dagysfe pe lo mintu ke crino marmaro .i je lo se jonsi'u be lo bliku cu se zvati lo linji be lo ri'ojme poi jbisi'u zi'e poi mircai ri'a lo nu lo solri cu carmi .i lo canko kajna cu marji lo crino blaci .i lo ji'a sai tsani be la tcadu cu milxe lo ka crino .i je lo solri gusli'i cu crino
ni'o zvati fa lo so'i prenu (to lo nanmu .e lo ninmu .e lo verba toi) poi ru'u cadzu .i je ro lo go'i cu dasni lo crino taxfu gi'e se pilka lo crino milxe .i catlu la .dorotis. .e lo ri cizra vrici kansa se pi'o lo kucli kanla .i je ro lo verba ca lo nu viska la cinfo cu to'o bajra gi'e mipygau lo sevzi lo trixe be lo mamta .i ku'i no da tavla lo litru .i so'i zarci cu zvati lo klaji .i je la .dorotis. cu viska lo nu ro poi nenri zy cu crino .i lo crino titspi .e lo crino selpo'azmu cu jai se friti fai lo ka vecnu .i je go'i fa ji'a lo crino cutci .e lo crino mapku .e lo crino taxfu pe ro klesi .i bu'u pa stuzi lo nanmu cu vecnu lo crino nimrysodva .i je ca lo nu lo verba cu te vecnu ny kei la .dorotis. cu viska lo nu ny. pleji lo crino sicni
ni'o simlu lo ka no xirma je no danlu pe su'o klesi cu zvati .i lo nanmu cu ru'u bevri lo dacti se pi'o lo cmalu ke crino marce noi ny ke'a catke .i ro lo prenu cu simlu lo ka gleki gi'e se mansa gi'e ricfu
ni'o la badypre pe la balvro cu klagi'a lo litru pa'o lo klaji co'u lo nu tolcliva lo barda dinju poi midju zei prane lo tcadu zi'e no'u lo noldi'u pe la .oz. ku no'u la banli te makfa .i crane lo vorme fa lo pa sonci noi dasni lo crino taxfu zi'e noi se xejykre lo clani je crino
ni'o «lu lo fange ba'o tolyli'a —sei la badypre pe la balvro fi sy cu cusku— .i fy djica lo nu penmi la .oz. li'u»
ni'o «lu ko nerkla —sei lo sonci cu spusku— .i se va'o bo mi ba bevri lo do notci .obu li'u»
ni'o ja'e bo lo litru cu pagre lo noldi'u vorme gi'e se klagi'a lo barda kumfa pe lo crino lolgai .e lo kukte ke crino nilce pe ri'ojme .i lo sonci cu gasnu lo nu lo litru cu jisygau satra lo matci lo cutci pu lo nu nerkla lo bi'u nai kumfa .i je ca lo nu ly cu ba'o stizu tsebi'o kei sy cu clite cusku:
ni'o «lu .e'o do kufra ze'a lo nu mi klama lo vorme be la nolstizu kumfa gi'e jungau la .oz. lo du'u do ti zvati li'u»
ni'o lo litru cu bilga lo ka ze'u denpa pu lo nu lo sonci cu xruti .i ca lo nu ro mai sy xruti kei la .dorotis. cu retsku:
ni'o «lu xu do pu viska la .oz. li'u»
ni'o «lu na go'i —sei lo sonci cu spuda— .i mi .obu pu no roi viska .i ku'i pu tavla .obu fau lo nu ca gi .obu zutse ti'a lo sepybi'u gi mi dunda lo do notci .obu .i .obu cusku lo se du'u ba curmi lo nu do .obu tavla kei va'o lo nu do djica .i ku'i ro do bilga lo ka nonkansa lo nu penmi .obu .i je .obu ba curmi lo nu ca ro djedi pa po'o do cu klama .i se ki'u bo ki'u lo nu do nitcu lo nu stali la noldi'u ze'a lo djedi be li so'o zo'u: mi ba gasnu lo nu da do klagi'a lo kumfa poi do ka'e surla ba lo do nunli'u li'u»
ni'o «lu ki'e —sei lo nixli cu spuda— .i .obu mutce lo ka xendo li'u»
ni'o lo sonci ca bifca'e lo crino siltci .i je ba zi sai bo lo citno nixli noi dasni lo melbi ke crino pastu cu nerkla lo kumfa .i ny se kerfa lo melbi crino gi'e se kanla lo melbi crino .i ny krobi'o fa'a ca'u la .dorotis. gi'e fau bo cusku «lu ko mi jersi .i se va'o bo mi fi do ba jarco lo do kumfa li'u»
ni'o ja'e bo la .dorotis. cu cusku zo co'o ro lo ri pendo po'u na'e bo la .totos. gi'e jersi fau lo nu birka jgari bevri lo gerku kei lo cnino nixli pa'o lo ze vorlu'a je ve ka'a lo ci serti co'u lo nu tolcliva lo kumfa pe lo crane be la noldi'u .i ky traji lo ka kukte gi'e cmalu kei lo ro kumfa pe lo munje kei gi'e vasru lo ranti je se kufra ckana pe lo boxfo co crino silka .e lo crino ke demsilka dorckabo'o .i midju lo kumfa fa lo cmatce je'erjinto poi cecla lo crino pukpanlitki fa'a lo vacri pu lo nu py. xruti farlu lo melbi ke se sraku ke marmaro tansi .i lo melbi ke crino xrula cu sanli bu'u lo canko .i je pa da se zvati lo kajna poi lo linji be lo cmalu ke crino cukta cu sanli ke'a .i la .dorotis. ca lo nu zifre lo ka templi lo ka kargau lo vi cukta cu facki lo du'u cy vasru lo cizra ke crino pixra poi rinka lo nu dy. cmila .i tai xajmi
ni'o lo tafni'e cu vasru lo so'i crino taxfu poi marji lo silka fa'u lo xulbu'u fa'u lo demsilka .i je ro boi ty prane mapti la .dorotis.
ni'o «lu do'a ko kufra prane —sei lo crino nixli cu cusku— .i je va'o lo nu do djica zo'u: ko selsnagau lo janbe .i la .oz. ba minde ca lo bavla'i cerni lo nu da cpacu do li'u»
ni'o ny cliva la .dorotis. gi'e xruti lo drata .i ri ji'a zo'u: ny klagi'a fi lo kumfa .i je ro lo litru cu ro mai zvati lo pluka mutce pagbu be la noldi'u .i li'a no da prali fi lo bi'u nai nu clite tu'a la cpitepygau .i ki'u bo cy ca lo nu nonselkansa lo nu zvati lo ri kumfa cu bebna sanli bu'u lo pa mokca bu'u lo vorme te zu'e lo nu denpa co'u lo cerni .i da'i cy na surla lo ka vreta .i je cy na ka'e ga'orgau lo kanla .i se mu'i bo cy stodi ze'a pi ro lo nicte lo ka catlu lo pa cmalu jukni noi jivbu lo julne tai lo nu da'i lo vi kumfa na cmima lo melrai be lo kumfa pe lo munje .i la tinci mudypre cu vrebi'o lo ri ckana ri'a lo nu tcaci .i ki'u bo my cu morji lo du'u my pu ca lo nu marji lo rectu cu co'e .i ku'i ki'u lo nu na kakne lo ka sipna kei my te zu'e lo nu selbitygau lo du'u lo cidni cu stodi lo ka tolpo'u kei cu xaksu lo nicte ta'i lo nu muvgau cy .i da'i la cinfo cu zmanei tu'a lo ckana poi marji lo sudga pezli zi'e poi zvati lo ricfoi ku'o gi'e na nelci lo ka nenri lo ganlo kumfa .i ku'i cy dukse lo ka tolbebna kei lo ka curmi lo nu la'e di'u raktu cy .i se ki'u bo cy cu plipe lo ckana gi'e bolbi'o tai tu'a lo mlatu gi'e latcmo gasnu lo nu cy ba zi lo mentu cu sipna
ni'o ca lo bavla'i cerni ba tu'a lo vacysai lo crino nixli cu klama te zu'e lo nu cpacu la .dorotis. .i je ny cu dasygau dy lo melbi mutce pastu poi marji lo morna xulbu'u .i la .dorotis. cu dasybi'o lo crino ke silka jisystota'u gi'e lasna lo crino dasri lo cnebo be la .totos. .i je lo ro mei cu co'a klama la nolstizu kumfa pe la banli .oz.
ni'o pa mai tolyli'a lo barda balku'a noi ne'i ke'a lo so'i nolni'u .e lo so'i nolnau vu'o pe lo nolstu zi'e noi ro ke'a dasni lo ricfu taxfu .i lo vi prenu cu zukte no drata be lo ka tavysi'u .i ku'i py ca ro cerni cu klama te zu'e lo nu denpa to'e ne'i la nolstizu kumfa .i to'e ki'u nai bo py no roi jai se curmi fai lo ka viska la .oz. .i ca lo nu la .dorotis. cu nerkla kei py kucli catlu dy .i je pa boi py smasku:
ni'o «lu xu do ja'a ba catlu lo flira be la .oz. no'u la xlatce li'u»
ni'o «lu li'a go'i —sei lo nixli cu spusku— va'o lo nu .obu mi ba klacru li'u»
ni'o «lu .obu ba curmi —sei lo sonci poi pu bevri lo notci pe ny la te makfa cu cusku— .i to'e ki'u bai bo .obu na nelci lo nu lo prenu cu cpedu lo ka viska .obu .i je'u ca lo cfari .obu pu fengu gi'e cusku lo se du'u .ei mi do xrugau benji lo do te klama .i ba bo .obu fi mi retsku lo se du'u ma kau do jvinu .i je ca lo nu mi jungau .obu fo lo do rijno cutci kei .obu mutce lo ka se cinri .i ro mai mi .obu pu jungau fo lo barna be lo do mebri .i je .obu cu jdice lo du'u ba curmi lo nu do .obu vitke li'u»
ni'o ca ku lo janbe cu jabyselsna .i je lo crino nixli cu cusku fi la .dorotis. fe «lu ta snasni .i .ei do nonselkansa klama la nolstizu kumfa li'u»
ni'o ny kargau lo cmalu vorme .i je la .dorotis. cu virnu cadzu pa'o vy gi'e co'a zvati lo se manci stuzi .i sy barda je cukla kumfa .i se drudi lo galtu bargu .i je lo bitmu .e lo drudi .e lo loldi cu se gacri lo barda ri'ojme poi zvajbisi'u .i bu'u lo midju be lo drudi cu gusni fa lo barda noi carmi dunli lo solri zi'e noi rinka lo nu lo ri'ojme cu mircai tai lo se manci
ni'o ku'i traji lo ka cinri la .dorotis. kei fa lo barda nolstizu co crino marmaro poi sanli lo midju be lo kumfa .i tarmi simsa lo stizu gi'e se pagbu lo mircai ri'ojme du'i tu'a ro lo drata .i lo midju be lo stizu cu se zvati lo bratce stedu poi se xadni no da poi ka'e sarji sy zi'e pe no birka .e no tuple .i no kerfa cu cpana lo vi stedu .i ku'i sy se kanla gi'e se nazbi gi'e se moklu .i je sy. mutce lo ka bramau lo stedu be lo brarai be lo brabracrida
ni'o ca lo nu la .dorotis. ca'o catlu la'e di'u fau lo nu manci joi terpa zo'u: lo kanla cu carna masno gi'e kinli je stodi catlu dy .i ba bo lo moklu cu muvdu .i je la .dorotis. cu tirna lo nu lo voksa cu cusku
ni'o «lu mi'e .oz. no'u la banli je xlatce .i do me ma .i je mu'i ma do mi klama li'u»
ni'o lo ni lo voksa be lo barda stedu cu mabla cu mleca lo me lo se kanpe be la .dorotis. moi .i se ki'u bo dy. zu'e darsi gi'e spusku:
ni'o «lu mi'e .dorotis. no'u la cmalu je ruble .i mi klama te zu'e lo nu do mi sidju li'u»
ni'o lo kanla cu pensi catlu dy ze'a lo mulno mentu .i ba bo lo voksa cu cusku
ni'o «lu do pu cpacu lo rijno cutci ma li'u»
ni'o «lu mi pu cpacu cy la palci termafyfe'i pe la stuna ca lo nu lo mi zdani cu farlu ty gi'e jai mrori'a ty —sei dy spusku— li'u»
ni'o «lu do pu cpacu lo barna be lo do mebri ma —sei lo voksa cu di'a co'e— li'u»
ni'o «lu by pu te cinba mi la xamgu termafyfe'i pe la berti ca lo nu ty cu tolrinsa mi gi'e klagau mi do —sei lo nixli cu cusku— li'u»
ni'o za'u re'u ku lo kanla cu kinli catlu ny .i je viska lo nu ny cu jungau fi lo jetnu .i ba bo la .oz. cu retsku «lu do djica lo nu mi mo li'u»
ni'o «lu ko mi xrugau benji la .kanzas. ku noi la fetfamti .em. .e la nakfamti .xenris. cu zvati — la .dorotis. cu junri cusku— .i mi na nelci lo do gugde .i to'e ki'u bai bo gy cu tai melbi .i je mi birti lo du'u la fetfamti .em. cu xanka zei mutce lo mi nu tolzva ze'a lo tai clani li'u»
ni'o lo kanla cu ci roi kalgaisligau gi'e ba bo selfarbi'o lo drudi je ba bo lo cnita loldi gi'e carna tai lo cizra mutce ja'e lo nu ky. simlu lo ka viska ro pagbu be lo kumfa .i ro mai ky. za'u re'u catlu la .dorotis.
ni'o «lu da'i ma mukti lo nu mi zukte la'e di'u se va'u do —sei la .oz. cu retsku— li'u»
ni'o «lu lo nu ge do tsali gi mi ruble .e lo nu ge do banli te makfa gi mi cmalu nixli li'u»
ni'o «lu ku'i lo ni do tsali cu pu banzu lo nu catra la palci termafyfe'i pe la stuna —sei la .oz. cu cusku— li'u»
ni'o «lu sa'u pu fasnu —sei la .dorotis. cu sampu spuda— .i mi na fuzme li'u»
ni'o «lu ja'o —sei la stedu cu cusku— .i mi ba spuda .i do na se krali lo nu kanpe lo nu mi do ba benji la .kanzas. kei va'o lo nu na ku do da poi xamgu mi cu zukte fi'o se canja .i bu'u lo vi gugde ro prenu cu bilga lo ka pleji fo ro se dunda be vo'a .i do va'o lo nu djica lo nu mi pilno lo mi makfa lo nu xrugau benji do lo zdani cu pa mai bilga da pe se va'u mi .i ko mi sidju .i se va'o bo mi do ba sidju li'u»
ni'o «lu ma mi se bilga —sei lo nixli cu retsku— li'u»
ni'o «lu ko catra la palci termafyfe'i pe la stici —sei la .oz. cu spusku— li'u»
ni'o «lu ue sai .i ku'i mi na kakne —sei la .dorotis. cu krixa be fau lo nu mutce lo ka se spaji— li'u»
ni'o «lu do pu catra la palci termafyfe'i pe la stuna .i je do dasni lo rijno cutci noi vasru lo tsali makfa .i ca ku bu'u lo mulno gugde cu zasti fa pa po'o la palci termafyfe'i .i je ca lo nu do mi jungau lo du'u ty cu morsi zo'u: mi do ba xrugau benji la .kanzas .i ku'i pu ku na co'e li'u»
ni'o lo cmalu nixli cu co'a klaku .i ny tai mutce lo ka nalfaudri .i je lo kanla cu za'u re'u ... gi'e xanka catlu ny tai lo nu da'i la banli .oz. cu jinvi lo du'u ny ka'e sidju va'o lo nu da'i troci
ni'o «lu mi pu no roi catra da se zu'e lo nu no'a —sei ny klakycmo— .i va'o lo ji'a sai nu da'i mi djica zo'u: mi ta'i ma ka'e catra la palci termafyfe'i .i va'o lo nu do no'u la banli je xlatce na ka'e catra ty zo'u: do kanpe ma poi nu mi ja'a ca'a co'e li'u»
ni'o «lu mi na djuno —sei la stedu cu cusku— .i ku'i de'u se spusku mi .i je ze'a lo nu la palci termafyfe'i cu jmive kei do na za'u re'u viska lo do nakfamti .e lo do fetfamti .i ko morji lo du'u la termafyfe'i cu palci (to tcetce lo ka palci toi) gi'e .ei se catra .i nau ku ko cliva .i je ko ze'a lo nu do na ba'o zukte lo do selgu'a cu na cpedu lo ka za'u re'u viska mi li'u»
ni'o la .dorotis. fau lo nu badri cu cliva la nolstizu kumfa gi'e xruti lo jai bu'u denpa be fai la cinfo .e la cpitepygau .e la tinci mudypre bei lo nu tirna lo nu la .oz. cu cusku ma kau dy .i «lu ui nai li no te pacna fi mi —sei dy badri cusku— .i ki'u bo la .oz. co'u lo nu mi ba'o catra la palci termafyfe'i pe la stici cu na benji mi lo zdani .i je mi no roi ka'e co'e la'e di'u li'u»
ni'o lo pendo be dy cu kecti gi'e ku'i na ka'e zukte da lo nu sidju dy .i se ki'u bo la .dorotis. cu klama lo ri kumfa gi'e vrebi'o lo ckana gi'e klaku sipybi'o
ni'o ca lo bavla'i cerni lo sonci pe lo crino zbikre cu klama la cpitepygau gi'e cusku:
ni'o «lu ko mi jersi .i la .oz. pu minde lo nu do se cpacu li'u»
ni'o ja'e bo la cpitepygau cu jersi gi'e jai se curmi fai lo ka nerkla la barda ke nolstizu kumfa ku noi bu'u ke'a cy viska lo kukte mutce nolni'u poi zutse lo ri'ojme nolstizu .i ny dasni lo crino ke silka se jivbu .i je cpana lo gapru be lo ny. flecu ke crino kerfa fa lo nolmapku co jemna .i lo birjanco cu se jimca lo nalci poi meltce skari gi'e tai linto ja'e lo nu ny. va'o lo nu lo rubrai be lo brife cu tolyli'a ny. cu slilu
ni'o ca lo nu la cpitepygau ba'o krobi'o se rai lo ka melbi poi lo se setca sudysrasu cu curmi kei ca'u lo vi melbi jmive kei jy. xendo catlu cy gi'e cusku:
ni'o «lu mi'e .oz. no'u la banli je xlatce .i do du ma .i je mu'i ma do mi klama li'u»
ni'o ca ku la cpitepygau ku noi pu kanpe lo nu viska lo mintu ke barda stedu poi la .dorotis. pu jungau cy tu'a ke'a cu mutce lo ka se spaji .i ku'i cy cu virnu spuda
ni'o «lu mi cpitepygau po'o .i terse'a lo sudysrasu .i se ki'u bo mi na se besna .i je bo mi klama do fau lo nu mi pikci do lo ka setca lo besna lo mi stedu ja'e lo nu mi binxo lo ka dunli lo do drata se gugde lo ka remna li'u»
ni'o «lu da'i mu'i ma mi zukte la'e di'u se va'u do —sei la ninmu cu retsku— li'u»
ni'o «lu lo nu do prije gi'e tsali gi'e lo nu no drata mi ka'e sidju —sei la cpitepygau cu spusku— li'u»
ni'o «lu mi no roi curmi lo se cpedu va'o lo nu no da se pleji —sei la .oz. cu cusku— .i ku'i mi la'e di'e ba nupre .i va'o lo nu do catra se va'u mi la palci termafyfe'i pe la stici kei mi baldu'a fi do fe lo so'i besna poi tai xamgu ja'e lo nu do ba pijrai lo ro remna pe lo gugde pe la .oz. li'u»
ni'o «lu mi pu jinvi lo du'u do fi la .dorotis. cu cpedu lo ka catra la termafyfe'i —sei la cpitepygau cu se spaji cusku— li'u»
ni'o «lu mi ja'a co'e .i mi na se vajni lo nu ma kau catra ty .i ku'i co'u lo nu ty cu morsi zo'u: mi na curmi lo se djica be do .i ca ku ko cliva .i je ko co'u lo nu do ba'o jerna lo besna poi do tai mutce lo ka djica tu'a ke'a cu na za'u re'u klama mi li'u»
ni'o la cpitepygau cu badri xruti lo ri pendo gi'e jungau py lo du'u la .oz. pu cusku ma kau .i je la .dorotis. cu se spaji lo nu la banli te makfa cu ckaji ge nai lo ka stedu noi dy pu viska tu'a ke'a gi ja'ai lo ka kukte ninmu
ni'o «lu to'e ki'u nai ku —sei la cpitepygau cu cusku— lo ninmu du'i tu'a la tinci mudypre cu nitcu tu'a lo risna li'u»
ni'o ca lo bavla'i cerni lo sonci pe lo crino zbikre cu klama la tinci mudypre gi'e cusku:
ni'o «lu la .oz. cu cpedu lo ka do klama .i ko mi jersi li'u»
ni'o ja'e bo la tinci mudypre cu jersi sy gi'e tolcliva la barda ke nolstizu kumfa .i ty my na djuno lo du'u la .oz. cu kukte ninmu gi'i kau stedu .i ku'i ty my pacna lo nu kukte nolni'u .i «lu .i ki'u bo —sei ty my lo sevzi cu cusku— ga nai .obu stedu gi mi birti lo du'u mi ba na te dunda lo risna .i ki'u bo lo stedu ku ji'a na se risna gi'e se ki'u bo na ka'e kecti mi .i ku'i ga nai .obu kukte nolni'u gi mi ba carmi cpedu tu'a lo risna .i ki'u bo ka'u ro nolni'u cu xendo se risna li'u»
ni'o ku'i la mudypre ca lo nu nerkla la barda ke nolstizu kumfa cu viska ge nai la stedu gi nai la nolni'u .i ki'u bo la .oz. pu seltambi'o lo selte'a mutce danlu .i dy milxe lo ka cmame'a lo xanto .i je lo crino nolstizu cu simlu lo ka lo ni ce'u tsali cu ja'a ru'e banzu lo nu sarji lo junta be dy .i la danlu cu se stedu da poi simsa lo me lo zbiseljirna moi .i frica fi po'o lo ka mu da kanla lo stedu be ce'u .i mu clani birka cu jorne lo xadni .i je si'a mu da clani je cinla tuple .i lo rotsu je sunla kerfa cu gacri ro pagbu be dy .i je na cumki fa lo nu se xanri lo tolpukmau se jvinu monstra .i zanfu'a fa lo nu la tinci mudypre ca lo ca mokca na se risna .i ki'u bo da'i ry cladu je sutra slilu ri'a lo nu terpa .i ku'i ki'u lo nu marji lo tinci ku po'o kei la mudypre cu na sai terpa gi'e ku'i mutce lo ka nalfaudri
ni'o «lu mi'e .oz. no'u la banli je xlatce —sei la danlu se pi'o lo voksa po'u lo pa barda selcmo cu cusku— .i do du ma .i mu'i ma do mi klama li'u»
ni'o «lu mi mudypre gi'e marji lo tinci .i se ki'u bo mi na se risna gi'e na ka'e prami .i mi do pikci lo nu dunda lo risna mi ja'e lo nu mi dunli lo drata prenu li'u»
ni'o «lu da'i mi mu'i ma zukte la'e di'u —sei la malda'u cu te preti— li'u»
ni'o «lu ki'u lo nu mi cpedu .e lo nu do po'o kakne lo ka gasnu lo mi se cpedu —sei la mudypre cu spusku— li'u»
ni'o la .oz. spuda lo nu cmoni kei la'e di'u gi'e ku'i rufsu cusku «lu va'o lo nu do je'a djica tu'a lo risna kei do bilga lo ka jerna li'u»
ni'o «lu ta'i ma —sei la mudypre cu retsku— li'u»
ni'o «lu ko sidju la .dorotis. lo ka catra la palci termafyfe'i pe la stici —sei la danlu cu spusku— .i ca lo nu la termafyfe'i cu morsi kei ko mi klama .i se va'o bo mi do ba dunda lo brarai je xedrai je pamrai ke'e be lo ro risna pe lo mulno gugde pe la .oz. li'u»
ni'o ja'e bo la tinci mudypre cu jai se bapli fai lo ka badri xruti lo ri pendo gi'e jungau py fo lo xlatce danlu poi my ke'a pu viska .i ro boi py mutce lo ka manci lo so'i tarmi poi la banli te makfa cu ka'e seltambi'o ke'a .i je la cinfo cu cusku:
ni'o «lu va'o lo nu .obu danlu ca lo nu mi klama te zu'e lo nu viska zo'u: mi ba cladyrai cmoni gi'e tepygau .obu ja'e lo nu .obu curmi ro lo se cpedu be mi .i va'o lo nu .obu kukte nolni'u zo'u: mi ba jifkritrazu'e lo ka plipe .obu kei te zu'e lo nu bapli lo nu .obu gasnu lo mi se cpedu .i va'o lo nu .obu barda stedu zo'u: .obu jai jalge fai lo ka xu kau mi fraxu ce'u .i ki'u bo mi ba co'u lo nu .obu nupre lo ka dunda mi'o lo jai se djica be mi'a cu gurgau lo stedu be .obu vi'u pi ro lo kumfa .i ja'o ko gleki doi pendo .i ki'u bo ro da ba xamgu li'u»
ni'o ca lo bavla'i cerni lo sonci pe lo crino zbikre cu klagi'a la cinfo la barda ke nolstizu kumfa gi'e minde cy lo ka nerkla lo me la .oz. moi
ni'o la cinfo cu ba zi pagre lo vorme gi'e viska fau lo nu ru'u catlu kei fau lo nu spaji kei lo nu ca'u lo nolstizu cu zvati fa lo bolci be lo fagri poi ke'a tai tsali gi'e tai gusycai vau ja'e lo nu cy. ja'a ru'e ka'e jdari lo ka catlu ke'a .i pa moi lo sidbo be cy fa lo du'u la .oz. cu se snuti lo ka co'a se fagri gi'e jenca .i ku'i ca lo nu cy. troci lo ka jbibi'o kei lo glanejni cu tai carmi ja'e lo nu lo zbikre be cy cu jenca milxe .i je cy. cu desku ke cpare xruti lo mokca poi jbimau lo vorme
ni'o ba bo lo dizlo je lauble voksa cu se sance lo bolci be lo fagri .i di'e se cusku be fy. valsi:
ni'o «lu mi'e .oz. no'u la banli je xlatce .i do du ma .i je mu'i ma do mi klama li'u»
ni'o la cinfo cu spusku «lu mi tolvirnu cinfo gi'e terpa ro da .i mi do pu klama te zu'e lo nu cpedu lo ka do dunda lo kamvirnu mi ja'e lo nu mi ka'e binxo lo noltru be lo danlu be'o noi lo remna mi te cmene li'u»
ni'o «lu da'i mi mu'i ma dunda lo kamvirnu do —sei la .oz. cu te preti— li'u»
ni'o «lu ki'u lo nu ge lo ro te makfa cu se balrai do gi do po'o vlipa lo ka curmi lo mi se cpedu —sei la cinfo cu spusku— li'u»
ni'o lo bolci be lo fagri cu ze'a tsali jelca .i je lo voksa cu cusku «lu ko je'urja'o fi mi fe lo du'u la palci termafyfe'i cu morsi .i ca lo nu do go'i kei mi dunda lo kamvirnu do .i ku'i ze'a lo nu la termafyfe'i cu jmive kei do na ka'e na stodi lo ka tolvirnu li'u»
ni'o la cinfo cu fengu lo di'u nunsku gi'e ku'i na ka'e spusku da .i je ze'a lo nu cy cu sanli fau lo nu smaji catlu lo bolci be lo fagri kei kei by tai carmi glare binxo ja'e lo nu cy cu carna gi'e bajra cliva lo kumfa .i cy gleki lo nu lo cy. pendo cu denpa cy kei gi'e jungau py fo lo xlatce nu tavla la te makfa
ni'o «lu .ei mi'o ca mo —sei la .dorotis. cu badri retsku— li'u»
ni'o «lu ro pa mei lo ka'e se zukte be mi'o fa lo ka klama lo gugde be la .uinkis. gi'e sisku la palci termafyfe'i gi'e daspo ri li'u»
ni'o «lu ku'i mo va'o lo nu na kakne —sei lo nixli cu cusku— li'u»
ni'o «lu va'o ku mi ba no roi virnu —sei la cinfo cu xusra— li'u»
ni'o «lu si'a mi ba no roi se besna —sei la cpitepygau cu jmina— li'u»
ni'o «lu si'a mi ba no roi se risna —sei la tinci mudypre cu cusku— li'u»
ni'o «lu si'a mi ba no roi viska la fetfamti .em. .e la nakfamti .xenris. —sei la .dorotis. fau lo nu co'a klaku cu cusku— li'u»
ni'o «lu .o'i sai —sei lo crino nixli cu krixa— .i lo se klaku ba farlu lo do crino ke silka pastu gi'e selba'agau py li'u»
ni'o ja'e bo la .dorotis. cu sudgau lo kanla gi'e cusku «lu ru'a mi'o nitcu lo ka troci .i ku'i mi birti lo du'u mi na djica lo nu catra da kei lo ji'a sai nu za'u re'u viska la fetfamti .em. li'u»
ni'o «lu mi do ba klakansa .i ku'i mi dukse lo ka tolvirnu kei lo nu catra la termafyfe'i —sei la cinfo cu cusku— li'u»
ni'o «lu mi ji'a ba klama —sei la cpitepygau cu jdice— .i ku'i mi ba na mutce lo ka plixau do .i mi tai bebna li'u»
ni'o «lu mi na ponse lo risna poi lo termafyfe'i ku ji'a sai zo'u: ke'a ka'e xrani ty —sei la tinci mudypre cu te notci— .i ku'i va'o lo nu do klama cu klama fa mi ji'a li'u»
ni'o ki'u ku lo se bende cu jdice lo du'u co'a litru ca lo bavla'i cerni .i je la tinci mudypre cu kilgau lo ri ka'amru se pi'o lo crino kilgauro'i gi'e ba'o ctilypu'i lo cidni .i la cpitepygau cu culgau lo sevzi lo vifne sudysrasu .i je la .dorotis. cu punji lo cnino cinta lo cy. kanla te zu'e lo nu cy. xagmau kakne lo ka viska .i lo crino nixli noi mutce lo ka xendo cu culgau lo lanka be la .dorotis. lo jai xamgu be fai lo ka citka gi'e lasna lo cmalu janbe lo cnebo be la .totos. lo crino dasri
ni'o clira fa lo nu lo se bende cu klama lo ckana .i je condi sipna co'u tu'a lo dorgu'i lu'u noi ca ke'a se cikri'a lo nu lo crino nakyjipci poi xabju lo trixe bimselsru pe la noldi'u kei .e lo nu cmoni fa lo fetyjipci poi ba'o punji lo crino sovda
## ni'o ni'o pa re mo'o lo nu sisku la palci termafyfe'i
ni'o lo sonci pe lo crino zbikre cu klagi'a pa'o lo klaji pe la ri'ojme tcadu co'u lo nu tolcliva lo kumfa poi la badypre pe lo vrogai cu xabju .i lo di'u catni cu toltelgau lo vistci te zu'e lo nu xrugau vy lo barda tanxe kei gi'e ba bo clite kargau lo vorme se va'u lo mi'o pendo
ni'o «lu ma dargu la palci termafyfe'i pe la stici —sei la .dorotis. cu retsku— li'u»
ni'o «lu no da dargu —sei la badypre pe lo vrogai cu spusku— .i no da su'o roi djica lo nu klama fa'a ku li'u»
ni'o «lu va'o ku mi'a ta'i ma ka'e tolcri ty —sei lo nixli cu te preti— li'u»
ni'o «lu ba frili —sei lo nanmu cu spusku— .i ki'u bo ty ca lo nu djuno lo du'u do zvati lo gugde pe la .uinkis. cu tolcri do gi'e sefygau do li'u»
ni'o «lu ju'o cu'i na go'i —sei la cpitepygau cu cusku— .i ki'u bo mi'a djica lo nu daspo ty li'u»
ni'o «lu ua .i la'e di'u frica —sei la badypre pe lo vrogai cu cusku— .i no da pu su'o roi daspo ty .i se ki'u bo li'a mi pu jinvi lo du'u da'i ty do sefygau du'i lo nu no'a ro lo drata .i ku'i ko capyju'i .i ki'u bo ty cu palci gi'e tsali gi'e ju'o cu'i ba na curmi lo nu do daspo ty .i ko stodi lo ka klama fa la berti ku noi lo solri cu galjdika bu'u ke'a .i se va'o bo do na ka'e fliba lo nu tolcri ty li'u»
ni'o lo litru cu kirsku lo sonci gi'e tolrinsa sy gi'e selfarbi'o la berti fau lo nu cadzu lo foldi be lo ranti srasu noi fe'e ru'i nai se barna lo xrulrxasteraka .e lo xrulnranunkulu .i la .dorotis. cu za'o dasni lo melbi ke silka pastu poi pu dasybi'o ke'a bu'u lo noldi'u .i ku'i ca ku fau lo nu spaji dy kei dy facki lo du'u na za'o crino gi'e ku'i curve blabi .i lo ji'a dasri pe ru'u lo cnebo be la .totos. cu cirko lo ka crino kei gi'e ca blabi du'i tu'a lo pastu pe la .dorotis.
ni'o la ri'ojme tcadu cu ba za darno mutce trixe .i ca lo nu lo litru cu ca'o cramu'u kei lo loldi cu fe'e ca'o rufsu je cmana zenba .i ki'u bo zvati lo vi gugde pe la stici fa no cange je no zdani .i je lo loldi cu kunti lo se zbasu
ni'o ca lo lecydo'i lo solri cu glare te gusni lo flira .i ri'a bo zvati fa no tricu poi ka'e se va'u se ctino .i ja'e bo pu lo nicte la .dorotis. .e la .totos. .e la cinfo cu tatpi gi'e vrebi'o lo srasu gi'e co'a sipna fau lo nu la mudypre .e la cpitepygau cu snura zgana
ni'o la palci termafyfe'i pe la stici cu se kanla lo pa po'o mei .i ku'i lo kanla cu vlipa du'i tu'a lo darvistci gi'e kakne lo ka viska ro da .i ja'e bo ty. fau lo nu zutse lo vorme pe lo ri badydi'u cu ru'u catlu gi'e viska lo nu la .dorotis. cu sipna vreta fau lo nu lo ri pendo cu sruri .i darno mutce .i ku'i la palci termafyfe'i cu fengu lo nu zvati lo ri gugde .i ja'e bo ty. bifca'e lo rijno siltci poi sruri dandu lo ri cnebo
ni'o ba zi sai bo fa'a bajra te ka'a ro farna fa lo gunma be lo barda labno .i ro boi ly se tuple lo clani gi'e se kanla lo palci gi'e se denci lo kinli
ni'o «lu ko klama lo vu prenu —sei la termafyfe'i cu cusku— gi'e vilka'a py lo spisa li'u»
ni'o «lu xu do na sefygau py do —sei lo jatna be lo labno cu retsku— li'u»
ni'o «lu na go'i —sei ty spuda— .i pa boi py marji lo tinci .i pa boi py marji lo sudysrasu .i pa boi py nixli .i pa drata cu cinfo .i no boi py kakne lo ka gunka .i se ki'u bo .e'a do vilka'a py lo spisa li'u»
ni'o «lu je'e do'u —sei lo labno cu cusku— li'u» .i ly to'o bajra se rai lo ka sutra kei fau lo nu lo drata labno cu jersi
ni'o zanfu'a fa lo nu la cpitepygau .e la mudypre cu cikna prane gi'e tirna lo nu lo labno cu ca'o klama
ni'o «lu lo ca nunda'a cu me mi moi —sei la mudypre cu cusku— .i se ki'u bo ko mi trixe .i mi ba penmi lo labno ca lo nu ly cu klama li'u»
ni'o my lebna lo vo'a ka'amru noi vo'a pu gasnu lo nu ke'a kinli mutce .i je ca lo nu lo jatna be lo labno cu klama kei la tinci mudypre cu sligau lo birka gi'e katna vimcu lo stedu be lo labno lo xadni ja'e lo nu ba zi sai mrobi'o .i co'a lo nu my cu ka'e lafti lo ka'amru kei lo drata labno cu klama .i je ri ji'a farlu gau lo kinli korbi be lo xarci pe la tinci mudypre .i lo labno cu vo no mei .i je vo no roi ku lo labno cu se catra .i ja'e bo ro mai lo ro morsi labno cu derxi vreta lo loldi
ni'o ba bo my cu lolpu'i lo ka'amru gi'e tsebi'o re'o la cpitepygau ku noi cusku «lu pu xamgu nunda'a doi pendo li'u»
ni'o lo re da cu denpa co'u lo nu la .dorotis. cu cikybi'o ca lo bavla'i cerni .i lo cmalu nixli cu terpa mutce ca lo nu viska lo barda derxi be lo kalsa labno .i ku'i la mudypre cu jungau dy boi ro da .i dy kirsku my lo nu nurgau kei gi'e tsebi'o te zu'e lo nu cersai citka noi ba ke'a lo gunma cu za'u re'u co'a litru li'u»
ni'o ca lo mintu cerni la palci termafyfe'i cu klama lo vorme be fo lo badydi'u gi'e catlu se pi'o lo pa kanla poi kakne lo ka viska lo darno .i viska lo nu ro lo labno cu morsi lolvre .e lo nu lo fange cu za'o litru pagre lo vo'a gugde .i la'e di'u gasnu lo nu ty cu fengu se mau lo purci kei ja'e lo nu re roi bifca'e lo siltci
ni'o ba zi bo lo barda gunma be lo cilce korvo cu voikla fa'a ty fi'o se banzu lo nu lo tsani cu manku binxo
ni'o la palci termafyfe'i fi la nolraitru korvo cu cusku «lu ko ba zi voikla lo fange .i ko ... gi'e vilka'a fy lo spisa li'u»
ni'o lo cilre korvo cu voikla se kai lo ka barda gunma kei fa'a la .dorotis. .e lo ri pendo .i ca lo nu lo cmalu nixli cu viska lo nu ky cu klama cu terpa
ni'o ku'i la cpitepygau cu cusku «lu lo ca nunda'a cu me mi moi .i se ki'u bo ko vrebi'o ne'a mi .i se va'o bo do ba na se xrani li'u»
ni'o mu'i ku ro lo litru po'u na'e bo la cpitepygau cu vrebi'o lo loldi .i je cy cu sa'irbi'o gi'e tengau lo birka .i ca lo nu lo korvo cu viska cy kei ky terpa (to tai lo nu lo vi cipni cu ro roi co'e lo cpitepygau toi) gi'e na darsi lo ka jbibi'o .i ku'i la nolraitru korvo cu cusku:
ni'o «lu ii nai tu terse'a nanmu .i mi ba ja'urxe'a ke tunta vimcu lo kanla be ny li'u»
ni'o la nolraitru korvo cu voikla fa'a la cpitepygau ku noi jairbi'o ky fo lo stedu gi'e se torni lo cnebo co'u lo nu mrobi'o .i je ba bo lo drata korvo cu fa'a voikla .i je bo la cpitepygau cu se torni lo ra cnebo ku ji'a .i lo korvo cu vo no mei .i je vo no roi ku la cpitepygau cu se torni lo cnebo .i co'u bo ro mai ro boi ky cu re'o morsi vreta .i ba bo la cpitepygau fi lo ri pendo cu cpedu lo ka sa'irbi'o .i je za'u re'u di'a litru
ni'o la palci termafyfe'i ca lo nu za'u re'u catlu lo bartu gi'e viska lo nu ro lo korvo cu derxi cu binxo lo fengu mutce gi'e ci roi bifca'e lo vo'a rijno siclu
ni'o ba zi bo tirna lo banli zbazaza poi zvati lo vacri .i je lo cinkygunma be lo xekri bifce cu vofli jbibi'o ty
ni'o «lu ko klama lo fange gi'e kilrango catra ri —sei la termafyfe'i cu minde— li'u» .i lo bifce cu carna gi'e sutra vofli co'u lo nu jibni lo jai bu'u cadzu be fai la .dorotis. .e lo ri pendo .i ku'i la mudypre pu viska lo nu by. klama .i je la cpitepygau pu jdice lo ka zukte ma kau
ni'o «lu ko tolse'a lo mi sudysrasu gi'e pejgau sy lo cmalu nixli .e lo gerku .e la cinfo —sei fi la mudypre cu cusku— .i se va'o bo lo bifce na ka'e kilrangytunta li'u» .i la mudypre cu zukte la'e di'u .i je la .dorotis. cu vrebi'o lo jibni be la cinfo gi'e jgari la .totos. lo birka fau lo nu lo sudysrasu cu mulno gacri
ni'o lo bifce cu klama gi'e tolcri no na'e bo la cpitepygau ku poi ka'e se kilrangytunta .i se mu'i bo voikla fa'a cy gi'e lifri lo ka lo kilrango be ce'u cu porpi ri'a tu'a lo tinci se cau lo nu ja'a ru'e ji'a sai crogau la mudypre .i je ki'u lo du'u lo bifce ca lo nu lo kilrango cu ba'o porpi na ka'e jmive zo'u: la'e di'u fanmo lo xekri bifce .i je by. rotsu senta cpana la mudypre tai tu'a lo cmalu derxi be lo tolrufsu kolme
ni'o ba bo la .dorotis. .e la cinfo cu sa'irbi'o .i je lo nixli cu sidju la tinci mudypre lo nu xrugau lo sudysrasu lo nenri be la cpitepygau co'u lo nu cy cu cnici du'i lo nu no'a ca lo purci .i ja'e bo lo ro da cu za'u re'u co'a litru
ni'o la palci termafyfe'i cu tai fengu ca lo nu viska lo nu lo ri xekri bifce cu se derxi lo cmalu tai tu'a lo kolme kei kei ja'e lo nu jalgau lo jamfu lo loldi gi'e lacpu lo kerfa gi'e danre lo denci .i je ba bo klacpe lo pa re mei be lo selfu noi me la .uinkis. ku'o gi'e dunda lo kilga'a sy fau lo nu minde sy lo nu klama lo fange gi'e daspo fy
ni'o la .uinkis. na virnu selnai gi'e ku'i bilga lo te minde .i se ki'u bo cadzu co'u lo nu jibni la .dorotis. .i ba bo la cinfo cu cladu cmoni gi'e bajra fa'a uy .i je la uu .uinkis. cu tai terpa ja'e lo nu to'o bajra se rai lo ka sutra
ni'o ca lo nu ba'o xruti lo badydi'u kei la palci termafyfe'i cu so'i roi darxi uy lo dasri gi'e xrumi'e uy lo nu gunka kei gi'e ba bo tsebi'o te zu'e lo nu pensi lo nu .ei ba mo kau .i na kakne lo ka jimpe lo du'u se ja'e ma kau ro lo se platu be fi lo nu daspo lo va fange cu pu zilfli .i ku'i vlipa termafyfe'i gi'e palci co'e .i je ba za bo jdice lo du'u ba mo kau
ni'o zvati lo nenri be lo kajnyta'e fa lo solji mapku noi se sruri lo tabjme jo'u lo zirxunjme .i lo bi'u nai solji mapku cu vasru lo makfa .i lo ponse be lo go'i cu ka'e ci roi klacpe la selna'i smani ku noi tinbe ro lo se minde .i ku'i no prenu ka'e minde lo bi'u nai cizra danlu za'u ci roi ku .i xa'o ba'o re roi ku la palci termafyfe'i cu pilno lo makfa pe la mapku .i pu pa roi go'i ca lo nu sefygau la .uinkis. gi'e bixygau lo sevzi lo ka turni lo gugde be uy .i la selna'i smani pu sidju ty la'e di'u .i re re'u go'i ca lo nu damba la banli .oz. gi'e li'argau .obu lo gugde pe la stici .i la selna'i smani pu sidju ty la'e di'u ji'a .i ca lo pa po'o se jmina ty ka'e pilno lo bi'u nai solji mapku .i se mu'i bo na'e djica lo nu ca'a go'i kei co'u lo nu ro lo drata se vlipa cu ba'o se pilno .i ku'i ca fau lo nu lo tsali labno .e lo cilce korvo .e lo kinli bifce cu ba'o canci .e lo nu lo ro lo selfu cu ba'o se tepli'agau la tolvirnu cinfo cu sajbi'o lo du'u ca pa po'o mei fa lo tadji be lo nu daspo la .dorotis. .e lo ri pendo
ni'o se mu'i bo la palci termafyfe'i cu lebna la solji mapku lo kajnyta'e gi'e punji my lo stedu .i ba bo co'a sanli lo zunle jamfu gi'e masno lo ka cusku:
ni'o zoi «lu. Ep-pe, pep-pe, kak-ke! .lu»
ni'o bavla'i fa lo nu co'a sanli lo pritu jamfu gi'e cusku:
ni'o zoi «lu. Hil-lo, hol-lo, hel-lo! .lu»
ni'o ba bo co'a sanli lo jamfu re mei gi'e cladu voksa krixa:
ni'o zoi «lu. Ziz-zy, zuz-zy, zik! .lu»
ni'o ca ku lo makfa cu co'a rinka .i lo tsani cu manku zenba .i je lo dizlo rumbalu poi zvati lo vacri cu se tirna .i sance fa lo carcaca be lo so'i nalci be'o .e lo cladu nu tavysi'u gi jo'u cmila .i je lo solri cu co'a te gusni lo tcini ja'e lo nu ka'e viska lo nu la palci termafyfe'i cu se sruri lo gunma be lo smani noi ro ke'a se nalci lo banli je tsali re mei poi zvati lo birjanco
ni'o pa boi sy noi bramau zei mutce lo drata cu simlu lo ka jatna sy .i voikla lo jibni be la termafyfe'i gi'e cusku «lu do ba'o klacpe mi'a ci .e ro re'u .i do mi'a ma minde li'u»
ni'o «lu ko klama lo fange poi zvati lo mi gugde ku'o gi'e daspo ro boi fy po'u na'e bo la cinfo —sei la palci termafyfe'i cu cusku— .i ko zvagau lo bi'u nai danlu mi .i mu'i bo mi platu lo nu jitro cy tai tu'a lo xirma gi'e gasnu lo nu cy cu gunka li'u»
ni'o «lu .ai lo do te minde cu se tinbe —sei lo jatna cu cusku— li'u» .i ba ku fau lo cladu nu tavla bacru kei je nu savru kei la selna'i smani cu to'o voikla lo jai bu'u cadzu be fai la .dorotis. .e lo ri pendo
ni'o lo su'o la smani cu jairbi'o la tinci mudypre gi'e bevri my pa'o lo vacri co'u lo nu gapru lo gugde poi rotsu se gacri lo kinli rokci .i bu'u ku sy cu falcru la uu mudypre ku noi farlu ve'a lo barda lo rokci noi bu'u ke'a my vreta fau lo nu tai se kevna je selxai vau ja'e lo nu na ka'e ga muvdu gi cmoni
ni'o lo su'o drata smani cu kavbu la cpitepygau .i je se pi'o lo ra clani degji cu lacpu pi ro lo sudysrasu lo se dasni .e lo stedu .i gasnu lo nu lo mapku .e lo cutci .e lo taxfu cu cmalu derxi kei gi'e renro dy lo galrai jimca be lo rajycla tricu
ni'o lo drata smani cu renro lo spisa be lo rotsu skori ja'e lo nu sruri la cinfo kei gi'e srugau so'i djine lo xadni .e lo stedu .e lo tuple vu'o pe cy .i ja'e bo la cinfo na ka'e ga batci gi sraku gi'a damba tai su'o da .i ba bo sy sy lafti cy gi'e to'o voikla to'e se cau cy lo noldi'u pe la termafyfe'i ge'u noi bu'u ke'a punji cy lo cmalu selsrustu poi lo galtu ke tirse bitmu cu sruri ke'a ja'e lo nu no da ka'e rivbi barkla
ni'o ku'i la .dorotis. zo'u: sy sy na sai xrani dy .i dy sanli fau lo nu zvati lo vo'a birka fa la .totos. kei .e lo nu zgana lo se badri dimna be lo vo'a pendo gi'e jinvi lo du'u ba zi se li'erla'i fa vo'a .i lo jatna be la selna'i smani cu voikla dy fau lo nu lo ri clani je se kerfa birka cu se tengau .e lo nu lo to'e melbi flira cu mabla cisma .i ku'i jy viska lo barna be lo mebri be dy gi'e klasti fau lo nu xanja'o jungau lo drata lo du'u .ei na pencu dy
ni'o «lu mi'o na darsi lo ka xrani lo vi cmalu nixli —sei jy fi lo drata cu cusku— .i ki'u bo ny se bandu la kamvlipa co vrude .i je ri balmau la kamvlipa co palci .i ro pa mei lo mi'a ka'e se zukte fa lo ka bevri ny lo noldi'u pe la palci termafyfe'i gi'e stacru li'u»
ni'o ja'e bo racyju'i joi toljursa lafti fa sy sy la .dorotis. fi'o te jgari lo birka gi'e sutra bevri dy pa'o lo vacri co'u lo nu tolyli'a lo noldi'u noi bu'u ke'a punji dy lo serti pe lo crane vorme .i ba bo lo jatna fi la termafyfe'i cu cusku:
ni'o «lu mi'a ba'o tinbe fi do fi'o se jimte lo ni mi'a kakne .i la tinci mudypre .e la cpitepygau cu ba'o se daspo .i je la cinfo cu skojo'e bu'u lo do bimselsru .i lo cmalu nixli zo'u: mi'a na darsi lo nu xrani ny .a lo gerku poi ny ke'a birka bevri .i lo nu do vlipa lo ka jitro lo mi'a bende cu ca tolcfa .i je do ba no roi za'u re'u viska mi'a li'u»
ni'o ba bo ro la selna'i smani fau lo nu cmila je tavla je selsna mutce cu voikla fa'a ne'i lo vacri gi'e ba za bo cu'u se viska
ni'o la palci termafyfe'i cu ge se spaji gi xanka vau ca lo nu viska lo barna be lo mebri ba la .dorotis. .i ki'u bo je'a djuno lo du'u ge nai la selna'i smani gi nai vo'a darsi lo ka crogau lo nixli tai su'o da .i fa'a ni'a catlu lo jamfu be la .dorotis. .i je ca lo nu viska lo rijno cutci cu co'a desku ri'a lo nu terpa .i ki'u bo ty. djuno lo du'u lo tsali makfa cu jinzi cy .i ca lo cfari la termafyfe'i cu se xlura fi lo ka bajra to'o la .dorotis. .i ku'i fasnu fa lo nu ty. catlu lo kanla be lo nixli gi'e visyga'e lo du'u sampu mutce fa lo ruxse'i poi trixe ky kei .e lo du'u lo cmalu nixli cu na djuno fi lo se manci kamvlipa poi la rijno cutci cu dunda ny .i ja'e bo la palci termafyfe'i cu mipri cmila gi'e pensi «lu mi za'o ka'e gasnu lo nu ny mi selfu .i ki'u bo ny na djuno lo du'u ta'i ma kau pilno lo kamvlipa li'u» .i ba bo ty. jursa je rufsu cusku fi la .dorotis.:
ni'o «lu ko klakansa mi .i je ko tinbe ro da poi mi do ke'a minde .i ki'u bo va'o lo nu do na go'i kei mi ba tolcfagau do tai lo nu mi pu no'a la tinci mudypre .e la cpitepygau li'u»
ni'o la .dorotis. cu jersi ty pa'o so'i lo melbi kumfa be fo lo vo'e badydi'u co'u lo nu tolcliva lo jupku'a noi bu'u ke'a la termafyfe'i cu minde dy lo ka lumci lo patxu gi'e brulu'i lo loldi gi'e stogau lo fagri lo ka da cidja ce'u
ni'o la .dorotis. co'a gunka co filseltro fau lo nu ba'o zu'edji lo ka gunka se rai lo ka kakne .i mu'i bo dy. gleki lo nu la palci termafyfe'i pu zu'ejdi lo ka na catra dy
ni'o fau lo nu la .dorotis. cu ca'o carmi gunka kei la termafyfe'i cu pensi lo nu ri ba klama lo selsrustu gi'e jitro la tolvirnu cinfo tai tu'a lo xirma .i da'i zdile ty (to ty birti toi) fa lo ka gasnu lo nu cy. lacpu lo ty. carce se ka'a ro da poi ty djica lo nu ty. klama ke'a .i ku'i ca lo nu ty. kargau lo vorme kei la cinfo cu cladu camcmo gi'e tai tsali plipe ty ja'e lo nu la termafyfe'i cu terpa gi'e barbajra gi'e gasnu lo nu lo vorme cu di'a ganlo
ni'o «lu va'o lo nu mi na ka'e jitro do zo'u: —sei la termafyfe'i fi la cinfo cu cusku be fau lo nu tavla pa'o lo grana be lo vrogai se'u— mi ka'e djacaumrogau do .i jai do co'u lo nu do zukte lo mi se djica cu na citka da li'u»
ni'o ba la'e di'u ty bevri no cidja lo pinfu cinfo .i ku'i ca ro djedi cu klama lo vrogai ca lo dormidju gi'e retsku «lu xu do bredi lo nu se jitro tai tu'a lo xirma li'u»
ni'o .e la cinfo cu spusku «lu na go'i .i va'o lo nu do nerkla lo vi bimselsru kei mi do ba batci li'u»
ni'o krinu lo nu la cinfo cu na bilga lo ka zukte jai se djica be la termafyfe'i kei kei fa lo nu ca ro nicte ca lo nu lo ninmu cu sipna kei la .dorotis. cu bevri lo cidja cy lo kajnyta'e .i di'i ku ba lo nu cy. citka kei cy. vrebi'o lo cy. ckana be lo sudysrasu .i je la .dorotis. cu vrebi'o lo jibni be cy. gi'e punji lo stedu be dy. lo cy. ranti je rotsu ne'okre .i je ca bo lo re mei cu ca'o casnu lo ri raktu selfri gi'e troci lo ka platu tu'a da poi tadji lo nu rivbi .i ku'i lo re mei na snada lo ka facki fi lo tadji be lo nu barkla lo noldi'u .i ki'u bo ri ro roi se bandu lo pelxu .uinkis. ku noi selfu la palci termafyfe'i gi'e dukse lo ka terpa ty kei lo ka na zukte lo te minde be uy bei ty
ni'o lo nixli cu bilga lo ka carmi gunka ze'a lo donri .i je so'i roi ku la termafyfe'i cu capnu'e lo nu darxi ny lo tolci'o santa poi ro roi xance bevri ke'a .i ku'i je'u ty na'e darsi lo nu darxi la .dorotis. kei ki'u tu'a lo barna be lo mebri .i lo verba cu na djuno la'e di'u gi'e jai ni vy. terpa lo dimna me vy .e la .totos. moi kei fa li ro .i pa roi ku la termafyfe'i cu darxi la .totos. se pi'o lo ty. santa .i je lo virnu ke cmalu gerku cu vofli plipe ty gi'e venfu fo lo ka batci lo tuple be ty .i la termafyfe'i zo'u: na blucri fa lo mokca poi se batci .i ki'u bo ty cu tai palci ja'e lo nu lo ciblu be ne'i ty pu za lo nanca be li so'i ba'o sudbi'o
ni'o lo nunji'e pe la .dorotis. cu se badri mutce binxo ca lo nu dy cu co'a jimpe lo du'u lo nu xruti la .kanzas. ju'e la fetfamti .em. cu nadmau ro lo purci .i su'o roi ku la .dorotis. cu klaku ze'a lo cacra be li so'i fau lo nu la .totos. cu zutse re'o lo jamfu be dy gi'e catlu lo flira be dy fau lo nu pante tonga ke klaku cmoni te zu'e lo nu jarco lo ka kecti lo cmalu jitro be ty .i la .totos. cu no'e se vajni lo du'u ty zvati la .kanzas. ji kau lo gugde pa la .oz. kei va'o lo nu la .dorotis. cu kansa ty .i ku'i ty djuno lo du'u lo cmalu nixli cu tolgei .i je la'e di'u se jalge lo nu tolgei fa ty ji'a
ni'o la palci termafyfe'i cu mutce lo ka djica lo nu ponse la rijno cutci ku noi lo nixli cu ro roi dasni .i lo bifce .e lo korvo .e lo labno vu'o pe ty cu derxi vreta gi'e sudbi'o .i je ty cu ba'o xaksu pi ro lo makfa pe la solji mapku .i ku'i va'o lo nu da'i snada lo ka cpacu la rijno cutci kei cy dunda lo ty lo ka vlipa poi zmadu ke'a pe ro lo drata dacti poi pu cirko .i ty jundi catlu la .dorotis. te zu'e lo nu facki lo du'u xu kau dy su'o roi toldasybi'o lo cutci kei fau lo nu jinvi lo du'u da'i ty kakne lo ka zerle'a cy .i ku'i lo verba cu tai jgira tu'a lo melbi cutci ja'e lo nu vy toldasybi'o cy ca no da po'u na'e lo nicte noi ca ke'a vy jirli'u vy .i la termafyfe'i cu dukse lo ka terpa lo manku kei lo nu darsi lo nu nerkla lo kumfa pe la .dorotis. ca lo nicte te zu'e lo nu lebna lo cutci .i je lo ni ty cu terpa tu'a lo djacu cu zmadu lo ni ty cu terpa lo manku .i se ki'u bo ty cu no roi klama lo jibni ca lo nu la .dorotis. cu djacu jinru .i je'u lo tolci'o me la termafyfe'i cu no roi pencu lo djacu .i je nai ty curmi lo nu lo djacu cu pencu ty tai su'o da
ni'o ku'i lo bi'u nai palci danlu cu mutce lo ka mencre kei gi'e ro mai te sidbo fi da poi ju'o ba se jalge lo nu vo'a cpacu lo jai se djica .i punji lo tirse grana lo midju be lo jupku'a loldi gi'e ba bo gasnu se pi'o lo vo'a makfa larcu lo nu lo tirse cu nonselji'u lo remna kanla .i ja'e bo la .dorotis. ca lo nu cadzu lo loldi cu snuti stapa lo grana ki'u lo nu na kakne lo ka viska gy kei gi'e farlu .i na mutce lo ka se xrani .i ku'i ca lo nu farlu kei pa la rijno cutci cu co'u jorne .i je pu lo nu dy ka'e cpacu cy kei la termafyfe'i cu lebna cy gi'e jongau cy lo cinla jamfu be lo ty. sevzi
ni'o lo palci ninmu cu mutce lo ka gleki lo nu ba'o snada lo ka tcica .i ki'u bo ze'a lo nu ponse pa lo cutci cu ponse lo xadba be lo makfa .i je la .dorotis. na ka'e pilno my to'e se va'u ty va'o lo ji'a sai nu da'i dy djuno lo du'u ta'i ma kau ja'a ca'a co'e
ni'o lo cmalu nixli fau lo nu viska lo nu ba'o cirko pa lo vo'a melbi cutci cu binxo lo fengu gi'e cusku fi la termafyfe'i fe «lu ko xrugau lo mi cutci mi li'u»
ni'o «lu mi ba na go'i —sei la termafyfe'i cu spuda— .i mu'i bo cy ca me mi moi gi'e nai me do moi li'u»
ni'o «lu do palci maldanlu —sei la .dorotis. cu krixa— .i do na se krali lo ka lebna lo cutci mi li'u»
ni'o «lu .ai mi to'e ki'u nai ralte —sei la termafyfe'i fau lo nu cmila fa'a dy cu cusku— .i je ca pa djedi mi cpacu lo ji'a drata do li'u»
ni'o la'e di'u se jalge lo nu la .dorotis. cu tai fengu ja'e lo nu lafti lo baktu be lo djacu be'o poi vi zvati ku'o gi'e gasnu lo nu by toltisna ga'u la termafyfe'i ja'e lo nu fy binxo lo ka fe'e co'a lo stedu fe'e co'u lo jamfu cu cilmo
ni'o ba zi sai ku lo palci ninmu cu cladu ke terpa krixa .i je ba bo fau lo nu la .dorotis. cu manci catlu ny kei la termafyfe'i co'a ge cmaze'a gi runta
ni'o «lu ko catlu lo nu do ba'o mo kau —sei ty krixa— .i zi lo mentu mi ba runme li'u»
ni'o «lu mi xenru mutce ja'a ku —sei la .dorotis. ku noi je'u terpa lo nu da'i nai la termafyfe'i cu ca'o runme tai tu'a lo bunre sakta ca'u je'a bo lo kanla be dy cu cusku— li'u»
ni'o «lu xu do pu na djuno lo du'u lo djacu cu fanmo mi —sei la termafyfe'i cu pante je tolpa'a tonga retsku— li'u»
ni'o «lu li'a na go'i —sei la .dorotis. cu spusku— .i da'i ma pu ve djuno li'u»
ni'o «lu ba zi lo mentu be li su'o mi mo'u runme .i je do po'o ba ponse lo badydi'u .i mi pu palci ze'a lo mi nunji'e .i ku'i mi pu no roi jinvi lo du'u lo cmalu nixli be mu'u do cu su'o roi ka'e rumgau mi gi'e tolcfagau lo mi palci nunzukte .i .o'i mi co'a co'e li'u»
ni'o fau tu'a lo di'u valsi cu farlu lo loldi fa la termafyfe'i ku poi bunre je runme be ba'o je nonseltai pesxu zi'e noi preja lo jinsa tanbo pe lo jupku'a loldi .i la .dorotis. fau lo nu viska lo nu ty ja'a ba'o runme ja'e lo no da cu cpacu lo drata baktu be lo djacu gi'e renro lo nenri lo tolcnici .i ba bo brulu'i catke pa'o lo vorme .i ba lo nu lebna lo pa rijno cutci noi ro pa mei lo vilvi'u be fo lo tolci'o ninmu ku'o la .dorotis. cu lumci cy se pi'o lo bukpu gi'e seldasygau cy lo jamfu .i ba ku dy fau lo nu ro mai zifre lo ka zukte lo se cuxna cu bajra barkla fi lo selsrustu te zu'e lo nu jungau la cinfo lo du'u la palci termafyfe'i pe la stici cu ba'o tolcfa .e lo du'u lo re mei cu co'u pinfu bu'u lo fange gugde
## ni'o ni'o pa ci mo'o lo nu nurgau
ni'o la tolvirnu cinfo cu mutce lo ka se pluka lo ka junbi'o lo du'u la palci termafyfe'i ba'o se rumgau se pi'o lo baktu be lo djacu .i je la .dorotis. cu ba zi sai toltelgau lo vrogai pe lo pifku'a pe cy gi'e zifygau cy .i lo re mei cu kansi'u lo ka nerkla lo badydi'u noi bu'u ke'a pa moi lo se zukte be la .dorotis. fa lo ka klacpe ro la .uinkis. gi'e jungau uy lo du'u uy co'u selfu
ni'o carmi gleki fa lo pelxu .uinkis. .i ki'u bo uy pu jai se gasnu fai lo ka nanca li so'i fa lo nu ce'u carmi gunka se va'u la palci termafyfe'i ku noi ke'a pu ro roi fartra uy lo ka kusru .i uy jdice lo du'u lo ca se detri cu sladei ca je ze'e kei gi'e jai xaksu lo temci fai lo ka sorcti gi jo'u dansu
ni'o «lu .o'e nai va'o lo nu lo mi'o pendo no'u la cpitepygau .e la tinci mudypre cu kansa mi'o zo'u: —sei la cinfo cu cusku— mi gleki mutce li'u»
ni'o «lu ru'a pei mi'o ka'e nurgau lo re mei —sei lo nixli cu xanka retsku— li'u»
ni'o «lu mi'o ka'e troci —sei la cinfo cu spusku— li'u»
ni'o ja'e bo klacpe la pelxu .uinkis. gi'e retsku fi uy fe lo se du'u xu kau uy djica lo ka sidju fi lo ka nurgau lo pendo .i je la .uinkis. cu cusku lo se du'u da'i uy gleki lo ka zukte ro lo se kakne se va'u la .dorotis. ku noi pu gasnu lo nu uy co'u selfu .i ja'e bo dy cuxna lo su'o .uinkis. poi simlu fi dy fe lo ka traji lo ka djuno xo kau da .i je lo ro da cu tolsti lo ka klama .i litru ca lo ca djedi je ze'a pi su'o lo bavla'i djedi gi'e klasti ca lo nu tolcliva lo jai bu'u vreta be fai la tinci mudypre ku noi vreta co se daspo je korcu mutce .i lo ka'amru pe my cu zvajbi .i ku'i lo balre cu furtirse .i je lo batke cu porpi
ni'o la .uinkis. cu toljursa lafti ty my se pi'o lo birka gi'e xrubei ty my la pelxu badydi'u fau lo nu la .dorotis. cu klaku so'o kakydirgo lo se viska betri pe lo dirba pendo kei .e lo nu la cinfo cu mutce lo ka kecti .i ca lo nu lo ro da cu tolcliva la badydi'u kei la .dorotis. cu cusku fi la .uinkis.:
ni'o «lu xu su'o lo do se gugde cu tincyzba li'u»
ni'o «lu go'i .i su'o mi'a certu mutce tincyzba —sei uy fi dy jungau— li'u»
ni'o «lu ja'o ko klagi'a ty mi —sei dy cusku— li'u» .i ca lo nu lo tincyzba cu klama fau lo nu bevri ro lo tutci pe ty kei dy retsku «lu xu do kakne lo ka vimcu lo kevna la tinci mudypre gi'e krogau ri ja'e lo nu di'a drani se tarmi kei gi'e jinjongau lo spofu pagbu li'u»
ni'o lo tincyzba cu mutce merli la mudypre gi'e ba bo spusku lo se du'u ty jinvi lo du'u ty kakne lo ka cikre my ja'e lo nu tcini du'i lo nu no'a ca lo purci .i ja'e bo ty co'a gunka bu'u pa lo barda ke pelxu kumfa be lo badydi'u gi'e gunka ze'a lo ci donri jo'u lo vo nicte fau lo nu mrupli gi'e tongau gi'e krogau gi'e jinjongau gi'e spali gi'e darxi vau lo tuple .e lo xadni .e lo stedu be la tinci mudypre co'u lo nu ca lo fanmo ge ty my sirji du'i lo nu pu no'a gi lo cidni cu di'a prane tolpo'u .i ju'o so'i da vabyficfoi ty my .i ku'i lo tincyzba pu xamgu gunka .i je la mudypre ki'u lo nu ri na sezyjgi cu na sai se nabmi lo vabyficfoi
ni'o ca lo nu ro mai my nerdzukla lo kumfa pe la .dorotis. gi'e kirsku dy lo ka nurgau my .i my tai gleki gi'e ja'e bo klaku lo gleki kakydirgo .i je la .dorotis. cu bilga lo ka te zu'e lo nu lo cidni na furtirbi'o cu racyju'i vimcu ro lo kakydirgo lo flira .i ca lo mintu lo dy. sevzi kakydirgo cu rotsu je sutra farlu ri'a lo nu gleki lo nu za'u re'u penmi lo slabu pendo .i je lo vi kakydirgo cu na jai se nitcu fai lo ka vimcu .i la cinfo zo'u: cy tai so'i roi satre lo kanla be cy. se pi'o lo jipno be lo rebla ja'e lo nu binxo lo ka cilmo mutce kei .e lo nu cy. bilga lo ka bartu klama lo selsrustu gi'e zvagau ry lo solgu'i co'u lo nu sudbi'o
ni'o «lu .o'e nai va'o lo nu da'i mi'o di'a tolcau la cpitepygau kei —sei la tinci mudypre cu cusku be ca lo nu la .dorotis. ba'o mo'u jungau my fo ro lo ba'o fasnu— mi mutce lo ka gleki li'u»
ni'o «lu mi'o bilga lo ka tolcri cy —sei lo nixli cu cusku— li'u»
ni'o ja'e bo ny cu klacpe la .uinkis. gi'e cpedu lo ka sidju ny .i lo ro mei cu cadzu ze'a pi ro lo ca djedi su'i pi su'o lo bavla'i .i co'u bo tolcliva lo bi'u nai galtu tricu poi la selna'i smani pu renro lo taxfu pe la cpitepygau lo jimca be ke'a
ni'o galtu mutce tricu .i je lo stani cu tai xutla ja'e lo nu no da ka'e cpare .i ku'i la mudypre cu cusku «lu mi ta ba katna .i ja ba bo mi'o ka'e cpacu lo taxfu pe la cpitepygau li'u»
ni'o pu ca lo nu lo tincyzba cu ca'o gunka lo ka cikre lo du be la mudypre kei kei pa drata .uinkis. noi slozba cu zbasu lo ka'amru jaitci poi sligu lo solji ku'o gi'e matygau fi lo ka'amru pe la mudypre fe jy noi basti lo laldo ke spofu jaitci .i su'o drata cu spali lo balre co'u lo nu ro lo furtirse cu ba'o se vimcu .e lo nu camgu'i tai tu'a lo se spali rijno
ni'o ca sai lo nu ty my mo'u tavla kei la tinci mudypre cu tolsti lo ka katna .i je ba za lo cmalu lo tricu cu farlu fau lo nu cladu savru noi ba ke'a lo taxfu pe la cpitepygau cu farlu fi lo jimca gi'e gunro lo loldi
ni'o la .dorotis. cu lafti ty gi'e gasnu lo nu la .uinkis. cu xrugau bevri ty lo noldi'u noi bu'u ke'a ty terse'a lo zabna je jinsa sudysrasu .i je ua za'a zvati fa la cpitepygau fau lo nu simsa lo purci tarmi gi'e za'u re'u je za'u re'u kirsku fi lo ka nurgau cy
ni'o ca ku fau lo nu refkansi'u kei la .dorotis. .e lo ri pendo cu xaksu lo so'o gleki djedi bu'u la pelxu badydi'u ku noi bu'u ke'a tolcri ro da poi nitcu ke'a lo ka kufra
ni'o ku'i ca pa lo djedi lo nixli cu pensi la fetfamti .em. gi'e cusku «lu mi'o nitcu lo ka xruti la .oz. gi'e cpacu lo mi'o se nupre li'u»
ni'o «lu go'i —sei la mudypre cu cusku— .i uo mi ba cpacu lo mi risna li'u»
ni'o «lu si'a mi ba cpacu lo mi besna —sei la cpitepygau cu gleki jmina— li'u»
ni'o «lu si'a mi ba cpacu lo mi kamvirnu —sei la cinfo cu pensi cusku— li'u»
ni'o «lu si'a mi ba xruti la .kanzas. —sei la .dorotis. cu krixa be fau lo nu jalsimgau lo xance— .i .e'e mi'o ca lo bavlamdei cu tolsti lo ka co'e fa'a la ri'ojme tcadu li'u»
ni'o la'e di'u jai se jdice fai lo ka zukte .i ca lo bavla'i djedi cu klacpe la .uinkis. gi'e tolrinsa uy .i la .uinkis. cu badri lo nu lo drata cu cliva .i je uy pu binxo lo ka tai nelci la tinci mudypre kei ja'e lo nu pikci ty my lo ka stali gi'e turni uy .e la pelxu gugde pe la stici .i la .uinkis. ca lo nu sajbi'o lo du'u lo drata cu djitsa lo ka cliva cu dunda .i je la .totos. gi la cinfo pa solji djine .i je fi la .dorotis. cu dunda fa uy lo melbi birja'i poi cpana fa lo tabjme .i je fi la cpitepygau cu dunda lo solji jipno ke cadzu grana te zu'e lo nu fanta lo nu cy. farlu .i je fi la tinci mudypre cu friti lo rijno ctilylante noi lo solji cu pagbu zi'e poi lo dirba jemna cu cpana
ni'o ro lo litru se va'u la .uinkis. cu cusku lo melbi .i je lo ro mei cu xanjaisi'u co'u lo nu cortu lo birka
ni'o la .dorotis. cu klama lo kajnyta'e pe la termafyfe'i te zu'e lo nu clugau lo lanka lo cidja te zu'e tu'a lo nunli'u .i je ca ku dy viska lo solji mapku .i dy. troci lo ka stedu dasni my kei gi'e facki lo du'u prane mapti .i dy na djuno su'o da pe lo makfa pe la solji mapku .i ku'i dy. viska lo nu my. melbi .i ja'e bo dy. zu'ejdi lo ka dasni my gi'e bevri lo solmapku fau lo nu ri nenri lo lanka pe dy
ni'o ba ku fau lo nu bredi tu'a lo nunli'u kei lo ro mei cu tolsti tu'a la ri'ojme tcadu .i je la .uinkis. cu ci roi tolrinsa gi'e cusku so'i jai te xendo poi lo go'i ka'e pensi ke'a ca lo nu litru
## ni'o ni'o pa vo mo'o la selna'i smani
ni'o ju'o do morji lo du'u zasti fa no klaji (to je nai ji'a sai lo cadzu pluta toi) bu'u lo badydi'u pe la palci termafyfe'i ge'u bi'i la ri'ojme tcadu .i ca lo nu lo vo litru cu ca'o klama co sisku la termafyfe'i kei ty cu viska lo nu ly cu klama kei gi'e ja'e bo minde fi la selna'i smani fe lo ka klama gi'e zvagau ly boi ty .i fi ly nadmau zei mutce fa lo ka facki lo du'u ve ka'a ma kau xrukla pagre lo barda foldi be lo matnyxrula jo'u lo pelxu sparbeli kei kei lo ka se bevri .i ly djuno li'a lo du'u bilga lo ka sirji klama lo stuna fa'a lo galze'a solri .i je ly tolsti fau lo nu klama lo drani farna .i ku'i ca lo dormidju ca lo nu lo solri cu gapru lo stedu be ly kei ly na djuno lo du'u ma kau fa'u ma kau stuna fa'u stici .i je la'e di'u krinu lo nu farcri bu'u lo barda foldi .i ku'i ly stodi lo ka cadzu .i je ca lo nicte lo lunra cu tolcanci gi'e carmi te gusni .i ja'e bo ly zukte vrebi'o lo jbini be lo titla se panci ke pelxu xrula gi'e condi sipna co'u lo cerni .i sa'e go'i fa ro boi ly po'u na'e bo la cpitepygau ja la tinci mudypre
ni'o ca lo bavla'i cerni lo solri cu trixe lo dilnu .i ku'i co'a klama tai lo nu mutce lo ka birti lo du'u klama fa'a ma kau
ni'o «lu va'o lo nu lo jai ve'a cadzu cu banzu zo'u: —sei la .dorotis. cu cusku se'u— ju'o mi'o ca da tolcliva su'o stuzi li'u»
ni'o ku'i so'o djedi cu prubi'o .i je lo bi'u nai litru cu za'o viska no da poi crane ly gi'e na me lo camxu'e foldi .i la cpitepygau cu co'a fegmliba'u milxe
ni'o «lu ju'o mi'o ba'o malkla —sei cy cusku— .i je va'o lo nu na ku lo ni clira fa lo nu mi'o tolcliva la ri'ojme tcadu cu banzu zo'u: mi ba no roi cpacu lo mi besna li'u»
ni'o «lu si'a na ku mi lo mi risna —sei la tinci mudypre cu xusra cusku— .i si'au mi ja'a ru'e ka'e denpa lo nu penmi la .oz. .i je ju'o ru'e do mi tugni lo du'u clani mutce nu litru li'u»
ni'o «lu .oi —sei la tolvirnu cinfo cu patcmo cusku be fau lo nu pa roi crocmo— .i mi na virnu be'au lo nu ze'e cadzu se cau lo nu tolcliva ba'e su'o da li'u»
ni'o ca ku la .dorotis. cu cirko lo ka pacna .i dy tsebi'o lo srasu gi'e catlu lo ra kansa .i je ky cu tsebi'o gi'e catlu dy .i je la .totos. cu cinmo lo ka pa re'u lo ri nunji'e cu dukse lo ka tatpi kei lo nu jersi lo toldi poi ca vofli lampagre lo vo'a stedu .i ja'e bo ty cu bargau lo tanxe gi'e gerva'u gi'e catlu la .dorotis. tai lo nu djica lo nu retsku fi dy fe lo du'u .ei lo ro da ca zukte ma kau
ni'o «lu da'i mi'o klacpe lo tumsmacu —sei dy stidi— .i la'a ty kakne lo ka jungau mi'o lo du'u ma kau pluta la ri'ojme tcadu li'u»
ni'o «lu ju'o sai kakne —sei la cpitepygau cu krixa .i ki'u ma mi'o na pensi la'e di'u pu ku li'u»
ni'o la .dorotis. cu bifca'e lo cmalu siltcu poi dy. pu ro roi dasni fau lo nu dandu lo cnebo kei co'a lo nu la noltruni'u be la smacu pu dunda sy. boi dy. .i ba zi lo mentu be li so'o cu tirna lo tapsata be tu'a lo cmalu jamfu .i je so'i lo cmalu ke grusi smacu cu bajra jbibi'o dy .i me lo go'i fa lo du be la noltruni'u ku noi torbrato'a ke cmalu voksa retsku:
ni'o «lu da'i mi sidju lo mi pendo ta'i ma li'u»
ni'o «lu mi'a pu malkla —sei la .dorotis. cu cusku— .i xu do kakne lo ka jungau mi'a lo du'u ma kau stuzi la ri'ojme tcadu li'u»
ni'o «lu ju'o —sei la noltruni'u cu spusku— .i ku'i darno milxe .i ki'u bo do pu ze'a lo mulno cu se trixe ry ty li'u» .i ba bo my cu sajbi'o la solji mapku ku pe la .dorotis. gi'e cusku «lu mu'i ma na ku do pilno lo makfa pe la mapku gi'e klacpe la selna'i smani .i da'i sy sy do bevri la tcadu pe la .oz. ze'a lo cacra be li me'i pa li'u»
ni'o «lu mi pu na djuno lo du'u makfa —sei la .dorotis. fau lo nu se spaji cu spusku— .i makfa rinka ma li'u»
ni'o «lu se ciska fi lo nenri be la solji mapku —sei la noltruni'u be la smacu cu spusku— .i ku'i va'o lo nu do ba klacpe la selna'i smani kei mi'a nitcu lo nu to'o bajra .i mu'i bo sy sy kusru mutce gi'e jinvi lo du'u zdile fa lo nu kusru mi'a li'u»
ni'o «lu xu sy mi na ba crogau —sei lo nixli cu xanka retsku— li'u»
ni'o na go'i .i sy bilga lo ka tinbe fi lo dasni be la mapku .i co'o li'u» .i je ny cu to'o klama co nalselvi'a binxo fau lo nu ro lo smacu cu jersi
ni'o la .dorotis. cu catlu lo nenri be la solji mapku gi'e viska lo so'u valsi poi se ciska fi lo nenri korbi .i «lu ti —sei dy pensi— cu ru'a makfa rinka valsi li'u» .i mu'i ku dy. racyju'i tcidu lo ctuselsku gi'e punji la mapku lo stedu be dy.
ni'o zoi «lu. Ep-pe, pep-pe, kak-ke! .lu» —sei dy fau lo nu sanli lo zunle jamfu cu cusku—
ni'o «lu do ma pu cusku —sei la cpitepygau ku noi na djuno lo du'u dy mo kau cu retsku li'u»
ni'o zoi «lu. Hil-lo, hol-lo, hel-lo! .lu» —sei la .dorotis. fau lo nu ca lo ca krefu cu sanli lo pritu jamfu cu di'a co'e—
ni'o «lu coi —sei la tinci mudypre cu smacni spuda— li'u»
ni'o zoi «lu Ziz-zy, zuz-zy, zik! .lu» —sei la .dorotis. ku noi ca sanli lo re jamfu cu cusku— .i la'e di'u se fanmo lo makfa selsku .i tirna lo cladu nunta'a je nu nalci muvdu kei fau lo nu lo bende be la selna'i smani cu fa'a ga'u voikla lo drata
ni'o la nolraitru cu dizlo krobi'o ca'u la .dorotis. gi'e retsku «lu do mi'a ma minde li'u»
ni'o «lu mi'a djica lo ka klama la ri'ojme tcadu kei —sei lo verba cu cusku— gi'e farcri li'u»
ni'o «lu mi'a do'o ba bevri —sei la nolraitru cu spusku— li'u» .i ca sai lo nu ny cu mo'u tavla kei je la smani cu jairbi'o la .dorotis. lo birka gi'e to'o vofli to'e se cau dy .i lo drata cu lebna la cpitepygau .e la mudypre .e la cinfo .i je lo pa cmalu me la smani cu jairbi'o la .totos. gi'e vofli jersi lo drata vau to'e ki'u nai lo nu lo gerku cu mutce lo ka troci lo ka batci cy
ni'o la cpitepygau .e la tinci mudypre ca lo cfari cu tcemli lo ka terpa .i ki'u bo morji lo li'i la selna'i smani pu xlali fartra vo'a .i ku'i lo go'i cu ganse lo du'u na djica lo nu xrani kei gi'e ja'e bo gleki mutce tsekla pa'o lo vacri gi'e pukfri lo ka catlu lo melbi purdi .e lo melbi ricfoi vu'o poi darno cnita
ni'o la .dorotis. cu kufra lo ka tsekla bu'u lo jbini be lo re me lo brarai be la smani be'o noi pa ke'a me la nolraitru .i sy pu zbasu lo stizu lo xance be sy. gi'e racyju'i lo ka na crogau dy
ni'o «lu ki'u ma do'o bilga lo ka tinbe fi lo makfa pe la solji mapku —sei dy retsku— li'u»
ni'o «lu clani lisri —sei la nolraitru fau lo nu nalci cmila cu spusku— .i ku'i mi ki'u lo nu ma'a pu'o ze'u litru cu .ai jai xaksu lo temci fai lo ka lisysku la'e di'u (to va'o lo nu do djica toi) li'u»
ni'o «lu da'i mi ba gleki lo ka tirna —sei dy spusku— li'u»
ni'o «lu ni'o pu zu ku —sei lo jatna cu co'a tavla— mi'a zifre prenu gi'e gleki xabju lo barda ricfoi fau lo nu mi'a voikla lo pa tricu lo drata gi'e citka lo narge .e lo grute gi'e zukte fi lo se djica be mi'a se cau lo nu da selse'u mi'a .i ju'o cu'i su'o mi'a su'o roi dukse lo ka ra'utra kei fau lo nu fa'a ni'a vofli te zu'e lo nu lacpu lo rebla be lo danlu poi na se nalci kei .e lo nu jersi lo cipni .e lo nu renro lo narge lo prenu poi cadzu ne'i lo ricfoi .i ku'i mi'a nonselra'u gi'e gleki gi'e mulno lo ka selzdi kei gi'e selpu'a ro mentu pe lo djedi .i la'e di'u cabyseltei lo nanca be li so'i gi'e seltei lo barda lo nu la .oz. cu barkla lo dilnu te zu'e lo nu turni lo vi gugde
ni'o pu zu vi ku xabju lo darno berti fa lo melbi noltruti'u noi ke'a ke ji'a vlipa te makfa .i ro lo ri makfa cu se pilno fi lo ka sidju lo prenu .i je ra no roi jai se djuno fai lo ka xrani da poi vrude .i cmene ra fa zo .geilet. .i xabju lo melbi noldi'u poi zilzba lo barda bliku be lo zirxunjme .i ro da prami gy .i ku'i traji lo ka gy. badri ce'u kei fa lo nu gy. ki'u lo nu ro lo nanmu cu dukse lo ka bebna gi'e to'emle kei lo ka gletu lo ninmu poi tai melbi gi'e tai prije cu na kakne lo ka tolcri su'o da poi gy. ke'a ka'e prami .i ro mai ku'i gy. tolcri lo nanla poi ke'a melbi je nanmu je prije zmadu lo na'azma be ke'a .i la .geilet. cu jdice lo du'u gy. ca lo nu ny. ma'urnau cu gasnu lo nu ny. speni gy .i ja'e bo gy. zvagau ny lo gy. noldi'u gi'e pilno ro lo makfa se kakne lo ka gasnu lo nu ny. tsali gi'e vrude gi'e kukte ja'e lo nu da'i no ninmu ka'e djica lo zmadu .i ca lo nu banro lo makcu kei la .kuelalas. noi bi'u cmene ke'a cu jai se jinvi fai lo ka xagrai je pijrai nanmu te rai lo ro se gugde .i je lo ni ky. nanmu melbi cu tai barda ja'e lo nu la .geilet. cu se dirba prami ky gi'e sutyzu'e lo ka gasnu lo nu ro da bredi tu'a lo specfari'i
ni'o lo mi rirpa'u cu nolraitru la selna'i smani ku noi xabju lo ricfoi poi jibni lo noldi'u pe la .geilet. .i je lo bi'u nai tolci'o cu zmanei lo xamgu xamselsku lo xamgu vacysai .i ca pa djedi zi pu lo specfari'i lo mi rirpa'u cu vofli litru fi'o kansa lo bende .i ca bo ry. viska lo nu la .kuelalas. cu cadzu re'o lo rirxe .i ky dasni lo ricfu taxfu co xunblabi joi zirpu demsilka .i je lo mi rirpa'u cu zukpei lo ka troci da .i co'a tu'a lo valsi pe ry lo bende cu fa'a ni'a vofli gi'e jairbi'o la .kuelalas. gi'e bevri ri lo birka co'u lo nu zvati lo gapru be lo midju be lo rirxe kei gi'e falgau ky lo djacu
ni'o «lu ko limkla lo bartu doi pe mi xamgu nanmu —sei lo mi rirpa'u cu krixa— gi'e facki lo du'u xu kau lo djacu cu jai rinka lo nu lo do taxfu cu se barna li'u» .i la .kuelalas. cu dukse lo ka prije kei lo ka na limna .i je lo nu ky. ricfu cu na sai se jalge lo nu ky. na'e vrude .i ky. cmila ca lo nu tolyli'a lo gapru be lo djacu kei gi'e limkla lo ri'erkoi .i ku'i la .geilet. ca lo nu klama lo bartu ju'e ky cu facki lo du'u ro lo silka je ro lo dimsilka pu se daspo lo rirxe
ni'o lo noltruti'u cu fengu .i je ri djuno li'a lo du'u ma kau pu gasnu .i ny gasnu lo nu ro la selna'i smani cu zvati lo crane be ny .i je ny. pa moi cusku lo se du'u djica lo nu lo nalci be sy sy cu se ciljonsimgau .e lo nu sy se fartra du'i lo nu sy pu no'a la .kuelalas. kei gi'e se falgau fi lo rirxe .i ku'i lo mi rirpa'u cu mutce lo ka pikci .i ki'u bo ry. djuno lo du'u la smani va'o lo nu lo nalci cu ciljonsi'u cu jaurvasmro ne'i lo rirxe .i je ji'a la .kuelalas. cu cusku da poi xendo sy .i ja'e bo la .geilet. cu ro mai curmi lo nu sy na se xrani kei lo nu ba ku la smani cu bilga lo ka ci roi tinbe lo se minde be lo dasni be la solji mapku .i lo bi'u nai mapku pu se zbasu te zu'e lo nu my. specfari'i seldu'a fi la .kuelalas. .i je my jai se krici fai lo ka se jdima lo xadba be lo noltutra .i li'a lo mi rirpa'u je ro lo drata smani cu ba zi sai tugni fi lo se bilga .i je la'e di'u se jalge lo nu ro da poi ponse la solji mapku zo'u: mi'a ci roi selfu da .i ju da mo kau li'u»
ni'o «lu ma jalge tu'a lo re mei —sei la .dorotis. ku noi pu mutce lo ka se cinri lo lisri cu retsku— li'u»
ni'o «lu la .kuelalas. ki'u lo nu ri pa moi lo ponse be lo solji mapku —sei la smani cu spusku— cu pa moi lo minde be mi'a bei lo se djica be ky .i ky ki'u lo nu lo speni be ky cu na kakne lo ka jdari lo jvinu be mi'a cu klami'e mi'a ky noi zvati lo ricfoi kei ba lo nu spebi'o kei gi'e minde mi'a lo ka ro roi zvati da poi lo speni be ky na ka'e viska su'o la selna'i smani kei noi mi'a pu gleki lo ka tinbe ke'a kei ki'u lo nu ro mi'a pu terpa sy
ni'o la'e di'u ro mei lo mi'a se bilga co'u lo nu la solji mapku cu jai fasnu fai lo ka zvabi'o lo xance be la palci termafyfe'i pe la stici ku noi gasnu lo nu mi'a sefygau la .uinkis. gi'e ba bo li'argau lo du be la .oz. la gugde pe la stici .i ca ku la solji mapku cu me do moi .i je ci roi ku do se krali lo ka gasnu lo nu mi'a tinbe lo se djica be do li'u»
ni'o ca lo nu la smani nolraitru cu mo'u lisysku kei la .dorotis. cu fa'a ni'a catlu gi'e viska lo crino je gusycai bitmu pe la ri'ojme tcadu ku noi crane .i dy se spaji lo sutra nu vofli pe la smani gi'e ku'i gleki lo nu lo nunli'u cu mulno .i lo cizra danlu cu toljursa punji lo litru lo crane be lo balvro pe la tcadu .i je la nolraitru cu dizlo krobi'o fa'a la .dorotis. gi'e ba bo to'o sutra vofli fau lo nu pi ro lo ri bende cu jersi
ni'o «lu xamgu nu tsekla —sei lo cmalu nixli cu cusku— li'u»
ni'o «lu ie .i ji'a sutra tadji lo nu rivbi lo mi'o raktu —sei la cinfo cu spusku— .i zanfu'a mutce fa lo nu do pu lebna lo va se manci mapku li'u»
## ni'o ni'o pa mu mo'o lo nu facki fi la .oz. no'u la xlatce
ni'o lo vo litru cu cadzu klama lo barda vrogai pe la ri'ojme tcadu gi'e selsnagau lo janbe .i ba lo nu so'i roi selsnagau cu se kargau lo mintu badypre pe lo vrogai be'o poi ly ke'a pu pa roi penmi
ni'o «lu ue sai .i xu do ba'o xruti —sei by fau lo nu se spaji cu retsku— li'u»
ni'o «lu xu do mi'a na viska —sei la cpitepygau cu spusku— li'u»
ni'o «lu ku'i mi pu jinvi lo du'u do pu klama gi'e vitke la palci termafyfe'i pe la stici li'u»
ni'o «lu mi'a ty pu ja'a vitke —sei la cpitepygau cu cusku— li'u»
ni'o «lu .i je ty pu curmi lo nu do cliva xu —sei lo nanmu cu manci retsku— li'u»
ni'o «lu ty pu na ka'e fanta .i ki'u bo ty cu rumne —sei la cpitepygau cu ciksi— li'u»
ni'o «lu rumne ue .i la'e di'u xamgu nuzba ja'a ku —sei lo nanmu cu cusku—.i ma ty pu rumgau li'u»
ni'o «lu la .dorotis. cu go'i —sei la cinfo cu junri cusku— li'u»
ni'o «lu ue sai —sei lo nanmu cu krixa— li'u» .i je ny cu dizlo mutce krobi'o ca'u dy
ni'o ba bo ny lo drata cu klagi'a lo vo'a cmalu kumfa gi'e stela jongau lo vistci lo kanla pe ro lo drata du'i lo nu ny cu no'a ca lo prula'i .i ba bo lo vo da pagre lo vorme be la ri'ojme tcadu .i ca lo nu lo prenu cu se jungau la badypre be lo vrogai lo du'u la .dorotis. pu rumgau la palci termafyfe'i pe la stici kei ro boi py jmaji lo sruri be lo litru gi'e jersi ly fau lo nu barda pregunma kei fa'a la noldi'u pe la .oz.
ni'o lo sonci pe lo crino zbikre cu za'o bandu sanli ca'u lo vorme .i ku'i sy ba zi nerklacru ly .i e ly cu za'u re'u se penmi lo melbi ke crino nixli noi ba zi klagi'a ro boi ly lo kumfa pe ly te zu'e lo nu ly cu ka'e surla co'u lo nu la banli .oz. cu bredi lo nu se penmi ly
ni'o lo sonci cu gasnu lo nu la .oz. cu ba zi se jungau fi lo nuzba poi du'u la .dorotis. .e lo drata litru pu xruti ba lo nu daspo la palci termafyfe'i .i ku'i la .oz. spuda fi no da .i ly kanpe lo nu la banli te makfa cu ba zi cpagau ly .i ku'i .obu na co'e .i ly te cusku no valsi pe la .oz. ca lo bavla'i djedi .a lo bavla'i .a lo bavla'i .i lo nu denpa cu ta'inri'a gi'e tolzdi .i je ro mai ly binxo lo ka fengu lo du'u la .oz. ba lo nu .obu gasnu lo nu ly. lifri lo nadytcini .e lo ka selfu cu tai xlali fartra ly .i se ki'u bo la cpitepygau cu ro mai cpedu fi lo crino nixli fe lo ka bevri fi la .oz. fe lo drata notci poi se du'u ly. va'o lo nu .obu na ba zi sai curmi lo nu ly. nerkla gi'e viska .obu cu klami'e la selna'i smani gi'e minde sy lo ka sidju ly kei gi'e facki lo du'u xu kau .obu gasnu lo se nupre .i la te makfa ca lo nu te dunda lo bi'u nai notci cu tai terpa ja'e lo nu .obu notybe'i fi ly fe lo se du'u .e'a klama la nolstizu kumfa ca lo bavla'i cerni ti'u li so pi'e vo .i .obu pu pa roi penmi la selna'i smani bu'u la gugde pe la stici .i je .obu na djica lo nu za'u re'u penmi
ni'o lo vo litru cu lifri lo nunsipna claxu nicte fau lo nu ro da pensi lo seldu'a poi la .oz. pu nupre lo nu dunda ke'a da .i la .dorotis. pu sipybi'o pa po'o roi .i je dy ca la'e di'u cu senva lo nu dy cu zvati la .kanzas. ku noi bu'u ke'a la fetfamti .em. dy jungau lo du'u tai ma kau gleki lo nu lo .ebu cmalu nixli cu di'a zdazva
ni'o ca lo se tcika be li so ca lo bavla'i cerni lo crino se zbikre sonci cu klama ly .i je ba za lo mentu be li vo lo ro da nerkla la nolstizu kumfa pe la .oz.
ni'o li'a ro boi ly kanpe lo nu viska la .oz. ku pe lo tarmi poi .obu ke'a pu pa re'u se tarmi .i je ro boi ly mutce lo ka se spaji kei ca lo nu ru'u catlu gi'e viska no sai prenu poi nenri lo kumfa .i stali lo jibni be lo vorme gi'e simxu lo ka zmadu jibni .i mu'i bo lo nunsmaji pe lo kunti kumfa cu zmadu ro lo tarmi be la .oz. lo ka mabla
ni'o ca'o ku lo vitke cu tirna lo salci tonga voksa noi simlu lo ka se krasi lo jibni be lo galraipau be lo barda kumfa zi'e noi cusku
ni'o «lu mi'e .oz. no'u la banli je xlatce .i mu'i ma do mi sisku li'u»
ni'o lo litru cu za'u re'u sisku catlu ro pagbu be lo kumfa .i je ba bo la .dorotis. fau lo nu viska no prenu cu retsku «lu do ma zvati li'u»
ni'o «lu mi ro da zvati —sei la voksa cu spusku— .i ku'i mi nonselji'u lo kanla be lo fadni mroka'e .i mi ca ba tsebi'o lo mi nolstizu te zu'e lo nu do mi ka'e tavla li'u» .i je'u la voksa cu simlu lo ka ca se krasi lo nolstizu .i se mu'i bo lo drata cu cadzu fa'a ny .i ca bo la .dorotis. cu cusku
ni'o «lu mi'a pu klama te zu'e lo nu do gasnu lo mi'a se nupre be do doi .oz. li'u»
ni'o «lu ma se nupre —sei la .oz. cu retsku— li'u»
ni'o «lu do pu nupre lo nu benji mi la .kanzas. ca lo nu la palci termafyfe'i ba'o se daspo —sei lo nixli cu cusku— li'u»
ni'o «lu ji'a do pu nupre lo nu dunda lo besna mi —sei la cpitepygau cu cusku— li'u»
ni'o «lu ji'a do pu nupre lo nu dunda lo risna mi —sei la tinci mudypre cu cusku— li'u»
ni'o «lu ji'a do pu nupre lo nu dunda lo kamvirnu mi —sei la tolvirnu cinfo cu cusku— li'u»
ni'o «lu xu la palci termafyfe'i cu ja'a ba'o se daspo —sei la voksa cu retsku— li'u» .i je la .dorotis. cu te simlu fi vy fe lo ka desku milxe
ni'o «lu go'i —sei dy spusku— .i mi ty pu rumgau se pi'o lo baktu be lo djacu li'u»
ni'o «lu ue sai —sei la voksa cu cusku— .i suksa mutce .i .i'a ko mi klama ca lo bavlamdei .i ki'u bo mi nitcu lo temci lo nu pensi li'u»
ni'o «lu do ba'o kakne lo ka ze'u pensi —sei la tinci mudypre cu fengu cu cusku— li'u»
ni'o «lu .ai mi'a na denpa ze'a lo se jmina djedi —sei la cpitepygau cu cusku— li'u»
ni'o «lu do bilga lo ka gasnu lo do se nupre be fi mi'a —sei la .dorotis. cu basna cusku— li'u»
ni'o la cinfo cu jinvi lo du'u xamgu fa lo nu fepygau la te makfa .i se mu'i bo cy cu cmoni lo barda je cladu selcmo noi tai tsali je mabla ku'o ja'e lo nu la .totos. cu to'o plipe fau lo nu terpa carmi kei gi'e falgau lo sepybi'u poi zvati pa lo kojna .i ca lo nu by farlu fau lo nu maxyvru kei kei lo ro da cu fa'a catlu .i je ca lo bavla'i mokca ro lo ro da cu mulno lo ka manci .i ki'u bo viska lo nu zvati je'a lo mokca poi lo sepybi'u pu mipri ke'a ku'o fa lo cmalu ke tolci'o nanmu noi sedykrecau zi'e noi lo flira be ke'a cu se cinje zi'e noi simlu lo ka dunli lo drata lo ka ma kau ni ce'u se spaji .i la tinci mudypre fau lo nu galgau lo ri ka'amru cu bajra fa'a lo cmalu nanmu gi'e krixa «lu do du ma li'u»
ni'o «lu mi'e .oz. no'u la banli je xlatce —sei lo cmalu nanmu cu desku voksa cusku— .i ku'i ko mi na darxi .i .e'o do na go'i .i se va'o bo mi ba zukte ro lo do se djica li'u»
ni'o lo ma'a pendo cu catlu ny fau lo nu se spaji gi'e xanka
ni'o «lu mi pu jinvi lo du'u la .oz. cu barda stedu —sei la .dorotis. cu cusku— li'u»
ni'o «lu si'a mi pu jinvi lo du'u la .oz. cu kukte ninmu —sei la cpitepygau cu cusku— li'u»
ni'o «lu si'a mi pu jinvi lo du'u la .oz. cu xlatce danlu —sei la tinci mudypre cu cusku— li'u»
ni'o «lu si'a mi pu jinvi lo du'u la .oz. cu bolci lo fagri —sei la cinfo cu cusku— li'u»
ni'o «lu na go'i .i ro do toldra —sei lo cmalu nanmu cu ruble cusku— .i mi pu tcica li'u»
ni'o «lu ue tcica —sei la .dorotis. cu krixa— .i xu do na banli te makfa li'u»
ni'o «lu .e'o do smaji doi dirba —sei .obu cusku— .i ko na tai cladu cusku .i se va'o nai bo lo drata do ba tirna .i je mi ba se maldimna .i .ei mi banli te makfa li'u»
ni'o «lu xu do na go'i —sei la .dorotis. cu retsku— li'u»
ni'o «lu na sai go'i doi dirba .i sa'u mi fadni prenu li'u»
ni'o «lu do xlamau lo fadni —sei cpitepygau cu badri tonga cusku— .i do ticpre li'u»
ni'o «lu ie sai —sei lo cmalu nanmu fau lo nu termosysimgau lo xance tai lo nu la'e di'u ny pluka cu cusku— .i mi ticpre li'u»
ni'o «lu ku'i la'e di'u xlatce —sei la tinci mudypre cu cusku .i ta'i ma mi ba cpacu lo mi risna li'u»
ni'o «lu si'a mi go'i lo mi kamvirnu —sei la cinfo cu retsku— li'u»
ni'o «lu si'a mi go'i lo mi besna —sei la cpitepygau fau lo nu vimcu lo se klaku lo kanla se pi'o lo kosta birtu'u cu cusku— li'u»
ni'o «lu doi pe mi dirba pendo —sei la .oz. cu cusku— mi fi do cpedu lo ka na casnu lo tai nalvai .i ko pensi mi .e lo xlatce raktu poi nu mi te facki li'u»
ni'o «lu xu no drata cu djuno lo du'u do ticpre —sei la .dorotis. cu retsku— li'u»
ni'o «lu no da po'u na'e bo lo vo do ja! mi cu djuno —sei la .oz. cu spusku— .i mi pu tcica ro lo prenu ze'a lo tai clani ja'e lo nu mi pu jinvi lo du'u mi ba no roi te facki .i pu barda se srera mi fa lo nu curmi lo nu do nerkla la nolstizu kumfa .i ta'e ku mi na viska lo ji'a sai mi selfu .i je se ki'u bo sy cu jinvi lo du'u mi xlatce li'u»
ni'o «lu ku'i mi na jimpe —sei la .dorotis. cu se cfipu cusku— .i ki'u ma mi do te jvinu lo barda stedu li'u»
ni'o «lu mi pu tcica —sei la .oz. cu spuda— .i .e'o klama fa'a ta .i se va'o bo mi fi do ba ciksi li'u»
ni'o .obu gidva klama lo cmalu kumfa be ti'a la nolstizu kumfa .i je lo drata .obu jersi .i .obu jarco lo pa kojna noi lo barda stedu noi zilzba lo so'i pelji senta gi'e co'e lo ralci se finti ke cinta flira cu lolcpana
ni'o «lu ta zo'u: mi pu dadgau fi lo drudi lo skori —sei la .oz. cu cusku— .i mi pu sanli ti'a lo sepybi'u! gi'e lacpu lo cilta te zu'e lo nu gasnu lo nu lo kanla cu muvdu .e lo nu lo moklu cu kalri li'u»
ni'o «lu ku'i lo voska zo'u mo —sei la .dorotis. cu te preti— li'u»
ni'o «lu mi befta'a —sei lo cmalu nanmu cu cusku— .i mi kakne lo ka renro lo sance pe lo mi voksa ro lo mi se djica stuzi .i ja'e bo do pu jinvi lo du'u lo voksa cu se sance lo stedu .i ti drata se pilno mi lo nu tcica do li'u» .i .obu fi la cpitepygau cu jarco lo taxfu .e lo firgai vu'o poi .obu ke'a pu dasni ca lo nu .obu simlu lo ka kukte ninmu .i je la tinci mudypre cu viska lo nu lo ri mabla danlu cu ckaji lo po'o ka gunma lo so'i skapi poi se fenso zi'e poi lo pinta mudri bo spisa cu sarji .i lo bolci be lo fagri zo'u: lo jitfa te makfa pu dadgau by ji'a lo drudi .i je'u by bolci lo mapni .i ku'i ca lo nu rincypu'i lo ctile kei lo bolci cu tsali jenca
ni'o «lu je'u —sei la cpitepygau cu cusku— .ei do ckeji lo ka tai ticpre li'u»
ni'o «lu mi co'e .i ju'o mi ja'a co'e —sei lo cmalu nanmu cu xenru cusku— .i ku'i no drata mi pu ka'e se zukte .i .e'o do tsebi'o .i lo stizu cu so'i mei .i mi fo do ba to'ai lisri lo me mi moi li'u»
ni'o ja'e bo tsebi'o gi'e tinju'i ze'a lo nu .obu te lisri lo di'e lisri
ni'o «lu mi jbena fo la .oma'as. li'u»
ni'o lu ue .i na darno zei mutce la .kanzas. —sei la .dorotis. cu krixa— li'u»
ni'o «lu go'i .i ku'i darmau ti —sei .obu fau lo nu badri desygau lo stedu fa'a dy cu cusku— .i mi ca lo nu ma'urbi'o cu binxo lo befyba'u .i je mi pu xamgu mutce se ctuca fi lo ka befyba'u kei fe lo banli balcre .i ro da klesi lo cipni .a lo danlu zo'u: mi kakne lo ka monfu'igau da li'u» .i ca ku .obu latcmo tai tu'a lo citmlatu ja'e lo nu la .totos. cu sirgau lo kerlo gi'e catlu te zu'e lo nu viska lo nu my ma kau zvati kei kei ro da .i «lu ba za lo temci —sei la .oz. cu di'a co'e— mi binxo lo ka tatpi la'e di'u kei gi'e binxo lo vartisyboi prenu li'u»
ni'o «lu ri mo —sei la .dorotis. cu retsku— li'u»
ni'o «lu prenu gi'e galbi'o ne'i lo vartisyboi ca lo tsirkuso djedi te zu'e lo nu lo remgunma cu jmaji .e lo nu ry. pleji fo lo ka viska lo tsirkuso se tigni —sei .obu ciksi— li'u»
ni'o «lu ua —sei dy cusku— .i mi djuno li'u»
ni'o «lu ni'o pu ku mi ca pa djedi cu galze'a ne'i lo vartisyboi .i je lo skori cu binxo lo ka se torni kei ja'e lo nu mi na ka'e di'a dizlo .i vy galze'a ja'e lo nu gapru lo dilnu .i tai darno ja'e lo nu lo flecu be lo vacri cu janli vy gi'e bevri vy ve'a lo minli be li so'i so'i .i ze'a lo donri su'i lo nicte mi litru pa'o lo vacri .i je ca lo cerni pe lo re moi be lo djedi mi cikybi'o gi'e viska lo nu lo vartisyboi cu fulta ga'u lo fange je melbi gugde
ni'o vy masno zenba lo ka dizlo .i je mi na sai se xrani .i ku'i mi zvati lo midju be lo fange prenu noi ca lo nu ke'a viska lo nu mi klama fi lo dilnu cu jinvi lo du'u mi banli te makfa .i li'a mi curmi lo nu py. jinvi la'e di'u kei ki'u lo nu py. terpa mi gi'e nupre lo ka zukte ro da poi mi djica lo nu vy ke'a zukte
ni'o «lu mi te zu'e sa'u lo nu mi se zdile .e lo nu lo xamgu prenu cu tolcando cu pu minde py lo ka zbasu lo vi tcadu .e lo mi noldi'u .i je py djica je xamgu zukte ro la'e di'u .i ba bo mi jinvi lo du'u mi lo gugde noi tai crino gi'e tai melbi cu te cmene «lu ri'ojme tcadu li'u» .i je te zu'e lo nu lo cmene cu zmadu mapti kei mi punji lo crino vistci ro lo prenu ja'e lo nu ro da poi se viska cu crino li'u»
ni'o «lu ku'i xu vi na ku ro da crino —sei la .dorotis. cu retsku— li'u»
ni'o «lu na zmadu su'o drata tcadu —sei la .oz. cu spusku— .i ku'i da ca lo nu da dasni lo crino vistci zo'u: li'a ro da poi se viska da cu skari lo ka crino kei da .i la ri'ojme tcadu cu se zbasu pu za lo nanca be li so'i sai .i ki'u bo mi pu citno nanmu ca lo nu lo vartisyboi cu bevri mi ti .i je mi nau tolci'o mutce nanmu .i ku'i lo mi prenu ba'o ze'u kanla dasni lo crino vistci ja'e lo nu so'i boi py jinvi lo du'u ja'a ri'ojme tcadu .i ju'o ry ty melbi stuzi gi'e ricfu lo jemna .e lo kargu jinme je ro xamgu poi se nitcu fi lo nu gleki .i mi ba'o xendo lo prenu .i je py. nelci mi .i ku'i co'a lo nu lo vi noldi'u cu se zbasu kei mi gau mi nenri gi'e viska no boi py li'u»
ni'o «lu pa lo brarai be lo se terpa be mi cu nu co'e la termafyfe'i .i ki'u bo to'e ki'u nai gi mi na sai kakne su'o makfa gi mi ba za facki lo du'u la termafyfe'i cu ja'a kakne lo se manci .i ty vu vo mei .i je ty. turni lo prenu pi xabju la berti fa'u la snanu fa'u la stuna fa'u la stici .i zanfu'a fa lo nu la termafyfe'i pe la berti fa'u la snanu cu vrude .i je mi pu djuno lo du'u lo re mei mi na xrani .i ku'i la termafyfe'i pe la stuna fa'u la stici cu xlatce palci .i je va'o lo nu da'i lo re mei pu na jinvi lo du'u mi zmadu lo du be ty lo ka vlipa cu ju'o pu daspo mi .i da'i nai mi pu jmive ze'a lo nanca be li so'i fau lo nu morsi terpa tu'a ty .i se ki'u bo do ka'e se xanri lo nu ma kau ni mi gleki ca lo nu mi junbi'o lo du'u lo zdani be do pu farlu la palci termafyfe'i pe la stuna .i mi pu ca lo nu do mi pu klama cu bredi lo ka va'o lo nu do catra lo drata termafyfe'i cu nupre ro da .i ku'i nau ku fau lo nu do ba'o rumgau ty zo'u: mi burna lo ka cusku lo se du'u mi na kakne lo ka gasnu lo se nupre li'u»
ni'o «lu pe'i do xlali mutce nanmu —sei la .dorotis. cu cusku— li'u»
ni'o «lu ie nai doi pe mi dirba .i je'u mi vrude mutce nanmu .i ku'i mi tolcre mutce te makfa .i mi bilga lo ka ra'arji'i li'u»
ni'o «lu xu do na kakne lo ka dunda lo besna mi —sei la cpitepygau cu retsku— li'u»
ni'o «lu do na nitcu by .i do ca ro djedi cu cilre da .i lo cifnu cu se besna .i ku'i cy na djuno so'i da .i lo nu lifri cu ro pa mei lo se jalge be lo nu djuno .i je lo jai ze'a zvati be lo terdi be fai do cu panra lo jai se la'u lifri be fai do li'u»
ni'o «lu cumki fa lo nu ro la'e di'u jetnu —sei la cpitepygau cu cusku— .i ku'i mi va'o lo nu na ku do dunda lo besna mi cu ba tolgei mutce li'u»
ni'o lo jitfa te makfa cu jundi catlu cy
ni'o «lu .y —sei cy fau lo nu patyva'u cu cusku— .i mi no'e te makfa .i ku'i va'o lo nu do ca lo bavlamdei cerni cu klama mi zo'u: mi ba setca lo besna lo do stedu .i ku'i mi na ka'e jungau do lo du'u ta'i ma kau pilno by .i do nitcu lo ka facki zu'e do po'o li'u»
ni'o «lu ki'e do ki'e do —sei la cpitepygau cu krixa— .i mi ba facki fi lo tadji be lo nu pilno .i ko na xanka li'u»
ni'o «lu ku'i lo mi kamvirnu zo'u: mo —sei la cinfo cu xanka retsku— li'u»
ni'o «lu lo ni do virnu cu barda .i mi birti —sei la .oz. cu spusku— .i ro se nitcu be do cu ka lacri lo sevzi .i na zasti fa su'o jmive poi na'e terpa ca lo nu penmi lo ckape .i jetnu nu virnu kei fa lo nu farzu'e lo ckape ca lo nu terpa .i je lo tai kamvirnu zo'u: lo ni do ckaji cu banzu li'u»
ni'o «lu cumki fa lo nu go'i .i ku'i mi to'e ki'u nai terpa —sei la cinfo cu cusku— .i mi va'o lo nu na ku do dunda lo klesi be lo kamvirnu be'o poi gasnu lo nu tolmo'i lo du'u terpa li'u»
ni'o «lu .i'a .i mi ca lo bavlamdei cu dunda lo tai kamvirnu do —sei la .oz. cu spuda— li'u»
ni'o «lu lo mi risna zo'u: mo —sei la tinci mudypre cu retsku— li'u»
ni'o «lu .y ri zo'u: —sei la .oz. cu spusku— mi jinvi lo du'u do toldra lo ka djica tu'a lo risna .i ry tolgeigau so'e prenu .i ja'o do djuno .i do se zanfu'a lo nu do na se risna li'u»
ni'o «lu ju'o lo du'u ma kau se jinvi cu manri —sei la tinci mudypre cu cusku— .i mi zo'u: mi va'o lo nu do dunda lo risna mi cu ba jarfri ro li'i nalgei kei se cau lo nu pante li'u»
ni'o «lu .i'a —sei la .oz. cu ruble spuda— .i ko klama mi ca lo bavlamdei .i jai do ba cpacu lo risna .i mi pu ze'u lo nanca be li so'i cu sezmlugau lo ka te makfa .i se ki'u .e'a se'i mi ra'irgau la'e di'u lo cmalu ziljmina li'u»
ni'o «lu .i je —sei la .dorotis. cu cusku— ta'i ma mi xruti la .kanzas. li'u»
ni'o «lu .ai mi pensi la'e di'u —sei lo cmalu nanmu cu spusku— .i ko curmi lo nu mi pensi lo tcini ze'a lo djedi be li re ji'i ci .i se va'o bo mi troci lo ka facki fi lo tadji be lo nu bevri do lo ragve be lo cantu'a .i ze'a lo tersei do'o se fartra .ai tai tu'a lo vitke be mi .i je ze'a lo nu do'o xabju la noldi'u kei lo mi prenu cu selfu do'o gi'e tinbe ro lo se djica be do'o .i pa po'o da zo'u: mi cpedu lo ka da se pleji fo lo nu mi sidju .i do bilga lo ka na jungau su'o da lo se mipri be mi be'o noi du'u mi ticpre li'u»
ni'o lo ro mei cu tugni fi lo du'u ba jungau no da lo se cilre kei gi'e xruti lo vo'a kumfa fau lo nu zancni .i la .dorotis. ku ji'a sai cu pacna fi li pi za'u no fe lo nu la'e «lu banli je xlatce ticpre li'u» noi dy tercme .obu ke'a cu facki fi lo tadji be lo nu xrugau benji dy la .kanzas. .i je da'i dy va'o lo nu .obu ja'a co'e cu bredi lo ka fraxu .obu ro da
## ni'o ni'o pa xa mo'o lo makfa larcu pe la banli ticpre
ni'o ca lo bavla'i cerni la cpitepygau cu cusku fi lo ri pendo
ni'o «lu ui sai mi klama la .oz. te zu'e lo nu ro mai cpacu lo mi besna .i mi ca lo nu xruti cu dunli lo drata remna li'u»
ni'o «lu mi pu ro roi nelci do poi do du —sei la .dorotis. cu sampu cusku— li'u»
ni'o «lu do xendo fi lo nu nelci lo cpitepygau —sei cy spusku— .i ku'i ju'o do ba jinvi lo xagmau mi ca lo nu do zgana lo xautce se pensi poi lo mi cnino besna cu cupra li'u» .i ba bo cusku zo co'o se pi'o lo gleki voksa gi'e klama lo nolstizu kumfa noi bu'u ke'a darxi lo vrogai
ni'o «lu ko nerkla —sei la .oz. cu cusku— li'u»
ni'o la cpitepygau cu nerkla gi'e tolcri lo cmalu nanmu poi zutse ne'a lo canko fau lo nu condi pensi
ni'o «lu mi klama te zu'e tu'a lo mi besna —sei la cpitepygau cu te notci be fau lo nu xanka milxe— li'u»
ni'o «lu je'e .i'a .i ko zutse lo va stizu pe'u do'u —sei la .oz. cu spusku— .i ko mi fraxu lo nu mi vimcu lo do stedu .i ku'i mi nitcu la'e di'u lo nu setca lo do besna lo drani stuzi li'u»
ni'o «lu na sai nabmi —sei la cpitepygau cu cusku— .i do ja'a sai jai se curmi fai lo ka vimcu lo mi stedu .i va'o bo sy cu xagmau ca lo nu do ba'o jongau sy li'u»
ni'o ja'e bo lo te makfa cu tolyla'a lo stedu gi'e vimcu lo sudysrasu .i je ba bo nerkla lo trixe kumfa gi'e lebna lo gurni klani noi .obu ke'a jmina lo mixre be lo so'i pijne joi lo so'i jesni .i ca lo nu ba'o desygau lo mixre zo'u .obu tisygau lo galpau be lo stedu be la cpitepygau lo mixre gi'e mulno setca lo sudysrasu lo ve vimcu canlu te zu'e lo nu lo besna cu zvasto
ni'o ca lo nu ba'o lasna lo stedu be la cpitepygau lo xadni cu cusku fi cy fe «lu co'a lo cabna do banli remna .i ki'u bo mi ba'o dunda lo cnino je barda besna li'u»
ni'o la cpitepygau ge gleki gi jgira vau lo nu lo brarai se djica cu binxo lo fatci .i je fau lo nu ba'o kirsku zei carmi la .oz. cu xruti lo vo'a pendo
ni'o la .dorotis. cu kucli catlu cy .i lo stedu be cy cu mutce lo ka se punli lo besna bu'u lo galpau
ni'o «lu do ma cinmo —sei dy te preti— li'u»
ni'o «lu mi cinmo lo ka prije je'u —sei cy stace spusku— .i mi ca lo nu se slabu lo mi besna cu djuno ro da li'u»
ni'o «lu ki'u ma lo va jesni joi pijne cu bartu pagre fo lo do stedu —sei la tinci mudypre cu retsku— li'u»
ni'o «lu la'e di'u je'urja'o lo du'u ta kinli se menli —sei la cinfo cu te notci— li'u»
ni'o «lu .ei mi klama la .oz. te zu'e lo nu te dunda lo mi risna —sei la mudypre cu cusku— li'u» .i my klama lo nolstizu kumfa gi'e darxi lo vrogai
ni'o «lu ko nerkla —sei la .oz. cu cusku— li'u» .i je la mudypre cu nerkla gi'e cusku «lu mi klama te zu'e tu'a lo mi risna li'u»
ni'o «lu xamgu —sei lo cmalu nanmu cu spusku— .i ku'i sarcu fa lo nu mi katna lo do cutne kei lo nu mi ka'e setca punji lo do risna lo drani .i .a'o do na ba cortu li'u»
ni'o «lu .o'u —sei la mudypre cu cusku— .i na ba ganse da li'u»
ni'o la .oz. cu bevri lo re mei be lo tinzba jinci gi'e sraku lo zunle pagbu be lo cutne be la tinci mudypre ja'e lo cmalu ke kurfa kunti .i ba bo fau lo nu klama lo tanxe be lo dacru cu tolse'a lo melbi risna noi mulno marji lo silka gi'e zilse'a lo komka'a pulce
ni'o «lu xu na melbi —sei .obu retsku— li'u»
ni'o «lu ja'a go'i —sei la mudypre noi mutce lo ka se pluka cu spusku— .i ku'i xu xendo risna li'u»
ni'o «lu ja'a sai go'i —sei .obu spuda— li'u» .i .obu setca lo risna lo cutne be la mudypre gi'e selbasygau lo tinci kurfa fau lo nu cnici ranjinjongau ry lo jai bu'u sraku
ni'o «lu uo —sei .obu cusku— .i do ca se risna da poi ro prenu cu jgira da'i tu'a ke'a .i mi xenru lo nu pu nitcu lo ka punji lo kurfa lo do cutne .i ku'i je'u pu sarcu li'u»
ni'o «lu na nabmi fa tu'a lo kurfa —sei la mudypre cu gleki basnysku— .i mi mutce lo ka ckire do kei gi'e no roi tolmo'i lo du'u ma kau ni do xendo li'u»
ni'o «lu ko na tavla fi la'e di'u —sei la .oz. cu spusku— li'u»
ni'o ba bo la tinci mudypre cu xruti lo ri pendo noi zandapsku ty my
ni'o la cinfo cu klama lo nolstizu kumfa gi'e darxi lo vrogai
ni'o «lu ko nerkla —sei la .oz. cu cusku— li'u»
ni'o «lu mi klama te zu'e tu'a lo mi ka virnu —sei la cinfo fau lo nu nerkla lo kumfa cu noisku— li'u»
ni'o «lu je'e do'u —sei lo cmalu nanmu cu spusku— .i mi ba lebna klama se va'u do li'u»
ni'o ny klama lo kajnyta'e gi'e lebna fi lo galtu kajna lo kurfa ke crino botpi noi ny seltisygau lo se vasru be ke'a lo crino joi solji palta noi melbi ke sraku morna .i la te makfa fau lo nu punji py lo crane be la tolvirnu cinfo ku noi sumne py tai lo nu na nelci cu cusku:
ni'o «lu ko pinxe li'u»
ni'o «lu ti mo —sei la cinfo cu retsku— li'u»
ni'o «lu ti zo'u: —sei .obu spusku— va'o lo nu nenri do cu ka virnu .i li'a do djuno lo du'u lo kamvirnu cu ro roi nenri lo prenu .i ja'o .ei ti na'e zilski lo ka kamvirnu kei co'u lo nu do ba'o tunlo vo'a .i se ki'u bo mi stidi lo ka pinxe se rai lo kamsutra li'u»
ni'o la cinfo cu denpa ze'i no ziljmina gi'e pinxe co'u lo nu lo palta cu kunti
ni'o «lu do ma cinmo ca ku —sei la .oz. cu retsku— li'u»
ni'o «lu lo ka culno lo ka virnu —sei la cinfo cu spuda— li'u» .i cy gleki xruti lo ri pendo te zu'e lo nu jungau py fo lo ri zanfu'a
ni'o la .oz. fau lo nu no drata cu zvati cu cisma co pensi lo nu snada lo ka dunda la cpitepygau .e la tinci mudypre .e la cinfo je'a lo se djica se jinvi .i «lu pau nai ta'i ma mi sisti lo ka ticpre kei—sei .obu cusku— va'o lo nu ro lo prenu cu djica lo nu mi gasnu lo fasnu poi ro da djuno lo du'u ke'a na cumki .i pu frili fa lo ka gasnu lo nu la cpitepygau .e la cinfo .e la mudypre cu gleki .i ki'u bo ro lo ci mei pu se xanri lo nu mi kakne ro da .i ku'i lo ka xrugau la .dorotis. la .kanzas. cu ba zmadu fi lo ka nandu .i je mi birti lo du'u mi na djuno lo du'u ta'i ma kau ka'e gasnu li'u»
## ni'o ni'o pa ze mo'o lo nu lo vartisyboi cu se galze'acru
ni'o ze'a lo djedi be li ci la .dorotis. cu se jungau fi no da la .oz .i djedi co se badri lo cmalu nixli .i ku'i ro lo ri pendo cu mutce lo ka gleki gi'e se mansa .i la cpitepygau cu jungau lo drata lo du'u lo melbi se pensi cu zvati lo stedu be cy .i ku'i cy jungau no da lo du'u ma kau me lo se pensi .i ki'u bo djuno lo du'u no da po'u na'e bo cy ka'e jimpe py .i la tinci mudypre ca lo nu ru'u cadzu cu ganse lo nu lo ri risna cu ru'u muvdu ne'i lo cutne .i je my cu jungau la .dorotis. lo du'u my pu facki lo du'u ry xendo je toljursa zmadu lo risna poi my ke'a se risna ca lo nu my. marji lo rectu .i la cinfo cu xusra lo du'u cy terpa no da pe lo terdi kei gi'e da'i gleki lo nu penmi lo jenmi .a lo pa re mei be lo tsali .kalidas.
ni'o tai ku ro cmima be lo cmalu gunma be'o po'u na'e bo la .dorotis. ku noi mutce lo ka djica lo nu xruti la .kanzas. cu se mansa
ni'o ca lo vo moi be lo djedi ja'e lo nu la .dorotis. cu banli gleki kei la .oz. cu cpedu lo ka dy klama .i je ca lo nu dy. nerkla la nolstizu kumfa kei .obu pluka rinsa dy
ni'o «lu ko tsebi'o doi dirba .i pe'i mi facki lo du'u ma kau tadji lo nu xrugau benji fi lo vi gugde
ni'o «lu pau se ka'a la .kanzas. —sei dy djicni retsku— li'u»
ni'o «lu .y mi na birti tu'a la .kanzas. —sei la .oz. cu cusku— .i ki'u bo mi na te sidbo fi lo cmarai fe lo du'u ky fa'a ma kau crane .i ku'i lo pa moi be lo do se bilga cu nu pagre lo cantu'a .i ba ku .ei frili fa lo ka zvafa'i lo do zdani li'u»
ni'o «lu ta'i ma mi pagre lo cantu'a —sei dy te preti— li'u»
ni'o «lu mi do ba jungau lo du'u mi ma kau jinvi —sei lo cmalu nanmu cu cusku— .i sa'u nai ca lo nu mi klama lo vi gugde kei mi klama fu lo vartisyboi .i do ji'a pu klama pa'o lo vacri fau lo nu se bevri lo vilcarbi'e .i ja'o mi krici lo du'u xagrai tadji lo nu zvabi'o lo ragve be lo kutytu'a kei fa lo nu pagre lo vacri .i lo ka zbasu lo vilcarbi'e cu dukse lo ka nandu kei lo ka cmima lo mi se vlipa .i ku'i mi pu pensi lo tcini gi'e krici lo du'u mi kakne lo ka zbasu lo vartisyboi li'u»
ni'o «lu ta'i ma —sei la .dorotis. cu retsku— li'u»
ni'o «lu lo vartisyboi —sei la .oz. cu cusku— cu marji lo silka noi se gapci lo snipa te zu'e lo nu lo gacri na ka'e barbi'o .i bu'u la mi noldi'u so'i silka cu zvati .i se ki'u bo ba na nabmi fa lo nu zbasu lo vartisyboi .i ku'i bu'u pi ro lo vi gugde cu zvati fa no gapci pe te pi'o lo nu fulta gasnu li'u»
ni'o «lu ga nai na fulta —sei la .dorotis. cu piksku— gi na plixau ma'a li'u»
ni'o «lu jetnu —sei la .oz. cu spusku— .i ku'i tadji fa lo drata noi nu clugau vy lo glare vacri .i lo glare vacri na xagdu'i lo gapci .i ki'u bo va'o lo nu lo vacri cu lenku binxo kei lo vartisyboi cu zvabi'o lo cantu'a ja'e lo nu mi'o farcri li'u»
ni'o «lu ue zo mi'o —sei lo nixli cu krixa— .i xu do klakansa mi li'u»
ni'o «lu go'i li'a —sei la .oz. cu spusku— .i mi tatpi lo nu mi tai ticpre .i va'o lo nu da'i mi barkla lo vi noldi'u lo mi se gugde cu ba zi facki lo du'u mi na te makfa kei gi'e ba bo fengu mi lo ka tcica gy .i se ki'u bo mi bilga lo ka stali lo nenri be lo vi kumfa ze'a pi ro lo donri .i je binxo lo ka se tatpi .i da'i mi zmanei lo ka klama la .kanzas. fi'o se kansa do gi'e za'u re'u zvati lo tsirkuso li'u»
ni'o «lu da'i mi gleki lo nu do mi kansa —sei la .dorotis. cu cusku— li'u»
ni'o «lu ki'e do'u —sei .obu spusku— .i ca ku va'o lo nu do ba sidju mi lo ka fenso lo silka zo'u: mi'o ba co'a gunka tu'a lo do vartisyboi li'u»
ni'o ja'e bo la .dorotis. cu lebna lo jesni .e lo cilta .i je du'i lo nu la .oz. cu sutra katna lo dasri be lo silka lo drani tarmi kei lo nixli cu cnici fenso dy .i pa mai lo dasri be lo carmi crino silka .i re mai lo dasri be lo manku crino .i ci mai lo dasri be lo ri'ojme crino .i ki'u bo la .oz. cu nelci lo nu zbasu lo vartisyboi poi skari lo vrici .i ditcu fa lo djedi be li ci lo nu fenso ro lo dasri .i ku'i ca lo nu mulno kei lo barda dakli be fi lo crino silka be'o poi mitre li za'u re no
ni'o ba bo la .oz. cu punji fi lo nenri sefta fe lo cinla gacri co snipa te zu'e lo nu no vacri cu ka'e pagre kei gi'e ba bo noisku lo se du'u lo vartisyboi cu bredi
ni'o «lu ku'i sarcu fa tu'a lo lanka poi ka'e se marce ke'a —sei .obu cusku— li'u» .i ja'e bo .obu minde lo sonci pe lo crino zbikre lo ka jbibei lo barda ke taxfu lanka noi .obu ke'a lasna lo loldi be lo vartisyboi lo so'i skori
ni'o ca lo nu lo ro mei cu bredi kei la .oz. cu benji fi lo ri prenu fe lo notci noi se du'u .obu ba vitke lo banli ke bruna te makfa poi xabju lo dilnu .i lo nuzba cu sutra preja pi ro lo tcadu .i je ro da klama te zu'e lo nu viska lo se manci jvinu
ni'o la .oz. cu minde fi lo nu lo vartisyboi cu se barbei fi lo crane be la noldi'u .i je lo prenu cu kucli mutce catlu vy .i la tinci mudypre pu katna cupra lo barda derxi be lo mudri .i je ca ku ty my zbasu lo fagri my .i je bo la .oz. cu jgari lo dziraipau be lo vartisyboi fau lo nu gapru lo fagri kei te zu'e lo nu lo glare gapci poi ra'i galze'a cu se kavbu fi lo silka dakli .i lo vartisyboi cu zenba lo ka plana kei gi'e galze'a fa'a lo vacri kei co'u lo nu ro mai lo lanka ku po'o cpana lo loldi li'u»
ni'o ba bo la .oz. cu nerbi'o lo lanka gi'e cusku fi lo ro prenu se pi'o lo cladu voksa:
ni'o «lu mi ca cliva te zu'e lo nu vitke .i ca lo nu mi nalzva kei la cpitepygau cu turni do .i mi do minde lo ka tinbe fi cy du'i lo nu do no'a fi mi li'u»
ni'o ca la'e di'u lo vartisyboi cu carmi lacpu lo skori poi te jorne vy lo loldi .i ri'a bo lo vacri poi nenci cu glare .i je la'e di'u rinka lo nu lo vartisyboi cu mutce lo ka mleca lo bartu vacri lo ka linto kei ja'e lo nu carmi lacpu te zu'e lo nu galze'a fa'a lo tsani
ni'o «lu ko ti klama doi .dorotis. —sei la te makfa cu krixa— .i ko sutra .i se va'o nai bo lo vartisyboi cu to'o vofli li'u»
ni'o «lu mi na kakne lo ka tolcri la .totos. su'o da —sei la .dorotis. ku noi na djica lo nu cliva lo ri cmalu gerku cu spuda— li'u» .i la .totos. pu bajra se ka'a lo midju be lo remgunma te zu'e lo nu gercmo fa'a lo citno mlatu .i je ro mai la .dorotis. cu tolcri ty .i dy lafti ty gi'e bajra fa'a lo vartisyboi
ni'o dy zvati ki vy vi lo nu so'u roi stapa .i je la .oz. cu tengau lo xance te zu'e lo nu sidju dy lo ka nerkla lo lanka .i ca bo —sei .krak.— lo skori cu porpi .i je lo vartisyboi cu galze'a fa'a lo vacri se cau la .dorotis.
ni'o «lu ko xruti —sei dy krixa— .i mi ji'a djica lo nu mi klama li'u»
ni'o «lu mi na kakne lo ka xruti doi dirba —sei la .oz. ne'i lo lanka cu lausku— .i co'o li'u»
ni'o «lu co'o —sei ro da krixa— li'u» .i ro lo kanla cu se farna lo gapru poi nu la te makfa cu se marce lo lanka fau lo nu zenba ca ro mokca lo ka galtu lo tsani
ni'o la'e di'u nu lo ro da ro re'u viska la .oz. ku no'u la se manci te makfa .i ku'i cumki fa lo nu ri snura tolyli'a la .oma'as. gi'e nau zvati ri .i ku'i lo prenu cu prami morji fi la .oz. gi'e simxu lo ka cusku:
ni'o «lu la .oz. pu ro roi pendo mi'o .i ri ca lo nu zvati cu zbasu se va'u ma'a lo vi melbi pe la ri'ojme tcadu .i je nau ku .obu nalzva gi'e pu gasnu lo nu la prije cpitepygau cu kansa ma'a li'u»
ni'o ku'i ze'a lo djedi be li so'i lo ro da cu badri lo nu cirko la se manci te makfa kei gi'e na kufra
## ni'o ni'o pa bi mo'o to'o mo'i ne'u
ni'o la .dorotis. cu badri lo nu fanmo fa lo nu dy cu pacna lo nu xruti la .kanzas .i ku'i dy ca lo nu pensi ro la'e di'u cu gleki lo nu pu na galze'a ne'i lo vartisyboi .i je ji'a dy badri lo nu ba'o cirko la .oz .i je si'a lo kansa be dy cu go'i
ni'o la tinci mudypre cu jbibi'o dy gi'e cusku:
ni'o «lu je'u mi ga nai fliba lo nu badri tu'a lo nanmu poi dunda lo mi melbi risna mi gi maltolckire .i .ai mi ze'i klaku fi lo nu la .oz. cu canci .i .e'o do xendo vimcu lo mi se klaku te zu'e lo nu mi na furtirse binxo li'u»
ni'o «lu .au —sei dy spuda— li'u» .i ba zi bevri lo bukpu .i ba bo la tinci mudypre cu klaku ze'a lo mentu be li so'o .i je la .dorotis. cu ralci catlu lo se klaku gi'e vimcu ky se pi'o lo bupku .i my ca lo nu ba'o mo'u co'e cu xendo kirsku dy gi'e mulno sabji lo ctile lo sevzi se pi'o lo jmeseljai ctile bo lante te zu'e lo nu rivbi lo nabmi
ni'o la cpitepygau ca turni la ri'ojme tcadu .i je lo prenu to'e ki'u nai lo nu cy na te makfa cu sinma cy .i «lu ki'u bo —sei py cusku— bu'u lo mulno munje cu zasti fa no drata tcadu poi se turni lo terse'a nanmu li'u» .i je py du'o py cu drani jinvi
ni'o ca lo cerni be ba lo nu lo vartisyboi joi la .oz. cu galze'a zo'u lo vo litru cu pensi'u la nolstizu kumfa gi'e casnu lo cuntu .i la cpitepygau cu zutse lo barda nolstizu .i je lo drata cu sinma sanli ca'u cy
ni'o «lu mi'o na mutce lo ka se malfu'a —sei lo cnino turni cu cusku— .i ki'u bo lo vi badydi'u .e la ri'ojme tcadu mi'o se ponse .i je mi'o zifre lo nu zukte lo se djica .i mi ca lo nu morji lo du'u mi pu za lo cmalu cu gapru lo grana bu'u lo zmufoi pe lo te cange .e lo du'u mi ca turni lo vi melbi tcadu cu mutce lo ka se mansa lo me mi moi li'u»
ni'o «lu mi ji'a —sei la tinci mudypre cu cusku— cu se pluka zei mutce tu'a lo mi cnino risna .i je'u ri po'o je no drata pe lo mulno munje pu se djica mi li'u»
ni'o «lu mi zo'u: gleki lo nu djuno lo du'u virnu dunli ro lo danlu poi pu jmive ku'o gi jo nai virnu zmadu —sei la cinfo cu cumla cusku— li'u»
ni'o «lu mi'o va'o lo nu la .dorotis. cu da'i gleki lo nu xabju la ri'ojme tcadu —sei cpitepygau cu di'a co'e— cu kansi'u lo nu gleki li'u»
ni'o «lu ku'i mi na djica lo nu vi xabju —sei la .dorotis. cu krixa— .i mi djica lo nu klama la .kanzas. gi'e xabju fi'o kansa la fetfamti .em. .e la nakfamti .xenris. li'u»
ni'o «lu va'o ku ma ka'e se zukte —sei la mudypre cu facki zukte retsku— li'u»
ni'o la cpitepygau cu jdice lo nu pensi .i je cy cu tai carmi pensi ja'e lo nu lo pijne .e lo jesni cu co'a barbi'o lo besna .i ro mai cy cusku
ni'o «lu mu'i ma na klacpe la selna'i smani gi'e cpedu lo ka bevri do ga'u lo kutytu'a li'u»
ni'o «lu ue mi no roi pensi la'e di'u —sei la .dorotis. cu gleki cusku— .i prane sidbo .i mi ba zi klama gi'e cpacu la solji mapku li'u»
ni'o dy ca lo nu bevri my la nolstizu kumfa cu cusku lo makfa valsi .i je ba zi bo lo bende be la selna'i smani cu voikla pa'o lo kalri canko gi'e sanli ne'a dy
ni'o «lu do mi'a ca re re'u klacpe —sei la smani noltru fau lo nu krobi'o ca'u lo cmalu nixli cu cusku— .i do ma djica li'u»
ni'o «lu mi djica lo nu do mi vofli bevri la .kanzas. —sei la .dorotis. cu cusku— li'u»
ni'o ku'i la smani noltru cu stedu sligau
ni'o «lu na cumki —sei cusku— .i mi'a ckini lo vi gugde ku po'o gi'e na ka'e cliva gy .i no roi zvati fa su'o la selna'i smani la .kanzas .i je ru'a ba no roi co'e .i ki'u bo sy boi ky na drazva .i da'i mi'a gleki lo nu sidju do ta'i ro lo mi'a selka'e .i ku'i mi'a na ka'e pagre lo kutytu'a .i co'o li'u»
ni'o .e la smani noltru fau lo nu za'u re'u krobi'o cu tolplo lo nalci gi'e to'o voikla pa'o lo canko fau lo nu pi ro lo bende cu jersi
ni'o ni'o la .dorotis. cu bredi lo nu selpa'aspocni klaku .i «lu mi ba'o xaksu lo makfa pe solji mapku —sei dy cusku— .i ki'u bo la selna'i smani mi na ka'e sidju li'u»
ni'o «lu ju'o uu xlali mutce —sei la mudypre ku noi ranti se risna cu cusku— li'u»
ni'o la cpitepygau cu za'u re'u pensi .i je lo ri stedu cu binxo lo tai se punli ja'e lo nu la .dorotis. cu terpa lo nu sy cu spoja
ni'o «lu .e'u mi'o klacpe lo sonci pe lo crino gaskre —sei cy cusku— gi'e stidi cpedu li'u»
ni'o ja'e bo lo sonci cu se klacpe gi'e toldarsi nerkla la nolstizu kumfa ki'u lo nu sy ze'a lo nu la .oz. cu jmive cu no roi jai se curmi fai lo ka klama lo darmau be lo vorme
ni'o «lu lo vi cmalu nixli —sei la cpitepygau fi lo sonci cu cusku— cu djica lo nu pagre lo kutytu'a .i ny ta'i ma ka'e co'e li'u»
ni'o «lu mi na ka'e djuno —sei lo sonci cu cusku— .i ki'u bo no da su'o roi pagre lo kutytu'a .i va'o bo da'i na ku la .oz. cu go'i li'u»
«lu xu no da mi'a ka'e sidju —sei la .dorotis. cu junri te preti— li'u»
ni'o «lu ju'o cu'i la .glindas. cu go'i —sei lo sonci cu stidi— li'u»
ni'o «lu la .glindas. cu me ma —sei la cpitepygau cu retsku— li'u»
ni'o la termafyfe'i pe la snanu .i gy vlirai lo ro termafyfe'i gi'e turni la vonpre .i ji'a lo badydi'u pe gy cu se stuzi lo korbi be lo kutytu'a .i se ki'u bo ju'o cu'i gy djuno lo du'u ma kau tadji lo nu pagre ky li'u»
ni'o «lu la .glindas. cu vrude termafyfe'i vau ie pei —sei lo verba cu retsku— li'u»
ni'o «lu la vonpre cu jinvi lo du'u xamgu —sei lo sonci cu cusku— .i je gy cu xendo ro da .i ti'e la .glindas. cu melbi ninmu gi'e snada lo ka citno stodi kei to'e ri'a nai lo nanca be li so'i be'o poi nu gy jmive li'u»
ni'o «lu ta'i ma mi ka'e klama lo badydi'u pe gy —sei la .dorotis. cu retsku— li'u»
ni'o lo dargu cu sirji fi la snanu —sei lo sonci cu spuda— .i ku'i ti'e dy tolcau lo so'i ckape be lo litru .i zvati lo ricfoi fa lo cilce danlu .e lo lanzu be lo cizra prenu poi na djica lo nu lo fange cu pagre lo ra gugde .i ki'u ku no la vonpre cu su'o roi klama la ri'ojme tcadu li'u»
ni'o lo sonci ba cliva lo drata .i je la cpitepygau cu cusku:
ni'o «lu si'au to'e ki'u nai lo ckape lo xagrai poi la .dorotis. ke'a ka'e zukte cu nu litru klama la snanu gugde gi'e cpedu fi la .glindas. fe lo nu sidju dy .i ki'u bo li'a la .dorotis. va'o lo nu stali ti cu no roi xruti la .kanzas. li'u»
ni'o «lu ju'o do pu za'u re'u pensi —sei la tinci mudypre cu te notci— li'u»
ni'o «lu go'i —sei la cpitepygau cu cusku— li'u»
ni'o «lu .ai mi klakansa la .dorotis. —sei la cinfo cu xusra— .i mu'i bo mi tatpi tu'a lo do tcadu gi'e djicai tu'a lo ricfoi .e lo numra .i je'u mi cilce danlu du'o do .i ji'a la .dorotis. cu nitcu da poi bandu dy li'u»
ni'o «lu jetnu —sei la mudypre cu tugni— .i lo mi ka'amru cu ju'o cu'i sidju dy .i se ki'u bo mi ji'a ba kansa dy lo ka klama la gugde be la snanu li'u»
ni'o «lu .ei ca ma mi'o tolsti —sei la cpitepygau cu retsku— li'u»
ni'o «lu ue xu do klama —sei lo drata cu retsku be fau lo nu ri se spaji— li'u»
ni'o «lu ju'o .i ga nai lo nu da'i la .dorotis. pu na co'e gi lo nu mi se besna cu ze'e ba na fasnu .i dy mi pu lafyvi'u lo grana pe lo gurni foldi gi'e gidva mi la ri'ojme tcadu .i ja'o ro lo mi zanfu'a cu se gasnu dy .i je .ai mi co'u lo nu dy cu co'a xruti la .kanzas. cu se va'u no roi cliva dy li'u»
ni'o «lu ki'e do —sei la .dorotis. cu ckire cusku— .i ro do mutce lo ka xendo mi .i ku'i .au mi tolsti ca lo cumki traji be lo ka clira li'u»
ni'o «lu .ei mi'o klama co'a lo bavlamdei cerni —sei la cpitepygau cu spuda— .i .e'e mi'o ca brebi'o .i ki'u bo ba clani nunli'u li'u»
## ni'o ni'o pa so mo'o se gunta la damba tricu
ni'o ca lo bavla'i cerni la .dorotis. cu tolrinsa cinba lo melbi ke crino nixli .i je lo ro da jo'u lo sonci pe lo crino zbikre cu desysimgau lo xance noi pu klakansa fe'e co'u lo balvrogai .i ca lo nu la badypre be la vrogai cu viska lo gunma cu mutce lo ka se spaji lo nu ri ka'e cliva lo melbi tcadu te zu'e lo nu za'u re'u raktu lifri .i ku'i by ba zi toltelgau lo vistci noi by ke'a xrugau setca lo crino tanxe ku'o gi'e cusku lo so'i xendo valsi pe te zu'e tu'a lo nunli'u
ni'o «lu do mi'a ca turni —sei by fi la cpitepygau cu cusku— .i se ki'u bo do nitcu lo nu xruti mi'a se rai lo kamsutra li'u»
ni'o «lu .ai mi ba xruti va'o lo nu kakne —sei la cpitepygau cu spuda— .i ku'i .ei pa mai mi sidju la .dorotis. lo nu xruti lo zdani li'u»
ni'o la .dorotis. ca lo nu ro re'u tolrinsa lo xendo badypre cu cusku:
ni'o «lu mi pu se xendo mutce bu'u lo do kukte tcadu .i je ro prenu mi pu xendo .i mi na ka'e cusku lo se du'u ma kau ni mi do ckire li'u»
ni'o «lu ko na troci doi dirba —sei by spusku— .i da'i mi'a gleki lo nu do mi'a stali .i ku'i va'o lo nu do djica lo nu xruti la .kanzas. kei mi pacna lo nu do snada li'u» .i ba bo by cu kargau lo bravro pe lo bartu bitmu .i je lo bende cu cadzu pagre gi'e co'a litru
ni'o lo solri cu carmi te gusni ca lo nu lo mi'a pendo cu selfargau lo ri flira la gugde pe la snanu .i ro boi py mutce lo ka gleki gi'e pa'acni gi'e kansi'u lo ka cmila kei gi'e tavysi'u .i la .dorotis. cu za'u re'u mulno lo ka pacna lo nu xruti lo zdani .i je la cpitepygau .e la tinci mudypre cu gleki lo ka plixau dy .i la cinfo zo'u: cy sumne lo vifne vacri se kai lo ka se kukte kei gi'e muvgau lo rebla lo pa mlana lo drata ri'a lo nu mulno gleki lo nu di'a zvati lo nurma .i ca bo la .totos. cu bajra ru'u lo drata gi'e jersi lo ctetoldi .e lo todma'u fau lo nu ru'i gleki gercmo
ni'o «lu lo tcadu nunji'e mi na sai mapti —sei la cinfo fau lo nu lo ro da cu cadzu sutra cu te notci— .i mi pu cirko lo barda rectu bo klani co'a lo nu mi xabju ty .i je nau ku mi djica lo ka jarco fi lo drata danlu fe lo ni mi ba'o virnu zenba li'u»
ni'o ca ku lo litru cu carna gi'e ro re'u catlu la ri'ojme tcadu .i viska fe po'o lo gunma be lo slanydi'u be ti'a lo crino bitmu be'o be'o .e lo darno galmau be lo ro da be'o po'u lo slanydi'u jipno .e lo boldi'u vu'o pe la noldi'u pe la .oz.
ni'o «lu ja'o la .oz. pu na tai xlali te makfa —sei la tinci mudypre fau lo nu ganse lo nu lo ri rinsa ne'i lo cutne cu ru'u muvdu cu cusku— li'u»
ni'o «lu .obu pu djuno lo du'u ta'i ma kau dunda lo besna mi .i je ji'a xamgu mutce besna —sei la cpitepygau cu cusku— li'u»
ni'o «lu la .oz. va'o lo nu da'i pu pinxe pi su'o lo mintu kamvirnu poi pu dunda fi mi —sei la cinfo cu jmina cusku— cu virnu mutce nanmu li'u»
ni'o la .dorotis. cu cusku no da .i la .oz. pu na gasnu lo ri se nupre be fi dy .i ku'i .obu pu troci se kai lo xagrai selka'e .i se ki'u bo dy boi .obu fraxu .i cu'u .obu ji'a .obu xamgu nanmu gi'u xlali te makfa
ni'o lo nunli'u pe lo pa moi be lo djedi cu nu pagre lo crino foldi .e lo carmi xrula vu'o poi sruri la ri'ojme tcadu .i lo litru cu sipna fi'o se cpana lo srasu fau lo nu no drata be lo tarci cu gapru .i je ja'a xamgu surla
ni'o ca lo cerni ly litru co'u lo nu tolyli'a lo rotsu ricfoi .i na cumki fa lo nu srukla ry .i ki'u bo ry. simlu lo ka kuspe fa'a lo pritu je zo zunle lo jai ve'a ka'e viska .i ji'a ly na darsi lo ka cenba lo ka litru klama fa'a ma kau .i ki'u bo terpa lo ka farcri .i ja'e bo sisku lo stuzi poi da'i bu'u ke'a filrai fa lo ka nerkla lo ricfoi
ni'o la cpitepygau ku noi lidne cu ro moi tolcri lo barda tricu poi se jimca lo tai ganra preja ja'e lo nu lo bende ka'e cnita pagre .i se mu'i bo cy cu cadzu fa'a lo tricu .i ku'i ca sai lo nu binxo lo cnita be lo pa moi be lo jimca kei jy fa'a ni'a krobi'o gi'e skori simsa sruri cy .i je ba zi bo cy cu lafti se vimcu fi lo loldi gi'e se renro fa'a lo litru kansa
ni'o la'e di'u na crori'a la cpitepygau .i ku'i spaji cy .i je cy cu simlu lo ka laxselfi'u tcemli kei ca lo nu la .dorotis. cy lafti
ni'o «lu vi drata canlu fa lo jbini be lo tricu —sei la cinfo cu jungau— li'u»
ni'o «lu ko curmi lo nu mi troci pa moi —sei la cpitepygau cu cusku— .i mu'i bo mi na se crori'a lo nu se renro li'u» .i cy klama lo drata tricu ca lo nu tavla .i ku'i lo jimca cu ba zi sai jairbi'o cy gi'e renro cy lo pu se zvati
ni'o «lu cizra —sei la .dorotis. cu basna cusku— .i .ei mi'o ma zukte li'u»
ni'o «lu lo tricu cu simlu lo ka ba'o jdice lo ka damba mi'o gi'e tolcfagau lo mi'o nunli'u —sei la cinfo cu te notci— li'u»
ni'o «lu ia mi ji'a ba troci —sei la mudypre fau lo nu janco punji lo ri ka'amru cu cusku— li'u» .i my cadzu lo pa moi be lo tricu be'o noi ke'a pu tai jursa tarti tu'a la cpitepygau .i ca lo nu lo pa barda jimca cu cnita krobi'o te zu'e lo nu jgari my kei la mudypre cu vlile ke ka'amru darxi jy tai lo jalge be lo nu katna fi lo re spisa .i ba zi sai bo lo tricu cu co'a desygau lo ri ro jimca tai lo nu da'i cortu .i je la tinci mudypre cu snura pagre lo cnita be ty
ni'o «lu .e'e sai —sei my fa'a lo drata cu krixa— .i ko sutra li'u» .i lo ro da fa'a ca'u bajra gi'e pagre lo cnita be lo tricu fau lo nu se xrani fa no da po'u na'e la .totos. ku noi se kavbu lo cmalu jimca gi'e se desygau ja'e lo nu gerki'a .i ku'i la mudypre cu ba zi katna vimcu lo jimca gi'e zifygau lo cmalu gerku
ni'o lo drata tricu pe lo ricfoi na zukte fi lo nu zunti .i ja'e bo co'a jinvi lo du'u lo po'o pa moi be lo lijgri be lo tricu cu kakne lo ka krogau lo ri jimca kei .e lo du'u lo bi'u nai tricu cu pulji tu'a lo ricfoi gi'e pu se manci vlipa jai se gasnu te zu'e lo nu gasnu lo nu no fange cu nerkla lo ricfoi
ni'o lo vo litru cu frili cadzu pagre lo tricu co'u lo nu tolyli'a lo darno korbi be lo ricfoi .i ba ku sei spaji ly ca'u viska lo rajycla bitmu poi simlu lo ka marji lo blabi portcelanu .i xutla tai tu'a lo sefta be lo palta gi'e galmau lo ly. stedu
ni'o «lu .ei mi'o ma zukte ca ku —sei la .dorotis. cu retsku— li'u»
ni'o «lu mi ba zbasu lo rajyserti —sei la tinci mudypre cu cusku— .i ki'u bo ju'o mi'o nitcu lo nu ravyparkla lo bitmu li'u»
## ni'o ni'o re no mo'o lo kukte ke portcelanu gugde
ni'o ze'a lo nu la mudypre cu zbasu lo rajyserti lo mudri poi my ke'a tolcri lo ricfoi kei la .dorotis. cu vreta gi'e sipna .i ki'u bo se ta'inri'a lo ve'u nu cadzu .i la cinfo ku ji'a djine tarmi vreta binxo te zu'e lo nu sipna .i je la .totos. cu re'o vreta
ni'o la cpitepygau cu catlu la mudypre ze'a lo nu my cu gunka kei gi'e cusku:
ni'o «lu mi na ka'e facki ga lo krinu be lo nu lo vi bitmu cu vi zvati gi lo du'u ma kau te zbasu li'u»
ni'o «lu ko surgau lo do besna gi'e na xanka tu'a lo bitmu —sei la mudypre cu spuda— .i ma'a ca lo nu ba'o cpare lampagre by cu djuno lo du'u ma kau zvati lo ragve li'u»
ni'o ba za lo temci lo rajyserti cu mulno .i simlu lo ka juxre .i ku'i la tinci mudypre cu birti lo du'u by tsali gi'e sarji lo sarcu .i la cpitepygau cu cikygau la .dorotis. .e la cinfo .e la .totos. gi'e jungau fi lo du'u lo rajyserti cu mulno .i la cpitepygau cu pa moi lo cpare gi'e ku'i tai juxre ja'e lo nu la .dorotis. cu nitcu lo nu jibni jersi gi'e fanta lo nu cy cu farlu fi .i cy ca lo nu lo ri stedu cu binxo lo gapru be lo bitmu cu cusku «lu ue sai li'u»
ni'o «lu ko di'a klama —sei la .dorotis. cu cladu cusku— li'u»
ni'o ja'e bo la cpitepygau cu di'a gapyparkla gi'e tsebi'o lo gapru be lo bitmu .i je la .dorotis. cu gapygau lo ri stedu by gi'e krixa «lu ue sai li'u» du'i lo nu la cpitepygau pu no'a
ni'o ba bo la .totos. cu klama lo gapru gi'e ba zi sai bo co'a gercmo .i ku'i la .dorotis. cu gasnu lo nu ty cu smaji
ni'o la cinfo cu selyli'e fi lo parkla .i je la tinci mudypre cu ro moi .i ku'i ro lo re mei cu krixa «lu ue sai li'u» co'a lo nu catlu ga'u lo bitmu .i lo ro da ca lo nu zutse tai lo linji lo gapru be lo bitmu cu catlu lo cnita gi'e viska lo cizra se jvinu
ni'o ca'u ku lo barda se kuspe lo gugde cu se loldi da poi xutla je camgu'i je blabi dunli lo loldi be lo barda palta .i zvati fa so'i zdani poi mulno marji lo portcelanu gi'e zilcintypu'i lo camgusrai .i lo bi'u nai zdani cu mutce lo ka cmalu .i lo brarai cu na galmau lo xadmidju be la .dorotis. .i zvati fa ji'a lo melbi je cmalu cagdaidi'u noi lo portcelanu bitmu cu sruri .i je ru'u sanli fa lo so'i bakni .e lo so'i xirma .e lo so'i xarju .e lo so'i jipci vu'o noi ro ke'a marji lo portcelanu
ni'o ku'i cizrai lo ro mei fa lo prenu poi xabju lo vi cizra gugde .i zvati fa lo ladycpani'u .e lo lankujni'u vu'o noi dasni lo carmi skari nimcreka zi'e noi lo pasyskaci be ke'a cu mulno se gacri lo solji banra ku'o .e lo noltruti'u noi dasni lo meltcerai pastu pe lo rijno .e lo solji .e lo zirpu ku'o .e lo lanku'i poi dasni lo tupcidni palku poi sraji se sriba'a lo xunblabi .e lo pelxu .e lo blanu zi'e poi lo solji batke cu zvati lo ke'a cutci ku'o .e lo noltruti'u poi lo jemna nolmapku cu cpana lo stedu be ke'a zi'e poi dasni lo .ermine pastu .e lo xulbu'u torluznaukosta ku'o .e lo xajmi xampre pe lo se rufygau pastu zi'e poi lo cukla xunre cu barna lo ke'a molmla zi'e pe lo clani je konju mapku .i ji'a cizrai lo ro mei fa lo du'u ro lo bi'u nai prenu cu mulno marji lo portcelanu gi'e tai cmalu ja'e lo nu lo brarai be py cu na galmau lo tupcidni be la .dorotis.
ni'o lo litru ca lo cfari cu se catlu no da po'u na'e bo lo pa cmalu ke zirpu portcelanu gerku noi se stedu lo barda mutce zi'e noi klama lo bitmu gi'e gercmo fa'a ly se pi'o lo cmalu voksa gi'e ba bo to'o bajra
ni'o «lu .ei mi'o ta'i ma zvabi'o lo loldi —sei la .dorotis. cu retsu— li'u»
ni'o lo rajyserti cu dukse lo ka tilju kei lo nu lafti .i se ki'u bo la cpitepygau ri falcru fo lo bitmu .i je lo drata te zu'e lo nu lo jdari loldi na crogau lo jamfu be dy cu fa'a ni'a plipe lo gapru be cy .i li'a dy mutce lo ka kurji lo nu na plipe lo flira ja'e lo nu lo pijne cu tunta lo jamfu .i ca lo nu lo ro mei cu snura zvati lo loldi cu lafti la cpitepygau ku noi lo xadni be ke'a cu ba'o binxo lo ka pintce ku'o gi'e toljusyga'i lo sudysrasu pe cy lo draseltai
ni'o «lu mi'o nitcu lo ka pagre lo vi cizra stuzi kei lo ka klama lo ragve —sei la .dorotis. cu cusku— .i ki'u bo nalpijyzu'e da'i fa mi'o lo ka klama fa'a su'o na'e bo lo snanu li'u»
ni'o tolsti lo ka cadzu pa'o lo gugde be lo portcelanu prenu .i je pa moi lo se penmi fa lo portcelanu ladycpani'u noi ca'o ladycpa lo portcelanu bakni .i ca lo nu lo litru cu jbibi'o kei lo bakni cu suksa fa lo nu lo bakni cu tikpa gi'e tikpa falgau lo stizu .e lo baktu .e ji'a sai lo ladycpani'u .i je lo ro da farlu lo portcelanu loldi fau lo nu cladu savru
ni'o la .dorotis. cu selpajytce viska lo nu lo bakni ba'o porpi lo pa tuple kei .e lo nu lo baktu cu vreta gi'e se spisa so'i da kei .e lo nu lo uu ladycpani'u zo'u: lo zunle bircidni cu se fenra
ni'o «lu .oi sai —sei lo ladycpani'u cu fengu krixa— .i ko catlu lo se gasnu be do .i lo pa tuple be lo mi bakni pu porpi .i je mi nitcu lo ka klagi'a by lo me lo cikrypre moi ja'e lo nu ty se nipyjongau .i mu'i ma do klama ti gi'e tepygau lo mi bakni li'u»
ni'o «lu mi xenru mutce —sei la .dorotis. cu spuda— .i .e'o ko mi'a fraxu li'u»
ni'o ku'i lo melbi ladycpani'u cu dukse lo ka fengu kei lo ka spusku su'o da .i ly se fanza lafti lo tuple gi'e to'o klagi'a lo bakni fau lo nu lo uu danlu cu nadydzu fi lo tuple ci mei .i ca lo nu cliva lo litru kei lo ladycpani'u cu so'i roi ze'i jursa catlu ga'u lo tuple fa'a lo juxre fange fau lo nu stogau lo fenra bircidni lo ka jibni lo xadmlapau
ni'o la .dorotis. cu mutce lo ka badri lo vi malfu'a
ni'o «lu .ei mi'o vi mutce lo ka jundi —sei lo xendo me la mudypre cu cusku— .i se va'o nai bo cumki fa lo nu mi'o xrani lo vi melbi ke cmalu prenu ja'e lo nu ri ba no roi di'a kanro li'u»
ni'o bu'u lo darmau milxe la .dorotis. cu penmi lo melbi traji dasni ke citno noltruti'u noi klasti ca lo nu viska lo fange kei gi'e co'a to'o bajra
ni'o la .dorotis. cu djica lo ka zenba lo ka viska lo noltruti'u .i se mu'i bo dy bajra jersi .i ku'i lo portcelanu noltruti'u cu krixa:
ni'o «lu ko mi na jersi .i ko mi na jersi li'u»
ni'o ny tai terpa ke cmalu se voksa ja'e lo nu la .dorotis. cu klasti gi'e cusku «lu ki'u ma na ku li'u»
ni'o «lu ki'u —sei la noltruti'u cu spusku be fau lo nu ri ji'a klasti bu'u lo snura darno— lo nu mi va'o lo nu bajra cu ka'e farlu ja'e lo nu mi porpi li'u»
ni'o «lu ku'i xu do na ka'e se cikre —sei lo nixli cu retsku— li'u»
ni'o «lu ja'a go'i .i ku'i da ba lo nu se cikre cu no roi dunli fi lo ka melbi —sei la noltruti'u cu spusku— li'u»
ni'o «lu la'a jetnu —sei la .dorotis. cu cusku— li'u»
ni'o «lu ta me la xampre ku noi pa mei me lo mi'a xampre —sei lo portcelanu ninmu cu di'a co'e— zi'e noi ro roi troci lo ka sanli fi lo stedu .i ra pu tai so'i roi porpi ja'e lo nu pa no no mokca be ra cu se cikre .e lo nu na sai melbi .i va ku ra ca klama .i ja'o do ka'e zgana li'u»
ni'o je'u lo xedgei ke cmalu xampre cu ca'o cadzu fa'a ku .i je la .dorotis. cu viska lo nu to'e ki'u nai tu'a lo xy. melbi taxfu co xunre je pelxu je crino xy mulno se gacri lo fenra poi se farna ro da zi'e noi jarco lo du'u so'i mokca be xy pu se cikre
ni'o la xampre cu setca lo ri xance lo ra daski .i je ba lo nu baljygau lo molmla gi'e tolclite sedysa'orgau fa'a lo drata cu cusku
«lu
doi melbi melni'u
.i do catlu ki'u
ma la xampre uu
.i do tinsa carmi
gi'e sirji se tarmi
tai lo nu pu citka lo grana ku
li'u»
ni'o «lu ko smaji —sei la noltruti'u cu cusku— .i xu do na djuno lo du'u ti fange gi'e .ei se fartra fi lo ka sinma li'u»
ni'o «lu —sei la xampre cu xusra— li'u» .i je xy ba zi sanli fi lo stedu
ni'o «lu ko na se fanza la xampre —sei la noltruti'u fi la .dorotis. cu cusku— .i lo ri stedu cu se fenra so'i da .i ja'e bo xy bebna li'u»
ni'o «lu mi na sai se fanza —sei la .dorotis. cu cusku— .i ku'i do tai melbi —sei dy di'a co'e— ja'e lo nu mi birti lo du'u da'i mi kakne lo ka dirba prami do .i je'a pei mi xruti bevri do la .kanzas. gi'e punji do lo fagzda kajna pe la fetfamti .em. .i mi ka'e bevri do fau lo nu do nenri lo mi lanka li'u»
ni'o «lu da'i la'e di'u se jalge lo nu mi mutce lo ka tolgleki —sei la portcelanu noltruti'u cu spusku— .i sa'u nai vi ku bu'u lo mi'a gugde mi'a jmive co gleki gi'e ka'e ge tavla gi muvdu vau tai lo se nelci be mi'a .i ku'i ro da poi me mi'a zo'u: ca ro nu da se bevri fi lo darno kei lo da cidni cu tinsa binxo ja'e lo nu ro pa mei lo se kakne be da fa lo ka sirji sanli gi jo'u melbi se jvinu .i li'a lo nu mi'a ri ckaji cu ro pa mei lo jai se kanpe be fai lo ka mi'a zukte ca lo nu mi'a cpana lo fagzda kajna fa'u lo kajnyvroni'e fa'u lo xa'urku'a jubme .i ku'i lo mi'a nunji'e be bu'u lo vi gugde be mi'a cu mutce lo ka pukmau
ni'o «lu da'i mi va'o ji'a sai lo nu mi zildu'a lo mulno munje cu na zukte fi lo nu do tolgleki —sei la .dorotis.— .i se ki'u bo mi ba cusku zo co'o li'u»
ni'o «lu co'o —sei la noltruti'u cu spuda— li'u»
ni'o lo litru cu jundi cadzu pa'o lo portcelanu gugde .i lo cmalu danlu je ro lo prenu cu toljmaji lo ly. ve klama fau lo nu terpa lo nu lo fange cu popygau vo'a .i je ba za lo cacra be li ji'i pa lo litru cu tolyli'a lo drata fanmo gi'e tolyli'a lo drata portcelanu bitmu
ni'o by mleca ku'i lo pa moi lo ka galtu .i je ta'i lo nu sanli lo trixe be la cinfo kei lo ro da snada lo ka juxre klama lo galraipau .i ba bo la cinfo cu jajgau lo ri tuple gi'e plipe lo gapru be lo bitmu .i ku'i ca sai lo nu plipe kei lo rebla be cy cu catke lo portcelanu malsi ja'e lo nu porpi lo so'i spisa
ni'o «lu ui nai —sei la .dorotis. cu cusku— .i ku'i je'u pe'i zanfu'a mi'o fa lo nu mi'a xrani lo vi cmalu prenu no drata be lo ka popygau pa bakni tuple je pa malsi .i ro boi py tai filpo'i li'u»
ni'o «lu ja'a go'i —sei la cpitepygau cu cusku— .i je mi ckire fi lo nu mi marji lo sudysrasu gi'e na ka'e frili selxai .i zasti fa lo xlamau be lo nu cpitepygau li'u»
## ni'o ni'o re pa mo'o la cinfo cu binxo lo noltru be lo danlu
ni'o ba lo nu cnita cpare lo portcelanu bitmu kei lo litru cu zvati lo tolpluka gugde ne lo so'i cimtu'a zi'e noi se gacri lo clani je mabla srasu .i nandu fa lo nu cadzu se cau lo nu farlu lo cimde'u kevna .i ri'a bo lo srasu cu tai rotsu ja'e lo nu ky na ka'e se viska .i ku'i ta'i lo nu ralci cuxna lo ve klama cu snura cadzu co'u lo nu tolcliva lo sligu loldi .i ku'i bu'u ku lo gugde cu simlu lo ka cilce traji .i je ba lo clani je ta'inri'a nu cadzu pa'o lo demspa cu nerkla lo drata ricfoi noi lo tricu pe ke'a cu bramau je tolcitmau lo ro ba'o se viska
ni'o «lu lo vi ricfoi cu prane lo ka kukte —sei la cinfo cu xusra be fau lo nu gleki catlu lo sruri— .i mi no roi viska lo melbi zmadu stuzi li'u»
ni'o «lu si'au ta drimanku —sei la cpitepygau cu cusku— li'u»
ni'o «lu na sai go'i — sei la cinfo cu spuda— .i da'i mi djica lo nu xabju ti ze'a lo nu nunji'e .i ko ganse lo du'u ma kau ni lo ba'o sudbi'o pezli pe ni'a lo do jamfu cu ranti .e lo du'u ma kau ni ricfu je crino fa lo clika be fi lo vi tolci'o tricu .i ju'o no cilce danlu ka'e djica tu'a lo pukmau zdani li'u»
ni'o «lu ju'o cu'i lo cilce danlu ca zvati lo ricfoi —sei la .dorotis. cu cusku— li'u»
ni'o «lu ru'a go'i —sei la cinfo cu spuda— .i ku'i mi vi na viska su'o boi cy dy li'u»
ni'o lo gunma cu cadzu pagre lo ricfoi co'u lo nu ry cu manku dukse fi lo nu za'o cadzu .i la .dorotis. .e la .totos. .e la cinfo cu vrebi'o gi'e sipna ze'a lo nu la mudypre jo'u la cpitepygau cu zgana jundi tai lo fadni
ni'o ca lo nu cerni binxo cu di'a litru .i pu lo nu ba'o ve'u cadzu cu tirna lo dizlo selcmo be lo so'i cilce danlu .i la .totos. cu tepcmo milxe .i ku'i no lo drata cu terpa .i je ca'o klama fo lo xamgu se cadzu pluta co'u lo nu tolcliva lo tricu kalri noi lo su'o ki'o danlu pe lo ro tarmi ke'a jmaji .i zvati fa lo tirxu .e lo xanto .e lo cribe .e lo labno .e lo lorxu .e lo ro drata pe lo mivmu'e .i je ze'i lo mokca la .dorotis. cu terpa .i ku'i la cinfo cu ciksi lo nu lo danlu cu ca'o pensi'u gi'e casnu .i je cy fo lo selcmo fa'u sance cu djuno lo du'u dy se raktu lo barda
ni'o ca lo nu cy cu tavla kei so'o lo danlu cy co'a viska .i je suska fa lo nu lo barda casnu bo girzu cu smaji binxo tai lo nu lo makfa cu se pilno .i lo brarai be lo tirxu cu jbikla la cinfo gi'e cusku fau lo nu krobi'o:
ni'o «lu fi'o doi io noltru be lo danlu .i do klama ca lo mapti be lo nu damba lo mi'a bradi gi'e gasnu lo nu lo ro danlu pe lo ricfoi cu di'a panpi simxu li'u»
ni'o «lu ma do'o raktu —sei la cinfo cu smaji milxe cusku— li'u»
ni'o «lu ro mi'a se ckapa —sei lo tirxu cu spusku— tu'a lo vlile bradi poi pu za klama lo vi ricfoi .i barda carmi cizda'u .i simsa lo barda jukni poi se xadni da poi bradu'i lo xanto ku'o gi'e se tuple da poi cladu'i lo tricu stani .i se tuple lo bi tai clani tuple .i je fau lo nu cpare pagre lo ricfoi cu co'a jgari lo danlu lo pa tuple gi'e lacpu dy fa'a lo moklu noi bu'u ke'a cu citka dy tai lo nu lo jukni cu citka lo sfani .i na ku su'o mi'a snura .i ze'a bo lo bi'u nai vlipa danlu cu jmive .i je mi'a pu jmaji lo nuncasnu te zu'e lo nu jdice lo du'u mi'a mi'a ta'i ma kau kurji .i ca bo do mi'a jbikla li'u»
ni'o la cinfo cu ze'i pensi
ni'o «lu xu su'o drata cinfo cu zvati lo vi ricfoi —sei cy retsku— li'u»
ni'o «lu na go'i .i lo su'o cinfo pu zvati .i ku'i lo bi'u nai cizda'u ba'o citka ro boi cy .i ji'a no lo pu zvati cinfo cu jibni do lo kambra .a lo kamvirnu li'u»
ni'o «lu va'o lo nu mi selfamgau tu'a lo do bradi zo'u: xu do'o ba krobi'o fa'a mi gi'e tinbe fi mi poi noltru lo ricfoi —sei la cinfo cu te preti— li'u»
ni'o «lu mi'a ba gleki go'i —sei lo tirxu cu spuda— li'u» .i je lo ro drata danlu cu laucmo se pi'o lo tsali selcmo «lu .ai mi'a go'i li'u»
ni'o «lu lo do barda jukni ma zvati ca ku —sei la cinfo cu retsku— li'u»
ni'o «lu tu noi jbini lo cindu tricu —sei lo tirxu fau lo nu jarco se pi'o lo crane jamfu cu cusku— li'u»
ni'o «lu ko xamgu kurji lo vi pendo be mi —sei la cinfo cu cusku— .i se va'o bo mi ba zi klama gi'e damba lo cizda'u li'u»
ni'o la cinfo cu tolrinsa lo ri pendo gi'e jgira cadzu to'o te zu'e lo nu damba lo bradi
ni'o lo barda jukni cu sipna vreta ca lo nu la cinfo jy tolcri .i je jy se jvinu lo tai tolmelbi ja'e lo nu lo ra bradi cu gapru selfargau lo nazbi ri'a lo nu rigni .i lo tuple cu clani du'i lo se xusra be lo tirxu .i je lo xadni cu se gacri lo rufsu ke xekri kerfa .i se moklu lo barda pe lo kinli denci poi cladu'i lo remna jamfu .i ku'i lo stedu cu jorne lo plana xadni lo cnebo poi cinla dunli lo bifce xadmidju .i la'e di'u gasnu lo nu la cinfo cu te sidbo lo du'u ma kau xagrai lo tadji be lo nu gunta lo danlu .i ki'u bo djuno lo du'u lo nu damba dy ca lo nu sipna cu filmau lo nu co'e ca lo nu cikna .i la cinfo cu barda plipe gi'e prane cpanybi'o lo trixe be lo cizda'u .i ba bo la cinfo fau lo nu pa roi darxi fi lo ri tilju jamfu fi'o xarci lo kinli jgalu cu ka'arvi'u lo stedu be lo jukni lo xadni .i cy fi plipe gi'e catlu jy co'u lo nu lo clani tuple cu co'u desku noi ca ke'a cy djuno lo du'u jy morsi mulno
ni'o la cinfo cu xruti lo rickalri noi lo danlu pe lo ricfoi cu denpa cy bu'u ke'a cu jgira cusku:
ni'o «lu do na za'o nitcu lo nu terpa tu'a lo do bradi li'u»
ni'o ba bo lo danlu cu krobi'o fa'a la cinfo ku poi noltru dy .i je cy cu nupre lo nu ba xruti gi'e turni vau ca lo nu la .dorotis. cu snura klama la .kanzas.
## ni'o ni'o re re mo'o lo gugde be la vonpre
ni'o lo vo litru cu pagre lo ve vimcu ricfoi fau lo nu snura .i je ly ca lo nu barbi'o lo manku cu ca'u viska lo nitsalpo cmana noi se gacri fe'e co'a lo galraipau fe'e co'u lo dziraipau lo barda ke rokci spisa
ni'o «lu ba nandu nu cpare —sei la cpitepygau cu cusku— .i ku'i mi'o nitcu lo nu zvabi'o lo ragve be lo cmana kei to'e ki'u nai li'u»
ni'o cy klama gidva .i je lo drata cu jersi .i xai tolcliva zei jibni lo pa moi be lo rokci ca lo nu tirna lo nu lo rufsu voksa cu krixa «lu ko klasti li'u»
ni'o «lu do me ma —sei la cpitepygau cu retsku— li'u»
ni'o ba bo lo stedu cu co'a dzaselji'u ga'u lo rokci .i je lo voksa cu cusku «lu lo vi cmana mi'a se ponse .i je mi'a na curmi lo nu da pagre cy li'u»
ni'o «lu ku'i mi'a pagre nitcu —sei la cpitepygau cu cusku— .i mi'a klama lo gugde be la vonpre li'u»
ni'o «lu ku'i .e'a nai do go'i —sei lo voksa cu spusku— li'u» .i je va stapa klama fi lo trixe be lo rokci fa lo cizra traji prenu be te rai lo ro ba'o se viska be lo litru
ni'o py mutce lo ka tordu gi'e rotsu kei gi'e se stedu lo barda noi pinta bu'u lo galraipau gi'e se sarji lo rotsu cnebo poi se cinje so'i da .i ku'i py no sai da se birka .i je la cpitepygau ca lo nu viska la'e di'u cu na xanka lo nu lo tai nonseldju danlu cu ka'e fanta lo nu cpare lo cmana .i se ki'u bo cusku «lu mi xenru lo nu na zukte lo se djica be do .i ku'i mi'a nitcu lo nu gapru lampagre lo do cmana .i ju do gleki la'e di'u li'u» .i je la cpitepygau cu virnu cadzu fa'a ca'u
ni'o fi'o sutra dunli lo nu lindi kei lo stedu be lo prenu cu fa'a ca'u zilce'a .i je lo cnebo cu tcena co'u lo nu lo stedu galraipau noi pinta cu janli lo midju be la cpitepygau gi'e gasnu lo nu cy fau lo nu so'i roi gunro cu fa'a ni'a farlu re'o lo cmana .i fi'o na ru'e sutra dunli lo nu klama kei lo stedu cu xruti lo xadni .i je lo prenu cu jursa cmila gi'e cusku «lu na frili dunli lo do se kanpe li'u»
ni'o lo clatce ke cmila sance cu se krasi lo drata rokci .i je la .dorotis. cu viska lo nu lo su'o panono nonselbirka me la mruli stedu cu sanli lo cmana mlana (to ti'a ro rokci pa boi my sy cu sanli toi)
ni'o la cinfo cu binxo lo ka mutce lo ka fengu lo nu cmila lo nu la cpitepygau cu se xlali .i je fau lo nu cmoni lo cladu noi se mirsna lo lidvru simsa cu bajra fa'a lo gapru be lo cmana
ni'o za'u re'u ku lo stedu cu sutra lo ka zilce'a .i je la cinfo cu binxo lo ka fa'a ni'a gunro lo cmana tai lo nu se janli lo xacycelboi
ni'o la .dorotis. cu fa'a ni'a bajra gi'e sidju la cpitepygau lo nu sa'irbi'o .i je la cinfo ku noi cinmo lo ka se cagna nalmli cu jbibi'o dy gi'e cusku «lu no da prali fi lo nu damba lo prenu pe lo cecla stedu .i no prenu ka'e fapro li'u»
ni'o «lu .ei mi'o va'o mo —sei dy retsku— li'u»
ni'o «lu ko klacpe la selna'i smani —sei la tinci mudypre cu stidi— .i do za'o zifre lo nu za'u re'u minde sy li'u»
ni'o «lu .i'a —sei dy spuda— li'u» .i je fau lo nu dasybi'o la solska mapku cu bacru lo makfa valsi .i la smani cu sutra du'i lo prula'i .i je ba zi lo so'u mokca lo mulno bende cu sanli ca'u la .dorotis.
ni'o «lu do mi'a ma minde —sei la smani noltrunau fau lo nu dizlo krobi'o cu te preti— li'u»
ni'o «lu ko mi'a bevri ga'u lo cmana lo gugde be la vonpre —sei lo nixli cu spuda— li'u»
ni'o «lu .ai gasnu —sei la noltrunau cu cusku— li'u» .i je ba zi bo la selna'i smani cu kavbu lo vo litru .e la .totos. lo birka gi'e to'o bevri voikla .i ca lo nu pagre lo gapru be lo cmana kei la mruli stedu cu se fanza mutce krixa gi'e cecla lo stedu lo galtu vacri gi'e ku'i na ka'e tcena la selna'i smani ku noi snura bevri la .dorotis. .e lo ri pendo ga'u lo cmana gi'e punji fi lo loldi bu'u lo melbi gugde be la vonpre
ni'o «lu ca ro re'u ka'e klacpe mi'a —sei lo jatna fi la .dorotis. cu cusku— .i co'o do'u .a'o do se zanfu'a li'u»
ni'o «lu co'o do'u ki'e sai —sei lo nixli cu spuda— li'u» .i je la smani cu galze'a ne'i lo vacri gi'e ba zi bo co'u se viska
ni'o lo gugde be la vonpre cu simlu lo ka ricfu gi'e gleki stuzi .i zasti fa lo so'i foldi co ma'urbi'o gurni pe to'e se cau lo xamgu se sefta dargu poi jbini lo foldi ku'o .e lo melbi ke cinje cmari'e noi lo tsali ke'a cripu .i lo bitmu .e lo zdani .e lo cripu zo'u: lo ro ri se cintypu'i lo carmi xunre pa'a lo nu se cintypu'i nu'i ge lo pelxu bu'u lo gugde pe la .uinkis. nu'u gi lo blanu bu'u lo gugde pe la maxpre .i la vonpre ku noi tordu joi plana zi'e noi simlu lo ka xendo cu dasni lo xunre noi carmi frica lo crino srasu .e lo pelxu gurni
ni'o la smani pu punji fi lo jibni be lo cange zdani .i je lo vo litru cu cadzu klama zy gi'e darxi lo vorme .i vy se kargau lo speni be lo te cange .i je ca lo nu la .dorotis. cu cpedu lo ka te dunda lo cidja kei lo ninmu cu dunda fi lo ro da fe lo xamgu vacysai noi vasru lo ci titpesxu .e lo vo titnanba .e lo kabri be lo ladru bei se va'u la .totos.
ni'o «lu ma ni darno la badydi'u be la .glindas. —sei lo verba cu cusku— li'u»
ni'o «lu na darno mutce —sei lo speni be lo te cange cu spusku— .i ko litru lo dargu be la snanu .i se va'o bo do ba za tolcliva by li'u»
ni'o lo gunma fau lo nu kirsku lo xendo ninmu cu za'u re'u co'a litru gi'e cadzu re'o lo foldi gi'e pagre lo melbi cripu vau co'u lo nu ca'u viska lo melbi mutce badydi'u .i ca'u lo vrogai cu zvati fa lo ci citno nixli noi dasni lo melbi ke xunre taxfu noi se korbi lo solji dasri .i je ca lo nu la .dorotis. cu jbibi'o kei pa boi ny fi dy cu cusku
ni'o «lu mu'i ma do klama la snanu gugde li'u»
ni'o «lu lo nu penmi la vrude termafyfe'i ku noi vi turni —sei dy spusku— .i .e'o do mi ty cu klagi'a li'u»
ni'o «lu ko mi jungau lo du'u ma kau do cmene .i se va'o bo mi ba te preti fo la .glindas. fi lo se du'u xu kau gy ba randa lo nu do penmi li'u» .i lo ro da cu cmene jungau .i je lo nixli sonci cu klama lo nenri be la badydi'u .i ba za lo su'o mokca sy xruti gi'e cusku lo se du'u la .dorotis. .e lo drata cu jai se curmi fai lo ka ba zi penmi
## ni'o ni'o re ci mo'o la .glindas. no'u la vrude termafyfe'i cu curmi lo se djica be la .dorotis.
ni'o lo gunma pu lo nu klama la .glindas. cu se klagi'a fi pa lo kumfa be la badydi'u be'o noi bu'u ke'a la .dorotis. cu lumci lo ri flira gi'e kompli lo ra kerfa .i je la cinfo cu desyvi'u lo pulce lo ra ne'okre .i je la cpitepygau cu tamgau lo xagrai lo sevzi .i je la mudypre cu spali lo ri tinci gi'e sabji lo ctile lo ra te jorne
ni'o lo gunma ca lo nu ro vo'a ka'e xamgu se jarco cu jersi lo sonci nixli se ka'a lo barda kumfa noi bu'u ke'a la termafyfe'i .glindas. cu zutse lo zirxunjme nolstizu
ni'o gy ge melbi gi citno vau te ga'a lo ra kanla .i lo kerfa be gy cu ricfu xunre skari gi'e flecu djine farlu lo janco .i lo taxfu cu curve blabi .i ku'i lo kanla be gy cu blabi .i je gy cu xendo catlu lo cmalu nixli
ni'o «lu mi se va'u do ka'e mo doi pe mi verba —sei gy retsku— li'u»
ni'o la .dorotis. cu te lisri fi lo mulno la termafyfe'i .i lo nu lo vilcarbi'e cu bevri la .dorotis. lo gugde pe la .oz .i lo nu dy co'a se slabu lo ri kansa pendo .i lo se manci selfri be xai
ni'o «lu lo mi balrai se djica —sei dy jmina cusku— cu nu xruti la .kanzas .i mu'i bo la fetfamti .em. cu ju'o jinvi lo du'u lo xlali mi pu selfri .i je la'e di'u ba gasnu lo nu .ebu dribi'o .i je va'o lo nu na ku lo se crepu pe lo ca nanca cu xagmau lo me lo prula'i moi zo'u ju'o la nakfamti .xenris. cu na ka'e xamgu renvi li'u»
ni'o la .glindas. crasa'obi'o gi'e cinba lo titla je gapselfa'a flira be lo prami je cmalu nixli
ni'o «lu .e'o lo do xendo risna cu se zandapma —sei gy cusku— .i mi birti lo du'u mi do ka'e jungau lo du'u ma kau tadji lo nu xruti la .kanzas. li'u» .i je ba bo jmina cusku «lu .i ku'i do va'o lo nu do xruti cu bilga lo ka dunda la solji mapku mi li'u»
ni'o «lu .i'a sai —sei la .dorotis. cu cusku— .i je'u my mi na za'o plixau .i je do va'o lo nu ponse cu kakne lo ka minde la selna'i smani ci roi ku li'u»
ni'o «lu .i je pe'i mi ba nitcu lo my te selfu ci po'o roi —sei la .glindas. cu cisma spusku— li'u»
ni'o la .dorotis. cu ba dunda la solji mapku gy .i je la termafyfe'i cu cusku fi la cpitepygau fe «lu do ba mo ca lo nu la .dorotis. ma'a ba'o cliva li'u»
ni'o «lu mi ba xruti la ri'ojme tcadu —sei cy spuda— .i mu'i bo la .oz. pu gasnu lo nu mi turni .i je lo prenu mi nelci .i pa po'o da se xanka mi gi'e nu ta'i ma kau klama lo bancu be lo cmana be la mruli stedu li'u»
ni'o «lu .ai mi se pi'o la solji mapku cu minde la selna'i smani lo nu bevri do lo balvrogai pe la ri'ojme tcadu —sei la .glindas. cu cusku— .i ki'u bo da'i xlali fa lo nu caurgau lo prenu lo tai se manci turni li'u»
ni'o «lu xu mi ja'a zilmanci —sei la cpitepygau cu retsku— li'u»
ni'o «lu do tolfadni —sei la .gindas. cu spusku— li'u»
ni'o gy fau lo nu selfarbi'o la tinci mudypre cu retsku «lu do mo ca lo nu la .dorotis. cu cliva lo vi gugde li'u»
ni'o my sa'orsa'i re'o lo ri ka'amru gi'e ze'i pensi .i ba bo my cu cusku «lu la .uinkis. pu xendo zei mutce mi gi'e djica lo nu mi uy cu turni kei ba lo nu la palci termafyfe'i pu mrobi'o .i mi nelci la .uinkis .i je mi va'o lo nu ka'e xruti la stici gugde cu zmanei no da lo nu ze'e turni uy li'u»
ni'o «lu lo re moi be lo mi se cpedu be fi la selna'i smani —sei la .glindas. cu cusku— cu nu sy do snura bevri lo gugde be la .uinkis .i lo do besna cu brame'a da'i lo me la cpitepygau moi .i ku'i do carmi zmadu je'u cy (to ca lo nu do xamgu se spali toi) .i je mi birti lo du'u do ba prije je xamgu turni la .uinkis. li'u»
ni'o ba bo la termafyfe'i cu catlu lo barda je se kaskre cinfo gi'e retsku «lu ca lo nu la .dorotis. ba'o xruti lo ri zdani zo'u: do mo li'u»
ni'o «lu ti'a lo cmana pe la mruli stedu —sei la mudypre cu spusku— cu barda ke tolci'o ricfoi .i je ro lo danlu poi bu'u xabju cu jdice lo du'u mi vo'a noltru .i da'i mi va'o lo nu ka'e xruti lo bi'u nai ricfoi cu bu'u gleki mutce lifri lo mi nunji'e li'u»
ni'o «lu .ai lo ci moi be lo mi se cpedu be fi la selna'i smani —sei la .gindas. cu cusku— cu nu sy do bevri lo do ricfoi .i ba ku zo'u .ai mi ki'u lo nu ba'o xaksu lo makfa pe la solji mapku cu dunda my la smani noltru te zu'e lo nu ri jo'u lo ri bende cu ba ze'e zifre li'u»
ni'o la cpitepygau .e la tinci mudypre .e la cinfo cu ca stace kirsku la vrude termafyfe'i lo ri te xendo .i je la .dorotis. cu cusku:
ni'o «lu ju'o do xamgu du'i lo nu do melbi .i ku'i do mi na xa'o jungau lo du'u ta'i ma kau xruti la .kanzas. li'u»
ni'o «lu lo do rijno skari cutci do ba bevri ga'u lo kutytu'a —sei la .glindas. cu spusku— .i da'i do va'o lo nu pu djuno fi lo cy se vlipa cu ka'e xruti lo do fetfamti .em. ca lo pa sai moi be lo djedi poi do zvati lo vi gugde ca ke'a li'u»
ni'o «lu ku'i va'o ku mi na te dunda lo mi se manci besna —sei la cpitepygau cu krixa— .i da'i mi zvati ze'a pi ro lo mi nunji'e lo zmufoi pe lo te cange li'u»
ni'o «lu .i je da'i mi na te dunda lo mi dirba risna —sei la tinci mudypre cu cusku— .i da'i mi sanli gi'e furtirtolcaubi'o vau bu'u lo ricfoi co'u lo fanmo be lo munje li'u»
ni'o «lu .i je da'i mi ze'e toldarsi —sei la cinfo cu cusku— .i je da'i no lo danlu pe lo ricfoi cu cusku lo xendo valsi mi li'u»
ni'o «lu pi ro la'e di'u jetnu —sei la .dorotis. cu cusku— .i je mi gleki lo nu mi pu plixau lo vi xamgu pendo .i ku'i ca lo cabna noi nu ro boi py cu tolcau lo se djica traji gi'e gleki lo nu ji'a ponse lo se turni tumla zo'u: mi jinvi lo du'u .ei mi xruti la .kanzas. li'u»
ni'o «lu lo rijno skari cutci —sei la vrude termafyfe'i cu vlipa lo banli .i pa lo cinri traji selkai be cy cu ka ka'e bevri do ro stuzi pe lo munje se zu'e lo ci nu stapa .i je ro lo ci nu stapa cu se ditcu lo nu kalgaisligau .i do jai sarcu fai lo ka po'o ci roi jalsimgau lo cucti'e gi'e minde lo cutci lo nu bevri do lo do se djica
ni'o «lu va'o lo nu jetnu zo'u: —sei lo verba cu gleki cusku— mi ba zi cpedu fi cy fe lo nu bevri mi la .kanzas. li'u»
ni'o vy srugau lo birka lo cnebo be la cinfo gi'e cinba cy fau lo nu toljursa catke lo ri barda stedu .i ba bo vy cu cinba la tinci mudypre ku noi ca'o klaku tai lo tamsmi poi mutce lo ka ckape lo ri terjo'e .i ku'i vy pamjai lo ranti je terse'a xadni be la cpitepygau se ba'i lo nu cinba lo se cintypu'i stedu be cy kei gi'e facki lo du'u vy ji'a klaku fi lo vi seldri nu cliva lo ri prami pendo
ni'o la .glindas. ku no'u la xamgu cu stapa klama fi lo ri zirxunjme nolstizu te zu'e lo nu tolrinsa cinba lo cmalu nixli .i je la .dorotis. cu kirsku gy lo nu pu tai xendo la .dorotis. .e lo ri pendo
ni'o la .dorotis. cu ca co'a salci jgari la .totos. lo birka .i je ca lo nu ba'o ro re'u tolrinsa cu ci roi jalsimgau lo trixe be lo cutci fau lo nu cusku:
ni'o «lu ko mi bevri lo zdani ju'e la fetfamti .em. li'u»
ni'o ba zi lo mokca dy carna pagre lo vacri .i tai sutra ja'e lo nu viska ja ganse no na'e bo lo brife poi siclu re'o lo kerlo
ni'o la rijno cutci cu so'u ci roi stapa .i je ba bo la .dorotis. cu tai suksa mu'usti ja'e lo nu pu lo nu djuno lo du'u zvati ma kau cu so'o roi gunro lo srasu
ni'o ku'i ba lo barda dy tsebi'o gi'e ru'u catlu
ni'o «lu ue sai —sei dy krixa— li'u»
ni'o ki'u bo dy zutse lo ganra sastu'a pe la .kanzas. .i je ca'u vi zvati fa lo cnino ke cange zdani poi la nakfamti .xenris. ba lo nu lo vilcarbi'e cu darbei lo tolci'o cu zbasu .i la nakfamti .xenris. ca'o ladycpa lo bakni bu'u lo cagdalstu .i je la .totos. pu plipe fi lo birka be dy gi'e ca ca'o bajra fa'a lo cagdalstu fau lo nu carmi gercmo
ni'o la .dorotis. cu sa'irbi'o gi'e sajbi'o lo du'u dasni lo po'o smoka .i ki'u bo la rijno cutci pu sepybi'o ca lo nu vofli pa'o lo vacri kei gi'e ze'e seltolcrinalka'e bu'u lo cantu'a
## ni'o ni'o re vo mo'o nu di'a zdazva
ni'o la fetfamti .em. cu pu zi barkla lo zdani te zu'e lo nu jaursabji lo kobli kei ca lo nu fa'a ca'u catlu gi'e viska lo nu la .dorotis. cu fa'a bajra
ni'o «lu doi pe mi dirba verba —sei fy krixa be fau lo nu birjai lo cmalu nixli gi'e cinba dy boi pi ro lo flira— .i do klama fi ba'e ma li'u»
ni'o «lu lo gugde pe la .oz. —sei la .dorotis. cu junri cusku— .i je zvati ti fa la .totos. ku ji'a .i ui sai doi fetfamti .em .i mi tai gleki lo nu di'a zdazva li'u»
fa'o
|
# gudjanas
ni'o la gudjanas goi ko'a zi'e no'u lu gudjanas. zei simdju gubyseltru li'u no'u la'o gy Cooperative republic of Guyana gy cu berti ketco gugde ne'u le atlantik. zei braxamsi du'a la benesuel. vu'a la surinam. be'a la razgu'e go'i pu se cmene lu brito zei gudjanas li'u .i ko'a cu vomoi lo ketco gugde lo cmalu nilsefta [na gendra]
|
gismu
.i ro gismu be la lojban. cu se rafsi .i lo rafsi cu pagbu lo lujvo .i lo gismu cu se tarmi me'o zykyzyzyky .a me'o zyzykyzyky .i ro gismu po'u na'ebo zo brode .a zo brodi .a zo brodo .a zo brodu ge'u cu se ke lerfu vomei rafsi vu'i le pamei lerfu vomei .i lo drata rafsi cu se zbasu ta'i lo nu cuxna ci lerfu pe lo gismu gi'u setca pa me'o y'y
.i le gi'uste cu liste ro lo pavoji'inono lojbo gismu |
la viktor medranos cu finti la'e lu mi lanzu circre li'u
ni'oni'o le mi cmene po'u la medranos to me la'o sy Medrano sy toi cu spano me la auskalerik noi bangu co na'e xinropno i ti'e la auskalerik poi kulnrxeuskara cu zvati le ropno ba'o le prula'i bisli bo cedra ba'o lo ji'i ni'u 20ki'omoi nanca ni'o ti'ecai lo filcina stuzi cu smuni le cmene pe la medranos
ni'o pu le citri ne'i le spano zo'u zasti fa la auskalerik e le kulnrkelti e le kulnrxiberia i le spano cu xelso cecmu gi'e semto kulnrfenisia cecmu ba'o lo ji'i ni'u 500moi i ji'a le spano cu latmo binxo ri'a le la'ornai gi'e latmo cecmu ba'o lo ji'i ni'u 200moi ni'o la pilipinas cu ze'a spano cecmu ba'o lo
ji'i 1521moi i la medranos klama le vu so'imei daplu ne'i le baxso i mi jbena fi li 1966 pi'e 01 pi'e 12 fo la pilipinas i ra'unai la pilipinas cu ze'i merko jitro co'a lo 1898moi mo'u lo 1946moi i ca'a merko xlura i vu ponjo jamna dicra co'a lo 1941moi mo'u lo 1945moi ni'o la pilipinas me lo gugde noi zasti fa lo tca'anka e lo zduriane e lo rutrkoko i grute i le karbi be le spano bei la pilipinas zo'u drata mutce i le spano cu mediteran zei tcima i la pilipinas cu tropik zei tcima
ni'o le mi lanzu cu ponse loi jgina ra'i lo remnrkaukasu e lo remnrmongolo e lo remnrnegro e le remnrxaustralia i lo remnrkaukasu cu klama fi la mediteran i ji'a loi remnrnordi cu remnrkaukasu klesi i loi remnrmediterani cu remnrkaukasu klesi i la'a mi ponse loi jgina ra'i ro re lo'i remnrkaukasu klesi i la'a klama fi le stici ja stuna ja snanu ropno i ji'a la'a lo remnrnegro cu klama fi la kubas e le stici ja berti friko i lo remnrmongolo cu klama fi lo baxso e lo jungo e lo mexno la'a e lo ponjo la'a e la tais la'a e la viet la'a i la'a lo remnrxaustralia cu klama fi lo baxso gugde i lo baxso cu remnrmongolo joi remnrxaustralia i lo xindo cu remnrkaukasu joi remnrxaustralia i la'a mi ponse loi jgina ra'i lo xindo e lo ba'e semto
ni'o su'a le mi lanzu cu klama fi lo so'imei gugde i zo remnrkaukasu e zo remnrmongolo e zo remnrnegro e zo remnrxaustralia cu zasti ri'a lo cafne kluske ro'o ni'o le mi lanzu cu ponse loi jgina ra'i lo latmo e lo xelso e lo slovo e lo dotco la'a e lo ropno drata la'a ne'i lo remnrkaukasu i la'a dotcrnederlanda i la'a me la xabzburg zei
lanzu bo cedra i la'a me la otoman zei brazma gugde
ni'o ti'e lo latmo e lo xelso e lo slovo e lo dotco e lo dzeko'o to me lo kulnrkelti toi e lo drata cu me lo xinropno kulnu je bangu noi klama fi le snanu softo vi le xekri xamsi ba'o lo ji'i ni'u 4ki'omoi ni'o ne'i le ropno la medranos zei lanzu cu ponse la sirkus poi muvdu i la djipsiz poi klama fi le xindo ku'o cu gunka ne'i la sirkus i xu la'a lanzu prenu i la djipsiz ze'u xabju le ropno
ni'o le mi lanzu cu ponse loi latmo jgina ra'i le spano e le porto la'a e le fraso la'a e la italian e la rumanias la'a i lo latmo prenu cu klama fi la italian i lo latmo na'e curve ri'a jgina ra'i lo drata se terdi ni'o le mi lanzu cu ponse loi xispo jgina ra'i le mexno la'a e la kubas la'a i loi xispo cu jalge le spano brazma gugde
ni'o la'a le mi lanzu cu ponse loi jgina ra'i lo jugyporto ri'a la makaus ne'i le jungrkantoni i la'a lo drata lanzu jungo prenu cu klama fi la futcien zei pagbu ne'i le jungo i ne'i la pilipinas lo jungo cu tavla bau la min nan to jungrxokieni toi ni'o ba'o lo ji'i 1100moi lo ponjo cu klama la pilipinas i so'o ca'a lanzu prenu cu simsa lo ponjo prenu ro'o
ni'o lo semto noi remnrkaukasu cu ponse loi jgina ra'i lo so'umei remnrnegro la'a a lo so'umei remnrxaustralia la'a i lo semto cu mixre lo xelso a lo remnrkaukasu vrici i loi semto cu klama lo drata gugde lo gugde i le xebro semto te klama zo'u gugdrbabilonia i le semto ve klama zo'u glare canre gi'e djacu i ji'a lo ba'e xrabo cu semto
ni'o lo polno e lo baxso cu remnrmongolo joi remnrxaustralia gi'e mintu remna ra'i le xazdo i lo liryraixa'u bemjoitco remna cu klama fi le xazdo ba'o loi ji'i ni'u 40ki'o nanca i mu'a mexno kulnrnauatli gi'e mexno kulnrmaia i ku'i ti'e ro lo remna noi me la'o ly Homo sapiens ly cu klama fi le ba'e friko ba'o loi ji'i ni'u 200ki'o nanca i ti'e lo remnrxaustralia cu klama le sralo ba'o loi ji'i ni'u 70ki'o nanca ni'o ti'e lo remna poi me la'o ly Homo erectus ly ku'o dzena lo remna poi me la'o ly Homo sapiens ly i la'o ly Homo erectus ly zasti ba'o loi ji'i ni'u 1800ki'o nanca i ti'e lo remna poi me la'o ly Homo habilis ly ku'o dzena lo remna poi me la'o ly Homo erectus ly i ti'e le se jutsi poi me la'o ly Homo ly ku'o cu zasti
ba'o loi ji'i ni'u 2300ki'o nanca i ti'e le remna poi me la'o ly Homo sapiens ly ku'o ponse lo bruna poi me la'o ly Homo neanderthalensis ly ku'o noi morsi remna i ti'e zasti fa lo drata remna noi me la'o ly Homo ergaster ly e la'o ly Homo heidelbergensis ly e la'o ly Homo floresiensis ly i la'a dzena ja tamne ja bruna remna ni'oni'o ne'i le mi lanzu cu zasti fa lo sonci e lo mikce e lo ctuca e lo nobli e lo cagypre e lo vecnu e lo fipkalte
ni'oni'o la viktor medranos cu cfagau le vi se finti de'i li 2011 pi'e 12 pi'e 27 i le vi se finti prula'i bo te galfi zo'u de'i li 2012 pi'e 01 pi'e 15 tcika |
# le cmalu noltru
.i finti fa la'o me. Antoine de Saint-Exupéry .me
.i fanva fa la .xorxes.
.i milxe ke gerna dragau stika fa la lalxu de'i li 2020n
ni'o ni'o no mo'o
ni'o salci la'o zoi Léon Werth zoi
ni'o ko mi fraxu doi verba lo nu mi salci lo makcu prenu lo dei cukta .i lo se junri be mi cu krinu .i lo bi'unai makcu prenu cu xagrai lo pendo be mi .i lo drata cu krinu .i lo bi'unai makcu prenu cu kakne lo nu jimpe fi roda .e ji'asai lo cukta be fo lo verba .i lo cimoi cu krinu .i lo bi'unai makcu prenu cu xabju lo fraso noi py. xagji gi'e lenku lifri bu'u ke'a .i py. ja'a nitcu lo nu se drijdikygau .i mi va'o ro nu ro lo krinu na banzu cu djica lo nu salci fi lo cukta fe lo verba poi lo bi'unai makcu prenu cu me ke'a ca lo purci .i ro makcu prenu cu verba ca lo cfari (to ku'i so'uboi py. cu morji toi) .i ja'o mi dragau lo mi salci selsku
ni'o salci la'o zoi León Werth zoi pe ca lo nu ly. verba
ni'o ni'o pa mo'o
ni'o mi ca lo nu mi nanca li xa cu paroi viska lo banli pixra pe lo cukta be la cilce ricfoi be'o noi se tcita «lu se lifri lisri li'u» .i py. pixra lo sincrboua noi tunlo lo danlu .i di'e fukpi lo pixra
ni'o fo lo cukta cu cusku fe «lu lo sincrboua cu tunlo lo se kalte be sy. fau lo nu ky. mulno gi'enai se marxa .ibabo sy. de'a kakne lo ka muvdu kei gi'e sipna ze'a lo masti be li xa be'o poi se kuspe lo befctiru'e li'u»
ni'o mu'i ku mi mutce pensi lo cicricfoi se lifri gi'e baza snada lo nu mi sepi'o lo skari pinsi cu finti lo mi pamoi pixra .i lo mi pixra pamoi cu simsa di'e
ni'o mi jarco lo mi ralju se finti lo makcu prenu gi'e preti cusku fi py. fe lo sedu'u xukau lo mi pixra cu jai se terpa py.
ni'o py. spuda cusku fi mi fe «lu ue lo mapku cu jai se terpa fai ma li'u»
ni'o lo mi se finti cu na pixra lo mapku .i pixra lo sincrboua poi ba'o tunlo lo xanto .iseki'ubo mi pirfi'i lo nenri be lo sincrboua tezu'e lo nu lo makcu prenu cu kakne lo nu jimpe .i py. roroi nitcu lo ve ciksi .i lo mi pixra remoi cu simsa di'e
ni'o lo makcu prenu cu stidi fi mi fe lo du'u mi cliva lo pixra be lo sincrboua poi kalri gi'a ganlo ku'o gi'e co'a se cinri lo tedyske .e lo cirske .e lo cmaci .e lo gerna .isemu'ibo mi cliva ca lo nu mi nanca li xa vau lo pu'o banli jibri be lo pirlarpre .i mi se tolxlu fo lo nu fliba fa lo mi pixra pamoi .e lo mi pixra remoi .i lo makcu prenu cu noroi jimpe da zu'e py. po'o .ije tatpi fa lo verba lo nu roroi ciksi
ni'o mi ki'u bilga lo nu cuxna lo drata jibri .ije mi cilre fi lo nu jatna lo vinji .i mi vofli fe'eru'inai ve'a lo mulno munje .i lo tedyske ja'a sa'e mutce selfu mi .i mi kakne lo nu ca lo nu ze'i pare'u catlu cu djuno lo du'u da du lo jugygu'e jikau la .arizonas. .i la'e di'u mutce se pilno va'o ro nu farcri ca lo nicte
ni'o mi taiku ze'a lo mi nunjmive cu so'iroi penmi so'i junri prenu .i mi ze'u jbini lo makcu prenu .i mi jibni mutce viska py. .i la'e di'u na xagzenri'a lo mi se jinvi
ni'o gau mi ca lo nu penmi paboi py. poi ke'a simlu fi mi fe lo ka milxe prije cu cipra fi py. fa tu'a lo mi pixra pamoi noi mi ru'i ponse .i mi djica lo nu djuno lo du'u xukau py. ca'a jimpe kakne .i ku'i roroi ku py. spuda cusku «lu ta mapku li'u» .iseki'ubo mi py. tavla genai lo sincrboua gigenai lo cilce ricfoi ginai lo tarci .i mi mi punji lo se kuspe be py. .i mi py. tavla lo nu kelcrbridji .e lo nu kelcrgolfi .e lo jecta srana .e lo nebysrijge .i lo makcu prenu cu mutce gleki lo nu se slabu lo nanmu poi tai racli
ni'o ni'o re mo'o
ni'o taiku mi ze'a nonkansa secau lo prenu poi mi ke'a ka'e fatci tavla ku'o co'u lo nu spofu bu'u lo kutytu'a po'u la .sa'aras. pu za lo nanca be li xa .i da ba'o porpi ne'i lo mi matra .i mi kansa genai lo mi'icre ginai lo se vinji prenu .iseki'ubo mi pu'o bredi lo nu nonkansa troci lo nu snada lo nandu nu cikre .i lo cuntu cu srana lo du'u mi za'o jmive gi'ikau mrobi'o .i mi ponse lo djacu poi ka'e pinxe ze'a lo djedi be li su'ebi po'o
ni'o ca lo pamoi vanci mi sipna bu'u lo canre ki lo se xabju tumla vu lo minli be li ki'o .i mi zmadu lo porpi bloti prenu noi cpana lo fultapla bu'u lo xamsi midju ku'o lo ka sepli .iseki'ubo do ka'e se xanri lo nu mi se spaji lo nu ca lo co'a donri lo xajmi ke cmalu voksa mi cikygau .i vy. cusku di'e
— .i .e'o ko pirfi'i lo lanpanzi seva'u mi
— .i ke'o
— .i ko pirfi'i lo lanpanzi seva'u mi
ni'o mi co'a sanli fi lo mi jamfu tai lo nu da'i mi se lindi .i mi carmi satre lo mi kanla .i mi carmi catlu .i mi viska lo tolfadni ke cmalu prenu noi junri lanli mi .i di'e xagrai pixra be py. be'o noi mi baza snada lo nu finti ke'a .i ku'i li'a lo mi pixra cu mutce mleca lo se pixra lo ka se manci .i mi na fuzme .i mi se to'e xlura lo makcu prenu lo nu pirlarcu se jibri vau ca lo nu mi nanca li xa vau gi'enai cilre fi lo nu pirfi'i na'e bo lo sincrboua poi kalri gi'a ganlo
ni'o mi catlu lo tolcanci fau lo nu lo mi kanla cu barda cukla seja'e lo nu spaji .i ko na tolmorji lo du'u mi zvati ki lo se xabju tumla vu lo minli be li ki'o .i ku'i lo cmalu prenu na simlu lo ka farcri gi'a tatpi morsi gi'a xagji morsi gi'a taske morsi gi'a terpa morsi .i py. nasai simlu lo ka verba co farcri lo midju be lo kutytu'a ki lo se xabju tumla vu lo minli be li ki'o .i mi ca lo nu uo snada lo nu tavla cu cusku di'e py.
— .i .y. do va mo
ni'o py. mutce tolxanka je junri ke krefu cusku di'e
— .i .e'o ko pirfi'i lo lanpanzi seva'u mi
ni'o da ca lo nu lo cizra cu dukse lo ka se manci cu na darsi lo nu toltinbe .i simlu lo ka to'e racli vau ki lo se xabju tumla vu lo minli be li ki'o fau lo nu morsi ckape .isemu'inaibo mi to'e setca lo pelji boxfo .e lo penbi lo mi daski .i ku'i mi morji lo du'u mi ralju cilre fi lo tedyske .e lo cirske .e lo cmaci .e lo gerna vau gi'e cusku fi lo cmalu prenu (to fau lo nu mi milxe se fanza toi) fe lo sedu'u mi na kakne lo nu pirfi'i .i py. spuda cusku di'e
— .i na vajni .i ko pirfi'i lo lanpanzi seva'u mi
ni'o mi noroi pu pirfi'i lo lanpanzi .i seki'ubo mi krefu finti seva'u py. pa lo re po'o pixra poi mi kakne .i lo me lo ganlo sincrboua moi .i mi traji se spaji lo nu tirna lo nu lo cmalu prenu cu spuda cusku di'e
— .i na'i .i mi na djica lo me lo xanto poi nenri lo sincrboua moi .i lo sincrboua cu mutce lo ka ckape .ije lo xanto cu mutce lo ka fanza .i lo mi zdani cu cmalu mutce .i mi nitcu lo lanpanzi .i ko pirfi'i lo lanpanzi seva'u mi
ni'o ba ku mi pirfi'i
ni'o py. jundi catlu .i di'e
— .i na'i .i ta mutce lo ka bilma .i ko finti lo drata
ni'o mi pirfi'i di'e
ni'o lo mi pendo cu xendo cisma fau lo nu fraxu
— .i za'asaidai ta lanpanzi nagi'e lanynakni .i ta se jirna
ni'o mi mu'i krefu finti lo mi pixra
ni'o ku'i na'e se zanru tai tu'a lo lidne
— .i ta dukse lo ka tolci'o .i mi djica lo lanpanzi poi ba ze'u jmive
ni'o ba ku secau lo nunsurla mi fau lo nu sutydji lo nu co'a toljajgau lo mi matra cu malfi'i lo di'e pixra
ni'o mi bacru di'e
— .i ta tanxe .i lo lanpanzi poi do djica cu nenri
ni'o ku'i mi mutce lo ka se spaji lo nu viska lo nu lo flira be lo mi citno pajni cu se gusni
— .i ta prane lo ka mi djica .i pe'ipei lo vi lanpanzi cu nitcu lo mutce srasu
— .i ki'u ma
— .i ki'u lo nu lo mi zdani cu cmalu mutce
— .i ju'o banzu .i mi dunda lo cmalu mutce lanpanzi do
ni'o py. sa'orgau lo stedu fa'a lo pixra
— .i na tai cmalu .i ua ta sipna
ni'o tai la'e di'u mi co'a se slabu lo cmalu noltru
ni'o ni'o ci mo'o
ni'o mi ze'u jmibi'o lo du'u ny. ba'o klama fi makau .i lo cmalu noltru noi retsku so'i da mi cu noroi simlu lo ka jimpe fi lo memimoi .i lo cunso se bacru valsi cu di'i jungau mi roda .i taiku ny. ca lo nu pare'u sanji lo mi vinji (to mi na pirfi'i lo mi vinji .i lo pixra cu dukse lo ka pluja vau lo me mi moi toi) cu preti cusku di'e mi
— .i lo va dacti cu mo
— .i ta na dacti .i ta vofli .i ta vinji .i ta me lo mi vinji
ni'o mi jgira lo nu jungau ny. lo du'u mi vofli .ibabo ny. ki'asku di'e
— .i ue do ba'o farlu fi lo tsani
— .i go'i —sei mi cumla cusku
— .i ua xajmi
ni'o lo cmalu noltru cu bacru lo gleki nu cmila noi mutce fanza mi .i mi djica lo nu da junri lo mi malfunca .ibabo ny. jmina cusku di'e
— .i ja'o do ji'a klama fi lo tsani .i ma terdi do
ni'o mi ze'i vismli lo guska'u lo cizra po'u lo nu ny. zvati .i mi bikla terpreti
— .i xu ja'o do klama fi lo drata terdi
ni'o ku'i ny. na spuda .i ny. tolvlile deskygau lo stedu ca'o lo nu catlu lo mi vinji
— .i je'u do na ka'e klama fi lo darno mutce fu ta
ni'o ny. jinru lo ze'u se senva .ibabo ny. tolse'a lo mi lanpanzi lo ny. daski gi'e sfubu lo nu manci catlu lo ny. dirba
ni'o do se xanri lo du'u tai makau mi kucli gau lo xadba selsku pe lo drata terdi .i mi troci lo nu djuno zenba
— .i do klama fi ma doi cmalu prenu .i ma stuzi lo do zdani .i do djica lo nu bevri lo mi lanpanzi ma
ni'o ny. spuda mi di'e ba lo pensi smaji
— .i xamgu fa lo tanxe poi do ke'a mi dunda ku'o fi lo nu ty. ca lo nicte cu selfu ly. lo nu zdani
— .i li'a .i ji'a mi va'o ro nu do clite cu ba dunda lo skori do tezu'e lo nu ly. jorne ca lo donri .i go'i lo grana
ni'o lo se friti cu simlu lo ka jenca lo cmalu noltru
— .i xu jorne .i ue xajmi sidbo
— .i ku'i ly. va'o ro nu na jorne gau do cu ba klama makau gi'e ba se cirko
ni'o lo mi pendo cu za'ure'u bacru lo nu cmila
— .i ku'i ly. ka'e klama ma
— .i makau .i lo sirji crane be ly.
ni'o ba ku lo cmalu noltru cu junri te pinka
— .i na vajni .i lo mi zdani cu tai cmalu
ni'o fau lo nu ju'ocu'i badri milxe cu jmina cusku di'e
— .i da fa'a lo sirji crane cu na ka'e klama lo darno mutce
ni'o ni'o vo mo'o
ni'o taiku mi ba'o facki lo remoi ke vajni datni noi du'u lo ny. krasi plini cu ja'aru'e zmadu lo zdani lo ka barda
ni'o la'e di'u mi na ka'e mutce spaji .i mi djuno lo du'u pa'a lo barda plini no'umu'a la .terd. joi la .jupiter. joi la .mars. joi la .venus. vu'o noi da ke'a de cmene cu zasti fa ji'a lo xecto be lo drata noi su'oroi tai cmalu ja'e lo nu nandu fa lo nu viska ke'a sepi'o lo darvistci .i ca lo nu lo tarskepre co'a facki fi pa lo cmalu cu te cmene ri lo namcu .i mu'a cmene fa «lu lo plinycma po'u li 3251 li'u»
ni'o mi jinvi fo lo se junri fe lo du'u lo plini poi terdi lo cmalu noltru cu me lo plinycma po'u li B612 .i papo'oroi viska lo di'u plinycma sepi'o lo darvistci .i lo turko tarskepre cu go'i ca li 1909
ni'o ty. banli jarco lo ty. te facki bu'u lo tarske ke sornai nunjmaji .i ku'i noda lacri ty. .i mu'i bo ty. dasni makau .i lo makcu prenu cu tai zukte
ni'o xamgu lo nunmisno pe lo plinycma po'u li B612 fa lo nu lo turko raitru cu bigygau lo ry. se turni lo nu dasni tai lo ropno .i lo tarskepre cu rere'u jarco ca li 1920 fau lo nu dasni lo melmapti mutce .i ca lo ca krefu roda tugni ty.
ni'o mi te lisri lo plinycma po'u li B612 lo di'u tcila do gi'e lacri do tu'a lo py. namcu ki'u tu'a lo makcu prenu .i lo makcu prenu cu prami lo namcu .i py. ca lo nu do py. tavla lo cnino pendo cu noroi te preti lo vajrai .i py. noroi cusku «lu ma sance lo ra voksa .i ra zmanei lo mo nunkei .i xu ra crepu lo toldi li'u» .i py. preti cusku «lu ra nanca li xo .i xoda tunba ra .i ra ki'ogra li xo .i lo ra patfu cu jerna lo rupnu be li xo li'u» .ibabo py. jinvi lo du'u cypy. slabu py. .i py. va'o ro nu do cusku fi lo makcu prenu fe «lu mi pu viska lo melbi zdani ne lo xunblabi bliku zi'e noi lo xrulrgeraniu cu zvati lo canko zi'e noi lo tcacpi cu cpana lo drudi li'u» cu na kakne lo nu se xanri lo zdani .i .ei cusku «lu mi pu viska lo zdani pe lo rupnu be li panonoki'o .isemu'ibo py. ki'asku «lu ua melbi li'u»
ni'o taiku py. va'o ro nu do cusku «lu lo du'u lo cmalu noltru cu zasti cu se je'urja'o lo nu ny. se manci gi'e cmila gi'e djica lo lanpanzi .i lo nu da djica lo lanpanzi cu je'urja'o lo du'u da zasti li'u» cu galgau lo janco gi'e tarti tai lo nu do verba .i ku'i py. va'o ro nu do cusku «lu ny. se terdi lo plinycma po'u li B612 li'u» cu se birtygau gi'enai jai fanza do fai tu'a lo preti .i py. zukte tai la'e di'u .i .ei na xebni py. .i .ei lo verba cu mutce fraxu lo makcu prenu
ni'o ki'u li'a ma'a poi jimpe fi lo nunjmive cu ckasu lo namcu .i .au mi co'a te lisri fi dei tai tu'a lo crida lisri .i .au mi cusku «lu puzuvuku lo cmalu noltru cu xabju lo terdi noi ja'aru'e zmadu ny. lo ka barda ku'o gi'e nitcu lo pendo li'u» .i du'o lo jimpe be fi lo nunjmive la'e di'u simlu lo ka zmadu fi lo ka jetnu
ni'o ki'uku mi na nelci lo nu da xalbo tcidu lo mi cukta .i mi lifri lo tai se dunku ca lo nu mi te lisri fi lo dei se morji .i za lo nanca be li xa lo mi pendo pu cliva co kansa lo py. lanpanzi .i mi troci lo ka skicu py. vau tezu'e lo ka na to'e morji fi py. .i badri fa lo ka to'e morji fi lo pendo .i naku ro prenu cu se pendo da .i mi ka'e binxo lo makcu prenu noi se cinri no na'e bo lo namcu .i ki'u la'e di'u ji'a mi pu te vecnu lo skari joi pinsi tanxe .i nandu fa lo nu da za'ure'u co'a pirfi'i ca lo nu nanca lo memimoi .i va'o bo ro nu da noroi troci lo drata be lo nu co'e lo kalri sincrboua .a lo ganlo sincrboua ca lo nu nanca li xa .i li'a mi ba troci lo nu pirfi'i lo traji be lo ka simsa .i ku'i mi na mulno birti lo du'u snada .i lo pixra cu mapti .i lo drata na'e simsa .i mi milxe srera ji'a tu'a lo ka barda .i viku lo cmalu noltru cu dukse lo ka barda .i vaku dukse lo ka cmalu .i mi senpi ji'a fi lo skari be lo ny. taxfu .iseki'ubo mi juxre troci tai ti tai ta ja'e lo zabna ja'e lo mabla .i mi ba srera tu'a lo vajni mutce tcila .i ku'i .ei fraxu mi la'e di'u .i lo mi pendo noroi ciksi .i ju'ocu'i py. jinvi lo du'u mi py. simsa .i ku'i uinai mi na kakne lo nu viska lo lanpanzi pa'o lo tanxe .i ju'ocu'i mi milxe simsa lo makcu prenu .i la'a mi ba'o tolci'obi'o
ni'o ni'o mu mo'o
ni'o ca ro donri mi cilre da lo plini .a lo nu cliva .a lo nu litru .i la'e di'u masno fasnu fau lo nu cunso pensi .i taiku ca lo cimoi donri mi djuno fi lo betri pe lo tricubaubau
ni'o ca lo ca krefu ji'a za'ure'u fasnu seja'e lo lanpanzi .iki'ubo lo cmalu noltru cu suksa retsku di'e mi tai lo nu junri senpi
— .i je'usaipei lo lanpanzi cu citka lo dzispa
— .i go'i je'u
— .i .o'u mi gleki
ni'o mi na jimpe lo du'u ki'u makau tai vajni fa lo nu lo lanpanzi cu citka lo dzispa .i ku'i lo cmalu noltru cu jmina cusku
— .iseni'ibo xu ly. citka lo tricubaubau ji'a
ni'o mi fa'irgau lo cmalu noltru lo du'u lo tricubaubau cu dzispa nagi'eku'i tricu co barda fi lo malsi vau .e lo du'u lo xanto so'imei ji'asai va'o ro nu da'i ny. bevri xy. cu na ka'e mo'u citka lo paji'asai tricubaubau
ni'o lo sidbo be lo xanto so'imei cu cmilygau lo cmalu noltru
— .i da'i .ei gasnu lo nu xy. simxu lo ka cpana
ni'o ku'i ny. prije cusku di'e
— .i lo tricubaubau pu lo nu banro cu cfari fau lo nu cmalu
— .i drani .i ku'i mu'i ma do djica lo nu lo do lanpanzi cu citka lo cmalu tricubaubau
ni'o ny. mi spuda «lu ie li'a li'u» tai lo nu frili se jimpe .i mi nitcu lo nandu ke menli nuntoi lo nu mi nonkansa jimpe fi lo nabmi
ni'o je'u zvati lo terdi be lo cmalu noltru tai lo nu zvati ro terdi vau fa lo xamgu srasu .e lo xlali srasu .i seni'ibo go'i fa lo xamgu tsiju be lo xamgu srasu be'o .e lo xlali tsiju be lo xlali srasu .i ku'i lo tsiju na ka'e se viska .i ty. sipna ne'i lo se mipri be lo terdi co'u lo nu sidbo fi pa boi ty. fa lo nu ty. cikna binxo .ibabo ty. preja gi'e catke fau lo nu toldarsi ca lo cfari vau fa'a lo solri lo cmalu ke tolckape jicycma .i ty. va'o ro nu jicycma lo samcu .a lo rozgu cu catke .e'a tai lo pluka be ty. .i ku'i da va'o ro nu xlali spati cu vimcu .ei lo spati co'a lo nu da facki fi sy. .i ju'a lo xlali mutce tsiju cu zvati lo terdi be lo cmalu noltru .i tsiju lo tricubaubau .i lo loldi be lo terdi cu culno ty. .i ju'a lo tricubaubau zo'u da va'o lo nu lerci dukse facki fi ty. cu ze'eba na kakne lo nu vimcu ty. .i ty. se canlu lo terdi .i ty. gregau lo genja lo terdi .i va'o ro nu ge lo terdi cu dukse lo ka cmalu gi lo tricubaubau cu dukse lo ka se kancu fi makau cu spoja fa lo terdi gau ty.
ni'o «lu srana lo nu cnici —sei lo cmalu noltru fi mi ba cusku— .i da ba lo nu mo'u lumci vo'a ca lo cerni cu kurji lumci .ei lo terdi .i .ei da bilgygau vo'a lo nu di'i vimcu lo tricubaubau co'a lo nu ficysanji ty. lo rozgu noi ty. mutce simsa ke'a ca lo nu ty. mutce citno .i lo nu gunka cu mutce tolzdi gi'eku'i mutce frili li'u»
ni'o ca da ny. stidi fi mi fe lo nu mi troci lo nu finti lo melbi pixra vau tezu'e lo ka gasnu lo nu mulno jimpe la'e di'u fa lo verba pe lo mi terdi .i «lu la'e di'u va'o ro nu vy. litru ca da —sei ny. cusku— cu ka'e xamgu vy. .i su'oroi na raktu fa lo nu bavypunji lo nu gunka .i ku'i va'o ro nu srana lo tricubaubau cu roroi raktu mutce .i mi se slabu lo plini poi se xabju lo lazni .i ly. naljunri ci dzispa li'u»
ni'o fi'o gidva lo cmalu noltru mi pirfi'i lo di'u plini .i mi nasai nelci lo nu mi marde cusku .i ku'i lo ckape pe lo tricubaubau cu tai tolmutce te djuno .ijebo lo se tolnu'a be lo farcri be bu'u lo plinycma cu tai vajni .isemu'ibo paroiku mi na'e tarti lo nu mi jinzi sezyfanta .i mi cusku «lu doi verba ko jundi lo tricubaubau li'u» .i mi kajde lo mi pendo lo ckape poi py. ne pa'a mi ze'upu lamji ke'a secau lo nu sanji .isezu'ebo mi tai mutce gunka tu'a lo vi pixra .i lo te ctuca be fi mi cu vamji lo nu troci .i ju'ocu'i do retsku fi do fe lo sedu'u ki'u makau na zvati lo dei cukta fa lo drata pixra poi dunli lo pixra be lo tricubaubau lo ka banli .i lo danfu cu sampu mutce .i mi troci gi'eku'i na snada .i mi ca lo nu mi pirfi'i lo tricubaubau cu jai se bapli lo se cinmo pe lo nu vaitcu
ni'o ni'o xa mo'o
ni'o iu doi cmalu noltru mi ca'o jimpe taiku fi lo do badri ke cmalu nunjmive .i do ze'u se zdile no na'e bo lo nu xutla pe lo solri nu canci .i mi facki lo di'u cnino tcila ca lo cerni be lo vomoi donri ca lo nu do cusku di'e
— .i mi mutce nelci lo solri nu canci .i .e'u mi'o viska lo solri nu canci
— .i ku'i .e'i mi'o denpa
— .i denpa ma
— .i denpa lo nu lo solri cu canci
ni'o do simlu lo ka mutce se spaji vau ca lo cfari .ibabo do do mi'afra .i do fi mi cusku di'e
— .i ue mi za'o krici lo du'u mi zvati lo memimoi
ni'o je'u ka'u lo solri ca lo nu dormidju fi lo mergu'e cu canci lo fasygu'e .i lo nu klama lo fasygu'e ze'i lo mentu cu banzu lo nu zvati lo solri nu canci .i ku'i uinai lo fasygu'e cu mutce lo ka darno .i ku'i bu'u lo do tai cmalu terdi cu banzu fa lo nu bevri lo do stizu ve'a lo taplai be li so'o .i do viska lo solri nuncanci ca ro krefu poi do djica
— .i ca lo djedi mi viska lo nu lo solri cu vociroi canci
ni'o bazaku do jmina cusku di'e
— .i .o'e da ca lo nu tai badri cu mutce nelci lo solri nu canci
— .i ja'o do ca lo djedi pe lo voci krefu cu tai badri pei
ni'o ku'i lo cmalu noltru na spuda
ni'o ni'o ze mo'o
ni'o ca lo mumoi donri fi'o za'ure'u se jalge tu'a lo lanpanzi lo di'e se mipri pe lo nunjmive be lo cmalu noltru cu binxo lo to'e se mipri be fi mi .i ny. suksa retsku di'e mi secau lo pruselsku tai lo nu jalge lo nu ze'u smaji pensi lo nabmi
— .i pau lo lanpanzi tai lo nu ly. citka lo dzispa cu citka lo xrula ji'a xu
— .i lo lanpanzi cu citka ro se penmi be ly.
— .i xu go'i lo xrula ji'asai poi se pagbu lo kinli
— .i ja'a go'i lo xrula ji'asai poi se pagbu lo kinli
— .i va'oku lo kinli cu selfu fi ma
ni'o mi na djuno .i mi ca'o mutce lo ka gunka lo nu troci lo nu vimcu lo dukse tagji klupe lo mi matra .i mi mutce lo ka dunku .iki'ubo ge lo nu spofu cu co'a simlu lo ka vajni gi lo se pinxe djacu noi se xaksu cu gasnu lo nu mi tepkanpe lo xlarai
— .i lo kinli cu selfu fi ma
ni'o lo cmalu noltru noroi sisti tu'a lo preti ca lo nu ny. ba'o cusku py. .i mi se fanza lo mi klupe gi'e spusku lo cunso
— .i lo kinli cu selfu fi noda .i curve jalge lo nu lo xrula cu palci
— .i ue
ni'o ku'i ny. ba lo nu smaji cu renro di'e mi fau lo nu milxe fengu
— .i ianai .i lo xrula cu ralci .i xy. na palci .i xy. nurgau xy. ta'i lo se kakne .i xy. krici lo du'u xy. selteptce fau tu'a lo xy. kinli
ni'o mi spusku noda .i ca lo ca mokca mi fi mi cusku «lu lo vi klupe va'o lo nu ky. za'o xarnu cu ba plipe gau mi sepi'o lo nu mruli darxi li'u» .i lo cmalu noltru za'ure'u dicra lo nu mi pensi
— .i pau do jinvi fi lo xrula .y.
— .i na go'i .i mi jinvi noda .i mi pu spusku lo cunso .i mi gunka lo se junri cuntu
ni'o ny. catlu mi fau lo nu se spaji
— .i ue lo se junri cuntu
ni'o ny. viska mi fau lo nu lo mruli cu zvati lo xance vau .e lo nu lo degji cu grasu xekri .e lo nu mi salpo fa'a lo dacti noi simlu fi ny. fe lo ka mutce tolmelbi
— .i do tavla tai tu'a lo makcu prenu
ni'o la'e di'u rinka lo nu mi milxe ckeji .i ku'i ny. nalkecti ke jmina cusku di'e
— .i do cfipygau lo roda .i do xregau lo roda
ni'o ny. mutce se fanza je'u .i ny. deskygau bu'u lo brife lo solji skari kerfa
— .i mi djuno fi lo plini poi se zvati lo xunre nanmu .i ny. noroi sumne lo xrula .i ny. noroi catlu lo tarci .i ny. noroi prami lo prenu .i ny. noroi zukte na'e bo lo nu kanji .i ze'a piro donri ny. rapli cusku tai tu'a do «lu mi junri nanmu .i mi junri nanmu li'u» .i la'e di'u rinka lo nu ny. jgira .i ku'i ny. na nanmu .i ny. gumri
— .i ny. mo
— .i ny. gumri
ni'o lo cmalu noltru cu blabi ri'a lo nu fengu
— .i ze'u lo nanca be lo megdo lo xrula cu zbasu lo kinli .iji'a ze'u lo nanca be lo megdo lo lanpanzi cu citka lo xrula .i xu na junri fau lo nu sisku lo nu jimpe lo du'u ki'u makau xy. tai gunka lo nu zbasu lo kinli poi selfu fi noda .i xu na vajni fa lo nu jamna fa lo lanpanzi lo xrula .i xu na zmadu fi lo ka vajni .e lo ka jai fau junri vau fe lo nu kanji fa lo rotsu ke xunre nanmu .i mi se slabu lo xrula noi pamei se steci fi lo munje zi'e noi zasti bu'u no na'ebo lo mi terdi zi'e noi lo cmalu lanpanzi ka'e daspo ze'iku taiku ca lo cerni secau lo nu ly. sanji lo se gasnu .i xu la'e di'u na vajni
ni'o ny. xunre binxo .ibabo di'a co'e
— .i lo nu da prami lo xrula noi zasti fa pa ke'a bu'u lo megdo be lo megdo be lo tarci cu banzu lo nu da gleki lo nu catlu ty. .i da cusku fi da fe «lu lo mi xrula cu zvati piso'u ta li'u» .i ku'i lo nu lo lanpanzi cu citka lo xrula cu simsa ci'o da lo nu ro tarci cu suksa naltergu'ibi'o .i uesai na vajni fa la'e di'u
ni'o ny. na kakne lo nu jmina cusku .i ny. spoja lo nu klaku .i lo nicte ba'o tolcanci .i mi ba'o falcru lo mi tutci .i mi ja'asai ckasu lo mi mruli .e lo mi klupe .e lo nu taske .e lo nu morsi .i zvati lo tarci di'o lo terdi no'u lo memimoi no'u la .terd. fa lo cmalu noltru noi nitcu lo nu se kurji .i mi jgari ny. lo birka .i mi sligau ny. .i mi cusku fi ny. fe «lu lo xrula poi do prami cu na se ckape .i mi ba pirfi'i lo molgai seva'u lo do lanpanzi .i mi ba pirfi'i seva'u do lo marbi be lo do xrula .i mi .y. li'u» .i mi na djuno fi lo nu .ei mi cusku makau .i mi cinmo lo nu mutce lo ka juxre .i mi na djuno fi lo nu ta'i makau mi ny. penmi gi'a pruxi jorne .i tai cizra fa lo se klaku gugde
ni'o ni'o bi mo'o
ni'o mi ze'i cilre fi lo nu djuno fi lo bi'unai xrula .i ze'epu ta'e zvati lo terdi be lo cmalu noltru fa lo sampu mutce xrula noi se jadni papo'o djine be lo rulpezli zi'e noi ja'aru'e se canlu zi'e noi fanza noda .i xy. tolcanci ca lo cerni lo srasu .ibabo xy. canci ca lo vanci .i ku'i lo bi'unai xrula co'a te tsiju ca lo djedi fi da poi se bevri fo lo na te djuno .i lo cmalu noltru cu jibni jundi lo stanycma noi na simsa lo drata stanycma .i cumki fa lo nu cnino klesi lo tricubaubau .i ku'i lo dzispa bazi sisti lo nu banro vau gi'e co'a zbasu lo xrula .i lo cmalu noltru noi zvati lo nu zvagau lo barda balji cu birti lo du'u ba barkla by. fa lo se manci tolcanci .i ku'i lo xrula za'o na mo'u brebi'o lo nu melbi vau fi'o marbi lo xy. crino kumfa .i xy. jundi cuxna lo xy. skari .i xy. masno lo nu dasni binxo .i xy. stika ro lo rulpezli .i xy. na djica lo nu barkla fau lo nu xy. mulno se cinje tai tu'a lo xrulrpapavera .i xy. na djica lo nu tolcanci fau na'ebo lo mulno nu dirce lo nu xy. melbi .i ie xy. mutce lo ka meltritra .i lo se mipri nu xy. brebi'o cu djedi li so'o gi'ebabo djedi li so'i .ibabo xy. ca lo cerni ca lo tcika be lo solri nu tolcanci cu jarco vo'a
ni'o xy. noi pu tai tcila gunka cu cusku di'e fau lo nu sipna frumu
— .i .a'i mi ja'aru'e co'a cikna .i ko mi fraxu .i .u'u mi za'o mulno krekalsa
ni'o lo cmalu noltru ka'enai rivbi lo nu manci
— .i .u'e do melbi
— .i go'i pei —sei lo xrula cu xutla spusku— .i mi dunli lo solri lo ka jbena ca makau
ni'o lo cmalu noltru cu drani smadi lo du'u xy. na mutce lo ka cumla .i ku'i xy. tai cnigau
— .i pe'i tcika tu'a lo cerni sanmi —sei xy. bazi jmina cusku— .i da'i do mi xendo lo nu pensi mi
ni'o lo cmalu noltru fau lo nu mulno se cfipu vau ca lo nu ba'o tolcri lo jaursabytci cu vifne djacu selfu lo xrula
ni'o taiku xy. fanza ny. fau lo nu xy. badri milxe jgira .i mu'a xy. ca lo donri fau lo nu tavla fi lo vo kinli po'e xy. cu cusku di'e lo cmalu noltru
— .i .e'e klama ti fa lo tirxu noi se jgalu
— .i no tirxu cu zvati lo mi terdi —sei lo cmalu noltru cu fapro cusku— .i ji'a lo tirxu na citka lo srasu
— .i mi na srasu —sei lo xrula cu xutla spusku
— .i ko mi fraxu
— .i mi na terpa lo tirxu .i ku'i mi mutce terpa lo vacri flecu .i xu do ponse lo bifmarbi
ni'o «lu mutce terpa lo vacri flecu .i na zabna funca lo spati —sei lo cmalu noltru cu zgana— .i lo vi xrula cu mutce pluja li'u»
— .i ca ro vanci do mi ba setca lo blacygai .i mutce lenku bu'u lo medomoi .i xlali stuzi .i bu'u lo te klama be fi mi .y.
ni'o ku'i xy. dicra vo'a .i xy. pu klama fau lo nu tsiju .i xy. ka'enai pu se slabu lo drata terdi .i xy. fau lo nu ckeji lo nu curmi lo nu da facki fi lo nu xy. bregau lo tai klina jitfa cu so'uji'iciroi kafke tezu'e lo nu lo cmalu noltru cu zungi
— .i xu lo bifmarbi
— .i mi pu'o klama tezu'e lo nu tolcri .i ku'i do mi tavla
ni'o xy. bapli lo nu kafke vau tezu'e lo nu frigau ny. lo zugyselcni
ni'o taiku lo cmalu noltru mu'inai lo zabna terzu'e pe lo ny. nunprami bazi tolylacri xy. .i ny. junri jundi lo na'e vajni valsi gi'e binxo lo mutce tolgei
ni'o «lu .ei mi pu na'e tirna xy. —sei ny. fi mi ca lo djedi cu lacri cusku— .i .ei da noroi tirna lo xrula .i .ei da xy. catlu gi'e sumne .i lo memimoi cu clugau lo mi terdi lo titla panci .i ku'i mi pu na se pluka .i lo lisri be lo jgalu be'o noi tai fanza mi cu .ei mi cnigau li'u»
ni'o ny. za'o lacri cusku «lu mi pu na snada lo nu jimpe .i .ei mi pajni ji'u lo se zukte .enai lo valsi .i iu xy. mi panci clugau gi'e te gusni .i .u'u .eisai mi na cliva .i .ei mi smadi fi lo nu xy. xendo poi se mipri fo lo nu xy. tcica .i .oi lo xrula cu tai natfe tarti .i ku'i mi dukse lo ka citno vau lo nu djuno kakne lo nu prami xy. li'u»
ni'o ni'o so mo'o
ni'o pe'i ny. se prali lo nu cliva vau lo nu lo so'o cilce cipni cu zdacne .i ca lo nuncliva cerni ny. gasnu lo nu lo ny. terdi cu mulno cnici .i ny. kurji pumlumci lo cikna je'erma'a .i ny. ponse re je'erma'a poi cikna zi'e noi xamgu se pilno fi lo nu glagau lo cerni sanmi .i ny. ponse pa cando je'erma'a ku ji'a .i ku'i cu'u ny. da noroi djuno .iseki'ubo ny. pumlumci lo cando je'erma'a ku ji'a .i lo je'erma'a va'o lo nu drani pumlumci cu di'i tolvlile jelca secau lo nu jetce .i lo je'erma'a nu jetce cu simsa lo damtubnu fagri .i li'a bu'u lo mi'o terdi mi'o dukse lo ka cmalu kei lo nu ka'e pumlumci lo je'erma'a .iseki'ubo jy. mutce lo ka jai raktu mi'o
ni'o ji'a ny. vimcu fau lo nu milxe badri kei lo romoi be lo tricubaubau co'arbanro .i ny. krici lo du'u ny. ba noroi xruti .i ku'i ro lo slabu se gunka cu simlu ca lo ca cerni lo ka mutce lo ka titla .i ny. ca lo nu ny. lo xrula rore'u jaursabji gi'e pu'o setca lo blacygai cu sanji lo nu djica lo nu klaku
— .i co'o —sei ny. fi lo xrula cu cusku
ni'o ku'i xy. na spusku
— .i co'o —sei ny. krefu cusku
ni'o lo xrula cu kafke .i ku'i na se rinka lo nu xy. bilma
— .i mi pu bebna —sei xy. za cusku— .i ko mi fraxu .i ko troci lo nu do gleki
ni'o ny. se spaji lo nu claxu lo nu vlasfa .i ny. stali fau lo nu mulno se cfipu gi'e jgari lo blacygai .i ny. na jimpe fi lo vi tolvlile cando
— .i je'u mi do prami —sei lo xrula fi ny. cusku— .i do pu djuno noda fi'o fuzme mi .i nasai vajni .i ku'i do mi dunli lo ka bebna .i ko troci lo nu do gleki .i ko toljgari lo blacygai .i mi na za'o djica tu'a by.
— .i ku'i lo brife .y.
— .i mi na tai bilma .i lo nicte ke vifne vacri ba xamgu mi .i mi xrula
— .i ku'i lo danlu .y.
— .i .ei mi renvi tu'a reji'ici ciftoldi va'o lo nu mi djica lo nu se slabu lo toldi .i ti'e tai melbi .i va'onaiku ma mi ba vitke .i do ba darno .i lo barda danlu zo'u mi na terpa .i mi se jgalu
ni'o xy. sapru'i jarco lo vo kinli .ibabo xy. jmina cusku di'e
— .i .oi ko na tai stali .i do ba'o jdice lo du'u do cliva .i ko klama
ni'o ki'ubo xy. na djica lo nu ny. viska lo nu xy. klaku .i xy. tai jgira xrula
ni'o ni'o pano mo'o
ni'o ny. zvati lo kensa be lo plinycma po'u li 325 jo'u li 326 jo'u li 327 jo'u li 328 jo'u li 329 jo'u li 330 .i seki'ubo pamai ny. vitke fi py. tezu'e lo nu zukte da gi'e cilre
ni'o lo pamoi cu se xabju lo nolraitru .i lo nolraitru cu zutse fi'o se dasni lo zirpu jo'u .ermine lo ritli stizu noi sampu jeku'i banli
— .i .a'e lo se turni —sei lo nolraitru ca lo nu ny. viska lo cmalu noltru cu krixa cusku
ni'o lo cmalu noltru cu preti cusku fi vo'a fe «lu ta'i ma tu ka'e djuno fi mi va'o lo nu tu mi pu noroi viska li'u»
ni'o ny. na djuno lo du'u ga'a lo nolraitru lo munje cu sampu mutce .i ro remna cu ga'a se turni
— .i ko jbikla tezu'e lo nu mi do semau viska —sei lo nolraitru noi mutce jgira lo nu uo nolraitru da cu cusku
ni'o lo cmalu noltru cu kanla sisku lo se zutse .iku'i lo plini cu culno lo banli ke .ermine kosta .iseki'ubo ny. sanli stali .i ny. ri'a lo nu tatpi cu sipfru
— .i ga'i lo nu sipfru cu naldrani nu tarti va'o lo nu lo nolraitru cu zvati —sei lo nolraitru cu cusku— .i mi tolcurmi la'e di'u
— .i mi ka'enai fanta —sei lo cmalu noltru cu spuda cusku— .i mi puze'a klama gi'enai sipna
— .iseki'ubo —sei lo nolraitru fi ny. cusku— mi do minde lo nu do sipfru .i mi ze'u lo nanca be li so'i na zgana lo nu da sipfru .i lo nu sipfru cu rirci cinri mi .i .o'ocu'i ko za'ure'u sipfru .i mi minde
— .i la'e di'u se xanka mi .i mi na kakne lo nu ranji —sei lo cmalu noltru cu xunre binxo
— .i .o'ucu'i —sei lo nolraitru cu spuda— .i .i'a mi do minde lo nu do ga sipfru ginai sipfru
ni'o ny. milxe lo ka fi'usku kei gi'e simlu lo ka se fanza
ni'o lo nolraitru cu se vajni lo nu da sinma lo nu ny. catni .i ny. na renvi lo nu toltinbe .i ny. traji lo ka turni .i ku'i ki'u lo nu ny. mutce lo ka xendo cu minde fi lo racli
ni'o «lu va'o lo nu mi minde —sei ny. ta'e cusku— .i va'o lo nu ge mi minde lo jatna lo nu binxo lo xamsi cipni gi jy. na tinbe cu fuzme fa jy. na.e mi li'u»
— .i .e'apei mi zutse —sei lo cmalu noltru cu toldarsi retsku
— .i mi do minde lo nu do zutse —sei lo nolraitru noi nobli crepu lo pagbu be lo ny. rankre kosta cu spusku
ni'o ku'i lo cmalu noltru cu se spaji .i lo plini cu cmatcetce .i lo nolraitru cu ka'e turni ma
— .i doi nobli —sei cyny. fi ny. cusku— ko mi fraxu lo nu mi retsku fi do
— .i mi do minde lo nu do retsku fi mi —sei lo nolraitru zi sutra cusku
— .i doi nobli .y. do turni ma
— .i roda —sei lo nolraitru sekai lo ka mutce sampu cu spusku
— .i xu roda
ni'o lo nolraitru cu sampu farja'o lo ny. plini .e lo drata plini .e lo tarci
— .i xu turni ro tu —sei lo cmalu noltru cu cusku
— .i turni ro tu —sei lo nolraitru cu spusku
ni'o ny. turni co traji po'onai je mujyku'e ji'a
— .i xu lo tarci cu tinbe fi do
— .i li'a go'i —sei lo nolraitru cu cusku— .i ty. zi tinbe .i mi na renvi lo nu toltinbe
ni'o lo tai nu vlipa cu se manci lo cmalu noltru .i ri va'o lo nu da'i tai vlipa cu kakne lo nu zvati vovo po'onai solri nu canci .a zereboi ji'a sy. .a panonoboi ji'asai sy. .a renonoboi ji'acai solri nu canci kei ca pa djedi gi'e noroi bevri lo stizu .i ny. mu'i lo nu milxe badri lo nu morji lo ny. se cliva ke cmalu plini cu darsi lo nu cpedu lo se dunda lo nolraitru
— .i mi djica lo nu viska lo solri nu canci .i .e'o io ko minde lo solri lo nu canci
— .i va'o lo nu da'i ge mi minde lo jatna lo nu vofli klama lo xrula lo drata tai tu'a lo toldi kei .a lo nu finti lo draci kei .a lo nu binxo lo xamsi cipni gi jy. na tinbe lo te minde zo'u jy. ji mi fuzme srera
— .i do go'i —sei lo cmalu noltru cu jdari cusku
— .i drani .i .ei da mi'ecpe fi rode fe lo se kakne be de —sei lo nolraitru di'a cusku— .i lo nu catni cu ralju se jicmu lo nu racli .i va'o lo nu do minde lo do prenu lo nu plipe lo xamsi cu ba catni fapro fa py. .i mi lo nu mi'ecpe lo nu tinbe cu zifre ki'u lo nu mi racli minde
— no'i lo mi solri nu canci cu mo —sei lo cmalu noltru noi noroi tolmorji fi lo preti ca lo nu ba'o cusku cu mojgau
— .i lo do solri nu canci zo'u do ba lifri .i mi ba mi'ecpe .i ku'i mi ba denpa ji'u lo mi turni saske lo nu lo vanbi cu mapti
— .i la'e di'u cabna ma —sei lo cmalu noltru cu djuno cpedu
— .i .y. .y. —sei lo nolraitru noi ca'o tadni lo barda veldetri cu spusku— .y. .y. cabna .y. .y. lo zi vanci ti'u li ji'i ze pi'e vono .i do ba zgana lo nu mi ja'asai te tinbe
ni'o lo cmalu noltru cu sipfru .i ny. xenru tu'a lo ny. se claxu ke solri nu canci .iji'a ny. xa'o milxe lo ka se tolzdile
— .i .einai mi vi zukte —sei ny. fi lo nolraitru cu cusku— .i .ai mi cliva
— .i ko na cliva —sei lo nolraitru noi tai jgari lo nu turni da cu spusku— .i ko na cliva .i ca'e do raljitro
— .i raljitro ma
— .i .y. lo nu pajni
— .i ku'i no prenu vi ka'e se pajni
— .i na djuno —sei lo nolraitru cu cusku— .i mi za'o na kuspe litru lo mi tutra .i mi dukse lo ka tolcitno .i mi claxu lo canlu be lo nobli carce .i mi tatpi lo nu cadzu
— .i .a'i mi ba'o catlu —sei lo cmalu noltru noi salpo binxo tezu'e lo nu za'ure'u zgana lo drata mlana be lo plini cu cusku— .i noda zvati tu ji'a
— .iseva'obo do do ba pajni —sei lo nolraitru cu spusku— .i traji lo ka nandu .i lo sevzi lo drata cu mutce zmadu lo ka nandu fa lo nu pajni ce'u .i lo nu do snada lo nu do do pajni cu jarco lo nu do ca'a prije
— .i mi —sei lo cmalu noltru cu cusku— cu kakne lo nu mi mi pajni bu'u makau .i mi na nitcu lo nu xabju ti
— .i .y. .y. —sei lo nolraitru cu cusku— mi birti lo du'u lo tolcitno ratcu cu diklo da lo mi terdi .i mi tirna ry. ca lo nicte .i do ka'e pajni lo tolcitno ratcu .i do ry. di'inai dapma lo nu mrobi'o .i taiku lo nu ry. jmive cu ba jalge lo nu do pajni .i ku'i do ry. ba roroi fraxu ki'u lo nu .ei na xaksu ry. .i ry. papo'omei
— .i mi —sei lo cmalu noltru cu spusku— na nelci lo nu mi dapma fi lo nu mrobi'o .iji'a mi birti lo du'u mi cliva
— .i ko na co'e —sei lo nolraitru cu cusku
ni'o ku'i lo cmalu noltru noi bredi lo nu cliva cu na djica lo nu drigau lo tolcitno turni
— .i lo banli nobli va'o lo nu djica lo nu satci se tinbe cu .ei minde mi lo racli .i mu'a ny. mi minde lo nu mi cliva pu lo mo'u mentu .i lo vanbi cu simlu lo ka ca mapti
ni'o lo nolraitru cu spusku noda .iseki'ubo lo cmalu noltru cu ze'i senpi .ibazibo fau lo nu cnivasxu cu cliva
— .i ca'e do mi jansu —sei lo nolraitru cu sutra ki'asku
ni'o ny. catni mutce simlu
ni'o «lu lo makcu prenu cu cizra mutce li'u» se cusku lo cmalu noltru ri ca lo nu litru
ni'o ni'o papa mo'o
ni'o lo remoi plini cu se xabju lo sezyjgidu'e
— .i .a'e lo sinma be mi mi vitke —sei lo sezyjgidu'e ca lo nu co'a viska lo cmalu noltru cu vu krixa cusku
ni'o ga'a lo sezyjgidu'e ro drata remna cu sinma sy.
— .i coi do'u —sei lo cmalu noltru cu cusku— .i do dasni lo cizra mapku
— .i ti tutci lo nu mi rinsa —sei lo sezyjgidu'e cu spusku— .i ti tutci lo nu mi rinsa ca lo nu mi se ki'arzau .i ku'i uinai noroiku da vi litru
— .i .a'a —sei lo cmalu noltru noi na jimpe cu cusku
— .i ko jalsimgau lo do xance —sei lo sezyjgidu'e cu stidi
ni'o lo cmalu noltru cu jalsimgau lo xance .i lo sezyjgidu'e cu cunlo rinsa fau lo nu lafti lo mapku
ni'o «lu ta zdimau lo nu vitke lo nolraitru li'u» se sezysku lo cmalu noltru .i ny. di'a ca'o jalsimgau lo xance .i lo sezyjgidu'e di'a rinsa fau lo nu lafti lo mapku
ni'o baza lo mentu be li mu be'o noi nu zajba cu tatpi fa lo cmalu noltru lo stodi nu kelci
— .i pau lo nu lo mapku cu farlu —sei ny. preti cusku— cu se sarcu ma
ni'o ku'i lo sezyjgidu'e na tirna .i lo sezyjgidu'e noroi tirna na'ebo lo si'avla
— .i xu do mi ja'asai mutce sinma —sei sy. fi lo cmalu noltru cu preti cusku
— .i ma smuni zo sinma
— .i zo sinma cu se smuni lo du'u zgana lo nu mi traji lo ka melbi .e lo ka zabna dasni .e lo ka ricfu mutce .e lo ka tolbebna kei fo lo se terdi
— .i ku'i ue do nonkansa lo nu se terdi
— .i .e'osai ko mi sinma va'o makau
— .i mi do sinma —sei lo cmalu noltru fau lo nu milxe lafti lo janco cu cusku— .i ku'i ma prali do la'e di'u
ni'o lo cmalu noltru cu cliva
ni'o «lu lo makcu prenu ja'a cizra mutce li'u» se cusku lo cmalu noltru ri ca lo nu litru
ni'o ni'o pare mo'o
ni'o lo za'umoi plini cu se xabju lo pixydu'e .i lo nu vitke cu tordu gi'eku'i rinka lo nu lo cmalu noltru cu mutce lo ka badri
— .i do va zukte ma —sei ny. fi lo pixydu'e noi smaji crane lo kunti botpi .e lo culno botpi cu cusku
— .i mi pinxe —sei lo pixydu'e fau lo nu badri simsa cu spusku
— .i tezu'e ma do pinxe —sei lo cmalu noltru cu retsku
— .i tezu'e lo nu mi tolmorji —sei lo pixydu'e cu spusku
— .i tolmorji ma —sei lo cmalu noltru noi xa'o kecti py. cu retsku
— .i tolmorji lo du'u mi ckeji —sei lo pixydu'e fau lo nu dizgau lo stedu cu zungi cusku
— .i ckeji ma —sei lo cmalu noltru noi djica lo nu sidju cu datni cpedu
— .i ckeji lo nu mi pinxe —sei lo pixydu'e noi co'a stodi smaji cu famsku
ni'o lo cmalu noltru cu se cfipu cliva
ni'o «lu lo makcu prenu ja'asai cizra mutce li'u» se cusku lo cmalu noltru ri ca lo nu litru
ni'o ni'o paci mo'o
ni'o lo vomoi plini cu terdi lo cu'upre .i lo nanmu cu tai ca'o gunka ja'e ji'asai lo nu ri na lafti lo stedu ca lo nu lo cmalu noltru cu tolcliva
— .i coi do'u —sei ny. fi cy. cusku— .i lo do sigja ba'o naljelbi'o
— .i li ci li re te sumji li mu .i li mu li ze li pare .i li pare li ci li pamu .i coi do'u .i li pamu li ze li rere .i li rere li xa li rebi .i claxu lo temci pe lo nu za'ure'u jelgau .i li rexa li mu li cipa .i uo sumji fa li munopaki'o xarereki'o zecipa
— .i munopaki'oki'o mo
— .i ua do za'o xu zvati .i munopaki'oki'o .y. .i mi na za'o djuno .i .ei mi gunka lo tai mutce .i mi junri .i mi na se zdile lo xalbo .i li re li mu li ze .i .y.
— .i munopaki'oki'o mo —sei lo cmalu noltru noi noroi lo nu jmive cu sisti tu'a lo preti ca lo nu ba'o cusku py. cu za'ure'u cusku
ni'o lo cu'upre cu lafti lo stedu
— .i mi ze'a lo nanca be li muvo be'o poi nu mi xabju lo vi plini cu cipo'oroi se dicra .i lo pamoi cu fasnu pu za lo nanca be li rere gau lo cakcinki noi lo cevni ku po'o cu djuno lo du'u ke'a farlu fi makau .i cy. se sance lo rigni savru .ibo mi voroi srera lo nu sumji kanji .i lo remoi cu fasnu puza lo nanca be li papa ri'a lo nu mi sluji bilma .i mi pime'irauroi zajba .i mi claxu lo temci pe lo nu cunso cadzu .i mi junri .i lo cimoi .y. cu fasnu caku .i no'i li munopaki'o .y.
— .i munopaki'oki'o mo
ni'o lo cu'upre cu jimpe lo du'u li no te pacna lo nu smaji
— .i munopaki'oki'o cmalu dacti poi su'oroi se viska fi lo tsani
— .i xu lo sfani
— .i na go'i .i lo cmalu dacti poi carmi
— .i xu lo bifce
— .i na go'i .i lo cmalu ke sloskari dacti poi gasnu lo nu lo tolgunka cu ciksenva .i ku'i mi junri .i mi claxu lo temci pe lo nu ciksenva
— .i ua lo tarci xu
— .i drani .i lo tarci
— .i do mo munopaki'oki'o tarci
— .i munopaki'o xarereki'o zecipa tarci .i mi junri .i mi satci cusku
— .i do mo lo tarci
— .i ke'upei mi mo ty.
— .i go'i
— .i sa'u mi ty. ponse
— .i xu do ponse lo tarci
— .i go'i
— .i ku'i mi pu zgana lo nolraitru noi ...
— .i lo nolraitru cu ponse nagi'e turni .i mutce frica
— .i ma do prali lo nu do ponse lo tarci
— .i prali mi fa lo nu mi ricfu
— .i ma do prali lo nu do ricfu
— .i lo nu mi te vecnu lo drata tarci va'o lo nu da tolcri ty.
ni'o «lu tu —sei lo cmalu noltru fi ri cusku— cu milxe simsa lo mi pixydu'e lo ka ce'u pensi ta'i makau li'u»
ni'o ku'i ny. za'o preti cusku
— .i da ka'e ponse lo tarci ma
— .i ma ponse ty. —sei lo cu'upre fau lo nu fengu cu spusku
— .i mi na djuno .i noda go'e
— .i seki'ubo mi ponse ty. lo nu mi pamoi lo pensi be la'e di'u
— .i xu la'e di'u banzu
— .i li'a go'i .i va'o lo nu do tolcri lo tabykrili poi noda ke'a ponse zo'u do ty. ponse .i va'o lo nu do stufa'i lo daplu poi noda ke'a ponse zo'u do dy. ponse .i va'o lo nu do pamoi lo te sidbo be fi da gi'e rejgau zo'u do ponse da .i mi ponse lo tarci lo nu no prenu pu tu'a mi cu pacna lo nu ponse ty.
— .i la'e di'u jetnu —sei lo cmalu noltru cu cusku— .i do ty. mo
— .i mi ty. jitro .i mi ty. kancu gi'e za'ure'u kancu —sei lo cu'upre cu cusku— .i nandu .i ku'i mi junri
ni'o lo cmalu noltru za'o na se mansa
— .i va'o lo nu mi ponse lo nebyta'u zo'u mi kakne lo nu mi ny. punji lo sruri be lo cnebo gi'e dasni .i va'o lo nu mi ponse lo xrula zo'u mi kakne lo nu mi xy. crepu gi'e bevri .i ku'i do na kakne lo nu do crepu lo tarci
— .i na go'i .i ku'i mi kakne lo nu gau mi sorcu ty. lo banxa
— .i ma smuni di'u
— .i smuni fa lo du'u ge mi ciska lo te kancu be lo tarci lo cmalu pelji gibabo mi setca lo pelji lo se stela dacru
— .i xu mulno
— .i banzu
ni'o «lu zdile —sei lo cmalu noltru cu pensi— .i pemci tarti .i ku'i na junri mutce li'u»
ni'o lo cmalu noltru cu mutce frica lo makcu prenu lo ka makau sidbo lo se junri ce'u
— .i mi —sei ny. di'a cusku— cu ponse lo xrula noi mi jaursabji ke'a ca ro djedi .i mi ponse lo ci je'erma'a noi mi derlumci ke'a ca ro jeftu .i mi derlumci lo paboi jy. poi cando ku'o ji'a .i da noroi djuno .i prali lo mi je'erma'a .e lo mi xrula lo nu mi ponse .i ku'i na prali lo tarci tu'a do
ni'o lo cu'upre cu kargau lo moklu gi'eku'i pensi noda poi spusku ke'a .i lo cmalu noltru cu cliva
ni'o «lu lo makcu prenu ja'asai cizra mutce li'u» se cusku lo cmalu noltru ri ca lo nu litru
ni'o ni'o pavo mo'o
ni'o lo mumoi plini cu mutce lo ka cizra .i py. cmalu traji fo lo romei .i lo canlu cu satci banzu lo nu canlu lo gubni tergusni joi lo tergusni cikygau .i lo cmalu noltru na snada lo nu jimpe lo du'u makau prali bu'u lo pagbu be lo kensa bu'u lo plini noi claxu lo zdani .e lo se xabju ku'o fi lo gubni tergusni .e lo tergusni cikygau .i ku'i ny. fi ny. cusku fe di'e
ni'o «lu ju'ocu'i lo vu nanmu cu tolracli .i ku'i tu mleca lo nolraitru .e lo sezyjgidu'e .e lo cu'upre .e lo pixydu'e lo ka tolracli .i lo jibri be tu cu se smuni do'anai .i lo nu tu cikygau lo tergusni cu panra lo nu jbegau lo cnino tarci .a lo xrula .i lo nu tu cadgau lo tergusni cu sipri'a lo tarci .a lo xrula .i lo jibri cu melbi .i jy. te prali je'u ki'u lo nu jy. melbi li'u»
ni'o ny. ca lo nu tolcliva lo plini cu sinma rinsa lo cikygau
— .i coi do'u .i ki'u ma do puzi cadgau lo do tergusni
— .i lo javni —sei lo cikygau cu spusku— .i ko cerni zanfri
— .i ma se javni
— .i lo nu cadgau lo mi tergusni .i ko vanci zanfri
ni'o cy. boi za'ure'u cikygau ty.
— .i ku'i ki'u ma do puzi za'ure'u cikygau ta
— .i lo javni —sei lo cikygau cu spusku
— .i mi na jimpe —sei lo cmalu noltru cu cusku
— .i .einai jimpe da —sei lo cikygau cu cusku— .i lo javni cu javni .i ko cerni zanfri
ni'o cy. cadgau lo cy. tergusni
ni'o baku cy. sudgau lo mebri sepi'o lo xunre kurfa boxfo
— .i mi gunka lo malnandu .i puzu racli .i mi pu cadgau ca lo cerni gi'e cikygau ca lo vanci .i mi surla ze'a lo donri velvi'u gi'e sipna ze'a lo nicte velvi'u
— .i xu ba la'e di'u lo javni ba'o cenba
— .i lo javni na cenba —sei lo cikygau cu cusku— .i la'e di'u sa'e nabmi .i lo plini ca'o lo nanca cu zenba lo ka sutra fa lo nu carna .ije lo javni na cenba
— .i ni'i mo —sei lo cmalu noltru cu cusku
— .i ni'iku caku py. mulcarna paroi ro mentu .ije mi claxu lo nu surla poi snidu be li pa ji'asai .i mi cikygau gi'e cadgau paroi ro mentu
— .i .u'i lo djedi cu mentu bu'u lo medomoi
— .i .u'inaisai —sei lo cikygau cu cusku— .i mi'o ba'o tavla simxu ze'a lo masti
— .i xu lo masti
— .i go'i .i lo mentu be li cino .i va'i lo djedi be li cino .i ko vanci zanfri
ni'o cy. boi za'ure'u cikygau lo cy. tergusni
ni'o lo cmalu noltru cu catlu gi'e nelci lo cikygau noi tai bigysi'a lo javni .i ny. morji fi lo solri nu canci noi ny. pu ta'e sisku ta'i lo nu bevri lo ny. stizu .i ny. djica lo nu sidju lo ny. pendo
— .i .e'u .i mi se slabu lo tadji be lo nu do surla ca lo nu do djica
— .i mi roroi djica —sei lo cikygau cu cusku
ni'o je'u da ka'e bigysi'a je lazni
ni'o lo cmalu noltru di'a cusku
— .i lo do plini tai cmalu ja'e lo nu do ka'e sruri py. fau ci nu stapa .i lo nu do masno cadzu cu banzu lo nu do ze'e stali lo solri mlana .i do ca lo nu do djica lo nu surla cu cadzu .i lo donri ba ranji lo do se djica
— .i prali mi la'e di'u fa na'ebo lo mutce —sei lo cikygau cu cusku— .i lo pukrai be mi cu nu sipna
— .i na zanfunca —sei lo cmalu noltru cu cusku
— .i na zanfunca —sei lo cikygau cu cusku— .i ko cerni zanfri
ni'o cy. cadgau lo cy. tergusni
ni'o «lu tu —sei lo cmalu noltru fi vo'a ca lo nu ca'o litru cu cusku— tu so'emu'ei se tolsinma ro lo drata no'u lo nolraitru .e lo sezyjgidu'e .e lo pixydu'e .e lo cu'upre .i ku'i tu se steci lo ka na simlu fi mi fe lo ka se ckasu kakne .i ju'ocu'i la'e di'u se mukti lo nu tu se cuntu tu'a lo na'e sevzi be vo'a li'u»
ni'o ny. cnivasxu gi'e di'a cusku di'e fi ny.
ni'o «lu tu se steci lo ka mi ka'e pendo ce'u .i ku'i lo tu plini cu dukse lo ka cmalu .i claxu lo canlu be lo remei li'u»
ni'o lo cmalu noltru na darsi lo nu ny. juncru ny. lo du'u ny. xenru lo nu pu cliva lo vi se zandimna plini kei mu'i lo paki'ovovono solri nu canci pe ro cacra be li revo
ni'o ni'o pamu mo'o
ni'o lo xamoi plini cu dekto fi lo ka barda .i py. se xabju lo tolci'o nanmu poi ciska fi lo bratce cukta
— .i ua .a'e lo tumfakli'u —sei ny. ca lo nu co'a viska lo cmalu noltru cu krixa cusku
ni'o lo cmalu noltru cu tsebi'o lo jubme gi'e milxe ke surla vasxu .i uo ny. xa'o mutce litru
— .i do klama fi ma —sei lo tolci'o nanmu cu cusku
— .i lo rotsu cukta cu mo —sei lo cmalu noltru cu cusku— .i do vi zukte ma
— .i mi tedyskepre —sei lo tolci'o nanmu cu cusku
— .i lo tedyskepre cu mo
— .i prije certu lo nu djuno lo du'u makau se stuzi lo xamsi .e lo rirxe .e lo tcadu .e lo cmana .e lo kutytu'a
— .i mutce cinri —sei lo cmalu noltru cu cusku— .i ui uo lo fatci se jibri
ni'o ny. sruri catlu lo plini pe lo tedyskepre .i ny. pu noroi viska lo tai banli plini
— .i lo do plini cu melbi mutce .i xu da xamsi py.
— .i mi na ka'e djuno —sei lo tedyskepre cu cusku
— .i ua —sei lo cmalu noltru cu tolmanci— .i xu cmana py.
— .i mi na ka'e djuno —sei lo tedyskepre cu cusku
— .i xu tcadu .i xu rirxe .i xu kutytu'a
— .i ji'a mi na ka'e djuno —sei lo tedyskepre cu cusku
— .i ue ku'i do tedyskepre
— .i satci —sei lo tedyskepre cu cusku— .i ku'i mi na tumfakli'u .i mi ja'asai claxu lo tumfakli'u .i lo tedyskepre na vi je vu kancu lo tcadu .e lo rirxe .e lo cmana .e lo xamsi .e lo kutytu'a .i lo tedyskepre cu dukse lo ka vajni kei lo nu xalbo litru .i ty. na cliva lo ty. briju .i ku'i by. te vitke ty. lo tumfakli'u .i lo tedyskepre cu te preti fo lo tumfakli'u gi'e rejgau fi lo ri se morji .i va'o lo nu lo se morji be pa lo tumfakli'u cu simlu lo ka cinri zo'u lo tedyskepre cu gasnu lo nu da lanli lo marde be lo tumfakli'u
— .i ma krinu la'e di'u
— .iki'ubo lo tumfakli'u poi jitfa cusku cu betri lo tedyske .i ji'a go'i fa lo tumfakli'u poi pixydu'e
— .i ma krinu la'e di'u —sei lo cmalu noltru cu cusku
— .iki'ubo lo pixydu'e cu remei viska .iseki'ubo lo tedyskepre cu rejgau fo lo cmana remei seba'i lo cmana pamei
— .i mi se slabu da —sei lo cmalu noltru cu cusku— poi da'i mabla lo ka tumfakli'u
— .i la'e di'u cumki .i no'i va'o lo nu lo marde be lo tumfakli'u cu simlu lo ka xamgu zo'u da lanli lo se tumfakli'u be ty.
— .i xu da klama tezu'e lo nu viska
— .i na go'i .i pluja dukse .i ku'i da ca'icpe fi lo tumfakli'u lo nu ty. dunda lo ve jinvi .i mu'a va'o lo nu srana lo barda cmana zo'u da ca'icpe lo nu bevri lo barda rokci da
ni'o lo tedyskepre cu suksa cinmo
— .i ku'i do klama fi lo darno .i do tumfakli'u .i do ba skicu lo do plini mi
ni'o lo tedyskepre ca lo nu ba'o kargau lo ty. reicku cu kilgau lo ty. pinsi .i pamai da ciska lo nuzba be fi lo tumfakli'u fo lo pinsi .i da denpa lo nu lo tumfakli'u cu dunda lo ve jinvi kei fo lo nu xinmo ciska
— .i re'i —sei lo tedyskepre cu cusku
— .i .a'e bu'u lo mi zdani —sei lo cmalu noltru cu cusku— na cinri mutce .ibo roda cu cmalu .i mi ponse ci je'erma'a .i go'i re cikna je'erma'a .e pa cando je'erma'a .i ku'i da noroi djuno
— .i da noroi djuno —sei lo tedyskepre cu cusku
— .i mi ponse lo xrula ku ji'a
— .i mi'a na rejgau fo lo xrula —sei lo tedyskepre cu cusku
— .i ma krinu .i xy. traji lo ka melbi
— .i krinu fa lo nu lo xrula cu zasni
— .i ma smuni zo zasni
— .i lo tedyskecku —sei lo tedyskepre cu cusku— cu traji lo ka makau vamji ce'u kei fo lo ro cukta .i ty. noroi purci datni binxo .i rirci mutce fa lo nu lo cmana cu cenba lo ka stuzi .i rirci mutce fa lo nu lo xamsi cu toltisna lo xy. djacu .i mi'a ciska lo srana be lo vitno
— .i ku'i lo cando je'erma'a ka'e cikna binxo —sei lo cmalu noltru cu dicra— .i ma smuni zo zasni
— .i lo du'u lo je'erma'a cu cando gi'ikau cikna cu na vajni mi'a —sei lo tedyskepre cu cusku— .i vajni mi'a fa lo cmana .i cy. na cenba
— .i ku'i ma smuni zo zasni —sei lo cmalu noltru noi noroi lo nu jmive cu sisti tu'a lo preti ca lo nu ba'o cusku py. cu za'ure'u cusku
— .i smuni fa lo du'u da se ckape lo nu da zi canci
— .i xu lo mi xrula cu se ckape lo nu xy. zi canci
— .i li'a go'i
ni'o «lu lo mi xrula cu zasni —sei lo cmalu noltru fi ny. cu cusku— .ije xy. ponse vo kinli po'o tepi'o lo nu bandu xy. lo munje .ije mi cliva xy. ja'e lo nu xy. nonkansa bu'u lo mi zdani li'u»
ni'o la'e di'u pamoi lo nu ny. xenru cinmo .i ku'i ny. za'ure'u virnu binxo
— .i do stidi lo nu mi vitke fi ma kei mi —sei ny. preti cusku
— .i lo plini po'u la .terd. —sei lo tedyskepre cu spuda— .i ty. zabna misno
ni'o lo cmalu noltru cu cliva fau lo nu senva lo ny. xrula
ni'o ni'o paxa mo'o
ni'o lo zemoi plini cu du la .terd.
ni'o la .terd. na fadni fi lo plini .i ty. vasru papapa nolraitru (to li'a na tolmorji fi lo xekri nolraitru toi) .e ze ki'o tedyskepre .e sonono ki'o cu'upre .e ze ki'o munono ki'o pixydu'e .e cipapa ki'o ki'o sezyjgidu'e .i va'i vasru ji'i re ki'o ki'o ki'o makcu prenu
ni'o tezu'e lo nu dunda lo sidbo be lo du'u la .terd. cu barda sela'u makau cu cusku fa mi lo sedu'u pu lo nu lo dikca cu se finti cu sarcu ve'a lo xa bratumla fa lo se sonci be voxare ki'o mupapa tergu'i cikygau
ni'o ri'a la'e di'u lo banli cu jvinu fi lo darno .i lo nu muvdu pe lo se sonci cu se javni tai tu'a lo me lo dansu bende moi .i pamoi fa lo tergu'i cikygau pe lo nuzlo joi lo sralo .i ba bo cy. ca lo nu ba'o cikygau lo cy. tergu'i cu sipna .i babo nerkla ca lo vo'a krefu lo nu dansu kei fa lo tergu'i cikygau pe lo jungo joi lo gugdrsiberi .i ba bo cy. ji'a canci ti'a lo murta .i ba bo za'umoi fa lo tergu'i cikygau pe lo rusko joi lo xindo .i ba bo lo me lo friko joi lo ropno moi .i ba bo lo me lo ketco moi .i ba bo lo me lo bemro moi .i noroi lo cikygau pu srera lo nu porsi nerkla lo tsina .i pu banli
ni'o ge po'o lo cikygau be lo pa tergu'i pe lo berti jedjipno gi po'o lo cy. kansa pe lo pa tergu'i pe lo snanu jedjipno cu lifri lo nu cando je surla jmive .i lo remei cu gunka reroi ro nanca
ni'o ni'o paze mo'o
ni'o lo nu djica lo nu zdile cu ta'e se jalge lo nu milxe jifsku .i mi na pu mutce lo ka stace do lo nu mi do tavla lo cikygau .i ckape fa lo nu mi sibgau lo jitfa lo mi'o terdi lo na se slabu be ty. .i lo ro remna cu se canlu lo cmalu pe lo terdi sefta .i lo reki'oki'oki'o xabju be la .terd. va'o lo nu sanli gi'e milxe tagji tai tu'a lo nunjmaji cu frili mapti lo gubni panka poi clani minli li reno gi'e ganra minli li reno .i lo rolremymei ka'e se vasru lo cmarai daplu be fi la .pasifik.
ni'o li'a lo makcu prenu na krici la'e di'u .i py. se xanri lo nu mutce canlu .i py. jinvi lo du'u py. vajni tai tu'a lo tricubaubau .i .e'u do stidi lo du'u py. kanji .i py. neltce lo namcu .i la'e di'u pluka py. .i ku'i ko na malpli lo do temci lo nu tai pensi .i na prali .i do lacri mi
ni'o lo cmalu noltru ca lo nu ba'o tolcliva lo terdi cu mutce se spaji lo nu viska no prenu .i ny. co'a terpa lo nu srera tu'a lo plini kei ca lo nu lo lunra skari djine cu desku bu'u lo canre
— .i coi do'u —sei lo cmalu noltru cu cusku
— .i coi do'u —sei lo since cu cusku
— .i mi lo plini po'u ma ba'o farlu —sei lo cmalu noltru cu retsku
— .i la .terd. di'o lo friko —sei lo since cu spusku
— .i ua ja'o no prenu cu zvati la .terd.
— .i ti kutytu'a .i no prenu cu zvati lo kutytu'a .i la .terd. cu barda —sei lo since cu cusku
ni'o lo cmalu noltru cu tsebi'o lo rokci gi'e selfargau lo kanla lo tsani
— .i mi retsku fi mi —sei ny. cusku— fe lo sedu'u xukau lo tarci cu se cikygau mu'i lo nu roda ka'e tolcri lo medamoi ca lo djedi .i ko catlu lo mi plini .i tu mi'o satci gapru .i ku'i .oi tu darno
— .i tu melbi —sei lo since cu cusku— .i do vi zukte fi ma
— .i mi se nabmi tu'a lo xrula —sei lo cmalu noltru cu cusku
— .i ua —sei lo since cu cusku
ni'o lo remei cu smaji
— .i lo remna cu zvati ma —sei lo cmalu noltru di'a cusku— .i da bu'u lo kutytu'a cu milxe lo ka nonkansa
— .i da nonkansa ne'a lo remna ji'a —sei lo since cu cusku
— .i do zdile danlu —sei ny. cusku— .i do cinla tai tu'a lo degji
— .i ku'i mi vlimau lo degji be lo nolraitru —sei lo since cu cusku
ni'o lo cmalu noltru cu cisma
— .i do na mutce vlipa .i do na se tuple ji'asai .i do na ka'e litru ji'asai
— .i mi zmadu lo bloti lo ni ka'e bevri do lo darno —sei lo since cu cusku
ni'o sy. srubi'o lo tupne'o be lo noltru tai tu'a lo solji djine
— .i lo se pencu be mi zo'u mi benji py. lo dertu poi krasi py. —sei sy. za'o cusku— .i ku'i do curve gi'e klama fi lo tarci
ni'o lo cmalu noltru spuda noda
— .i mi do kecti .i do tai ralci bu'u lo vi rokci terdi .i mi kakne lo nu sidju du ca lo nu do dukse claxu lo do terdi .i mi kakne .y.
— .i je'edo'u mi mulno jimpe —sei lo cmalu noltru cu cusku— .i ku'i ki'u ma do ta'e tavla sepi'o lo nabmi
— .i mi dafsabji ro boi ny. —sei lo since cu cusku
ni'o lo remei cu smabi'o
ni'o ni'o pabi mo'o
ni'o lo cmalu noltru cu greli'u lo kutytu'a gi'e penmi lo xrula po'o .i lo xrula noi se pezli cida .i lo xrula noi tolvai
— .i coi do'u —sei lo noltru cu cusku
— .i coi do'u —sei lo xrula cu cusku
— .i lo remna ma zvati —sei lo cmalu noltru cu clite retsku
ni'o lo xrula pu paroi viska lo nu lo karvana zo'a klama
— .i lo remna xu .i zasti fa ji'i ze boi ry. .i mi ry. pu ganse za lo nanca be li so'o .i ku'i da noroi djuno lo du'u ry. zvati makau .i lo brife ry. muvgau .i ry. claxu lo genja .i la'e di'u ry. mutce fanza
— .i co'o do'u —sei lo cmalu noltru cu cusku
— .i co'o do'u —sei lo xrula cu cusku
ni'o ni'o paso mo'o
ni'o lo cmalu noltru cu cpare lo galtu cmana .i lo po'o cmana poi ze'e pu slabu ny. cu me lo ci je'erma'a noi galtu dunli lo ny. cidni .i ny. pilno lo cando je'erma'a lo nu zutse .i «lu mi to'o lo cmana poi galtu tai ti —sei ny. sezysku— cu ka'e viska piro lo terdi .e ro remna li'u» .i ku'i ny. viska no na'e bo lo mutce kinli ke rokci jesni
— .i coi do'u —sei ny. cipra cusku
— .i coi do'u coi do'u coi do'u —sei lo snaminra cu spuda
— .i do mo —sei lo cmalu noltru cu cusku
— .i do mo .i do mo .i do mo —sei lo snaminra cu spuda
— .i .e'o ko mi pendo .i mi nonkansa —sei ny. cusku
— .i mi nonkansa .i mi nonkansa .i mi nonkansa —sei lo snaminra cu spuda
ni'o «lu cizra terdi —sei ny. pensi— .i ty. sudga gi'e kinli gi'e silna .i lo remna na se xanri .i ri ke'usku lo se cusku be da .i bu'u lo memimoi mi ponse lo xrula .i xy. roroi pamoi cusku li'u»
ni'o ni'o reno mo'o
ni'o lo cmalu noltru ba lo nu ze'u litru lo canre .e lo rokci .e lo snime cu facki lo dargu uo .i ro dargu cu dargu lo remna
— .i coi do'u —sei ny. cusku
ni'o ta xrula purdi fi lo preja pezli rozgu
— .i coi do'u —sei lei rozgu cu cusku
ni'o lo cmalu noltru ry. catlu .i ro boi ry. simsa lo ny. xrula
— .i do mo —sei ny. noi mutce spaji cu retsku fi ry.
— .i mi rozgu —sei lei rozgu cu spusku
— .i ua —sei lo cmalu noltru cu cusku
ni'o ny. mutce badri .i lo ny. rozgu pu cusku lo du'u ry. cu ropamei lo rozgu ve'e lo munje .i ue ti se zvati muki'o rozgu noi simsa ku'o bu'u pa po'o purdi
ni'o «lu ry. ba mutce se fanza va'o lo nu da'i ry. viska tu .i ry. ba mutce kafke gi'e simlu lo ka pu'o mrobi'o kei tezu'e lo nu rivbi lo nu se ckasu .i mi ba bilga lo nu simlu lo ka kurji .iki'ubo va'o lo drata ry. tezu'e lo nu culgau mi ji'a cu ba curmi lo nu ry. ca'a mrobi'o li'u»
ni'o ny. za'o sezysku «lu mi pu krici lo du'u mi ricfu lo ropamei xrula .i ku'i mi ponse lo po'o fadni rozgu .i go'i ri .e lo ci je'erma'a noi galtu dunli lo mi cidni zi'e noi ju'ocu'i pa ke'a ze'e ba cando .i va'o la'e di'u mi na banli noltru li'u» .i ny. fau lo nu vreta lo srasu cu klaku
ni'o ni'o repa mo'o
ni'o caku tolcanci fa lo lorxu
— .i coi do'u —sei lo lorxu cu cusku
— .i coi do'u —sei lo cmalu noltru noi carna gi'e ku'i viska no da cu clite spuda
— .i mi vi zvati —sei lo voksa cu cusku— .i cnita lo plisytricu
— .i do mo —sei lo cmalu noltru cu cusku— .i do mutce melbi
— .i mi lorxu —sei lo lorxu cu cusku
— .i ko mi kansa lo nu kelci —sei lo cmalu noltru cu stidi— .i mi tai badri
— .i mi do ka'enai kansa lo nu kelci —sei lo lorxu cu cusku— .i mi na ba'o se tolcicygau
— .i ua .u'u —sei lo cmalu noltru cu cusku
ni'o ku'i ny. ba lo nu pensi cu jmina cusku di'e
— .i ma smuni zo tolcicygau
— .i do na vi xabju —sei lo lorxu cu cusku— .i do ma sisku
— .i mi sisku lo remna —sei lo cmalu noltru cu cusku— .i ma smuni zo tolcicygau
— .i lo remna —sei lo lorxu cu cusku— cu ponse lo celxarci gi'e kalte .i mutce fanza .i ry. ba'orgau lo jipci .i la'e di'u po'o ry. cinri .i xu do sisku lo jipci
— .i na go'i —sei lo cmalu noltru cu cusku— .i mi sisku lo pendo .i ma smuni zo tolcicygau
— .i go'i fa lo mutce se tolmorji —sei lo lorxu cu cusku— .i smuni fa lo du'u zbasu lo te jorne
— .i «lu zbasu lo te jorne li'u» xu
— .i li'a —sei lo lorxu cu cusku— .i do ga'a mi za'o cmalu nanla po'o gi'e simsa panonoki'o cmalu nanla .i mi do na nitcu .i ji'a do mi na nitcu .i mi ga'a do lorxu po'o gi'e simsa panonoki'o lorxu .i ku'i mi'o va'o lo nu da'i do mi tolcicygau cu ba simxu lo ka nitcu .i do ba se steci ma'i mi fi lo munje zvati .i mi ba se steci ma'i do fi lo munje zvati
— .i mi co'a jimpe —sei lo cmalu noltru cu cusku— .i lo xrula zo'u pe'i xy. mi pu ba'o tolcicygau
— .i cumki —sei lo lorxu cu cusku— .i la .terd. cu jai bu'u viska lo mutce vrici
— .i ue na go'e bu'u la .terd. —sei lo cmalu noltru cu cusku
ni'o lo lorxu cu simlu lo ka kucli
— .i xu bu'u lo drata terdi
— .i go'i
— .i xu lo kalte cu zvati lo di'u nai terdi
— .i na go'i
— .i ua .a'u .i xu lo jipci
— .i na go'i
— .i no da prane —sei lo lorxu cu dricmo
ni'o ku'i lo lorxu cu xruti lo ri sidbo
— .i lo mi nunjmive cu stodi .i mi kalte lo jipci .i lo remna mi kalte .i lo ro jipci cu simsa simxu .i lo ro remna cu simsa simxu .ija'ebo mi milxe se tolzdi .i ku'i lo mi nunjmive va'o lo nu da'i do mi tolcicygau cu ba solri se gusni simlu .i mi ba se slabu lo sance be lo nu stapa be'o poi frica ro drata .i lo drata nu stapa cu ba rinka lo nu mi nitkla lo tumloi .i lo medomoi cu ba rinka lo nu mi barkla lo kevzda tai tu'a lo zgike .i ji'a ko catlu .i xu do viska lo vu maxri foldi .i mi na citka lo nanba .i lo maxri mi nonselpli .i lo maxri foldi mi noda morjygau .i la'e di'u se badri .i ku'i do se kerfa lo se skari be lo solji .i seki'ubo ba manci ca lo nu do mi ba'o tolcicygau .i lo maxri noi se skari lo solji cu ba gasnu lo nu mi do pensi .i mi ba prami lo sance be lo brife be bu'u lo maxri
ni'o lo lorxu cu smabi'o gi'e ze'u catlu lo cmalu noltru
— .i .e'o ko mi tolcicygau —sei ly. cusku
— .i .au go'i —sei lo cmalu noltru cu spusku— .i ku'i mi na ponse lo mutce temci .i .ei mi facki za'u pendo gi'e co'a se slabu so'i da
— .i da se slabu no na'ebo lo se tolcicygau be vo'a —sei lo lorxu cu cusku— .i lo remna na za'o ponse lo temci pe lo nu co'a se slabu da .i ry. te vecnu lo mo'u se zbasu .i mu'igi na zasti fa lo vecnu be lo nu da pendo gi lo remna na za'o se pendo .i ganai do djica lo pendo gi .e'e ko mi tolcicygau
— .i .ei mi zukte ma —sei lo cmalu noltru cu cusku
— .i .ei denpa vrude —sei lo lorxu cu spuda— .i pamai do zutse lo srasu ki mi vu ru'e .i mi do catlu ra'i lo kojna be lo kanla .i do noda cusku .i lo bangu cu krasi lo nu jmisre .i ku'i ca ro djedi do ka'e zutse za lo milxe mleca
ni'o ca lo bavlamdei lo cmalu noltru cu xruti
— .i xagmau fa lo nu xruti ti'u lo mintu —sei lo lorxu cu cusku— .i va'ogi do tolcliva ti'u mu'a li paxa gi ti'u li pamu mi co'a gleki .i pa'a gi zenba lo ka makau tcika gi mi zenba lo ni gleki .i ti'u li paxa mi xa'o tolsurla je dunku .i mi facki lo du'u makau jdima lo nu gleki .i ku'i va'ogi do tolcliva ti'u lo cunso gi mi noroi djuno lo du'u .ei ti'u makau mi dasygau lo risna .i lo ritli cu sarcu
— .i lo ritli ki'a —sei lo cmalu noltru cu cusku
— .i ry. ji'a dukse lo ka se tolmorji —sei lo lorxu cu cusku— .i ry. rinka lo nu lo djedi cu frica lo drata djedi .i co'e lo cacra lo drata cacra .i mu'a ritli fi lo mi kalte lo nu dansu ca lo vondei fi'o kansa lo nixli pe lo tcadu .isemu'ibo lo vondei cu se manci djedi .i mi litru fe'eco'u lo vanjbafoi .i va'ogi da'i lo kalte ta'e dansu ca lo cunso gi ge lo djedi cu simsa simxu gi mi noroi zifre
ni'o tai la'e de'u lo cmalu noltru cu tolcicygau lo lorxu .i lo jai ca cliva cu jibni
— .i uinai —sei lo lorxu cu cusku— .i mi ba klaku
— .i do fuzme —sei lo cmalu noltru cu cusku— .i mi na pu djica lo nu do se xlali .i ku'i do pu djica lo nu mi do tolcicygau
— .i li'a —sei lo lorxu cu cusku
— .i ku'i ue do ba klaku —sei lo cmalu noltru cu cusku
— .i li'a —sei lo lorxu cu cusku
— .i ju'o noda do prali
— .i mi se prali —sei lo lorxu cu cusku— mu'i tu'a lo skari be lo maxri
ni'o baku ly. jmina cusku
— .i ko klama gi'e rere'u catlu lei rozgu .i do ba jimpe lo du'u lo medomoi cu pamei bu'u lo munje .ibabo do xruti tezu'e lo nu tolrinsa mi .i mi ba dunda lo mipri do
ni'o lo cmalu noltru cu klama gi'e rere'u catlu lei rozgu
— .i do nasai simsa lo mi rozgu .i do za'o menoda .i no prenu do ba'o tolcicygau .ije do no prenu ba'o tolcicygau .i do ca ckaji tai lo nu lo mi lorxu pu ckaji .i ly. pu na zmadu lo lorxu poi simsa panonoki'o drata .i ku'i mi ly. mi pendygau .i ly. pamei bu'u lo munje
ni'o lei rozgu cu se fanza
— .i do melbi .i ku'i do kunti —sei ny. za'o cusku— .i lo prenu na morsi seva'u do .i .i'a lo mi rozgu zo'u lo da'i fadni ke pagre klama cu jinvi lo du'u ry. do simsa .i ku'i ry. po'o zmadu ro do lo ka vajni .iki'ubo ba'e ry. zo'u mi ry. jaursabji .iki'ubo ba'e ry. zo'u mi ry. punji lo cnita be lo blacygai .iki'ubo ba'e ry. zo'u mi ry. bandu sepi'o lo bifmarbi .iki'ubo ba'e ry. zo'u mi catra lo ciftoldi (to .eji'anai lo reji'ici da poi ba binxo lo toldi toi) .iki'ubo ba'e ry. zo'u mi tirna lo nu ry. pante gi'e sezyzarsku gi'e ji'asai su'oroi smaji .iki'ubo ry. memimoi lo rozgu
ni'o ny. xruti lo lorxu
— .i co'o —sei ny. cusku
— .i co'o —sei lo lorxu cu cusku— .i mi di'e mipri .i di'e sampu .i da xamgu ganse fi no na'ebo lo risna .i lo vajrai cu nonselji'u lo kanla
— .i lo vajrai cu nonselji'u lo kanla —sei lo cmalu noltru tezu'e lo nu morji cu fuksku
— .i lo temci poi do pu xaksu seva'u lo do rozgu cu rinka lo nu lo do rozgu cu tai vajni
— .i lo temci poi mi pu xaksu seva'u lo mi rozgu —sei lo cmalu noltru tezu'e lo nu morji cu co'e
— .i lo remna na za'o morji lo di'u jetnu —sei lo lorxu cu cusku— .i ku'i .ei do na tolmorji .i do co'a ze'eba fuzme roda poi do ba'o tolcicygau .i do fuzme lo do rozgu
— .i mi fuzme lo mi rozgu —sei lo cmalu noltru tezu'e lo nu morji cu fuksku
ni'o ni'o rere mo'o
— .i coi do'u—sei lo cmalu noltru cu cusku
— .i coi do'u—sei lo gartro cu cusku
— .i do bu'u zukte ma —sei lo cmalu noltru cu cusku
— .i mi ganzu lo litru lo ki'omei —sei lo gartro cu cusku— .i mi benji lo trene poi marce ly. ku'o ga lo pritu gi lo zunle
ni'o lo selgu'i sutre'e noi cmoni tai lo lindi cu rinka lo nu lo troku'a cu desku
— .i tu sutydji —sei lo cmalu noltru cu cusku— .i tu ma sisku
— .i lo nanmu pe lo ve trene zo'u ny. ji'asai na djuno —sei lo gartro cu cusku
ni'o cmoni klama fa'a lo dukti fa lo remoi ke selgu'i sutre'e
— .i xu tu xa'o xruti —sei lo cmalu noltru cu retsku
— .i tu na mintu —sei lo gartro cu cusku— .i nu canja
— .i xu tu na gleki bu'u lo pu se zvati be tu
— .i da noroi gleki bu'u lo se zvati be da —sei lo gartro cu cusku
ni'o cmoni fa lo lindi po'u lo cimoi ke selgu'i sutre'e
— .i xu tu jersi lo pamoi litru —sei lo cmalu noltru cu retsku
— .i tu jersi noda —sei lo gartro cu cusku— .i tu ne'i sipna .ija tu sipfru .i lo verba ku po'o cu catke lo nazbi re'o lo blaci
— .i lo verba ku po'o djuno lo du'u sisku makau —sei lo cmalu noltru cu co'e— .i vy. xaksu lo temci mu'i tu'a lo bukpu selkeipre .i sy. binxo lo vajni mutce .i mu'igi da'i da sy. lebna vy. gi vy. klaku
— .i vy. se zanfu'a —sei lo gartro cu cusku
ni'o ni'o reci mo'o
— .i coi do'u —sei lo cmalu noltru cu cusku
— .i coi do'u —sei lo vecnu cu cusku
ni'o vy. vecnu lo xagze'a bidju poi mansa lo taske .i da tunlo by. boi paroi lo jeftu gi'enai za'o lifri lo nu nitcu lo nu pinxe
— .i ki'u ma do ta vecnu —sei lo cmalu noltru cu cusku
— .i mutce tolxaksu lo temci —sei lo vecnu cu cusku— .i lo certu ba'o kanji .i da tolxaksu lo mentu be li muci ca ro jeftu
— .i da pilno lo mentu be li muci ma
— .i da my. pilno lo se djica
ni'o «lu mi —sei lo cmalu noltru cu sezysku— va'ogi da'i ka'e pilno lo mentu be li muci gi masno cadzu seka'a lo jinto
ni'o ni'o revo mo'o
ni'o nau djedi li bi fa lo mi nu spofu bu'u lo kutytu'a .i mi pu tirna lo lisri be lo vecnu ca lo nu pinxe lo romoi dirgo be lo mi djacu sorcu
— .i uo —sei mi fi lo cmalu noltru cu cusku— .i mutce melbi fa lo do se morji .i ku'i mi za'o na cikre lo mi vinji .i mi na za'o ponse lo se pinxe .i mi ji'a gleki romu'ei lo du'u mi ka'e masno cadzu seka'a lo jinto
— .i lo mi pendo no'u lo lorxu cu cusku .y.
— .i doi dirba cmalu zanpre na za'o srana lo lorxu
— .i ma krinu
— .i lo nu ba morsi ri'a lo nu taske
ni'o ny. na jimpe lo mi se racli .i ny. spuda di'e
— .i xamgu da fa lo nu da pu se pendo romu'ei ji'asai lo du'u da ba morsi .i mi mutce gleki lo nu mi se pendo lo lorxu
ni'o «lu tu na merli lo ckape —sei mi fi mi cusku— .i tu noroi xagji ja taske .i lo solgu'i toltce tu banzu li'u»
ni'o ku'i ny. catlu mi gi'e spuda lo mi se pensi
— .i mi ji'a taske .i .e'e mi'o sisku lo jinto
ni'o mi frumu lo nu tatpi .i fenki fa lo nu cunso sisku lo jinto lo barda pe lo kutytu'a .i ku'i mi'a co'a cadzu
ni'o ca lo nu mi'a ba'o smaji cadzu ze'a lo cacra be li so'o kei lo nicte cu farlu .i lo tarci co'a gusni .i mi ty. ganse tai lo nunsenva fau lo nu mi milxe glabi'a ri'a lo nu mi taske .i lo valsi pe lo cmalu noltru cu dansu bu'u lo mi se morji
— .i ke'u do ji'a taske xu —sei mi retsku
ni'o ku'i ny. na spuda lo mi preti .i ny. sampu cusku di'e
— .i lo djacu ka'e xamgu lo risna ku ji'a
ni'o mi na jimpe lo ny. danfu .i ku'i mi smaji .i mi ja'asai djuno lo du'u .einai da retsku fi ny.
ni'o ny. tatpi .i ny. co'a zutse .i mi co'a zutse ne'a ny. .ibabo za lo smaji ny. cusku di'e
— .i lo tarci cu melbi mu'i tu'a lo xrula poi da ke'a na viska
ni'o mi spusku zo li'a gi'e catlu secau lo nu tavla kei lo canre terplo ni'a lo lunra
— .i lo kutytu'a cu melbi —sei ny. jmina cusku
ni'o .i'a jetnu .i mi ze'e prami lo kutytu'a .i da zutse lo canre ma'acma .i da viska node .i da tirna node .i ku'i smaji carmi
— .i melgau lo kutytu'a fa la'e di'e —sei lo cmalu noltru cu cusku— .i ky. mipri lo jintyke'a bu'u da
ni'o spaji mi fa lo nu suksa jimpe fi lo selmipri seldirce be lo canre .i mi ca lo nu verba cu xabju lo tolci'o zdani noi ranmi ke'a fa lo nu ke'a mipri lo vamtce .i li'a noroi ku da snada lo nu tolcri kei gi'a ju'ocu'i sisku ji'asai .i ku'i vy. selmancygau piro lo zdani .i lo mi zdani cu mipri da bu'u lo condi pe lo zy. risna
— .i ie —sei mi fi lo cmalu noltru cu cusku— lo zdani lo tarci lo kutytu'a zo'u lo rinka be lo nu melbi cu nonselji'u
— .i mi gleki —sei ny. cusku— lo nu do tugni lo mi lorxu
ni'o lo cmalu noltru cu sipna binxo .iseki'u bo mi jgari ny. lo mi birka gi'e di'a litru .i mi cinmo .i mi te simlu lo ka bevri lo ralci vamtce .i mi te simlu lo ji'a sai ka bu'u lo terdi no da zmadu fi lo ka ralci .i mi catlu fi'o te gusni lo lunra lo kandi mebri .e lo ganlo kanla .e lo kerfa bakfu noi desku ri'a lo brife .i mi cusku fi mi fe «lu tu poi mi viska cu pilka po'o .i lo vajni traji cu nonselji'u li'u»
ni'o lo milxe kalri ctebi cu jarco lo xadba nu cisma .isemu'ibo mi fi mi za'o cusku «lu mi cinmo lo tai tsali lo vi sipna ke cmalu noltru ri'a lo nu ti pamsto lo xrula .i ri'a lo pixra be lo rozgu be'o noi dirce ne'i ti tai lo fagri pe lo tergu'i ca ji'asai lo nu ti sipna li'u» .i mi jijnu lo du'u ny. semau ralci .i sarcu fa lo nu bandu lo tergu'i .i lo brife kantu ka'e cadri'a ty.
ni'o mi ca lo nu ca'o tai cadzu cu tolcri lo jintyke'a ca lo cerni murse
ni'o ni'o remu mo'o
— lo remna —sei lo cmalu noltru cu cusku— cu setca vo'a lo sutra trene .i ku'i na morji lo du'u ry. sisku makau .i seki'ubo ry. xanka gi'e carna
ni'o ny. jmina cusku di'e
— .i na se vamji lo raktu
ni'o lo jintyke'a poi mi'a tolcliva ke'a cu na simsa lo jintyke'a pe la .sa'aras. .i lo jintyke'a pe la .sa'aras. cu sampu kevna te kakpa lo canre .i lo vu zvati cu simsa lo tcadu jintyke'a .i ku'i noda vu tcadu .i mi jinvi lo du'u mi senva
— .i cizra —sei mi fi lo cmalu noltru cu cusku— .i roda bredi .i lo pulni .e lo baktu .e lo skori
ni'o ny. cmila gi'e pencu lo skori gi'e cargau lo pulni .i lo pulni cu cmoni tai lo nu cmoni fa lo tolci'o selbifmre ca lo nu lo brife ba'o ze'u sipna
— .i do tirna —sei lo cmalu noltru cu cusku— .i mi'o cikygau lo jintyke'a .i jy. sanga
ni'o mi na djica lo nu ny. bairgau
— .i .e'e mi zukte —sei mi fi ny. cusku— .i dukse lo kamtilju tu'a do
ni'o mi masno lafti lo baktu fe'eco'u lo korbi .i mi by. snura punji ky. .i lo mi kerlo cu se stali lo se sanga be lo pulni .i mi bu'u lo djacu noi za'o desku cu viska lo nu lo solri cu desku
— .i mi taske lo vu djacu —sei lo cmalu noltru cu cusku— .i ko dy. mi dunda ja'e lo nu mi pinxe
ni'o ua mi jimpe lo du'u ny. pu sisku makau
ni'o mi lafti lo baktu fe'eco'u lo ny. ctebi .i ny. pinxe fau lo nu lo kanla cu ganlo .i kukte tai lo tersla .i lo djacu cu ja'asai drata lo cidja .i dy. jbena lo nu cadzu ni'a lo tarci kei .e lo se sanga be lo pulni be'o .e lo nu lo mi birka cu bairgau .i dy. xamgu lo risna tai lo seldu'a .i ca lo nu mi verba kei lo gusni be fi lo xisnunjbe tricu be'o .e lo zgike be lo ctemidju jdari'i be'o .e lo kampu'a be lo cisma cu tai se gunma lo se dirce be lo xisnunjbe seldu'a be fi mi
— .i lo remna pe lo do terdi —sei lo cmalu noltru cu cusku— cu te cange lo pa purdi lo muki'o rozgu gi'e na tolcri lo se sisku be vo'a py.
— .i ry. na tolcri —sei mi spusku
— .i ku'i ka'e tolcri lo se sisku be vo'a lo pa rozgu .a lo djacu spisa
— .i li'a —sei mi spusku
ni'o lo cmalu noltru cu jmina cusku
— .i ku'i lo kanla na viska .i .ei sisku sepi'o lo risna
ni'o mi ba'o pinxe .i mi xamgu vasxu .i lo canre ca lo donri cfari cu skari lo bicyladru .i mi gleki lo nu bicyladru skari ku ji'a .i ki'u ma da'i mi badri
— .i .ei do zukte lo do se nupre —sei lo cmalu noltru noi za'ure'u zutse ti'a mi cu nalylau cusku
— .i lo ki'a se nupre
— .i do djuno .i lo molgai seva'u lo mi lanpanzi .i mi fuzme tu'a lo xrula
ni'o mi tolsetca lo mi pixra tocyja'e lo mi daski .i lo cmalu noltru cu viska ty. gi'e cmila cusku di'e
— .i lo do tricubaubau cu milxe simsa lo kobli
— .i ue
ni'o mi tai jgira tu'a lo tricubaubau
— .i lo do lorxu zo'u lo ly. kerlo cu milxe simsa lo jirna gi'e clani dukse
ni'o ny. za'ure'u cmila
— .i do na nulpai doi cmalu zanpre .i mi pu kakne lo nu pirfi'i no na'ebo lo ganlo sincrboua .a lo kalri sincrboua
— .i .o'u ba banzu —sei ny. cusku— .i lo verba cu djuno
ni'o mi seja'e pisfi'i lo molgai .i lo mi risna cu trati ca lo nu dunda
— .i do platu lo na se djuno be mi
ni'o ku'i ny. na spuda mi .i ny. cusku di'e
— .i ta'o lo nu mi farlu la .terd. zo'u lo bavlamdei cu detke'u
ni'o ba lo smaji ny. za'o cusku di'e
— .i mi pu farlu lo mutce jibni be ti
ni'o ny. xunbi'o
ni'o za'ure'uku mi secau lo nu jimpe lo du'u makau krinu cu lifri lo cizra nu dunku .i ku'i lo preti cu tolcanci mi
— .i ja'o na cunso fa lo nu do ca lo nu mi do pu pamoi penmi za lo djedi be li bi cu tai nonkansa cadzu vu lo minli be li ki'o ki lo ro se xabju stuzi .i xu do xruti lo se farlu be do
ni'o lo cmalu noltru za'ure'u xunbi'o
ni'o mi jmina cusku di'e fau lo nu senpi
— .i ki'u ju'ocu'i lo detke'u .y.
ni'o lo cmalu noltru za'ure'u xunbi'o .i ny. noroi spuda lo preti .i ku'i lo nu da xunbi'o cu sinxa tu'a zo go'i iepei
— .i uinai —sei mi cusku— mi terpa
ni'o ku'i ny. spusku di'e
— .i .ei do ca gunka .i .ei do cliva fa'a lo do minji .i mi bu'u denpa .i ko xruti ca lo bavlamvanci
ni'o ku'i mi na surbi'o .i mi morji lo lorxu .i da se ckape lo nu klaku kei lo nu da curmi lo nu tolcicygau da
ni'o ni'o rexa mo'o
ni'o mlana lo jintyke'a fa lo rokci bitmu temfesti .i mi ca lo nu xruti fi lo mi nungunka ca lo bavlamvanci cu darno viska lo mi cmalu noltru noi zutse lo vu galtu fau lo nu lo tuple cu dandu .i mi tirna lo nu ny. tavla
— .i ja'o xu do na morji —sei ny. cusku— .i na co'e bu'u ti sa'e
ni'o ju'o lo drata voksa cu spuda —sei za'a ny. di'e spusku
— .i ie go'i .i lo detri cu drani .i ku'i ti na stuzi
ni'o mi ca'o cadzu fa'a lo bitmu .i mi lo prenu za'o genai viska ginai tirna .iku'i lo cmalu noltru za'ure'u spusku di'e
— .i li'a .i do va viska lo krasi be lo mi tapsni bu'u lo canre .i .ei po'o do denpa mi ky. .i mi ba zvati ky. ca lo nicte
ni'o mi sepli lo bitmu lo mitre be li reno .i mi za'o viska noda
ni'o lo cmalu noltru di'a cusku di'e baza lo smaji
— .i xu do ponse lo zabna vindu .i ju'opei mi na ba ze'u cortu
ni'o mi se dicra fau lo nu lo risna cu trati .i ku'i mi za'o na jimpe
— .i nauku ko cliva —sei ny. cusku— .i mi djica lo nu mi dzikla
ni'o seja'e ku ba'e mi dzigau lo kanla fa'a lo dizlo be lo bitmu .ije ue mi plipe .i sraji fa'a lo cmalu noltru fa lo pelxu since poi catra da ze'i lo snidu be li cino .i mi ca lo nu sisku lo cecla lo mi daski cu co'a bajra .i ku'i ri'a lo sance be mi lo since cu ranti sakli lo canre tai lo djacu jetce poi mrobi'o .i sy. secau lo nu dukse sezysutygau cu se julne lo rokci fau lo nu kandi ke jinme savru
ni'o mi tolcliva lo bitmu ca lo satci mapti be lo nu co'a jgari fi lo birka fe lo mi cmalu zanpre noltru noi blabi tai lo snime
— .i ma mo .i ue xu do nau ta'e tavla lo since
ni'o mi ba'o luzgau lo ny. ze'e sloska nebyta'u .i mi ba'o cimgau lo ny. mebmla gi'e ba'o pixygau ny. .i caku mi na darsi lo nu za'o retsku .i ny. junri catlu mi gi'e srugau lo ny. birka lo mi cnebo .i mi ganse lo nu lo ny. risna cu rilgau tai da pe lo cipni poi mrobi'o ca lo nu ba'o cecla danti darxi ke'a .i ny. cusku di'e mi
— .i mi gleki lo nu do facki lo du'u makau nabmi lo do minji .i do ba kakne lo nu xruti lo zdani be do
— .i ta'i ma do djuno
ni'o mi ja'a pu pu'o jungau ny. lo du'u mi fa'e ro se pacna cu snada lo se gunka be mi
ni'o ny. spuda lo mi preti noda .i ku'i ny. jmina cusku di'e
— .i mi ji'a ca lo cabdei cu xruti lo me mi moi
ni'o baku badri
— .i ja'asai darmau .i ja'asai nadmau
ni'o mi jijnu lo nu lo rirci cu fasnu .i mi ca'o jgari ny. lo mi birka tai lo nu ny. cifnu .i ku'i ny. simlu lo ka sraji sakli fa'a lo kunti secau lo nu mi kakne lo nu ralte ny.
ni'o ny. jarco lo junri flira tai lo nu darno catlu
— .i mi ponse lo do lanpanzi .i go'i lo tanxe pe seva'u lo lanpanzi .i go'i lo molgai
ni'o ny. badri cisma
ni'o mi ze'u denpa .i mi ganse lo nu ny. masno cikyze'a
— .i doi cmalu zanpre do pu terpa
ni'o li'a ny. pu terpa .i ku'i ny. milxe cmila
— .i mi ba mutce zmadu terpa ca lo vanci
ni'o mi za'ure'u dunja cinmo fi lo selcikrynalka'e .i mi jimpe lo du'u mi na kakne lo nu renvi lo si'o mi ze'e ba na tirna lo nu ny. cmila .i ma'i mi cy. simsa lo jinto pe lo kutytu'a
— .i doi cmalu zanpre mi djica lo nu za'ure'u tirna lo nu do cmila
ni'o ku'i ny. cusku di'e
— .i ca lo nicte cu mulno fa lo nanca be li pa .i lo mi tarci ba zvati lo satci gapru be lo stuzi be lo mi se farlu pe lo purlamnanca
— .i doi cmalu zanpre lo lisri be lo since .e lo nunpenmi .e lo tarci cu mabla se senva iepei
ni'o ku'i ny. na spuda lo mi preti .i ny. di'e mi cusku
— .i lo vajni na se viska
— .i li'a
— .i co'e tai tu'a lo xrula .i va'o lo nu do prami lo xrula poi zvati lo tarci cu pluka fa lo nu catlu lo tsani ca lo nicte .i ro tarci cu se zvati lo xrula
— .i li'a
— .i co'e tai tu'a lo djacu .i dy. poi do ke'a mi dunda tezu'e lo nu pinxe cu simsa lo zgike be lo pulni joi lo skori .i xu do morji .i dy. xamgu
— .i li'a
— .i do ba catlu ca lo nicte lo tarci .i lo mi zdani cu dukse lo ka cmalu kei lo nu mi jarco lo du'u makau stuzi lo mi tarci .i la'e di'u xagmau .i lo mi tarci ba me pa tarci ma'i do .i ja'o ro tarci zo'u do ba nelci lo nu catlu ty. .i roboi ty. do ba pendo .i mi da do ba dunda
ni'o ny. boi za'ure'u cmila
— .i .oinai doi zanpre mi mutce se pluka lo nu tirna lo nu do cmila
— .i ba'e ri se dunda mi do .i ba simsa lo djacu
— .i do skudji ma
— .i lo prenu cu ponse lo tarci poi na mintu .i lo tarci seva'u py. poi litru cu gidva .i seva'u lo drata cu cmalu te gusni po'o .i seva'u lo drata poi prije cu nabmi .i seva'u lo mi cu'upre cu solji .i ku'i ro lo tai tarci cu smaji .i do ba ponse lo tarci poi no prenu cu ponse lo simsa
— .i do skudji ma
— .i ca lo nu do catlu lo tsani ca lo nicte kei ki'u lo nu mi xabju paboi ty. kei ki'u lo nu mi cmila bu'u paboi ty. kei ro tarci ba simlu lo ka cmila kei do .i ui do ba ponse lo tarci poi kakne lo nu cmila
ni'o ny. za'ure'u cmila
— .i do ca lo nu do ba'o cnikufybi'o (to da roroi cnikufybi'o toi) cu ba gleki lo nu mi do slabu .i do mi ze'e ba pendo .i do ba djica lo nu kansa mi lo nu cmila .i do ba su'oroi kargau lo do canko tezu'e lo nunpluka .i lo do pendo ba mutce se spaji lo nu viska lo nu do cmila fau lo nu catlu lo tsani .i do fi py. ba cusku «lu .i'a lo tarci cu roroi gasnu lo nu mi cmila li'u» .i py. ba jinvi lo du'u do fenki .i .u'i mi ba ba'o gasnu lo nu do mabla lifri
ni'o ny. za'ure'u cmila
— .i si'a da'i mi dunda seba'i tu'a lo tarci lo so'i cmalu jabyboi poi kakne lo nu cmila
ni'o ny. za'ure'u cmila .i ba bo ny. xruti lo ka junri
— .i ca lo nicte .y. .o'e .y. ko mi na klama
— .i mi do na ba cliva
— .i mi ba simlu lo ka bilma .i mi ba milxe simlu lo ka mrobi'o .i go'i .i ko na klama tezu'e lo nu viska la'e di'u .i na vamji fa lo nu troci
— .i mi do na ba cliva
ni'o ku'i ny. dunku
— .i mi cusku di'e .i krinu fa tu'a lo since ji'a .i .ei sy. do na batci .i lo since cu xlali .i ka'e batci mu'i lo nu pluka
— .i mi do na ba cliva
ni'o ku'i da rinka lo nu ny. nurcni
— .i je'u sy. na za'o ponse lo vindu tepi'o lo nu rere'u batci
ni'o ca lo nicte mi na viska lo nu ny. co'a klama .i ny. ba'o cliva secau lo savru .i ny. ca lo nu mi snada lo nu jorne ny. cu jdice cadzu co sutra stapa .i ny. cusku di'e po'o
— .i ua do zvati
ni'o ny. mi jgari lo xance .i ku'i ny. za'o dunku
— .i do srera .i do ba badri .i mi ba simlu lo ka morsi .i ku'i la'e di'u na ba jetnu
ni'o mi smaji
— .i do jimpe .i darno dukse .i mi na kakne lo nu bevri lo xadni .i tilju dukse
ni'o mi smaji
— .i ku'i ba simsa lo tolci'o pilka poi se cliva .i na badri tu'a lo tolci'o pilka
ni'o mi smaji
ni'o ny. milxe toldarsybi'o .i ku'i ny. za'ure'u troci
— .i ba xamgu .o'e .i mi ji'a ba catlu lo tarci .i ro tarci ba jintyke'a gi'e ponse lo kijyfusra pulni .i ro tarci ba dunda lo se pinxe mi
ni'o mi smaji
— .i ba tai zdile .i do ba ponse munonoki'oki'o jabyboi .i mi ba ponse munonoki'oki'o jinto
ni'o ny. ji'a co'a smaji ki'u lo nu ny. klaku
— .i tu stuzi .i ko curmi lo nu mi nonkansa stapa
ni'o ny. zutse binxo ki'u lo nu ny. terpa
ni'o ny. di'a cusku di'e
— .i .o'e lo mi xrula zo'u mi fuzme tu'a xy. .i xy. tai ruble .i xy. tai zanbebna .i xy. ponse lo vo kinli ku po'osai tepi'o lo nu bandu xy. lo munje
ni'o mi zutse binxo ki'u lo nu mi na za'o kakne lo nu sanli sezysarji .i ny. cusku di'e
— .i .i'a uo
ni'o ny. ze'i za'o senpi .ibabo ny. sanli xruti .i ny. paroi stapa .i mi na kakne lo nu muvdu
ni'o po'o pelxu lindi ne'a lo ny. tupne'o .i ny. cu ze'i cando stali .i ny. na krixa .i ny. smaji farlu tai lo nu lo tricu cu farlu .i na'e savru ri'a tu'a lo canre
ni'o ni'o reze mo'o
ni'o nauku baza lo nanca be li xa mi za'o na ze'e pu cusku lo lisri .i lo pendo poi pu za'ure'u viska mi cu mutce gleki lo nu za'ure'u viska mi fau lo nu mi jmive .i mi pu badri gi'e ku'i cusku «lu ri'a lo nu tatpi li'o li'u»
ni'o nauku mi ba'o milxe surbi'o .i sa'e na mulno .i ku'i mi djuno lo du'u ny. pu xruti lo ny. plini kei ki'u ca lo co'a donri mi pu na tolcri lo ny. xadni .i lo xadni na tai tulji .i mi nelci ca lo nicte lo nu tirna lo tarci .i simsa lo munonoki'oki'o jabyboi
ni'o ku'i fasnu fa lo rirci .i lo molgai poi mi pirfi'i ke'a seva'u lo cmalu noltru zo'u .oi mi fliba lo nu jmina lo skapi skori my. .i ny. ze'e na ka'e lasna my. lo lanpanzi .i seki'ubo mi sezretsku «lu ma pu fasnu bu'u lo ny. plini .i xu lo lanpanzi pu citka lo xrula li'u»
ni'o zu'u su'oroiku mi sezysku «lu li'a na go'i .i lo cmalu noltru cu selsantygau ca ro nicte lo ny. xrula ni'a lo blacygai gi'e mutce jundi lo ny. lanpanzi li'u» .iseki'ubo mi gleki .ije ro tarci cu xutla cmila
ni'o zu'unai su'oroiku mi sezysku «lu da su'oroi tolju'i .i .oi la'e di'u banzu .i ny. ca pa vanci na morji tu'a lo blacygai .ija lo lanpanzi cu barkla secau lo savru ca lo nicte li'u» .i seki'ubo ro jabyboi cu binxo lo se klaku
ni'o mutce cizra .i ma'i mi .e do noi ke'a ji'a prami lo cmalu noltru zo'u no pagbu be lo munje cu mintu stali va'o lo nu xukau bu'u lo na slabu be mi'o lo lanpanzi noi na slabu mi'o cu pu citka lo rozgu
ni'o ko catlu lo tsani .i ko sezyretsku di'e .i pau xu lo lanpanzi pu citka lo xrula .i do ba jimpe lo du'u ro da cenba
ni'o ia ze'eku no makcu prenu ba jimpe lo du'u la'e di'u tai vajni
ni'o ti ma'i mi traji lo ka melbi .e lo ka badri kei lo jvinu pe lo munje .i ti mintu lo jvinu pe lo lidne papri .i ku'i mi rere'u pirfi'i fi ti tezu'e lo nu mi ti do drani jarco .i bu'u ti lo cmalu noltru pu tolcanci la .terd. gi'ebabo canci .i ko jundi catlu lo jvinu tezu'e lo nu birti lo du'u dubju'o ti va'o lo nu do litru ca da lo friko bu'u lo kutytu'a .i .e'osai ko va'o lo nu do ti pagre cu na sutra .i ko ze'a denpa ni'asa'e lo tarci .i do va'o lo nu lo verba cu klama do gi'e cmila gi'e se kerfa lo solji se skari gi'e na spuda ca lo nu da retsku cu ba drani smadi lo du'u vy. mokau .i va'oku ko xendo gi'e na curmi lo nu mi tai badri .i .e'o zi xatra mi ko lo du'u vy. xruti
fa'o
|
# gugde
ni'o va'o lo tutske zo gugde valsi lo tumla canlu .i ka'e se smuni lo terfendi ja tutra pe lo zifyje'a .a lo mau cmalu ja narcabna jecta .i lo pu zifyje'a ka'e smuni mu'u la gligu'e .e la kotygu'e vu'o noi pagbu la bri'ito gi'e na zifyje'a .i la berti erlando ku fa'u la .uelcu ta'e te jinvi lo du'u gugypau fa'u nolgugypau .ije go'i lo du'u sei simxu se'u gugde kei va'o lo nu casnu lo pagygu'e be la .unke .i lo pu zifyje'a pe mu'u la pienmote to ca pagbu la .italias. toi ta'enai te jinvi lo du'u gugde
## e'u tcidu
- gugde liste
- uikivlacukt
|
le maircpukai goi le ka maicpu kei ku goi le maircpuda'e goi le danrgravitati pa'a le tsada'ekai .e le makydickai .e le bleda'ekai cu cmima le'i vo jicmu rarda'e gi'e jai tadji le nu da poi ke'a majni dacti ku'o de poi ke'a drata je majni dacti ku'o lacpu kei ku lei rarjva |
la viktor medranos cu finti la'e
lu lijda sezbanzu li'u
ni'oni'o mi jbena fi li 1966 pi'e 01 pi'e 12 fo la pilipinas i li 10 pi'e 45 tcika i sanxuandeDIOS zei spita ne'i la pasais zei tcadu i de'i li 1966 pi'e 02 pi'e 06 lo jdaca'i cu likpu'i mi ne'i la imakiulitkonsepcyn zei masyce'u ne'i la batangas zei tcadu i xrisrkatoliki i ji'a mi nelci le mivmu'e ni'o mi mudri since pe'a ne'i le jungo detci'e i ji'a mi nelci le mivmu'e
ni'o la salgrinxilz ckule ne'i la manilias i mi tadni lo xrisrkatoliki i mi tadni la rozaris poi xriso jdaselsku joi bidju nebja'i i ka'u xriso pensrmeditei i ji'a mi nelci le mivmu'e ni'o ro lo nicte mi ze'u di'i lijda cusku la'e lu me la ma'a patfu li'u i ku'i se'i mi puba mo'u cusku i ji'a la'a mi na xriso i zo'o rapli minji i zo'ocu'i le valsi cu glibau
ni'o ne'i lo xrisrkatoliki ritlrkomuni mi so'oroi censa fatri pe'a i mi citka lo nanba noi xrison zei xadni pe'a i ji'a ritlrkonfesi i mi ba'e so'uroi censa cusku u'u lo jdazei lo jdaca'i i ji'a cidytse ritli i su'a lo xrisrkatoliki cu ritli gi'e larcu i mu'a lo ceizda prenu blixra cu so'imei ne'i lo malsi ni'o se'o le mi ze'u lijda zo'u pruxyjda to me la animizm toi gi'a budjo ne'i le mi verba cedra i za'a re'e ne'i la pilipinas le budjo blixra poi me la maitre,as cu so'imei i ji'a mi nelci le mivmu'e
pi'e 16 i la mykinis ckule i la eringdyn ckule i mi zvati la lulus noi daplu i ca'a pruxyjda gi'a budjo i la eringdyn ponse lo jdaselsku noi xrisrprotestanti su'a i ji'a mi nelci le mivmu'e ni'o ne'i la lulus noi daplu ku'o la seintpolz me le mi lanzu malsi noi xrisrkatoliki
ni'o midju ckule ne'i la lulus noi daplu i la lyndyn ckule i la stivzdyn ckule i le mi lanzu cu xrisrbaptisti binxo i u'inai mi joi le mi lanzu cu klama le malsi i ji'a mi nelci le mivmu'e ni'o ta'o lo xrisrbaptisti cu xrisrprotestanti i i'enai le ri malsi cu tolzdi gi'e na larcu gi'e ponse le ka zulbesna
ni'o mi joi le greizbaptist zei malsi prenu cu klama la beikr poi cmana ne'i la uacintyn zei pagbu pe le merko i prenrpilipino verba i lo jdaca'i cu so'umei i e'odai lo prenrpilipino jdaca'i cu krici su'a i e'odai mi'a krici i u'inaidai lo prenrpilipino na nelci lo snime ga'u le cmana i ku'i u'i ba'e mi nelci i u'i ne'i la beikr mi xabju lo barda zdanrcale i ji'a mi nelci le mivmu'e ni'o ne'i la greizbaptist zei malsi ne'i la vankuvr zei tcadu pe la bycys zei pagbu lo jdaca'i cu me la katanus e la pantoxas i prenrpilipino i pe'idai su'a ky e py zo'u lo xriso na xazdo i pe'idai su'a lo xriso na mapti lo xazdo i ky e py mipri pensi i ji'a mi nelci le mivmu'e
ni'o co'a lo 1984moi mo'u lo 1989moi ne'i le bycys zei balcu'e mi cilre lo saske i ku'i le balcu'e cu barda ba'e makfa i ji'a mi nelci le mivmu'e
ni'o co'a lo 1992moi mo'u lo 1994moi mi xabju la tokios ne'i le ponjo i mi klama lo budjymalsi e lo malsrcinto i re'e vu zasti i le ponjo cu ba'e makfa i ji'a mi nelci le mivmu'e ni'o le lijdrcinto cu pruxyjda i lo prenrcinto cu krici le du'u lo ruxse'i fe'eroroi zasti i mu'a zvati loi spati e loi cmana e loi danlu e loi tsani e loi xamsi i la'a lo prenu cu xance pe'a i ri'a 5 ruxse'i cu zvati lo'e prenu i me la itcireicikon
ni'o si'a ne'i le dadjo lo so'imei ruxse'i cu zvati lo'e prenu i le dadjo cu pruxyjda i lo klesi pe dy cu so'imei i le dadjo cu krici le ka curve su'a e le ka xruti su'a i lo'e dadjo
prenu cu djica le du'u roroi jmive ro'o
ni'o lo pruxyjda klesi cu so'imei i py fe'eroroi liryraixa'u lijda ni'o la xaitis zei lijdrvudu cu pruxyjda i da krici le du'u ponse lo re ruxse'i poi me la tibonanj e la guobonanj i la'a la tibonanj noi cmalu zmadu cu xruti fi le cevni i la'a la guobonanj cu roroi stali le terdi i gy roroi klama lo drata stuzi lo stuzi i le prenrzombi cu morsi jmive pe'a i le lijdrvudu cu klama la xaitis le stici friko
ni'o ji'a le lijdrsanteri,a cu klama la kubas e le brazo le stici friko i da krici lo so'imei cevni i lo jdaca'i cu ritlrsakrifai sepi'o lo danlu ni'o le tolci'o lijdrxeskimo cu pruxyjda ne'i le tolzi'o i da krici lo so'imei ruxse'i ne'i lo lenku cicfoi i lo prenu cu zbasu lo censa blixra i da krici le du'u lo cmene cu ruxse'i
ni'o ta'o le lijdrxa,uai,i to polno toi e le lijdrxuika to zvati le ropno toi cu pruxyjda ni'o mi vitke lo drata gugde i ua i'o i'u la balis noi daplu cu xindo ne'i le baxso i le xelso cu xrisrxortodokso i ua i'o i'u ne'i le xelso lo jdaka'i zdani cu zasti ga'u lo cmana i ua i'o i'u ne'i la tais lo budjymalsi cu so'imei i ji'a mi nelci le mivmu'e
ni'o ua i'o i'u ne'i le ropno mi vitke lo xrisrkatoliki malsi i melbi gi'e tolci'o ni'o ne'i la vankuvr e la lulus noi daplu mi
penmi lo drata xrisrprotestanti poi xrisrpentekosta gi'e xrisrmormoni gi'e xrisrdjexovasuitnesi i ku'i u'inai zvati le stici lijda i la'a mi na'e kakne le du'u jimpe lo stici lijda i mi na'e stici prenu i ji'a mi nelci le mivmu'e ni'o mi ca'a pruxyjda gi'a budjo i ji'a mi nelci le mivmu'e
ni'o le pavbudjo cu me la cakiamunis a la sidartas gautamas i ji'a lo drata me la budas cu zasti i mu'a la amidas e la maitre,as zasti i ne'i la cuvgu'e bu'okle lo'e budjo prenu cu sanga ri'a la amidas noi zvati le cuvgu'e a le curvymunje su'a i la maitre,as cu me la budas poi balvi i lo bu'okle cu so'imei i mu'a la zen zasti ni'o ne'i la zen zei bu'okle na krici le du'u
ba'e valsi pensi i la zen mixre le dadjo i la zen na krici la doktrin i ra'u ne'i ro le bu'okle lo di'i pensrmeditei cu vajni ni'o ta'o la cuvgu'e bu'okle e la zen budjrmaxaiana
ni'o so'e le bu'okle cu krici la doktrin i ji'a le budjrmaxaiana noi berti budjo cu ponse lo srito manri i le budjrteravada noi snanu budjo cu ponse lo bangrpali manri i ra'unai le snanu budjo cu tolci'o zmadu le berti budjo ni'o ro le bu'okle cu krici le ka curvykunti i nandu i ji'a lo'e jmive cu sarlu gi'e rapli i se'o ka'u ro'ocu'i lo'e prenu a lo'e jmive cu xabju le munje i lo'e prenu a lo'e jmive na ponse lo ruxse'i i ku'i ponse lo ba'e ruxfle i la'a uinai ne'i le vi munje ma'a na kufra i
e'osai o'ecu'i o'u ma'a zasti
ni'o ra'unai ne'i lo 2002moi mi pamoi pensrmeditei sepi'o zo tcati bau le lojbo i mi zu ze'u di'i klama lo budjrteravada malsi noi me la tais ne'i la vankuvr noi tcadu i mi co'a ze'i tadni le lojbo to'u zo'o ni'o mi nutli le du'u xriso su'a i xu da kakne le du'u lo'e pruxyjda prenu a lo'e budjo prenu cu panpi lo xriso gugde i le xisyjbenunsla cu lijdrpeigani terkla i ti'e ka'u de'i li ny pe'i 12 pe'i 25 salci ri'a le solri cevni ne'i le tolci'o la'ornai i ti'e ka'u su'a le xisyjbenunsla tricu cu tolci'o lijdrpeigani dotco i iicu'i i'ocu'i lo'e xriso prenu cu pensi lo xisyjbenunsla i ri'a iacu'i re'ecu'i zasti i ba'anai i'u ne'i lo zarci ne'i la mykinis zei ckule ba'e mi te vecnu lo tolci'o softo bo kabri ri'a lo seldu'acpa i me lo
1976moi
ni'o ne'i le ponjo lo xisyjbenunsla cu simsa la valentainz zei djedi ni'o ta'o da krici lo na'ujda i la'a da krici li 4 i la'a da krici li 3 i fenki lijda i la'a skitsofrenias zei bilma i xu zo'o la'a le cevni cu namcu
ni'o xu ma'a zvati le terdi ri'a ma i xu le ka cevni cu mo ni'oni'o la viktor medranos pu co'a vi finti de'i li 2012 pi'e 01 pi'e 16 i le prula'i te galfi zo'u de'i li 2012 pi'e 01 pi'e 21 tcika |
# lo selfri be la .alis. bei bu'u la selmacygu'e
.i finti fa la'o me. Lewis Carroll .me
.i terxra fa la'o me. John Tenniel .me
.i fanva fa la .xorxes.
## ni'o ni'o no mo'o
### nu nergi'a
.i ze'a lo slolecydo'imi'a surla sakli
.i terbloga'a catke fa lobirka be lo cmaxli
fau lo nu tolcre troci lo nugidva co za'akli
.i .oi lo kusru ci mei ni'alo tai senva tcima
cu ruble pikci fi lo lisri.i uu sai ta'i ma
pa voksa ka'e damba lo cimei tancyselcmima
.i la pa moi fa'a mi'esku«lu ko cfagau li'u»
.i la re moi cu racmau djicpelo nonselsmuji'u
.i la ci moi cu lisri zuntica me'i ro snidu
.i ba zi ca'o xanri jersica lo suksa smaji
lo senva verba pa'o lo semanci jo'u spaji
pe lo nu tavla danlu .i iaru'e jetnu ckaji
.i xarjintysudbi'o uo .ibavlamke'u di'a
.i tatpi bletoi lo nu mi lolisri cu zasli'a
ze'a .i «lu ui bavlamke'unau li'u» selki'a
.i tai pu banro fa lo lisrila selmacygu'e
.i ba lo terpra be lo cizranau mo'u lisru'e
.i ma'a gleki zdakla ni'alo cancysolxu'e
.i ju'i .alis. ko dei lebnagi'e xanracpu'i
lo verba selsne jvibu stuzinoi nunmojbafru'i
tai lo nu friti lo ruldjinepoi vu zu selku'i
## ni'o ni'o pa mo'o
### mo'i ni'a lo ractu kevna
ni'o la .alis. co'a tatpi lo nu zutse lo rirxe korbi re'o lo mensi gi'e zukte fi no da .i .abu cu so'u roi sutra zgana lo cukta poi my. tcidu .i ku'i cy. vasru no pixra ja nuncasnu .i «lu ji'a ma prali sei la .alis. cu pensi fi lo cukta poi vasru no pixra ja nuncasnu li'u»
ni'o .abu ca'o menli jdice (to se kai lo xagrai selka'e poi se curmi lo glare donri noi rinka lo nu .abu lifri lo nu sipydji je bebna toi) lo du'u xu kau lo nu pluka fa lo nu zbasu lo xrula linsi cu se vamji lo raktu poi nu sa'irbi'o gi'e crepu lo xrula .i ca bo suksa fa lo nu lo blabi ractu poi xunblabi se kanla cu bajra zo'a .abu
ni'o la'e di'u na'e ba'e ''mutce'' lo ka cizra .i je nai ji'a la .alis. cu jinvi lo du'u ba'e ''mutce'' lo ka nalfadni kei fa lo nu tirna lo nu la ractu cu sezysku «lu .oi ro'a .oi ro'a mi lerci li'u» (to baku .abu ca lo nu pensi la'e di'u cu te sidbo ri lo du'u .ei ri .abu cizra .i ku'i ca ku ro ra simlu lo ka rarna toi) .i ku'i la .alis. ca lo nu la ractu ca'a lebna lo junla lo kosta daski gi'e catlu jy. gi'e di'a sutra cu spaji sa'irbi'o ki'u lo nu lindi pagre lo menli be .abu fa lo si'o ri pu no roi viska lo ractu poi ponse lo kosta daski .a lo junla poi ry. ke'a dy. ka'e lebna .i .abu bai lo nu kucli cu bajra pagre lo foldi gi'e jersi ry. gi'e .u'a viska lo nu ry. canci mo'i ne'i lo barda ke ractu kevna noi cnita lo spabi'u
ni'o ba zi ku la .alis. mo'i ne'i jersi ry. gi'e no roi pensi lo du'u ta'i ba'e ''ma'' kau .abu ba za'u re'u bartu
ni'o lo ractu kevna cu ve'a tubnu sirji gi'e suksa nitsalpo .i tai suksa ja'e lo nu la .alis. na zifre lo nu ze'i ji'a sai pensi lo nu sezydicra kei pu lo nu .abu ca'o farlu fo lo condi mutce jintyke'a
ni'o ga lo jintyke'a cu mutce lo ka condi gi .abu mutce lo ka masno lo nu farlu .i ni'i bo lo nunfarlu temci cu mutce banzu lo nu catlu lo sruri gi'e kucli lo du'u ma kau ba zi fasnu .i pa mai .abu troci lo nu catlu lo cnita gi'e facki lo du'u .abu ma kau klama .i ku'i dukse lo ka manku kei lo nu ka'e viska .i re mai .abu catlu lo mlana be lo jintyke'a gi'e facki lo du'u my. culno lo se kajna tanxe jo'u lo cukta kajna .i .abu viska lo so'o cartu jo'u lo so'o pixra vu'o noi dandu lo so'o genxu .i .abu lebna lo botpi lo kajna ca lo nu lampagre .i by. se tcita «lu najnimre titydju li'u» gi'e ku'i .u'a nai kunti .i .abu mu'i lo nu terpa lo nu catra da cu na djica lo nu falcru lo botpi .i se ki'u bo .abu suksa lo nu punji by. lo se kajna tanxe poi .abu ke'a farlu lampagre
ni'o «lu uo sei la .alis. cu pensi mi ba lo nu farlu tai ti cu ba na xanka lo nu farlu fo lo serti .i «lu ua virnu sei lo lanzu fi mi ba jinvi li'u» .i .u'o mi no da cusku va'o ji'a sai lo nu mi farlu fi lo drudi be lo zdani (to sa'a la'e di'u la'a sai jetnu toi) li'u»
ni'o mo'i ni'a mo'i ni'a mo'i ni'a .i xu lo nu farlu cu no roi mulno .i «lu mi kucli lo du'u mi ca minli li xo kau lo ni farlu sei .abu cladu cusku .i ia mi pu'o jibni lo midju be lo terdi .i ka'u minli li vo ki'o lo ni cnita (to sa'a la .alis. pu cilre so'o da la'e di'u lo ckule .i zu'u lo cabna ki'u lo nu no da .abu tirna cu na ba'e ''mutce'' mapti lo nu jarco lo ka djuno .i zu'u nai lo nu rapsku cu xamgu .abu lo nu cilre toi) .i ie se'i lo se minli cu jibni drani .i ku'i mi kucli lo du'u ma kau ti bernanjudri gi'e sunsicyjudri li'u» .i (to la .alis. na sai djuno lo du'u ma kau smuni ga zo bernanjudri gi zo sunsicyjudri .i ku'i .abu jinvi lo du'u melbi je banli valsi toi)
ni'o ca ku .abu cu za'u re'u co'a co'e .i «lu mi kucli lo du'u xu kau mi ba farlu ba'e ''pagre'' lo terdi .i ba xajmi fa lo nu tolcanci lo jbini be lo prenu poi cadzu fau lo nu lo stedu cu cnita .i pe'i bu'u lo smudukti (to sa'a ca ku .abu lo nu no da tirna cu gleki ki'u lo nu lo valsi na sai drani sance toi) .i ku'i .ei mi te preti lo gugde lo du'u ma kau cmene .i «lu pau doi ninmu ti nuzlo gi'i sralo li'u» (to sa'a .abu ca lo nu tavla cu troci lo nu krorinsa .i xanri ko fa lo nu krorinsa ca lo nu farlu .i xu do snada toi) .i ny. ba jinvi lo du'u mi toldjuno ke cmalu nixli kei fo lo nu mi te preti .i .ei mi na te preti .i la'a cu'i mi viska lo nu ba'o ciska lo cmene da li'u»
ni'o mo'i ni'a mo'i ni'a mo'i ni'a .i ka'e zukte no drata be la'e di'e .i se ki'u bo la .alis. za'u re'u co'a tavla .i «lu ju'o la .dinas. ca lo cabnicte ba mutce lo ka claxu mi (to sa'a la .dinas. cu mlatu toi) .i .a'o da ba morji tu'a lo dy. ladru palta ca lo sanmi tcika .i doi .dinas. noi dirba mi do'u .au do mi kansa lo nu vi cnita .i .u'u no smacu cu zvati lo vacri .i ku'i do ka'e kavbu lo volratcu noi ka'u mutce lo ka simsa lo smacu .i ku'i .a'u xu lo mlatu cu citka lo volratcu li'u» .i ca ku la .alis. co'a sipydji lifri gi'e di'a senva sezysku «lu xu lo mlatu cu citka lo volratcu .i xu lo mlatu cu citka lo volratcu li'u» .e su'o roi bo «lu xu lo volratcu cu citka lo mlatu li'u» .i ku'i lo du'u porsi ma kau cu na vajni mutce ki'u lo nu .abu ka'e spuda no lo re preti .i .abu lifri lo nu pu'o sipna kei gi'e pu zi co'a senva lo nu .abu xanjaisi'u cadzu kansa la .dinas. gi'e cusku «lu ju'i doi .dinas. ko mi jungau lo jetnu .i xu do su'o roi citka lo volratcu li'u» .i ca bo suksa fa lo nu .abu lo cpana be lo derxi be lo grana jo'u lo sudga pezli mo'u farlu
ni'o la .alis. na sai se xrani gi'e zi sanli fi lo jamfu gi'e catlu lo gapru noi ku'i manku mulno .i crane .abu fa lo drata ke clani vorme .i la blabi ractu cu za'o se viska gi'e sutra lo nu litru vy. .i .ei la .alis. na denpa .i .abu klama tai tu'a lo brife gi'e ja'a ru'e snada lo nu tirna lo nu ry. cusku «lu .oi doi lo mi kerlo jo'u zbikre ca'o mutce lerci binxo li'u» .i .abu jibni trixe ry. ca lo nu carna lo kojna .i ku'i ry. ca na za'o se viska .i .abu facki lo du'u ri zvati lo clani je dziseldru kumfa noi se gusni fi lo se linji noi dandu lo drudi
ni'o lo kumfa cu se sruri lo so'i vorme .i ku'i ro ri cu stela ganlo .i la .alis. ca lo nu ba'o litru lo pa moi mlana .e lo drata gi'e troci tu'a ro vorme cu badri cadzu bu'u lo midju gi'e kucli lo du'u ta'i ma kau .abu ba za'u re'u bartu
ni'o ba zi ku .abu penmi lo cmalu ke cibyseltuple jubme be lo sligu blaci .i cpana jy. fa po'o lo cmatce ke solji ckiku .i .abu cu pa moi jinvi lo du'u cy. ckiku pa lo stela be lo kumfa vorme .i ku'i ui nai ga lo stela cu dukse lo ka barda gi lo ckiku cu dukse lo ka cmalu .i se ju cy. ka'e kargau no ra .i ku'i .abu ca lo nu re moi sruli'u cu penmi lo dizlo murta noi .abu na pu sanji ke'a .i my. murta lo cmalu vorme noi centre li ji'i vo no .i .abu troci lo nu co'e lo cmalu ke solji ckiku lo stela .i ui sai mapti
ni'o la .alis. cu kargau lo vrogai gi'e facki lo du'u vy. se jersi lo cmalu vorme noi na bramau lo ratcu kevna .i .abu cidni sanli gi'e catlu lo se vorme noi mlerai lo purdi poi su'o roi se viska .i .a'o sai barkla lo manku kumfa gi'e cadzu jbini lo va carmi xrula zdani jo'u lo va lenku je'erjinto .i ku'i .abu na ka'e gregau lo stedu ji'a sai lo vorme .i «lu lo stedu be mi va'o ji'a sai lo nu ka'e pagre sei la .alis. uu cu pensi cu tolmutce lo ka se pilno kei se cau lo mi janco .i .au mi ka'e se polje tai tu'a lo darvistci .i pe'i mi ka'e go'i va'o lo nu da'i mi djuno lo du'u mi co'a go'i ta'i ma kau li'u» .i lo pu zi nalfadni fasnu cu tai so'i mei ja'e lo nu la .alis. co'a jinvi lo du'u so'u sai da ca'a nalcumki
ni'o simlu lo ka na prali fi lo nu denpa fi tu'a lo cmalu vorme .i se ki'u bo .abu xruti lo jubme gi'e xadba pacna lo nu tolcri lo drata ckiku .a do'a nai lo cukta co javni be lo nu ta'i ma kau polje lo prenu tai tu'a lo darvistci .i ca lo ca krefu .abu tolcri lo cmalu botpi (to «lu noi ju'o pu na zvati ti sei la .alis. cu cusku li'u» toi) .i sruri lo botpi cnebo fa lo pelji tcita noi lo valsi po'u «lu ko mi pinxe li'u» cu melbi prina ke'a se pi'o lo barda lerfu
ni'o .o'o cu'i xamgu fa lo nu cusku «lu ko mi pinxe li'u» .i ku'i la .alis. noi prije cu na ba zi zukte la'e ba'e ''di'u'' .i «lu na go'i .i pa mai mi catlu sei .abu cusku gi'e facki lo du'u xu kau se tcita zo vindu li'u» .i .abu pu tcidu so'o melbi ke cmalu lisri be lo verba poi jelca se xrani gi'a se citka lo cilce danlu gi'a lifri lo drata tolpluka ki'u lo nu na ba'e ''morji'' lo sampu javni poi lo pendo cu ctuca zi'e no'u mu'a lo nu lo xunre glare tunta cu jelca xrani lo za'o jgari be ty. zi'e no'u mu'a lo nu lo degji va'o lo nu condi ba'e ''mutce'' se sraku se pi'o lo dakfu cu ta'e ciblu cirko .i .abu cu no roi tolmorji lo du'u lo nu da dukse lo ka pinxe lo se botpi be lo se tcita be zo vindu cu ba zi ja ba zu fanza da
ni'o ku'i lo vi botpi na se tcita zo vindu .i se ki'u bo la .alis. cu darsi lo nu vu'irga'e lo selvau .i .abu facki lo du'u pluka (to je'u vrusi lo mixre be lo rutrceraso tisna jo'u lo sovykruji jo'u lo bromeli jo'u lo seljukpa xukre'u jo'u lo satmatne jo'u lo glare ke matne jelnanba toi) .i .abu zi mo'u pinxe
ni'o «lu ue cizra selga'e sei la .alis. cu cusku .i ru'a ju'o mi se polje tai tu'a lo darvistci li'u»
ni'o ca'a co'e .i ca ku .abu centre li so'u re mu .i lo flira be .abu cu cambi'o se ja'e lo nu pensi lo nu ca ku .abu mapti lo cmalu vorme lo ka pagre fi lo melbi purdi .i ku'i pa mai .abu denpa lo nu zgana lo du'u xu kau za'o brajdika .i .abu milxe lo ka xanka la'e di'u .i «lu cumki fa lo nu se fanmo sei la .alis. cu sezysku lo nu mi mo'u canci tai tu'a lo lakyga'a fagri .i mi kucli lo du'u mi ma kau simsa va'o da'i la'e di'u li'u» .i .abu troci lo nu se xanri lo du'u lo lakyga'a fagri ma kau simsa ba lo nu lo lakyga'a cu se gusydicra .i ku'i na ka'e morji lo nu viska lo tai dacti
ni'o ba za ku .abu ca lo nu facki lo du'u no drata cu fasnu cu jdice lo nu zi klama lo purdi .i ku'i la .alis. uu ca lo nu tolcliva lo vorme cu facki lo du'u .abu tolmorji tu'a lo cmalu ke solji ckiku .i ca lo nu ba'o xruti lo jubme te zu'e lo nu cpacu cy. cu facki lo du'u lo ni .abu galtu cu na banzu lo nu cpacu cy. .i .abu viska cy. fi'o klina lo blaci .i .abu traji troci lo nu cpare pa lo tuple be lo jubme .i ku'i ty. dukse lo ka se sakli .i .abu uu ca lo nu tatpi lo nu troci cu zutse gi'e klaku
ni'o «lu .e'e no da do prali lo nu tai klaku sei la .alis. cu kinli sezysku .i .e'u ko ca zi sisti li'u» .i .abu ta'e sezystidi lo xamgu mutce (to ku'i ta'e nai mapti zukte toi) gi'e su'o roi tai junri sezytolzarsku ja'e lo nu gasnu lo nu lo se klaku cu zvati lo kanla .i .abu morji lo nu pa roi troci lo nu darxi lo kerlo be .abu kei mu'i lo nu .abu tcica .abu ca lo nu .abu fapro .abu lo nu kelcrkroke .i lo vi cizra verba cu mutce lo ka nelci lo nu sruma lo du'u du lo re prenu .i «lu ku'i no da mi ca prali sei la .alis. uu cu pensi lo nu sruma lo du'u mi du lo re prenu .i .oi lo ve vimcu be fi mi na banzu lo nu marji fi lo ba'e ''pa'' se sinma prenu li'u»
ni'o lo nu .abu catlu cu ba zi se farna lo cmalu ke blaci tanxe noi cnita lo jubme .i .abu kargau ty. gi'e facki lo du'u nenri ty. fa lo cmalu mutce titnanba noi bu'u ke'a lo valsi po'u «lu ko mi citka li'u» se morna lo sudjba .i «lu .ai mi ti citka sei la .alis. cu cusku .i mi va'o lo nu da'i gau ti mi braze'a cu snada lo nu cpacu lo ckiku .i mi va'o lo nu da'i gau ti mi cmaze'a cu kakne lo nu reskla ni'a lo vrogai .i se ki'u bo mi va'o ro fasnu cu kakne lo nu klama lo purdi .i na vajni mi fa lo du'u ma kau ca'a fasnu li'u»
ni'o .abu citka lo spisa gi'e xanka sezysku «lu fa'a ma .i fa'a ma li'u» gi'e punji lo xance lo cpana be lo stedu te zu'e lo nu ganse lo nu sy. banro fa'a ma kau .i .abu mutce lo ka spaji lo nu facki lo du'u .abu stodi lo ka barda .i li'a la'e di'u ta'e fasnu ca lo nu citka lo titnanba .i ku'i la .alis. tai se tcaci lo nu kanpe lo nu no na'e tolfadni cu fasnu .i ja'e bo simlu lo ka tolzdile gi'e bebna kei fa lo nu lo nunjmive cu ca'o fadni
ni'o .abu co'a batci gi'e ba zi mo'u citka lo titnanba
* * * * * * *
* * * * * *
* * * * * * *
## ni'o ni'o re mo'o
### lo se klaku lalxu
ni'o .abu ca'o platu lo nu co'e ta'i ma kau .i «lu .ei lo cutci cu se mrilu sei .abu pensi .i ba xajmi fa lo nu da benji lo seldu'a lo jamfu be da .i ua lo judri ba simlu lo ka cizra .i «lu
''la selsi'a ke pritu jamfu be la .alis.''
''bu'u la fagzda lolgai''
''ne'a lo fagju'e''
''(to la .alis. cu prami benji toi)''
li'u» .i ue mi bebna tavla li'u»
ni'o ca ku lo stedu be .abu cu janli lo drudi be lo kumfa .i je'u .abu ca mitre li za'u re pi mu .i .abu ze'i lebna lo cmalu ke solji ckiku gi'e sutra klama lo purdi vorme
ni'o la .alis. uu zo'u lo nu mlana vreta gi'e catlu lo purdi se pi'o pa kanla cu jimte lo se zukte lo ka .abu kakne ce'u .i lo nu pagre cu nalcumki traji .i .abu zutse gi'e za'u re'u co'a klaku
ni'o «lu .ei do ckeji sei la .alis. cu cusku .i do barda nixli (to sa'a ju'o drani toi) .i .i'e nai ca'o tai klaku .i le'o ko ca sisti li'u» .i ku'i .abu za'o klaku lo litce be li so'i ja'e lo nu .abu se sruri lo barda lalxu noi centre li ji'i pa no lo ka condi kei gi'e preja lo xadba be lo kumfa
ni'o ba za ku .abu tirna lo nu cmalu stapa lo darno kei gi'e sutra lo nu sudgau lo kanla te zu'e lo nu viska lo nu ma kau klama .i klama fa la blabi ractu noi xruti gi'e melbi dasni gi'e jgari lo blabi ke kanba gluta re mei fa'u lo barda bifpra lo re xance .i ry. sutra bajra klama gi'e sezysku «lu .oi la noltroni'u zo'u ba'a ny. ba cilce fengu va'o lo nu mi gasnu lo nu ny. denpa li'u» .i la .alis. tai cinmo lo ka tolpacna kei ja'e lo nu bredi lo nu cpedu lo nunsidju ma kau .i se ki'u bo .abu ca lo nu la ractu cu jibni cu co'a cusku se pi'o lo lauble je toldarsi voksa «lu pe'u doi ractu li'u» .i la ractu cu suksa se jenca gi'e falcru lo blabi ke kanba gluta jo'u lo bifpra gi'e bajra mo'i ne'i lo manku se rai lo kamsutra
ni'o la .alis. cu lebna lo bifpra jo'u lo gluta gi'e co'a pilno by. mu'i lo nu lo kumfa cu glare .i ca bo ca'o cusku «lu .oi ue ro da cizra ca lo cabdei .i ca lo purlamdei ro da fadni fasnu .i mi kucli lo du'u xu kau da galfi mi ca lo nicte .i .ei mi pensi .i xu mi me mi ca lo nu mi cikna binxo ca lo zi cerni .i pe'i ru'e ba'a nai mi cinmo lo ka frica milxe .i ku'i va'o lo nu mi na me mi cu jersi preti fa lo du'u mi me ma kau .i la'e di'u cu barda nabmi li'u» .i .abu co'a pensi ro lo verba poi ke'a .abu slabu gi'e mintu lo ka ce'u nanca ma kau ku'o te zu'e lo nu jdice lo du'u xu kau cumki fa lo nu da .abu ba'o galfi su'o me vy
ni'o «lu ju'o mi na me la .adas. sei .abu cusku .i ki'u bo ge lo kerfa be ri cu clani sarlu gi lo me mi moi cu na sai sarlu .i ji'a ju'o mi na me la .mabel. .i ki'u bo ge mi djuno lo so'i vrici gi my. .y. djuno lo tolmutce .i ji'a ge my. me my. gi mi me mi .i .oi ue ro da cfipu .i mi mi cipygau lo ka ca djuno ro da poi mi pu djuno .i pilji li vo li mu fa li pa re .i pilji li vo li xa fa li pa ci .i pilji li vo li ze fa .y. .i .oi mi ba no roi snada tu'a li re no va'o lo nu tai masno .i ku'i lo pilji porsi na vajni .i .e'u troci tu'a lo tedyske .i la .londn. cu raltca la .paris. .i la .paris. cu raltca la .romas. .i la .romas. si si la'e di'u naldrani ju'o .i ju'o da pu galfi mi la .mabel. .i mi troci lo nu cusku la'e «lu ua lo cmalu li'u» li'u» .i .abu punji lo kruca xance lo tuple tai lo nu cusku lo se cilre kei gi'e co'a sitsku .i ku'i lo voksa cu se sance lo rufsu je cizra .i lo valsi na mintu lo se tcaci
.i ua lo cmalu krokodilocu zengau lo ky. rebla
si'u lo djacu pe la .nilos.lo ka camri'ojvebla
.i ua lo jgalu ja'a tinsaje cnici preja panra
.i lo cmafi'e cu se rinsalo cisma xedja ganra
ni'o «lu ju'o lo valsi na drani sei la .alis. uu cu cusku li'u» .i lo kanla be .abu cu za'u re'u tisna lo se klaku ca lo nu di'a cusku «lu ja'o mi me la .mabel. .i mi ba bilga lo nu xabju lo pindi ke cmalu zdani gi'e ponse ji'i no selkei gi'e .oi cilre so'i sai da .i .ai na go'i .i mi mu'o jdice lo du'u mi ga nai me la .mabel. gi stali ti .i no da ba prali lo bartu prenu lo nu py. setca lo stedu ti gi'e cusku «lu ko barkla doi dirba li'u» .i mi ba fa'a ga'u catlu gi'e cusku «lu pau mi me ma .i pa mai ko mi jungau la'e di'u .i ba bo mi va'o lo nu nelci lo nu me ma kau cu barkla .i va'o lo nu na nelci cu denpa ti lo nu mi drata li'u» .i ku'i .oi sei la .alis. cu suksa klaku krixa .i .au da ba'e ''ca'a'' setca lo stedu ti .i mi tai ba'e ''mutce'' tatpi lo nu mi ti nonkansa li'u»
ni'o .abu ca lo nu cusku di'u cu fa'a ni'a catlu lo xance gi'e se spaji lo nu viska lo nu .abu pu ca'o dasni pa lo cmalu ke blabi ke kanba gluta pe la ractu ze'a lo nu tavla .i «lu mi kakne ti ma sei .abu pensi .i ja'o mi za'u re'u jdika lo ka barda li'u» .i .abu sa'irbi'o gi'e klama lo jubme te zu'e lo nu sezmerli fi jy. .i facki lo du'u ca centre li ji'i mu no gi'e sutra lo nu ca'o jdika .i ba zi facki lo du'u rinka la'e di'u fa lo nu jgari lo bifpra .i .abu sutra falcru by. pu lo nu zi mo'u sai jdika
ni'o «lu ba'e ''ja'a'' jibni rivbi sei la .alis. noi na toltce lo ka terpa lo nu suksa cenba kei kei gi'e ku'i mutce lo ka gleki lo nu ca'o zasti cu cusku .i .e'e ca ku mi klama lo purdi li'u» .i .abu bajra se rai lo kamsutra fa'a lo cmalu vorme .i ku'i .oi lo cmalu vorme cu za'u re'u ganlo .i lo cmalu ke solji ckiku za'u re'u vreta lo blaci jubme .i «lu lo tcini ro da xlamau sei lo se kecti verba cu pensi .i ki'u bo mi no roi pu cmalu tai ti .i no roi .i ju'a ty. mutce lo ka xlali je'u li'u»
ni'o ca lo nu .abu cusku lo di'u valsi kei lo jamfu be .abu cu sakli .i ba zi ku lo nu jaurjanli zo'u .abu jinru lo silna djacu fe'e co'u lo firji'o .i pa moi sidbo fa lo nu .abu ba'o farlu lo xamsi .i «lu va'o la'e di'u mi ka'e xrukla fu lo trene sei .abu sezysku li'u» (to la .alis. pu klama lo xamsi korbi pa roi lo nunjmive gi'e ja'e bo jinvi lo du'u ro pagbu be lo glico korbi cu se zvati so'o jinru minji noi nenri lo xamsi ku'o .e so'o verba noi kakpa lo canre lo loldi lo mudri canpa ku'o .e lo porsi be fi lo xotli be'o .e lo trene tcana noi trixe py. toi) .i ku'i ba zi .abu sanji lo nu .abu jinru lo lalxu pe lo se klaku poi .abu klaku ke'a ca lo nu .abu mitre li re pi mu
ni'o «lu .au mi na pu klaku lo tai mutce sei la .alis. ca lo nu limna gi'e troci lo nu tolcri lo bartu pluta cu cusku .i ru'a sfasa mi la'e di'u lo nu mrobi'o co jinru lo se klaku be mi .i ju'o la'e di'u ba cizra .i ku'i ro da cizra ca lo cabdei li'u»
ni'o ca ku .abu tirna lo nu da va jaurjanli bu'u lo lalxu .i .abu jbize'a limna te zu'e lo nu zgana lo nu da mo kau .i pa mai .abu jinvi lo du'u da .odbenu ja ri'erxi'a .i ku'i re mai .abu morji lo nu .abu ma kau ca mitre kei gi'e ba zi viska lo nu da smacu po'o gi'e mintu .abu lo ka pu sakli
ni'o «lu xu da mi prali sei la .alis. cu pensi lo nu tavla lo va smacu .i ro da bu'u lo cnita cu tai tolfadni ja'e lo nu pe'i lakne fa lo nu ta ka'e tavla .i se ju no da mi tolprali lo nu troci li'u» .i se ki'u ku .abu co'a co'e «lu doi smacu xu do se slabu lo pluta be lo bartu be lo bu'u lalxu .i mi mutce lo ka tatpi lo nu ru'u limna doi smacu li'u» (to la .alis. pu jinvi lo du'u ju'o ta drani lo ka tadji lo nu tavla lo smacu .i .abu cu no roi pu zukte lo simsa gi'e ku'i morji lo nu tcidu fi lo latmo gerna cukta pe lo bruna fe «lo'u lo smacu sera'a lo smacu fa'a lo smacu ri'i lo smacu doi smacu le'u» toi) .i lo smacu cu terpreti mutce catlu .abu gi'e simlu lo ka rinsa fi lo nu ze'i ga'orgau pa lo cmalu kanla .i ku'i sy. cusku no da
ni'o cumki fa lo nu ta na se bangu lo lojbo sei la .alis. cu pensi .i ru'a ta fraso smacu gi'e kansa la .uiliam. poi jamji'a ku'o lo nu klama ti li'u» (to .abu djuno so'i da lo purcedra gi'e ku'i na mutce lo ka jimpe lo du'u ma kau pu fasnu za ma kau toi) .i .abu cu za'u re'u co'a cusku zoi fy. ou est ma chatte? .fy. noi pa moi lo jufra pe lo .abu fraso ve cilre cukta .i lo smacu cu suksa plipe lo bartu be lo djacu gi'e simlu lo ka desku lo nu terpa .i «lu .oi se'i ko mi fraxu sei la .alis. noi xersmadi lo du'u ke'a crogau lo danlu lo cnirango cu sutra krixa .i mi mulno lo ka tolmorji lo nu do na nelci lo mlatu li'u»
ni'o «lu .oi na nelci lo mlatu sei la smacu cu kinli je cinmo voksa krixa .i xu ba'e ''do'' nelci lo mlatu va'o lo nu da'i do me mi li'u»
ni'o «lu .y. la'a nai sei la .alis. cu surgau tonga cusku .i ko na fengu .i ku'i .au mi ka'e jarco lo mi'a mlatu no'u la .dinas. do .i pe'i do co'a nelci lo mlatu va'o lo nu da'i do dy. viska .i dy. tai dirba smaji sei la .alis. fi .abu ca lo nu lazni limna lo lalxu cu ca'o cusku .i dy. melbi cmoni zutse ne'a lo fagri gi'e tacpe'u lo xance be dy. gi'e lumci lo flira be dy. .i dy. tai pluka ranti lo nu kujyjai .i dy. tai certu lo nu kavbu lo smacu .i .oi se'i ko mi fraxu sei la .alis. noi birti lo du'u la smacu noi ca ku tinsa cu je'u cnicro cu za'u re'u krixa .i mi'o dy. na ba di'a casnu va'o lo nu do zmanei li'u»
ni'o «lu ue zo mi'o sei la smacu noi desku fe'e co'u lo jipno be lo rebla cu krixa .i li'a sai ba'e ''mi'' na casnu lo simsa .i lo lanzu be mi cu ze'e xebni lo mlatu .i rigni je tolba'i je malfadni danlu .i .e'u mi na za'u re'u tirna lo cmene li'u»
ni'o «lu vi'o sai sei la .alis. noi sutra lo nu galfi lo selsnu cu cusku .i xu .y. xu do .y. nelci .y. lo gerku li'u» .i la smacu na spuda .i se ki'u bo la .alis. ca'o cusku «lu lo melbi ke cmalu gerku noi xabju lo jibni be lo zdani be mi'a zo'u mi djica lo nu mi gy. do jarco .i gy. cmalu gerku la .terier. gi'e se kerfa lo clani je sarlu je bunre gi'e xrubei lo dacti poi do renro .i gy. fa'a ga'u zutse gi'e cpedu lo sanmi gi'e zukte lo so'i vrici noi mi na morji lo xadba be ke'a .i gy. se ponse lo te cange noi xusra lo du'u gy. tai plixau ja'e lo nu gy. se vamji lo rupnu be li pa no no .i cy. xusra lo du'u gy. catra ro lo ratcu .i .oi se'i sei la .alis. cu xenru tonga krixa .i mi xersmadi lo du'u mi ta za'u re'u cnixai li'u» .i la smacu ca'o limna to'o .abu se rai lo kamvli gi'e mutce lo ka kalsygau lo lalxu ca lo nu klama
ni'o .abu xutla trisku «lu doi smacu dirba ko za'u re'u xruti .i nu'e do'u mi'o ba casnu ge nai lo mlatu gi nai ji'a lo gerku va'o lo nu do na nelci li'u» .i la smacu ca lo nu tirna di'u cu carna gi'e masno limna xruti .abu .i lo flira cu mutce lo ka blabi (to fau lo nu cinmo sei la .alis. cu pensi toi) .i sy. lauble je desku voksa cusku «lu .e'u mi'o klama lo korbi .i ba bo mi do jungau lo lisri be mi .i do ba jimpe lo du'u ma kau krinu lo nu mi xebni lo mlatu .e lo gerku li'u»
ni'o ca mapti tcika lo nu cliva kei ki'u lo nu lo lalxu cu ca'o tisna lo cipni jo'u lo danlu vu'o poi ba'o farlu ly. .i la datka jo'u la cipnrdodo jo'u la cipnrlori jo'u la .atkuila cifnu jo'u lo so'o drata noi vrici je cizra danlu .i la .alis. cu lidne .i lo mulno girzu cu limna fa'a lo korbi
## ni'o ni'o ci mo'o
### lo jdijmaji terjvi jo'u lo clani lisri
ni'o je'u lo cizra simlu gunma cu jmaji lo se lalxu .i lo cipni zo'u lo pimlu cu dandu .i lo danlu zo'u lo kerfa cu jibni snipa .i lo ro mei zo'u cilmo carmi gi'e fengu gi'e na kufra
ni'o lo pa moi preti cu li'a du'u ta'i ma kau za'u re'u sudga .i casnu la'e di'u .i ba bo zi lo mentu be li so'u cu simlu lo ka rarna kei fa lo nu la .alis. ca'o pendo tavla lo ro mei tai lo nu da'i ri .abu cu slabu ze'a lo nu .abu jmive .i je'u .abu cu ze'u daupro la cipnrlori noi uo badri carna gi'e cusku «lu mi do tolcitmau gi'e ja'e bo junmau li'u» po'o .i la'e di'u zo'u la .alis. na curmi se cau lo nu djuno lo du'u ly. nanca ma kau .i la cipnrlori cu je'a tolbre lo nu jungau fi lo du'u ly. ma kau nanca .i ja'e bo no drata cu se cusku
ni'o ro mai la smacu noi simlu lo ka catni lo ro mei cu krixa «lu ko zutse doi ro do gi'e jundi mi .i ba'e ''mi'' do ba zi sudgau li'u» .i lo ro mei ca zi zutse gi'e barda djine .i la smacu cu midju .i la .alis. cu ca'o xanka catlu sy. ki'u lo nu .abu birti lo du'u .abu co'a bilma bai lo nu na ba zi sudga
ni'o «lu ta'a sei la smacu cu vajni simlu cusku .i xu ro do bredi .i la'e di'e cu sudrai lo ro se djuno be mi .i .e'o ro ko smaji .i «lu la .uiliam. poi jamji'a zi'e noi lo jdaja'a cu zanru lo jamna te zukte be fi ke'a cu ze'i trubi'o lo glipre noi ke'a djica lo turni gi'e pu mutce lo ka se tcaci lo nu flacau trubasti gi'e jamji'a .i la .eduin. jo'u la .morkar. vu'o noi turni la .mersias. fa'u la .nortumbrias. li'u» li'u»
ni'o «lu .o'u nai sei la cipnrlori cu cusku je desku li'u»
ni'o «lu ke'o pe'u sei la smacu cu frumu cusku je ke ku'i clite mutce .i xu do cusku li'u»
ni'o «lu mi na go'i sei la cipnrlori cu sutra cusku li'u»
ni'o «lu mi pu jinvi lo du'u ja'a go'i sei la smacu cu cusku .i mi di'a cusku .i «lu la .eduin. jo'u la .morkar. vu'o noi turni la .mersias. fa'u la .nortumbrias. cu xusra se va'u .ubu .i je la .stigand. ji'a sai noi naijgi ke banli jdatro la .kanterburis. cu facki fi da fe lo du'u xamgu sidbo li'u» li'u»
ni'o «lu facki fi ba'e ''ma'' sei la datka cu cusku li'u»
ni'o «lu «lu facki fi ba'e ''da'' li'u» sei la smacu cu spuda co fengu milxe .i li'a do djuno lo du'u ma kau smuni zo da li'u»
ni'o «lu mi ja'a djuno lo du'u ma kau smuni zo da kei ca lo nu mi facki sei la datka cu cusku fi da noi so'e roi pipybanfi ja curnu .i lo preti zo'u fi ma facki fa lo banli jdatro li'u»
ni'o la smacu na sanji lo di'u preti gi'e sutra lo nu di'a cusku «lu «lu facki fi da fe lo du'u xamgu sidbo fa lo nu kansa la .edgar.atelin. lo nu penmi la .uiliam. gi'e friti lo trumapku .ubu .i lo se tarti be la .uiliam. ca lo nu cfari cu milxe .i ku'i lo nuntolclite be lo .ubu normano li'u» .i pei doi do iu sei sy. di'a cusku je ca bo carcra be la .alis. li'u»
ni'o «lu cilmo du'i lo nu pu cilmo sei la .alis. cu badri cusku .i simlu lo ka na sai sudgau mi li'u»
ni'o «lu va'o la'e di'u sei la cipnrdodo ca lo nu sa'irbi'o lo tuple cu junri cusku mi stidi lo du'u lo nu penmi cu se tolcfari'i te zu'e lo nu temsepcau plicu'a lo tolcadmau daftadji li'u»
ni'o «lu ko tavla bau la .lojban. sei la .atkuila cifnu cu cusku .i mi na se slabu lo smuni be lo xadba be lo di'u clani valsi .i je pe'i do ji'a na go'i li'u» .i la .atkuila cifnu cu krogau lo stedu te zu'e lo nu mipri lo nu cisma .i su'o lo drata cipni cu mi'amli co se tirna
ni'o «lu mi pu pu'o cusku sei la cipnrdodo cu se xrani cusku lo se du'u lo traji be lo ka se jalge lo nu sudgau mi'o cu jdijmaji terjvi li'u»
ni'o «lu ki'a jdijmaji terjvi sei la .alis. cu cusku li'u» .i .abu na mutce lo ka djica lo nu djuno .i ku'i la cipnrdodo pu denpa tai lo nu dy. jinvi lo du'u ba'e ''da'' .ei tavla .i je no drata pu simlu lo ka djica lo nu cusku de
ni'o «lu je'u sei la cipnrdodo cu cusku lo xagrai be lo ciksi tadji cu nu zukte li'u» (to ji'a ki'u lo nu ju'o cu'i do ji'a djica lo nu troci ca lo dunra donri kei mi do jungau lo du'u la cipnrdodo cu zukte ma kau toi)
ni'o pa mai dy. finti lo sinxa be lo nunbajra pluta be'o noi cukla milxe (to lo satci tarmi na vajni sei dy. cusku toi) .i ba bo vi fa'u va punji lo ro mei lo pluta .i cusku no «lu pa .i re .i ci .i ko bajra li'u» .i ba'i bo ro da co'a bajra ca lo nu da djica kei gi'e co'u bajra ca lo nu da djica .i se ki'u bo na frili fa lo nu djuno lo du'u mo'u ma kau bajra jivna .i ku'i la cipnrdodo ba lo nu ca'o bajra ze'a lo xadba cacra gi'e za'u re'u je'a sudga cu suksa kixsku «lu lo nu jivna cu mulno li'u» .i lo ro mei cu denmi sanli gi'e vasxu mutce gi'e te preti fi «lu ku'i ma jinga li'u»
ni'o lo di'u preti zo'u la cipnrdodo na kakne lo nu danfu se cau lo nu mutce pensi .i je dy. ze'u zutse fau lo nu pa degji cu danre lo mebri (to tai lo nu tarmi la .ceikspir. fi'o ta'e se pixra ri toi) .i ca bo lo drata cu denpa je smaji .i ro mai la cipnrdodo cu cusku «lu ba'e ''ro'' da jinga .i je .ei ro da se cnemu li'u»
ni'o «lu ku'i ma cnemu sei lo voksa so'i mei cu te preti li'u»
ni'o «lu li'a ba'e ''tu'' sei la cipnrdodo noi sinxa la .alis. se pi'o pa degji cu cusku li'u» .i je lo ro mei ba zi jmaji lo sruri be .abu gi'e se cfipu kixsku «lu .au ve cnemu .i .au ve cnemu li'u»
ni'o la .alis. na te sidbo lo du'u .ei zukte ma kau kei gi'e dunku punji lo xance lo daski gi'e vimcu lo tanxe be lo titspi (to .u'a lo silna djacu na pagre lo tanxe lo nenri toi) gi'e fairgau lo titspi lo ro jinga .i satci banzu lo nu ro da cu te dunda pa titspi
ni'o «lu ku'i .ei tu ji'a se cnemu sei la smacu cu cusku li'u»
ni'o «lu li'a sei la cipnrdodo cu junri spuda .i ma poi drata cu nenri lo do daski sei fa'a la .alis. cu jmina cusku li'u»
ni'o «lu lo po'o tajgai sei la .alis. cu badri cusku li'u»
ni'o «lu ko ta mi dunda sei la cipnrdodo cu cusku li'u»
ni'o baku lo ro mei cu za'u re'u jmaji lo sruri be .abu ca lo nu la cipnrdodo cu junri dunda lo tajgai gi'e cusku «lu mi'a do pikci lo nu do cpazau lo vi melbi tajgai li'u» .i je lo ro mei ca lo nu dy. mo'u cusku lo tordu se cusku cu geirkrixa
ni'o la .alis. cu jinvi lo du'u pi ro lo tcini cu mutce lo ka cizra .i ku'i lo ro mei cu simlu lo ka tai junri kei ja'e lo nu .abu na darsi lo nu cmila .i .abu ki'u lo nu na te sidbo lo du'u .ei cusku ma kau cu krobi'o rinsa gi'e lebna lo tajgai se rai lo ka junri simlu
ni'o lo bavla'i cu nu citka lo titspi .i la'e di'u rinka lo nu savru gi'e cfipu kei ki'u lo nu ge lo barda cipni cu pante lo nu na banzu lo nu vu'irga'e lo me ri moi gi lo cmalu cu dirva'u gi'e nitcu lo nu se darxi fo lo trixe .i ro mai ku'i mo'u co'e .i je lo ro mei cu za'u re'u djine zutse gi'e pikci la smacu lo nu di'a cusku
ni'o «lu do nupre lo nu jungau mi lo citri be do sei la .alis. cu cusku .e lo du'u ki'u ma kau do xebni .y. my. jo'u gy. sei tolylau jmina li'u» .i .abu xadba terpa lo nu sy. cu za'u re'u cinmo se xrani
ni'o «lu lo lisri be mi cu clani je se badri sei la smacu fa'a la .alis. cu cusku je dricmo li'u»
ni'o «lu ba'e ''je'a'' clani linsi sei la .alis. noi manci catlu lo rebla be la smacu cu cusku .i ku'i ki'u ma do ly. mi'a skicu lo ka se badri li'u» .i .abu ca lo nu la smacu cu cusku cu ca'o manci la'e di'u ja'e lo nu lo te sidbo lo rebla linsi lo simsa be «lu
la fengu lo smacu
noi fy. ke'a
cpacu cu
penmi lo
zdani .i fy
ra jungasnu
.i .ai no
proki'u .i .ei
flajvisi'u
.i ca lo ca
cerni no
drata cu
fasnu .i .e'o
mi farlu
sei lo smacu
cu darlu .i
se cau lo
pairkamni ia
mi'o nolpratra
.i .o'u na
vajni .i
je ba'e ''mi''
pajni
sei la
fengu cu
cusku
lo nu
do
se
catra
li'u»
ni'o «lu do na jundi sei la smacu fi la .alis. cu junri cusku .i do pensi ma li'u»
ni'o «lu ie nai ga'i nai sei la .alis. cu cumla cusku .i do pu'o cusku lo mu moi be lo kruvi pe'i li'u»
ni'o «lu .i je ge na go'i sei la smacu cu cladu je fengu mutce krixa gi na simsa li'u»
ni'o «lu .a'e jgena li'u» se cusku la .alis. noi ro roi bredi lo nu sidju zi'e noi ru'u xanka catlu .i «lu ko curmi lo nu mi do sidju lo nu luzgau jy. li'u»
ni'o «lu .ai mi curmi no simsa sei la smacu cu cusku je sa'irbi'o je cliva .i do mi tolsi'a fau lo nu do cusku lo tai nonselsmu li'u»
ni'o «lu .ai nai go'i sei la .alis. uu cu pikci .i ku'i frili do fa lo nu selxaicni li'u»
ni'o la smacu cu spuda fi lo po'o nu cmoni
ni'o «lu .e'o sai ko xruti klama gi'e mo'u cusku lo lisri be do sei la .alis. cu kixsku li'u» .i lo drata cu kansa cusku «lu go'i .e'o sai li'u» .i ku'i la smacu cu desygau po'o lo stedu gi'e depcau sutyze'a lo ka cadzu
ni'o «lu .u'u na stali li'u» se xersku la cipnrlori zi ba lo nu mo'u na'e se viska .i je lo tolci'o cakyjukni cu cabna cusku fi lo tixnu be ri fe «lu ie doi dirba be mi .i .a'o ctuca do lo nu ba'e ''do'' no roi fengu li'u» .i «lu ko na cusku doi mamta sei lo citno cakyjukni cu milxe bikla cusku .i do jai banzu lo nu fegygau lo xamsi cakcurnu li'u»
ni'o «lu .au la .dinas. cu vi zvati sei la .alis. fi no steci cu bacru cusku .i ju'o da'i dy. zi cpacu li'u»
ni'o «lu la .dinas. ki'a .i e'a pei mi darsi lo nu te preti sei la cipnrlori cu cusku li'u»
ni'o la .alis. cu djicni spuda ki'u lo nu ro roi bredi lo nu tavla fi lo .abu danlu .i «lu la .dinas. cu me mi'a moi mlatu .i ji'a certu je'u lo nu kavbu lo smacu .i ui .au do viska ca lo nu dy. jersi lo cipni .i je'u dy. lo cmalu cipni du'i gi catlu gi citka li'u»
ni'o lo di'u se cusku cu se jalge lo banli nu cinmo savru ra'i lo zvati .i so'o lo cipni cu sutra lo nu cliva .i pa tolci'o cipnrpika co'a cliva brebi'o gi'e ca bo cusku «lu .ei je'u mi zdakla .i lo nicte vacri na mapti lo galxe be mi li'u» .i lo cipnrkanario cu nalsto voksa kixsku fi lo panzi fe «lu ko klama doi dirba .i je'u ca tcika lo nu ro do cu sipna bu'u lo ckana li'u» .i ki'u lo vrici ro lo ro mei cu cliva .i je la .alis. cu ba zi kansa no da
ni'o «lu .au mi na pu tavla fi la .dinas. sei .abu badri sezysku .i no da dy. vi nelci pe'i .i ku'i ju'o dy. xagrai lo ro mlatu pe lo munje .i .oi doi .dinas. iu .i'i xu mi do ba za'u re'u viska li'u» .i ca ku la .alis. uu co'a za'u re'u klaku ki'u lo nu .abu cinmo lo ka mutce lo ka nonkansa je badri .i ba zi bo ku'i .abu cu za'u re'u tirna lo nu vu stapa .i je .abu djicni catlu lo galtu gi'e xadba pacna lo du'u la smacu cu jdice lo drata gi'e xruti te zu'e lo nu mo'u cusku lo lisri
## ni'o ni'o vo mo'o
### la ractu cu benji lo cmalu me la .bil.
ni'o me la blabi ractu noi masno bajra xruti gi'e xanka ke sruri catlu ca lo nu klama kei tai lo nu ry. da pu cirko .i .abu tirna lo nu ry. lauble sezysku «lu .oi la noltroni'u .i .oi la noltroni'u doi dirba xance be mi doi skapi be mi doi zbikre be mi zo'u ny. da mi ba catrymi'e ju'o sai .i jo ro mabrnfuru cu mabrnfuru .i mi ko'a ma falcru li'u» .i la .alis. zi smadi lo du'u ry. sisku lo bifpra .e lo blabi ke kanba gluta re mei .i .abu noi xendo cu co'a sisku ko'a .i ku'i ko'a na se viska .i ro da ba lo nu .abu limna lo lalxu cu simlu lo ka ba'o cenba .i lo barda kumfa poi vasru lo blaci jubme .e lo cmalu vorme cu ba'o mulno canci
ni'o ba zi ku la ractu cu sanji la .alis. noi ru'u sisku ku'o gi'e fengu kixsku fi .abu fe «lu ue doi .merian. do ma zukte bu'u lo bartu .i ko ca bajra klama lo zdani gi'e bevri lo gluta re mei .e lo bifpra mi .i ko sutra li'u» .i la .alis. tai terpa ja'e lo nu .abu zi bajra fa'a lo farna poi ry. jarco ku'o gi'e na troci lo nu ciksi lo se srera be ry
ni'o «lu tu jinvi lo du'u mi tu zdase'u sei .abu ca lo nu bajra cu sezysku .i tu ba se spaji lo nu facki lo du'u mi me ma kau .i ku'i .e'e mi bevri lo bifpra .e lo gluta tu .y. va'o lo nu da'i mi tolcri li'u» .i .abu ca lo nu cusku di'u cu penmi lo cnici ke cmalu zdani noi lo ke'a vrogai cu se dandu lo carmi lastu tapla noi lo cmene po'u «lu blabi ractu li'u» ba'o se ciska fi ke'a .i .abu nerkla se cau lo nu vrodarxi kei gi'e sutra lo nu serti cpare kei gi'e terpa lo nu penmi lo ca'a me la .merian. gi'e gau barkla lo zdani pu lo nu tolcri lo bifpra .e lo gluta
ni'o «lu ua cizra sei la .alis. cu sezysku fa lo nu mi selfu lo ractu .i ru'a za'u mai la .dinas. mi ba minde li'u» .i .abu co'a se xanri lo klesi be lo cuntu poi da'i fasnu .i «lu doi .nix.alis. ko ca klama ti gi'e bredi lo nu cadzu li'u» .i «lu mi ba zi klama doi kurji .i ku'i .ei mi jundi lo vi kevna gi'e fanta lo nu lo smacu cu barkla li'u» .i «lu ku'i ia nai curmi sei la .alis. di'a co'e lo nu la .dinas. cu stali lo zdani va'o lo nu dy. co'a tai minde lo prenu li'u»
ni'o ca ku .abu zvati lo cnici ke cmalu kumfa noi lo jubme cu lamji lo canko be ke'a gi'e se cpana (to du'i lo .abu se pacna toi) lo bifpra .e ji'i ci cmatce ke blabi ke kanba gluta re mei .i .abu lebna lo bifpra .e pa lo gluta re mei gi'e pu'o cliva lo kumfa ca lo nu catlu fa'a lo cmalu botpi noi sanli lo jibni be lo minra
ni'o ca lo ca krefu no da by. tcita fi'o jufra «lu ko mi pinxe li'u» .i ku'i .abu gacri vimcu gi'e punji by. lo .abu ctebi .i «lu ju'o ca ro nu mi pinxe ja citka da kei sei .abu sezysku ba'e ''de'' poi cinri cu fasnu .i se ki'u bo mi ba zgana lo nu lo vi botpi ma kau gasnu .i .a'o ti gasnu lo nu mi za'u re'u banro lo barda .i mi mutce lo ka tatpi lo nu tai cmatce li'u»
ni'o ja'a ca'a gasnu la'e di'u .i go'i pu lo se pacna be .abu .i pu lo nu .abu mo'u pinxe lo xadba be lo se botpi kei lo stedu be .abu ca'o catke lo drudi .i .abu bilga lo nu korcu kei lo nu marbi lo cnebo lo nu porpi .i .abu sutra lo nu punji lo botpi kei gi'e sezysku «lu banzu .i .a'o mi co'u banro .i ca ku mi na ka'e pagre lo vorme .i .au mi na pu pinxe lo tai mutce li'u»
ni'o .oi dukse lo ka lerci kei fa lo nu djica la'e di'u .i .abu banro gi'e za'o banro gi'e ba zi bilga lo nu sanli lo loldi lo cidni .i ba zi bo lo canlu na banzu la'e di'u ji'a sai .i .abu troci lo nu vreta gi'e punji ge lo bircidni lo lamji be lo vorme gi lo drata birka lo sruri be lo stedu .i ku'i .abu za'o banro .i uo .abu tolse'a lo birka lo zdani pa'o lo canko gi'e setca lo jamfu lo danmo tubnu gi'e sezysku «lu uo mi na ka'e gasnu lo bancu .i mi ma ba lifri li'u»
ni'o zanfu'a la .alis. fa lo nu lo cmalu ke makfa botpi ca mulno lo ka ce'u ma kau rinka .i .abu ca na banro lo bramau gi'e ku'i mutce lo ka tolkufra .i za'a na cumki fa lo nu .abu cu za'u re'u bartu lo kumfa .i se ki'u bo .abu tolgei ue nai
ni'o «lu lo mi zdani ti mutce zmadu lo ka pluka sei la .alis. uu cu pensi .i bu'u zy. ge nai ro roi zenba jo'u jdika gi nai ro roi se minde lo smacu .a lo ractu .i .au nai ru'e mi na klama fo lo ractu kevna .i ku'i .i ku'i cizra fa lo tai nu jmive .i mi ja'a kucli lo du'u mi ma kau ca'a lifri .i mi ca lo nu tcidu lo crida lisri cu krici lo du'u lo tai cuntu no roi fasnu .i ca ku mi cy. midju .i .ei da finti lo cukta mi .i ie .ei go'i .i .ai mi ca lo nu ba'o banro cu finti .i ku'i mi ca ba'o banro sei .abu badri jmina .i ba'u nai lo bu'u canlu na banzu lo nu banro lo bancu li'u»
ni'o «lu ku'i ja'o sei la .alis. cu pensi mi ba no roi zenba lo ka tolcitno .i la'e di'u pluka .i mi no roi tolcitno ninmu .i ku'i mi ro roi cilre da .ei .i .oi .au nai go'i li'u»
ni'o «lu .oi doi .alis. noi bebna sei .abu sezyspuda ta'i ma do da bu'u ka'e cilre .i ue lo canlu ja'a ru'e banzu tu'a do .i no da bu'u canlu lo ve cilre cukta li'u»
ni'o .abu ca'o co'e .i pa mai darlu lo mlana gi'e re mai darlu lo drata gi'e zbasu lo vajni nuncasnu lo ro mei .i ku'i ba lo mentu be li so'o .abu tirna lo voksa noi bartu ku'o gi'e sisti te zu'e lo nu tinzga
ni'o «lu doi .merian. doi .merian. sei lo voksa cu cusku ko bevri lo mi gluta mi ca ku li'u» .i ba bo tirna lo nu cmalu ke jamfu stapa lo serti .i la .alis. cu djuno lo du'u la ractu cu klama te zu'e lo nu sisku .abu .i .abu desku ja'e lo nu lo zdani cu desku .i .abu tolmorji lo nu ge .abu ca kilto la ractu lo ka barda gi se ki'u bo no da krinu lo nu terpa ry
ni'o ca ku la ractu cu tolcliva lo vorme gi'e troci lo nu kargau vy. .i ku'i lo se troci cu fliba ki'u lo nu ge .ei lo vrogai fa'a ne'i karbi'o gi lo bircidni be la .alis. cu catke vy. .i la .alis. cu tirna lo nu ry. sezysku «lu .ai mi srukla gi'e nerkla fo lo canko li'u»
ni'o «lu na ba go'i sei la .alis. cu pensi li'u» .i .abu denpa lo nu krici lo du'u tirna lo nu la ractu cu cnita lo canko .i ba zi bo .abu jai suksa fai lo nu pejgau lo xance gi'e jgari lo vacri .i .abu kavbu no da gi'e ku'i tirna lo cmalu se krixa .e lo nu farlu .e lo porpi blaci sance gi'e nibji'i la'e di'u lo du'u cumki fa lo nu ry. farlu lo guzme tanxe .a lo simsa
ni'o baku lo fengu voksa (to be la ractu toi) cu co'e «lu ju'i .pat. ju'i .pat. do ma zvati li'u» .i ba bo lo voksa noi .abu ke'a na pu tirna cu co'e «lu ju'o mi ti zvati .i mi kakpa sisku lo plise doi banli li'u»
ni'o «lu .o'o nai kakpa sisku lo plise sei la ractu cu fengu cusku .i ko mi klama gi'e sidju lo nu mi ba'e ''ti'' bartu li'u» (to sance lo drata ke porpi blaci toi)
ni'o «lu pau ju'i .pat. ta poi zvati lo canko cu mo li'u»
ni'o «lu ju'o ta birka doi banli li'u» (to py. bacru zo biryrka toi)
ni'o «lu birka doi bebna .i ma pu viska lo birka poi tai barda .i ta se tisna pi ro lo canko li'u»
ni'o «lu ju'o go'i doi banli .i ku'i ta ca'a birka li'u»
ni'o «lu .i se ju no da va cuntu ta .i ko ta vimcu li'u»
ni'o baku ze'u smaji .i la .alis. so'u roi tirna lo lauble selsku no'u mu'a «lu ju'o mi na nelci doi banli .i na sai go'i li'u» .e «lu ko zukte tai lo mi te minde doi tolvri li'u» .i uo .abu cu re re'u pejgau lo xance gi'e re re'u jgari lo vacri .i ca ku tirna re cmalu se krixa .e lo porpi blaci sance drata .i «lu ue xo kau guzme tanxe cu zvati sei la .alis. cu pensi .i .a'u ma ba zi se zukte .i lo nu lacpu mi pa'o lo canko zo'u .au kakne .i ju'o mi na djica lo nu za'o stali ti li'u»
ni'o .abu ze'a denpa gi'e tirna no lo za'u moi .i ro mai tirna lo sance be lo cmalu carce xislu .e so'i sai voksa noi tavla kansi'u .i .abu snada lo nu jimpe tu'a lo valsi .i «lu lo drata serti ma zvati .i ua .ei mi bevri lo pa mei .i la .bil. cu co'e lo drata .i ju'i .bil. ko ta ti bevri doi citno .i ko ta punji lo vi kojna .i na go'i .i pu ku ko ta jonsimgau .i ta za'o na preja lo galtu banzu .i ju'o ta ba xamgu banzu .i ko na tcila jundi .i ju'i .bil. ko jgari lo vi skori .i xu lo drudi ba sarji .i ko jundi lo va kluza tapla .i .oi ta ca'o farlu ju'i cnita (to sa'a cladu popsna toi) .i ma ta gasnu .i ru'a la .bil. .i ma ba cnita klama fo lo danmo tubnu .i mi na.e ko go'i .i vi'o nai .i la .bil. ba go'i .i ju'i .bil. lo selse'u do minde lo nu do cnita klama fo lo danmo tubnu li'u»
ni'o «lu .a'a .ei pei la .bil. cu cnita klama fo lo danmo tubnu sei la .alis. cu sezysku .i su'a la .bil. cu bilga lo nu zukte ro da .i mi na basti la .bil. gi'u te pleji lo mutce .i lo vi fagzda ja'a jarki .i ku'i pe'i mi ka'e tikpa milxe li'u»
ni'o pa mai .abu tirna lo voksa so'i mei pe «lu ta mo'i me la .bil. li'u» .i re mai go'i lo ractu voksa pe «lu ko ta jgari doi lamji be lo spati bitmu li'u» .i ci mai go'i lo smaji .i vo mai go'i lo drata ke voksa kalsa pe «lu ko sarji lo stedu be ta .i gau ko ta pinxe lo jikru .i ko ta na vaxydicra .i ma mo doi pendo .i do ma pu lifri .i ko mi'a jungau la'e di'u li'u»
ni'o ro mai go'i lo cmalu je ruble je lauble voksa (to «lu tu me la .bil. sei la .alis. cu pensi li'u» toi) pe «lu mi ja'a ru'e djuno .i banzu ki'e .i mi ca kufra .i ku'i mi dukse lo ka jenca kei lo nu jungau .i mi djuno lo po'o du'u da mi catke tai lo danre selkei plipe .i mi tolfa'u tai tu'a lo tsani jakne li'u»
ni'o «lu ie do ca'a go'i doi pendo sei lo drata cu cusku li'u»
ni'o «lu .ei mi'o jelgau lo zdani sei lo ractu voksa cu cusku li'u» .i la .alis. cu krixa se rai lo ka cladu kei «lu ga nai go'i gi mi ba je'icru la .dinas. do li'u»
ni'o zi smaji mulno .i la .alis. cu pensi «lu .a'u tu ma ba zukte .i .ei va'o lo nu prije cu vimcu lo drudi li'u» .i ba zi lo mentu be li ji'i re co'a za'u re'u ru'u muvdu .i la .alis. cu tirna lo nu la ractu cu cusku «lu lo nu carcylai li pa cu banzu lo nu cfari li'u»
ni'o «lu lo nu ba'e ''ma'' carcylai li pa sei la .alis. cu pensi li'u» .i ku'i na cumki fa lo nu .abu ze'u senpi .i ba zi bo so'i cmalu bidju cu carvi pa'o lo canko .i su'o ra darxi .abu fo lo flira .i «lu mi ti ba tolcfagau sei .abu sezysku li'u» .i .abu krixa «lu le'o ko na za'u re'u co'e li'u» .i la'e di'u cupra lo drata ke smaji mulno
ni'o la .alis. cu se spaji sanji lo nu ro lo bidju cu binxo lo cmalu nanba ca lo nu vreta lo loldi .i lo carmi co'a sidbo fi lo .abu menli .i «lu lo nu mi citka pa lo nanba sei .abu pensi ba ju'o rinka lo nu mi cenba lo ka barda .i na sai ka'e brazengau mi .i ja'o ju'o pe'i cmazengau mi li'u»
ni'o ki'u la'e di'u .abu tunlo pa lo nanba gi'e gleki lo nu facki lo du'u ca co'a cmaze'a .i .abu ca lo nu cmalu banzu lo nu pagre lo vorme cu bajra klama lo bartu be lo zdani gi'e penmi lo so'i cmalu ke danlu jo'u cipni noi denpa .i lo cmalu rebyrespa uu no'u la .bil. cu midju lo ro mei gi'e se sarji re smacrkobaiu noi dunda lo se botpi .i ro da sutra fa'a la .alis. ca lo nu .abu tolcanci .i ku'i .abu to'o bajra se rai lo kamsutra gi'e ba zi snura zvati lo denmi ricfoi
ni'o «lu .ei pa mai sei la .alis. ca lo nu ru'u cadzu bu'u lo ricfoi cu sezysku mi za'u re'u banro lo mi barda .i .ei re mai mi tolcri lo melbi purdi .i pe'i la'e di'u cu xagrai selpla li'u»
ni'o ju'o xamgu selpla .i cnici je sampu .i lo pa po'o nabmi zo'u .abu na te sidbo lo nu co'a co'e kei lo cmarai ji'a sai .i ca lo nu .abu xanka catlu ru'u lo tricu kei lo cmalu ke kinli se bacru noi vi gapru lo .abu stedu cu gasnu lo nu .abu fa'a ga'u sutra catlu
ni'o lo bratce gerpanzi fa'a ni'a catlu .abu se pi'o lo barda je cukla kanla gi'e ruble tengau lo xance gi'e troci lo nu pencu .abu .i «lu uu doi dirba li'u» se cusku la .alis. se pi'o lo xlura tonga .i .abu mutce lo ka troci lo nu siclu .i ku'i mutce terpa lo si'o gy. xagji noi la'a nibli lo nu gy. citka .abu mu'i nai lo nu .abu xlura
ni'o .abu ja'a ru'e sanji lo nu .abu lo cmalu grana cu lafti gi'e jarco lo gerpanzi .i ja'e bo lo gerpanzi cu plipe lo vacri ro lo jamfu gi'e se pluka cmoni gi'e sezre'o lo garna gi'e gasnu lo nu simlu lo ka gunta ri .i ba bo la .alis. cu rivbi lo nu janli kei lo nu muvdu lo trixe be lo barda cpinyspa .i lo gerpanzi ca lo nu .abu tolcanci lo drata mlana cu za'u re'u sezre'o lo grana gi'e gunro farlu se ja'e lo nu sutra troci lo nu jgari gy. .i ba bo la .alis. noi jinvi lo du'u simsa lo nu kelci lo braxirma zi'e noi terpa lo nu se stapa fi lo gy. jamfu cu za'u re'u bajra fa'ati'a lo cpinyspa .i lo gerpanzi co'a so'o roi ze'i gunta lo grana gi'e ve'i fa'a je ve'u to'o bajra gi'e ro roi rufsu bacru gi'e ro mai vu zutse gi'e ta'irva'u gi'e se tance lo dandu be lo moklu gi'e se kanla lo xadba ganlo
ni'o lo cabna cu simlu fi la .alis. fe lo ka xamgu mapti lo nu cliva .i se ki'u bo .abu zi co'a go'i gi'e bajra co'u lo nu mutce tatpi gi'e vasxu claxu .e lo nu lo se bacru be lo gerpanzi vu se sance lo ruble mutce
ni'o «lu ku'i ia dirba ke cmalu gerpanzi sei la .alis. noi surla lo nu vreta lo matnyxrula kei gi'e pilno lo my. pezli lo nu cupra lo brife cu cusku .i mi mutce nelci lo nu ctuca tu lo seltra va'o da'i lo nu mi mapti fi lo ka barda .i .oi mi jibni tolmorji lo nu .ei mi za'u re'u banro .i .a'a .ei mi ma zukte .i ru'a .ei mi citka ja pinxe da .i ku'i lo banli preti zo'u go'i ma li'u»
ni'o ju'o lo banli preti cu me zo ma .i la .alis. fa'a ru'u catlu lo xrula .e lo srasu gi'e ku'i viska no da poi simlu lo ka mapti lo se citka ja pinxe .i lo barda gumri cu zvati lo jibni be .abu gi'e simsa .abu lo ka galtu .i .abu ca lo nu ba'o catlu lo cnita .e lo re mlana .e lo trixe cu te sidbo fi lo du'u .e'e catlu gi'e viska lo nu ma kau cpana
ni'o .abu tcena ji'u lo jamfu jipno gi'e catlu lo bancu be lo korbi be lo gumri .i lo .abu kanla cu penmi lo kanla be lo barda ciftoldi noi zutse lo cpana zi'e noi lo ke'a birka cu se polje zi'e noi smaji damva'u se pi'o lo clani nargile zi'e noi jundi ge nai .abu gi no drata
## ni'o ni'o mu mo'o
### se djusku lo ciftoldi
no'i la ciftoldi joi la .alis. ze'a simxu lo nu smaji catlu .i ba zu bo la ciftoldi cu bevri lo nargile fo lo moklu gi'e cusku fi .abu fo lo surla je cando voksa
ni'o «lu do me ba'e ''ma'' sei la ciftoldi cu cusku li'u»
ni'o di'u na xamgu mukti lo nu co'a casnu .i la .alis. cu toldarsi spusku «lu mi .y. .i mi na'e mulno djuno doi do'u ga'i nai ca lo cabna .i sa'u nai mi djuno lo du'u mi me ma kau ca lo nu mi ckana cliva ca lo cabycerni .i ku'i pe'i mi so'o roi se galfi ba la'e di'u li'u»
ni'o «lu ma di'u do smuni sei la ciftoldi cu jursa cusku .i ko ko ciksi li'u»
ni'o «lu .u'u mi na kakne lo nu mi mi ciksi doi do'u ga'i nai sei la .alis. cu cusku .i ki'u bo mi na me mi ua pei li'u»
ni'o «lu ua nai sei la ciftoldi cu cusku li'u»
ni'o «lu .u'u mi na kakne lo nu xagmau cusku de'u sei la .alis. cu clite mutce spuda ki'u lo nu zu'u mi na jimpe la'e de'u .i je zu'u nai lo nu mitre so'i da ze'a lo pa donri cu cfipu mutce li'u»
ni'o «lu na go'i sei la ciftoldi cu cusku li'u»
ni'o «lu .o'o cu'i .i'a do za'o na facki sei la .alis. cu cusku .i ku'i pe'i do ca lo nu binxo lo todbi'olanka (to ju'o do ba ca'a binxo ca da toi) gi'e ba bo binxo lo toldi cu ba milxe lo ka se cizra pe'i pei li'u»
ni'o «lu pe'i nai sai sei la ciftoldi cu cusku li'u»
ni'o «lu .o'o cu'i ju'o cu'i do cinmo lo drata sei la .alis. cu cusku .i mi djuno lo du'u da'i ba'e ''mi'' cinmo lo se cizra li'u»
ni'o «lu ba'e ''do'' ga'i sei la ciftoldi cu tolsi'a cusku .i do me ba'e ''ma'' li'u»
ni'o di'u xrugau lo re mei lo krasi be lo nu ta'arsi'u .i la .alis. cu milxe fanza lo nu la ciftoldi cu cusku lo tordu mutce pinka kei gi'e sanli zenba gi'e junri mutce cusku «lu pe'i .ei do cusku pu ku lo se du'u ba'e ''do'' me ma kau li'u»
ni'o «lu ki'u ma sei la ciftoldi cu cusku li'u»
ni'o la'e di'u ji'a cfipu preti .i la .alis. na kakne lo nu pensi lo xamgu krinu .i je la ciftoldi cu simlu lo ka na se zdile .i se ki'u bo .abu co'a cliva
ni'o «lu ko xruti sei la ciftoldi fa'a .abu krixa .i .ei mi cusku lo vajni li'u»
ni'o la'e di'u cinri simlu ju'o .i la .alis. cu carna gi'e xruti
ni'o «lu ko surla stali sei la ciftoldi cu cusku li'u»
ni'o «lu xu la'e di'u cu mulno sei la .alis. cu cusku li'u» .i .abu ralte lo nu fengu kei tai lo xagrai nu .abu kakne
ni'o «lu na go'i sei la ciftoldi cu cusku li'u»
ni'o la .alis. cu jdice lo du'u denpa kei ki'u lo nu ge no da se zukte gi cumki fa lo nu cy. jungau .abu lo se vamji be lo nu tirna .i cy. ze'a lo mentu be li so'o ca'o damva'u gi'e na tavla .i ro mai cy. tolpolje lo birka gi'e za'u re'u lebna lo nargile lo moklu gi'e cusku «lu ja'o do jinvi lo du'u do ba'o cenba .i xu go'i li'u»
ni'o «lu .oi mi ba'o cenba doi do'u sei la .alis. cu cusku .i mi na kakne lo nu morji tai lo nu mi pu na'o no'a .i ji'a mi na stodi lo ka mitre kei ze'a lo mentu be li su'o pa no li'u»
ni'o «lu na kakne lo nu morji ba'e ''ma'' sei la ciftoldi cu cusku li'u»
ni'o «lu mi pu troci lo nu sitna «lu ua lo cmalu gunkybifce li'u» .i ku'i ri se bacru ja'e lo frica sei la .alis. cu badri mutce voksa spuda li'u»
ni'o «lu ko sitna «lu do tolcitno doi .paf.uiliam. li'u» sei la ciftoldi cu cusku li'u»
ni'o la .alis. cu polje lo xance gi'e co'a co'e di'edo tolci'o doi .paf.uiliam. sei lo citnau cu cusku.i lo kerfa be do ca'a blabi
.i ue do lo loldi lo stedu cu sanli.i do jinvi xu lo du'u drani
.i ca lo mi nunci'o sei la .uiliam. spudami terpa lo nu mi se benxai
.i ca ku ju'o sai mi no da se besna.i ui sai mi ro roi ka'e co'e
.i sei lo citnau cu cusku do ke'u tolci'ogi'e ba'o binxo lo plana
.i ku'i do plipe pu zi vi lo vorme.i ma krinu lo nu ka'e go'i
.i ca lo mi nunci'o sei lo ruskre prijecu cusku mi pruni se xadni
se pi'o lo vi kruji noi fepni li pa.i xu do te vecnu lo re mei
.i do tolci'o sei cusku .i se xedja co rublefi ro da poi jarmau lo grasu
.i ku'i lo gunse do mo'u se citka.i .a'u ta'i ma do snada
.i ca lo mi nunci'o mi flara'a gunkagi'e darlu ro da lo speni
.i lo jalge ke sluji kamtsa pe lo xedjacu renvi fi lo mi nunjmive
.i do tolci'o sei cusku .i nandu co srumalo nu lo do kanla cu vlipa
.i ku'i lo curfi'e gau do nazbi lanxe.i ma rinka lo nu do tai certu
.i mi ba'o spuda ci preti noi banzusei lo patfu cu cusku .i ko cumla
.i pe'i pei mi do ba tirna ze'e sai.i ko cliva .i ja mi do ba tikpa
ni'o «lu di'u na drani se cusku sei la ciftoldi cu cusku li'u»
ni'o «lu .u'u na mulno drani sei la .alis. cu toldarsi cusku .i su'o lo valsi ba'o cenba li'u»
ni'o «lu toldrani co'a lo krasi co'u lo fanmo sei la ciftoldi cu birti cusku li'u» .i smaji ze'a lo mentu be li so'o
ni'o la ciftoldi cu tavla pa moi
ni'o «lu .au pei do clani mitre ma sei cy. te preti li'u»
ni'o «lu ue .i lo du'u mitre ma kau na vajni sei la .alis. cu sutra spuda .i .i'i na nelci lo nu tai cafne fa lo nu cenba li'u»
ni'o «lu .i'i ba'e ''nai'' sei la ciftoldi cu cusku li'u»
ni'o la .alis. no da cusku .i .abu pu tai se fapro no roi lo .abu nunjmive gi'e ca cinmo lo nu fengu binxo
ni'o «lu xu do ca se mansa sei la ciftoldi cu cusku li'u»
ni'o «lu .y. .au mi braze'a doi do'u sei la .alis. cu cusku .i lo nu centre li ze cu mutce lo ka mabla li'u»
ni'o «lu ia sai mutce lo ka zabna sei la ciftoldi cu fengu cusku li'u» .i cy. sanli binxo ca lo nu tavla (to cy. satci centre li ze toi)
ni'o «lu ku'i mi na se tcaci sei la .alis. cu kecti tonga pante li'u» .i .abu pensi «lu .au lo danlu na tai jai frili fai lo nu se cnixrani li'u»
ni'o «lu do ba co'a se tcaci sei la ciftoldi cu cusku li'u» .i cy. punji lo nargile lo moklu gi'e co'a za'u re'u damva'u
ni'o ca ku la .alis. cu denpa lo nu cy. di'a tavla .i ba lo mentu be li ji'i re la ciftoldi cu vimcu lo nargile lo moklu gi'e ji'i re roi sipfru gi'e desku .i cy. cliva lo gumri gi'e cpare lo srasu lo darno gi'e ca bo piksku po'o «lu pa mlana do clazengau .i je lo drata mlana do torzengau li'u»
ni'o «lu pa mlana be ba'e ''ma'' .i lo drata mlana be ba'e ''ma'' sei la .alis. cu pensi li'u»
ni'o «lu lo gumri li'u» se cusku la ciftoldi tai lo nu da'i cy. tirna lo .abu selpensi .i ba zi bo canci
ni'o la .alis. cu pensi zgana lo gumri ze'a lo mentu gi'e troci co facki lo du'u lo re mlana cu me ma kau .i gy. prane cukla .i se ni'i bo lo nabmi cu nadycai .i ku'i ca lo fanmo .abu tengau lo birka ru'u lo gumri ve'a lo selku'e gi'e popygau se pi'o ro lo re xance lo korbi lo spisa
ni'o «lu ma fa'u ma mo fa'u mo sei .abu sezysku li'u» .i cmabatci lo pritu spisa te zu'e lo nu cipra fi lo selri'a .i ba zi bo ganse lo vlile nundarxi lo xejni'a .i ri darxi lo jamfu
ni'o .abu carmi terpa lo suksa nuncenba .i ku'i cinmo lo nu .ei na xaksu lo temci .i mu'i bo .abu sutra tolba'o .i je zi co'a zukte lo nu citka pi so'u lo drata spisa .i lo .abu xejni'a cu tai tagji se danre lo jamfu ja'e lo nu carmi nandu fa lo nu kargau lo moklu .i ku'i ca lo fanmo cu kargau gi'e snada lo nu tunlo lo pagbu be lo zunle spisa
* * * * * * *
* * * * * *
* * * * * * *
ni'o «lu ua lo stedu be mi cu zifre li'u» se cusku la .alis. fi'o tonga lo ka gleki poi ba zi binxo lo ka tepselspaji kei ca lo nu facki lo du'u na ka'e tolcri lo janco .i .abu fa'a ni'a catlu gi'e viska lo bratce clani cnebo po'o noi stani simsa sanli lo xamsi be fi lo ni'a vu crino pezli
ni'o «lu lo va crino cu ba'e ''mo'' sei la .alis. cu cusku .i lo mi janco ba'o klama ma .i .oi doi xance be mi ki'u ma mi nalka'e lo nu viska do li'u» .i .abu muvgau xy. ca lo nu tavla .i ku'i se jalge lo po'o cmalu nu desku fa lo darno ke crino pezli
ni'o lo nu muvgau lo xance lo stedu cu simlu lo ka na cumki .i se ki'u bo .abu troci lo nu muvgau lo stedu lo xance .i .abu mutce gleki lo nu facki lo du'u lo cnebo cu jai frili fai lo nu krobi'o fa'a ro da tai tu'a lo since .i .abu ba'o snada lo nu krobi'o ja'e lo melbi zigzagi kei gi'e bredi lo nu sfubu lo jbini be lo pezli noi .abu facki lo du'u ke'a na'e drata lo gapru be lo tricu noi ni'a ke'a .abu pu klama .i ca bo lo kinli se bacru cu gasnu lo nu .abu sutra ti'ekla .i lo barda tcacpi pu vofli fa'a lo .abu flira gi'e vlile darxi .abu lo nalci
ni'o «lu ii since sei la tcacpi cu krixa li'u»
ni'o «lu mi ba'e ''na'' since sei la .alis. cu fengu cusku .i .oi ko mi cliva li'u»
ni'o «lu since ke'u sei la tcacpi cu mlimau rapsku li'u» .i ty. klaku jmina «lu ro da poi mi troci zo'u da na mansa sy. li'u»
ni'o «lu mi jimpe no da lo te tavla be fi do sei la .alis. cu cusku li'u»
ni'o «lu mi troci tu'a lo tricu genja .i je mi troci tu'a lo ri'erkoi .i je mi troci tu'a lo spabi'u sei la tcacpi se cau lo nu jundi .abu cu cusku .i ku'i no da pluka lo since li'u»
ni'o la .alis. cu zenba lo ka se cfipu .i ku'i .abu pensi lo du'u no da prali lo nu jmina cusku pu lo nu la tcacpi cu mo'u tavla
ni'o «lu po'o nai nandu fa lo nu kurji lo sovda sei la tcacpi cu cusku .i je ji'a .ei mi mi kajde lo since ze'a lo nicte jo'u lo donri .i ze'u lo jeftu be li ci mi sipna no da li'u»
ni'o «lu mi mutce xenru lo nu do se fanza sei la .alis. noi co'a jimpe lo smuni be fi ty. cu cusku li'u»
ni'o «lu mi cuxna lo tricu poi galrai lo ricfoi sei la tcacpi cu krixa zenba ke ranji cusku .i ca bo mi pensi lo du'u uo mi zifre fi lo nu claxu lo since .i ku'i ue sy. torni klama fi lo tsani .i .oi since li'u»
ni'o «lu ku'i ju'a sai mi ba'e ''na'' since sei la .alis. cu cusku .i mi .y. .i mi li'u»
ni'o «lu .a'a do ba'e ''mo'' sei la tcacpi cu cusku .i mi zgana lo du'u do troci co finti da li'u»
ni'o «lu mi .y. cmalu nixli li'u» la .alis. cu se cusku co senpi ki'u lo nu morji lo nu so'i roi cenba ze'a lo ca donri
ni'o «lu lisri lakne ia nai sei la tcacpi cu tolsi'arai tonga cusku .i mi pu viska so'i cmalu nixli .i ku'i no ri se cnebo lo simsa be ta .i ie nai cai .i do since .i je .e'e nai do tolxu'a .i la'a do ba zi cusku lo se du'u do pu no roi vu'izga lo sovda li'u»
ni'o «lu mi ba'e ''ja'a'' vu'izga lo sovda sei la .alis. noi mutce jetsku verba cu cusku .i ku'i ka'u lo cmalu nixli cu dunli lo since lo ni citka lo sovda li'u»
ni'o «lu ia nai sei la tcacpi cu cusku .i se ni'i bo lo cmalu nixli cu since da .i di'u pi ro si'e lo ka'e se cusku li'u»
ni'o lo sidbo tai cnino la .alis. ja'e lo nu .abu smaji ze'a lo mentu be li ji'i re .i la'e di'u curmi lo nu la tcacpi cu jmina «lu ju'o sai do sisku lo sovda .i na vajni mi fa lo du'u do cmalu nixli gi'i kau since li'u»
ni'o «lu mutce vajni ba'e ''mi'' sei la .alis. cu sutra cusku .i ku'i je'u mi na sisku lo sovda .i ji'a mi va'o lo nu da'i ja'a go'i cu na djica lo me do moi .i mi na nelci lo nalseljukpa sovda li'u»
ni'o «lu ko cliva va'o ku sei la tcacpi cu nalta'acni tonga cusku li'u» .i ty. cu za'u re'u zutse lo ty. zdani .i la .alis. cu dzibi'o bu'u lo jbini be lo tricu tai lo xagrai selka'e .i lo .abu cnebo jo'u lo jimca cu za'o se jgena binxo .i .abu cu so'i roi bilga lo nu tolselto'i cy
ni'o baku .abu morji lo nu .abu za'o jgari lo gumri spisa lo xance .i .abu co'a junri zukte lo nu citka pa spisa pa mai .e lo drata re mai .i .abu cu su'o roi zenba gi'e su'o roi jdika .i ro mai .abu snada lo nu tcaci clani
ni'o .abu pu mitre lo drani simsa zu lo tai mutce ja'e lo nu cizra ca lo cfari .i ku'i .abu se tcaci binxo ze'a lo mentu be li so'u gi'e di'a ta'e sezytavla .i «lu uo lo xadba be lo mi selpla ba'o se zukte .i .u'e lo bu'u nuncenba cu cizra .i mi no roi birti lo du'u mi ba binxo ma kau zi lo mentu .i ku'i mi ba'o xruti lo ka drani mitre .i ca ku .ei nerkla lo melbi purdi .i .a'u ta'i ma zukte la'e di'u li'u» .i .abu ca lo nu cusku di'u cu suksa tolcliva lo klina noi vasru lo cmalu zdani noi mitre li ji'i pa .i «lu va'o lo nu ma kau xabju ta sei la .alis. cu pensi cu na drani fa lo nu mi tolcanci tai lo nu mi ca mitre .i va'o ku mi terpygau mutce li'u» .i se ki'u bo .abu co'a za'u re'u citka lo pritu spisa gi'e na darsi lo nu jbikla lo zdani kei pu lo nu ba'o jdika ja'e lo nu centre li re no
## ni'o ni'o xa mo'o
### xarju jo'u cpinytsapi
ni'o ze'a lo mentu .abu sanli gi'e catlu lo zdani gi'e pensi lo du'u .ei ba zi zukte ma kau .i ca bo lo selfu noi dasni lo manfyta'u cu bajra cliva lo ricfoi (to .abu lo du'u ra selfu cu jinvi fo lo nu ra dasni lo manfyta'u .i va'o da'i na'e bo la'e di'u .abu ca lo po'o nu viska lo flira cu te cmene ra zo finpe toi) gi'e cladu darxi lo vorme lo degycidni .i vy. karbi'o gau lo drata manfyta'u dasni selfu noi se flira lo cukla gi'e se kanla lo barda tai tu'a lo pipybanfi .i lo re selfu sei la .alis. cu sanji zo'u lo kerfa cu pumvau gi'e cukla gacri pi ro lo stedu .i .abu mutce kucli lo du'u srana ma kau kei gi'e parkla lo milxe bartu be lo ricfoi te zu'e lo nu tinju'i
ni'o pa mai la finpe selfu cu tolse'a fi lo cnita be lo birka fe lo barda xatra noi jibni ra lo ka barda .i ra dunda xy. lo drata selfu gi'e junri tonga cusku «lu fi la noltroni'u cu fityti'i fa la noltruni'u fe lo nu kelcrkroke li'u» .i la pipybanfi selfu cu mintu fi lo ka junri tonga kei gi'e milxe stika lo valsi porsi gi'e refsku «lu fa la noltruni'u cu fityti'i fi la noltroni'u fe lo nu kelcrkroke li'u»
ni'o ba ku lo re mei cu simxu lo ka krobi'o rinsa .i lo kerfa be lo re mei cu xrebi'o
ni'o la .alis. tai cmila mu'i la'e di'u ja'e lo nu bilga lo nu bajra xruti lo ricfoi ki'u lo nu terpa lo nu ru tirna .i ca lo nu .abu cu za'u re'u mipri catlu kei ge la finpe selfu ba'o cliva gi lo drata cu zutse lo loldi ne'a lo vorme gi'e bebna catlu fa'a lo tsani
ni'o la .alis. cu toldarsi klama lo vorme gi'e darxi
ni'o «lu no da do prali lo nu darxi sei la selfu cu cusku .i go'i ki'u re da .i pa mai mi do dunli lo ka zvati lo mo kau mlana be lo vorme .i re mai ne'i cupra lo tai savru ja'e lo nu no da kakne lo nu tirna do li'u» .i ju'o lo tolfadni savru ca'o nenri .i ru'i cmoni je senci .i ru'i nai barda sance tai lo nu lo palta .a lo patxu cu porpi
ni'o «lu pe'u do'u sei la .alis. cu cusku mi nerkla ta'i ma li'u»
ni'o «lu lo nu do darxi cu racli sei la selfu se cau lo nu jundi .abu kei di'a co'e va'o lo nu da'i mi do sepli lo vorme .i mu'a va'o lo nu da'i do nenri kei ge do darxi gi mi curmi lo nu do barkla li'u» .i sy. catlu lo tsani ze'a lo nu tavla .i la .alis. cu jinvi lo du'u ju'o sai sy. tolclite la'e di'u .i «lu ku'i ju'o cu'i ta na kakne lo nu rivbi la'e di'u sei .abu sezysku .i lo ta kanla tai jibni lo gapru be lo stedu .i se ju .ei ta spuda lo preti .i mi nerkla ta'i ma sei .abu cladu ke krefu cusku li'u»
ni'o «lu mi zutse ti sei la selfu cu te pinka co'u lo bavlamdei li'u»
ni'o ca ku lo vorme be lo zdani cu karbi'o .i lo barda palta cu sfubu lo bartu fa'a sa'e lo stedu be la selfu .i py. ja'a ru'e pencu lo sy. nazbi gi'e porpi janli lo tricu poi trixe sy
ni'o «lu .i ja go'i co'u lo bavlamji re moi djedi li'u» di'a se cusku la selfu se pi'o lo mintu tonga tai lo nu da'i no da fasnu
ni'o «lu mi nerkla ta'i ma sei la .alis. se pi'o lo lauzma tonga za'u re'u retsku li'u»
ni'o «lu xu do ba'e ''ja'a'' nerkla sei la selfu cu cusku .i di'u pa moi lo preti li'u»
ni'o li'a la'e di'u jetnu .i ku'i la .alis. na nelci lo nu te cusku di'u .i «lu .oi sei .abu bacru sezysku ro lo danlu cu darlu .i banzu lo nu fenkygau li'u»
ni'o la selfu cu simlu lo ka jinvi lo du'u mapti lo nu za'u re'u te pinka .i «lu mi ti ba zutse sei sy. cusku ru'i nai ze'a lo djedi be li so'i li'u»
ni'o «lu ku'i .ei mi ma zukte sei la .alis. cu cusku li'u»
ni'o «lu lo se djica be do sei la selfu cu cusku li'u» .i sy. co'a siclu
ni'o «lu .oi no da mi prali lo nu tavla ta sei la .alis. cu nalpacna cusku .i ta prane lo ka bebna li'u» .i .abu kargau lo vorme gi'e nerkla
ni'o lo vorme cu pluta lo barda jupku'a noi culno lo danmo fe'e co'a lo fanmo fe'e co'u lo drata .i la noltroni'u cu zutse lo cibyseltuple stizu bu'u lo midju gi'e kurji lo cifnu .i lo jukpa cu korcu ga'u lo fagri gi'e jicla do'e lo barda patxu noi simlu lo ka culno lo stasu
ni'o «lu ju'o lo dukse cpinytsapi cu zvati lo va stasu sei la .alis. noi ru'i senci cu sezysku li'u»
ni'o ju'o lo dukse cu zvati lo vacri .i la noltroni'u ji'a sai cu ru'i nai senci .i lo cifnu zo'u cy. na di'i senci jo'u kakcmoni se cau lo nu denpa .i lo re po'o zvati be lo jupku'a poi na senci cu me lo jukpa jo'u lo barda mlatu noi zutse lo cpana be lo fagzda gi'e relkerlo ganra cisma
ni'o «lu .e'o ko mi jungau sei la .alis. noi milxe terpa ri'a lo nu na birti lo du'u xu kau lo nu pa moi tavla cu clite cu cusku lo du'u lo do mlatu tai cisma mu'i ma kau li'u»
ni'o «lu tu tcicymlatu sei la noltroni'u cu cusku .i la'e di'u krinu .i doi xarju li'u»
ni'o lo nu ny. viltce bacru lo ro moi valsi cu mukti lo nu la .alis. cu suksa plipe .i ku'i .abu ba zi jimpe lo du'u ny. tavla lo cifnu .e nai .abu .i se mu'i bo virnu lo nu di'a cusku «lu mi na pu djuno lo du'u lo tcicymlatu cu ro roi gancisma .i je'u mi na pu djuno lo du'u lo mlatu cu ba'e ''kakne'' lo nu gancisma li'u»
ni'o «lu ro mlatu cu kakne sei la noltroni'u cu cusku .i je so'e mlatu ca'a co'e li'u»
ni'o «lu mi na djuno fi su'o me my. poi ca'a co'e sei la .alis. cu litytce cusku li'u» .i .abu mutce se pluka lo nu co'a pagbu lo ta'arsi'u
ni'o «lu do na djuno so'i da sei la noltroni'u cu cusku .i je la'e di'u fatci li'u»
ni'o la .alis. na sai nelci lo tonga pe lo pinka gi'e jinvi lo du'u xamgu fa lo nu cfagau lo drata selcasnu .i lo jukpa ca lo nu .abu troci lo nu cuxna sy. cu lebna lo patxu be lo stasu lo fagri gi'e co'a zukte lo nu renro ro se kuspe be jy. la noltroni'u jo'u lo cifnu .i lo fagri tirse cu pa moi .i ba bo jersi fa lo tansi jo'u palta jo'u palne carvi .i la noltroni'u cu na'e jundi ca ji'a sai lo nu darxi ny. .i lo cifnu pu ca'o tai mutce krixa ja'e lo nu nalcumki fa lo nu djuno lo du'u xu kau lo nundarxi cu crogau
ni'o «lu .oi .e'o sai ko kurji lo do se tarti sei la .alis. cu terpa dunku plipe krixa .i .oi lo ba'e ''melbi'' nazbi be ta uu li'u» ca lo nu lo nalfadni barda tansi cu vofli zo'a ny. gi'e na ru'e bevri ny. lo sepli
ni'o «lu va'o lo nu ro da kurji lo cuntu be da kei sei la noltroni'u cu rufsu cmoni cusku lo munje cu zenba lo ka carna sutra li'u»
ni'o «lu la'e di'u ba'e ''na'' prali sei la .alis. noi mutce gleki lo nu ka'e jarco pi so'u lo nu .abu djuno cu cusku .i ko pensi lo nabmi poi la'e di'u ke'a rinka sera'a lo donri jo'u lo nicte .i ka'u lo nu lo terdi cu carna lo jendu cu cacra li revo li'u»
ni'o «lu lo nu catra zo'u sei la noltroni'u cu cusku ko vimcu lo stedu tu li'u»
ni'o la .alis. cu xanka catlu lo jukpa te zu'e lo nu zgana lo du'u xu kau jy. zukte fi lo nu tinbe .i ku'i lo jukpa cu jicla lo stasu gi'e simlu lo ka na jundi .i se ki'u bo .abu di'a cusku «lu cacra li revo pe'i ji li pa re pei .i mi .y. li'u»
ni'o «lu .oi ko mi na fanza sei la noltroni'u cu cusku .i mi na ka'e renvi lo namcu li'u» .i ca bo ny. co'a za'u re'u kurji lo cifnu gi'e sanga lo sipselsa'a simsa cy. gi'e vlile desygau cy. ca lo fanmo be ro vlali'i
ko rufsu tavla lo do panzi.i ko py. senci sfasa
.i lo nu po'o py. do fanzacu ia te zukte krasi
krefu
(to lo jukpa lo cifnu cu kansa toi)
ua ua ua
ni'o la noltroni'u ca lo nu sanga lo re moi be lo vlagri cu ca'o vlile renro lo cifnu lo gapru jo'u lo cnita .i lo se kecti cmalu cu tai krixa ja'e lo nu la .alis. cu ja'a ru'e tirna lo valsi
mi junri tavla lo mi panzi.i mi py. senci sfasa
.i li'a py. se pluka banzu.i cpinytsapi stasu
krefu
ua ua ua
ni'o «lu ju'i do'u .e'a do ti kurji sei la noltroni'u ca lo nu renro lo cifnu la .alis. cu cusku .i .ei mi mi bredygau lo nu kansa la noltruni'u lo nu kelcrkroke li'u» .i ny. sutra cliva lo kumfa .i lo jukpa cu renro lo tansi ny. ca lo nu ny. barkla .i ku'i ja'a ru'e fliba lo nu darxi
ni'o la .alis. cu milxe nandu kavbu lo cifnu ki'u lo nu cizra seltai ke cmalu danlu gi'e tengau lo birka jo'u lo tuple fo ro da .i «lu tai lo mumbircurnu sei la .alis. cu pensku li'u» .i lo cmalu uu cu zbisnava'u tai lo jacfebmatra ca lo nu .abu kavbu .i cy. za'o sezyplo jo'u sezytolplo .i se ki'u bo ze'a lo pa moi mentu be li ji'i re .abu ja'a ru'e kakne lo nu jgari
ni'o .abu zi ba lo nu facki lo du'u ma kau drani tadji lo nu kurji (to no'u lo nu tongau cy. ja'e lo jgena gi'e tagji jgari lo cy. pritu kerlo jo'u lo cy. zunle jamfu ja'e lo nu rivbi lo nu cy. sezytolplo toi) cu bevri cy. lo bartu vacri .i «lu da va'o lo nu mi na lebna lo vi cifnu sei la .alis. cu pensi cu ba catra cy. za lo djedi be li ji'i re .i xu na zekri fa lo nu cliva cy. li'u» .i .abu cladu cusku lo ro moi valsi .i lo cmalu cu spuda cmoni (to cy. pu co'u senci toi) .i «lu ko na cmoni sei la .alis. cu cusku .i na sai drani tadji lo nu cusku li'u»
ni'o lo cifnu cu za'u re'u cmoni .i la .alis. cu xanka mutce catlu lo flira be cy. te zu'e lo nu facki lo du'u cy. mo kau .i ju'o cy. se nazbi lo gapselfa'a noi lo xajyzbi cu zmadu lo re'azbi lo ka ke'a simsa ce'u .i ji'a lo kanla be cy. ca'o binxo lo mutce cmalu lo cifnu kanla .i to'u la .alis. na sai nelci lo jvinu be lo dacti .i «lu ku'i ju'o cu'i ti kakcmo po'o sei .abu pensi li'u» .i .abu cu za'u re'u catlu lo cy. kanla te zu'e lo nu facki lo du'u xu kau lo dirgo ba'o se klaku
ni'o na co'e .i no dirgo ba'o se klaku .i «lu ga nai do binxo lo xarju doi dirba sei la .alis. cu junri cusku gi .o'i mi do co'u srana li'u» .i lo se kecti cmalu za'u re'u kakcmo (to go'i gi'a xajycmo .i na cumki fa lo nu jdice toi) .i lo re mei di'a co'e ze'a lo smaji
ni'o la .alis. co'a pensi sezysku «lu .ei mi zukte mo sera'a lo vi danlu ca lo nu mi tolcliva lo zdani li'u» ca lo nu cy. cu za'u re'u cmoni se kai lo ka tai vlile ja'e lo nu .abu xalni milxe catlu lo cy. flira .i ca ku na senpi .i cy. zmadu na je nai mleca lo xarju .i .abu jinvi lo du'u fenki mutce fa lo nu za'o bevri cy
ni'o ki'u ku .abu punji lo danlu lo loldi gi'e co'a mutce tolxanka lo nu viska lo nu dy. smaji bajra fa'a ne'i lo ricfoi .i «lu lo cifnu va'o lo nu banro sei .abu sezysku cu tolmelbi mutce verba .i ku'i pe'i tu ca'a melbi xarju li'u» .i .abu co'a pensi lo drata verba noi ke'a slabu .abu gi'e se xamgu da'i lo nu ke'a xarju .i .abu sezysku «lu .au djuno lo du'u ma kau drani tadji lo nu galfi da li'u» ca lo nu .abu milxe se spaji lo nu viska la tcicymlatu noi zutse lo jimca be lo tricu va lo mitre be li su'o
ni'o la mlatu cu cisma po'o ca lo nu viska la .alis. .i my. simlu lo ka xendo sei .abu pensi .i ku'i my. se jgalu lo clani mutce gi'e se denci lo so'i sai mei .i se ki'u bo .abu jinvi lo du'u .ei sinma my. .i «lu doi tcicymlatu li'u» .i .abu toldarsi co'asku ki'u lo nu na sai djuno lo du'u xu kau my. nelci lo cmene .i ku'i my. ganze'a cisma po'o .i «lu ua ta ca se pluka sei la .alis. cu pensi li'u» .i .abu di'a cusku «lu .e'o ko mi jungau lo du'u .ei mi klama zo'e ti ma kau li'u»
ni'o «lu la'e di'u jalge lo du'u do djica lo nu klama ma kau sei la mlatu cu cusku li'u»
ni'o «lu na'e mutce vajni mi fa lo nu klama ma kau kei sei la .alis. cu cusku li'u»
ni'o «lu va'o la'e di'u na vajni fa lo nu do klama fo ma kau sei la mlatu cu cusku li'u»
ni'o «lu va'o lo nu mi ca'a klama ba'e ''da'' sei la .alis. cu ciksi jmina li'u»
ni'o «lu ua ju'o do ca'a co'e sei la mlatu cu cusku va'o lo nu do cadzu ze'a lo banzu li'u»
ni'o la .alis. cu jinvi lo du'u la'e di'u na ka'e te darlu .i se ki'u bo .abu troci tu'a lo drata preti .i «lu lo mo prenu cu xabju lo vi sruri li'u»
ni'o «lu vu fa'a tu sei la mlatu cu pritu xance desku cusku cu xabju la mapypre .i vu fa'a tu sei drata xance desku cu xabju la cibmasti cicyractu .i ko vitke lo se nelci be do .i ro lo re da fenki li'u»
ni'o «lu ku'i mi na djica lo nu jbini lo fenki sei la .alis. cu te pinka li'u»
ni'o «lu .o'o do na ka'e rivbi sei la mlatu cu cusku .i bu'u ti ro ma'a fenki .i mi fenki .i do fenki li'u»
ni'o «lu do jinvi lo du'u mi fenki kei fo ma li'u»
ni'o «lu ju'o do co'e sei la mlatu cu cusku .i ja do na ba'o klama ti li'u»
ni'o la .alis. na sai jinvi lo du'u la'e di'u cu je'urja'o .i ku'i di'a cusku «lu do jinvi lo du'u do fenki kei fo ma li'u»
ni'o «lu pa mai sei la mlatu cu cusku lo gerku na fenki .i ie pei li'u»
ni'o «lu ie ru'e sei la .alis. cu cusku li'u»
ni'o «lu ka'u sei la mlatu cu di'a cusku lo gerku cu fe'ucmo ca lo nu fengu kei gi'e rebla deskygau ca lo nu gleki .i zu'u nai ba'e ''mi'' fe'ucmo ca lo nu gleki kei gi'e rebla deskygau ca lo nu fengu .i se ni'i bo mi fenki li'u»
ni'o «lu mi te cmene fi zo latcmo .e nai zo fe'ucmo sei la .alis. cu cusku li'u»
ni'o «lu ko te cmene fi lo do se nelci sei la mlatu cu cusku .i xu do kansa la noltruni'u lo nu kelcrkroke ca lo cabdei li'u»
ni'o «lu mi mutce lo ka nelci la'e di'u sei la .alis. cu cusku .i ku'i mi za'o na te friti li'u»
ni'o «lu do mi ba bu'u viska sei la mlatu cu cusku li'u» .i my. canci
ni'o la .alis. na mutce se spaji la'e di'u ki'u lo nu .abu ca'o co'a se tcaci lo nu lo cizra cu fasnu .i la mlatu ca lo nu .abu catlu lo pu se zvati be my. cu za'u re'u tolcanci
ni'o «lu ta'o lo cifnu cu mo sei la mlatu cu cusku .i mi na ru'e tolmo'i lo nu te preti li'u»
ni'o «lu ba'o binxo lo xarju sei la .alis. tai lo da'i nu my. fadni xruti cu lauble cusku li'u»
ni'o «lu mi pu jinvi lo du'u go'i sei la mlatu cu cusku li'u» .i za'u re'u canci
ni'o la .alis. ze'i denpa gi'e xadba pacna lo nu za'u re'u viska my. .i ku'i my. na tolcanci .i baku .abu za lo mentu be li ji'i re cu di'a cadzu fa'a lo se cusku se xabju be la cibmasti cicyractu .i «lu mi pu viska lo mapypre sei .abu sezysku .i la cibmasti cicyractu cu mutce zmadu fi lo ka cinri .i la'a cu'i cycy. ki'u lo nu ca mumymasti cu na tcetce fenki .i do'a na tai fenki du'i lo nu ja'a no'a ca lo cibmasti li'u» .i .abu ca lo nu cusku di'u cu fa'a ga'u catlu .i la mlatu cu za'u re'u zvati gi'e zutse lo jimca be lo tricu
ni'o «lu pau do cusku zo xarju ji zo narju sei la mlatu cu cusku li'u»
ni'o «lu mi pu cusku zo xarju sei la .alis. cu spuda .i .au do na za'o suksa canci je tolcanci .i do gasnu lo nu mutce lo ka se cfipu li'u»
ni'o «lu vi'o sei la mlatu cu cusku li'u» .i ca ku my. masno mutce canci co'a lo fanmo be lo rebla co'u lo nu cisma noi ze'a renvi ba lo nu lo drata pagbu ba'o canci
ni'o «lu ue mi so'i roi viska lo mlatu pe se cau lo nu cisma sei la .alis. cu pensi .i ku'i ua lo nu cisma pe se cau lo mlatu .i traji lo ka cizra kei lo se viska be mi bei ze'a lo nu mi jmive li'u»
ni'o .abu ze'u nai klama pu lo nu viska lo zdani be la cibmasti cicyractu .i .abu jinvi lo du'u drani zdani kei fo lo du'u ge lo damtu'u cu tarmi lo kerlo gi lo drudi cu se gacri lo skapi .i lo zdani cu tai barda ja'e lo nu .abu na nelci lo nu jbikla pu lo nu ge citka pi so'u lo zunle spisa be lo gumri gi gasnu lo nu .abu banro lo mitre be li ji'i pi mu .i se va'o ji'a sai bo .abu milxe toldarsi cadzu fa'a zy. gi'e sezysku «lu ru'a cycy. ca'a tcetce fenki .i .au nai ru'e mi se ba'i pu klama lo nu viska la mapypre li'u»
## ni'o ni'o ze mo'o
### fenki tcati bo kansi'u
ni'o lo jubme cu bredi ni'a lo tricu ca'u lo zdani .i la cibmasti cicyractu jo'u la mapypre cu pinxe lo tcati .i la sipsmacu cu zutse jbini lo re mei gi'e carmi sipna .i lo re mei cu pilno sy. lo nu kicne kei gi'e vregau lo bircidni sy. gi'e simxu lo ka tavla ga'u lo sy. stedu .i «lu mutce tolkufra fa la sipsmacu sei la .alis. cu pensi .i ku'i pe'i sy. va'o lo nu sipna cu na se vajni li'u»
ni'o lo jubme cu barda .i ku'i lo ci mei cu tagji jmaji lo kojna be jy. .i «lu canlu no mei .i canlu no mei sei lo re mei ca lo nu viska lo nu la .alis. cu klama cu krixa li'u» .i «lu canlu ba'e ''za'u'' rau mei sei la .alis. cu fengu cusku li'u» .i .abu tsebi'o lo barda birstizu bu'u lo fanmo be lo jubme
ni'o «lu .e'e ko cpacu lo vanju sei la cibmasti cicyractu cu zanru cusku li'u»
ni'o la .alis. cu catlu pi ro lo jubme .i ku'i no na'e tcati jy. cpana .i «lu mi na viska lo vanju sei .abu piksku li'u»
ni'o «lu no vanju cu zvati sei la cibmasti cicyractu cu cusku li'u»
ni'o «lu .o'o nai va'o la'e di'u do na clite lo nu friti sei la .alis. cu fengu cusku li'u»
ni'o «lu do na clite lo nu tsebi'o se cau lo nu se zvacpe sei la cibmasti cicyractu cu cusku li'u»
ni'o «lu mi na pu djuno lo du'u lo jubme cu me ba'e ''do'' moi sei la .alis. cu cusku .i jy. bredi tu'a lo za'u sai ci mei li'u»
ni'o «lu lo do kerfa cu nitcu lo nu se katna sei la mapypre cu cusku li'u» .i my. pu ze'u mutce kucli catlu la .alis. gi'e ca pa re'u tavla
ni'o «lu .ei do cilre fi lo nu na cusku lo prenu pinka sei la .alis. cu junri cusku .i mutce tolclite li'u»
ni'o la mapypre cu kargau lo kanla ja'e lo nu mutce ganra kei ca lo nu tirna di'u .i ku'i my. cusku «lu lo korvo lo ciska jubme cu simsa ma li'u» po'o
ni'o «lu ui mi ze'a ba se zdile sei la .alis. cu pensi .i mi gleki lo nu co'a retsku lo zdifanza nabmi .i mi jinvi lo du'u mi ka'e smadi la'e di'u sei .abu bacru jmina li'u»
ni'o «lu xu do skudji lo du'u do jinvi lo du'u do ka'e facki lo danfu be di'u sei la cibmasti cicyractu cu cusku li'u»
ni'o «lu go'i sai sei la .alis. cu cusku li'u»
ni'o «lu .ei do cusku lo do se skudji sei la cibmasti cicyractu di'a cusku li'u»
ni'o «lu mi go'i sei la .alis. cu sutra spuda .i .y. ju'o ru'e .y. do'a nai mi skudji lo mi se cusku .i ka'u la'e di'u mintu li'u»
ni'o «lu na mintu sei la mapypre cu cusku .i do du'i ka'e cusku lo se du'u «lu mi viska lo mi se citka li'u» mintu «lu mi citka lo mi se viska li'u» li'u»
ni'o «lu do du'i ka'e cusku sei la cibmasti cicyractu cu jmina lo se du'u «lu mi nelci lo mi se cpacu li'u» mintu «lu mi cpacu lo mi se nelci li'u» li'u»
ni'o «lu do du'i ka'e cusku sei la sipsmacu noi simlu lo ka sipna tavla cu jmina lo se du'u «lu mi vasxu ze'a lo nu sipna li'u» mintu «lu mi sipna ze'a lo nu vasxu li'u»
ni'o «lu ja'a mintu sera'a do sei la mapypre cu cusku li'u» .i ca bo lo nu casnu cu ve denpa .i lo kansi'u cu smaji zutse ze'a lo mentu ca'o lo nu la .alis. cu pensi pi ro da poi .abu morji ke'a lo korvo .a lo ciska jubme zi'e noi na mutce
ni'o la mapypre cu pa moi lo co'u smaji
ni'o «lu lo xo moi be lo masti djedi cu detri sei my. fa'a la .alis. cu cusku li'u» .i my. lo junla ba'o cpacu lo daski gi'e ca'o xanka catlu gi'e di'i nai desygau gi'e jbipu'i lo my. kerlo
ni'o la .alis. ze'i pensi gi'e cusku «lu lo vo moi li'u»
ni'o «lu .oi ri'e srera la'u lo djedi be li re sei la mapypre cu cusku .i mi do pu jungau lo du'u lo matne na mapti lo minji sei my. jmina li'u» .i my. fengu catlu la cibmasti cicyractu
ni'o «lu ra ba'e ''xagrai'' lo matne sei la cibmasti cicyractu cu cumla spuda li'u»
ni'o «lu go'i .i ku'i la'a lo ji'a nanba spisa cu nerbi'o sei la mapypre cu fegmli pante .i .ei do ra na pu setca se pi'o lo nanba dakfu li'u»
ni'o la cibmasti cicyractu lo junla cu jgari gi'e tolgei catlu gi'e jirgau lo kabri tcati gi'e re re'u catlu .i ku'i cycy. na kakne lo nu pensi lo se cusku poi xagmau lo pa moi pinka no'u «lu ga'i cu'i ra ba'e ''xagrai'' lo matne li'u»
ni'o la .alis. pu ca'o kucli catlu ga'u lo cycy. janco .i «lu .a'u xajmi junla sei .abu te pinka .i ue jy. sinxa lo du'u lo xo kau moi be lo masti djedi cu detri .e nai ku'i lo du'u ma kau tcika li'u»
ni'o «lu .ei ki'u ma ja'a go'i sei la mapypre cu cusku .i xu lo ba'e ''do'' junla cu sinxa lo du'u lo xo kau moi nanca cu detri li'u»
ni'o «lu li'a na go'i sei la .alis. cu mutce sutra spuda .i ku'i la'e di'u se krinu lo nu ze'u stali fa lo nanca be li pa li'u»
ni'o «lu mintu sa'e lo me ba'e ''mi'' moi sei la mapypre cu cusku li'u»
ni'o la .alis. cu cinmo lo ka mutce se cfipu .i lo pinka be fi la mapypre cu simlu lo ka no da smuni ke'a kei gi'e ku'i ja'a lojbo .i «lu mi na mulno jimpe sei .abu se rai lo ka clite cu cusku li'u»
ni'o «lu la sipsmacu za'u re'u sipna sei la mapypre cu cusku li'u» .i my. falcru pi so'u lo glare tcati lo sy. nazbi
ni'o la sipsmacu cu tolsurla desygau lo stedu gi'e cusku se cau lo nu kargau lo kanla kei «lu li'a li'a .i di'u sai pu'o pinka fi mi li'u»
ni'o «lu xu do ba'o smadi tu'a lo zdifanza nabmi sei la mapypre fi la .alis. cu cusku li'u»
ni'o «lu na go'i .i mi te jinga sei la .alis. cu spuda .i ma danfu li'u»
ni'o «lu mi na te sidbo la'e di'u lo cmarai ji'a sai sei la mapypre cu cusku li'u»
ni'o «lu mi go'i sei la cibmasti cicyractu cu cusku li'u»
ni'o la .alis. cu tatpi patyva'u .i «lu pe'i do ka'e se prali lo temci sei .abu cusku ta'i lo xagmau be lo nu xaksu ty. ta'i lo nu preti fa lo zdifanza nabmi poi na se danfu li'u»
ni'o «lu do va'o lo nu se slabu la temci du'i lo nu mi no'a sei la mapypre cu cusku cu na pilno zo lo lo nu cmene ty. .i zo la mapti li'u»
ni'o «lu mi na jimpe lo du'u do skudji ma kau sei la .alis. cu cusku li'u»
ni'o «lu li'a do na go'i sei la mapypre cu stedu muvgau tolsi'a cusku .i la'a do no roi tavla ji'a sai la temci li'u»
ni'o «lu ie ru'e sei la .alis. cu kajde spuda .i ku'i ju'o .ei mi darxi do'e lo temci ca lo nu mi cilre lo nu se zgike li'u»
ni'o «lu ua la'e di'u ve ciksi sei la mapypre cu cusku .i ty. na nelci lo nu darxi .i ty. va'o lo nu se pendo do cu gasnu so'a se nelci be do ri'i lo junla .i mu'a da'i li so ca tcika lo nu co'a tadni .i lo nu do ja'a ru'e stidi fi ty. cu banzu lo nu lo junla mo'u ze'i cukli'u .i uo li pa ci pi'e ci no ca tcika lo nu citka li'u» (to «lu .au go'i sei la cibmasti cicyractu cu lauble sezysku li'u» toi)
ni'o «lu la'e di'u da'i banli ju'o sei la .alis. cu pensi cusku .i ku'i va'o ku mi na xagji li'u»
ni'o «lu ie ru'e go'i ca lo cfari sei la mapypre cu cusku .i ku'i .e'e li pa ci pi'e ci no za'o tcika ze'u lo do se djica li'u»
ni'o «lu xu la'e di'u tadji lo nu ba'e ''do'' zukte sei la .alis. cu retsku li'u»
ni'o la mapypre cu tolgei desygau lo stedu .i «lu na go'i sei my. spuda .i mi'a da'arsi'u ca lo pu zi cibmasti .i ba zi bo ba'e ''tu'' fenki binxo za'a dai sei my. lo tcati smuci lo nu farja'o la cibmasti cicyractu cu pilno .i fasnu ca lo banli ke zgike se tigni be la noltruni'u pe lo risna .i mi bilga lo nu sanga di'e
.i gu'irgu'i doi volratcu.i .u'e .a'u do ma klatcu
.i .a'u xu lo selsanga do slabu li'u»
ni'o «lu mi pu tirna lo simsa sei la .alis. cu cusku li'u»
ni'o «lu di'a co'e sei la mapypre di'a cusku di'e
.i do munje gapru voflitcatypalne simsa trofli
.i gu'irgu'i
li'u»
ni'o ca ku la sipsmacu cu desyzu'e gi'e co'a sanga ca lo nu sipna «lu gu'irgu'i gu'irgu'i li'u» gi'e ze'u za'o co'e ja'e lo nu sarcu fa lo nu tunta sy. kei lo nu stigau sy
ni'o «lu no'i mi pu zi ba'o mulgau lo pa moi pempau sei la mapypre cu cusku ca lo nu la noltruni'u cu zunti gi'e krixa «lu ta catra lo temci .i ko lo stedu ta vimcu li'u» li'u»
ni'o «lu .oi selte'a cilce sei la .alis. cu ki'asku li'u»
ni'o «lu co'a la'e di'u sei la mapypre di'a tolgei cusku ty. zukte no se cpedu be mi .i ca ze'e ru'i tcika fa li xa li'u»
ni'o lo carmi sidbo cu se pensi la .alis. .i «lu ua xu la'e di'u krinu lo nu so'i ue tcati dacti cu zvati sei .abu retsku li'u»
ni'o «lu ja'a go'i sei la mapypre cu va'urpante cusku .i ru'i tcika lo tcati sanmi .i mi'a no roi kakne lo nu lumci lo dacti ca lo jbini li'u»
ni'o «lu ja'o ru'a do za'o muvdu fo lo cukla sei la .alis. cu cusku li'u»
ni'o «lu go'i sa'e sei la mapypre cu cusku ca lo nu so'o lo dacti mo'u se xaksu li'u»
ni'o «lu ku'i ma fasnu ca lo nu do xruti lo cfari sei la .alis. cu retsku darsi li'u»
ni'o «lu .e'u mi'o galfi lo se casnu sei la cibmasti cicyractu cu zunti je sipfru .i mi ti tatpi .i mi sarji lo nu da lisri zo'e lo citno ninmu mi'a li'u»
ni'o «lu .u'u no da mi slabu sei la .alis. noi xanka lo se stidi cu cusku li'u»
ni'o «lu va'o la'e di'u la sipsmacu ba co'e sei lo re mei cu krixa .i ko cikybi'o doi sipsmacu li'u» .i lo re mei cu tunta sy. lo re mlana ca lo mintu .i la sipsmacu cu masno kargau lo kanla .i «lu mi na pu sipna sei se pi'o lo rufsu je ruble voksa sy. cusku .i mi pu tirna ro valsi poi do doi ci mei ca'o cusku li'u»
ni'o «lu ko te lisri fo mi'a sei la cibmasti cicyractu cu cusku li'u»
ni'o «lu .e'o go'i pe'u sei la .alis. cu cpesku li'u»
ni'o «lu ji'a ko sutra sei la mapypre cu jmina .i se va'o nai bo do ba sipna pu lo nu mulno li'u»
ni'o «lu pu zu vu ku lo ci cmalu mensi zo'u sei la sipsmacu cu mutce sutra tolsisti zo .elsis. fa'u zo .lesis. fa'u zo .tilis. cu cmene .i my. xabju lo loldi be lo jintyke'a li'u»
ni'o «lu ma my. cidja sei la .alis. noi ro roi se cinri lo du'u citka je pinxe ma kau cu cusku li'u»
ni'o «lu lo satyjisra my. cidja sei la sipsmacu ba lo nu pensi ze'a lo mentu be li ji'i re cu cusku li'u»
ni'o «lu ka'u na ka'e go'i sei la .alis. cu xendo te pinka .i va'o da'i ku my. bilma li'u»
ni'o «lu ja'a go'i sei la sipsmacu cu cusku .i ba'e ''mutce'' lo ka bilma li'u»
ni'o la .alis. cu troci lo nu se xanri lo nu lo tai tolfadni ke jmive tadji cu simsa ma kau .i ku'i dukse lo ka cfipu .abu .i se ki'u bo .abu di'a cusku «lu .i ku'i ki'u ma my. xabju lo loldi be lo jintyke'a li'u»
ni'o «lu ko za'u re'u pinxe lo tcati sei la cibmasti cicyractu fi la .alis. cu mutce junri cusku li'u»
ni'o «lu mi no roi pu pinxe sei la .alis. cu cnicro spuda .i se ni'i bo mi na ka'e za'u re'u go'i li'u»
ni'o «lu do skudji lo du'u do na ka'e ba'e ''me'i'' re'u pinxe sei la mapypre cu cusku .i frili fa lo nu za'u no re'u go'i li'u»
ni'o «lu no da cpedu lo ba'e ''do'' se jinvi sei la .alis. cu cusku li'u»
ni'o «lu ma cusku lo prenu pinka ca ku sei la mapypre cu jinga reisku li'u»
ni'o la .alis. na kakne lo nu spuda la'e di'u .i se ki'u bo .abu selfu vo'a lo nu cpacu lo tcati jo'u lo nanba joi matne kei gi'e ba bo re re'u te preti fo la sipsmacu fi «lu ki'u ma my. xabju lo loldi be lo jintyke'a li'u»
ni'o la sipsmacu za'u re'u pensi ze'a lo mentu be li ji'i re gi'e ba bo cusku «lu jy. satyjisra jintyke'a li'u»
ni'o «lu .o'o nai no go'i cu zasti sei la .alis. co'a fengu cusku li'u» .i ku'i la mapypre jo'u la cibmasti cicyractu cu bacru zoi sance c c sance .i la sipsmacu cu pante te pinka fi «lu .e'e do se'a dai mulgau lo lisri va'o lo nu do na ka'e clite li'u»
ni'o «lu na go'i .i .e'o do ja'a di'a go'i sei la .alis. cu mutce cumla cusku .i mi na ba za'u re'u zunti .i .i'a cumki fa lo nu lo ba'e ''pa'' go'a cu zasti li'u»
ni'o «lu zasti ju'o sei la sipsmacu cu se si'arxai fengu cusku li'u» .i ku'i sy. nalpro fi lo nu di'a co'e .i «lu lo bi'u nai ci cmalu mensi noi ca'o crebi'o lo nu te pixra li'u»
ni'o «lu pixra ma my. sei la .alis. noi ca'o tolmorji lo se nupre cu cusku li'u»
ni'o «lu lo satyjisra sei ca ku la sipsmacu se cau lo nu pensi cu cusku li'u»
ni'o «lu mi djica lo jinsa kabri sei la mapypre cu zunti .i .e'u ro mi'o muvdu lo lamji stuzi li'u»
ni'o my. muvdu ca lo nu cusku .i la sipsmacu my. jersi .i la cibmasti cicyractu cu muvdu lo pu se zvati be la sipsmacu .i la .alis. noi banzu naldjica cu basti la cibmasti cicyractu lo ka ce'u zvati ma kau .i la mapypre po'o cu se prali da lo nuncenba .i la .alis. cu se tolprali lo mutce ki'u lo nu la cibmasti cicyractu pu zi falcru lo ladru botpi lo cycy. palta
ni'o la .alis. na djica lo nu za'u re'u cnixai la sipsmacu gi'e se ki'u bo kajde ke tolsti cusku «lu mi na jimpe .i my. cpacu lo satyjisra ma li'u»
ni'o «lu ka'u ka'e cpacu lo djacu lo djacu jintyke'a sei la mapypre cu cusku .i si'a li'a ka'e cpacu lo satyjisra lo satyjisra jintyke'a vau ie pei doi bebna li'u»
ni'o «lu ku'i my. ba'e ''nenri'' lo jintyke'a sei la .alis. fi la sipsmacu cu cusku co naljundi be lo ro moi pinka li'u»
ni'o «lu li'a go'i sei la sipsmacu cu cusku .i nenri lo jintyke'a li'u»
ni'o lo danfu tai mutce cfipu la .alis. uu ja'e lo nu curmi lo nu la sipsmacu ca'o co'e ze'a lo nu .abu na zunti
ni'o «lu my. ca'o crebi'o lo nu te pixra sei la sipsmacu di'a co'e li'u» .i sy. sipfru gi'e mosra lo kanla ki'u lo nu co'a sipydji .i «lu my. te pixra so'i klesi be lo dacti .i ro da poi zo my. pa moi lo cmene be ke'a lerfu li'u»
ni'o «lu ki'u ma zo my. sei la .alis. cu cusku li'u»
ni'o «lu ki'u ma na ku da'i sei la cibmasti cicyractu cu cusku li'u»
ni'o la .alis. cu smaji
ni'o la sipsmacu ba'o ga'orgau lo kanla ca la'e di'u gi'e ca'o co'a sipna .i ku'i sy. ca lo nu se tunta la mapypre cu za'u re'u cikybi'o gi'e cmalu krixa gi'e di'a cusku «lu li'o ro da poi zo my. pa moi lo cmene be ke'a lerfu .i mu'a lo mirli terkavbu .e lo mluni .e lo mojrango .e lo mutce .i ka'u da ka'e mutce .i xu do su'o roi viska lo pixra be lo mutce li'u»
ni'o «lu je'u ua ru'e sei la .alis. cu mutce se cfipu cusku .i pe'i na go'i li'u»
ni'o «lu .ei va'o la'e di'u do na tavla sei la mapypre cu cusku li'u»
ni'o lo di'u se tolclite cu zmadu lo sarji selka'e be la .alis. .i .abu selrigni gi'e sa'irbi'o gi'e to'o cadzu .i la sipsmacu cu zi sipybi'o .i no lo re drata cu jundi lo nu .abu cliva .i .abu ji'i re roi trixe catlu fau lo nu xadba pacna lo du'u lo re mei cu xrucpe .abu .i lo re mei ca lo nu ro moi se viska .abu cu troci lo nu setca la sipsmacu lo tcati patxu
ni'o «lu ta'o nai .ai mi no roi za'u re'u klama ba'e ''tu'' sei la .alis. ca lo nu pluta sisku pa'o lo ricfoi cu cusku .i traji lo kambebna lo tcati kansi'u poi mi pagbu ca lo nu mi jmive li'u»
ni'o .abu ca lo nu cusku di'u cu co'a sanji lo nu pa lo tricu cu ve vorme lo ty. nenri .i «lu cizra sei .abu pensi .i ku'i ro da cizra ca lo cabdei .i pe'i .ai mi ca zi nerkla li'u» .i .abu nerkla
ni'o .abu cu za'u re'u zvati lo clani kumfa gi'e jibni lo cmalu ke blaci jubme
ni'o «lu .e'e mi xagmau snada ca lo ca krefu sei .abu sezysku li'u» .i pa mai .abu jgari lo cmalu ke solji ckiku gi'e telcaugau lo vorme be lo purdi .i re mai .abu co'a citka lo gumri noi pu punji lo spisa be ke'a lo daski ku'o co'u lo nu .abu centre li ji'i ci no .i ci mai .abu cadzu pa'o lo cmalu vorlu'a .i ba'e ''ro'' mai uo .abu zvati lo melbi purdi gi'e jbini lo carmi ke xrula zdani .e lo lenku milxe je'erjinto
## ni'o ni'o bi mo'o
### me la noltruni'u moi kelcrkroke bo foldi
ni'o lo barda ke rozgu tricu cu jibni lo vorme be lo purdi .i lo rozgu poi xrula ty. cu blabi .i ku'i ci purdykurji cu ca'o punji lo xunre cinta ry. .i la .alis. cu pensi jinvi lo du'u mutce cizra kei gi'e jbize'a te zu'e lo nu catlu .i .abu ca lo nu ba'o klama cu tirna lo nu pa lo purdykurji cu cusku «lu .o'i doi .mum. ko na renro lo cinta mi li'u»
ni'o «lu .oi mi pu na ka'e rivbi sei la .mum. cu cusku .i la .zel. pu catke lo mi bircidni li'u»
ni'o ca la'e di'u la .zel. cu galcatlu gi'e cusku «lu .e'e doi .mum. ko ro roi fuzgau lo drata li'u»
ni'o «lu .ei ba'e ''do'' na tavla sei la .mum. cu cusku .i ti'e la noltruni'u cu xusra ca lo purlamdei lo du'u .ei vimcu lo stedu do li'u»
ni'o «lu ma krinu sei lo tavla pa moi cu cusku li'u»
ni'o «lu la'e di'u ba'e ''do'' na cuntu doi .rel. sei la .zel. cu cusku li'u»
ni'o «lu ba'e ''ja'a'' go'i sei la .mum. cu cusku .i .ai mi ta jungau .i krinu fa lo nu sabji lo tujli genja .e nai ba'i bo lo sluni lo jukpa li'u»
ni'o la .zel. cu bikre'o lo burcu lo cnita gi'e co'a cusku «lu ua ve rai lo ro toldra li'u» .i ca bo lo zy. kanla cu cunso se farna la .alis. noi sanli gi'e catlu lo purdykurji .i zy. ze'i sezydicra .i lo drata ji'a cu catlu lo trixe .i lo ro mei cu dizlo krobi'o
ni'o «lu .e'o do mi jungau sei la .alis. cu toldarsi milxe cusku lo du'u ki'u ma kau do punji lo cinta lo va rozgu li'u»
ni'o la .mum. .e la .zel. cu cusku no da gi'e catlu la .rel. .i la .rel. co'a kandi voksa cusku «lu je'u sa'u doi citni'u ti ba'e ''xunre'' .ei rozgu tricu .i mi'a pu srera lo nu sombo lo blabi .i ro mi'a va'o lo nu la noltruni'u cu facki la'e di'u cu ba katna te vimcu lo stedu .i to'u sa'u doi citni'u mi'a zukte lo mi'a xagrai pu lo nu ny. klama li'u» .i ca ku la .mum. noi pu ca'o xanka catlu lo purdi cu krixa «lu la noltruni'u .i la noltruni'u li'u» .i lo ci purdykurji cu sezre'o ja'e lo nu lo flira cu cpana lo loldi .i sance so'i nu stapa .i la .alis. cu catlu lo sruri gi'e djica lo nu viska la noltruni'u
ni'o klama pa moi fa lo pa no sonci noi bevri lo xacyga'a .i sy. mintu lo purdykurji lo ka ma kau tarmi ce'u .i clani kurfa gi'e plita gi'e se kojna lo xance jo'u lo jamfu .i jersi fa lo pa no nolkansa noi ricfu se jadni lo tabjme gi'e re mei cadzu du'i tu'a lo sonci .i jersi fa lo noltru panzi noi pa no mei .i lo cmalu dirba cu gleki plipe klama co xance jgari re mei .i ro lo panzi cu se jadni lo risna .i jersi fa lo vitke .i so'e ri noltrunau ja noltruni'u .i la .alis. cu sajbi'o la blabi ractu noi jbini vy. .i ry. sutra je xanka tavla gi'e cisma frati ro se cusku gi'e zo'a klama se cau lo nu sanji .abu .i jersi fa la nolse'u pe lo risna zi'e noi bevri lo noltrunau mapku se pi'o lo zirxu'e ranbu'u kicne .i fanmo lo banli dzupoi fa ba'e fu'e la noltrunau jo'u la noltruni'u vu'o pe lo risna fu'o
ni'o la .alis. cu senpi lo du'u xu kau .ei cnita flira vreta tai tu'a lo ci purdykurji .i ku'i .abu na morji lo du'u ti'e la'e di'u dzupoi javni .i «lu ji'a ma ma prali lo dzupoi sei .abu pensi va'o lo nu .ei ro da cnita flira vreta ja'e lo nu na ka'e viska dy. li'u» .i se ki'u bo .abu sanli lo se zvati gi'e denpa
ni'o ro da ca lo nu lo dzupoi cu crane la .alis. cu sisti gi'e catlu .abu .i la noltruni'u cu junri cusku «lu ti mo li'u» .i ny. di'u cusku la nolse'u pe lo risna zi'e noi spuda fi lo po'o nu krobi'o je cisma
ni'o «lu doi bebna sei la noltruni'u cu sutydji cusku li'u» .i fa'a la .alis. ny. di'a cusku «lu ma do cmene doi verba li'u»
ni'o «lu zo .alis. mi cmene doi banli nobli sei la .alis. cu clite mutce cusku li'u» .i ku'i .abu jmina sezysku «lu ua ta bakfu lo karda ga'i .i .ei mi ta na terpa li'u»
ni'o «lu ba'e ''ti'' mo li'u» se cusku la noltruni'u noi farja'o lo ci purdykurji noi vreta ru'u lo rozgu tricu .i ny. ca lo nu py. cnita flira vreta kei ki'u lo nu lo trixe morna cu mintu lo me ro drata moi cu na ka'e djuno lo du'u py. purdykurji ji kau sonci ji kau nolkansa ji kau panzi be ny. ci mei
ni'o «lu .a'u cu'i sei la .alis. noi se spaji lo nu darsi cu cusku .i na cuntu ba'e ''mi'' li'u»
ni'o la noltruni'u cu binxo lo zirxu'e ri'a lo nu fengu .i ny. ba lo nu catlu .abu ze'i lo mokca tai tu'a lo cilce danlu cu krixa «lu ko lo stedu ta vimcu .i ko - li'u»
ni'o «lu nonselsmu sei la .alis. cu cladu je birti cusku li'u» .i la noltruni'u cu smaji
ni'o la noltrunau cu punji lo xance lo birka be la noltruni'u gi'e toldarsi cusku «lu ko pensi doi dirba lo nu ta verba po'o li'u»
ni'o la noltruni'u cu carna to'o la noltrunau gi'e cusku «lu ko ta fa'ergau li'u» la nolse'u
ni'o la nolse'u cu kurji mutce fa'ergau se pi'o lo jamfu
ni'o «lu ko sanli sei la noltruni'u cu cpina je cladu voksa cusku li'u» .i lo ci purdykurji ze'i sa'irbi'o gi'e co'a korcu rinsa la noltrunau .e la noltruni'u .e lo noltru panzi .e ro lo drata
ni'o «lu ko ta sisti sei la noltruni'u cu krixa .i do mi tolylaxygau li'u» .i fa'a lo rozgu tricu ny. di'a cusku «lu do ma ca'o vi zukte li'u»
ni'o «lu doi banli nobli sei la .rel. ca lo nu cpanygau lo cidni lo loldi cu cumla mutce tonga cusku .i mi'a troci .y. li'u»
ni'o «lu je'e li'a sei la noltruni'u noi pu ca'o lanli lo rozgu cu cusku .i ko lo stedu ta vimcu li'u» .i lo dzupoi cu di'a muvdu .i ci lo sonci cu stali mu'i lo nu selmi'ecatra lo se malfu'a purdykurji noi bajra fa'a la .alis. mu'i lo nu se marbi
ni'o «lu do lo stedu na ba te vimcu sei la .alis. cu cusku li'u» .i .abu cu punji py. lo barda ke xrula patxu noi vi zvati .i lo ci sonci cu sruri klama je sisku ze'a lo mentu be li ji'i re gi'e ba bo smaji jersi lo drata
ni'o «lu xu lo stedu ba'o se vimcu sei la noltruni'u cu krixa li'u»
ni'o «lu lo stedu ba'o canci doi banli nobli sei lo sonci cu spuda krixa li'u»
ni'o «lu .i'e sei la noltruni'u cu krixa .i xu do kelcrkroke li'u»
ni'o lo sonci cu smaji gi'e catlu la .alis. ki'u lo nu li'a di'u preti fo .abu
ni'o «lu go'i sei la .alis. cu krixa li'u»
ni'o «lu ja'o .e'e sei la noltruni'u cu camki'a li'u» .i la .alis. cu jorne lo dzupoi gi'e kucli lo du'u ma kau ba fasnu
ni'o «lu .y. melbi .i .y. melbi donri sei lo mutce toldarsi se voksa ne'a .abu cusku li'u» .i .abu ca'o cadzu ne'a la blabi ractu noi ze'i catlu lo .abu flira
ni'o «lu mutce sei la .alis. cu cusku .i la noltroni'u ma zvati li'u»
ni'o «lu .o'i .o'i sei la ractu cu lauble je sutra tonga cusku li'u» .i ry. xanka catlu ga'u lo janco ca lo nu tavla kei gi'e sezgalgau co cpana lo jmadegji gi'e jbigau lo moklu lo .abu kerlo gi'e lauble cusku «lu ri ba se selmi'ecatra li'u»
ni'o «lu ma krinu sei la .alis. cu cusku li'u»
ni'o «lu xu do pu cusku «lu mi kecti li'u» sei la ractu cu retsku li'u»
ni'o «lu na go'i sei la .alis. cu cusku .i mi na sai kecti .i mi pu cusku «lu ma krinu li'u» li'u»
ni'o «lu ny. darxi lo kerlo be la noltruni'u sei la ractu co'a cusku li'u» .i la .alis. cu cmila krixa .i «lu .o'i sei la ractu cu terpa tonga laurblesku .i la noltruni'u do ba tirna .i no'i ny. pu lerci klama .i la noltruni'u cu cusku - li'u»
ni'o «lu ko zvati lo me do moi sei la noltruni'u cu lidvru voksa cusku li'u» .i lo prenu co'a bajra fa'a ro da gi'e jalsi'u .i ku'i bredi zi lo mentu be li ji'i re .i lo nu kelci cu cfari .i la .alis. cu jinvi lo du'u no roi lo nunji'e pu viska lo tai kelcrkroke foldi .i tolku'o jo'u skuro .i lo bolci cu jmive jesymabru .i lo mruli cu jmive fagycpi .i lo sonci cu krosa'ibi'o fi lo xance jo'u lo jamfu ja'e lo nu bargu
ni'o lo ralju be lo nandu be la .alis. ca lo cfari cu nu jitro lo fagycpi .i .abu snada lo nu kufra banzu punji lo fy. xadni noi lo tuple cu dandu ku'o lo cnita be lo .abu birka .i ku'i ta'e ku fy. ca lo nu ge lo cnebo mo'u sirji gi .abu bredi lo nu darxi lo jesymabru lo fy. stedu cu torni gi'e catlu fa'a lo .abu flira gi'e se cfipu frumu ja'e lo nu .abu na ka'e rivbi lo nu spoja cmila .i ca lo nu .abu ba'o punji lo fy. stedu lo dizlo gi'e pu'o za'u re'u co'a co'e cu xajmi mutce fa lo nu facki lo du'u lo jesymabru pu nalbolbi'o gi'e ca'o klama lo darno .i ji'a ta'e ku lo tolku'o .a lo skuro cu zunti ca lo nu .abu djica lo nu benji lo jesymabru .i la .alis. ki'u lo nu lo korcu sonci ro roi sa'irbi'o gi'e dzukla lo drata pagbu be lo foldi cu jivbi'o lo du'u lo nunkei ja'a mutce lo ka nandu
ni'o ro lo kelci cu kelci ca lo mintu gi'e na denpa lo kelka'u be ky. gi'e ru'i dausnu gi'e damba fi lo jesymabru .i ba zi ku la noltruni'u cu fengu cinmo gi'e ca'o marxa cadzu gi'e krixa «lu ko lo stedu ta vimcu li'u» .a «lu ko lo stedu tu vimcu li'u» ji'i pa roi ro mentu
ni'o la .alis. co'a cinmo lo ka tolkufra .i .i'a .abu za'o na damba la noltruni'u gi'e ku'i djuno lo du'u ka'e ba zi fasnu .i «lu va'o la'e di'u sei .abu pensi mi mo .i bu'u nelci lo nu vimcu lo stedu lo prenu .i manci mutce fa lo nu da stali lo ka jmive li'u»
ni'o .abu sisku lo tadji be lo nu zi'erbi'o kei gi'e pensi lo du'u xu kau ka'e cliva se cau lo nu se viska .i ca bo .abu co'a sanji lo cizra tolcanci be lo vacri .i ty. cfipu .abu ca lo cfari .i ku'i .abu ba lo nu catlu ty. ze'a lo mentu be li ji'i re cu facki lo du'u ty. nu cisma kei gi'e sezysku «lu ua la tcicymlatu .i ca ku mi da ka'e tavla li'u»
ni'o «lu do mo sei la mlatu ca lo nu lo ni moklu cu banzu lo nu tavla cu cusku li'u»
ni'o la .alis. cu denpa lo nu lo kanla cu tolcanci .i ba bo .abu tu'ifru .i «lu na prali fi lo nu tavla ta kei sei .abu pensi pu lo nu zvati fa lo kerlo .a do'a nai su'o ri li'u»
ni'o za lo drata mentu lo stedu cu mo'u tolcanci .i la .alis. cu toljgari lo fagycpi gi'e co'a te lisri lo nunkei gi'e cinmo lo ka gleki lo nu da .abu tirna .i la mlatu cu simlu lo ka jinvi lo du'u pi rau ri ca se viska .i no drata pagbu be my. cu tolcanci
ni'o «lu mi na jinvi lo du'u tu ca'o stace kelci sei la .alis. co'a pante tonga cusku .i ro tu da'arta'a ja'e lo nu na ka'e tirna lo nu tavla .i tu simlu lo ka na steci javni fi ce'u .i ja do'a nai no da va'o lo nu de ja'a javni cu jundi de .i do na se xanri lo du'u tai ma kau cfipu fa lo du'u ro lo dacti cu jmive .i mu'a lo bargu poi .ei mi ca pagre cu co'a cadzu lo drata fanmo be lo foldi .i mi pu'o kroke lo jesymabru pe la noltruni'u .i je ku'i ue jy. to'o bajra ca lo nu viska lo nu lo me mi moi cu jbikla li'u»
ni'o «lu xu do nelci la noltruni'u sei la mlatu cu lauble voksa cusku li'u»
ni'o «lu na sai go'i sei la .alis. cu cusku .i ny. mutce .y. li'u» .i ca ku .abu sanji lo nu la noltruni'u cu jibni trixe .abu gi'e tirna .i se ki'u bo di'a cusku «lu lo ka lakne fa lo nu ce'u jinga .i se ki'u bo na vamji lo temci fa lo nu mo'u kelci li'u»
ni'o la noltruni'u cu cisma gi'e pagre
ni'o «lu do ma tavla sei la noltrunau cu cusku li'u» .i ny. klama la .alis. gi'e mutce se cinri catlu lo stedu be la mlatu
ni'o «lu ta mi pendo .i ta tcicymlatu sei la .alis. cu cusku .i .e'a pei mi do ta pengau li'u»
ni'o «lu mi na sai nelci lo nu ta simlu ma kau sei la noltrunau cu cusku .i ku'i .e'a ta cinba lo mi xance va'o lo nu pluka ta li'u»
ni'o «lu mi zmanei lo nu na go'i sei la mlatu cu te pinka li'u»
ni'o «lu ko na tolsi'a sei la noltrunau cu cusku .i ko mi na catlu tai ta li'u» .i ny. klama lo trixe be la .alis. ca lo nu tavla
ni'o «lu lo mlatu ka'e catlu lo noltrunau sei la .alis. cu cusku .i mi pu tcidu di'u lo cukta .i ku'i mi na morji lo du'u cy. mo kau li'u»
ni'o «lu .ei ta se vimcu sei la noltrunau cu jdice cusku li'u» .i ny. cusku fi la noltruni'u noi ca jibni pagre ku'o fi «lu .au doi dirba do da vicygau lo vi mlatu li'u»
ni'o la noltruni'u cu cikre ta'i pa da ro nabmi noi barda ja cmalu .i «lu ko lo stedu ta vimcu sei ny. se cau lo nu fa'a catlu cu cusku li'u»
ni'o ba'e ''mi'' klagau lo selmi'ecatra sei la noltrunau cu sutydji cusku li'u» .i ny. sutra klama
ni'o la .alis. cu jdice lo du'u xruti gi'e viska lo nu lo nunkelci cu mo kau .i ca bo .abu tirna lo darno voksa be la noltruni'u noi cinmo krixa .i .abu ba'o tirna lo nu ny. minde lo nu ci kelci cu se catra ki'u lo nu ky. na kelci ca lo kelka'u be ky. .i .abu na'e nelci lo jvinu be lo cuntu ki'u lo nu lo nunkelci cu mutce lo ka cfipu kei ja'e lo nu .abu no roi djuno lo du'u xu kau ca .ei kelci .i se ki'u bo .abu co'a sisku lo .abu jesymabru
ni'o lo jesymabru ca'o damba lo drata jesymabru .i la .alis. cu jinvi lo du'u la'e di'u xautce lo nu kroke lo se drata lo drata .i lo po'o nabmi cu nu lo .abu fagycpi ba'o klama lo drata fanmo be lo purdi gi'e bu'u fliba troci ga'a la .alis. lo nu volkla lo tricu
ni'o ca lo nu .abu lo fagycpi ba'o kavbu gi'e xrugau kei ge lo nundamba cu mulno gi lo re jesymabru na se viska .i «lu ku'i na vajni mutce sei la .alis. cu pensi .i ro lo dargu cu canci lo vi mlana be lo foldi li'u» .i .abu punji fy. lo cnita be lo .abu birka ja'e lo nu na ka'e za'u re'u cliva kei gi'e xruti lo nu jmina tavla lo pendo
ni'o .abu ca lo nu ba'o xruti tu'a la tcicymlatu cu se spaji lo nu facki lo du'u lo prenu so'i mei ba'o jmaji lo sruri be ty. .i da'arsi'u fa lo selmi'ecatra jo'u la noltrunau jo'u la noltruni'u vu'o noi ro ke'a cu tavla ca lo mintu ca lo nu ro drata cu smaji mutce gi'e tolkufra simlu
ni'o la .alis. ca lo nu tolcliva cu te cpedu lo nu jdice lo cuntu kei ro lo ci mei .i ku'i .abu ki'u lo nu ro ri tavla ca lo mintu cu mutce lo ka se nandu lo nu jimpe lo du'u ma kau se cusku
ni'o lo seldau be lo selmi'ecatra zo'u na ka'e katna vimcu lo stedu se cau lo nu da poi xadni zo'u ka'e katna vimcu lo stedu da .i sy. no roi pu zukte lo simsa .i .ai na co'a go'i ca lo sy. ca nunjmive pagbu
ni'o lo seldau be la noltrunau zo'u ro da poi ke'a se stedu zo'u da ka'e se sedycaugau .i .ei na cusku lo nonselsmu
ni'o lo seldau be la noltruni'u zo'u ga da se zukte sera'a lo cuntu zi lo mleca be lo temci pi no si'e gi ny. ba minde fi lo nu ro de se catra (to lo ro moi pinka cu rinka lo nu pi ro lo kansi'u cu simlu lo ka mutce lo ka junri je xanka toi)
ni'o la .alis. na ka'e pensi lo nu cusku na'e bo «lu ta se ponse la noltroni'u .i .e'u preti ta ko ba'e ''ny'' li'u»
ni'o «lu ny. pinfu sei la noltruni'u fi lo selmi'ecatra cu cusku .i ko ny. ti klagau li'u» .i lo selmi'ecatra cu klama tai tu'a lo danti
ni'o lo stedu be la mlatu co'a kadze'a ca lo nu sy. cliva kei gi'e ba'o mu'o canci ca lo nu sy. xruti co kansa la noltroni'u .i se ki'u bo la noltrunau .e lo selmi'ecatra cu cilce bajra gi'e sisku my. ca lo nu lo drata cu di'a kelci
## ni'o ni'o so mo'o
### lisri fi la jitfa cakyrespa
ni'o «lu do na ka'e pensi lo nu se la'u ma kau mi gleki lo nu mi do za'u re'u viska doi dirba slabu sei la noltroni'u cu cusku li'u» .i ny. xendo tagygau lo ny. birka lo me la .alis. moi .i ny. jo'u .abu kansi'u lo nu cadzu cliva
ni'o la .alis. cu mutce gleki lo nu zgana lo nu ny. pluka tarti .i .abu pensi lo du'u ju'o cu'i lo cpinytsapi cu rinka lo nu ny. cilce ca lo nu .abu penmi ny. lo jupku'a
ni'o «lu ca lo nu ba'e ''mi'' noltroni'u kei sei .abu (to se pi'o nai ku'i lo pacna mutce tonga toi) sezysku no sai cpinytsapi ba zvati lo mi jupku'a .i lo stasu cu xamgu se cau ku .i cumki fa lo nu ro roi ku lo cpinytsapi cu rinka lo nu lo prenu cu cpina tarti sei .abu mutce se pluka be lo nu facki lo cnino javni .i lo sarvanju cu rinka lo nu py. slari tarti .i lo spatrkamomili cu rinka lo nu py. kurki tarti .i .y. .i lo bavmi sakta .e lo simsa cu rinka lo nu lo verba cu titla tarti .i .au lo prenu cu djuno la'e ba'e ''di'u'' ja'e lo nu py. na mobdu'a ra li'u»
ni'o ca ku .abu nalmo'i fi la noltroni'u gi'e milxe se spaji ca lo nu tirna lo ny. voksa noi jibni lo .abu kerlo .i «lu do da pensi doi dirba .i la'e di'u rinka lo nu do tolmo'i lo nu .ei tavla .i mi na ka'e ca cusku lo se du'u la'e di'u ma kau madni'i .i ku'i mi ba zi morji li'u»
ni'o «lu ju'o cu'i madni'i no da sei la .alis. cu darsi te pinka li'u»
ni'o «lu .e'i doi verba sei la noltroni'u cu cusku ro da de madni'i .i sarcu fa lo nu facki li'u» .i ny. la'irze'a la .alis. ca lo nu tavla
ni'o la .alis. na mutce nelci lo nu tai jibni ny. ge pa mai ki'u lo nu la noltroni'u cu mutce lo ka tolmelbi gi re mai ki'u lo nu ny. satci ke galtu mapti lo nu vregau lo firji'o lo .abu janco .i se tolkufra kinli firji'o .i ku'i .abu na nelci lo nu tolclite .i se ki'u bo .abu renvi se rai lo ka se kakne
ni'o «lu lo nunkei ca'o xagze'a sei .abu se ta'i lo nu stogau lo nunsnu cu cusku li'u»
ni'o «lu ie go'i sei la noltroni'u cu cusku .i la'e di'u madni'i la'e «lu .u'e nu prami .i lo nu prami cu rinka lo nu lo munje cu carna li'u» li'u»
ni'o «lu ti'e rinka sei la .alis. cu lauble cusku fa lo nu ro da jundi lo cuntu be da li'u»
ni'o «lu .i'a .a'u nai mintu fi lo ka smuni sei la noltroni'u noi ca'ergau lo kinli je cmalu firji'o lo janco be la .alis. cu cusku .i la'e di'u madni'i la'e «lu ko kurji lo smuni .i se va'o bo lo sance cu kurji vo'a li'u» li'u»
ni'o «lu ua ti nelci lo nu facki lo du'u ro da ma kau madni'i sei la .alis. cu pensi li'u»
ni'o «lu ju'o do pensi sezretsku lo se du'u ma kau krinu lo nu mi na srupunji lo mi birka lo do xadmidju sei ba lo nundenpa la noltroni'u cu cusku .i krinu fa lo nu mi na'e lacri lo do fagycpi lo nu tarti .i .e'u pei mi troci lo nu cipra li'u»
ni'o «lu cumki fa lo nu fy. batci sei la .alis. noi na sai xankydji lo nu troci lo nu cipra cu spuda li'u»
ni'o «lu je'u sai sei la noltroni'u cu cusku ge lo fagycpi gi lo sansrmustardo cu batci .i la'e di'u madni'i la'e «lu lo cipni poi pimdu'i ckaji cu ro roi jmaji li'u» li'u»
ni'o «lu ku'i lo sansrmustardo na cipni sei la .alis. cu te pinka li'u»
ni'o «lu drani ue cu'i sei la noltroni'u cu cusku .i .i'o lo nu do cusku cu klina lo nu jimpe li'u»
ni'o «lu sy. kunra ba'e ''pe'i'' sei la .alis. cu cusku li'u»
ni'o «lu li'a go'i sei la noltroni'u noi simlu lo ka bredi lo nu tugni la .alis. ro da cu cusku .i lo barda ke sansrmustardo terkunra vi jibni .i la'e di'u madni'i la'e «lu lo nu lo me mi moi cu zenba cu panra lo nu lo me do moi cu jdika li'u» li'u»
ni'o «lu ua ka'u sei la .alis. noi na jundi lo ro moi pinka cu krisku .i sy. stagi .i sy. lo ka go'i cu na simlu gi'e ku'i ja'a ckaji li'u»
ni'o «lu mi do ja'a sai tugni sei la noltroni'u cu cusku .i la'e di'u madni'i la'e «lu ko ckaji lo se simlu be do li'u» .i va'i sa'u «lu ko no roi se xanri lo nu do na ckaji na'e bo da poi do simlu fi lo drata fe lo ka de poi do ca'a ja nu'o ckaji ke'a na drata di poi do simlu ke'a lo drata lo drata li'u» li'u»
ni'o «lu pe'i mi ka'e xagmau jimpe la'e di'u sei la .alis. cu clite mutce cusku va'o lo nu ciska .i ku'i mi na ka'e jimpe ca lo nu do cusku li'u»
ni'o «lu di'u no va'e ci'u lo mi ka'e se cusku be va'o lo nu mi cuxna sei la noltroni'u cu se pluka tonga spuda li'u»
ni'o «lu .e'o ko ko na raktu lo nu cusku se pi'o lo clamau sei la .alis. cu cusku li'u»
ni'o «lu .o'a na raktu sei la noltroni'u cu cusku .i mi dunda ro ca ba'o se cusku be mi do li'u»
ni'o «lu tolkargu seldunda sei la .alis. cu pensi .i mi gleki lo nu na ta'e tai dunda ca lo jbedetri te salci li'u» .i ku'i .abu na darsi lo nu cladu cusku
ni'o «lu xu za'u re'u pensi sei la noltroni'u ca lo nu za'u re'u ca'ergau lo kinli je cmalu firji'o cu te preti li'u»
ni'o «lu mi zifre lo nu pensi sei la .alis. noi co'a xanka cu kinli cusku li'u»
ni'o «lu du'i lo nu zifre sei la noltroni'u cu cusku fa lo xarju lo nu vofli .i la'e di'u madni'i .y. li'u»
ni'o ca ku la .alis. cu mutce se spaji lo nu lo voksa be la noltroni'u cu canci ca ji'a sai lo midju be lo ny. se nelrai valsi no'u zo madni'i .i lo birka poi jorne lo .abu birka cu co'a desku .i la .alis. cu catlu .i la noltruni'u cu ca'u sanli .i ny. se polje se birka gi'e lindi vilti'a simsa frumu
ni'o «lu xamgu donri doi nolba'i sei la noltroni'u co'a cmato'a je ruble voksa cusku li'u»
ni'o «lu .o'i pa'e sei la noltruni'u ca lo nu darxi lo loldi lo jamfu cu krixa do .a lo stedu be do cu .ei se vimcu .i go'i ze'i pi mu lo no temci .i ko cuxna li'u»
ni'o la noltroni'u cu cuxna gi'e zi ba'o cliva
ni'o «lu .e'u mi'o di'a kelci sei la noltruni'u fi la .alis. cu cusku li'u» .i la .alis. cu dukse lo ka terpa kei gi'e cusku no valsi gi'e ku'i masno jersi ny. fa'a lo kelcrkroke foldi
ni'o lo nu surla bu'u lo ctino cu prali lo drata vitke lo nu la noltruni'u cu nalzvati .i ku'i vy. ca lo nu viska ny. cu zi sutra lo nu xruti lo nu kelci .i la noltruni'u cu te pinka fi lo po'o du'u lo mokca nunlerci cu se jdima lo vy. nunjmive
ni'o ze'a pi ro lo nunkei la noltruni'u no roi de'a damba lo drata kelci gi'e no roi de'a krixa «lu ko lo stedu ta vimcu li'u» .a «lu ko lo stedu tu vimcu li'u» .i lo se dapma be ny. cu se pifygau lo sonci noi li'a de'a bargu .i ba za lo cacra be li ji'i pi mu ge no bargu cu zvati gi ro lo kelci po'u na'e bo la noltrunau .a la noltruni'u .a la .alis. cu pinfu gi'e se dapma fi lo nu se selmi'ecatra .i ba bo la noltruni'u cu tatpi cliva gi'e cusku fi la .alis. fe «lu xu do pu viska la jitfa cakyrespa li'u»
ni'o «lu na go'i sei la .alis. cu cusku .i mi na djuno ji'a sai lo du'u ma kau jitfa cakyrespa li'u»
ni'o «lu te zbasu lo jitfa cakyrespa bo stasu sei la noltruni'u cu cusku li'u»
ni'o «lu mi pu no roi ga viska cy. gi se tavla fi cy. sei la .alis. cu cusku li'u»
ni'o «lu .e'e mi'o klama sei la noltruni'u cu cusku .i ba lisri cy. ri do li'u»
ni'o la .alis. ca lo nu cliva cadzu cu tirna lo nu la noltrunau cu lauble voksa cusku fi lo zvati fe «lu ca'e ro do se fraxu li'u» .i «lu ri'e la'e ba'e ''di'u'' xamgu sei .abu sezysku .i .abu pu cinmo lo nu tolgei lo nu la noltruni'u cu minde xo kau nuncatra
ni'o ba zi ku penmi la cpicinfo noi sipna mutce vreta lo se solgu'i (to .e'u ko va'o lo nu na djuno lo du'u ma kau cpicinfo cu catlu lo pixra toi) .i «lu ko sanli doi lazni sei la noltruni'u cu cusku .i ko klagau lo vi citno ninmu lo nu viska la jitfa cakyrespa gi'e tirna lo cy. lisri .i .ei mi xruti gi'e jitro so'o nuncatra noi mi pu minde li'u» .i ny. cadzu cliva la .alis. noi stali la cpicinfo .i la .alis. na mutce lo ka nelci lo jvinu be lo vi danlu .i ku'i .abu pensi lo du'u se snura dunli fa lo nu stali cy. kei lo nu jersi lo cilce noltruni'u .i se ki'u bo .abu denpa
ni'o la cpicinfo cu tsebi'o gi'e mosra lo kanla gi'e ba bo catlu la noltruni'u co'u lo nu ny. na ka'e se viska kei gi'e ba bo cmila .i «lu zdile sei la cpicinfo cu cusku se'i se'i nai li'u»
ni'o «lu ba'e ''ma'' zdile sei la .alis. cu cusku li'u»
ni'o «lu ue ba'e ''tu'' sei la cpicinfo cu cusku .i ro da tu xanri .i ju'o no roi selmi'ecatra da .i .ei klama li'u»
ni'o «lu ro da bu'u cusku zo .ei sei la .alis. ca lo nu masno jersi cy. cu pensi .i mi pu tai se minde no roi lo mi nunji'e li'u»
ni'o lo re mei pu lo nu ve'u klama cu viska la jitfa cakyrespa noi zu badri je nonkansa zutse lo cmalu ke rokci ctebi .i la .alis. ca lo nu jbize'a cu tirna lo nu jycy. vruva'u tai lo nu mutce badri .i .abu carmi lo ka kecti jycy. .i «lu tu ma badri sei .abu fi la cpicinfo cu retsku li'u» .i la cpicinfo cu spuda se pi'o lo valsi poi jibni mintu lo pu valsi ku'o «lu ro da tu xanri .i ju'o tu node badri .i .ei klama li'u»
ni'o lo re mei cu klama la jitfa cakyrespa noi catlu se pi'o lo barda je selkakclu kanla gi'e ku'i cusku no da
ni'o «lu lo vi citno ninmu zo'u sei la cpicinfo cu cusku ti djica lo nu djuno fi lo do lisri .i go'i li'u»
ni'o «lu mi ta ly. tavla sei la jitfa cakyrespa cu condi je kunti tonga cusku .i .e'u lo re do tsebi'o gi'e nai cusku lo valsi pu lo nu mi mo'u co'e li'u»
ni'o lo re mei cu tsebi'o .i no da tavla ze'a lo mentu be li so'o .i la .alis. cu pensi «lu mi na jimpe lo du'u ta ka'e mo'u co'e ta'i ma kau va'o lo nu ta na co'a co'e li'u» gi'e ku'i tolxanka denpa
ni'o «lu pu ku sei la jitfa cakyrespa cu condi vruva'u cusku mi jetnu cakyrespa li'u»
ni'o lo di'u valsi cu se jersi lo nu ze'u smaji noi zunti ke'a fa po'o lo ru'i nai me zo xyjyckryrx se krixa be la cpicinfo be'o .e lo ru'i tilju nunvruva'u be la jitfa cakyrespa .i la .alis. pu'o sa'irbi'o je cusku «lu ki'e doi prenu mi do ckire lo do cinri lisri li'u» gi'e ku'i na ka'e rivbi lo nu pensi lo du'u .ei da ji'a jersi .i se ki'u bo .abu smaji zutse gi'e cusku no da
ni'o «lu ca lo nu mi'a cmalu sei la jitfa cakyrespa noi ca surla zenba gi'e ku'i ru'i nai za'o milxe vruva'u cu di'a cusku mi'a ve ckule lo xamsi .i lo ralju cu junri je tolcitno cakyrespa gi'e se cmene «lu ractu cafmi'a li'u» mi'a li'u»
ni'o «lu ki'u ma do'o te cmene ra «lu ractu cafmi'a li'u» va'o lo nu ra ge nai ractu gi nai cafmi'a sei la .alis. cu te preti li'u»
ni'o «lu mi'a te cmene ra «lu ractu cafmi'a li'u» ki'u lo nu ra ctuca mi'a sei la jitfa cakyrespa cu fengu cusku .i je'u do bebna mutce li'u»
ni'o «lu .ei do ckeji lo nu cusku lo tai sampu preti sei la cpicinfo cu jmina cusku li'u» .i ba bo lo re mei cu smaji zutse gi'e catlu la .alis. uu noi cinmo lo nu bredi lo nu se tunlo lo terdi .i ba zu bo la cpicinfo cu cusku fi la jitfa cakyrespa fe «lu .e'e doi slabu ko na co'e ze'a pi ro lo donri li'u» .i jycy. di'a cusku di'e
ni'o «lu ke'u mi'a te ckule lo xamsi .i ju do la'e di'u na krici li'u»
ni'o «lu mi no roi cusku lo se du'u mi na krici sei la .alis. cu zunti li'u»
ni'o «lu do ja'a go'i sei la jitfa cakyrespa cu cusku li'u»
ni'o «lu ko ri'urgau lo tance sei la cpicinfo pu lo nu la .alis. ka'e za'u re'u tavla cu jmina cusku li'u» .i la jitfa cakyrespa cu di'a co'e
ni'o «lu mi'a cilre fu lo xagrai .i je'u mi'a zvati lo ckule ca ro donri li'u»
ni'o «lu mi ji'a zvati lo donri ckule sei la .alis. cu cusku .i .ei do na tai jgira li'u»
ni'o «lu xu do se ctuca fo lo seljmina tercli sei la jitfa cakyrespa cu xanka milxe retsku li'u»
ni'o «lu go'i sei la .alis. cu cusku .i mi'a cilre fi lo fasybau .e lo zgike li'u»
ni'o «lu xu go'i fi lo nu lumci sei la cakyrespa cu cusku li'u»
ni'o «lu li'a na go'i sei la .alis. cu fengu cusku li'u»
ni'o «lu ua lo me do moi na mutce lo ka xamgu ckule sei la jitfa cakyrespa cu surbi'o mutce tonga cusku .i lo dejnoi be fi lo me mi'a moi cu se fanmo «lu lo fasybau .e lo zgike ba'e ''.e'' lo nu lumci cu seljmina li'u» li'u»
ni'o «lu do na mutce lo ka nitcu ly. sei la .alis. cu cusku va'o lo nu xabju lo xamsi loldi li'u»
ni'o «lu mi na kakne lo nu pleji sei la jitfa cakyrespa cu vruva'u cusku .i mi cilre lo fadni po'o li'u»
ni'o «lu ri mo sei la .alis. cu retsku li'u»
ni'o «lu li'a pa mai nu ctidu'e gi'e ci'iska sei la jitfa cakyrespa cu spuda .i re mai lo vo pagbu be lo nacycmaci be'o no'u lo nu jmina'e .e lo nu vimcu'a .e lo nu pilji'e .e lo nu fende'a li'u»
ni'o «lu mi na jimpe fi zo jmina'e sei la .alis. cu cusku darsi .i ki'a li'u»
ni'o la cpicinfo cu spaji lafti lo re xance .i «lu ue pau nai xu na jimpe fi zo jmina'e sei cy. ki'asku .i ru'a je'u pei do jimpe fi zo natfe li'u»
ni'o «lu go'i sei la .alis. cu senpi cusku .i lo du'u da de natfe cu se smuni lo du'u da .o nai de ka'e jetnu li'u»
ni'o «lu ja'o sei la cpicinfo di'a cusku do natfe jimpe .i do ja'a bebna va'o lo nu do na jimpe natfe jimpe li'u»
ni'o la .alis. na darsi lo nu za'u re'u te preti la'e di'u .i .abu fa'a la jitfa cakyrespa cu cusku «lu do cilre fi ma ji'a li'u»
ni'o «lu lo cridyske sei la jitfa cakyrespa noi kancu lo seltadni se pi'o lo limna'i cu cusku .i lo cridyske no'u lo prutce jo'u lo cabna ge'u .e lo xasyske .i ji'a lo nu pixra'i zo'u lo pixra'i ctuca cu tolci'o sincyfi'e noi zvati pa roi ro jeftu .i ba'e ''ra'' ctuca fo lo nu pixra'i gi'e grasu'u cintai finti li'u»
ni'o «lu .a'u la'e di'u mo sei la .alis. cu cusku li'u»
ni'o «lu ba'e ''mi'' na ka'e jarco sei la jitfa cakyrespa cu cusku .i mi dukse lo ka tinsa .i ji'a la cpicinfo no roi cilre li'u»
ni'o «lu claxu lo temci sei la cpicinfo cu cusku .i mi zvati lo dzeklu ctuca .i ri tolci'o cakyjukni .i ba'e ''ri'' go'i li'u»
ni'o «lu mi ri no roi zvati sei la jitfa cakyrespa cu vruva'u cusku .i ri ctuca fo ti'e lo clacmo jo'u lo geisto li'u»
ni'o «lu go'i .i go'i sei la cpicinfo noi ji'a vruva'u cu cusku li'u» .i lo re danlu cu gairgau lo vo'a xance lo vo'a flira
ni'o «lu pau do cilre ca ro donri ze'a lo cacra be li xo sei la .alis. noi djica lo nu sutra galfi lo selsnu cu cusku li'u»
ni'o «lu ze'a lo cacra be li pa re ca lo pa moi donri .e lo re moi donri sei la jitfa cakyrespa cu cusku .i li so ca lo ci moi .e lo vo moi .i li xa ca lo mu moi .e lo xa moi .i si'a li'o li'u»
ni'o «lu cinri selpla sei la .alis. cu ki'asku li'u»
ni'o «lu la'e di'u krinu lo nu zo ''ci''l''re'' cu cmene .i jdika lo ka temci kei lo cacra be li ba'e ''ci'' ca ro djedi be li ba'e ''re'' li'u»
ni'o lo sidbo cu mutce cnino la .alis. .i .abu ze'a pensi pu lo nu te pinka fi «lu ja'o je'u pei ca lo so moi donri .e lo pa no moi donri cu zifre li'u»
ni'o «lu je'u li'a go'i sei la jitfa cakyrespa cu cusku li'u»
ni'o «lu mo ca lo pa pa moi donri sei la .alis. di'a kucli cusku li'u»
ni'o «lu la'e di'u banzu sera'a lo nu ckule sei la cpicinfo cu jditce tonga zunti .i ca ku ko ti tavla lo nu kelci li'u»
## ni'o ni'o pa no mo'o
### xasyjukni vonseldansu
ni'o la jitfa cakyrespa cu condi vruva'u gi'e mosra lo trixe be pa lo limna'i lo kanla gi'e catlu la .alis. gi'e troci lo nu tavla .i ku'i ze'a lo mentu be li ji'i re lo nu vruva'u cu dicra lo voksa .i «lu mintu lo nu lo bongu cu zunti lo galxe sei la cpicinfo cu cusku li'u» .i cy. co'a gunka lo nu desygau gi'e darxi fo lo trixe .i ba za bo la jitfa cakyrespa cu xruti lo ka se voksa kei gi'e di'a selklaku flira cusku -
ni'o «lu ju'o cu'i do na ze'u xabju lo xamsi cnita (to sa'a «lu mi na go'i sei la .alis. cu cusku li'u» toi) .i ju'o cu'i do no roi penmi lo xasyjukni (to sa'a la .alis. co'a cusku «lu mi pa roi vu'irga'e li'u» gi'e ku'i sutra sezydicra gi'e cusku «lu no roi go'i li'u» toi) .i se ki'u bo do na ka'e se xanri lo nu lo xasyjukni vonseldansu cu mo kau kukte li'u»
ni'o «lu ie na go'i sei la .alis. cu cusku .i ri mo seldansu li'u»
ni'o «lu ta'a do'u sei la cpicinfo cu cusku .i pa mai lo dansu pa da se linji pa'a lo xamsi korbi - li'u»
ni'o «lu ba'e ''re'' da sei la jitfa cakyrespa cu krixa .i lo pinpedi ce'o lo cakyrespa ce'o lo salmone ce'o zo'e si'a li'o .i ba bo ba lo nu mo'u vimcu ro mivjdu lo jvinu - li'u»
ni'o «lu la'e di'u ta'e ze'u co'e sei la cpicinfo cu zunti li'u»
ni'o «lu .e'e re roi crakla li'u»
ni'o «lu ro da kansa lo xasyjukni sei la cpicinfo cu krixa li'u»
ni'o «lu li'a sei la jitfa cakyrespa cu cusku .i .e'e re roi crakla .i .e'e penmi lo kansa li'u»
ni'o «lu .e'e cajysi'u lo xasyjukni .i .e'e xruti po'i lo mintu sei la cpicinfo cu di'a co'e li'u»
ni'o «lu baku ju'i do'u sei la jitfa cakyrespa di'a cusku .i .e'e renro li'u»
ni'o «lu fe lo xasyjukni sei la cpicinfo noi plipe lo vacri cu krixa li'u»
ni'o «lu fi lo xamsi se rai lo selka'e ka darno li'u»
ni'o «lu .e'e limna jersi lo xasyjukni sei la cpicinfo cu krixa li'u»
ni'o «lu .e'e pipcarna ne'i lo xamsi sei la jitfa cakyrespa cu krixa li'u»
ni'o «lu .e'e za'u re'u cajysi'u lo xasyjukni sei la cpicinfo cu voksa cladu traji krixa li'u»
ni'o «lu .e'e xruti lo tumla .i mo'u pa moi morna sei la jitfa cakyrespa noi suksa jdikygau lo voksa cu cusku li'u» .i lo re danlu noi pu ru'u plipe ze'a la'e di'u tai lo nu fenki cu badri je smaji tsebi'o gi'e catlu la .alis.
ni'o «lu ju'o da'i melbi seldansu sei la .alis. cu toldarsi cusku li'u»
ni'o «lu .a'u pei do viska lo mupli sei la jitfa cakyrespa cu cusku li'u»
ni'o «lu .a'u sai go'i sei la .alis. cu cusku li'u»
ni'o «lu .e'e mi'o troci lo nu pa moi morna sei la jitfa cakyrespa fi la cpicinfo cu cusku .i mi'o se'a kakne se cau lo xasyjukni .i ma sanga li'u»
ni'o «lu .i'e ba'e ''do'' go'i sei la cpicinfo cu cusku .i mi tolmorji lo valsi li'u»
ni'o co'a junri dansu ru'u la .alis. .i ru'i nai stapa lo .abu jmadegji ca lo nu dukse jbikla .i sligau lo xance te zu'e lo nu sinxa lo rilti .i ze'a bo la jitfa cakyrespa cu masno je badri mutce sanga «lu.e'o sutra doi cakcurnu .i ko ti'a zgana ua paxajyfi'e noi jbitrixe gi'e me mi rebla stapa
.i ui .a'a ro lo jukni .e lo respa ca se gansegi'e denpa mi lo canre .i pei do ba kansa dansu
.i .ai pei nai pei .ai pei nai pei .ai pei do ba dansu.i .ai pei nai pei .ai pei nai pei nai pei do ba dansu
.i do na ka'e se xanri lo nu pluka co mo kauca lo nu mi'o se renro fi lo xamsi .i'a .au
.i dardukse .i dardukse sei cy. spuda tolselmansadoi merlanu ki'e ku'i .i mi na ba kansa dansu
.i .ai nai .ei nai .ai nai .ei nai .ai nai mi ba dansu.i .ai nai .ei nai .ai nai .ei nai .ei nai mi ba dansu
.i na selvai lo ni darno sei lo pendo ze'i frati.i ia sai lo drata korbi ca'a drata mlana zvati
.i lo ni darno lo glico cu ni jibni be la .frans..i ko virnu doi cakcurnu .i .ei do ba kansa dansu
.i .ai pei nai pei .ai pei nai pei .ai pei do ba dansu.i .ai pei nai pei .ai pei nai pei nai pei do ba dansuli'u»
ni'o «lu ki'e .i lo nu dansu zo'u mutce cinri fa lo nu catlu sei la .alis. noi mutce gleki lo nu uo mulno cu cusku .i mi ja'a sai nelci lo cinri selsanga be sera'a lo merlanu li'u»
ni'o «lu .a'a lo merlanu zo'u sei la jitfa cakyrespa cu cusku do my. pu ca'a viska li'a pei li'u»
ni'o «lu go'i sei la .alis. cu cusku .i mi my. so'i roi viska lo sairpaln- sei .abu sutra sezydicra li'u»
ni'o «lu mi na djuno lo du'u ma kau stuzi la .sairpaln. sei la jitfa cakyrespa cu cusku .i ku'i do va'o lo nu tai so'i roi viska my. cu se slabu li'a lo nu ma kau my. jvinu li'u»
ni'o «lu ia sei la .alis. cu pensi spuda lo my. rebla cu nenri lo my. moklu .i my. cpana lo nabyspi li'u»
ni'o «lu do srera tu'a lo nabyspi sei la jitfa cakyrespa cu cusku .i lo nabyspi cu se jisybi'o va'o lo nu jinru lo xamsi .i ku'i lo my. rebla ja'a nenri lo my. moklu .i krinu la'e di'u fa - sei ca ku la jitfa cakyrespa cu sipfru ke kanla ga'orgau .i ko ta tavla lo krinu .e ro srana sei fi la cpicinfo cu cusku li'u»
ni'o «lu krinu sei la cpicinfo cu cusku fa lo nu my. ba'e ''ja'a'' kansa lo xasyjukni lo nu dansu .i se ki'u bo my. se renro fi lo xamsi .i se ki'u bo my. farlu lo darno .i se ki'u bo my. carmi setca lo rebla lo moklu .i se ki'u bo my. na ka'e tolsetca .i uo li'u»
ni'o «lu ki'e sei la .alis. cu cusku .i cinri mutce .i mi pu no roi djuno lo tai mutce lo merlanu li'u»
ni'o «lu do'a mi do ka'e tavla lo se jmina sei la cpicinfo cu cusku .i xu do djuno lo du'u ma kau krinu lo nu zo labyfi'e cmene lo merlanu li'u»
ni'o «lu mi la'e di'u no roi pensi sei la .alis. cu cusku .i ma krinu li'u»
ni'o «lu my. kurji lo jufra .e lo selsku sei la cpicinfo cu junri spuda li'u»
ni'o la .alis. cu mulno lo ka se cfipu .i «lu ua nai kurji lo jufra .e lo selsku sei .abu preti tonga rapsku li'u»
ni'o «lu .a'a do ma pilno lo nu kurji lo do selsku sei la cpicinfo cu cusku .i va'i ma cipra lo ka gendra li'u»
ni'o la .alis. ze'a pensi pu lo nu danfu .i «lu la jbofi'e cu go'i pe'i li'u»
ni'o «lu ie la lobyfi'e va'i nai .i lo gendra ni'a lo xamsi sei la cpicinfo cu di'a condi voksa cusku cu se cipra lo labyfi'e .i ka'udai li'u»
ni'o «lu mi va'o lo nu da'i mi merlanu cu cusku sei la .alis. noi za'o pensi lo selsanga cu cusku fi lo xajyfi'e fe «lu fi'i nai do'u .e'o darsta .i mi'a na djica lo nu do mi'a kansa li'u» li'u»
ni'o «lu bilga lo nu xy. kansa sei la jitfa cakyrespa cu cusku .i no clite finpe cu rivbi lo xajyfi'e li'u»
ni'o «lu ue je'u pei sei la .alis. cu spaji mutce tonga cusku li'u»
ni'o «lu li'a go'i sei la jitfa cakyrespa cu cusku .i mu'a mi va'o lo nu lo finpe cu te preti cu cusku «lu do ma friti lo do xajyfi'e li'u» li'u»
ni'o «lu xu do skudji zo xasyvi'e sei la .alis. cu cusku li'u»
ni'o «lu mi skudji lo se cusku be mi sei la jitfa cakyrespa cu jgicro tonga spuda li'u» .i la cpicinfo cu minsku «lu .e'e do mi'a tavla su'o lo do selfri li'u»
ni'o «lu mi do ka'e tavla lo mi selfri pe co'a lo zi cerni sei la .alis. cu toldarsi milxe cusku .i ku'i na prali fi lo nu peixru lo purlamdei .i ki'u bo mi drata prenu ca py. li'u»
ni'o «lu ko ciksi pi ro la'e di'u sei la jitfa cakyrespa cu cusku li'u»
ni'o «lu .o'o nai na go'i .i pa mai lo selfri sei la cpicinfo cu sutydji tonga cusku .i lo velcki cu ze'u .oi co'e li'u»
ni'o la .alis. co'a tavla fi lo .abu selfri pe co'a lo nu pa re'u viska la blabi ractu .i .abu milxe lo ka xanka la'e di'u kei ca lo cfari .i lo re danlu .abu mutce jibni gi'e mlana .i dy. ganra mutce kargau lo kanla .e lo moklu .i ku'i .abu zenba lo ka darsi ca lo nu ca'o co'e .i lo tirna cu prane smaji co'u lo nu .abu tolyli'a lo pagbu pe sera'a lo nu .abu sitsku «lu do tolcitno doi .paf.uiliam. li'u» la ciftoldi fau lo nu lo valsi cu ficybi'o .i ca ku la jitfa cakyrespa cu ze'u sakyva'u gi'e cusku «lu la'e di'u mutce lo ka cizra li'u»
ni'o «lu traji lo ka cizra kei fo lo cizra sei la cpicinfo cu cusku li'u»
ni'o «lu ro da fricybi'o sei la jitfa cakyrespa re re'u pensi cusku .i mi djica lo nu tirna lo nu ta ca troci lo nu sitsku da .i ko ta skumi'e lo nu co'a co'e li'u» .i jycy. catlu la cpicinfo tai lo nu jinvi lo du'u cy. catni la .alis.
ni'o «lu ko sa'irbi'o gi'e sitsku «lu lazni se voksa li'u» sei la cpicinfo cu cusku li'u»
ni'o «lu ue lo danlu cu mutce minde gi'e gasnu lo nu sitsku lo selcli sei la .alis. cu pensi .i dunli lo nu mi ve ckule li'u» .i ku'i .abu sa'irbi'o gi'e co'a sitsku .i ku'i lo .abu menli cu culno lo xasyjukni vonseldansu ja'e lo nu .abu ja'a ru'e djuno lo du'u .abu cusku ma kau .i lo valsi ca'a cizra mutce barkla .i «lu
xasyjukni se voksa .i cusku ia ti'e«lu do mi za'o jukpa .i .ei gau kresi'e
li'u» gi'e zbipilno lo nu vo'a cnicilo ka dasri joi batke .e ro si'a vrici
.i ca lo nu lo canre cu sudga cu cmilagi'e tavla co ckasu brafi'e se cfila
.i ii ku'i ca lo nu lo xamsi cu banrokei lo voksa cu binxo lo sance tolkanro
li'u»
ni'o «lu di'u frica lo ta'e se cusku be mi bei ca lo nu mi verba sei la cpicinfo cu cusku li'u»
ni'o «lu ju'a mi di'u pu no roi tirna sei la jitfa cakyrespa cu cusku .i ku'i simlu lo ka nalfadni nonselsmu li'u»
ni'o la .alis. no da cusku .i .abu ca'o zutse (to lo flira cu se sarji lo xance toi) gi'e kucli lo du'u xu kau ca de ba za'u re'u rarna fasnu
ni'o «lu mi djica lo nu ciksi fi mi sei la jitfa cakyrespa cu cusku li'u»
ni'o «lu ti na ka'e ciksi sei la cpicinfo cu sutra cusku .i .e'e di'a co'e lo jersi pempau li'u»
ni'o «lu ku'i lo batke xu sei la jitfa cakyrespa cu za'o co'e .i ta'i ba'e ''ma'' pilno lo nazbi lo nu cnici li'u»
ni'o «lu pa moi be lo nundansu stapa sei la .alis. cu cusku li'u» .i ku'i .abu mutce se cfipu pi ro lo cuntu gi'e djica lo nu lo selsnu cu cenba
ni'o «lu .e'e di'a co'e lo jersi pempau sei la cpicinfo re re'u naldenpa cusku .i co'a co'e «lu mi pagre lo purdi li'u» li'u»
ni'o la .alis. na darsi lo nu na tinbe .i .abu birti lo du'u ba srera barkla gi'e di'a desku voksa cusku «lu
mi pagre lo purdi .i .i'e se funjdi.i lo ctecpi lo tirxu vi kansa lo nuncti
.i ty. lo se snuji .e ia lo te snujicu citka ca lo nu cy. cpacu lo smuci
.i ba lo nu mulno uo kei cy. te dundalo palta noi ke'a cy. ka'e se tunta
.i ca lo nuncabna lo tirxu cu brejbilo nu pilno lo dakfu
li'u»
ni'o «lu ma prali fi lo nu sitsku ro di'u sei la jitfa cakyrespa cu zunti va'o lo nu do na ca'o ciksi .i traji lo ka cfipu kei fo lo mi se tirna li'u»
ni'o «lu go'i .i pe'i .ei sisti sei la cpicinfo cu cusku li'u» .i la .alis. cu mutce lo ka gleki lo nu tai zukte
ni'o «lu .e'u pei mi'a troci lo drata nu morna fi lo xasyjukni vonseldansu sei la cpicinfo cu di'a cusku .i ji .au pei la jitfa cakyrespa cu sanga da do li'u»
ni'o «lu .a'e .e'o sanga pe'u doi jitfa cakyrespa sei la .alis. cu spuda li'u» .i lo nu .abu tai sutra spuda cu rinka lo nu la cpicinfo cu cusku se pi'o lo jgicro tonga «lu .i'a na ka'e jimpe lo nu ma kau pluka .i ko sanga «lu cakyrespa stasu li'u» ta vau .ai pei doi slabu li'u»
ni'o la jitfa cakyrespa cu condi vruva'u gi'e co'a sanga di'e se pi'o lo voksa noi so'o roi dicra .i «lu melbi bo stasu ricfu je crino
denpa fi lo vaurcnino
.i pronalka'e kukselzbasu
stasu co vanci melbi bo stasu
stasu co vanci melbi bo stasumeelbi bo staasumeelbi bo staasu
staasu co vaaancimelbi bo melbi bo stasu
melbi bo stasu .i ro da kecti
lo re'ucti ja fi'ecti
.i no da xanka lo nu ckasu
da lo nu djica lo melbi bo stasu
da lo nu djica lo melbi bo stasumeelbi bo staasumeelbi bo staasu
staasu co vaaancimelbi bo melbi BO STAsuli'u»
ni'o «lu .e'e krefu sei la cpicinfo cu krixa li'u» .i la jitfa cakyrespa pu zi co'a re re'u sanga ca lo nu lo selki'a no'u «lu lo nunpai cu cfari li'u» darno se tirna
ni'o «lu .e'e sei la cpicinfo cu krixa li'u» .i cy. jgari la .alis. fo lo xance gi'e sutra cliva gi'e na denpa lo nu mo'u sanga
ni'o «lu lo nunpai cu mo sei la .alis. ca lo nu bajra cu vaxselnandu cusku .i ku'i la cpicinfo cu spusku zo .e'e po'o gi'e sutyze'a bajra ca'o lo nu bleze'a (to se bevri lo brife poi jersi vo'a toi) fa lo badri valsi po'u di'e .i «lu
staasu co vaaancimelbi bo melbi bo stasu
li'u»
## ni'o ni'o pa pa mo'o
### ma zerle'a lo rutytisna
ni'o la noltrunau jo'u la noltruni'u vu'o pe lo risna cu zutse lo vo'a nolstizu ca lo nu la .alis. jo'u la cpicinfo cu tolcliva .i lo barda so'i mei cu jmaji lo sruri .i ro klesi be lo cmalu cipni jo'u danlu be'o jo'u ji'a lo karda ro mei .i la nolse'u cu sanli ca'u lo re mei gi'e rinju lo linsi gi'e jbini lo sonci re mei noi fanta .i jibni la noltrunau fa la blabi ractu noi jgari ge lo tabra lo xance gi lo skapi te ciska slanu lo drata .i satci midju lo kumfa fa lo jubme noi se cpana lo barda palne be lo rutytisna noi tai xamgu se jvinu ja'e lo nu la .alis. cu xagji ri'a lo nu catlu .i «lu .au mulgau lo nunpai sei .abu pensi gi'e fairgau lo cidja li'u» .i ku'i la'e di'u simlu lo ka na lakne .i se ki'u bo .abu co'a catlu ro sruri be .abu te zu'e lo nu lo temci cu culno
ni'o la .alis. pu no roi zvati lo nunpai kumfa gi'e ku'i pu ca'a tcidu lo srana be ky. lo cukta gi'e se pluka lo nu facki lo du'u djuno lo du'u ma kau cmene so'a zvati .i «lu tu pajni sei .abu sezysku ki'u lo nu tu dasni lo barda krebasti li'u»
ni'o ta'o lo pajni cu me la noltrunau noi dasni lo nolmapku lo cpana be lo krebasti (to ko catlu lo craxra va'o lo nu do djica lo nu viska lo nu dasni ta'i ma kau toi) gi'e nai sai simlu lo ka kufra .i ju'o na melbi mapti
ni'o «lu tu pairkamni tsina sei la .alis. cu pensi .i lo vu pa re jmive (to .ei .abu cusku zo jmive ki'u lo nu ge su'o ri mabru gi su'o ri cipni toi) cu pairkamnycmi pe'i li'u» .i .abu ji'i ci roi cusku lo ro moi valsi gi'e jgira mutce ki'u lo nu jinvi (to drani toi) lo du'u so'u sai cmalu nixli be lo me .abu moi cu djuno lo du'u ma kau smuni .i ku'i zo paicmi ji'a mapti banzu
ni'o ro lo pa re pairkamnycmi cu zuktce ciska fi lo tanbo .i «lu tu ma zukte sei la .alis. fi la cpicinfo cu tolylau cusku .i tu na ka'e ciska da pu lo nu lo nunpai cu cfari li'u»
ni'o «lu tu ciska lo tu cmene sei la cpicinfo cu tolylau spuda ki'u lo nu terpa lo nu tolmorji pu lo fanmo be lo nunpai li'u»
ni'o «lu ue bebna sei la .alis. co'a cladu je fengu voksa cusku li'u» .i ku'i .abu sutra sisti ki'u lo nu la blabi ractu cu krixa «lu .ei smaji bu'u lo kumfa li'u» .i la noltrunau co'a dasni lo vistci gi'e xanka catlu lo sruri te zu'e lo nu facki lo du'u ma kau tavla
ni'o la .alis. ka'e viska (to frili tai lo nu da'i catlu ga'u lo janco be py. toi) lo nu ro lo pairkamnycmi cu ciska «lu ue bebna li'u» lo py. tanbo kei gi'e ji'a sai ka'e tilvi'a lo nu pa me py. na se slabu lo lerfu pe zo bebna gi'e nitcu lo nu cpedu lo nu se jungau kei lo lamji .i «lu ba melbi kalsa fa lo tanbo pu lo nu lo nunpai cu mulno sei la .alis. cu pensi li'u»
ni'o pa lo pairkamnycmi cu pilno lo pinsi noi vrumli cupra .i li'a la .alis. na ka'e renvi la'e di'u gi'e klama fo lo sruri be lo kumfa gi'e ti'erbi'o py. gi'e ba zi kakne lo nu lebna lo pinsi py. .i .abu tai sutra ja'e lo nu lo selkecti ke cmalu pairkamnycmi no'u lo rebyrespa po'u la .bil. na ka'e facki lo du'u lo pinsi ma kau binxo .i se mu'i bo by. ba lo nu ve'u sisku py. ro sruri cu bilga lo nu ciska se pi'o lo degji ze'a lo djedi velvi'u .i la'e di'u tolmutce lo ka prali kei ki'u lo nu no da se ja'e barna lo tanbo
ni'o «lu doi noisku ko tcidu lo zerfuzyxu'a selsku sei la noltrunau cu cusku li'u»
ni'o ca ku la blabi ractu cu ci roi tolsakci pa'o lo tabra gi'e tolgurgau lo skapi te ciska slanu gi'e tcidu bacru «lu
la noltruni'u pe lo risna cu zbasu lo rutytisnaze'a lo crisa djedi
.i la nolse'u pe lo risna cu zerle'a lo rutytisnagi'e darbevri bredi
li'u»
ni'o «lu ko pensi lo do se paijdi sei la noltrunau fi lo pairkamni cu cusku li'u»
ni'o «lu .ei za'o na go'i .i .ei za'o na go'i sei la ractu cu sutra zunti .i .ei lo mutce cu purci la'e di'u li'u»
ni'o «lu ko klagau lo pa moi zgana sei la noltrunau cu cusku li'u» .i la blabi ractu cu ci roi tolsakci pa'o lo tabra gi'e krixa «lu ju'i pa moi zgana li'u»
ni'o lo pa moi zgana cu me la mapypre noi nerkla gi'e jgari ge lo tcati kabri lo xance gi lo nanba joi matne lo drata .i «lu ko mi fraxu doi nolba'i sei my. co'a cusku lo nu mi ti nerbevri .i ku'i mi na mo'u pinxe lo tcati ca lo nu mi se klagau li'u»
ni'o «lu .ei do pu mo'u go'i sei la noltrunau cu cusku .i ca ma do co'a go'i li'u»
ni'o la mapypre cu catlu la cibmasti cicyractu noi pu klaje'i my. lo kumfa gi'e kansa la sipsmacu .i «lu lo pa vo moi pe lo cibmasti pe'i sei cy. cusku li'u»
ni'o «lu pa mu moi sei la cibmasti cicyractu cu cusku li'u»
ni'o «lu pa xa moi sei la sipsmacu cu jmina li'u»
ni'o «lu ko ciska la'e di'u sei la noltrunau fi lo pairkamni cu cusku li'u» .i lo pairkamni cu sutra ciska lo ci detri lo py. tanbo gi'e sujykanji fi dy. gi'e galfi lo se kanji lo rupnu jo'u fepni
ni'o «lu ko vimcu lo do mapku sei la noltrunau fi la mapypre cu cusku li'u»
ni'o «lu ti na me mi moi sei la mapypre cu cusku li'u»
ni'o «lu zerle'a sei la noltrunau fa'a lo pairkamni cu ki'asku li'u» .i py. zi notci'a lo fatci
ni'o «lu mi ti vecnu sei la mapypre cu jmina ciksi .i mi no ti ponse .i mi mapypre li'u»
ni'o ca ku la noltruni'u co'a dasni lo vistci gi'e co'a ze'a catlu la mapypre noi labybi'o gi'e xanka tarti
ni'o «lu ko dunda lo do datni sei la noltrunau cu cusku .i ko na xanka .i ja mi da do nau catrymi'e li'u»
ni'o la'e di'u na sai simlu lo ka darsygau lo zgana noi za'o slilu fi lo nu sanli fi lo jamfu fa'u lo drata kei gi'e xanka catlu la noltruni'u gi'e se cfipu batyvi'u lo barda spisa lo tcati kabri .e nai lo nanba joi matne
ni'o ca ku la .alis. cu ganse lo cizra noi cfipu .abu co'u lo nu facki lo du'u ma kau fasnu .i .abu ca'o co'a za'u re'u barda banro gi'e pa mai jdice lo nu cliva lo kumfa kei gi'e ku'i re mai jdice lo nu stali ze'a lo nu lo canlu cu banzu
ni'o «lu .au do na tai catke sei la sipsmacu noi zutse lamji .abu cu cusku .i mi ka'e ru'e vasxu li'u»
ni'o «lu mi na ka'e rivbi sei la .alis. cu cumla cusku .i mi ca'o banro li'u»
ni'o «lu .ei do na bu'u banro sei la sipsmacu cu cusku li'u»
ni'o «lu ko na bebna tavla sei la .alis. cu darsyze'a cusku .i ju'o do ji'a ca'o banro li'u»
ni'o «lu go'i .i ku'i mi banro se kai lo ka racli sutra sei la sipsmacu cu cusku .i na tai ckasu go'i li'u» .i sy. tolgei mutce sa'irbi'o gi'e pagre lo kumfa lo drata fanmo
ni'o ze'a la'e di'u la noltruni'u no roi sisti lo nu catlu la mapypre kei gi'e cusku ca lo nu la sipsmacu cu pagre lo kumfa kei fi pa lo nunpai pulji «lu ko bevri lo liste be lo sanga pe lo ro moi ke zgike se tigni li'u» .i la mapypre cu tai desku ja'e lo nu lo re cutci cu nalseldasybi'o
ni'o «lu ko dunda lo do datni sei la noltrunau re re'u fengu cusku .i ja do te catrymi'e gi'u xanka li'u»
ni'o «lu mi pindi doi nolba'i sei la mapypre cu co'a desku voksa cusku .i mi pu zi co'a pinxe lo mi tcati (to zi lo jeftu be li ji'i su'e pa toi) .i lo nanba joi matne ca'o cinlyze'a .i lo tcati cu tergu'i li'u»
ni'o «lu lo mo cu tergu'i sei la noltrunau cu cusku li'u»
ni'o «lu ty. pa moi lo go'i sei la mapypre cu spuda li'u»
ni'o «lu li'a ty. pa moi zo tergu'i sei la noltrunau cu kinli cusku .i xu do jinvi lo du'u mi bebna .i .e'e di'a co'e li'u»
ni'o «lu mi pindi sei la mapypre cu di'a co'e .i so'e da cu tergu'i ba la'e di'u .i ku'i la cibmasti cicyractu cu cusku - li'u»
ni'o «lu mi na go'i sei la cibmasti cicyractu cu sutra zunti li'u»
ni'o «lu do ja'a go'i sei la mapypre cu cusku li'u»
ni'o «lu mi tolxu'a sei la cibmasti cicyractu cu cusku li'u»
ni'o «lu tu tolxu'a sei la noltrunau cu cusku .i ko tolju'i lo di'u pagbu li'u»
ni'o «lu no'i la sipsmacu cu cusku - sei la mapypre cu di'a co'e li'u» .i my. xanka ke sruri catlu te zu'e lo nu zgana lo nu xu kau sy. ji'a tolxu'a .i ku'i sy. tolxu'a no da gi'e carmi sipna
ni'o «lu baku sei la mapypre cu di'a cusku mi za'u re'u katna lo nanba joi matne li'u»
ni'o «lu ku'i la sipsmacu ma cusku sei pa lo pairkamnycmi cu te preti li'u»
ni'o «lu mi na morji sei la mapypre cu cusku li'u»
ni'o «lu .ei do morji sei la noltrunau cu piksku .i ja mi da do catrymi'e li'u»
ni'o la mapypre noi dunku mutce cu falcru lo tcati kabri jo'u lo nanba joi matne gi'e sanli fi pa lo cidni .i «lu mi pindi doi nolba'i sei my. co'a co'e li'u»
ni'o «lu do pindi lo ka tavla certu sei la noltrunau cu cusku li'u»
ni'o ca ku pa lo smacrkobaiu cu geirki'a gi'e ba zi rinju lo nunpai pulji (to zo rinju cu rufsu valsi .i mi ciksi lo nu ta'i ma kau zukte .i py. ponse lo barda ke bukpu dakli noi ka'e ganlo se pi'o lo dasri .i py. lo smacrkobaiu cu setca dy. gi'e zutse toi)
ni'o «lu mi gleki lo nu mi viska la'e di'u sei la .alis. cu pensi .i mi so'i roi tcidu fi lo karni ca lo mo'u nunpai «lu troci lo nu xanvruzau noi ba zi rinju lo nunpai pulji li'u» gi'e pu no roi jimpe lo du'u ma kau smuni li'u»
ni'o «lu .e'a do va'o lo nu la'e di'u cu pi ro si'e lo do se djuno be fi lo cuntu cu nitkla sei la noltrunau cu di'a cusku li'u»
ni'o «lu mi na ka'e klama lo nitmau sei la mapypre cu cusku .i mi cpana lo loldi li'u»
ni'o «lu .e'a va'o la'e di'u do nitytse sei la noltrunau cu spuda li'u»
ni'o ca ku lo drata smacrkobaiu cu geirki'a gi'e rinju
ni'o «lu .a'u mo'u smacrkobaiu sei la .alis. cu pensi .i ca ku mi'a xagmau li'u»
ni'o «lu mi zmanei lo nu mo'u tcati pinxe sei la mapypre cu cusku li'u» .i my. xanka catlu la noltruni'u noi tcidu lo liste be lo sanga
ni'o «lu .e'a klama sei la noltrunau cu cusku li'u» .i la mapypre cu sutra cliva lo kumfa se cau lo nu denpa ji'a sai lo nu dasni lo cutci
ni'o «lu .i je ko lo stedu tu vimcu bu'u lo bartu sei la noltruni'u fi pa lo pulji cu jmina cusku li'u» .i ku'i la mapypre na ka'e se viska pu lo nu lo pulji cu tolcliva lo vorme
ni'o «lu ko klagau lo jersi zgana sei la noltrunau cu cusku li'u»
ni'o lo jersi zgana cu me lo jukpa pe la noltroni'u .i jy. jgari lo cpinytsapi tanxe lo xance .i la .alis. cu smadi lo du'u jy. me ma kau kei pu lo nu jy. klama lo kumfa kei ki'u lo nu ro lo prenu poi jibni lo vorme cu co'a senci
ni'o «lu ko dunda lo do datni sei la noltrunau cu cusku li'u»
ni'o «lu na go'i sei lo jukpa cu cusku li'u»
ni'o la noltrunau cu xanka catlu la blabi ractu noi tolylau voksa cusku «lu .ei lo nolba'i cu kuclanli lo vi zgana li'u»
ni'o «lu .i'a .o'o .i'a sei la noltrunau cu tolgleki li'u» .i ny. ba lo nu kucysimgau lo birka gi'e frumu fa'a lo jukpa co'u lo nu lo ny. kanla cu jibni lo nu na ka'e se viska cu condi voksa cusku «lu ma te zbasu lo rutytisna li'u»
ni'o «lu lo cpinytsapi ra'u sei lo jukpa cu cusku li'u»
ni'o «lu lo satyjisra sei lo sipna voksa noi trixe jy. cu cusku li'u»
ni'o «lu ko selkarlygau la vu sipsmacu sei la noltruni'u cu krixa .i ko lo stedu tu vimcu .i ko tu barklagau lo kumfa .i ko tu se rinju .i ko tu tunta .i ko lo zbikre cu vimcu li'u»
ni'o ze'a lo mentu be li so'o lo kumfa cu kalsa ca'o lo nu la sipsmacu gau barkla .i ca lo nu cnici xruti kei lo jukpa ba'o canci
ni'o «lu na vajni sei la noltrunau cu surla mutce cusku .i ko klagau lo jersi zgana li'u» .i ny. tolylau tonga jmina cusku fi la noltruni'u fe «lu .i'u doi dirba .ei ba'e ''do'' kuclanli lo jersi zgana .i lo nu go'i cu mutce corgau mi lo sedycra li'u»
ni'o la .alis. cu catlu la blabi ractu noi juxre co'e lo liste ku'o gi'e mutce kucli lo du'u lo jersi zgana cu mo kau .i «lu za'o na mutce lo ka datni sei .abu sezysku li'u» .i ko se xanri lo nu spaji fa lo nu la blabi ractu se pi'o lo kinli je cmalu voksa cu bacru tcidu lo cmene po'u zo .alis.
## ni'o ni'o pa re mo'o
### la .alis. cu sabji lo datni
ni'o «lu mi zvati sei la .alis. cu krixa li'u» .i .abu ze'i tolmorji lo du'u .abu ba'o banro lo mo kau barda ze'a lo pu zi mentu be li so'u .i .abu tai sutra plipe ja'e lo nu falgau lo pairkamni tsina se pi'o lo skaci korbi gi'e renro ro lo pairkamnycmi lo stedu be lo cnita prenu .i lo pairkamnycmi cu kalsa preja .i la'e di'u morjygau la .alis. fi lo nu .abu se snuti lo nu falgau lo slofi'e tanxe ca lo purlamjeftu
ni'o «lu .u'u .i .e'o sai ko mi fraxu sei .abu dunku tonga ki'asku li'u» .i .abu co'a crepu lo pairkamnycmi lo loldi se rai lo kamsutra ki'u lo nu lo slofi'e snuti za'o stali lo .abu menli .i .abu tolsatci te sidbo fi lo du'u ga .ei ze'i crepu gi'e punji py. lo pairkamni tsina gi py. ba mrobi'o
ni'o «lu lo nunpai na ka'e di'a fasnu sei la noltrunau cu junri mutce voksa cusku pu lo nu ro lo pairkamnycmi cu xruti lo drani selzva .i ba'e ''ro'' ra sei ny. re re'u basna mutce cusku li'u» .i ny. catlu la .alis. ca lo nu cusku
ni'o la .alis. cu catlu lo pairkamni tsina gi'e viska lo nu .abu pu punji se ja'e lo nu sutra kei lo rebyrespa ja'e lo nu lo ry. stedu cu cnita .i lo se kecti cu sligau lo rebla tai lo nu tolgei kei gi'e na sai ka'e muvdu .i .abu ra bargau gi'e drani punji .i «lu na mutce lo ka vajni sei .abu sezysku .i pe'i lo fatne lo se fatne cu dunli lo ka ma kau prali lo nunpai ce'u li'u»
ni'o lo pairkamni ca lo nu ge py. ba'o ru'e xruti fi lo jenca po'u lo nu se dicra gi ro lo tanbo jo'u ro lo pinsi cu se tolcri gi'e se dunda fi py. cu co'a tolylazni ciska lo lisri be lo fasnu .i go'i fa ro me na'e bo lo rebyrespa noi simlu lo ka dukse lo ka se sfasa kei lo nu zukte lo drata be lo nu kalri moklu zutse gi'e gapru catlu lo drudi be lo kumfa
ni'o «lu do ma djuno lo cuntu sei la noltrunau fi la .alis. cu cusku li'u»
ni'o «lu no da sei la .alis. cu cusku li'u»
ni'o «lu xu no sai da sei la noltrunau cu za'o co'e li'u»
ni'o «lu no sai da sei la .alis. cu cusku li'u»
ni'o «lu la'e di'u cu mutce lo ka vajni sei la noltrunau fa'a lo pairkamni cu cusku li'u» .i py. co'a ciska di'u lo tanbo ca lo nu la blabi ractu cu zunti .i «lu li'a zo tolvajni cu se skudji do doi nolba'i sei ry. sinma mutce tonga cusku li'u» .i ku'i ry. frumu gi'e flira snigau ca lo nu tavla
ni'o «lu li'a mi skudji zo tolvajni sei la noltrunau cu sutra cusku li'u» .i ny. ca'o tolylau sezysku «lu vajni .i tolvajni .i tolvajni .i vajni li'u» tai lo nu cipra lo ka ma kau sance zanrai kei lo valsi
ni'o so'o lo pairkamnycmi cu ciska zo vajni .i so'o drata cu go'i zo tolvajni .i la .alis. ka'e viska ki'u lo nu jibni co banzu lo nu catlu lo py. tanbo .i «lu ku'i na sai vajni sei .abu pensi sezysku li'u»
ni'o ca ku la noltrunau noi pu ze'a zukte ciska fi lo ny. notci cukta cu cusku «lu .ei smaji li'u» gi'e bacru tcidu fi cy. fe «lu lo vo re moi javni zo'u ro prenu poi galtu minli li za'u pa cu bilga lo nu cliva lo kumfa li'u»
ni'o ro da catlu la .alis.
ni'o «lu mi na galtu minli li pa sei la .alis. cu cusku li'u»
ni'o «lu do go'i sei la noltrunau cu cusku li'u»
ni'o «lu go'i li ji'i re sei la noltruni'u cu jmina li'u»
ni'o «lu .i se ju .ai mi na cliva sei la .alis. cu cusku .i ji'a jy. na fadni javni .i do jy. ca zi finti li'u»
ni'o «lu jy. tolcitrai lo javni pe lo cukta sei la noltrunau cu cusku li'u»
ni'o «lu ga nai go'i gi .ei jy. pa moi sei la .alis. cu cusku li'u»
ni'o la noltrunau cu labybi'o gi'e sutra polje lo notci cukta .i «lu ko pensi lo do se paijdi sei la noltrunau fi lo pairkamni cu lauble je desku voksa cusku li'u»
ni'o «lu lo drata datni za'o ba se jarco pe'u doi nolba'i sei la blabi ractu noi sutra plipe cu cusku .i lo vi pelji pu zi se cpacu li'u»
ni'o «lu ma se ciska fi ta sei la noltruni'u cu cusku li'u»
ni'o «lu mi ti za'o na kargau sei la blabi ractu cu cusku .i ku'i ti simlu lo ka xatra fi lo pinfu fe .y. da li'u»
ni'o «lu ju'o go'i sei la noltrunau cu cusku .i jo nai ti xatra lo no da .i ku'i ka'u la'e di'u rirci li'u»
ni'o «lu ma se judri sei pa lo pairkamnycmi cu cusku li'u»
ni'o «lu na sai se judri sei la blabi ractu cu cusku .i je'u no da se ciska fi lo bartu li'u» .i ry. tolplo lo pelji ca lo nu tavla kei gi'e jmina «lu pa'e ti na xatra .i ti pempau selcmi li'u»
ni'o «lu xu lo ciska tarmi cu me lo pinfu moi sei lo drata pairkamnycmi cu te preti li'u»
ni'o «lu na go'i sei la blabi ractu cu cusku .i la'e di'u cu traji lo ka cizra li'u» (to ro lo pairkamnycmi cu simlu lo ka se cfipu toi)
ni'o «lu ja'o py. fukygau ta lo ciska tarmi pe lo drata sei la noltrunau cu cusku li'u» (to ro lo pairkamnycmi cu xruti lo ka cikygei toi)
ni'o «lu pe'u doi nolba'i sei la nolse'u cu cusku mi tu na ciska .i ji'a no da ka'e je'urja'o lo du'u mi ja'a go'i .i no cmene cu zvati lo fanmo be tu li'u»
ni'o «lu lo cuntu cu xlaze'a va'o lo nu do na ciska lo do cmene sei la noltrunau cu cusku .i ba'e ''ju'o'' do zukte fi lo nu palci .i bo do va'o lo nu na go'i cu ja'a pu ciska lo do cmene tai tu'a lo stace li'u»
ni'o kampu fa lo nu xanvruzau la'e di'u noi pa moi co tolbebna selsku la noltrunau ca lo cabdei
ni'o «lu la'e di'u cu je'urja'o lo du'u tu zerzu'e sei la noltruni'u cu cusku li'u»
ni'o «lu la'e di'u cu je'urja'o no da poi simsa sei la .alis. cu cusku .i ua do na djuno ji'a sai lo du'u ma kau se ciska li'u»
ni'o «lu ko tcidu sei la noltrunau cu cusku li'u»
ni'o la blabi ractu co'a dasni lo vistci .i «lu .ei mi go'i co'a ma pe'u doi nolba'i sei ry. retysku li'u»
ni'o «lu co'a lo krasi sei la noltrunau cu junri cusku ko ca'o go'i co'u lo fanmo .i ba bo ko sisti li'u»
ni'o di'e penmi co se tcidu la blabi ractu
.i ti'e do ta vitke ca'a.i do tu tavla mi
.i cu'u ta ge mi preza'agi nai mi limna di
.i cu'u tu mi pu vi sanli(to mi'o djuno toi
.i ga nai ta za za'o lanligi ma do dimna .oi
.i dunda fa mi pa da ta.i go'i re da tu
.i do se xruti lo ro danoi me mi moi za pu
.i ga nai ga mi gi ta iuse cuntu lo vi fasnu
gi ia tu lacri do lo nudo zifre xruti gasnu
.i pe'i do pu lo nu tcinilo nu se fengu ta
cu fanta zunti gi'e jbiniuo tu joi mi joi ra
.i tu na djuno .ei gau kolo du'u ta ru zmanei
.i .ei se mipri mi joi doro drata lo nu ca nei
ni'o «lu la'e di'u cu vajrai lo datni poi se tirna ca lo cabdei sei la noltrunau noi simymosra lo xance cu cusku .i se ki'u bo .ei lo pairkanmi li'o li'u»
ni'o «lu mi va'o lo nu py. di'u ka'e ciksi sei la .alis. cu cusku (to .abu banro lo tai barda ze'a lo pu zi mentu be li so'u ja'e lo nu .abu na sai terpa lo nu zunti ny. toi) cu dunda lo rupnu py. .i ba'e ''mi'' na jinvi lo du'u lo smuni selci ji'a sai cu zvati di'u li'u»
ni'o ro lo pairkamnycmi cu ciska fi lo tanbo fe «lu ba'e ''ta'' na jinvi lo du'u lo smuni selci ji'a sai cu zvati di'u li'u» gi'e nai ku'i troci lo nu ciksi lo pelji
ni'o «lu lo nu no da smuni di'u sei la noltrunau cu cusku cu fanta lo barda raktu ki'u lo nu .ei nai mi'a troci lo nu facki lo smuni .i ku'i ju'o cu'i sei ny. noi ke'a lo pempau cu pejgau lo cidni gi'e catlu se pi'o pa kanla cu di'a cusku .i pe'i mi viska lo smuni .i «lu nai mi limna di li'u» .i ju'i do'u je'u pei do na ka'e limna di sei ny. fa'a la nolse'u cu jmina li'u»
ni'o la nolse'u cu badri desygau lo stedu .i «lu xu mi simlu lo ka ka'e go'i sei ny. cusku li'u» (to ju'o sai ny. noi marji lo jarple cu na simlu toi)
ni'o «lu .i'e sei la noltrunau cu cusku li'u» .i ny. di'a tolylau bacru lo pempau .i «lu «lu (to mi'o djuno toi) li'u» mapti li'a lo pairkamni .i «lu .i dunda fa mi pa da ta .i go'i re da tu li'u» .i ua ju'o la'e di'u nu ta fairgau lo rutytisna li'u»
ni'o «lu ku'i di'a co'e «lu .i do se xruti lo ro da li'u» sei la .alis. cu cusku li'u»
ni'o «lu ua ry. zvati tu sei la noltrunau noi jarco lo rutytisna noi cpana lo jubme cu jinga cusku .i no da ka'e klimau la'e di'u .i ku'i «lu pu lo nu tcini lo nu se fengu ta li'u» .i do no roi fengu doi dirba pe'i je'u pei sei ny. fi la noltruni'u cu cusku li'u»
ni'o «lu no roi sei la noltruni'u cu fengu mutce cusku li'u» .i ny. renro lo xinmo vasru lo rebyrespa ca lo nu tavla .i (to la .bil. uu pu de'a ciska fi lo tanbo lo degji .i mu'i bo dy. na mornygau .i ku'i by. ca zi di'a co'e se pi'o lo xinmo noi carvi lo by. flira ku'o ze'a lo nu xy. renvi toi)
ni'o «lu ja'o lo valsi do na mapti sei la noltrunau cu cusku li'u» .i ny. cisma catlu lo sruri .i morsi smaji
ni'o «lu mi pu vlakei sei la noltrunau cu jgicro tonga jmina li'u» .i ro da cmila
ni'o «lu .e'i lo pairkamni cu pensi lo se paijdi sei la noltrunau ji'i re no re'u lo djedi cu cusku li'u»
ni'o «lu na go'i .i na go'i sei la noltruni'u cu cusku .i lo se sfami'e cu pa moi .i lo se paijdi cu za'u moi li'u»
ni'o «lu bebna je nonselsmu sei la .alis. cu cladu cusku .i io nai .oi pa moi fa lo se sfami'e li'u»
ni'o «lu ko ri'urgau lo do tance sei la noltruni'u noi zirpu binxo cu cusku li'u»
ni'o «lu .ai mi na go'i sei la .alis. cu cusku li'u»
ni'o «lu ko lo stedu tu vimcu sei la noltruni'u cu voksa launrai krixa li'u» .i no da muvdu
ni'o «lu ma do terpa sei la .alis. noi ca ba'o banro lo .abu ta'e barda cu cusku .i ga'i do na'e drata lo bakfu be lo karda li'u»
ni'o ca ku pi ro lo bakfu cu tolfarlu lo vacri gi'e ba bo farlu la .alis. .i .abu milxe krixa ri'a lo nunterpa zu'u .e lo nunfengu zu'u nai gi'e troci lo nu rivbi ky. ta'i lo nu darxi .i .abu facki lo du'u .abu vreta lo rirxe korbi fau lo nu lo stedu cu cpana lo galtupcra be lo mensi noi xendo vimcu lo morsi pezli noi ba'o farlu lo .abu flira lo tricu
ni'o «lu ko cikna doi .alis. doi dirba sei lo mensi cu cusku .i ue do ze'u sipna li'u»
ni'o «lu .u'e mi senva lo tai cizra sei la .alis. cu cusku li'u» .i .abu tavla lo mensi ro lo cizra se lifri poi do ke'a pu zi ca'o tcidu .i lo mensi ca lo nu mo'u go'i cu cinba .abu gi'e cusku «lu je'u ju'o cizra se senva doi dirba .i ku'i ko ca bajra klama tu'a lo tcati .i ca'o lerci binxo li'u» .i la .alis. cu sa'irbi'o gi'e bajra gi'e ca bo pensi lo du'u pa'e lo se senva cu se manci
ni'o ku'i lo mensi cu zutse za'o lo nu .abu cliva kei gi'e vregau lo stedu lo xance gi'e catlu lo nu lo solri cu farlu kei gi'e pensi lo cmalu no'u la .alis. ge'u jo'u ro lo .abu se manci se lifri .i lo mensi ji'a co'a senva sa'e nai .i senva la'e di'e
ni'o pa mai my. senva la .alis. .i lo .abu cmalu xance cu za'u re'u ca'o jgari lo my. cidni .i lo .abu carmi selci'i kanla cu catlu lo me my. moi .i my. ka'e tirna lo satci tonga be fi lo .abu voksa gi'e viska lo cizra nu stedu desku noi se rinju lo kerfa lo nu gacri lo kanla .i ca lo nu my. tirna gi'a simlu lo ka tirna cu jmive binxo ru'u sai my. fa lo cizra tigni be lo se senva be lo my. cmalu mensi
ni'o lo clani srasu cu vruvricypra bu'u lo my. jamfu ca lo nu la blabi ractu cu sutra klama .i la smacu noi terpa cu jacre'o pagre lo jibni la'ucma .i my. tirna lo sance be lo tcati kabri ca lo nu la cibmasti cicyractu cu kansa lo cycy. pendo lo ze'e nu sanmi .i lo cpina voksa be la noltruni'u cu minde fi lo nu lo malselfu'a vitke cu se catra .i lo xarju cifnu cu za'u re'u senci ga'u re'o lo cidni be la noltroni'u ca lo nu lo palta jo'u lo palne cu sruri porpi .i za'u re'u ku lo selkrixa be la cpicinfo lo snamli be lo tanbo pinsi pe lo rebyrespa lo se zunva'u be lo smacrkobaiu zo'u lo ro mei cu se tisna lo vacri gi'e jorne lo darno kaksna be la jitfa cakyrespa noi tolgeitce
ni'o my. za'o zutse (to lo kanla cu ganlo toi) gi'e xadba krici lo du'u my. zvati la selmacygu'e .i ku'i my. djuno lo du'u lo nu kargau ky. cu banzu lo nu ro da binxo lo tolzdi fatci .i lo srasu cu vruvricypra gau lo brife .i lo la'ucma cu se boxna gau lo jauspa .i lo sance be lo tcati kabri cu binxo lo se lanjanbe
ni'o lo cpina se krixa be la noltruni'u cu binxo lo voksa be lo lankurji nanla .i lo nunsenci be lo cifnu lo selkrixa be la cpicinfo ro lo drata ke cizra savru zo'u lo ro mei cu binxo sei my. djuno lo mixre sance be lo zukcfu cange .i lo se cmoni be lo zu bakni cu basti lo tilju kaksna be la jitfa cakyrespa
ni'o ro mai my. se xanri lo nu lo my. cmalu mensi ca lo balvi cu makcu ninmu gi'e ralte ze'a lo makcu nanca lo sampu je prami risna pe lo vercedra gi'e jajgau lo cymy. cmalu panzi gi'e gasnu lo nu lo ba'e ''ri'' kanla cu carmi se cinri so'i cizra lisri jo'u ju'o cu'i ji'a sai lo se senva pe la pu zu selmacygu'e kei gi'e cnikansa ra lo ra sampu se tolgei gi'e se pluka lo ra sampu se gleki gi'e morji lo cymy. verba nunji'e jo'u lo selgei ke crisa djedi
fa'o
|
# gubytrusi'o
ni'o lo gubytrusi'o du le sibyci'e lenu turni lo natmi ci'e lo gubyseltru gi'e le jecta jatna cu catni fi da noi drata lo ka cerda to cafne fa lo nuncuxna toi .i le satci smuni pe zo gubytrusi'o cu cenba fo lo kulnu .a lo citri [na gendra]
|
cidja
ni'o lo .cidja cu du lo marji poi la'a sema'e lo drotabmai .e lo grasu .e lo djacu ku ka'e se citka lo danlu noi cmima lo remna .i lo cidja cu la'a se krasi lo spati .a lo danlu .a lo drata se krasi no'u mu'a lo ledgrute .iku'ibo so'i remna kulnu pu sisku lo cidja zu'e lonu kalte .a lonu jmaji .i piso'a kulnu ca sisku zu'e lonu cange ra'u .a lonu fipkalte .a lo drata gundi |
ni'o cai lisri la nicte cadzu
ni'o sai pa mo'o nu penmi
ni'o pa pi pa mo'o nu cadzu
.i .e'u nai cai la nicte cadzu ba mulno spogau lo se terpa da poi fanva dei lo na logji bangu .i mu'i bo lo nu fanva cu rinka lo nu da poi mi'a mipri ke'a lo bradi be mi'a cu tolmipri binxo .i la'a la'e di'u simlu lo ka mutce cizra vau do .i ku'i do ba jimpe .i di'e krasi le lisri ni'o ni'o la susan cu mutce lerci le nu penmi le mensi be ri .i la susan ze'u na penmi le mensi .i ri'a bo la susan fa'u le mensi cu xabju la kalifornias fa'u la masytcusets .i ku'i ca le cabycte le mensi cu vitke lo tcadu poi sy xabju vau zi'e no'u la san fransiskos zi'e no'u la sanfran .i la susan ca sutra cadzu klama le gusta po le nu penmi
ni'o la susan cu zgana lo cmalu dargu poi jai jdika lo ni cadzu .i ku'i mutce manku gi'e se terpa .i ku'i sy peisku lo glico panra be lu na srana .i lo sluji be fimi cu xamgu .i mi pu tadni lo nu damba ca lo nu mi citno .i mi ka'e kurji mi li'u .i se ki'u bo nergau le cmalu dargu .i sy gasnu co zenba jdari jgari lo kosta mu'i lo nu le dargu canlu cu lenku gi'e ji'a mutce zmadu lo vi drata dargu canlu lo ka lenku .i sy zgana lo nu la'e di'u cu mutce cizra .i se mu'i bo zenba sutra cadzu ni'o sy ze'a cadzu .i le dargu canlu cu manku binxo ri'a lo nu so'o tergu'i cu spofu .i ba bo mulno lo ka manku .i sy terpa la'e di'u .i ku'i mutce lerci .i se ki'u bo ti'a le xance sy klama lo manku .i mutce smaji .i sy tirna lo vasxu se bacru be lo gerku be'o .e nai lo drata
.i ba zi bo sy facki lo du'u lo bitmu cufanmo le dargu .i le bitmu cu rufsu .i se ri'a bo sy cortu le xance.i la susan cu so'i roi mabla bacru .i sy carna filo te cliva be le bitmu pu'o lo nu sy zgana lo nu lo bitmu cu te gusni lo crane lo grusi ni'o se pi'o lo bitmu gusni sy ka'e zgana lo se zvati .i lo cmalu gerku po'o cu zvati le fanmo be le dargu .i le gerku cu catlu sy gi'e sligau lo rebla .i za'a le bitmu cu marji lo staku bliku .i ji'a lo ciblu be lo xance be sy cu cpana
.i .ii .u'e sy pencu le bitmu le xance da .i je da krasi lo boxna be le bitmu sefta .i .u'e sai na sance la'e di'u .i ji'a le ciblu poi cpana le bitmu cu se sakcpu le bitmu .i le sefta be le bitmu cu simlu lo ka se boxna gi'e cenba lo ka skari .i sy cu djica lo nu cliva vau mu'i lo nu lerci .i ku'i tu'a le bitmu cu dukse lo ka cinri je cizra je se terpa .i le gerku cu co'a cladu bacru ni'o spaji fa lo nu lo gusni cu jmaji lo tarmi .i sy ze'a zgana lo tarmi poi ca'o cenba .i ba bo sy suksa jimpe lo du'u le tarmi cu simsa lo .oxtapodi .i le tarmi cu co'u mulno lo ka frica lo sruri .i ji'a .ii cai pa tu'urbirka cu tcena lo ba'e vacri pe fa'a sy .i so'o tu'urbirka cu ba zi ji'a tcena .i re ri muvdu je jgari le gerku .i lo tu'urbirka cu tagji zenba .i ca'o bo le gerku cu cladu cmoni .i ji'a ri binxo co porpi re spisa .i lo ciblu cu se bumru lo ve'i canlu .i pi so'u ciblu cu binxo co cpana la susan .i la'e di'u rinka lo ka sy kakne lo nu bajra .i sy carna lo te cliva be lo tu'urbirka crida ca lo nu lo tu'urbirka co'a lacpu lo gerku spisa fa'a lo barda ke blabi ja'urxe'a poi nenri lo midju be lo crida
ni'o sy bajra se rai lo ka kakne sutra .i ku'i pensi lo si'o krixa .i ba zi bo ji'a sy viska lo zdani claxu remna se pi'o lo bitmu gusni .i ry sipna ni'a lo papri .i sy jgari ry gi'e troci lo nu cikna rinka .i sy krixa lo glico panra be lu .ii ko sanli .i ta jersi .i ko bajra li'u .i ku'i za'a ry na jimpe .i sy krici lo nu ry menli tolcertu .i ku'i sy ka'e tirna lo cilmo ke citka sance .i se mu'i bo jgari ry .i rinka lo nu ry sanli .i sy viska lo nu le crida cu mulno cliva le bitmu gi'e klama lo re remna .i se mu'i bo sy lacpu le zdani claxu .i ku'i ri mutce masno .i sy ca'o troci lo nu sidju ni'o le remna cu farlu .i sy pu'o sidju ca lo nu le crida cu jgari ry .i so'o tu'urbirka cu lacpu ry fa'a le moklu ca'o lo nu lo drata cu lacpu le crida fa'a sy.i ry pu zi co'a krixa .i ku'i ry jibni le moklu .i ca bo sy tirna lo smaji batci sance .i ry mulno ke smaji je toljdari ke'e binxo .i sy boi za'u roi bajra gi'e klaku firy
ni'o pa pi re mo'o nu badgau
.i mutce manku ri'a lo nu le bitmu pu zi co'u te gusni .i se ni'i bo sy na viska lo remna poi sy janli ke'a .i ku'i sy na jai xrani ri .i ri'a bo ra jgari le birka be sy gi'e kurji to ku'i tcetce sutra toi renro sy lo
loldi .i le nanmu to lo voksa cu ju'o mapti lo nanmu toi cusku lo glico panra be lu ko to'e sanli gi'e to'e muvygau .i la'a lo nu do bajra di'a cu mukti lo nu ti jdice lo du'u do zmadu mi lo ka cinri li'u ni'o cusku ri poi se terpa gi'e milxe cfipu sy ba'o so'i fasnu poi sy zgana ne'i lo simlu be tu'a pa mokca .i sy na kakne lo nu xamgu viska .i ku'i krici lo nu zgana la'e di'e
ni'o pu lo nu le toljundi remna cu se daspo to rinka lo cnino ke ciblu bumru toi vau ny celgunta le crida fo lo barda ke xance xumjimcelxa'i lo cizra gusni dacti .i sy pu na djuno lo du'u lo xumjimcelxa'i poi barda simsa ti gi'e srana lo pa xance po'o cu zasti .i ku'i .ue ny ca'a pilno re xance .i lo nu celgunta cu rinka lo mutce cladu .e lo barda ke fagri gusni be ze'o lo jipno .i le crida cu pa re'u bacru .i bacru lo cmoni krixa poi simsa lo se xrani cinfo .i ca zi bo le crida cu sutra klama ny .i sy na'e sai jimpe lo tadji be lo nu lo oxtapodi simsa cu mutce sutra pa'a la'e di'u ne'i nai lo djacu .i ku'i .ii li'a sai le crida cu kakne .i ku'i .u'e le nanmu cu zmadu filo ka sutra .i sy no roi pu viska lo remna poi milxe jibni ny lo ka sutra ni'o ta'o lo ve xumjimcelxa'i ca'o gusni ne'i lo grusi recta be le crida ca lo nu re tu'urbirka cu jibni binxo .i ta'o nai ny cu jgari re barda je kusru dakfu .i ny galtu clani plipe gi'e xa roi katna le crida ca lo nu .u'e sai sy ca'o pa roi ne'i mo'i vasxu .i le crida cu cladu zmadu krixa gi'e troci je snada lo nu jgari pa birka be ny to le birka poi te jgari lo dakfu toi .i .ui ny jgari ze'o lo barda kosta lo sinxa fagri grana gi'e renro ri le moklu be le crida .i ny ca lo nu lo ka cortu cu mukti lo nu na birka jgari cu jgari le moklu .i ki'u bo fanta lo nu le crida cu ze'o sputu lo fagri .i le crida cu tcetce slilu je desku .i lo la'a ciblu be le crida be'o poi grusi cu flecu lo loldi .i le crida cu jgari ny se ri'a no da
ni'o ba za bo le crida cu co'u desku .i ji'a za'u roi manku .i sy tirna lo nu katna .e lo blaci botpi sance .i ku'i na djuno lo rinka .i sy mutce terpa desku .i ba zi bo le nanmu cu jibni klama gi'e friti lo xance .i ku'i lo ni terpa cu fanta lo nu pilno .i se ki'u bo ny dunda lo cmalu botpi gi'e cusku lo glico panra be lu pe'u do ko pinxe ti .i ri rinka lo nu do surla ca'o lo cacra be li so'o .i ji'a ko na terpa lo mukti be mi .i do pu zi viska da poi banzu lo nu do djuno lo du'u mi na nitcu lo xukmi lo nu da'i xairgau do li'u ni'o ti'a ny boi sy viska lo nu le crida cu litki binxo kei gi'e rigni desku .i sy masno cpacu le botpi se pi'o pa desku xance gi'e pinxe .i ny zo'e mo'i lo daski cu punji lo cmalu jadni le xadni .i ny cusku lo glico panra be lu mi pu viska lo nu do troci co sidju lo zdani claxu .i mutce virnu li'u .i sy na cinmo lo ka virnu .i ku'i cinmo mo'a da bai le se pinxe .i ca lo nu ny za'u re'u friti pa xance vau sy jgari
ni'o ba zi bo la susan .e le nanmu cu sanli vi le cfari be le cmalu dargu .i ny friti lo judri karda gi'e cusku lo glico panra be lu ko lebna ti .i do ba djica lo nu tavla da .i ku'i no drata be mi'a ba krici do .i lo nu do troci lo nu fadni zukte ca lo nu do pu'o za'u roi tavla mi cu mutce vajni mi'a .i mi'a troci .a'i sai lo nu badgau lo remna tu'a lo se terpa se djuno li'u ni'o sy cpacu lo karda poi se prina lo glico panra be lu la .deivid.uit. poi cmima la nicte cadzu li'u .e lo fonxa judri po'o .i sy catlu le kanla be la deivid gi'e .a'u cu'i peisku lo glico panra be lu lo ti kanla zo'u vi'a xekri .i mulno se cau lo blabi .i ma rinka li'u .i ku'i sy tavla cusku lo glico panra be lu ki'e do li'u po'o gi'e carna le gusta po lo nu penmi le mensi
ni'o pa pi ci mo'o nu jdice
.i sy ca'a tolcliva le gusta ca lo nu le mensi be sy no'u la keit cu denpa .i ky se fanza .i ku'i ky ba zi tolmorji lo nu fanza vau mu'i lo nu casnu gi'e skicu lo se morji .i sy nelci lo nu penmi ky .i ku'i ca'o cinmo so'u da .i cizra cinmo .i ku'i sy na kakne lo nu mutce terpa la'e de'u .i sy jo'u ky casnu ze'a lo cacra be li ji'i re .i ba bo ky nitcu lo nu cliva vau ki'u lo nu gunka ca lo bavlamdei .i sy lifri lo nu casnu vau pa'a lo senva .i sy prami jgari ky gi'e suksa lifri lo nu bartu le gusta gi'e kansa no da gi'e se sruri lo manku nicte .i ca lo nu sy xruti lo zdani vau sy mutce gleki tu'a lo xukmi poi bandu filo nu terpa ni'o la susan cikna binxo ca lo nu terpa krixa .i va'o lo senva le crida cu ro roi vi jersi sy .i le moklu be sy cu sudga .i sy cortu le stedu .i sy kucli tu'a lo xalka bilma ba'o lo nu morji lo xukmi .i sy sanli mu'i lo nu cpacu lo djacu
ni'o sy mutce djica lo nu to'e krici le nu crida gunta .i ku'i na kakne .i sy frili morji lo tcila be le nu gunta be'o gi'e pe'isku lo glico panra be lu lo nu mi se xanri ro purlamcte lifri cu nibli lo nu mi mulno lo ka fenki .i se ri'a bo mi bai krici no da .i ku'i la'e di'u cu na se plika'e .i se ki'u bo mi na'e pensi le cumki li'u .i sy sisku le karda be la deivid .i bazibo facki .i ku'i na pilno .i sy djica lo nu jimpe lo se pensi je se djica ba'o lo nu pilno .i ku'i na ca jimpe
ni'o sy fonta'a lo jibri prenu lo nu na'e gunka ca le cabdei mu'i lo nu bilma .i sy na nitcu lo nu tcica galfilo voksa .i ki'u bo sy ca'a bilma simlu .i lo jibri prenu cu curmi .i sy troci lo nu za'u roi sipna .i milxe snada .i ba bo sy milxe zenba lo ka xamgu cinmo .i sy pensi lo nu ca'a gunka .i ku'i pe'i na xamgu sidbo .i se ki'u bo sy zbasu lo tcati gi'e ji'a zutse vi lo canko te zu'e lo nu pensi ni'o pa mai sy kucli lo du'u ma kau jei fadni fa lo nu le crida cu gunta lo remna .i sy pensi la'e di'e .i za'a no da to'e se fadni le nu cadzu .i .ua na drani .i le ka mulno manku cu pu na'e se fadni .i ku'i la'a na ku lo crida cu tolcanci ne'i ro manku ke cmalu dargu .i va'o la'e di'u no zukte cu kakne lo nu fanta lo nu ro remna cu djuno tu'a lo crida .i se ni'i bo lo drata cu rinka lo nu lo crida cu tolcanci .i la'a cu'i cunso .i ji'a li'a na rirci .i ni'i bo la deivid simlu lo ka na terpa jo spaji .i da'i lo nu lo crida cu gunta pa roi lo nanca be li pa no no bai lo mutce purci ke dimna selsku to ri .a lo simsa toi cu mukti lo nu mutce xanka .i ku'i pe'i la deivid cu so'i sai roi damba lo crida
ni'o la susan cu denpa lo nu zbasu lo cmalu sanmi gi'e di'a pensi la'e di'e ca'o lo nu citka .i sy ca kucli la deivid .i li'a sai lo cizra to ri ji'a milxe fenki toi remna po'o di'i damba lo crida .i ma mukti .i dy pu badgau sy .i ku'i za'a dy na'e mutce kurji sy .i li'a dy pu bandu so'i remna .i le se tarti be dy cu simsa lo jursa mikce lo ka sidju ro de gi'e ku'i na cinmo kurji .i sy pe'isku lo glico panra xe lu li'a lo nu damba lo crida cu jibri la deivid to'i cmalu nu denpa toi .i .ii dai sai .u'e sai mutce cizra gi'e se terpa li'u ni'o ku'i ji'a la .susan. pe'isku pa'a lu .i ku'i ji'a mutce vajni je banli .i lo remna poi bandu ro drata remna lo crida cu traji lo ka vrude je vajni .i ba'e mi no roi gasnu da poi vajni li'u .i ta'o la susan cu barja ke xalka selfu .i sy di'i sidju lo se selfu .i ku'i na krici lo du'u la'e di'u cu vajni .i sy glico pe'isku pa'a lu .oi mi bilga lo nu pensi lo fenki sidbo be lo xalka bilma se selfu .i la'a so'o ra cu jetnu li'u
ni'o la susan cu suksa sanli gi'e cadzu fa'a lo fonxa .i ca'o bo glico pe'isku pa'a lu .o'o cu'i lo nu mi zukte jdice cu mukti lo nu mi ca zukte li'u .i sy pilno lo judri .i ba zi bo lo na'e slabu voksa jai lojbo bacru lu coi ma do tavla lo krati be la nicte cadzu .i mi sidju do ma li'u
ni'o pa pi vo mo'o nu casnu
.i la susan cu mulno lo ka na jimpe .i se ki'u bo cusku lo glico panra be lu .y. ki'a sai li'u .i le se voksa cu cusku lo glico panra be lu .ue .u'u na drani bangu li'u be'o ce'o lo glico panra be le pu zi jufra .i sy spuda filo panra be lu ki'e do .i mi sisku tu'a la deivid uit li'u .i cmalu denpa .i py cusku pa'a lu la deivid cu nicte gunka .i se ki'u bo ca sipna to'i ji'a cmalu denpa toi .i xu do nitcu lo nu ciksi casnu li'u .i sy cusku pa'a lu go'i li'u ju'e lu je'e .i do djica lo nu ba tavla la deivid gi'i ca tavla lo drata li'u ju'e lu mi denpa tu'a la deivid li'u ju'e lu je'e .i .e'u ko vitke ti'u lo ji'i re no moi cacra li'u .i py dunda lo judri be lo gusta .i ba zi bo mo'u casnu ni'o la susan cu pensi ca'o le djedi .i ba bo sy klama lo gusta .i sy ze'i fakci fila deivid .i la'e di'u cu frili ri'a lo nu dy po'o dasni lo manku lenjo .i sy zutse vi dy gi'e cusku lo glico panra be lu .oi xu lo nu mipri cu sarcu .i mi ca djuno lo jibri be do .i ji'a ma mukti lo nu pilno lo manku lenjo .i la'e di'u na banzu lo nu mipri le flira be do li'u .i dy milxe se fanza gi'e cusku pa'a lu pa mai do ba'e na djuno le jibri be mi .i la'a cu'i do smadi po'o .i re mai le manku lenjo cu bandu ge nai le flira be mi gi ro kanla be mi lo nu xrani .i ci mai lo nu mipri cu bandu lo pendo be mi li'u
ni'o le re mei denpa .i da selfu re ra lo nu ciska lo se djica cidja .i ba zi bo sy cusku pa'a lu .u'u sai mi di'i cusku pu lo nu mi pensi ze'a lo banzu li'u .i dy cusku lu ki'e .y. ma li'u ju'e lu mi'e susan li'u ju'e lu coi susan .i .e'u lo nu do skicu ro se krici be do bei mi cu xamgu cfari li'u ju'e lu vi'o .i do'o se jibri lo nu bandu filo crida .i lo nu do damba cu di'i sarcu to'i cmalu denpa .i sy barda vasxu toi .i ji'a .au sai mi kansa do lo nu bandu li'u .i mu'i la'e di'u lo flira be dy cu milxe fengu binxo .i dy cusku pa'a lu do be'a na djica li'u .i mu'i la'e di'u sy zmadu fengu binxo gi'e cladu cusku pa'a lu do ba'e na zifre lo nu skicu ma kau poi mi djica .i .o'o nai sai do pu zi fengu mi lo nu mi pu skicu lo krici be do .i ku'i do ca mintu gasnu li'u ni'o dy se fanza bacru gi'e cusku pa'a lu mi xenru .i ku'i do na jimpe ro pagbu be le se cpedu be do .i ma mukti le nu cpedu li'u ju'e lu mi no roi gasnu da poi mutce vajni .i ju'o do se jibri lo mutce vajni li'u ju'e lu go'i .i ji'a mutce ckape gi'e se sarcu lo nu cirko so'i da .i xu le zdani claxu remna poi pu morsi binxo ca srana le se cpedu li'u ju'e lu milxe srana .i da'i lo nu mi na djica lo nu bandu lo simsa remna
cu mukti lo nu mi na cpedu .i cirko ma mu'a li'u ju'e lu mu'a mi na kakne lo nu cadzu ca lo donri se cau lo jinme jorne lenjo noi mutce manku gi'e to'e melbi gi'e kajde ro da lo nu mi mutce cizra li'u ni'o sy cmila .i dy cusku pa'a lu ma zdile li'u ju'e lu mi bajra ke xalka selfu .i sa'e nai mi na morji lo detri be lo nu mi me'i re'u viska lo solri li'u ju'e lu .ua .u'i li'a do na mutce terpa lo nu cikna ca'o lo nicte po'o li'u .i dy ze'u smaji zgana sy .i la'e di'u faurtei lo temci poi zmadu lo banzu be lo nu sy mutce xanka binxo .i ji'a sy ganse lo mutce cizra .i simsa lo nu sy pencu lo lenku .e ba bo lo glare .e ba bo lo pecycpina lo ve'e skapi .i sy co'a krici lo du'u dy catlu lo ruxse'i be sy
ni'o dy ze'i de'a viska lo kanla be sy .i ca bo sy kakne lo nu zenba lo ka surla .i ba bo dy di'a viska sy gi'e cusku pa'a lu .i'a sai mi curmi lo nu do troci co binxo lo cmima be la nicte cadzu .i .e'u nai sai lo pruce cu clani je nandu .i ji'a pu lo nu ca'a co'a cilre tu'a mi'a vau do bilga lo nu cilre fila lojban li'u .i la susan poi pu zi co'a gleki simsa cu cusku pa'a lu la lojban mo li'u ju'e lu bangu .i xu do pu'i pilno la internet to'i sy tugni desku lo stedu toi .i xamgu .i ko sisku la lojban se pi'o .i bu li'u ju'e lu .ua nai ma mukti li'u ju'e lu .u'i nai lo crida na kakne lo nu jimpe ja cusku bau la lojban li'u ju'e lu mi ba troci .i to'i cmalu denpa toi .i .y. lo crida cu kakne lo nu tavla xu li'u ju'e lu .u'i lo crida poi do pu viska cu na go'i .i ri cilce ganlu simsa .i se ki'u bo na mutce pensi .i ku'i so'i klesi be lo crida cu zasti .i ji'a so'o ri cu tcetce mencre li'u ni'o la deivid cusku pa'a lu ta'o nai do zifre lo nu tavla lo drata ke lojbo prenu .i ku'i .e'u nai lo nu da'i do cusku tu'a la nicte cadzu ra cu krinu lo nu da'i do ba no roi tavla la nicte cadzu .i xu do jimpe li'u ju'e lu go'i li'u ju'e lu xamgu .i ji'a do nitcu lo nu jimpe di'e .i la nicte cadzu cu nitcu tu'a so'i jibri .i lo nu crida kalte cu pa fi'u so'i mei pagbu po'o .i ku'i .e'u nai sai lo nu do crida kalte binxo cu rinka lo nu do joi pa crida ba se fatri lo ruxse'i be do .e lo menli be do .i la nicte cadzu cu ro roi se sidju lo crida poi jamna lo crida poi simsa le crida poi troci lo nu catra do .i lo nu crida kalte cu na frili li'u
ni'o la susan simlu lo ka terpa .i ku'i cusku pa'a lu mi kakne lo nu troci po'o li'u .i za'a la deivid gleki la'e di'u .i ca zi bo lo cidja cu tolcliva .i sy jo'u dy citka gi'e casnu lo na mutce vajni .i sy co'a nelci dy ca'o lo nu sanmi .i sy kucli lo nu pendo binxo .a'o
ni'o pa pi mu mo'o nu cilre
ni'o pa pi mu mo'o nu cilre
.i dei skicu lo skami seltcana nu casnu ve cu'u la'o zoi #lojban zoi po la irk .i la'a cizra simsa .i la susan pilno la irk di'i so'a djedi .i ku'i jarco lo cinri casnu po'o .i ji'a vimcu so'o selsku le dei vreji mu'i lo nu na cinri gi'a na srana
<
susan
>
coi
<taliesin> coi susan do mo
<susan> yyy troci lo cilre lojban i y tavla lojban po'o pe'u
<taliesin> mi djisku lu troci lo nu cilre la lojban li'u
<susan> ki'e do
<taliesin> xu do djica lo nu mi cusku fido bau la lojban po'o
<susan> y denba
<susan> tugni
<taliesin> .u'i ru'e stidi zo go'e poi simsa zo go'i
<susan> ki'e .i yyy mi pensi jimpe
<taliesin> stidi lu pe'i mi jimpe li'u
<susan> oi nandu
<broca> coi ro do
<taliesin> coi broca do mo
<broca> mi pu zi tcidu lo cukta poi skicu lo gerna be la gliban .i mutce cinri .i ku'i nandu
<susan> .ii .oi ro'e sai
<broca> coi susan .i do terpa ma
<taliesin> la susan pu spuda lo nu mi'o cusku fisy bau la lojban po'o .i ku'i cnino cilre
<broca> .ua .io sai doi susan xu do terpa lo mi barda jufra
<susan> .oi mi na jimpe .i mi cortu lo stedu .i co'o
<taliesin> co'o
```
<broca> co'o ni'o balvi lo jeftu be li ji'i pa <susan> coi ro do <susan> xu do tirna <susan> coi norsmu <norsmu> la pu makfa da'i <norsmu> re'i la susan <susan> y makfa ki'a #lojban> ny: mo'a milxe cadzu <susan> yyy ki'a sai <norsmu> coi mi <susan> y ma mukti cu do rinsa do <susan> la norsmu xu do tirna mi <norsmu> mi bredi <susan> .ua nai du bredi ma <norsmu> doi co'e <broca> coi susan .i xu do djuno lo du'u la norsmu cu zmiku gi'e nai remna <susan> .oi sai .i mi na djuno .i mi ca tatpi .i co'o ro do ni'o balvi lo jeftu be li ji'i ci <susan> coi ro do <broca> coi susan do mo <taliesin> coi susan <susan> mi sai tatpi .i mi pu clani gunka <taliesin> .e'u mi mutce tatpi <broca> zo sai cu se lidne lo valsi poi ra srana .i ji'a ko pilno lo re moi te bridi be zo tatpi <xod> coi ro do <broca> coi xod do mo <xod> mi xebni la buc <broca> xu lo cnino mukti cu zasti <susan> je'e .i xu lu mi tatpi sai lo nu mi clani gunka li'u <xod> go'i .i la buc pu zi sfasa lo to'e gunka poi pante la ual mart <xod> doi sy mi stidi zo ze'u .o nai zo za'o .e nai bo zo clani <susan> ki'e xod .i xu lu mi mutce tatpi lo nu za'o gunka li'u cu drani <xod> go'i <susan> la buc ki'a <xod> la buc cu nolraitru lo merko gugde <susan> y lo merko gugde na nolraitru ponse mi pe'i <xod> zo mi na sarcu .i zo pe'i ro roi srana do <xod> la buc na je'u nolraitru .i ku'i tarti simsa lo nolraitru <susan> .u'i <taliesin> doi susan lo nu ciksi la lojban do bau la lojban cu nandu .i ma mukti lo nu do djica le go'i <susan> .oi sai le mi stedu cu cortu <susan> mutce pluja <taliesin> .u'i sai mi pu xusra <susan> y .ua mi jimpe .u'i <susan> mi djica lo nu sutra cilre la lojban <taliesin> ma mukti <susan> mi djuno lo prenu nelci la lojban <taliesin> mi stidi zo poi .i lu la lojban li'u cu pu srana lo ci moi se bridi be zo djuno .i li'a sai do na djica <taliesin> ma cmene le prenu <susan> .oi mi sipna nitcu .i co'o
```
```
ni'o balvi lo masti be li ji'i pa <susan> coi ro do .i do mo <dir> coi susan <norsmu> fenki mo <susan> .oi mi na nelci la norsmu <dir> ma krinu <norsmu> ba ca'o brode <susan> ri pu cfipu mi .i xu do nelci la norsmu <dir> .u'i go'i <norsmu> mi .i xu melbi <susan> ma mukti <dir> mi finti la norsmu <susan> .u'u mi y xenru lo nu mi mabla <dir> na nabmi .i la norsmu cu ja'a cfipu .i ny na troci lo nu cusku lo se kakne se jimpe <norpan> .i ku'i lo nu troci co jimpe ny cu la'a mutce sidju lo nu cilre <susan> .ue coi norpan do pu no roi tavla <susan> doi norpan xu do tirna <taliesin> ko pilno zo jundi .e nai zo tirna <susan> coi tal .i ma krinu <taliesin> xu do tirna lo selsku be la irk se pi'o lo kerlo be do <susan> na go'i <taliesin> la'e di'u krinu <susan> je'e mi jimpe <taliesin> .u'i xu do di'i nitcu lo nu ciksi fido fe lo nu do jimpe <susan> y ki'a <taliesin> zo je'e lidne lo cmene be lo te cusku poi do djica lo nu djuno lo du'u do jimpe .i do pu cusku lu je'e mi li'u <susan> yyyy mi krici jimpe .i ku'i le stedu be mi ca cortu .i co'o ro do <taliesin> co'o susan ni'o balvi lo masti be li ji'i re <susan> coi ro do <susan> do mo <broca> coi susan mi tadni <susan> do tadni ma <broca> lo citri .i mi cuxna lo citri xe ctuca poi ne sarcu <susan> .a'u ru'e citri ma <broca> lo mutce purci misro .i mi bilga lo nu tadni so'o xe ctuca poi na srana lo ralju se tadni be mi .i ji'a mi ro roi cinri lo pu zu misro <susan> je'e .i do ralju tadni ma <broca> lo bangu saske <susan> .u'i .i se ni'i bo mi na jimpe lo du'u ma kau mukti lo nu do tadni la lojban .i je'u nai zo'o <broca> .u'i mi tadni la lojban te zu'e lo nu fanza lo ctuca be mi <susan> .u'i sai mi ji'a stidi lo nu do di'i xusra lo si'o tu'a la sapir.uorf cu prane <broca> .u'i <susan> .i ji'a sai ki'u lo nu da'i la'e di'u na banzu cu stidi fa mi di'e .i do xusra lo nu do finti lo samselpla poi prane jimpe la gliban gi'e djica lo nu sy gubni binxo se pi'o la .ueb. gi'e ku'i do pu'o nelci lo tarmi be lo te pruce <broca> .u'i sai <taliesin> .u'i sai ta'o la'e lu tarci bu li'u cu sinxa lo sinvi selsku ve cu'u la .irk. <taliesin> doi susan do certu la lojban <susan> ki'e sai tal .i mi mutce gunka *broca* .i ji'a do bredi
```
*susan* yy mi bredi ma
*broca* da poi rinka lo nu do cilre la lojban .i .a'o xamgu funca
*susan* y ki'e .i co'o broca
*broca* xamgu lo nu do na spuda .i co'o susan
ni'o pa pi xa mo'o nu cfari
.i la susan ba zi lo ro moi skami nu casnu poi pu zi jarco cu pilno lo fonxa judri be la nicte cadzu .i ko'a spuda lo fonxa lu coi ma do tavla lo krati be la nicte cadzu .i mi sidju do ma li'u .i sy cusku lu .u'u ko zi denpa .i mi so'u roi pu bacru tavla la lojban .i yyy la susan lo nu vitke do'o li'u ju'e lu .ua coi susan .ui sai mi pu cilre so'i xamgu do .i sa'e do sutra cilre fila lojban li'u ju'e lu y ga'i nai .u'u ku'i mi ca'o masno li'u ju'e lu ju'o do ba zi sutra tavla .i xu lo bavlamdjedi cu xamgu do li'u ju'e lu mutce xamgu li'u ni'o ji'a ko'a cusku lu xu do jimpe lo du'u lo nu do vitke mi'a cu cumki rinka lo nu do mrobi'o li'u ju'e lu y mrobi'o ki'a li'u ju'e lu morsi binxo li'u ju'e lu mi jimpe li'u ju'e lu .i ji'a lo nu do xrani mi'o cu ju'o rinka lo nu do mrobi'o li'u ju'e lu mi jimpe li'u ju'e lu xamgu li'u
ni'o ko'a dunda lo judri .e lo tcika sy gi'e nu casnu kei sisti .i la susan djuno lo du'u lo cnino pagbu be lo za'i jmive cu ca cfari .i sy gleki gi'e ji'a tcetce xanka |
la snime blabi
sei misno ke dotco lisri
sei lo no'u lai. grim. bruna cu jajgau finti
sei la selpa'i cu fanva
lo notruni'u
ni'o pu zu ku ca lo dunra midju fau lo nu lo snime tai tu'a lo pimlu cu carvi fi lo tsani kei lo noltruni'u cu zutse ne'a lo canko noi se korbi lo xekri mudri ku'o gi'e fenso .i lo noltruni'u fau lo nu fenso gi'e zgana lo snime nu carvi cu rakygau lo jesni lo degji .i je ci dirgo be lo ciblu cu farlu lo snime .i mu'i lo nu lo xunre be ne'i lo blabi snime cu tai melbi kei ny pensi «lu .au sai mi se panzi da poi blabi du'i tu'a lo snime zi'e poi xunre du'i tu'a lo ciblu zi'e poi xekri du'i tu'a lo mudri korbi li'u» .i ba za lo no'e clani ny se tixnu .i ty blabi du'i tu'a lo snime gi'e xunre du'i tu'a lo ciblu gi'e xekri du'i tu'a lo mudri korbi .i se ki'u bo se cmene «lu snime blabi li'u» .i ca lo nu ba'o jbena kei lo noltruni'u cu mrobi'o
ni'o ba za lo nanca lo noltrunau co'a speni lo drata .i melbi ninmu gi'e ku'i ge jgira gi tolcumla vau gi'e na curmi lo da'i nu da ny zmadu lo ni melbi .i ny ponse lo se manci minra .i ca ro nu ny cu sanli ca'u lo minra gi'e sezycta kei ny cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do mlerai lo se gugde li'u»
.i ba bo ny se mansa ki'u lo du'u djuno lo du'u lo minra cu cusku lo jetnu
ni'o ku'i la snime blabi cu banro gi'e zenba ca ro djedi lo ni melbi .i ca lo nu nanca li ze cu melbi du'i tu'a lo klina donri gi'e ji'a mlemau lo noltruni'u .i ca lo djedi ca lo nu ny cu za'u re'u retsku fi lo minra fe «lu doi minra doi minra ne bu'u lo bitmu ma mlerai lo ro se gugde li'u» kei lo minra cu spusku «lu doi ga'i nai noltruni'u do vi mlerai .i ku'i la snime blabi cu mlemau do fo lo pilji be li ki'o li'u» .i ca ku lo noltruni'u cu se spaji mutce gi'e binxo lo pelxu joi crino ri'a lo nu jilra .i co'a ku ca ro nu viska la snime blabi kei lo risna be ny cu carna .i la'e di'u jai du'i xebni la snime blabi fai ny .i lo ni jilra gi'e tolcumla cu se zenba tai lo cicyspa nu malba'o ne'i lo risna .i malba'o .i malba'o .i se ri'a bo ny na za'o surla kakne ca ga lo donri gi lo nicte .i lo noltruni'u cu klacpe lo kalte gi'e cusku «lu ko gidva la snime blabi lo ricfoi .i mi na djica lo nu za'u re'u viska .i .e'o ko catra by gi'e bevri fi mi fe lo by. fepri .e lo by. livga fi'o se sinxa lo du'u by. je'a morsi li'u» .i lo kalte cu tinbe gi'e gidva la snime blabi lo bartu .i ca lo nu ba'o cpacu lo mirli catra dakfu gi'e pu'o rakygau fi lo zernalfu'e risna be la snime blabi kei by co'a klaku gi'e cusku «lu pe'u xendo kalte .i ko curmi lo nu mi jmive .i mi ba bajykla lo cilce ricfoi gi'e ze'e na xruti li'u» .i mu'i lo nu by tai melbi kei lo kalte cu kecti by gi'e cusku «lu ko bajra doi malselfu'a verba li'u» .i «lu lo cilce danlu ba zi ba'o citka do —sei lo kalte cu pensi li'u» .i ku'i to'e ki'u nai cinmo lo ka co'u dunku kei ki'u lo du'u na bilga lo nu catra
la snime blabi cu pagre lo ricfoi
ni'o lo kalte ca lo nu lo xarju panzi cu jbikla cu daktuncatra gi'e lebna lo fepri .e lo livga gi'e bevri fi'o sinxa ku fi lo noltruni'u .i lo jukpa cu .ei silnyjau jukpa xai .i lo palci ninmu cu citka gi'e birti lo du'u ba'o citka lo fepri .e lo livga vu'o pe la snime blabi
ni'o lo uu verba bu'u lo barda ricfoi cu mulno nonkansa gi'e terpa mutce ja'e lo nu catlu ro lo pezli be lo tricu gi'e na djuno lo du'u .ei ta'i ma kau sezdju .i co'a bajra gi'e bajra lo kinli rokci gi'e pagre lo rulkinli foldi .i je lo cilce danlu cu mo'i ne'a plipe gi'e ku'i na gunta .i la snime blabi cu bajra co'u lo nu na za'o kakne .e lo nu co'a vanci .i ca ku viska lo cmalu zdani gi'e nerkla te zu'e lo nu sipna .i ne'i lo zdani ro da cmalu .i ku'i tai cmalu je ralci se ki'u lo nu nandu fa lo nu skicu .i bu'u sanli fa lo blabi se bregau cmajubme noi te punji ze cmalu palta ne to'e se cau ze ralci smuci .e ze cmalu dakfu .e ze cmalu forca .e ze cmalu kabri .i re'o lo bitmu ze cmalu ckana cu linji se punji gi'e se gacri lo snime blabi boxfo .i la snime blabi mu'i lo nu tai xagji je taske cu citka pi lo cpana be ro lo palta be'o no'u lo stagi joi lo nanba gi'e pinxe pa dirgo ne ro lo kabri .i mu'i bo na djica lo nu xaksu ro da pe su'o lo torcrida .i ba ku mu'i lo nu tatpi cu cpana lo ckana .i ku'i no lo cpana cu mapti .i pa boi cy cu cladu'e .i pa boi cy cu tordu'e .i uo lo ze moi cu mapti .i stali lo ckana gi'e zausku la cevni gi'e co'a sipna
ni'o ca lo nu ba'o manku binxo kei cu xruti fa lo xabju be lo zdani be'o no'u lo ze torcrida noi bu'u lo cmana cu kakpa sisku lo kunra .i ty cikygau lo ty. cmalu te gusni .i je co'a lo nu tolmanku cu viska lo nu da pu zvati lo nenri kei ki'u lo du'u na ku ro de stali lo pu te punji .i lo pa moi cu cusku «lu ma pu zutse lo mi stizu li'u» .i lo re moi cu cusku «lu ma pu citka pi lo cpana be lo mi palta li'u» .i lo ci moi cu cusku «lu ma vimcu fi lo mi nanba li'u» .i lo vo moi cu cusku «lu ma citka pi lo mi stagi li'u» .i lo mu moi cu cusku «lu ma tungau se pi'o lo mi forca li'u» .i lo xa moi cu cusku «lu ma ka'argau se pi'o lo mi dakfu li'u» .i lo ze moi cu cusku «lu ma pinxe fi lo mi kabri li'u» .i ba ku lo pa moi cu sisycta gi'e viska lo nu da cmalu punli lo vo'a ckana .i je cusku «lu ma stapa lo mi ckana li'u» .i lo drata cu jbikla gi'e lausku «lu lo me mi moi ku ji'a pu se cpana da li'u» .i ku'i lo ze moi ca lo nu catlu lo ri ckana cu viska la snime blabi ku noi cpana gi'e sipna .i lo ze moi cu klacpe lo drata noi jbikla gi'e krixa ri'a lo nu se spaji kei gi'e cpacu lo vo'e te gusni gi'e selgusygau la snime blabi .i «lu ua .u'e sai .u'e sai —sei lo torcrida cu krixa— ta mutce lo ka ba'e melbi li'u» .i lo torcrida tai gleki se mu'i lo nu cikygau na gi'e sipna stodi curmi .i ku'i lo ze moi torcrida cu sipna bu'u lo ri pendo ze'a lo cacra .i tai ku lo nicte cu mulno
lo torcrida
ni'o ca lo cerni la snime blabi cu co'a cikna gi'e viska lo ze torcrida gi'e se spaji .i ku'i ty xendo gi'e retsku «lu ma cmene do li'u» .i «lu mi se cmene «lu snime blabi li'u» —sei by spusku li'u» .i «lu ta'i ma nerkla lo mi'a zdani —sei lo torcrida cu di'a retsku li'u» .i la snime blabi cu skicu lo nu ge lo mamta pu catra djica gi ku'i lo kalte cu zandu'a lo nunjmive kei .e lo nu ba ku bajra ze'a pi ro lo djedi co'u lo nu facki fi lo zdani .i lo torcrida cu cusku «lu lo nu do djica lo nu nicygau lo zdani srana gi'e jukpa gi'e lumci gi'e fenso cu te curmi lo nu do stali mi'a gi'e ja'e bo claxu no da li'u» .i «lu .i'a —sei la snime blabi cu cusku— mi djica li'u» .i je stali .i by se va'u lo torcrida cu nicygau lo zdani .i sa'u nai ca lo cerni lo torcrida cu cliva se ka'a lo cmana gi'e sisku lo kunra .e lo solji .i ca lo vanci cu xruti .i ca ku .ei lo sanmi cu ba'o se bregau .i ku'i ca'o lo donri lo nixli cu nonkansa .i se mu'i bo lo xendo torcrida cu jai kajde gi'e cusku «lu ko capyju'i lo mamta be do .i my ba zi djuno lo du'u do ti zvati .i ko na curmi lo nu da nerkla li'u» .i ku'i lo noltruni'u ba lo nu citka lo fepri .e lo livga vu'o noi ny krici fi ke'a fe lo du'u pagbu la snime blabi cu jinvi lo du'u di'a ku pa moi lo melbi gi'e mlerai .i je klama lo minra gi'e cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i la snime blabi ku ne ti'a lo cmana
zi'e ne bu'u lo ze torcrida
cu mlemau fo lo pilji be li ki'o li'u»
ni'o ca ku lo noltruni'u cu se spaji ki'u lo nu ny cu djuno lo du'u lo minra na cusku lo to'e jetnu .i je ny co'a sanji lo du'u ge lo kalte ny tcica gi la snime blabi cu za'o jmive .i ny cu za'u re'u pensi lo nu ta'i ma kau catra kei mu'i lo nu co'u lo nu ca'a mlerai lo ro selgu'e cu na'e ke surla kakne ri'a lo nu jilra .i ca lo nu ba'o platu cu skagau lo flira gi'e dasni lo se dasni be lo te zarci gi'e tai binxo lo se sanji jai nandu .i tai ku klama fo lo ze cmana fe lo ze torcrida gi'e snadarxi lo vorme gi'e lausku «lu lo xamgu ve pleji cu se friti li'u» .i la snime blabi cu catlu pa'o lo canko gi'e lausku «lu coi di'ai xendo ninmu do ma vecnu li'u» .i ny spusku «lu lo xamgu joi lo melbi vu'o no'u lo jongausko poi skari ro da li'u» gi'e lebna fi lo dakli fe pa boi jy poi se jivbu fi lo silka .i «lu lo stace ninmu zo'u .e'a .ei nai mi nerkla curmi li'u» se pensi la snime blabi ku noi kargau lo vorme gi'e te vecnu lo melbi jongausko .i «lu doi verba —sei lo tolci'o cu cusku— do se jvinu ma .u'e pau nai .i .au mi nicygau do se pi'o lo skori li'u» .i la snime blabi na kanpe lo xlali gi'e co'a sanli ne'a lo ninmu gi'e curmi lo nu ny cu srugau lo skori .i je ku'i lo tolci'o cu sutra je tagji srugau ri'a lo nu la snime blabi co'u vasxu kakne gi'e morsi farlu lo loldi .i «lu ca ku do ba'o mlerai li'u» zo'u cusku gi'e sutra lo nu cliva
ni'o ba na'e zu ku ca lo vanci lo ze torcrida cu xruti lo zdani gi'e mutce lo ka se spaji kei ca lo nu viska lo nu la snime blabi cu cpana lo loldi gi'e na muvdu fi'o selmlu lo ka morsi .i lo torcrida cu lafti .i ty viska lo nu dukse lo ka tagji se srugau .i se ki'u bo ka'argau fi lo skori .i ca ku la snime blabi cu co'a linto vasxu gi'e masno binxo lo di'a jmive .i lo torcrida ca lo nu se jungau fi lo du'u ma kau pu fasnu cu cusku «lu lo tolci'o te zarci cu du no na'e bo lo cevycau noltruni'u .i ko na curmi lo nu da nerkla ca lo nu mi'a na zvati do li'u»
lo ninmu cu vitke
la snime blabi cu pa re'u morsi
ni'o ku'i lo palci ninmu ca lo nu ba'o tolcliva lo ri zdani cu klama lo minra gi'e retsku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i la snime blabi ku ne ti'a lo cmana
zi'e ne bu'u lo ze torcrida
cu mlemau fo lo pilji be li ki'o li'u»
ni'o lo noltruni'u ca lo nu tirna la'e di'u cu jenca se spaji se ri'a lo nu lo ciblu cu muvdu lo risna .i ki'u bo je'a sanji lo du'u la snime blabi cu ba'o di'a jmive .i «lu ca ku .ai —sei ny cusku— mi platu lo prane te catra li'u» .i je ny zbasu lo vindu komcu gi'e ba bo co'a se ticta'u ja'e lo nu simlu lo ka drata ninmu .i tai ku klama fo lo ze cmana fe lo ze torcrida gi'e darxi lo vorme gi'e lausku «lu lo xamgu cu selve'u li'u» .i la snime blabi cu catlu lo bartu gi'e cusku «lu ko di'a klama .i .ei mi na curmi lo nu da nerkla li'u» .i «lu ju'o lo nu do catlu po'o cu se curmi li'u» zo'u lo tolci'o cu cusku gi'e cpacu lo vindu komcu gi'e jarco lafti .i ky mutce lo ka se nelci la snime blabi kei ja'e lo nu by kargau lo vorme .i ca lo nu ba'o terve'u kei lo tolci'o cu cusku «lu ca ku .ai mi krefu nicygau do li'u» .i la uu snime blabi cu pensi no da gi'e curmi tu'a lo tolci'o .i ku'i ca lo nu lo komcu co'i pencu lo kerfa kei lo vindu cu jai rinka lo nu lo nixli cu tolsanji farlu lo loldi .i «lu do noi prane lo ka melbi —sei lo palci ninmu cu cusku— .i ca ku do se fanmo li'u» .i je cliva .i ku'i ui na ru'e vanci .i ja'e bo ba zi ku lo ze torcrida cu xruti lo zdani .i ty ca lo nu viska lo nu la snime blabi cu cpana lo loldi cu temsepcau sruma tu'a lo noltuni'u gi'e sisku gi'e tolcri lo vindu komcu .i zi ca lo nu ba'o vimcu lo komcu lo kerfa cu di'a sanji fa la snime blabi ku noi cusku lo se du'u ma kau fasnu .i lo ze torcrida cu za'u re'u kajde cusku fi ny fe lo se du'u .ei capyju'i gi'e na curmi lo nu da nerkla .i lo noltruni'u bu'u lo ri zdani cu co'a sanli ca'u lo minra gi'e cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i la snime blabi ku ne ti'a lo cmana
zi'e ne bu'u lo ze torcrida
cu mlemau fo lo pilji be li ki'o li'u»
ni'o lo noltruni'u ca lo nu tirna la'e di'u cu desku ri'a lo nu fengu .i «lu .ai la snime blabi cu mrobi'o —sei ny krixa— .i ju lo mi nunjmive cu jdima li'u» .i ba bo klama lo se mipri je sepli kumfa noi no drata ke'a klama ku'o gi'e zbasu lo vindu plise .i lo sefta cu melbi co skari lo blabi joi ke xunre barna .i je ge ro da poi viska py cu ctidji gi ku'i lo ca'a citka be py cu mrobi'o .i lo noltruni'u ca lo nu lo plise cu bredi cu skari cnegau lo flira gi'e binxo lo simlu be lo ka te cange ninmu kei gi'e tai klama fo lo ze cmana fe lo ze torcrida .i vorme darxi .i la snime blabi cu muvgau lo ri stedu pa'o lo canko gi'e cusku «lu mi na jai se curmi fai lo nu nerklacru da .i lo ze torcrida cu tolcru li'u» .i «lu .i'a —sei lo te cange ninmu cu spusku— .i ro lo mi plise zo'u mi ba cirko snada .i .au pa boi py cu se dunda mi do li'u» .i «lu .e'a nai —sei la snime blabi cu cusku— .i mi na jai se curmi fai lo nu fitytu'i da li'u» .i «lu xu do terpa tu'a lo vindu —sei lo tolci'o cu cusku— .i za'a dai mi jai katna lo plise lo re mei .i do citka lo xunre xadba .i je mi citka lo blabi li'u» .i ku'i lo plise cu rutni se zbasu ja'e lo nu no na'e bo lo xunre xadba cu selpau lo vindu .i la snime blabi cu se xlura fo lo plise .i ny ca lo nu viska lo nu lo te cange ninmu cu citka cu na za'o rivbi kakne gi'e kupygau lo xance gi'e lebna lo vindu xadba .i ku'i ny ba zi lo nu pa te batfendi cu nenri lo moklu cu morsi farlu lo loldi
la snime blabi cu morsi
ni'o lo noltruni'u cu palci catlu la snime blabi gi'e cladu cmila gi'e cusku «lu blabi du'i tu'a lo snime gi'e xunre du'i tu'a lo ciblu gi'e xekri du'i tu'a lo mudri .i ca ku lo torcrida na kakne lo nu refmivgau do li'u» .i ca lo nu ny. bu'u lo ri zdani cu retsku fi lo minra fe
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do mlerai lo ro se gugde li'u»
.i se ja'e ku lo risna be ny cu surla fi'o se kuspe lo ni lo'e jilra risna cu surla kakne
ni'o lo torcrida ca lo nu xruti ca lo vanci cu tolcri la snime blabi ku noi cpana lo loldi zi'e noi vasxu na gi'e morsi .i lafti by gi'e sisku lo vindu fau lo nu luzgau lo se dasni skori kei .e lo nu kompli fi tu'a lo kerfa kei .e lo nu lumci by fo lo djacu .e lo vanju .i ku'i ro lo se zukte na sidju .i lo xendo verba cu morsi gi'e stodi lo ka morsi .i lo torcrida cu punji by lo mrota'o gi'e stizu sruri gi'e klaku fi tu'a by gi'e klaku ze'a lo djedi be li ci .i ba ku djica lo nu derse'a .i ku'i za'o simlu lo ka vifne dunli lo jmive remna kei gi'e za'o se molmla lo melbi xunre .i lo torcrida cu cusku «lu .e'a nai mi'a setca fi lo xekri dertu li'u» gi'e gasnu lo nu lo klina ke blaci mrovau cu se zbasu kei mu'i lo nu ka'e se viska fi'o te jvinu ro mlana kei gi'e setca fi lo nenri gi'e ciska fi lo mrovau fi'o lerfu lo solji fe lo cmene .e lo se du'u tixnu lo noltrunau .i ba bo punji lo mrovau lo cmana .i pa lo torcrida cu ro roi stali gi'e bandu zgana .i lo danlu ji'a cu klama gi'e klaku fi tu'a la snime blabi .i pa mai lo cipnrstrigi .i re mai lo cipnrkorvo .i ro mai lo cipnrkolumbi
ni'o la snime blabi cu ze'u sai vreta bu'u lo nenri be lo mrovau gi'e na fusra gi'e ja'a simlu lo ka sipna .i ki'u bo za'o blabi du'i tu'a lo snime gi'e xunre du'i tu'a lo ciblu gi'e se ke xekri kerfa du'i tu'a lo mudri .i ku'i fasnu fa lo nu pa noltrunau bersa cu binxo lo ka ricfoi zvati kei gi'e klama lo torcrida zdani te zu'e lo nu sipna ze'a lo nicte .i viska bu'u lo cmana lo mrovau .e la snime blabi ku noi melbi ku'o gi'e tcidu lo se ciska be fi'o lerfu lo solji .i cusku fi lo torcrida fe «lu .e'o ko curmi lo nu mi cpacu lo mrovau .i .au mi pleji fi do fe lo jai se djica be do li'u» .i lo torcrida cu spusku «lu lo nu da'i do pleji lo ro solji pe lo munje cu na banzu lo mi mi'a vecnu li'u» .i lo noltrunau bersa cu cusku «lu va'o ku ko fi mi zandu'a .i ki'u bo mi na kakne lo nu jmive se cau lo nu viska la snime blabi .i mi ba sinma gi'e kurji vau tai tu'a lo selnei traji li'u» .i ca lo nu cusku la'e di'u kei lo torcrida cu cinmo lo ka kecti kei gi'e dunda lo mrovau .i lo noltrunau bersa cu gasnu lo nu lo ri selfu cu bevri fi'o se cpana lo janco .i ca fasnu fa lo nu tapflifa'u lo dzitricu .i se ri'a bo lo plise spisa noi pu se batfendi la snime blabi cu muvdu lo bartu be lo galxe .i ba za lo na'e clani la snime blabi cu kargau lo kanla gi'e lafti lo gacri be lo mrovau gi'e tsebi'o gi'e di'a jmive .i «lu ua nai mi ma zvati li'u» se lausku by .i lo noltrunau bersa fau lo nu gleki mutce cu cusku «lu do mi zvati li'u» gi'e te lisri lo ba'o fasnu gi'e cusku «lu do zmadu ro da lo ka selnei mi .i ko mi kansa lo nu klama lo noldi'u pe lo patfu be mi .i .au do mi ba speni li'u» .i la snime blabi cu tugni gi'e klakansa .i lo specfari'i cu te platu lo barda mleba'i
blaci mrovau
ni'o fi lo nunsla cu vi'ecpe lo ji'a kusru mamta be la snime blabi .i my ca lo nu ba'o co'a dasni lo melbi cu klama lo minra gi'e cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i lo citno noltruni'u cu mlemau do fo lo pilji be li ki'o li'u»
ni'o ca ku lo kusru ninmu cu dapma krixa gi'e terpa mutce ja'e lo nu na djuno lo du'u .ei mo kau .i ny ca lo cfari cu na djica lo nu klama lo jai bu'u specfari'i .i ku'i na kakne lo ka co'u dunku .i .e'i dai cliva gi'e catlu lo citno noltruni'u .i lo ninmu ca lo nu nerkla cu co'a sanji tu'a la snime blabi gi'e jai se rinka lo nunte'a fai lo nu na muvdu kakne .i xa'o ku lo jinme cutci pu se punji lo kolme fagri gi'e ca se bevri se pi'o lo cinza lo kumfa nenri gi'e se punji lo crane be lo noltruni'u .i ba ku ny bilga lo nu dasni lo xunre glanungu'i cutci gi'e dansu co'u lo nu morsi farlu lo loldi
nu salci
fa'o
|
# gugde liste
ni'o dei liste be lo gugde
## liste loi gugde
### bemjoitco
bemjoitco
#### bemtu'a
bemtu'a
- kadnygu'e
- mergu'e
- mexygu'e
#### karibes.
karibes.
| - aitis en:haiti - angilys en:anguilla - antiguas.joik.barbudas en:antigua and Barbuda - antilen en:netherlands Antilles - arubas en:aruba - ba'am en:bahamas - barbados en:barbados - bermudas - dominik - dominik.ka'ijec - grenadas | - iamaikas - keiman - kubas - monserat - puertorikos - seint.kits.joik.nevis - seint.vincent.joik.grenadinz - sen.pier.joik.mikelon - trinidad.joik.tobagos - turks.joik.kaikos.dapl - vrdjin.daplu |
#### midju bemjoitco
midju bemjoitco
- beliz
- guatemal
- kostarikas
- nikaraguas
- onduras
- panamas
- salvador
#### ketytu'a
ketytu'a
- bolivias en:bolivia
- ekuador
- fok
- fraso zei gudjanas
- gudjanas
- getygu'e
- kolombias
- paraguais
- perus
- surinam
- tciles
- razgu'e
- uruguais
- benesuel
### frikytu'a
frikytu'a
| - angol - benin - botsuanas - burkinas fasos en:burkina Faso - burundis - djibutis - ertras - gabon - ganas - gineas - ginebisos - gineas ekuatorial - itiopias - jexygu'e - kamerun - kenias - komoros - kongos | - kot.divuar - lesutus - liber - libgu'e - madagaskar - malauis - malis - maiot - mijyfi'o ka'irje'a - misrygu'e - morgu'e - mosambik - muritan - naidjer - namib - nanfi'o - nijer | - roltrusi'o zei .kongos - ruandas. - san.tomes.joik.prinsipes - senegal - secel - sieras. leon - somal - somalis - suatinis - sudan - tanzan - tcad - togos - tunis - .ugandas - zambias - zimbabues |
### poltu'a
poltu'a
| - belaus en:palau - faspolgu'e - kiribas - kukis - marcal.dapl - mer.samoas en:american Samoa - mikronesias | - naurus - niues - norfuk - papuas - pitkern - samoas - solomon.dapl | - sralygu'e - tongas - tuvalus. - .ualis.joik.futunas - vanuatus. - zis. poi cnino |
### rontu'a
rontu'a
| - airland - andoras. - beldjym - belrus - bosnas ertsegovinas en:bosnia and Herzegovina - bulgarias - ckipyris en:albania - danmark. - dotygu'e - elvetias - estis - fasygu'e - finland - island - italias - kosovas | - lanplu - latyv - lietuvas - lixtenctain - luksymbyrg - makedon - maltas - marin. poi censa - moldovas - monakos - nederlant. - noreg - polskas - potygu'e - pridnestrovis - ritygu'e | - romanias - rukygu'e - sangu'e - sloven - slovensk - srb - sueriges - tcesk - tokelaus - turk - turkmenis - usteraij - vatikanus.tcad - vurgu'e - xesygu'e |
### zdotu'a
zdotu'a
| - afyganis - azerbaidjan en:azerbaijan - barain en:bahrain - bruneis en:brunei - begygu'e - berti zei .xanguk - bidgu'e - tibet - brogu'e - djogu'e - drukiul - elenas. poi censa - fisygu'e - kaledon. poi cnino - kamputceas - kazaksTAN | - kisygu'e - kokos - kupr - kyrg - kuait - sakartulos - iaman - iran - jorgu'e - jugygu'e - laos - lu'orgu'e - makaus - maldives - mejgu'e - mianmar - mongol | - nepal - ozbekis - pilipinas - pongu'e - raksygu'e - sinapur - sixygu'e - snanu zei .xanguk - srilynkas - tadjikis - tais - vietnam - xingu'e - xonkon - xesygu'e |
## lerfu cnici gugde
### .abu
- akrotiris dekelias en:akrotiri and Dhekelia
- apsnis en:abkhazia
- asension en:ascension Islands
### by
- blabruk
### dy
- daglik.karabak
### gy
- gam
- gernezis
- gibraltar
- gua'an
### ky
- kaboverdes
- klalit.nunat
- katar
### my
- madiarorsag
- manin
- mejgu'e
- moris
### sy
- sur
- zvalbard
### ty
- tristan.dakunias
- tsrnas.goras
### .ubu
- .uman
### vy
- vitis
### xy
- xaik
- xrvatskas
|
ni'o le ranmi cu purci citri lisri gi'a krici je jitfa .i
purci citri lisri [stika ti]
ni'o le ranmi noi ke'a cafne censa cu srana le terdi krasi .a le nu le terdi .e le danlu cu binxo cabna morna .i le ranmi cu lisri le cevni .a le banli jatna .i
krici je jitfa [stika ti] |
la .makin.
fi’e la .tciktar.
fi’o fanva la .cogas.
ni'o da puzaki nixli gi'e se cmene zo .makin, gi'e xabju lo tcadu
.i la .makin, goi ko'a roroi cmila culno
gi'e mutce nelci lo nu kelci ka'ai lo barda bruna ,a lo pendo
.i ca lo djedi lo cizra te tavla cu klama lo tcadu fu lo brife
.i lo xadni cu binxo lo minji
.i ti'e lo te bilma be la'e di'u cu te facki bu'u lo lamji tcadu
.i ca lo donri be lo nu la .makin, cu te pixra sepi'o lo lakse pinsi kei zo'u
ti'a lo xance la .makin, cu facki fi zo'e noi ke'a na zasti ca lo prulamdei ze'epu
.i lu ti mo pau li'u
.i ti'a lo xance be la .makin, zo'u pa da kulpe
.i lo xadni be la .makin, cu ca'o binxo lo minji
.i ko'a klama lo spita .ijeku'i lo mikce cu cusku po'o lu .uanai li'u
.i lo ckule pendo .eji'a lo jibni xabju .eji'a lo lamji pagre cu co'a rivbi tu'a ko'a ki'u lonu ce'u te dunda lo bilma
.i lo so'o verba ko'a jai gau cmene fai zo minji gi'e ckasu
.i lu do na nitcu lo djacu
.i lo ctile cu zmadu fi loka do mapti ce'u li'u se cusku lo patfu la .makin, roroi lo sanmi
.i ku'i ba'oku ko'a cinmo loka badri
.i la .makin, cu cusku noda
.i la'a ko'a kakne co cusku noda
.i lo mamta .a lo bruna cu puca'o bandu la .makin,
gi'eku'i caku tarti po'o loka ce'u djuno noda .i no da sidju la .makin,
.i ca lo nicte la .makin, cu cliva lo zdani .e lo tcadu
.i ko'a jimpe lodu'u claxu lo se klama
.i ku'i la .makin, cu claxu lo te xruti .eji'a lo se surla zvati
.i ko'a cadzu la'u ma paunai
.i lo tsani cu milxe cenba loka to'e manku
.i la .makin, cu ru'i cadzu po'o fi lo citno tuple secau lonu klaku
.i ze'a lo temci lo xadni na sisti lo nu binxo lo minji
.i ko'a klama lo tcadu
.i lo midju be lo dargu zo'u da xekri
.i lo xunre ciblu cu se flecu
.i ri xekri mlatu
gi'e pu'o mo'u jmive
.i lo so'i prenu pe lo tcadu cu no'e cukli lo xekri mlatu
.i la .makin, cu catlu lo flira be lo prenu
.ibabo ko'a jinvi la'e di'e
.i simsa lo flira be
lo mamta ku jo'u lo bruna
.i ca lo nu la .makin, pu'o jai gau to'e farlu fai lo mlatu kei ko'a co'a sanji lonu da ru'u prenu gunma
.i lu .ue minji prenu pau li'u
.i lu mo .a'u .i ma fasnu li'u
.i lu .a'unai .oisai li'u
.i lu ju'i do'u lo minji prenu cu pecnu lo morsi mlatu li'u
.i la .makin, ti'e tirna lo sance be lo kacma gi'eku'i cusku noda
.i pa'a lo nu catlu lo ca'uvi mlatu zo'u
ko'a smaji satre po'o lo stedu be lo mlatu
.i ze'aca lo nu lo mlatu cu mo'u milxe glare kei
la .makin, ba'e ru'u satre
.i ko’a pamjai lo lenku mlatu gi’e cliva lo tcadu
.i ko’a co’a pamei cadzu
.i la .makin, cu facki fi lo xrulrpieri te’e lo dargu
.i ko’a catlu lo xrula be tai lo blabi ckana bo matci
.i jebabo ko’a troci lonu vi zi surla
.i la .makin, cu xendo punji lo mlatu noi vo'a pamjai ke'a ku'o lo srasu
.i ca la'e di'u lo brife cu pluka brife
gi'e xendo tai lo nu cusku lu fi'i .makin, li'u
.i la .makin, cu co'a sipna ka'ai lo mlatu
.i lo milxe glare kevensa solri bo gusni cu marbi la .makin, ku joi lo mlatu
fa’o |
la snime blabi
sei misno ke dotco lisri
sei lo no'u lai. grim. bruna cu jajgau finti
sei la selpa'i cu fanva
lo notruni'u
ni'o pu zu ku ca lo dunra midju fau lo nu lo snime tai tu'a lo pimlu cu carvi fi lo tsani kei lo noltruni'u cu zutse ne'a lo canko noi se korbi lo xekri mudri ku'o gi'e fenso .i lo noltruni'u fau lo nu fenso gi'e zgana lo snime nu carvi cu rakygau lo jesni lo degji .i je ci dirgo be lo ciblu cu farlu lo snime .i mu'i lo nu lo xunre be ne'i lo blabi snime cu tai melbi kei ny pensi «lu .au sai mi se panzi da poi blabi du'i tu'a lo snime zi'e poi xunre du'i tu'a lo ciblu zi'e poi xekri du'i tu'a lo mudri korbi li'u» .i ba za lo no'e clani ny se tixnu .i ty blabi du'i tu'a lo snime gi'e xunre du'i tu'a lo ciblu gi'e xekri du'i tu'a lo mudri korbi .i se ki'u bo se cmene «lu snime blabi li'u» .i ca lo nu ba'o jbena kei lo noltruni'u cu mrobi'o
ni'o ba za lo nanca lo noltrunau co'a speni lo drata .i melbi ninmu gi'e ku'i ge jgira gi tolcumla vau gi'e na curmi lo da'i nu da ny zmadu lo ni melbi .i ny ponse lo se manci minra .i ca ro nu ny cu sanli ca'u lo minra gi'e sezycta kei ny cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do mlerai lo se gugde li'u»
.i ba bo ny se mansa ki'u lo du'u djuno lo du'u lo minra cu cusku lo jetnu
ni'o ku'i la snime blabi cu banro gi'e zenba ca ro djedi lo ni melbi .i ca lo nu nanca li ze cu melbi du'i tu'a lo klina donri gi'e ji'a mlemau lo noltruni'u .i ca lo djedi ca lo nu ny cu za'u re'u retsku fi lo minra fe «lu doi minra doi minra ne bu'u lo bitmu ma mlerai lo ro se gugde li'u» kei lo minra cu spusku «lu doi ga'i nai noltruni'u do vi mlerai .i ku'i la snime blabi cu mlemau do fo lo pilji be li ki'o li'u» .i ca ku lo noltruni'u cu se spaji mutce gi'e binxo lo pelxu joi crino ri'a lo nu jilra .i co'a ku ca ro nu viska la snime blabi kei lo risna be ny cu carna .i la'e di'u jai du'i xebni la snime blabi fai ny .i lo ni jilra gi'e tolcumla cu se zenba tai lo cicyspa nu malba'o ne'i lo risna .i malba'o .i malba'o .i se ri'a bo ny na za'o surla kakne ca ga lo donri gi lo nicte .i lo noltruni'u cu klacpe lo kalte gi'e cusku «lu ko gidva la snime blabi lo ricfoi .i mi na djica lo nu za'u re'u viska .i .e'o ko catra by gi'e bevri fi mi fe lo by. fepri .e lo by. livga fi'o se sinxa lo du'u by. je'a morsi li'u» .i lo kalte cu tinbe gi'e gidva la snime blabi lo bartu .i ca lo nu ba'o cpacu lo mirli catra dakfu gi'e pu'o rakygau fi lo zernalfu'e risna be la snime blabi kei by co'a klaku gi'e cusku «lu pe'u xendo kalte .i ko curmi lo nu mi jmive .i mi ba bajykla lo cilce ricfoi gi'e ze'e na xruti li'u» .i mu'i lo nu by tai melbi kei lo kalte cu kecti by gi'e cusku «lu ko bajra doi malselfu'a verba li'u» .i «lu lo cilce danlu ba zi ba'o citka do —sei lo kalte cu pensi li'u» .i ku'i to'e ki'u nai cinmo lo ka co'u dunku kei ki'u lo du'u na bilga lo nu catra
la snime blabi cu pagre lo ricfoi
ni'o lo kalte ca lo nu lo xarju panzi cu jbikla cu daktuncatra gi'e lebna lo fepri .e lo livga gi'e bevri fi'o sinxa ku fi lo noltruni'u .i lo jukpa cu .ei silnyjau jukpa xai .i lo palci ninmu cu citka gi'e birti lo du'u ba'o citka lo fepri .e lo livga vu'o pe la snime blabi
ni'o lo uu verba bu'u lo barda ricfoi cu mulno nonkansa gi'e terpa mutce ja'e lo nu catlu ro lo pezli be lo tricu gi'e na djuno lo du'u .ei ta'i ma kau sezdju .i co'a bajra gi'e bajra lo kinli rokci gi'e pagre lo rulkinli foldi .i je lo cilce danlu cu mo'i ne'a plipe gi'e ku'i na gunta .i la snime blabi cu bajra co'u lo nu na za'o kakne .e lo nu co'a vanci .i ca ku viska lo cmalu zdani gi'e nerkla te zu'e lo nu sipna .i ne'i lo zdani ro da cmalu .i ku'i tai cmalu je ralci se ki'u lo nu nandu fa lo nu skicu .i bu'u sanli fa lo blabi se bregau cmajubme noi te punji ze cmalu palta ne to'e se cau ze ralci smuci .e ze cmalu dakfu .e ze cmalu forca .e ze cmalu kabri .i re'o lo bitmu ze cmalu ckana cu linji se punji gi'e se gacri lo snime blabi boxfo .i la snime blabi mu'i lo nu tai xagji je taske cu citka pi lo cpana be ro lo palta be'o no'u lo stagi joi lo nanba gi'e pinxe pa dirgo ne ro lo kabri .i mu'i bo na djica lo nu xaksu ro da pe su'o lo torcrida .i ba ku mu'i lo nu tatpi cu cpana lo ckana .i ku'i no lo cpana cu mapti .i pa boi cy cu cladu'e .i pa boi cy cu tordu'e .i uo lo ze moi cu mapti .i stali lo ckana gi'e zausku la cevni gi'e co'a sipna
ni'o ca lo nu ba'o manku binxo kei cu xruti fa lo xabju be lo zdani be'o no'u lo ze torcrida noi bu'u lo cmana cu kakpa sisku lo kunra .i ty cikygau lo ty. cmalu te gusni .i je co'a lo nu tolmanku cu viska lo nu da pu zvati lo nenri kei ki'u lo du'u na ku ro de stali lo pu te punji .i lo pa moi cu cusku «lu ma pu zutse lo mi stizu li'u» .i lo re moi cu cusku «lu ma pu citka pi lo cpana be lo mi palta li'u» .i lo ci moi cu cusku «lu ma vimcu fi lo mi nanba li'u» .i lo vo moi cu cusku «lu ma citka pi lo mi stagi li'u» .i lo mu moi cu cusku «lu ma tungau se pi'o lo mi forca li'u» .i lo xa moi cu cusku «lu ma ka'argau se pi'o lo mi dakfu li'u» .i lo ze moi cu cusku «lu ma pinxe fi lo mi kabri li'u» .i ba ku lo pa moi cu sisycta gi'e viska lo nu da cmalu punli lo vo'a ckana .i je cusku «lu ma stapa lo mi ckana li'u» .i lo drata cu jbikla gi'e lausku «lu lo me mi moi ku ji'a pu se cpana da li'u» .i ku'i lo ze moi ca lo nu catlu lo ri ckana cu viska la snime blabi ku noi cpana gi'e sipna .i lo ze moi cu klacpe lo drata noi jbikla gi'e krixa ri'a lo nu se spaji kei gi'e cpacu lo vo'e te gusni gi'e selgusygau la snime blabi .i «lu ua .u'e sai .u'e sai —sei lo torcrida cu krixa— ta mutce lo ka ba'e melbi li'u» .i lo torcrida tai gleki se mu'i lo nu cikygau na gi'e sipna stodi curmi .i ku'i lo ze moi torcrida cu sipna bu'u lo ri pendo ze'a lo cacra .i tai ku lo nicte cu mulno
lo torcrida
ni'o ca lo cerni la snime blabi cu co'a cikna gi'e viska lo ze torcrida gi'e se spaji .i ku'i ty xendo gi'e retsku «lu ma cmene do li'u» .i «lu mi se cmene «lu snime blabi li'u» —sei by spusku li'u» .i «lu ta'i ma nerkla lo mi'a zdani —sei lo torcrida cu di'a retsku li'u» .i la snime blabi cu skicu lo nu ge lo mamta pu catra djica gi ku'i lo kalte cu zandu'a lo nunjmive kei .e lo nu ba ku bajra ze'a pi ro lo djedi co'u lo nu facki fi lo zdani .i lo torcrida cu cusku «lu lo nu do djica lo nu nicygau lo zdani srana gi'e jukpa gi'e lumci gi'e fenso cu te curmi lo nu do stali mi'a gi'e ja'e bo claxu no da li'u» .i «lu .i'a —sei la snime blabi cu cusku— mi djica li'u» .i je stali .i by se va'u lo torcrida cu nicygau lo zdani .i sa'u nai ca lo cerni lo torcrida cu cliva se ka'a lo cmana gi'e sisku lo kunra .e lo solji .i ca lo vanci cu xruti .i ca ku .ei lo sanmi cu ba'o se bregau .i ku'i ca'o lo donri lo nixli cu nonkansa .i se mu'i bo lo xendo torcrida cu jai kajde gi'e cusku «lu ko capyju'i lo mamta be do .i my ba zi djuno lo du'u do ti zvati .i ko na curmi lo nu da nerkla li'u» .i ku'i lo noltruni'u ba lo nu citka lo fepri .e lo livga vu'o noi ny krici fi ke'a fe lo du'u pagbu la snime blabi cu jinvi lo du'u di'a ku pa moi lo melbi gi'e mlerai .i je klama lo minra gi'e cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i la snime blabi ku ne ti'a lo cmana
zi'e ne bu'u lo ze torcrida
cu mlemau fo lo pilji be li ki'o li'u»
ni'o ca ku lo noltruni'u cu se spaji ki'u lo nu ny cu djuno lo du'u lo minra na cusku lo to'e jetnu .i je ny co'a sanji lo du'u ge lo kalte ny tcica gi la snime blabi cu za'o jmive .i ny cu za'u re'u pensi lo nu ta'i ma kau catra kei mu'i lo nu co'u lo nu ca'a mlerai lo ro selgu'e cu na'e ke surla kakne ri'a lo nu jilra .i ca lo nu ba'o platu cu skagau lo flira gi'e dasni lo se dasni be lo te zarci gi'e tai binxo lo se sanji jai nandu .i tai ku klama fo lo ze cmana fe lo ze torcrida gi'e snadarxi lo vorme gi'e lausku «lu lo xamgu ve pleji cu se friti li'u» .i la snime blabi cu catlu pa'o lo canko gi'e lausku «lu coi di'ai xendo ninmu do ma vecnu li'u» .i ny spusku «lu lo xamgu joi lo melbi vu'o no'u lo jongausko poi skari ro da li'u» gi'e lebna fi lo dakli fe pa boi jy poi se jivbu fi lo silka .i «lu lo stace ninmu zo'u .e'a .ei nai mi nerkla curmi li'u» se pensi la snime blabi ku noi kargau lo vorme gi'e te vecnu lo melbi jongausko .i «lu doi verba —sei lo tolci'o cu cusku— do se jvinu ma .u'e pau nai .i .au mi nicygau do se pi'o lo skori li'u» .i la snime blabi na kanpe lo xlali gi'e co'a sanli ne'a lo ninmu gi'e curmi lo nu ny cu srugau lo skori .i je ku'i lo tolci'o cu sutra je tagji srugau ri'a lo nu la snime blabi co'u vasxu kakne gi'e morsi farlu lo loldi .i «lu ca ku do ba'o mlerai li'u» zo'u cusku gi'e sutra lo nu cliva
ni'o ba na'e zu ku ca lo vanci lo ze torcrida cu xruti lo zdani gi'e mutce lo ka se spaji kei ca lo nu viska lo nu la snime blabi cu cpana lo loldi gi'e na muvdu fi'o selmlu lo ka morsi .i lo torcrida cu lafti .i ty viska lo nu dukse lo ka tagji se srugau .i se ki'u bo ka'argau fi lo skori .i ca ku la snime blabi cu co'a linto vasxu gi'e masno binxo lo di'a jmive .i lo torcrida ca lo nu se jungau fi lo du'u ma kau pu fasnu cu cusku «lu lo tolci'o te zarci cu du no na'e bo lo cevycau noltruni'u .i ko na curmi lo nu da nerkla ca lo nu mi'a na zvati do li'u»
lo ninmu cu vitke
la snime blabi cu pa re'u morsi
ni'o ku'i lo palci ninmu ca lo nu ba'o tolcliva lo ri zdani cu klama lo minra gi'e retsku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i la snime blabi ku ne ti'a lo cmana
zi'e ne bu'u lo ze torcrida
cu mlemau fo lo pilji be li ki'o li'u»
ni'o lo noltruni'u ca lo nu tirna la'e di'u cu jenca se spaji se ri'a lo nu lo ciblu cu muvdu lo risna .i ki'u bo je'a sanji lo du'u la snime blabi cu ba'o di'a jmive .i «lu ca ku .ai —sei ny cusku— mi platu lo prane te catra li'u» .i je ny zbasu lo vindu komcu gi'e ba bo co'a se ticta'u ja'e lo nu simlu lo ka drata ninmu .i tai ku klama fo lo ze cmana fe lo ze torcrida gi'e darxi lo vorme gi'e lausku «lu lo xamgu cu selve'u li'u» .i la snime blabi cu catlu lo bartu gi'e cusku «lu ko di'a klama .i .ei mi na curmi lo nu da nerkla li'u» .i «lu ju'o lo nu do catlu po'o cu se curmi li'u» zo'u lo tolci'o cu cusku gi'e cpacu lo vindu komcu gi'e jarco lafti .i ky mutce lo ka se nelci la snime blabi kei ja'e lo nu by kargau lo vorme .i ca lo nu ba'o terve'u kei lo tolci'o cu cusku «lu ca ku .ai mi krefu nicygau do li'u» .i la uu snime blabi cu pensi no da gi'e curmi tu'a lo tolci'o .i ku'i ca lo nu lo komcu co'i pencu lo kerfa kei lo vindu cu jai rinka lo nu lo nixli cu tolsanji farlu lo loldi .i «lu do noi prane lo ka melbi —sei lo palci ninmu cu cusku— .i ca ku do se fanmo li'u» .i je cliva .i ku'i ui na ru'e vanci .i ja'e bo ba zi ku lo ze torcrida cu xruti lo zdani .i ty ca lo nu viska lo nu la snime blabi cu cpana lo loldi cu temsepcau sruma tu'a lo noltuni'u gi'e sisku gi'e tolcri lo vindu komcu .i zi ca lo nu ba'o vimcu lo komcu lo kerfa cu di'a sanji fa la snime blabi ku noi cusku lo se du'u ma kau fasnu .i lo ze torcrida cu za'u re'u kajde cusku fi ny fe lo se du'u .ei capyju'i gi'e na curmi lo nu da nerkla .i lo noltruni'u bu'u lo ri zdani cu co'a sanli ca'u lo minra gi'e cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i la snime blabi ku ne ti'a lo cmana
zi'e ne bu'u lo ze torcrida
cu mlemau fo lo pilji be li ki'o li'u»
ni'o lo noltruni'u ca lo nu tirna la'e di'u cu desku ri'a lo nu fengu .i «lu .ai la snime blabi cu mrobi'o —sei ny krixa— .i ju lo mi nunjmive cu jdima li'u» .i ba bo klama lo se mipri je sepli kumfa noi no drata ke'a klama ku'o gi'e zbasu lo vindu plise .i lo sefta cu melbi co skari lo blabi joi ke xunre barna .i je ge ro da poi viska py cu ctidji gi ku'i lo ca'a citka be py cu mrobi'o .i lo noltruni'u ca lo nu lo plise cu bredi cu skari cnegau lo flira gi'e binxo lo simlu be lo ka te cange ninmu kei gi'e tai klama fo lo ze cmana fe lo ze torcrida .i vorme darxi .i la snime blabi cu muvgau lo ri stedu pa'o lo canko gi'e cusku «lu mi na jai se curmi fai lo nu nerklacru da .i lo ze torcrida cu tolcru li'u» .i «lu .i'a —sei lo te cange ninmu cu spusku— .i ro lo mi plise zo'u mi ba cirko snada .i .au pa boi py cu se dunda mi do li'u» .i «lu .e'a nai —sei la snime blabi cu cusku— .i mi na jai se curmi fai lo nu fitytu'i da li'u» .i «lu xu do terpa tu'a lo vindu —sei lo tolci'o cu cusku— .i za'a dai mi jai katna lo plise lo re mei .i do citka lo xunre xadba .i je mi citka lo blabi li'u» .i ku'i lo plise cu rutni se zbasu ja'e lo nu no na'e bo lo xunre xadba cu selpau lo vindu .i la snime blabi cu se xlura fo lo plise .i ny ca lo nu viska lo nu lo te cange ninmu cu citka cu na za'o rivbi kakne gi'e kupygau lo xance gi'e lebna lo vindu xadba .i ku'i ny ba zi lo nu pa te batfendi cu nenri lo moklu cu morsi farlu lo loldi
la snime blabi cu morsi
ni'o lo noltruni'u cu palci catlu la snime blabi gi'e cladu cmila gi'e cusku «lu blabi du'i tu'a lo snime gi'e xunre du'i tu'a lo ciblu gi'e xekri du'i tu'a lo mudri .i ca ku lo torcrida na kakne lo nu refmivgau do li'u» .i ca lo nu ny. bu'u lo ri zdani cu retsku fi lo minra fe
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do mlerai lo ro se gugde li'u»
.i se ja'e ku lo risna be ny cu surla fi'o se kuspe lo ni lo'e jilra risna cu surla kakne
ni'o lo torcrida ca lo nu xruti ca lo vanci cu tolcri la snime blabi ku noi cpana lo loldi zi'e noi vasxu na gi'e morsi .i lafti by gi'e sisku lo vindu fau lo nu luzgau lo se dasni skori kei .e lo nu kompli fi tu'a lo kerfa kei .e lo nu lumci by fo lo djacu .e lo vanju .i ku'i ro lo se zukte na sidju .i lo xendo verba cu morsi gi'e stodi lo ka morsi .i lo torcrida cu punji by lo mrota'o gi'e stizu sruri gi'e klaku fi tu'a by gi'e klaku ze'a lo djedi be li ci .i ba ku djica lo nu derse'a .i ku'i za'o simlu lo ka vifne dunli lo jmive remna kei gi'e za'o se molmla lo melbi xunre .i lo torcrida cu cusku «lu .e'a nai mi'a setca fi lo xekri dertu li'u» gi'e gasnu lo nu lo klina ke blaci mrovau cu se zbasu kei mu'i lo nu ka'e se viska fi'o te jvinu ro mlana kei gi'e setca fi lo nenri gi'e ciska fi lo mrovau fi'o lerfu lo solji fe lo cmene .e lo se du'u tixnu lo noltrunau .i ba bo punji lo mrovau lo cmana .i pa lo torcrida cu ro roi stali gi'e bandu zgana .i lo danlu ji'a cu klama gi'e klaku fi tu'a la snime blabi .i pa mai lo cipnrstrigi .i re mai lo cipnrkorvo .i ro mai lo cipnrkolumbi
ni'o la snime blabi cu ze'u sai vreta bu'u lo nenri be lo mrovau gi'e na fusra gi'e ja'a simlu lo ka sipna .i ki'u bo za'o blabi du'i tu'a lo snime gi'e xunre du'i tu'a lo ciblu gi'e se ke xekri kerfa du'i tu'a lo mudri .i ku'i fasnu fa lo nu pa noltrunau bersa cu binxo lo ka ricfoi zvati kei gi'e klama lo torcrida zdani te zu'e lo nu sipna ze'a lo nicte .i viska bu'u lo cmana lo mrovau .e la snime blabi ku noi melbi ku'o gi'e tcidu lo se ciska be fi'o lerfu lo solji .i cusku fi lo torcrida fe «lu .e'o ko curmi lo nu mi cpacu lo mrovau .i .au mi pleji fi do fe lo jai se djica be do li'u» .i lo torcrida cu spusku «lu lo nu da'i do pleji lo ro solji pe lo munje cu na banzu lo mi mi'a vecnu li'u» .i lo noltrunau bersa cu cusku «lu va'o ku ko fi mi zandu'a .i ki'u bo mi na kakne lo nu jmive se cau lo nu viska la snime blabi .i mi ba sinma gi'e kurji vau tai tu'a lo selnei traji li'u» .i ca lo nu cusku la'e di'u kei lo torcrida cu cinmo lo ka kecti kei gi'e dunda lo mrovau .i lo noltrunau bersa cu gasnu lo nu lo ri selfu cu bevri fi'o se cpana lo janco .i ca fasnu fa lo nu tapflifa'u lo dzitricu .i se ri'a bo lo plise spisa noi pu se batfendi la snime blabi cu muvdu lo bartu be lo galxe .i ba za lo na'e clani la snime blabi cu kargau lo kanla gi'e lafti lo gacri be lo mrovau gi'e tsebi'o gi'e di'a jmive .i «lu ua nai mi ma zvati li'u» se lausku by .i lo noltrunau bersa fau lo nu gleki mutce cu cusku «lu do mi zvati li'u» gi'e te lisri lo ba'o fasnu gi'e cusku «lu do zmadu ro da lo ka selnei mi .i ko mi kansa lo nu klama lo noldi'u pe lo patfu be mi .i .au do mi ba speni li'u» .i la snime blabi cu tugni gi'e klakansa .i lo specfari'i cu te platu lo barda mleba'i
blaci mrovau
ni'o fi lo nunsla cu vi'ecpe lo ji'a kusru mamta be la snime blabi .i my ca lo nu ba'o co'a dasni lo melbi cu klama lo minra gi'e cusku
«lu doi minra doi minra ne bu'u lo bitmu
ma mlerai lo ro se gugde li'u»
.i lo minra cu spusku
«lu doi ga'i nai noltruni'u do vi mlerai
.i ku'i lo citno noltruni'u cu mlemau do fo lo pilji be li ki'o li'u»
ni'o ca ku lo kusru ninmu cu dapma krixa gi'e terpa mutce ja'e lo nu na djuno lo du'u .ei mo kau .i ny ca lo cfari cu na djica lo nu klama lo jai bu'u specfari'i .i ku'i na kakne lo ka co'u dunku .i .e'i dai cliva gi'e catlu lo citno noltruni'u .i lo ninmu ca lo nu nerkla cu co'a sanji tu'a la snime blabi gi'e jai se rinka lo nunte'a fai lo nu na muvdu kakne .i xa'o ku lo jinme cutci pu se punji lo kolme fagri gi'e ca se bevri se pi'o lo cinza lo kumfa nenri gi'e se punji lo crane be lo noltruni'u .i ba ku ny bilga lo nu dasni lo xunre glanungu'i cutci gi'e dansu co'u lo nu morsi farlu lo loldi
nu salci
fa'o
|
# xesygu'e
la xesygu'e goi ko'a zi'e no'u lu xelso gubyseltru li'u no'u la'o xesybau. Ελλάδα .xesybau. cu snanu ropno gugde .ipe'u ko'a krasu le cabna stici kulnu
ni'o la .atenas ko'a trutca gi'e rajtca
- xelso citri
|
ni'o lo braxamsi cu barda xamsi .ije so'a lo xamsi .e ro lo braxamsi cu jorne le pa terdi braxamsi .i le pa terdi braxamsi cu gacri be lo terdi sefta be'o frinu li zepa li panono .i so'i lo pe lo terdi ku silna djacu cu condi mitre li ciki'o .i |
la viktor medranos cu finti la'e lu la plana zirpu bo noblrprinsi li'u ni'o le zirpu noblrprinsi po'u la raljitprut cu cusku lu ga'icai ko zi dunda lo tadjrbarbikiu xarju mi li'u
i le selfu cu cusku lu ku'i ga'inaicai u'u zasti fa lo no xarju ne'i le tutra be le nobli li'u i la raljitprut cusku lu i doi le selfu ga'icai ku'i ri'a mo li'u
i le selfu cu cusku lu ga'inaicai u'u lo terbilma cu catra ro lo xarju li'u i le zirpu noblrprinsi cu cusku lu a'a go'i i zu'unai ga'icai ko zi dunda lo grutrpaupau mi li'u
i le selfu cu cusku lu ga'inaicai je'e go'i li'u i zi zasti fa lo grutrpaupau ne'i lo solji kabri |
lo noltrutì'u poị cpàna lo dèmbi
sei la. xans.kristian.ànderson. cu fìnti
sei la selpà'i cu fànva
ni'o pu zu vu ku zàsti fa lo noltrubè'a poị djìca lo nu spèni lo noltrutì'u noị ku'i .eị dràni noltrutì'u .i lo noltrubè'a cu lìtru bu'u pi ro lo tèrdi te zu'e lo nu tòlcri pa boị ty gi'e ku'i ka'e cpàcu bu'u no da de poị by djìca .i zàsti fa lo raụ noltrutì'u .i ku'i nàndu fa lo nu fàcki lo du'u xu kaụ dràni noltrutì'u .i ty cu ro roị ckàji da poị na màpti lo nu .eị mo kaụ .i ja'e bo by cu xrùti lo zdàni gi'e bàdri .i ki'u bo mùtce lo ka djìca tu'a lo dràni noltrutì'u
ni'o ca pa vànci lo xlàtce vilbì'e cu jbibì'o .i zvàti fa lo nu lìndi joị lo nu lìdvru .i je càrvi fa lo bàrda ri'èrlaị pe lo djàcu .i ca bo sùksa fa lo nu se tìrna fa lo nu dàrxi lo tcàdu vrògaị .i je lo tolcì'o noltrùnaụ cu klàma gi'e kàrgaụ
ni'o bu'u lo bàrtu ca'u lo vrògaị cu sànli fa lo noltrutì'u .i ku'i .u'e saị ma kaụ ty jvìnu ri'a lo càrvi jo'u lo brìfe .i lo djàcu cu cnìta mùvdu fi lo kèrfa .e lo se dàsni .i je cnìta mùvdu lo jìpno be lo cùtci gi'e di'a barmù'u lo cùtci trìxe .i ku'i lo noltrutì'u cu to'e ki'u naị cùsku lo se du'u ty dràni noltrutì'u
ni'o «lu ma'a ba zi fàcki la'e di'u —seị lo tolcì'o noltrunì'u cu pènsi— li'u» .i ku'i ny cùsku no da gi'e klàma lo ckàna kùmfa gi'e vìmcu ro lo ckàna bùkpu lo ckagrèku gi'e pùnji lo pa dèmbi lo lòldi .i je ba bo lèbna lo re no màtci gi'e pùnji my lo dèmbi gi'e ba bo pùnji lo re no pìmlu ckàna lo màtci
ni'o lo di'u ckàna zo'u .e'i lo noltrutì'u cu cpàna ze'a lo nìcte .i ca lo cèrni ty te rètsku lo se du'u ma kaụ ty li'i sìpna
ni'o «lu .oị xlàli mùtce —seị ty cùsku— .i mi pu ja'a ru'e ga'òrgaụ lo kànla ze'a lo mùlno nìcte .i na saị djùno lo du'u ma kaụ nènri lo ckàna .i ku'i mi pu cpàna da poị jdàri .i ja'e bo pi ro lo mi xàdni cu xèkri joị blànu .i xlàtce li'u»
ni'o ca ku ro da djùno lo du'u dràni noltrutì'u .i ki'u bo ty pu gànse lo dèmbi pa'o lo re no màtci jo'u lo re no pìmlu ckàna
ni'o no da poị na dràni noltrutì'u cu ka'e taị ràlci gànse
ni'o ja'e bo lo noltrubè'a ty spèni .i ki'u bo ca djùno lo du'u by tòlcaụ lo dràni noltrutì'u .i je lo dèmbi cu se sètca fi lo mùzga noị bu'u ke'a za'o ka'e se vìska va'o lo nu no da pu zerlè'a
ni'o ca'e di'u jètnu lìsri
|
# xi'ojda
le xi'ojda cu lijda filenu krici ledu'u le te ctuca befi la iecu,ys goi ko'e cu vajni gi'a censa .iji'a so'a se xi'ojda cu krici ledu'u ko'e censa gi'a bersa la cevni .i ji'a lo se xi'ojda cu krici le du'u ko'e se xrani gi'e ca'o morsi gi'e ca'o krefu jmive .i lo xi'ojda cu se krasi ca lo pa moi na'acto
ni'o le xi'ojda cu traji leka se lijda kei fole'i ro lijda
ni'o lo xriso jdacku cu se pagbu lo xebro jdacku ku joi lo jdacku poi xriso je nai xebro
|
purdi
ni'o le purdi cu larcu le rinka spati banro tezu'e le finti be le melbi vanbi .i le zdani purdi cu cafne fasnu tu'i le stuzi no'u le purdi .i le purdi cu fadni stuzi le dertu sefta tu'i le jibni be le zdani ku gi'e rirci stuzi le zdani drudi .a le nenri dinju ke barda je kalri canlu ke'e .a le balni .a le canko tanxe .a le bartu je lamji zdani sefta .i |
lo cmàlu
sei la selpà'i cu fìnti be fi'o se sàlci la. triliyn.
ni'o pu zu ku jmive fa lo cmalu .i cy xabju lo darno be lo tcadu .i je so'u sai da pu su'o roi viska cy .i la'a lo cy. nunjmive cu simlu fi so'i da fe lo ka se mipri .i ku'i je'u lo tai jinvi na ralci banzu zgana .i lo bi'u nai cmalu cu no roi zukte fi lo nu mipri
ni'o je'u lo so'u prenu ku ji'a sai poi ba'o viska lo bi'u nai cmalu cu za'o na birti lo du'u me ma kau .i je so'i lo viska cu jdice lo du'u na jungau da (to la'a kanpe lo nu da'i na jai se krici toi) .i je'u lo lisri be lo nu penmi la cmalu cu tai jai se manci ja'e lo nu simlu lo ka na ka'e jetnu .i lo pa moi be lo viska be la cmalu cu verba gi'e se cmene zo drakuci .i ca lo djedi ca lo cerni cu ru'u cadzu ne'i lo rifcoi bu'u lo sasfoi gi'e sisku lo melbi xlura gi'e zgana lo bifce jo'u lo toldi .i ca bo tirna lo savru .i pa mai na birti lo du'u xu kau pu tirna .i ja'e bo stodi lo ka xrula sisku .i ku'i ba bo re re'u savru .i la drakuci ca birti .i lo cizra je xlura sance pu se tirna .i kucli lo du'u ma kau se sance .i se mu'i bo co'u xlura sisku gi'e co'a cadzu fa'a lo ricfoi noi simlu lo ka to'o ne'i ce'u se sance .i lo verba cu co'a ralci je masno nerkla lo rifcoi
ni'o ca lo co'i nu binxo lo nenri be lo ricfoi zo'u ro lo savru pe lo bartu co'u se tirna .i tai bo da'i pagre lo rokci bitmu .i ba zi tu'a lo re nu stapa cu suksa fa lo nu lo cladu je fange savru poi simlu lo ka lo kalte cipni cu cmoni ce'u cu sance .i lo verba tai se spaji ja'e lo nu falcru lo xrula poi vy ke'a pu jajgau .i ru'u catlu gi'e ku'i na ganse lo krasi .a lo drata ke cizra dacti .i je'u lo nenri be lo ricfoi cu simlu lo ka mulno kunti lo danlu .i fi'o nafselte'i lo pu zi malsavru ro da smaji
ni'o lo verba di'a condi cadzu fa'a lo ricfoi midju .i na birti lo du'u ma kau krinu lo nu go'e .i simlu lo ka zmiku .i ca lo nu ba'o ze'a cadzu zo'u co'a manku binxo .i lo verba co'u sanji lo du'u vy ma kau zvati .e lo du'u ma kau pluta lo bartu .i je ji'a co'a lenku milxe .i ca tai manku ja'e lo nu ka'e viska lo tarci pa'o lo tricu galraipau .i rarna sa'u fa lo nu xanka
ni'o lo verba cu jdice lo du'u xagrai fa lo nu tolcri lo jai bu'u sipna .i ku'i dukse lo ka manku kei lo nu sanji lo du'u lo manku dacti cu tricu gi'i kau drata .i ca ku suksa fa lo nu tirna lo lauble voksa .i simlu lo ka cusku «lu ko na terpa .i mi do ba sidju li'u» .i lo verba cu se spaji mutce gi'e ku'i no'e zifre lo nu seldjupro .i go nai lacri lo voksa gi di'a to'e birti sisku bo cadzu bu'u lo ca mulno manku ricfoi
ni'o lo verba cu jdice lo nu lacri lo voksa kei gi'e cusku «lu .y mi .y na prane tirna .i pe'u do'u ko za'u re'u cusku li'u» .i ba bo denpa ze'a zo'e noi simlu lo ka krafamtei fa lo mentu .i ku'i ba bo lo voksa za'u re'u cusku «lu ko na terpa doi verba .i do snura .i lo manku do na .ei se terpa li'u» .i «lu mi tatpi —sei lo verba cu toldarsi cusku— .i .ei bu'u ma sipna li'u»
ni'o «lu ko catlu lo trixe be do —sei lo voksa cu xendo tonga cusku— li'u» .i lo verba cu carna gi'e ca pa re'u viska lo barda ctino poi vy ca lo nu jbibi'o cu facki lo du'u ke'a barda rokci co se kevna lo ganra banzu be lo nu nerkla .i vy nerkla gi'e vrebi'o lo kojna .i pu lo nu co'a sipna cu pensi lo pu zi fasnu .i lo voksa ma voksa .i lo se voksa cu remna gi'i danlu .i fau lo nu pensi cu co'a sipna gi'e raktu senva lo manku joi nu voksa co ki'asku lo cmene be la drakuci
ni'o co'a cikna ca lo bavlamcerni fau lo nu tirna lo cipni selsa'a .i ro lo smaji pe lo prulamnicte ba'o canci .i je ro da panpi simlu .i ku'i ba zi bo la drakuci cu morji fi lo cizra je se mipri voksa gi'e co'a kucli lo du'u vy ca mo kau .i se ki'u bo sa'irbi'o gi'e barkla lo kevna .i lo va se viska dy jai spaji zei mutce .i va lo mitre be li so'u ki lo kevna bu'u lo tsustani ve vimcu lo palta jo'u lo kabri vu'o pe to'e se cau lo sanmi cu zvati
ni'o la drakuci cu senpi lo du'u lo se viska ca'a zvati .i ku'i co'a lo nu co'a citka fa'u pinxe lo nanba fa'u lo jisra cu birti .i dy ca lo nu ba'o citka cu jdice lo du'u djica lo nu kirsku lo da'i sabji .i ku'i sy no da se viska .i la drakuci cu sa'irbi'o gi'e ru'u cadzu te zu'e lo nu facki fi lo vanbi .i ju'o ca lo cabna noi ca ke'a tolmanku zo'u .ei cumki fa lo nu facki fi lo voksa .i ku'i ba za lo cacra be li fi'u re za'o na viska lo cmarai ji'a sai pe vy
ni'o ca lo nu ba'o ze'u sisku kei la drakuci cu morji lo du'u ju'o lo rirni cu denpa gi'e xanka .i se ki'u bo co'u sisku gi'e co'a xruti lo zdani to'o ne'i lo ricfoi .i lo xanka mutce rirni cu gleki lo nu lo verba za'o jmive .i ku'i ca lo nu la drakuci cu te lisri lo ricfoi fasnu zo'u lo rirni na krici .i lo simsa cu se lifri ro lo drata penmi be la cmalu .i lo re moi penmi cu me la. ferlon. noi makcu gi'e virnu .i di'e lisri tu'a fy
[...]
|
# xigzo
le xigzo kantrbocuni cu nenze'a kantu le ve'erze'erna'u poi tu'a ke'a rinka lonu lo kantu cu grake li su'ono ak’a an’a job’ava
|
abumoi mivytcuxu'i
lo abumoi mivytcuxu'i cu se nitcu fi lo nu viska .e tu'a lo skapi .e lo nu lo bongu cu banro .i se relslasi lo xumrdauko .i lo livga cu sorcu ge lo xumrdauko gi lo abumoi mivytcuxu'i .iku'i lo dukse ke abumoi mivytcuxu'i .enai lo dukse xumrdauko cu vindu .i lo dukse ke abumoi mivytcuxu'i cu selxre le'e dzipo ja tolzi'o danlu livga |
lo sèlsku be la. gòdot.
sei co'e
sei la selpà'i cu fànva
cènsa sèlsku
.i ra'i lo jmive be pu tu'a ma'a
.i mulno gi'e na se stika
ni'o ro da curve dunli da pe lo tolfa'o
.i lo nu dzena zo'u: dzena nu simsa .i se vamji
.i claxu lo malnunbi'o
.i mi la'e deị ba bandu
.i la'e deị mi se nupre
.i la'e deị mi dimna
.i lo ni mi jinsa zo'u ba'o te jdice
kàjde (to sùtra fa'u màsno toi)
1.
ni'o lo jamfu poị pencu lo vi censa tumla ku'o ma jamfu
.i ko do tolmipri
2.
ni'o lo degji poị pencu lo vi censa dacti ku'o ma degji
.i ko do jarco
3.
ni'o lo te ganse poị sakcpa lo datni lo vi censa vanbi ku'o fi ma te ganse
.i lo ma nunpeị cu tolcuvgaụ lo za'i curve
.i ko runta
si'òsni lìsri
ni'o ko tirna lo sance pe lo mi voksa
ca lo nu mi sitsku lo di'e valsi
ni'o fasnu ca lo nu jamna
.i lo pa sonci cu ca'o xruti fi lo nu damba
.i ca lo djedi pa moị sy cadzu pa'o lo kutytu'a se ka'a lo dargu te kruca
.i surla ni'a lo tricu ne ne'a lo dargu
gi'e sipna ze'a lo nicte
.i faụ lo nu senva cu viska lo nu lo pamsi'u cu birjaịsi'u
.i «lu ko mi'a zifcru lo vi nu jaịrsi'u
—seị lo pamsi'u fi lo sonci cu cusku—
.i mi'a na ka'e stigaụ zu'e mi'a po'o li'u»
ni'o lo sonci cu troci lo nu kargaụ lo xance be lo pamsi'u
.i jalge lo nu troci carmi keị fa lo nu lo prami nu jgari cu tagji zenba
ni'o «lu pe'u do ko mi'a sidju —seị lo pamsi'u cu krixa be pu lo nu lo sonci cu cikybi'o— li'u»
ni'o ca lo djedi re moị sy sazri lo carce lo nu klama lo tcadu .i surla ne'i lo va soịzda
.i faụ lo nu senva cu viska lo bi'u naị pamsi'u pe lo prula'i nicte
ni'o «lu ko mi'a zifcru lo vi nu jaịrsi'u
—seị lo pamsi'u fi lo sonci cu cusku—
.i mi'a djica lo nu se slabu lo nunji'e poị na taị se jimte li'u»
ni'o lo sonci cu katna pa jimca be lo jibni tricu gi'e troci lo nu se pi'o kargaụ lo jgari xance be lo pamsi'u
.i troci je troci ze'a pi ro lo nicte
.i ro maị lo jimca cu porpi .i je lo nunjaị pe lo pamsi'u cu zenba ji'a saị lo ka tagji
ni'o «lu pe'u do ko mi'a sidju —seị lo pamsi'u cu krixa— .i mi'a na ru'e na ka'e vasxu li'u»
ni'o «lu ju'o da tadji
—seị py krixa be pu lo nu lo sonci cu cikybi'o— li'u»
ni'o djedi ci moị .i je lo sonci cu litru klama fu lo vinji fi lo tcadu
.i lo nu vofli cu clani se ditcu .i je lo sonci ca lo nu gapru lo braxamsi cu sipybi'o
.i faụ lo nu senva cu viska lo pamsi'u za'u re'u
ni'o «lu ko mi'a zifcru lo nu co'u jaịrsi'u
—seị lo pamsi'u fi lo sonci cu za'u re'u cusku—
.i mi'a na ru'e vaxydicra simxu .i na djica lo nu mrobi'o li'u»
ni'o lo sonci cu lebna lo ri xarci gi'e selfargaụ xy lo stedu be pa lo pamsi'u
.i «lu pe'u do ko na crogaụ lo se prami be mi —seị lo drata cu krixa— li'u»
.i ja'e bo lo sonci cu lebna lo ri xarci gi'e selfargaụ xy lo stedu be lo pu cusku
.i «lu pe'u do ko na crogaụ lo se prami be mi —seị lo pa moị be lo se capnu'e be lo sonci cu cpedu— li'u»
.i «lu ko mi'a sidju gi'e ku'i na catra
—seị lo pamsi'u cu krixa— li'u»
.i «lu ku'i mi va'o lo nu na ka'e zifygaụ do cu kakne lo nu do'a naị gasnu lo do co'u cortu
—seị lo sonci cu cusku—
.i ja'e bo da'i do zifre li'u»
.i «lu na se djica be mi'a nu zifre
—seị lo pamsi'u cu cusku be pu lo nu lo sonci cu cikybi'o— li'u»
ni'o ca lo djedi vo moị lo sonci cu litru klama fu lo carce fe lo ra zdani tcadu
.i no lo pendo .e no lo lanzu se ckini sy za'o sanji
.i je naị sy sanji da poị sy ke'a bu'u viska
.i sy klama lo zdani be lo rirni
gi'e sipybi'o ca'u lo ve tivni
.i faụ lo nu senva cu viska lo pamsi'u za'u re'u
.i «lu .oị do za'u re'u co'e
—seị lo pamsi'u cu cusku—
.i do mi'a na ka'e tolstigaụ lo nu jaịrsi'u
.i se ki'u bo ko cliva pe'u li'u»
.i «lu .aị na go'i —seị lo sonci cu cusku—
.i ki'u bo mi ca ba'o facki lo du'u do zasti fi lo mi se senva
.i je .eị mi ralci lanli lo re do poi sinxa se xanri jo'u lo nàbmi poị do se va'u mi finti poị sinxa lo mi menvelxaị ku'o jo'u lo nu facki lo du'u ma kaụ danfu lo nau nabmi kei kei poị ka'onri'a nu litru li'u»
ni'o lo pamsi'u cu binxo lo ze'a smaji pu lo nu cusku fi lo sonci fe
«lu ti do na se senva
.i ti na saị se senva
.i zasti li'u»
.i «lu ta'i ma do ka'e taị birti lo du'u na se senva
—seị lo sonci cu retsku— li'u»
.i «lu ki'u bo do mi'a klama ca ro nicte
.i je ca ro nicte do tolci'o zenba
.i do va'o lo nu senva cu na zenba lo ka tolci'o —seị lo pamsi'u cu cusku—
.i ki'u bo lo temci na zasti fi lo se senva li'u»
.i «lu ku'i do ga'a mi na tolci'o zenba
—seị lo sonci cu cusku—
.i do co'a lo pa moị nu mi tu'a do senva cu stodi prane li'u»
.i lo pamsi'u cu za'u re'u binxo lo smaji
.i ditmaụ lo pu krefu
.i «lu la'e di'u pluja zmadu ro da poị ro ma'a ka'e djuno
—seị lo pamsi'u cu cusku be pu lo nu lo sonci cu cikybi'o— li'u»
.i sy klama lo bartu be lo zdani
gi'e catlu fa'a lo nicte tsani
.i troci lo nu sanji su'o pa lo so'i tarmo'a
.i ku'i no lo ro da cu slabu lo ra kanla
sànga
ni'o mi'e lo zgana
.e lo viska
.e lo ganse
ni'o .aị mi jdice lo du'u ma kaụ censa vanbi
.i .aị mi pajni
.i .aị mi ro moị lo stika
ni'o ro da jmive
.i ro da jmive
.i ro da jmive
co'u lo nu mrobi'o
ni'o ro da ba mrobi'o
.i ro da mrobi'o
.i ro da mrobi'o
ja'e/te zu'e lo nu za'u re'u jmive
.i fi'i saị zanvi'e
.i lo ca krefu ba se fanmo
.i do ba se cuvgaụ
.i do ba se cuvgaụ
.i do ba se cuvgaụ
za'u re'u .i za'u re'u
tàvla
ni'o ma'a ba zi tolsti
.i mi do ba bregaụ lo nu se cuvygaụ
.i ko vimcu ro na'e bo lo genja
te zu'e lo nu djuno lo du'u do je'a mo kaụ
sànga
ni'o lo me do moị cu xagrai lo ro nunji'e
.i do pu catra ro lo cevni poị ke'a do gapru ku'o gi'e finti lo do dimna
.i lo ji'a sai nunmro
cu dzigaụ lo ri tolmle stedu
fa'a do
.i do ba'o binxo lo se ditcimni
.i to'e ki'u nai ku ...
lo nu crocai cu tolnicygaụ lo do flira
.i xu ja'a
tai malnabmi da
fa lo nu da
.angeli
.i lo jai ca
sajbi'o
be lo du'u ze'e
ba'o canci
cu fanmo
lo ca
krefu
tàvla
.i mu mu
.i ci vo
.i re pa
.i pa ci
.i bi
.i mu
.i ci
.i re
.i pa
.i CA KU KO VISKA LO MI SE VISKA
|
# xesybau
ni'o lo xesybau goi ko'a cu bangu lo prenu poi ke'a cu xabju lo xesygu'e .e la'o gy. Cyprus gy. gi'e xespre .i xesybau ji'i pavoki'oki'o lo prenu
|
kerlo
ni'o lo kerlo cu rango le zgana je ganse sance boxna .i ro le danlu cu nalsimsa fi le ka lo kerlo stuzi cu nenri lo xadni .i lo me la kortis. rango noi ke'a cu nenri xadni kerlo cu tirna rango .i
mabru kerlo [stika ti]
ni'o ro mabru kerlo cu vasru ci bongu no'u lo mrubo'u ku ce'o lo kerzbebo'u ku ce'o lo kercupybo'u .i lo mrubo'u .e lo kerzbebo'u cu tarbyfavmapti lo xedja bongu be fi lo drata bogda'u .i lo bongu cimei cu matri'a lo vacri nilzunti lo litki nilzunti .i lo sluji cu stika lo nilzunti vau lo cladu sance
nalmabru tirna rango [stika ti]
ni'o lo jukni tuple kerfa cu sance ganse
ni'o lo respa kerlo cu vasru re lo bongu no'u la'o gy. columella gy. |
lo pèmci
lo xislu nu bastygau
(to la'o gy. Der Radwechsel .gy noi se finti
la'o me. Berthold Brecht .me toi)
sei mi fanva
.i mi zutse ne'a lo dargu
.i lo sazri cu selbastygau lo xislu
.i mi na nelci lo nu mi zvati lo te klama
.i mi na nelci lo nu mi zvati lo se klama
.i ma krinu lo nu mi sutydji lo nu lo xislu nu bastygau cu mulno
ro lo ma'a dàtka
(to dòtco ke vèrba selsà'a toi)
sei mi fànva
ro lo ma'a dàtka
noi làlxu lìmna va
cu làlxu lìmna ca
.i stèdu jìnru .i je
gàltu rèbla ua
ju'i brùna
(to la'o fy. Frère Jacques .fy toi)
sei mi fànva
ju'i brùna ju'i brùna
.i sìpna xu .i sìpna xu
.i lo jànbe ko se tìrna
.i lo jànbe ko se tìrna
.i dindindòno
.i dindindòno
smuni
(to la'o dy. Definition .dy noi se finti
la'o me. Erich Fried .me toi)
sei mi fanva
`I
lo gèrku
poi ki mòrsybi
je poi ki djùno lo du ki mòrsybi
je poi ki kàkne lo ka ce xùsra lo du ki mòrsybi
cu rèmna.
ri ckaji lo se ckaji be ri
(to la'o dy. Es ist, was es ist .dy noi se finti
la'o me. Erich Fried .me toi)
sei mi fanva
ni'o «lu ri nu bebna li'u»
se cusku lo ka racli
.i «lu ri ckaji lo se ckaji be ri li'u»
se cusku lo ka prami
ni'o «lu ri malfu'a li'u»
se cusku lo ka lanli
.i «lu ri nu cortu kei po'o li'u»
se cusku lo ka terpa
.i «lu ri se danfu no da li'u»
se cusku lo ka radji'i
.i «lu ri ckaji lo se ckaji be ri li'u»
se cusku lo ka prami
ni'o «lu ri fanza li'u»
se cusku lo ka jgira
.i «lu ri nu tolbanzu jundi li'u»
se cusku lo ka capyju'i
.i «lu ri tolcumki li'u»
se cusku lo ka pu lifri so'i da
.i «lu ri ckaji lo se ckaji be ri li'u»
se cusku lo ka prami
|
# xindo ropno bangu
ni'o loi xinjoiro'o bangu cu banlanzu ji'i 443 da gi'e bangu ji'i ciki'oki'oki'o remna .i ze xinjoiropno cu bangu su'o panonoki'oki'o remna .i lo xindo joi xurdo .e lo glico .e lo spano .e lo rusko .e lo porto .e lo fraso .e lo dotco go'i
ni'o lo xinjoiro'o bangu no'u
- lo me la kentum. bangu no'u
- lo xelso bangu .e
- lo bangrxitaliko no'u
- lo bangrxosko .e
- lo bangrxumbri .e
- lo bangrfaliska .e
- lo latmo bangu .e
- lo la'orpanzi bangu no'u
- lo talno bangu .e
- lo porto bangu .e
- lo spano bangu .e
- lo katlana bangu .e
- lo .okcitano bangu .e
- lo fraso bangu .ezo'e ge'u ge'u .e
- lo kelto bangu no'u
- lo ritkelto bangu no'u
- lo mraigo bangu .e
- lo kernauke bangu .e
- lo bre'one bangu ge'u .e
- lo gailge bangu no'u
- lo skoto gailge bangu .e
- lo me la .erin. gailge bangu .e
- lo gailgvani bangu ge'u ge'u .e
- lo brasmudotco bangu no'u
- lo sicydo'o bangu no'u
- lo glico bangu .e
- lo kotygli bangu .e
- lo dizdo'o bangu .e
- lo dotco bangu .e
- lo brodo'o bangu .e
- lo ma'ardo'o bangu ge'u .e
- lo berdo'o bangu no'u
- lo bangrxislenska .e
- lo bangrferoi .e
- lo norgo bangu .e
- lo zvero bangu .e
- lo bangrdanska ge'u .e
- lo sundo'o bangu .ava'ibo lo bangrgota ge'u ge'u .e
- lo me la satem. bangu no'u
- lo xinjoiparso bangu no'u
- lo brasmuxindo bangu no'u
- lo srito bangu .e
- lo xindo bangu .e
- lo xurdo bangu .e
- lo gudjrati bangu .e
- lo sinxala bangu .e
- lo marxati bangu .e
- lo tsigano bangu .ezo'e ge'u .e
- lo brasmuparso bangu no'u
- lo parso bangu .e
- lo bangrtadjiki .e
- lo bangrkurdi .ezo'e ge'u ge'u .e
- lo bangrxai .e
- lo bangrbalti no'u
- lo bangrlietuva .e
- lo bangrlatfia ge'u .e
- lo slovo bangu no'u
- lo sicyslovo bangu no'u
- lo bangrpolski .e
- lo slovako bangu .e
- lo tce'exo bangu .e
- lo bangrsorbo ge'u .e
- lo nanslovo bangu no'u
- lo slovino bangu .e
- lo serbo bangu .e
- lo xorvato bangu .e
- lo bolgaro bangu .e
- lo slovrmakedoni bangu ge'u .e
- lo sunslovo bangu no'u
- lo rusko bangu .e
- lo vukro bangu .e
- lo labru'o bangu ge'u ge'u .e
- lo ckiptare bangu ge'u ge'u
|
alxebra
ni'o lo alxebra goi ko'a saske lo stura je ckini je klani cmaci .i lo sampu alxebra cu di'i te ke galtu ckule .i ko'a srana lo si'o lo namcu cu pilji ja dilcu ja se vimcu ja jmina kei .e lo si'o fa'ispu lo jmina je pilji je se vimcu jenai dilcu ke stona'u je cnena'u
ni'o ko'a zmadu lo sapme'ocmaci lo ka barda kei fo lo ka saske gi'e zbasu kakne tolsteci .i seba'i lo nu cusku lo mekso sumti sepi'o lo namcu cu pilno lo sinxa mekso .e lo cmima .i lo jmina je pilji cu tolsteci selsazri gi'e satci selsmuni fi'o cupra lo stura mu'a lo girzu stura .e lo djine stura .e lo cmaci foldi |
ni'o no mo'o nergi'a::
ni'o la'edi'u se jicmu lo se gunka be la .stifen.mitcl. gi'e se fanva la .andrus.piekarskis. gi'e se cipcta la .maikl.turnianskis.::
ni'o da goi ko'a pu viska ro de gi'e pu lifri tu'a ro selcni po'u lo gekrai ku bi'i lo drirai gi'e terdu'a lo senva velcki be tu'a lo banli nonseljmi .e tu'a lo mipri stuzi .e tu'a lo prutce djedi poi purci la banli gairjaudu'e
.i ko'a pu klama ti ti lo korbi be lo munje ja'e loka dusta'i je ku'i kanro
.i ko'a pu rakci'a tu'a lonu ko'a te cipra lo tanbo be lo rokci gi'e pu cikre lo la .e,anas. censa malsi .e lo brabra bitmu pe la .uruk. poi no tcadu ka'e dunli ke'a
.i .ue ga'a ko lo badbi'u cu simlu lo ka tunka te gusycai kei fo tu'a lo solgu'i
.i .e'u ko cpare lo rokci serti noi tolcitmau ro kakne be lonu xanri ku'o gi'e jbikla lo la e,anas censa malsi ku poi censa la .ictar. zi'e poi no censa malsi ku poi se zbasu lo nolraitru ku'o pu dunli ke'a loka barda .e loka melbi ku'o gi'e cadzu lo bitmu pe la .uruk. gi'e litru tu'a by. mo'ine'i le tcadu gi'e catlu lo by. di'uzbe gi'e lanli lo kitybli .e lo certu nu zbasu ky. ta'i makau gi'e zgana lo tutra poi se sruri by. zi'e poi se zvati lo ricnrarekake .e lo rulpurdi .e lo rutpurdi .e lo mleba'i nolzda je malsi .e lo zaisle .e lo zacpanka .e lo zdani .e lo gubypanka
.i ko facki fi lo rokyko'a .e lo poi cnita vo'e ku'o tunka tanxe poi se barna lo cmene
.i ko toltelgau fi ty.
.i ko kargau lo gacri
.i ko lebna lo tanbo be lo kunrlazuli ra
.i ko tcidu lo sedu'u la .gilgamec. cu traji xlafri gi'e traji snada
|
# xiouz.of.mait.and.madjik to 5moi toi
la'o gy. Heroes of Might and Magic V .gy. goi ko'a cu cnino ke samselkei fi'o selfi'a lo klesrfentezi munje
|
xindo braxamsi
ni'o le xindo braxamsi goi ko'a cu cimoi leka barda lo braxamsi .i ko'a cpana pire lo djacu nilsefta pe le terdi sefta .i lamji ne'u la zdotu'a to ji'a le xindo tolbrazbani noi krasi le cmene be ko'a toi du'a la frikytu'a vu'a la poltu'a be'a la ziptu'a .i le nilca'u pe ko'a ji'i du li 292 131 000 kubyki'otre
|lo mu braxamsi pe lo terdi| |
lu le cukta li'u tcita ledi'e xe fanva be le lisri pefi'e la xypyp. lyfkreft. zi'epede'i li ji'ipasocivo .itu'efu'eju'ocu'i
ni'oni'o mojykalsa .i'unaisai bu'ocu'i .i norju'o ledu'u le cfari mokca pu fasnu ca ba'e makau .iki'ubo so'iroixipa se'o banli .ii purci mi .ije so'iroixireku'i se'o le cabna cu mokca co selsru le grusi je tarmycau cimni .iji'a ca'o benji ledei notci fu le nalselju'o .iju'a mi cusku .iku'i ruble jijnu ledu'u le xe benji bele selsku be mi be'o bei le stuzi be le tersku poi mi djica ke'a ku'o ba cizra jela'aru'e baltepygau .iji'a cfipu murse fa le mibypre smuni .iru'a ba'o banli te jenca lifri .iju'eru'e krasi fa le mabla se manci jalge be lemi nunrapli poi rircyrai je tolfadni lifyfau .i ri mulno je se birti se krinu lebi'u curselgre cukta goiko'a .i .a'e morji le fakstu ko'a .i puki manku je jibni le xekri je raskai rirxe poi stodi muvdu bumru cnita .i revycla mutce se kumfa .i le kajna co gu'e fusra cukta culno gi drudi tcena cu simlu co fanmycau porsi vile cankycau ke nenri kumfa je kevna .iji'a barda je tarmycau derxi le cukta vi le loldi .e le rufsu tanxe .i mi facki fi ko'a vi pale derxi .i na snada lemu'e cilre le cukta tcita .i claxu le crane papri .i ko'a karzukte vi le cukta fanmo .ibabo mi suksa je tortei viska da poi runtygau le sarxe flexu pele gasysanji
ni'o steci da .i mu'a liste le se cusku je se zukte ku .i'u.iire'e.a'unaisai .i da tcidu slabu mi sedi'o le noi mlimipri ke'a zi'enoi rigni joi cinrycai ku'o se ciska bele mintu be fu'e.u'ere'e le cizra je tolcni pevykakpa be fi le snura se mipri bele munje be'obe'o poi mi pu djica je ckire tcidu le cukta befi ke'a .i .au.a'afu'epe'a ckiku je gidvu fu'o ko'egoi lebi'u gremokca je banrytadji poi le cesfenki ru'i senva je blesku ke'a ze'upu le remna nuncfa ku'o zi'epoi gasnu le te facki .e le se zifre vu'ovoi bancu le marjymunje .e le plini .e le kesycanlu joike temci te cimde vu'o poi slabu mi'o fu'o .i sorctona'arbalvi lenu zo'e morji gi'a djuno co stuzi vau da .i ko'a ba'e revycla .i genai le minjypri gi le fekmli jdasivni xance ba'o ciska leko'a ckape je latmo jufra peseci'o le ruvle'u co se manci ka tolcni
ni'o ki .a'e morji lenu ko'igoi lebi'u nanmu noi tolcni puki gege ckasu se jvinu gi cizra cmila gi nalsau xansni zukte calenu mi ko'a batybei .i puku ko'i toltugni lenu mi fi vo'a pleji ko'a kei mu'i de poi clabalvi se smadi le mibypre .i calenu jarki je kruvi je bumclu rirxyla'i bo klaji sutrykla le zdani keiku mi terpa se xanri ledu'u le smamli stapa jamfu ca'o .o'unai bu'o jersi vo'a .i le xaksu tolvitno sruri zdani cu simlu le cnino je bilma jmive poi zukte zi'o le palci .ibo fu'epe'a ba'o suksa kalrygau ko'ogoi le purganlo co jilra nunsanji fu'o .i bitmu .i batytcena rudykoi .i gu'e dertu bliku gi te mledi mudri je bakri .i le peseta'i lo salpykurfa ge'u kanlysmi canko cu simlu co ckasu se jvinu .i fu'eda'i .ii rora jibni lenu nalkakne co narcfa co nerkla je danryspo be mi fu'o .iseni'inaibo ba'o tcidu le paucma po'o po'u lebi'unai jdanatfe ve sinxa pulenu ganlygau ko'a gi'ebabo batybei
ni'o ki .a'e morji lenu puki mulno tcidu .uo.u'a .i za'e pilda flira .i stela le nitydru kumfa poi mi ze'u pilno ke'a lo tolfadni nunsisku po'o .i mulsma fa le zdabra .ito'unai nicte midju .i ki su'a ju'oru'e lanzu puku .iku'i na tcila birti .iju sefpre si'imei ju'osai .i na detri sanji .i ba ra ku fu'e.u'e.i'unai ba'o lifri so'i cedra .e kestei .ije ba'o runta je cnegau lemi temci sidbo fu'o .i pukiku mi lakygrana se gusni tcidu .i ru'i digyfarlu lakse .ai .i di'inai se janbe le darno galdinju .i cizra pe'ipei jundi le se janbe .i da'i mu'ibo lenu mi terpa ledu'u tirna fi ra fe di poi darnycai je zunti tonga ge'ero'enaisai
ni'o .a'i.ue co'a sance le guska joi juxre .i bartu le canko .i canko le vorme poi te jvinu le gapru co drata drudi pele tcadu .i ko'u cabna lenu mi sagbacru le somoi pemcypau po'u da noi mujyclira .ice tepydesku jimpe fu'e.ainai le smuni be ko'u .i ca'e lo pagre be ko'e roroi te jmina le ctinytai .ije la'edi'u se balvi leza'i mulkansa fu'o .iba'o makfa benji .iju'o ko'a dunli le se jijnu be le pu mibypre .u'anaicai .i ve'a le mintu nicte kuku fe ko'e pagre le balsarlu co temci joi menli .ije le cerni nitydru bo kumfa zo'u viska fa le balmibypre ne'i le bitmu .e le kajna .e le ve lasna fe le narpruselvi'a
ni'o na viska le munje teki'i le purci ku ba la'ede'u .i roroi mixre fa le cabna bemi be'o le cabna ku joi le so'omei be le purci .i ro le pu slabu dacti cu simlu le cizra xebe'i le cnino je zenba pu'u viska .i ze'ubakiku senva cadzu pa'o le se manci peta'i le se tolju'o .a le se junmle .i daxiny.poi fu'epe'a ckiku je gidvu fu'o zo'u li ny.mei ve mlecu fi leka mi kakne co saurju'o le dacti po'u le jarki munje noi clani bapli mi .i mi .enai lo drata cu viska le vanbi bevo'a .i smamau je naljikca binxo balmibypre seki'u lenu mi na simlu le fenki .i le gerku mi ta'e terpa .i ra jijnu fo'agoi lebi'unai ctinytai noi noroi nalylamji mi .i si'a ca'o tcidu .i tcidu le cukta .e le slanycku vu'opoi tolgubni ja se tolmorji ke'a zi'epoi le cnino puvyviska cu gidva zo'i ke'a .i mi danre pagre le darmau se ckiku pe'a pelo kensa canlu .e lo nunzasti .e lo banrymorna ge'u le muctymunje midju co se tolju'o
ni'o ki .a'e morji le nicte poi vi ke'a ku mi puki zbasu mu midjymintu cukla le jelca bu'u le loldi .i sanli le midju .i sagbacru .i fo'egoi le tolcnano stepemci ba'o notci se bevri fo la tartar. i le bitmu ba'o runme .ibabo le xekri brife mi vilbei pa'o le balcoi co lolcau je grusi .i minli se cnita le jesnysmi jipno be le nalslabu cmana .ibaze'aku mulno manku .ibabo te gusni co gigdo tarci ta'i le cizra je tolslabu tarmorna .i ta'onai viska le plita co crino se gusni peni'ave'u mi .i vi ra ku sarlykru galdinju tcadu tepa'a no tcadu poi mi djuno ja tcidu ja senva sera'a ke'a .i jbimau fluvoi fa'a fo'igoi lebi'unai tcadu .icabo viska le banli rokci je kurfa dinju vi le kunti foldi .i cinmo le tolmelbi nunterpa poi jgari pe'a .i tepcmo .i damba .i za'i kunti co menli .ibabo di'a nitydru kumfa .i vreta le mu murse ke loldi cukla .i le steci nicte pu'u litru kei cu se pagbu gezu'u le mlecu befi leka cizra kei beife so'i purci nicte be'obe'o gizu'unai le zmadu befi leka tepcai .iki'ubo jimpe ledu'u mi zmadu fi leka jibni le bartu pe'a balcoi je plini keiku fe ro purci be mi .ibabo co'a to'e darsi co makfa sagbacru .i naku djica lenu seirgau le balmibypre .e le xadni .e le terdi ne'i le se tolju'o balcoi poi mi na kakne co sezyxru ke'a ta'a fu'otu'u
|
# xindo braxamsi
ni'o le xindo braxamsi goi ko'a cu cimoi leka barda lo braxamsi .i ko'a cpana pire lo djacu nilsefta pe le terdi sefta .i lamji ne'u la zdotu'a to ji'a le xindo tolbrazbani noi krasi le cmene be ko'a toi du'a la frikytu'a vu'a la poltu'a be'a la ziptu'a .i le nilca'u pe ko'a ji'i du li 292 131 000 kubyki'otre
|
selrunme
ni'o so'a le selxu'i cu ckaji leka le selrunme cu dunli le seldunja .imu'a le margu cu runme li 234.42 gi'e dunja li 234.42 .i le selrunme .iku'i so'o le selxu'i cu ckaji le ka le selrunme cu frica le seldunja .imu'a la .agar. cu runme li 358 gi'e dunja li 305 bi'i li 313 .i leti xumtra selcme cu naldu'ixrulu'a .i so'u le selxu'i noi ke'a cu zbasu nalvelganzu sligu ku'o mu'a le blaci ka'e cu cumki tinsa secau lenu binxo le krili sligu
ni'o ko'a cu mliki'i le danre |
ni'o lo botpi cu cpana lo jubme bu'u lo midju be lo kumfa i ze'a lo jeftu no da pagre lo vorme i lo lumci selfu na kurji gi'e na gasnu lo nu basti lo djacu i ja'e bo lo ralju jutsi be lo tcecmada'u cu binxo lo mutce tolci'o gi'e farvi lo mutce certu be lo saske i lo tarci saske cu traji lo ka pluka i lo prije cu ze'u catlu lo tsani dacti i lo cecmu cu nelci lo nu casnu lo jivna velcki i lo re canko noi se fanra lo stuna fa'u lo snanu cu rinka lo re solri nanca noi temci frica i lo re moi co'a kansa lo pa moi lo nu se mixre i lo pa moi cu za'u re'u se lidne lo re moi ba lo manku temci i ca'o lo nicte lo so'i rorgri cu jbena gi'e mrobi'o i lo tcaci datni be lo solri cu co'a jdika lo ka tsali i ja'e bo lo tolpa'apre co'u pacna lo nu lo solri ba xruti i lo lunra noi culno cu tcica su'o lo traji prije ji'a sai i ca lo xa moi ke clani solnanca cu tolcanci fa ko'a goi lo tcecmada'u poi naldu'i se menli i ko'a vimcu ro lo purci saske gi'e te cerda lo se darlu je te darlu
ni'o lo se sruma be ko'a ka'e se tcita lu sidbo be lo kumfa li'u i su'o tcila cu toldra i lo kumfa na culno lo pinxe xamgu djacu i ji'a lo bitmu na dunli lo jubme gacri lo ka marji i ku'i sa'e nai lo ko'a velcki cu jibni mapti lo fatci i ko'a kanji lo te sepli pe lo botpi jo'u lo jubme jo'u lo bitmu jo'u lo fagri stuzi kajna jadni jo'u lo djedi be li bi zmiku junla fi'o se satci lo mikri ki'u lo nu lo ko'a tutci jo'u tadji cu carmi ralci i lo se cupra be ko'a cu se zanru lo traji tolkripre
ji'a sai i ku'i le prije cu se menli lo vrude je tinbe gi'e jdice lo nu favgau ji'u lo natmi ranmi i ca lo krasi pu lo nu lo saske cu tolcanci cu ranmi lo nu lo pelxu kurfa pe lo berti bitmu cu karbi'o fi lo dacti noi nalxanri tcebra zi'e noi ze'a lo so'o rorcedra cu selvi'a muvdu fo lo kensa i lo gusni noi ke'a fi lo ka carmi cu zmadu lo solri fi'o jinvi su'o da gi'e zmadu lo lunra do'a fi'o jinvi su'o de cu kansa le barda muvdu lo nu mluni i ca'o la'e di'u lo botpi cu desku lo lindi sance jo'u ckicau jenca i jursa sance lo mlana be lo tsani i lo fanmo savru cu sinxa lo nu canci i lo tcecmada'u ca lo nu snada lo nu xruti fi lo se jenca cu viska lo nu lo kurfa pelxu diklo cu za'u re'u tcaci jvinu i la'e di'u lisri fi lo junri je racli i cu'u lo mleca se ctuca lo lisri cu frica i lu ca lo purci je cilce djedi lo tcecmada'u poi krinalka'e barda cu nerkla pa'o lo bitmu i bevri jgari lo solri lo jgalu i lo nu limna cu rinka lo nu pi ro lo botpi cu desku i lo brabra pu lo nu barkla cu frigau lo junla da li'u i lo cecmu cu se spaji lo nu le prije cu radzau lo di'u fadni se darlu i lo brabrapre poi bevri lo gusni zi'e noi simsa lo pu se viska cu di'i cadzu zo'a lo bartu mlana be lo bitmu be lo kumfa i lo nu cadzu zo'a lo canko fa'u lo drata canko cu ve ciksi lo re solri nanca i ku'i ko'a za'o co'e i lo tcecmada'u munje cu vasru lo traji rirci no'u lo junla noi se pagbu lo dandu jo'u lo crane jo'u lo cmaxance i lo so'i zgana rorgri cu birti jarco lo nu ge lo dandu cu slilu gi ge lo cmaxance cu muvdu fo lo crane gi ge lo nu janbe cu jibni dikni gi ju'o cu'i do'a nai pensi lo te ckini be lo te dikni bei lo ve muvdu be fo lo cmaxance i co'a lo krasi lo junla cu te denmi lo ka se jundi i jy midju lo ro sinxa be lo te zukte be lo nu munje zbasu i lo zbasu noi manku cusku fo lo drata se zbasu cu simlu lo ka bacru lo jetnu voksa se pi'o lo junla i lo cevni krici lo nalcevni krici cu damba lo junla zbasu se casnu i lo me la niuton tcecmada'u cu junla zbasu sarji gi'e darsi smadi lo du'u lo brabra poi bevri lo te gusni fu lo kumfa cu bilga lo nu muvdu ja'i lo junla nu muvdu
ni'o lo jalge be lo nu ko'a lanli cu zi binxo lo te lijda be lo jdasi'a i lo ranmi brabra cu gau du lo solri lo zbasu be lo junla i lo nu sinma lo junla zbasu cu basti lo purci lijda no'u lo nu pamsi'a lo djacu kei e lo nu pamsi'a lo dzena kei e lo cilce nu pamsi'a lo kajna be lo fagri stuzi i ro ka vrude cu te kairxu'a lo junla zbasu i lo ro mapti ke tcecmada'u se tarti cu gau jmaji lo se tcita be lu junla zbasu se tarti li'u i lo drata bende cu xusra tu'a lo tcecmada'utaisre i le prije pu xusra lo du'u pi ro lo kensa cu canlu lo djacu i no da mleca fi lo ka jetnu se jarco i no da mleca fi lo ka jetnu se jarco se kakne i ze'o lo nenri bitmu be lo botpi lo djacu cu sisti i va'o la'e di'u lo misno ke junla zbasu cu zvati ma i lo nu jmive cu nibli lo nu djacu i lo nu pensi cu nibli lo nu djacu i no da poi na xabju lo djacu cu kakne lo nu te sidbo lo temci e ji'a li'a lo junla i e'u mi'o lanli lo se stidi sei lo junla zbasu fapro cu cusku i ja'o lo danlu poi xabju lo djacu cu ca'o xabju lo bartu be lo djacu i ia nai i xu lo racli tcecmada'u cu kakne lo nu ze'a pensi lo tai cizra sidbo i ji'a sai da'i lo nalcumki cu fasnu i da'i to se va'u lo nu darlu toi lo jmive je pensi cu kakne lo nu zasti ze'o lo bitmu be lo botpi i ki'u ma lo junla zbasu na jarco vo'a i frili zy fa lo nu tavla lo tcecmada'u i frili fa lo nu ca lo nu zbasu lo junla cu punji lo se jimpe sinxa lo crane i mu'a lo vo ze moi se xusra a ji'a sai to va'o lo nu zy djica toi lo tutci be lo nu merli lo temci i ku'i ba'i bo fe'e di'i lo milxe dunli cu zvati fa lo na'e se smuni morna noi la'a jalge lo nu na kurji i ja'o ei ma'a va'o lo nu lo junla zbasu cu zasti cu se xanri lo nu zy na'e certu je xalbo je palci gi'e zbasu lo botpi jo'u lo jubme jo'u lo kumfa te zu'e lo nu po'o ckasu lo tcecmada'u lo nu betri
ni'o lo di'u se jinvi rai lo ka vlile cu se cusku lo cabna te pemci i lo malmisno pemci be fo lo junla zbasu be'o noi jenca lo cecmu cu se krasi di'e
i tcebra fa lo zekri poi do zukte
i tcebra tai lo mulno botpi
i doi junla zbasu mi do talsa
i lo nu do kusru cu bramau lo vasru
poi cpana lo kajna be lo fagri stuzi ku'o
gi'e dunli lo junla crane lo ka cukla
i do tsali je maljgira
i lo nu do certu cu banzu lo nu zbasu lo junla
i ku'i no da prali fi lo nu do tsali je certu
i lo nu po'o lo vrude tcecmada'u do ca'u catlu
cu rinka lo nu do se cfipu se ru'u lo do tutci
i do blabi binxo gi'e mipri do bu'u lo trixe kumfa
ni'o so'e da jinvi lo du'u lo te pemci cu dukse lo ka mabla cusku i da'i lo junla zbasu cu zasti i no da krinu lo nu sruma lo nu zy zanru lo nu lo tai se cusku na te sfasa i terpa lo nu pi ro lo botpi cu lifri lo nu venfu i lo te pemci ba lo nu se pajni ca lo nu jgira lo rigni se cinmo cu se dapma gi'e gubni se daspo i lo jursa se zukte cu rinka lo nu jimte ze'a lo so'o rorcedra lo zifre pensi pruxi
ni'o xanka denpa lo dorkra be lo zemoi ke relsolri nanca i ro darvistci pe lo botpi ca'o lo nu lo mokca ca'o jbibi'o cu se farna lo stuna canko a lo junla i ba lo fasnu so'i da denpa ca'u lo vorme pe lo tarci saske prenu ca lo nu ca'o kanji i su'o da jdaba'u i su'o da tolsi'a ke jdini talsa fi tu'a lo jalge i ku'i na se fanmo lo na'e se birti i lo junla jo'u lo solri na jarco lo ka satci mapti simxu i lo traji krici na snada lo nu jinga salci i ku'i lo te frica cu cmalu i lo tinsa traji be fi lo zifre pensi cu sanji lo sivni nu senpi i lu lo junla zbasu cu sezja'o se pi'o ro lo se zbasu li'u jo'u lu bandu be lo junla zbasu li'u jo'u lu lo jetnu ke junla saske cu se jarco gi'e se ciksi li'u cu se finti lo krici lo nu troci lo nu jdika lo ka dunku i lo zifre pensi cu vrici finti gi'e zengau lo nu jinga i lo krici ca'o lo nu ge lo cacra ca'o fasnu gi lo rorgri ca'o se lidne lo rorgri cu se darxi i lo nu krici lo junla zbasu cu ranji jdika i ba zi ku lo junla mi'u sai noi suksa muvdu gi'e toldikni dikni cu binxo lo se casnu be lo xalbo
ni'o ca bo za'a lo pelxu kufra pe lo berti bitmu cu kalri binxo i lo junla zbasu cu nerkla gi'e zukte lo nu tongau lo junla cabra
ni'o lo nu jenca cu traji i lo tcecmada'u pe ro ka nanca jo'u ro klesi cu se tisna lo censa stuzi i lo botpi cu tisna lo jdaselsanga i ro cinmo danlu pe lo botpi cu bredi lo nu dunda ro lo se ponse te zu'e lo nu selfu lo junla zbasu
ni'o lo junla zbasu ca lo nu mo'u tongau lo junla cabra cu zgana lo botpi i zy taske ri'a lo nu pinxe lo birje ca lo purlamnicte i ja'e bo zy pinxe pi ro lo se vasru be lo botpi i zy ze'a lo bavlamjeftu be li ci cu bilma bu'u lo ckana i lo mikce be zy cu minde lo nu mulno basti lo djacu sorcu pe lo vi tcadu pagbu
fa'o::
|
# xorxes.luis.borxes
la xorxes.luis.borxes. goi ko'a cu misno ke gento finpre .i ko'a jbena ca li 1899moi pi'e 8 pi'e 24 bu'u la buenosaires. gi'e mrobi'o ca li 1986moi pi'e 6 pi'e 14 bu'u la jenev. .i ko'a ba'o finti lo cortu cfika .e lo pemci .e lo notci
|
bakni
ni'o lo bakni goi ko'a cu barda tolcilce bogjmamabru .i ko'a cu bralai traji fo le .bos. zei seljutsi gi'e so'eroi se klegau fi la'e zoi ly Bos primigenius ly .i ko'a se kurji tezu'e lonu le ko'a rectu cu se citka kei .a lonu le ko'a ladru cu se pinxe .i vi so'u gugde to mu'i la xingu'e toi lo bakni cu censa .i ji'i 1pi3 bakni cu jmive vi le terdi caza
|
# la ckuzda pe la .babel.
## fi'e la .xorxeluis.borxes.
sei la .xorxes. cu fanva
By this art you may contemplate the variation of the 23 letters...
The Anathomy of Melancholy, part. 2, sec. ii, mem. iv
ni'o lo munje to noi zo ckuzda cu cmene ke'a lo drata toi cu gunma lo vei no'o ja ju'o cu'i ci'i xavyselmla kumfa noi barda ke vacri se kevna lo
midju zi'e noi se korbi lo dizlo garna .i ro xavyselmla cu te jvinu lo cnita jo'u gapru loldi lo famcau .i lo te ganzu be lo kumfa cu na cenba .i
lo re no kajna noi lo mu clani kajna cu srana lo mlana cu gacri lo da'a re mlana .i lo se kajna .e si'a lo kumfa cu ja'a ru'e zmadu lo cnano
cuzdaku'i lo ka galtu .i pa lo kunti mlana cu se vorme lo cmalu kumcra lo drata kumfa poi dunli lo pa moi kumfa .e ro kumfa .i lo zunle jo'u pritu
be lo kumcra cu se zvati lo re cmatce sabnu .i pa ri curmi lo nu sanli sipna .i lo drata cu go'i lo nu mansa lo fanmo se nitcu .i vi pagre fa lo
sarlu serti noi se farna lo darno cnita jo'u gapru .i lo kumcra cu se zvati lo minra noi satci fu'irgau lo jvinu .i lo remna cu ta'e lojycpa fi lo
minra fe lo du'u la ckuzda cu na cimni to va'o lo nu da'i ja'a co'e zo'u ma krinu lo xanri fukpi toi .i mi zmanei lo nu senva lo nu lo se spali
sefta cu sinxa je nupre lo cimni ...i ro xavyselmla cu se gusni fi lo re bolci grute fe lo na'e banzu je na'e sisti
ni'o tai tu'a ro remna pe la ckuzda mi pu litru ca lo nu mi citno .i mi litru sisku lo cukta no'u ju'o cu'i lo liste be lo liste .i mi nau lo nu
lo kanla cu na ru'e kakne lo nu tolmifygau lo se ciska be mi cu bregau mi lo nu mrobi'o va lo minli be li so'u ne'a lo xavyselmla poi mi jbena bu'u
ke'a .i ca lo nu morsi cu na ba claxu lo kecti xance poi renro mi ga'u lo garna .i lo mrostu be mi cu ba lolcau vacri .i lo xadni be mi cu ba ze'u
jirbi'o gi'e fusra gi'e runta lo brife poi se rorci lo nu farlu noi cimni .i mi xusra lo du'u la ckuzda cu na se fanmo .i lo tersi'o cu darlu lo
du'u o xavyselmla kumfa cu sarcu tarmi lo traji canlu .a do'a nai lo se jijnu be ma'a bei lo canlu .i ra darlu lo du'u lo cibyselmla ja mumselmla
kumfa cu na ka'e se pensi to lo ru'icre cu xusra lo du'u lo ruxtcini cu jarco lo cukla kumfa noi vasru lo barda ke cukla cukta poi lo trixe cu ranji
pi ro lo bitmu .i ku'i lo se xusra be ra cu se senpi .i lo ra valsi cu manku .i lo cukla cukta cu cevni toi .i ku'i .e'i mi nau rapli xusra lo klusau
se jinvi .i la ckuzda cu bolci noi se midju ro xavyselmla zi'e noi lo cukykoi be ke'a cu na ka'e se kuspe
ni'o ro bitmu be ro xavyselmla cu se srana mu kajna .i ro kajna cu vasru ci re cukta noi manfo tarmi .i ro cukta cu se papri vo pa no da .i ro papri
cu se lijysenta vo no da .i ro lijysenta cu linji ji'i bi no lerfu noi xekri .i ji'a su'o lerfu cu zvati lo trixe be ro cukta .i lo tai lerfu cu na
jarco ja sinxa lo se cusku be fo lo papri .i ka'u lo tai na te tcini cu pu simlu lo ka cizra .i mi pu lo nu tordu dunda lo danfu to noi ju'o cu'i lo
nu facki ke'a cu traji to'e ki'u nai lo betri se preja lo ka vajni kei lo se lisri toi cu djica lo nu mojgau fi su'o jicmu
ni'o pa mai la ckuzda cu ze'e pu zasti .i lo tai jetnu noi sirji nibli lo nu lo munje cu balvi vitno cu na ka'e se senpi lo racli menli .i lo remna
no'u lo na'e prane cuzdaku'i zo'u cumki fa lo nu se zbasu lo cunso .a lo palci zbacrida .i lo munje noi melbi ricfu lo kanja jo'u lo nabmi se papri
jo'u lo na'e tatpi serti poi xamgu lo litru ku'o jo'u lo vimku'a noi xamgu lo zutse cuzdaku'i zo'u cumki fa lo po'o nu se zbasu lo cevni .i lo nu
ganse lo te sepli be lo cevra'a bei lo remra'a cu se banzu lo nu karbi lo vi rufsu je korcu sinxa poi lo fliba xance be mi cu malciska ke'a lo gacri
be lo cukta ku'o lo nenri ke se stura lerfu noi satci gi'e ralci gi'e xektce gi'e fukcau lanxe [1]
ni'o re mai lo ciska kantu sinxa cu klani li re mu .i lo tai se pajni cu curmi pu za lo nanca be li ci no no lo nu finti lo tolte'i velski be
la ckuzda gi'e mansa dafsabji lo nabmi poi no se smadi cu pu tolmifgau ku'o no'u lo tolmanfo je kalsa jinzi be so'a cukta .i lo pa ri noi lo patfu
be mi cu viska ke'a lo xavselmla pe lo pluta po'u li pa mu pi'e so vo cu gunma lo lerfu po'u M C V noi palci rapli fe'e co'a lo pa moi lijysenta fe'e
co'u lo ro moi .i lo drata noi bu'u vi mutce se catlu cu lerfu lajykalsa po'o gi'e ku'i lo da'a moi papri cu ve cusku lu doi temci lo do pirmido li'u
.i ka'u lo pa racli jufra .a lo pa drani nuzba cu se mapti lo so'i minli pe lo tolracli malsna jo'u lo valsi kalsa jo'u lo seljminalka'e to ti'e bu'u
lo nurma diklo lo cuzdaku'i cu tolzau lo mafkri je palcau tcaci poi nu sisku lo smuni lo cukta .i ra xusra lo du'u dunli lo nu sisku fi lo se senva .a
lo kalsa linji pe lo xance ...i ra radji'i lo du'u lo finti be lo nu ciska cu pu fukygau fi lo re mu rarna sinxa .i ku'i ra xusra lo du'u lo fancu cu
cunso .e lo du'u lo cukta cu se smuni no da .i mi'o ba zgana lo du'u lo tai se xusra cu na mulno jitfa toi
ni'o da ze'u krici lo du'u lo tai selse'analka'e cukta cu te bangu fi lo prutce ja darno .i je'u lo prurai remna no'u lo pa moi cuzdaku'i cu se bangu
lo mutce frica be lo cabna .i je'u ri'u va lo minli be li so'o lo bangu cu gribau .i je ga'u va lo so no loldi cu seljminalka'e .i ke'u ro la'e di'u
jetnu .i ku'i lo vo pa no papri pe lo na'e cenba me M C V cu na kakne lo nu mapti lo bangu noi da'i ji'a sai gribau ja malsampu .i su'o da stidi lo
du'u ro lerfu cu ka'e stika lo jersi .i M C V pe lo ci moi linji pe lo papri po'u li ze pa cu na dunli lo mintu porsi pe lo drata stuzi pe lo drata
papri lo ka vamji .i ku'i lo tai nalsatci se stidi cu na zenba lo ka se zanru .i lo drata cu pensi lo te mifri .i lo tai se sruma cu ve'e se radji'i
.i ku'i na go'i fa lo smuni be ra bei lo finti
ni'o pu za lo nanca be li mu no no lo ralju pe lo gapru xavyselmla [2] cu tolcri lo cukta noi cfipu tai tu'a lo drata gi'e ku'i vasru lo ji'i re papri
pe lo saxsi'u linji .i ra jarco lo se tolcri lo litru tolmifygau noi cusku lo se du'u lo porto cu bangu fi ra .i lo drata cu cusku tu'a lo xebdo'o .i
pu lo nu mo'u ctona'a cu facki fi lo bangu fe lo du'u ri smoiedylietfio gribau pe lo guarni'o zi'e poi krasi xrabo taicne .i ji'a da tolmifygau lo se
vasru noi faircmaci sidbo poi se mupli lo jitcau rapli vrici .i lo tai mupli cu curmi lo nu lo mencre cuzdaku'i cu facki lo jicmu seldikni be la ckuzda
.i lo bi'u nai pensi cu zgana lo nu ro cukta noi na vajni fa lo nu vrici cu gunma lo mintu selci no'u lo ca'urle'u jo'u lo mocle'u jo'u lo ka'arle'u
jo'u lo re re lerfu be lo .alfabeta .i ji'a ra xusra lo fatci poi ro litru cu srasabji ke'a noi du'u na zvati la barda ckuzda fa lo re cukta poi dunsi'u
.i ra lojycpa fi lo tai terdaunalka'e fe lo du'u ge la ckuzda cu ro mei gi lo ri kajna cu ve vreji lo ro cumki porsi be fi lo re so'o ciska kantu sinxa
to klani lo bratce je nai ku'i cimni toi .i va'i ro da poi ka'e se cusku .i bau ro bangu .i ro da .i lo tcila lisri be lo balvi .i lo sezyskinoi be lo
raly'angeli .i lo pa jetnu liste pe la ckuzda .i lo vei ki'o je ki'o jitfa liste .i lo jarco be lo nu lo tai liste cu jitfa .i lo jarco be lo nu lo pa
jetnu liste cu jitfa .i lo junxi'o xagnuzba be fi la .basilides. .i lo pinka be lo tai xagnuzba .i lo pinka be lo pinka be lo tai xagnuzba .i lo jetnu
datni be lo nu do mrobi'o .i lo xe fanva be ro cukta bei ro bangu .i lo selfi'i poi la .bedas. cu pu'i ciska sa ra'a lo ranmi be fo lo purgli .i lo se
cirko cukta be fi la .tacitus.
ni'o lo nuzba be lo nu la ckuzda cu kuspe lo ro cukta cu pa moi te frati lo nu fenki gleki .i ro remna cu cinmo lo ka ponse lo curve je se mipri selcfu
.i no prenu ja munje nabmi zo'u lo klina danfu cu na zasti bu'u su'o xavyselmla .i lo munje cu se krinu .i lo munje cu suksa zerle'a lo jitcau cimde be
lo nu pacna .i ca lo tai temci da mutce casnu lo zanvelcki noi cukta be lo nu sinma bandu gi'e dimna xusra zi'e noi zancki lo se zukte be ro remna pe lo
munje gi'e ralte lo se manci se mipri pe lo ra balvi .i so'i ki'o djipre cu cliva lo titla ke veljbe xavyselmla gi'e co'a litru lo serti fa'a lo galtu
fau lo nu ra se xlura lo palcau te zukte poi nu tolcri lo ra zanvelcki .i lo tai litru cu dapsi'u bu'u lo jarki nerklaji gi'e bacru lo manku se dapma
gi'e nebda'esi'u bu'u lo cevra'a serti gi'e renro lo tcica cukta lo condi pe lo tubnu gi'e se mrobi'o fau lo nu farlu gau lo remna pe lo darno diklo .i
lo drata cu fekybi'o ...i lo zanvelcki cu zasti to mi pu viska re da poi srana lo balvi prenu noi ju'o cu'i na xanri toi .i ku'i lo sisku cu na morji lo
du'u da pacna lo nu tolcri lo me da moi .a lo nalmapti fukpi be lo me da moi lo selkajyka'e po'u li no
ni'o ji'a ca la'e di'u da pacna lo nu ciksi lo jimcu se nalju'o be lo remna be'o no'u lo krasi be la ckuzda jo'u lo temci .i je'umlu fa lo nu lo tai vajni
se nalju'o cu ka'e se ciksi se pi'o lo valsi .i ju'o la ckuzda va'o lo nu lo bangu be lo pesprije cu na banzu cu ba'o cupra lo nalsau bangu poi se nitcu
jo'u lo valsi jo'u lo gerna be lo tai bangu .i ze'a lo ctona'a be li vo lo remna cu ca'o litru lo xavyselmla ...i su'o da catni sisku .i va'i lalpai .i mi
pu viska da ca lo nu da zukte lo jibri be da .i da ro roi tatpi tolci'a .i da tavla fi lo serti poi claxu lo te serti zi'e noi na ru'e catra da tavla lo
cuzdaku'i lo kumfa jo'u lo serti .i da su'o roi lebna lo jbirai cukta gi'e mlitcidu ri fau lo nu sisku lo palci valsi .i za'a no da kanpe lo nu facki de
ni'o li'a lo nonri'u nunpa'a cu lidne lo dukse nuntolpa'a .i lo nu birti lo du'u ge su'o kajna be su'o xavyselmla cu vasru lo jemna cukta gi lo tai jemna
cukta cu selcpanalka'e cu simlu lo ka na ru'e selrevnalka'e .i lo cestolsi'a girzu cu stidi lo nu ge sisti lo nu sisku gi ro remna cu xregau fi lo lerfu
jo'u lo sinxa co'u lo nu zbasu ta'i lo cunso seldu'a lo tai jimcu cukta .i lo catni cu bilga lo nu xe flalu lo jursa .i lo girzu cu tolcanci .i ku'i mi ca
lo nu verba cu viska lo tolci'o remna poi ta'e ze'u sezmipri bu'u lo vimku'a fi'o se kansa lo jimne cukla poi nenri lo cmabaktu zi'e poi ruble fu'irgau fi
lo cevra'a kalsa
ni'o si'a nai lo drata cu krici lo du'u vajrai fa lo nu vimcu lo palcau selfi'i .i ra vlile nerkla lo xavyselmla .i ra jarco lo ca'irpikta noi na ro roi
jitfa .i ra se fanza mlitcidu lo selpapri .i ra dapma lo mulno kajna .i lo nu ra fengu je jusycurve lumci cu rinka lo nalracli nu cirko lo megdo be lo
cukta .i lo cmene be ra cu se xebni .i ku'i lo klaku be fi lo selcfu poi fenki se daspo cu nalju'i lo re vajni fatci .i pa mai la ckuzda cu tai barda ja'e
lo nu ro nunyjdika poi remna se krasi cu cmacimni .i re mai ro mupli cu pa ro mei gi'e selbasnalka'e .i je ku'i (to ki'u lo nu la ckazda cu ro mei toi ro
roi zasti fa so'o xecto be lo kilto be lo nalprane fukpi no'u lo selfi'i poi frica fi lo pa lerfu .a lo pa ka'arle'u .i ka'u nai ru'a .u'o lo jalge be lo
nu daspo fa la cuvgau cu se du'erbasna ri'a lo nu terpa lo tai fekyzu'e .i ri te mukti fi lo nu fekydji lo nu cpacu lo cukta pe la conxunre xavyselmla .i
lo tai cukta cu cmamau lo rarna gi'e rolvli gi'e xravau gi'e makfa
ni'o ka'u lo drata ranmi pe lo cedra cu me la io cukta nanmu .i .ei su'o lo kajna be su'o lo xavyselmla sei lo remna cu pajni cu se zvati lo cukta poi
sinxa gi'e prane se jmaji vau lo ro drata .i lo pa cuzdaku'i cu litru ra gi'e simsa lo cevni .i bau lo diklo bangu cu za'o zasti fa lo velvi'u be lo nu
jdasi'a lo bi'u nai darno se jibri .i so'i da litru sisku ra io .i ze'a lo ctona'a cu palcau litru lo mutce vrici dargu .i ta'i ma tolcri lo selsi'a ke
selmipri xavyselmla poi se xabju ra .i da stidi lo xruti tadji .i te zu'e lo nu tolcri lo cukta po'u A cu .e'i pu tcidu lo cukta po'u B zi'e poi jarco
lo stuzi be A .i te zu'e lo nu tolcri lo cukta po'u B cu .e'i pu tcidu lo cukta po'u C .i go'i ra'o co'u lo cimni ...i mi fau lo tai se tarti cu du'erdu'a
je xaksu lo mi nanca .i pe'i na naljetmlu fa lo nu su'o kajna pe lo munje cu se zvati lo mulno cukta [3] .i ce'a mi pikci lo nalterju'o cevni lo nu lo pa
remna to pa mo'a nai da pu za lo kilto be lo nanca toi cu pu'i lanli gi'e tcidu ra .i va'o lo nu se sinma gi'e djuno gi'e gleki vau na ku fa mi cu .e'o
ja'a co'e fa lo drata .i .e'o zasti fa lo cevzda to'e ki'u nai lo nu da'i mi se dimna lo fagvi'o .i .i'a mi se daspo .i ku'i .e'o ca lo mokca bu'u lo
jmive lo do io barda ckuzda cu se krinu
ni'o xusra fa lo nalkri lo du'u ge lo muncau cu cnano bu'u la ckuzda gi lo racli to lo ji'a sai cumla je curve sarxe toi cu na'e ru'e makfa nafselte'i
.i ra tavla fi fu'e ke'u la glabilma ckuzda noi lo cunso selpapri cu ru'i se ckape lo nu binxo lo drata zi'e noi xusra je tolxu'a je fi'urgau ro da tai
tu'a lo fenki cevni fu'o .i lo tai valsi noi ge po'o nai tolzau lo ka kalsa gi ji'a mupli ri cu je'urja'o lo nu ra mabla ga'erstati jo'u lo nu ra tolpa'a
nalju'o .i je'u la ckuzda cu vasru ro valsi stura .i je go'i ro porsi poi lo re mu ciska kantu sinxa cu curmi .i je ku'i go'i no traji muncau .i terplicau
fa lo nu te pinka fi lo du'u ge lo xagrai selpapri pe lo so'i xavyselmla poi se catni mi cu se tcita lu se komganzu lindi li'u gi ge lo drata cu co'e
lu bakri slusuksa li'u gi lo drata cu co'e lu .axaxaxas.mlun. li'u .i lo tai bridi noi ca lo nu pa re'u viska cu simlu lo ka na'e sarxe cu ju'o kakne
lo nu krinu se ciksi fo lo mifra ja sucyxra velski .i lo tai velski cu vlagunma gi'e ru'a se vasru la ckuzda .i mi na kakne lo nu xregau fi lo so'o lerfu
no'u mu'a zo'oi
dhcmrlchtdj
zi'e poi la cevra'a ckuzda cu na pu kanpe zi'e poi bau su'o lo ri mipri bangu cu na se nenri lo betri smuni .i no da kakne lo nu bacru lo slaka poi na
culno lo nunxe'o jo'u lo nunte'a zi'e poi na cmene bau su'o da lo vlipa cevni .i lo nu tavla cu nu cusku lo kutyje'u .i lo dei terplicau je vladu'e xatra
cu xa'o zasti bu'u su'o lo ci no selpapri pe lo mu kajna pe lo selkacnalka'e xavyselmla .i ji'a go'i fa lo natfe be ri .i to no'o cumki bangu cu pilno
lo mintu valsi .i bau su'o da zo ckuzda cu se munvelcki lo drani po'u lu ve'e ze'e ciste fi lo xavyselmla kumfa li'u .i ku'i lo ckuzda cu nanba gi'a pirmido
gi'a drata .i je lo ze valsi poi munvelcki ra cu se smuni lo drata .i xu do doi tcidu cu birti lo du'u do jimpe lo mi bangu toi
ni'o lo nu tadji ciska cu toljudri'a mi lo cabna tcini be lo remna .i lo nu da birti lo du'u ro de ba'o se ciska cu nonmemri'a ja ruxri'a da .i mi se slabu
lo jarbu poi bu'u ke'a lo citno cu krosi'a lo cukta gi'e cilce cinba lo papri gi'e ku'i na kakne lo nu tolmifygau lo pa ji'a sai lerfu .i lo kupterbi'a jo'u
lo jifkri nunda'a jo'u lo nunjdali'u noi ro roi malfarvi lo bedzei cu tcejdikyri'a lo xa'urlai .i pe'i mi pu te pinka lo nunsezycatra noi ca ro nanca cu
zenba lo ka cafne .i ju'o cu'i mi se tcica lo nu tolci'o gi'e terpa .i ku'i mi smadi lo du'u ge lo remna jutsi noi selte'i cu pu'o canci gi la ckuzda ba
renvi fau lo nu se gusni gi'e nonkansa gi'e cimni gi'e prane cando gi'e te xarci fi lo jemna selpapri gi'e terplicau gi'e furnalka'e gi'e selmipri
ni'o mi pu zi ciska zo cimni .i mi na setca lo tai valsi se ja'e lo cusku tcaci .i ju'a na lojypro fa lo nu pensi lo nu lo munje cu cimni .i da poi pajni
lo du'u ra se jimte cu sruma lo du'u bu'u lo darno lo nerklaji jo'u lo serti jo'u lo xavyselmla cu ka'e sisti noi tolracli .i da poi se xanri lo nu ra
claxu lo jimte cu tolmo'i lo du'u lo se klani be lo cukta cu ja'a se jimte .i mi darsi lo nu stidi lo di'e danfu be lo tolci'o nabmi .i la ckuzda cu jitcau
gi'e dikni .i lo da'i vitno litru poi pagre ra fa'a ma kau cu facki ba zu lo ctona'a be li so'i lo du'u lo mintu selpapri cu rapli po'i lo mintu kalsa noi
ki'u lo nu rapli cu binxo lo cnici no'u la cnici .i lo nonkansa me mi cu gleki lo tai pluka se pacna [4]
bu'u la .mardelplatas. de'i li 1941
lo krasi selci'a cu na vasru lo numle'u .a lo brale'u .i lo terpandi cu gunma lo ka'arle'u jo'u lo mocle'u .i lo re sinxa jo'u lo ca'urle'u jo'u lo re re lerfu be lo .alfabeta cu me lo re mu banzu sinxa poi lo fange finti cu kancu to'i pinka fi lo selfinbregau toi
ro lo xavyselmla ci mei cu pu vasru pa remna .i lo nunsezycatra jo'u lo fepri terbi'a cu ba'o daspo lo tai parbi .i lo selskunalka'e kamdri selmo'i zo'u su'o roi mi litru ze'a lo so'i nicte lo se spali nerklaji jo'u serti se cau lo nu tolcri lo pa ji'a sai ckuzdaku'i
ke'u lo nu lo cukta cu cumki cu banzu lo nu ri zasti .i lo po'o nalcu'i cu se tolvau .i mu'a no cukta cu serti ji'a .i ku'i ju'o su'o cukta cu casnu gi'e tolxu'a gi'e je'urja'o lo tai tcini .i je lo drata cu mapti lo serti lo ka stura
la .letizias.alvarez.toledos. cu te pinka fi lo du'u la barda ckuzda cu palcau .i sa'e banzu fa lo pa po'o selpapri pe lo cnano tarmi zi'e poi gunma lo ci'i papri poi cimni cinla to la .kavalieris. ca lo co'a pa ze moi ctona'a cu xusra lo du'u ro sligu cu se senta lo ci'i pliti toi .i lo nu pilno lo tai silka selbeicku cu da'i na se kufra .i ro papri cu simlu lo ka se tolplo ja'e lo simsa drata .i lo selpesnalka'e ke midju papri cu na se trixe
|
# bangu
ni'o lo bangu cu ciste lo gerna lo viska ja tirna ja pencu sinxa lo ka se smuni .i lo remna bangu cu se pilno lo nu skicu lo se lifri .i lo remna bacru bangu cu se skicu fo le sinxa ciste to le ciste cu vitci terdjuno la'o gy. lexemes gy. toi .e le gerna to javni toi fi'o kakne le nu jmina je galfi sinxa
|
gurni
ra'i Wikipedia
ni'o nilcupra[stika ti]
|Grain||Mg de'i li 2005||Mg de'i li 1961|
|zumri||711,762,871||205,004,683||lo zumri cu jicmu je remna cidja ne'i lo bemtu'a .e lo ketytu'a .e lo frikytu'a .ije le go'i cu cidja lo cange tolcilce danlu ne'i lo terdi|
|maxri||630,556,602||222,357,231||lo ralju gurni cu cidja ne'i lo citsi tumla|
|rismi[3]||621,588,528||284,654,697||lo ralju gurni cu cidja ne'i lo midju terdi sefta|
|bavmi||139,220,431||72,411,104||banro fi'o cpana lo tumla poi ke'a cu nalbanli bo ferti jake dukse lenku lonu banro maxri tepi'o lonu djacu cokcu kei .e lo cange tolcilce danlu|
|sorgus||59,722,088||40,931,625||lo jicmu gurni cu cidja ne'i lo zdotu'a .e lo frikytu'a .ije le go'i cu cidja lo cange tolcilce danlu ne'i lo terdi|
|cunmi||30,302,450||25,703,968||lo gurni girzu cu banro ne'i lo zdotu'a .e lo frikytu'a|
|mavji||24,032,521||49,588,769||pu ralju cidja ne'i lo sicko'ogu'e .ijecabo le go'i cu cidja lo cange tolcilce danlu ne'i lo terdi|
|mraji||15,202,142||35,109,990||banro ne'i lo lenku tumla|
|xrimraji||12,962,777||0||ginxre lo maxri .e lo mraji .ije simsa lo mraji|
|xrixruba||2,127,823||2,478,596||cidja ne'i lo rontu'a .e lo zdotu'a .i terpli vasru la'o gy. pancake gy. .e la'o gy. groat gy.|
|cunmrfonio||284,578||178,483||banro ne'i lo frikytu'a|
|spatrkinua||58,443||32,435||tolsau jibni gurni gi'e banro ne'i lo ketygu'e cmana| |
# nuncanci la krispinas ambylis
ni'o ne'i pa lu'a le selre'e po le pa va'e zi'e poi ke'a sutra xe klama la balkan fo le pinta je crino gugdrmadiara bo pintu'a ku'o lei re ritpre cu zutse va'o lo nu ru'i nai pedysmi casnu .i le go'i cu pa re'u jmaji ca le lenku je grusi cermurse bu'u le jecta korbi poi bu'u ke'a lo catni cipnrxakuila pe'a cu te jmina lo za'u moi stedu zi'e poi bu'u ke'a le dotco tutra fe'e mo'u fa'u fe'e co'a se turni lai xoenytsolrn fa'u lai xapspurk zi'e poi bu'u ke'a lo catlu ke catni cpimo'u pe'a cu bilga lo nu clite je kujmli ju'o cu'i je ku'i tatpyri'a ju'o ve kakpa zi'o lo dakli po lo za'e nunsipxagji pe'a litru .i ze'a le djedi cu denpa fi le nu stali la vin kei fo le nu litru .i ba zi bo lei re litru cu ge jmaji ne'a le trene gi xendo bo simxu je rarna zutse ne'i pa lu'a le selre'e .i le citme'a cu simsa lo'e jansu lo ka ce'u se viska jo'u jikca .i je da'i nai le go'i cu vancanja co ckini loi xlura vlipa .i ju'o le citmau cu karnysku .i no le re nanmu cu ckaji lo ka ce'u na'o mutce lo ni ce'u tavla .i je bo le'i re nanmu cu simxu lo nu ckire fi lo ka ce'u na'e mutce lo ka ce'u tavla .i se mu'i bo le go'i so'o roi di'i nai simxu lo nu tavla
.i pa te tavla cu rarna binxo le vajrai .i ne'i la vin le re mei ca le prulamdei cu se jungau fi le du'u pa terdi misno pixra cu cizra canci lo bitmu po'e la luvr
.i lu ba'a ju'o lo dracysmi nuncanci be pa'a la'e de'u cu cupra pe'a lo selcrepu pe'a noi fukpi so'i mei sei le karnysku cu cusku li'u
.i lu ba'a nai la'e de'u zo'u le nuncanci cu fukpi so'i da sei le vancanja cu cusku li'u
.i lu ie li'a la luvr pu ru'i nai te zerle'a li'u
.i lu mi pensi lo'e nu zerle'a lo remna e nai lo pixra .i su'a nai mu'u la noi fetfamti mi ku'o krispinas ambylis li'u
.i lu ba'a nai mi pu tirna da pe se ra'a le bi'u nai cuntu sei le karnysku cu cusku .i je ku'i ca bo mi zvati ze'o la gligu'e .i mi no roi djuno lo du'u ma kau cu fasnu li'u
.i lu e'a do ba tirna facki lo du'u ma kau cu ca'a fasnu .i jo bo do sinma lo du'u ri sivni sei le vancanja cu cusku .i pa mai ju'a le lanzu cu na'e birti lo du'u lo nu la poi fetspe ambylis goi ko'a cu canci cu betri .i la eduyd ambylis goi fo'a zi'e noi nakfamti mi cu ba'e na'e ruble lo ka ce'u zukte .i bo da'i nai ma'i lo jecta cuntu ku bilga lo nu sinma fo'a kei mu'i lo nu fo'a tsali .i je ku'i ju'o sai fo'a se jitro la krispinas .i je'u mi no roi penmi lo prenu poi ke'a na dunja pe'a ja'e lo nu se jitro kei ri'a lo za'i ze'u kansa ko'a .i zu'u so'o prenu cu rarna jatna .i zu'u nai la krispinas ambylis cu rarna za'e flafi'i jo'u za'e flarejgau jo'u za'e flatibyfu'e jo'u za'e selskupai jo'u curmi jo'u tolcru jo'u pulji jo'u pajni su'a .i la'e di'u co'a dimna ko'a ca le mu'e jbena o nai le nu verba .i pi ro lei selzda be bu'u joi ga'u le jupku'a ke zdani pagbu cu co'a se jursa se jitro ko'a .i je bo le go'i cu simsa lo'e cakcurnu poi ke'a lifri lo bisli cedra ku'o lo ka ce'u tolfapro go'i .i lo ka ko'a tarti kei ri'i mi noi ke'a se famti zi'e poi ke'a ru'i nai vitke cu simsa lo'e vidru lo ka ce'u ca'o lo nu renvi cu tolpluka kei e lo ka ce'u claxu lo vitno jalge .i je ku'i lei panzi be ko'a cu tcemanci ko'a .i bo loi nu tadni e loi nu pendo e lo selcu'a cidja e loi zdile e loi lijda ritli e lo selmlu be lo kerfa cu se javni fi'o se mapti lo seldji jo'u pluka pe le banli ninmu .i la'e di'u sidju do lo nu jimpe lo du'u le lanzu cu se jenca lo nu ko'a nalselzga je nalselckika'e canci .i ri simsa lo nu le la poi cesyvu'e paulos banli malsi a le la pikydilis xotli cu canci da'i ca lo nicte ja'e lo nu lo po'o canlu be no da cu datni lo stuzi be le no'a .i du'o ro da no de raktu ko'a .i da'i nai so'i pu'o fasnu cu rinka da'i lo nu lo nunji'e cu steci mansa ko'a .i le citrai bersa pu se'ixru fi le ckule fi'o se bevri le nalmansa ke te jungau seltcidu .i je bo ko'a pajni da'i tu'a le go'i ca le lecydo'i be le djedi poi ko'a ca ke'a cu canci .i ga nai le bersa pu suksa canci da'i gi kakne lo nu smadi lo mukti .i ji'a ko'a e pa nurma catnrdini pu ca'o simxu lo nu te xatra ve cu'u le karni .i ve cu'u lei xatra ko'a pu ba'o jarco lo ka selni'i fa lo nu ny cy jdasre gi'e sevzi nafxu'a gi'e darlu fapro fi lo selvamcau .i no fadni cu mukti da'i lo nu ko'a sisti le bi'u nai nu darlu .i li'a tu'a le cuntu cu te lacri le pulji .i je ku'i lo nu cy ve gubjungau ve cu'u lo karni cu se fanta ji'e lo ni ce'u cumki .i je kampu se krici fa lo du'u lo nu ko'a cliva le jikca girzu cu se rinka lo nu ko'a co'a xabju da'i le tolci'o remna zdani li'u
ni'o lu ma zi jalge ri'i le lanzu sei le karnysku cu te preti li'u
.i lu ro le nixli cu terve'u lo relxilma'e .i le ninmu ke relxilma'e fenki pu ca'o ranji .i je bo la krispinas pu junri tolcru lo nu le selzda cu selcu'u le go'i .i lo ni le citrai bersa cu zifygau ri ca le bavla'i kulcitsi cu se jalge lo nu bilga lo nu ri ro moi le'i kulcitsi poi ru ca ke'a cu ve ckule fo zo'e bi'u nai .i lei citme'a bersa cu stidi lo du'u ju'o ru'e dai le mamta cu kaskla ze'o le gugde .i je bo tolylazni sisku tu'a ko'a bu'u lo o'a nai ru'e ro'a ra'u klesi be lo surselstu be la monmartr be'o poi bu'u ke'a tu'a ko'a to'e lakne mutce se facki da'i li'u
.i lu xu le nakfamti pu ze'a na kakne lo nu facki lo tolvajrai do'a nai ke danfu sidju datni li'u
.i lu da'i nai da nuzba fo fo'a .i je ku'i li'a mi ca na djuno la'e di'u .i ca pa djedi fo'a cu ve notci lo du'u le fetspe be fo'a pu se zerle'a gi'e selmipri selbevri fi le bartu be le gugde .i zo'e cusku lo se du'u ko'a se mipri bu'u pa lei daplu be vi lo xaskoi be la noreg ju'o cu'i gi'e kufra gi'e se xamgu se kurji .i je bo ji'a zo'e mi'ecpe lo jdini .i su'a nai ei se'i nai lo rupnu be li re ki'o cu dikni lo nu ri se pleji kei lo nanca .i jo nai da'i ko'a ba zi se xruti fi le lanzu li'u
.i le karnysku cu ze'i smaji .i je ba zi bo co'a smaji cmila
.i je bo cusku lu ju'o sai ranxi lo'e nu jdini bo mi'ecpe se pinfu li'u
.i lu ga nai le fetfamti cu slabu da'i do sei le vancanja cu cusku gi do kucli da'i lo du'u na mi'ecpe lo zmadu li'u
.i lu mi jimpe lo du'u le nakfamti cu se xlura .i xu zo'e snada xlura fo'a li'u
.i lu ju'a fo'a bilga lo nu pensi lo drata prenu e vo'a ji'a .i lo nu la krispinas di'a jitro da'i le lanzu cu betri da'i ba lo nu ri pu ganse lo vrusi pe'a be lo nunzi'e kukte pe'a .i ji'a su'a bilga lo nu pensi le srana be lo za'u prenu .i su'a nai fo'a ba le nuncri be fo'a cu co'a tolsanji zenba lo ka ce'u darsi je cfagau kei lo mutce ma'i lo jecta cuntu .i lo ni fo'a selnei e lo ka fo'a xlura cu mapti lo se go'i lo ka ce'u se zenba .i fo'a ma'i lo jecta cuntu cu farvi fi pa le'i tsali nanmu fe le co'a se tcita be lu le ba'e pa tsali nanmu li'u bei cu'u ku .i djuno lo du'u pi ro le bi'u nai tcini cu se ckape da'i lo nu fo'a farlu pe'a da'i le jikca stuzi pe'a noi za'i di'a nakspe la ambylis .i fo'a ricfu .i je bo lo nanca dikni rupnu be li re ki'o poi pe'a ke'a ku'i na'e mintu do'a lo'e nu lo civla cu batci cu na'e dukse co selyle'i fo lo nu la krispinas bu'u nai le zdani cu xabju .i li'a fo'a pu mutce co zungi le bi'u nai se nupsi'u .i ba za bo fo'a ca lo nu gasnu lo nu mi selsivni cu cusku fi mi fe lo se du'u lo nu pleji le pinfu jdini noi smaji jdini fi'o tercme da'i mi kei fo'a te xlura fo lo po'o nai nu terpa lo nu ga nai na pleji da'i gi ju'o cu'i le zerle'a cu tolri'ugau pe'a lo ka ce'u fengu je steba kei ri'i le pinfu .i cu'u fo'a lo nu pensi lo nu ko'a selsi'a ke pleji vitke fi pa lai poi daplu lufutn cu xagmau lo da'i nu ko'a noi ke'a selxai cu badri nandu xabju lo zdani .i fo'a pleji co detyselylacri du'i lo nu zo'e na'o pleji lo jelca zdani binrydi'a .i du'i bo lo danfu notci cu klama fo'a se cu'u lo se du'u ge lo selyle'i pu ba'o se cpacu gi la krispinas cu kanro gi'e gleki milxe .i pa da xatra fo lo se du'u ko'a tolcando platu fi lo nu xagze'agau lo ve ganzu be lo xi'orce'u cuntu kei fe zo'e poi ko'a ba stidi ke'a lo masyja'a bende be vi ko'a .i pa drata cu go'i fo lo se du'u ko'a suksa binxo lo bilmnreumatizmi gi'e klama lo braplu te zu'e lo nu se mikce .i se ki'u bo lo ji'a rupnu be li bi no cu se mi'ecpe ce'o se pleji .i li'a lo nu le pinfu gau lei prezerle'a cu ru'i kanro cu prali ri .i je ku'i lo ka le se go'i cu mipri lo selpla cu ve jinvi lo du'u le bende cu se manci je'u .i le nakfamti cu pleji so'i da .i je bo ku'i lo ni lo nu fo'a badri cu carmi cu ka'e se jdikyri'a lo nu fo'a pensi lo du'u le terle'i cu steci certu li'u
ni'o lu ca'o ku xu le pulji co'u troci lo nu facki fi le selmipri ninmu sei le karnysku cu te preti li'u
.i lu na go'i .i le pulji cu ru'i nai vitke le nakfamti te zu'e lo nu jungau fi lo datni poi py jinvi lo du'u cumki fa lo nu ke'a tolmipri da pe se ra'a lo selzva ja selfri pe ko'a .i je ku'i ru'a le go'i cu smadi lo du'u ju'o cu'i le se djuno be fo'a cu zmadu lo te jungau be le go'i bei fo'a .i ba bo ba lo nu ko'a canci kei za lo nanca be li bi la krispinas cu dracysmi suksa se'ixru le zdani poi ko'a pu cizra cliva ke'a li'u
.i lu u'e xu ko'a pu rivbi le nu ru'i pinfu li'u
.i lu ko'a pu no roi se kavbu .i le nu ko'a cu kaskla lo nalzda cu se rinka le nu suksa cirko ro le selmo'i .i ko'a simsa lo'e lumni'u certu lo ka ce'u na'o selta'u .i se ri'a bo lo du'u ko'a smadi lo du'u ko'a me lo se go'i cu spaji naltce .i je bo lo du'u lo prenu cu krici lo du'u ko'a lumni'u kei gi'e sidju ko'a lo nu se jibri cu pajme'a .i ko'a pu ve'u kaskla la bEminm gi'e stodi milxe se jibri bu'u ri .i lo nu ko'a carmi gunka je selci'i lo nu ko'a nicygau lo kumfa po lo prenu cu fapro lo nu ko'a ckaji lo ka ce'u xarnu je jitro .i lo nunjenca be lo nu ko'a tolselsi'a selta'a se cmene lu le mi vrude ninmu li'u lo catnrkiuratu poi ko'a fapro ke'a lo selklo be le glagau minji bei le cecmrparoxiu ke zgiseltigni balku'a cu rinka lo nu suksa fa lo nu ko'a di'a morji zu'i .i lu io nai le'o za'a do ca tolmo'i lo du'u do ca'a tavla ma kau li'u fi ko'a xaitce pinka .i bo la'e di'u cu je'a dukse lo ka ce'u jursa kei va'o lo nu ba'e ko'a pu ba'e zi morji li'u
.i lu ua nai u'e ku'i sei le karnysku cu ki'asku le prenu pe la poi daplu lufutn zo'u pu kavbu ma li'u
.i lu lo xanri curve pinfu .i le cfari cu nuntoi da poi le tcini be le lanzu cu slabu ke'a zi'e poi ke'a gau ku co'u se jibri lo nu nakse'u la'a ku'o lo nu da ticygau fi la eduyd ambylis lo nu dunda lo jdini gunma pu lo nu le selmipri ninmu cu tolcanci .i le selyli'e ke nanca dikni selyle'i cu nalselpla seljmina fi le pa moi selyle'i
.i la krispinas cu facki lo du'u lo nu ko'a ze'a lo nanca be li bi cu de'a turni kei pu rinka lo nu ko'a bleze'a lo ka ce'u jitro le panzi noi ke'a ca makcu .i je ku'i le nakspe no roi snada lo banli be ma'i lo jecta munje ba le nu ko'a se'ixru .i bo lo nu troci lo nu mansa ciksi lo nalte'i selski nu pleji lo rupnu be li pa xa ki'o ca'o lo nanca be li bi cu banzu lo nu xaksu ro lo nejni co menli be fo'a
ni'o za'a ma'a nau zvati la bEograd e le za'u moi ke fange jecta cteki briju li'u
---
to'i ni'o ni'o ro le su'e re moi be le'i jufra be fi le glico bei se pa'u le cfika cu du zoi zoi
|
# banli lalxu
ni'o lai banli lalku goi ko'a cu girzu be lo narsilna djacu lalku vi le berti be le bemtu'a .esa'e le merko je kadno gugykoi .i ko'a girzu fi la .superior. zei lalxu ku joi la .mitcigan. zei lalku ku joi la .xuron. zei lalku ku joi la .eris. zei lalku ku joi la .ontarios. zei lalku
|
fla,ui,us.iulius konstantius
ni'o la fla,ui,us. .iulius. konstantius. goi ko'a cu jbena fi li no ci pa ze pi'e no bi pi'e no ze gi'e mrobi'o de'i li no ci xa pa pi'e pa pa pi'e no ci gi'e latmo nolraitru de'i li no ci ci ze bi'o no ci xa pa
ni'o ko'a re moi lo'i ci bersa be la poi banli konstantinus e lo re moi speni be ri be'o no'u la faustas i ko'a jbena fo la sirmium pe se di'o la ilIrikum gi'e binxo lo viptru to va'i la kaisar toi gau lo patfu be ko'a i ko'a ca lo nu by ky de'i li no ci ci ze cu mrobi'o cu catni lo nu lo se dzena be la konstantius xlorus poi pafpa'u ko'a ku'o e la te,odoras poi re moi speni be ky xy cu se catra i ja'e bo ko'a ce la poi re moi konstantinus poi ci'orme'a bruna ku'o ce la poi ci'ormau bruna konstans ce re loi tamne no'u la iulianus e la galus ge'u ce no drata cu jmive ke nakni seldze la poi banli konstantinus i loi bi'u nai ci bruna se va'u vo'a cu fendi lo latmo sosygugje'a ca'i lo cedyxu'a flaselci'a pe lo patfu be vo'a i ja'e bo la poi re moi konstantinus cu turni la britanias jo'u la galias jo'u la xispanias i je bo la konstans turni la italias jo'u la Afrikas jo'u la ilIrikum i je bo ko'a turni le stuna pagbu
ni'o lo ka ce'u se fendi cu se galfi lo nu la poi re moi konstantinus ca'o lo nu troci lo nu vlile basti la konstans lo zu'o turni la italias kei de'i li no ci vo no cu mrobi'o i ja'e bo la konstans po'o binxo lo turni be le stici pagbu be lo sosygugje'a i lo ka ce'u se fendi cu za'u re'u se galfi de'i li no ci mu no se ja'e lo nu la konstans va'o lo nu damba cu se catra loi sonci poi tinbe la magnentius goi my zi'e poi flapro
ni'o ko'a pu'o lo nu go'i cu tolzi'e ki'u lo nu damba lo me la sasan sosygugje'a i ki'u bo ko'a bai jai gau binxo fai la poi tamne ko'a galus lo viptru to va'i la kaisar toi be le stuna pagbu te zu'e lo nu gy sidju ko'a ca lo nu ko'a jundi my
ni'o ko'a de'i li no ci mu pa va'o lo nunda'a be bu'u la mursama,ior be'o poi so'u va'e lo'i nunda'a be loi latmo poi ja'e morsi cu penmi my gi'e jinga fi my i my vo'a de'i li no ci mu ci cu catra i ba zi bo ko'a minde lo nu la galus cu se catra i je ku'i ko'a ru'i na kakne lo nu jatna lo jamna cuntu be bu'u ge lo stuna korbi gi ji'a lo dotco korbi si'u no da i se ki'u bo ko'a gasnu lo nu la iulianus poi ro moi lo'i nakni lazmi'u be ko'a ku'o cu binxo la kaisar i ko'a ca lo nu la iulianus co'a se rinsa loi sonci be bu'u la galias lo si'o i bu nolraitru cu se xanri no drata be lo nu gunta i bu i ko'a pu lo nu lo re jenmi cu simxu penmi cu mrobi'o ri'a lo se bi'agla vi la tarsus de'i li no ci xa pa pi'e pa pa pi'e no ci i ba bo i bu cu co'a se rinsa lo prenu pe pi ro lo sosygugje'a lo si'o vo'a nolraitru
ni'o ko'a ci roi spebi'o i ko'a pa re'u spebi'o pa lo tixnu be la iulius konstantius gi'e re re'u spebi'o la e,usebias gi'e ci re'u spebi'o la faustinas poi ke'a ba lo nu ko'a mrobi'o cu se jbena la faustinas konstantias poi ba spebi'o la gratianus poi ba latmo nolraitru |
le mu xamgu pe lo nunji'e
ni'o ni'o pa mo'o ca lo cerni pe'a be lo nunji'e le pa vrude racycrida goi ko'a cu klama fi'o se bevri le lanka gi'e cusku
lu ti seldu'a .i ko lebna vimcu pa le go'i fo le drata .i o'i dai ko jundi gi'e prije cuxna .i o'i dai ko prije cuxna .i mu'i bo pa po'o le go'a cu dirba li'u
.i le'i seldu'a cu se mu mei fi lo nunmi'o ku ce lo nunpa'i ku ce lo nuncfu ku ce lo nunselpu'a ku ce lo nunmro .i le citnau goi fo'i cu djicai cusku
lu u'a na sarcu fa lo nu pensi li'u gi'e cuxna lo nunselpu'a
ni'o fo'i nerkla pe'a le munje gi'e sisku lo ka ce'u pluka poi ke'a zdile lo'e citpre .i je ku'i ro ckaji be le se go'i cu ranji lo tordu gi'e nalmansa gi'e tolvai gi'e smucau .i pe'a je le go'i ca lo nu cliva cu tolsinma fo'i .i fo'i ca lo fanmo cu cusku lu le ca zi nanca mi se xaksu .i ga nai lo nu mi za'u re'u cuxna cu selcru da'i gi mi prije cuxna li'u
ni'o ni'o re mo'o le racycrida cu tolcanci gi'e cusku
lu vo le seldu'a cu velvi'u .i ko za'u re'u cuxna .i je o'i dai ko morji lo du'u lo temci cu vofli pe'a e lo du'u pa po'o le go'a cu dirba li'u
.i le nanmu ze'u pensi gi'e ba bo cuxna lo nunpa'i .i je na ganse lo ka le selklaku cu tolcanci le kanla be le racycrida
ni'o ba lo nanca be li so'i fo'i zutse ne'a le mrotanxe ne'i le kunti zdani .i fo'i vo'a tavla se cu'u lu ui nai sai porsi klama be fi mi je cliva be mi .i je nau vreta fa ti no'u le dibrai je ro moi .i lo porsi be lo nunli'a cu boxna simlu selfri mi .i fo ro nungei cacra poi le tcica canja no'u la nunpa'i ke'a mi vecnu cu pleji fa mi lo nunbadri cacra be li ki'o .i ra'i le risna be le risna be'o pe'a mi dapma ny li'u
ni'o ni'o ci mo'o lu ko za'u re'u cuxna sei le racycrida cu tavla
.i le nanca be li so'o cu ba'o ctuca do lo kamprije vau ju'o .i ci le seldu'a cu velvi'u .i pa po'o le go'i cu dirba .i ko morji la'e di'u gi'e e'e jundi cuxna li'u
.i le nanmu ze'u pensi gi'e ba bo cuxna lo nunmi'o .i je le racycrida ca le nu bacru vasxu cu cliva
ni'o ba lo nanca be li su'o re ko'a xrukla gi'e sanli ti'a le nanmu poi ke'a ca lo nu lo donri ca'o se fanmo cu zutse je nalselkansa gi'e peisku .i je ko'a djuno fi le se peisku be fo'i be'o no'u
lu le cmene be mi pu selclu ba'u le munje .i je le selxu'a co zanru be tu'a le go'i cu zvati pe'a ro ba'u tance .i ze'i xamgu mi .i uu se'i ba'e ze'i go'i .i ba bo nunjilra ce'o nunpro ce'o ke jitfa selxu'a nunxai ke'e ce'o nunxebni ce'o nungunta .i ba bo co'e lo nu kusru cmila noi ke'a krasi le fanmo .i ro mai co'e lo nunkecti noi ke'a mrotersla pe'a lo nunmi'o .i oi sai kurki je betri fa lo nunmi'o be da .i bo da ca lo nu camrai cu te renro pe'a lo dertu .i je bo da ca lo nu camjdika cu go'i lo nunxebni je nunkecti li'u
ni'o ni'o vo mo'o lu ko za'u re'u cuxna sei voksa be le racycrida
.i re seldu'a cu velvi'u .i ko na tolpa'a .i ca lo krasi pa po'o le go'a cu dirba gi'e ca ca'o te cuxna li'u
.i lu ua sai le nuncfu no'u le nunvlipa .i ua sai ju'o pu nalviska'e pe'a fa mi sei le nanmu cu cusku .i le nunji'e ca co'a se vamji pe'a .i mi ba pleji je xaksu je mancygau .i lei tolsi'a e lei xebni ba cpare le dertu ca'u mi .i pe'a je mi ba ctigau le xagji risna be mi lo nunjilra be le go'i .i mi ba ponse ro kargu e ro selgei e ro pluka be lo ruxse'i e lo xadni be'o vu'o poi ke'a dirba lo'e prenu .i pe'a mi ba terve'u je terve'u je terve'u lo nu selsi'a e lo nu jdaselsi'a a va'i le ro nunji'e ke tolkargu basti be lo xamgu be'o poi lo zarci pe lo tolvajni munje ka'e sabji ke'a .i mi ba'o xaksu lo temci clani gi'e ba'o tolprije cuxna .i je ku'i toljundi la'e di'u .i mi ca la'e de'u cu tolprije gi'e ka'e lebna lo po'o simlu be lo ka ce'u xagrai li'u
ni'o ba zi lo nanca be li ci le nanmu cu lenkydesku je zutse bu'u lo pindi kumfa .i je fo'i cinlytce je kandi je ke kunti pe'a se kanla gi'e dasni lo festi bukpu .i je batci lo sudga ke nanba korbi gi'e smaji cusku
lu oi sai dapma ro lo munje seldu'a noi pe'a ke'a nu tolsi'a cmila kei gi'e solji selpi'a ticyselsku .i je srera selcme ro mei .i seldu'a na je seljbera .i lo nunselpu'a ku fa'u lo nunpa'i ku fa'u lo nunmi'o ku fa'u lo nuncfu cu zasni tcica bo gacri lo vitno jetnu no'u lo nuncro ku fa'u lo nundri ku fa'u lo nuncke ku fa'u lo nunpindi .i le racycrida pu jetnu cusku .i bo zo'e po'e ko'a cu sorcu pa po'o seldu'a poi ke'a dirba .i za'a mi ca djuno lo du'u le drata cu xlali je tolkargu fi'o te karbi le vamrai no'u va'i le dirba je xendo noi ke'a jirgau pe'a fi lo selsnecau je ranji nunsipna fe lo nuncro poi ke'a gunta lo xadni ku'o e lo nuncke joi nundri poi ke'a citka pe'a lo menli e lo risna pe'a .i ko bevri ru .i mi tatpi .i au mi surla li'u
ni'o ni'o mu mo'o le racycrida cu klama gi'e za'u re'u bevri vo le seldu'a .i je ku'i lo nunmro cu se claxu .i ko'a cusku
lu mi dunda ny le dirba po le mamta ge'u no'u le cmalu verba .i ri nalprije gi'e ku'i ge lacri mi gi cpedu lo nu mi se va'u ri cu cuxna .i do na cpedu lo nu mi cuxna li'u
.i lu uu sai se'i ma fi'o te dunda mi cu velvi'u li'u
.i lu le xlamau be lo se jerna be ba'e do .i sa'u nai lo rincau nuntolsi'a no'u lo nuntolci'o li'u
|
# bangrmalti
ni'o lo bangrmalti goi ko'a cu semto jecybau la maltas .i lo bangrmalti po'o cu semto gi'e na'o se ciska fi'o lerfu lo latmo .i ko'a simsa lo rabrtunisi peverai loi xrabo ge'u .e lo bangrsitcili peverai loi talno .i ko'a se jicmu lo xrabo gi'e te fu'ivla fi so'ida fu lo talno .i ko'a jicmu semto .iku'i le ni lo talno cu stika ko'a cu ju'oru'e banzu lo nu xusra le du'u ko'a banxre
## ni'o alfabeta
.i lo .alfabeta be lo bangrmalti cu se finti la mikiel.anton.vasalis .i so'u lerfu mo'u se galfi .i di'e cartu le cabna .alfabeta .e lo xe lerfanva be fi la rolnai se snale'u .e lo jibni ke lojbo selbacru
| lerfu | cmene | IPA | xrabo | jibni selbacru |
| ----- | ----- | ------ | -------- | ------------------------------------------------------------------------------------------------ |
| A a | a | a | ـَ ، ـَا | zo ma |
| B b | be | b | ب | zo barda .iku'i lerba'u zo .tolzip. bu'u lo fanmo be lo valsi |
| Ċ ċ | ċe | ʧ | (چ) | zo tutci .i ta'o me'o ky. basti me'o cy. poi claxu lo mocyba'a |
| D d | de | d | د | zo donri .iku'i lerba'u zo .cmit. bu'u lo fanmo be lo valsi |
| E e | e | ɛ | (ـَ ، ـَي) | zo fetsi |
| F f | ef | f | ف | zo fetsi |
| Ġ ġ | ġe | ʤ | ج | zo tadji .iku'i lerba'u zo .kritc. bu'u lo fanmo be lo valsi |
| G g | ge | ɡ | (ج ، گ) | zo galfi .iku'i lerba'u zo .pasifik. bu'u lo fanmo be lo valsi |
| GĦ għ | ajn | (ħ:) | ع ، ح | sinxa lo nu lo lamji karsna cu clani .i fi'o selyli'e me'o y'ybu cu sinxa lo nu me'o y'ybu clani |
| H h | akka | | ه ، ة | zo .y'y bu'u lo fanmo be lo valsi |
| Ħ ħ | ħe | ħ | ح | simsa me'o xy. .i lo tance cu muvdu lo trixe |
| I i | i | i | ـِ | zo cfipu |
| IE ie | ie | iɛ, iː | ـِي | zo .ie .a zo cfipu |
| J j | je | j | ي | zo .ia |
| K k | ke | k | ك | zo kevna |
| L l | elle | l | ل | zo linji |
| M m | emme | m | م | zo marce |
| N n | enne | n | ن | zo trano |
| O o | o | o | (ـُ ، ـَو) | zo spofu |
| P p | pe | p | (پ) | zo parkla |
| Q q | qe | ʔ | ء ، ق | lo'u na.e le'u |
| R r | erre | r | ر | zo cradi |
| S s | esse | s | س | zo santa |
| T t | te | t | ت | zo tatpi |
| U u | u | u | ـُ ، ـُو | zo cukta |
| V v | ve | v | (ڤ) | zo valsi .iku'i lerba'u zo .stef. bu'u lo fanmo be lo valsi |
| W w | we | w | و | zo .ua |
| X x | exxe | ʃ / ʒ | ش | zo cuxna .a zo jimpe .i zoi my. xx .my. sinxa lo clarai sance |
| Ż ż | że | z | ز | zo zepti .iku'i lerba'u zo .noras. bu'u lo fanmo be lo valsi |
| Z z | ze | ʦ / ʣ | (تْس) | zo fetsi .i zoi my. zz .my. ka'e sinxa zo dzena |
lo me'o grav. bu karsna to zoi my. à, è, ì, ò, ù .my. toi cu nenri lo bangrmalti valsi poi se krasi lo talno mu'u zoi my. libertà kamzi'e, sigurtà kamsnura, soċjetà kamjikca .my
|
dijyselpla
ni'o le dijyselpla cu larcu je saske le nu le dinju cu platu selfinti .i le ganra smuni cu vasru le mulno dinju vanbi platu fi'o jbini le galtu senta be le tcadu platu .e le midju tcadu platu selfinti .e le tumla dijyselpla be'o ce cmalu senta be le nilce .i le di'upla selfinti cu pensi le kakne je jdima pe le dinju zbasu gi'e pensi le dinju pilno mukti .e le dinju melbi .i |
# la lisri be lo nanla joi lo cipnrfalko
ni'oni'o jy. nanla
ni'o ca lo nu jy. jai nanca li xa kei lo jy. patfu goi py. dunda lo cipnrfalko goi fy. boi jy. gi'e minde jy. lo ka gau ce'u fy. tolcilce .i ta'o fu'e sei py. jungau be jy. lo'e cipnrfalko cu catra zi'o gi'e tsani turni fu'o .i fy. boi jy. nalnei gi'e ji'a se nalnei .i ge mu'i gi fy se ja'urxe'a gi jy. xanka gi lo se gusni bo simlu je kanla be fy. simlu lo ka ro roi zgana fy .i ri'a gi fy. katna gunta jy. va'o lo nu jy. boi fy. jibni gi ze'u lo jeftu be li su'o lo xance be jy. cu blucri .i du'o nai jy. boi py. ba'o cuxna lo xabju be lo cilce bei ze'u lo zmadu be lo nanca be'o cipnrfalko noi ja'a ru'e ku po'o tolcilce binxo kakne .i ku'i lo bi'u nai nanla cu troci mu'i lo nu se minde lo ri patfu kei .e lo nu se jgira be py. djica .i pamai jy. ge ze'u stali fy. gi ge jai gau ranji lo barda fai lo fy. nuncikna gi ji'a zgicu'u fi fy .i mu'i bo ti'e lo'e tatpi cipni cu za'e tolcilcybi'ogaufilzma .i re mai jy. cilre fi lo cipni tutci .i .e'i jy. jai gau visnalka'e cei broda fai fy. gi'e mu'i gi lo nu broda nardji gi na broda gi'e fi'o zilzu'e fe'u gi zutse bu'u lo se viska be fy ku po'o gi .a'o fy. lacri jy.
ni'o mu'i gi jy. pu ctigau fi'o xance ku gi fy. na citka .i ba za ku jy. citka carmi se ri'a lo nu katna lo jy. skapi .i ku'i lo nanla no'u jy. gleki lo cabna mu'i lo nu zabna farvi .e lo nu djica lo nu lo cipni cu se selsau vo'a se ja'e ji'a lo nu .e'i fy. citka lo ciblu be jy. .i je facki lo ka melbi kei joi ka lo noi cinla vau nalci be ce'u cu prije joi tsali kei fy .i bo sa'e ca lo nu fy. sfubu kei lo gusni fy. muvdu simsa .i ji'a fu'e mu'a ca lo co'i nu fy. cukla bo vofli je klama lo jy. xancidni kei jy. ja'a ru'e gleki krixa .i su'o roi ku fy. plipe lo jy. janco gi'e muvgau lo moklu lo jy. kerfa fu'o
ni'o ge jy. je'a facki lo kampa'i fy. gi ca gi jy. birti lo du'u tolcilce na je je'a tolcilce gi jy. klama lo patfu gi'e zgagau py. lo jy. terzu'e noi ba'a py. jgira .i ku'i sai jgira na gi'e ge jgari fy. noi tolcilce je lacri zi'o vau lo xance gi cnebo be fy. popygau .i "lu .i mi sei py. cusku pu minde do lo ka tibgau lo cipni" zo'u py. toljgari fy. noi loldi farlu .i "lu .i ku'i do jai te basti fi lo ka pamgau .i lo'e cipnrfalko cu na'e ke prami ke danlu pendo gi'e tsali joi kusru .i sa'e lo vi cipni zo'u se tolcilce na je spofu" li'u .i ba ku ca sa'e lo nu py. cliva jy. kei lo nanla cu klaku fi tu'a lo dalpe'o co'u lo nu py. minde lo selfu lo ka derse'a fy. .i ja'o jy. no roi ze'e ba klaku gi'e ze'e ba morji lo poi ka spogau kei joi ka se spogau ku'o se facki be jy. bei lo kampa'i
fa'o
|
# barda tarci bo girzu
ni'o lo barda tarci bo girzu cu tarci girzu le ka kampu velfarlu kei lo tarci .e lo jbini tarci gapci je pulce .e lo dikca ratni gapci .e lo cumki manku marji
|
simon.bolivar
ni'o la .simon.bolivar. goi ko'a zi'e no'u la'o sy Simón José Antonio de la Santísima Trinidad Bolívar y Palacios sy pu .benesuel. zei bilni je plajva prenu .i ko'a joi la xoses.des.san.martin noi gento pu me lo traji vajni prenu pe le nu bemjoitco gu'ecfa .i ko'a vajni sidju fi lenu cfagau be la .bolivias. joi la .kolombias. joi la .ekuador. joi la .panamas. joi la .perus. joi la .benesuel. i ko'a pu se cmene la zifygau le turni bende pe la mEridas. vi la .benesuel. i le cmene ca so'eroi cmene be ko'a |
# la krasi be lai .xacacin.
ni'o ni'o la .omar.al.kai'an. goi ky. jbena fi lo panovobi moi nanca lo kulnrperso ke cmalu tcadu ne la .kurasan. noi lu solri nu tolcanci kei tumla li'u cmene ke'a .i lo patfu be ky. cu se cmene zo .ibra'im. noi xrabo bangu cmene la. abra'am. i lo go'i cu vecnu lo bu'uzda
ni'o ca lo nu ky. ca'o co'a te pemci joi lo nu bilga lo nu jdice fi lo ky. cmene kei ky. cuxna lo'u .al. kai'an. le'u noi se smuni lu bersa lo bu'uzda vecnu li'u .i ca lo cedra be lo nu lo nunli'u cu clani lo temci kei va'o lo nu lo litru girzu cu so'emei kei lo jibri be lo patfu be ky. cu xamgu te prali .i se mu'i bo la .ibra'im. jai gau tadni fai ky. bu'u la .nicapur. noi barda je vajni tcadu .i la .omar. bu'u sutra lo nu ri ce lu'i sa'e la .abdul. kasem. e la .xasan. sabax. pedysi'u .i bo lo cimei goi cy. co'a je'a tolsei girzu .i lo go'i be fi'o kansa lu'a ri cu se li'i ge ge manci gi nu tadni gi pluka .i fi'o selsmi ro lo tadni pe ro lo cedra cy. lifri su'o lo pluka kalsa je fenki nicte pe lo vitno ba'u te salci
ni'o ca pa lo nu mo'u te salci kei pa lo cmima be cy. ku noi ta'o no da nau djuno lo ka ce'u mokau kei ke'a cu stidi lo nu cy. nupsi'u zo'e pe se cu'u lu .e'u .au ro lo ci lu'a mi'o roroi ze'e ba djusi'u .i mi'o gu'e simsa gi dunli simxu .i bo .ei lo nu go'i no roi ze'e ba tolcfa .i se mu'i bo lo ricfu ja misno pamoi be mi'o cu bilga .e'u lo nu sidju re lo re drata li'u .i se mu'i bo je'a nupsi'u
ni'o tu'e la .abdul. kasem. goi .a bu ky. ricfu ja misno binxo pamoi .i lo go'i noi ke'a goi ny. pu se cmene lo'u .nizam.ul.mulk. le'u cu pu co'a se jibri lo nu sidju lo nolraitru goi abu abu zi'e noi sa'e selcme lo'u .alp. arslan. le'u .i lo re pendo be .a bu ky. cu vitke .a bu ky. fi'o se morji lo se nupre .i .a bu ky. ji'a ja'a morji tu'u
.i zu'u lo go'i goi la .nizam. cu friti lo jibri la .omar. noi ku'i mu'igi ke'a na zanru gi'e cusku lu .i mi djica lo nu noda jibri mi .i sa'u lo nu mi jai se curmi fai lo ka tadni ze'e lo se djica be mi cu se friti be do xagrai li'u gi .a bu ky. ge jai gau zbasu lo tarci zgana dinju bu'u lo tcadu po'u la .ispa'an. zi'e goi .i bu gi co'a di'i dunda lo jdini ky.
.i baku zu'unai la .xasan. goi xy. zo'u tu'u xy. lo du'u se jibri binxo cu zanru .ije xy co'a gunka .i mu'i lo nu xy. mencre gi'e kulnu djuno kei xy. sutra lo ka co'a se nelci ny. i ku'i xy. co'a zekri pluta fi lo nu xy. binxo co basti .a bu ky. lo ka ce'u se jibri zo'e pe lo nolraitru .i la .nizam. noi prije gi'e vlipa pu kanpe lo nu go'i kei li so'a gi'e minde fi lo nu gau se morsi xy. i se si'u la .xasan. la .omar. se te se cpedu lo nalraitru lo ka na mrogau xy. ije ri zanru gi'e ku'i tolcru lo nu xy. xabju lo tcadu .i fi'o ji'a se bartu ty. boi xy. ru'i cenba .ei lo ka ce'u se zdani makau kei mu'i lo nu ko'a goi zo'e pe la .nizam. cu zukte lo ka jersi xy. kei lo ka ce'u catra xy. isemu'ibo xy. settse sisku lo ka ce'u snura lo ka'e nu la .nizam. gunta xy. kei kei lo'i ka'e se xabju be xy.
.i sa'e tu'e bu'u la poi xamsi vau kaspia ne'u stuzi la .elbruz. poi ke'a clani ke cmana su'o mei zi'e noi lo galtu bo traji je cmima be ke'a cu mitre li ji'i xa ki'o .i ti'e bu'u .e bu badydi'u gi'e jai se jdice xy. fai lo du'u xabju ma kau
.i xy. noi se kansa lo cmalu girzu ku'o co'a klama .i bu'u lo snime .e lo bisli ba lo nu cadzu su'o lo je'a ckape pluta kei .e lo nu koikla lo je'a barda je sraji kevna kei .e lo nu pagre lo jarki mutce kei baza lo nu klama kei djedi be li su'o kei xy. co'a viska lo noi cmana cpana gi'e turni pe'a zdani ku'o me la. alamut. goi .abu vau .uosai .i .abu se sruri lo bandu rirxe noi je'a lenku .i fi'o seldji lo nu nerkla kei se pluta pa da po'o noi muvdu cripu ga'u lo sraji kevna
.i ca lo pa re'u nunvi'a xy. facki lo du'u .a bu ka'e se gunta na ku kei gi'e jdice lo ka .au jitro .i ku'i ri'a gi selgunta ka'e na ku gi ka'e bapli ke jitro binxo na ku si'a .i ba lo nu xy. minde lo kansa lo ka viska be ce'u nalka'e kei xy. po'o crane klama gi'e cpedu lo ka ce'u joi lo ca'a jitro goi jy. cu casnu .i se mu'i bo co'a cripu co'u lo nu xy. mo'u klama fo lo no'a .i xy. klacpe jy. gi'e cusku lu mi ca bevri lo bakni skapi li'u .i xy. to'e polje lo skapi goi by. sy. i sei xy. cusku xy. pleji mu ki'o lo solji spisa jy. lo nu jy. dunda lo tumla poi kuspe by. sy. ku xy.
i mu'i gi jy. se nandu lo ka jinvi lo ka drani tirna kei kei gi'e djica lo nu viska lo solji gi xy. visygau jy. noi minde fi lo ka kancu lo'i spisa .i li mu ki'o ja'aku .uesai! .i va'o lo nu jy. jinvi lo ka canja fo lo jai fenki cu se zanru jy. pe se cu'u lu ko mi dunda lo solji .i je se mu'i bo ko cuxna lo stuzi poi djica li'u .i za'u re'u co'a cripu .i xy. barkla lo badydi'u goi by. dy. gi'e klama lo bitmu be fo by. dy. gi'e degji visygau lo loldi .i ku'i xy. se ba'i gi pejgau by. sy. gi derse'a lo grana gi'e co'a jgari lo clani dakfu noi katna by. sy. lo su'o jarki je clani noi xy. lu'i ke'a ri'a tu'a xy. jorne simxu .ibo xy. jai gau jorne lo se cupra skori fai lo bi'u nai grana .i je co'a cukla klama by. dy. i ba zi ku by. dy. je'a se sruri lo skori .i ja'e bo by. dy. co'a se ponse xy. uo! .i va'o lo nu lo xy. kansa pu ba'o sivni nerkla by. dy. kei lo ba'e ba'o jitro goi jy. cliva by. dy. se be'i ro lo mu ki'o solji spisa
ni'o co'a lo nu co'a se zdani by. dy. no'u la. alamut. goi .a bu kei xy. co'a binxo lo cizra
.i bu'u lo se bitmu no'u lo sivni pagbu be by. dy. bu'u lo nalselviska'e fi'o minde xy. zbasu lo jai bu'u je'a pluka goi py. zi'e noi bu'u ke'a melbi purdi gi'e minra joi klina rirxe gi'e carmi xlura gi'e prije tricu .i stuzi lo nu zdile joi pluka joi surla kei fi'o ku'i junri zgaku'i .i lo je'a pendo be xy. ku po'o jai se curmi fai lo nu djuno fi py. fe lo ka zasti .i sa'e py. se steci lo ka pa da zo'u ce'u se pilno fi da
.i ni'o sa'e xy. cuxna su'o lo dekto be lo citnau lu'i ro lo ro nanmu pe lo stuna .i mu'i bo lo se cuxna goi cy. cu tsali gi'a zukte carmi gi'a certu co damba .i bu'u la. alamut. goi .abu lo se cuxna cu se bregau ze'u lo masti be li su'o fi ro lo ka damba .i ca lo ro re'u bregau djedi fanmo xy. friti lo kukte sanmi .i ba lo nu sanmi xy. sivni ctigau cy. lo cizra xukmi .i va'o lo nu cy. sipna mutce kei cy. se bevri fi py. i ca lo nu cy. co'a cikna kei cy. se nandu co jinvi lo ka jetnu kei lo selzva .i sa'e cy. krici lo ka zvati lo cevni gugde .i ji'a se gugde so'i lo ninmu noi je'a melbi zi'e noi ba'e ke'a sipfa'ogau cy. fau so'i cinse nu jgari
.i ni'o sa'e se cfari lo detri be lo nu zdile joi pluka noi cy. no roi ze'e pu pensi ju senva lo simsa be ke'a .i ca lo nu co'a vanci kei joi nu citka lo selsne za'ure'u ctigau fi lo xukmi no'u lo spati zi'e noi jai rinka lo cizra .i lu'a cy. se bevri fi lo ckana
ni'o ca lo nu cy cikybi'o kei cy. carmi co cinmo .i sa'e no da pe'a jai ca'a sisti fai cy. noi ze'e ba ku lo ka ralci joi prami joi melbi ce'e lo ka pluka ce'e lo ka kukte pe'e je lo ninmu ce'e lo pu selzva ce'e lo cidja .ebo lo vanju cu se morji cy. i je'a simlu lo ka cy. senva ce'u noi ku'i je'a fasnu gi'e se zvati si'a cy. i xy. smacnigau cy. gi'e xusra lo du'u lo se viska be cy. je'a zasti .e lo du'u je'a bo lo selvi'a cu ceizda .e .ue lo du'u go cy. se xruti lo cevni tu'a lo ri zdani gi cy. co'a morsi va'o lo nu damba fau po'o sa'e lo ze'u te bregau noi ca lo bavlamdei cy. cliva la .alamut. ki'u ke'a
ni'o ku'i lo te bregau cu mo
i la .xasan. se galfi mutce .i sa'e xy. no'u lo pu jai gau ke se gugde cirko cu co'a jitro lo se lijda be lo se terpa be'o ku no'u lai .ismail. i ro lo nobli jitro je turni cu jai gau zukte co catra jersi lo se lijda no'u cy. i mu'i joi ki'u bo xy. co'a jamna ro lo bi'u nai turni mutce pe lo sa'e pagbu be lo munje zi'e goi ty. my. i xy. te xarni ty. my. boi cy. i cy. bredi ro zo'e gi'e na'e terpa lo da'i nu morsi .i sa'e cy. ba'e djica ri noi jaspu cy. boi xy. lo ka xy. xruti ce'u lo ceizda noi jai se nupre xy. boi cy. i cy. no roi fliba
.i mu'i lo nu lo spati xukmi no'u la .xacic. cu se citka cy. pu lo cy. te minde kei .a lo nu cy. noi ceizda djica carmi cu se minde la .xasan. kei cy. co'a se cmene zo .xacacin. i lai sivni catra ii!
|
# banpliske
ni'o lo banpliske cu pagbu be lo bauske be'o saske lo pu'u lo jimpe selragve cu jbini le jufra smuni .e le cusku smuni .i le nu tadni le du'u lo selvanbi cu xlura cu ralju
ni'o lo selvanbi cu smuni lo tcini fi'o vasru so'i le bancu bangu ckaji fi'o vasru lo selcasnu ja jikca ja vanbi ja menli steci
|
ni'o lo xamsi cu barda foldi be lo silna djacu be'o sekai le ka jorne lo pa braxamsi gi'a barda je cafne bo silna lalxu sekai le ka na rarna terflecu mu'a lo me la kaspi,an. xamsi .a lo morsi xamsi .i so'i lo xamsi cu condi jorne xamsi |
sirsunla kosta
lo patfu be ko'a goi lo cmalu nanla cu te vecnu lo kargu ke sirsunla kosta seva'u lo mamta be ko'a ku goi fo'o
.i ko'a cusku fi fo'o fe lu "xu do doi mamta cu djuno lo du'u le vi sirsunla kosta cu jalge lo nu lo danlu .uu cu xlafri" li'u
.i fo'o cusku spuda ko'a lu ".ue do doi bersa cu ka'e tavla fi le patfu be do tai ti" li'u
denpesxu
lo cmalu nixli goi ko'a cu retsku fi lo mamta be vo'a fe lu
"doi mamta do djuno xu lo du'u lo denpesxu poi nenri pa tubnu cu klani makau"
li'u .i le mamta cu cusku lu
"na'e djuno"
li'u .i ko'a go'i lu
".iku'i mi ba'e djuno .i mitre li ci"
li'u
rijno smuci
lo famti cu retsku: lu "xu do roroi sidju lo mamta be do?" li'u
i le verba cu spuda fi lu "go'i sai ! i mu'a mi bilga lo ka kancu lo rijno smuci vau ba ro nu do cliva."
terpa lo tirxu
A: doi patfu do terpa xu lo tirxu
B: na go'i
A: xu go'i lo cinfo
B: si'a na go'i
A: je'e .ija'o do terpa le mamta po'o
xalbebna
py. goi lo patfu ge'u joi by. goi lo bersa be py. cu zvati lo gusta
B: .a'u doi patfu da jimpe lo du'u de xalbebna vau ta'i ma
P: xu do viska ta po'u re ninmu .i ganai ta simlu lo ka vomei ninmu vau da gi .e'e da xalbebna
B: .iku'i .ue doi patfu ta du pa ninmu
xabyterspe
A: mi xabyterspe bersa
B: na cumki .i ro prenu zo'u gonai terspe panzi gi nalterspe panzi
A: .iku'i mi xabyterspe bersa .isa'e lo mamta be mi cu tolspeni .ije lo patfu be mi cu speni
vondei
A: mi prami do doi macas.
B: zo .macas. ue .i mi'e .anas.
A: zo .anas. uesai .i le cabdei na vondei xu .uesai
prami jbixa'u
pa nanmu ku joi lo speni be ri ku goi ko'a cu catlu lo bartu pa'o lo canko .i ko'a cu cusku lu
"ko catlu .i le jbixa'u cu cinba le fetspe be vo'a ca ro nu vo'a xruti le zdani .iku'i do noroi zukte la'e di'u"
li'u .i lo speni be ko'a cu spusku lu
"mi zukte ta'i ma .ue .isu'anai mi mulno na'e slabu le va ninmu"
mentu li mu
lo fetspe noi cliva le zdani cu cpedu cusku fi lo speni be vo'a fe lu
"mi cliva tezu'e lo nu vitke la lenas. gi'e tavla ri ze'i lo mentu be li mu .i doi dirba .e'o ko jicla ne'i le juptansi pa roi ro cacra xadba"
pinde nakspe
lo ninmu cu cusku fi lo speni be vo'a fe lu
".oi ro nanmu poi mi spebi'o fitytoltu'i pu lo za'i mi speni do ku'o ca cfumau do"
li'u .i le nakspe cu spusku fi lu
".u'i .uenai"
gusta cidja
A: doi tolci'o tolspe do pu suksa spebi'o mu'i ma
B: lo du'u mi pu co'u ctinei lo gusta cidja
A: .i caku mo
B: .i caku mi co'a nelci ri
srera cusku
re ninmu cu simxu tavla .i le pamoi ninmu cu cusku lu
"puzaku mi co'a so'iroi srera cusku .imu'a mi pu djica lo nu cusku lu .au mi pinxe loi vanju li'u le speni be mi gi'e ku'i srera cusku lu .au mi vasxu loi pinji li'u .u'i"
li'u .i le remoi ninmu cu spusku lu
".ie mi si'a co'a srera cusku .imu'a mi pu djica lo nu cusku lu doi dirba ko dunda .e'o le kabri be lo ckafi mi li'u le speni be mi gi'e ku'i srera cusku lu doi selgle malganxo do ba'o daspo lo nunji'e be mi li'u"
fonxa tavla
lo nakspe cu cusku fi le speni be vo'a fe lu
"doi dirba do ba'o fonxa tavla ze'i .ue lo mentu be li reno .i go'i ma .a'u"
li'u .i spusku fa le ninmu lu
"lo batkyci'a be lo srera fonjudri"
vitke le mamta
lo ninmu: doi dirba ca lo bavlamdei mi cliva tezu'e lo nu vitke le mamta be mi .i xu mi kakne lo ka ce'u gasnu lo nu do ba kufra kei pu ku
lo nanmu: ki'e do'u na go'i .i lo nu go'u cu banzu
karce snasni
A: mu'i ma do terpa lo nu tirna lo karce snasni
B: ca lo purci jeftu lo fetspe be mi cu mipri cliva fi'o kansa lo karce sazri .i caku mi terpa lo nu ky. ba'o xrubei fy. ti
glico nobli
ko'a goi lo tolci'o ke glico nobli cu xrukla le zdani ca lo lerci vanci .i lo selfu be ko'a cu cusku fi ko'a fe lu
"xu .a'u doi tolci'o bebna do za'u re'u ba'o malpinxe lo xalka gi'e vitke loi gleve'u"
li'u .i spusku fa ko'a lu
"na go'i doi djan. .i mi pu cliva tezu'e lo nu terve'u lo tirna cabra"
xejykre
lo tadypre cu penmi lo velcli gi'e retsku fi vy. fe lu
".a'u doi velcli ga'inai ca lo nu do co'a sipna vau do punji lo xejykre be do ga'u je'i ni'a lo ckagai"
li'u .i le velcli cu spusku lu
".a'unai mi na djuno"
li'u .i ba lo jeftu be li re le velcli ca lo nu penmi le tadypre cu mutce fengu cusku lu
"doi malpre mi ca na ka'e sipna .o'unai .isa'e ca lo nu mi punji le xejykre ga'u lo ckagai vau mi na kufra .ije si'abo ca lo nu mi punji le xejykre ni'a lo ckagai vau mi na kufra"
xebro rindo
ni'o lisri le bi'u ci rindo .i la geronovits. patfu .i la pokaientas. mamta .i la mini'orovits. tixnu .i ca le djedi la mini'orovits. klama le zdani gi'e cusku lu doi mam. mi ba speni li'u la pokaientas.
.i la pokaientas. cusku lu .ui do makcu nalspe .o'ocu'i .i do ca nanca li paxa .i ma bavyspe? li'u
.i la mini'orovits. cusku lu .ua doi mam. mi tolcri le nanmu! .i clani je vrude .i melbi je tsali li'u
—ma cmene?
—lu zugdze bakni li'u
—sinma ko'a do'e ma?
—ko'a selsi'a sai! .i ko'a se patfu la fenki xirma noi jatna ro le siksika
.i la pokaientas. cusku lu xamgu .i ma'a ba spesla fi le banli .i .oi
—mo .oidai?
—nabmi ma'a
—ma nabmi?
—le kapyzda na barda co banzu le nu vasru ro le vitke be fi le spenunsla be'o no'u ro le siksika .e ro le nienke'a .e ro le selylanzu
.i la pokaientas. kixsku lu doi geronovits. ko mo'u zutse fi le zargu gi'e kalte seva'u mi lo zubra li'u
.i la geronovits. cusku lu do djica lo nu mo lo zubra? li'u
—mi ka'e zbasu lo kukte ke jaurgapci seljukpa zubra stasu lo zubra rectu .i mi ka'e bramaugau le kapydi'u sepi'o lo zubra skapi .i mi'o ba ka'e vi'ecpe le spenunsla piro le munje
.i mo'ize'o se klama la geronovits .i djedi li pa ce'o li re ce'o li ci .ijenai la geronovits. zvati .i bazu le jeftu la geronovits. xruti ri fi'o xance le kunti .i la pokaientas. kixsku lu doi juxybebna le mi zubra cu zvati ma? li'u
—do .e le do zubra stasu cu zvati le lumbaktu
—ki'u ma .i ma fasnu
—ca le pamoi djedi mi viska le zubra .iku'i na banzu xamgu le stasu gi'e na banzu barda seva'u le kapydi'u .i ca le remoi djedi mi viska le drata je barda zubra noi se skapi lo tercivla ku'i .i mi na ze'epu viska lo mleme'a zubra .i ca le za'umoi djedi mi tolcri le zubra .i melbi je plana je barda .i prane zubra .ua
—.ibabo mo?
—.ibabo mo paunai .i mi pu'o catra le zubra .i mi sisku fi le mi dakli .i do djuno ma paunai .i bebna fa mi .i mi lebna le ladru ka'amru
|
# banpu'icu
ni'o la'o zoi. Pinji .zoi. goi ko'a cu banpu'icu gi'e bangu jutsi la .bantus. gi'e bangu mu no no no lo prenu pe tu'i la gabon .i
|
le ciso klesi be lo selgu'a bei lo ka se tolcru ca lo brojda surdei
du'o lo cacklu brojda ku lo klesi be lo selgu'a bei lo ka se tolcru ca lo brojda surdei cu cisomei .i ro klesi noi se tamgau la talmud. cu cmima pa lo vo klelei no'u lo selgu'a poi terpra le brori'imalsi nanba ku'o ku ce lo selgu'a poi terpra le taxfu be le brori'ija'a ku'o ku ce lo selgu'a poi terpra le pilka be le zasni brori'imalsi ku'o ku ce lo nu bevri da pa canlu pa bi'u canlu to ni'a se ciksi toi
ckupau pagbu
liste nacmeimei [stika ti]
to na se sepli fi lo flalu be fu la toras. fa'u le bropijgi'a toi
|xebro||lojbo||velcki||mupli|
|lo terpra le brori'imalsi nanba to paci selgu'a toi|
|חורש||nu plixa||nu ga bregau lo loldi lo nu sombo gi xagzengau lo loldi tu'a lo spati||lo nu kakpa lo dertu lo loldi|
|זורע||nu sombo||nu sidju lo spati lo nu banro||lo nu jaurdu'a lo tsiju|
|קוצר||nu crepu||nu vimcu lo spati .a lo spati pagbu lo vo'e nunji'e gasnu||nu ga katna lo srasu gi sumne lo grute poi jorne lo tricu to semu'i lo nu crepu ra toi|
|מעמר||nu jajgau lo gurni lo bakfu||nu jajgau lo spati||lo nu punji lo plise lo lanka|
|דש||nu popygau lo gurni calku||nu vimcu lo cidja lo ri rarna vasru||lo nu tolse'a lo jisra lo grute|
|זורה||nu fendi lo gurni lo calku kujo'u lo nenri tu'a lo brife||go'i fi lo cidja kujo'u lo na'e cidja||lo nu bifca'e lo derdembi calku to'o lo derdembi|
|בורר||nu cuxna||nu vimcu lo na'e seldji fo lo seldji||lo nu vimcu lo bongu lo finpe|
|טוחן||nu zalvi||nu zalvi ja marxa ja katna da lo cmalu spisa||lo nu zalvi lo ckafi dembi|
|מרקד||nu pilno lo grupu'o julne||nu gregau lo mixre be lo cidja lo julne be lo cidja bei lo na'e seldji||lo nu gregau lo vanju lo julne tezu'e lo nu vimcu loi pulce|
|לש||nu catke xregau||nu jmina lo litki lo purmo lo pesxu||lo nu zbasu lo mavypesxu lo lenku djacu|
|מבעיר||nu cfagau lo fagri||nu cfagau ja muvgau ja setese jmina lo fagri||lo nu sazri lo ctile karce|
|אופה||nu jukpa fi tu'a lo glare||nu pilno lo glare tezu'e lo nu redgau da||lo nu febgau lo djacu kei .a lo nu rumgau lo lakse|
|מכבה||nu fagystigau||nu stigau ja jdikygau lo fagri||lo nu jdikygau lo fagri lo ka glare sedi'o lo gapci toknu|
|lo terpra le taxfu be le brori'ija'a to paci selgu'a toi|
|גוזז צמר||nu kreka'a lo sunla||nu vimcu lo jorne be lo danlu||lo nu katna lo xandegycalku|
|מלבנו||nu labgau||nu vimcu ja jdikygau lo skari .e lo dertu vu'o po'e lo bukpu||lo nu rakygau lo xandegycalku lo dertu bu'u lo palku|
|מנפצו||nu nicygau lo kerfa||nu nicygau lo kalsa derxi be loi kerfa sepi'o lo xance .e lo tutci tezu'e lo nu galfi vo'e lo cilta||lo nu pilno lo komtci tu'a lo runkre|
|צובע||nu skagau||nu jai galfi lo skari be da lo drata||lo nu pilno lo se skari mlegaumai|
|טווה||nu tonjongau||nu jongau lo cilta lo cilta ta'i lo nu tongau tezu'e lo nu zbasu lo skori||lo nu go'i|
|מיסך||nu punji le panra cilta lo jivbu greku||nu go'i||lo nu punji lo clupa fa'a lo pamei farna lo paxyjaitci ke zbasu greku|
|עושה שני בתי נירין||nu gregau re lo panra cilta le djine noi jorne lo jivbu greku||nu go'i||lo nu go'i|
|אורג||nu jivbu||nu cupra loi bukpu lo nu li'urgau lo cilta lo ni'a je ga'u kruca cilta||lo nu larcu jivbu zi'o lo runkre|
|פוצע||nu vimcu lo cilta lo jivbu greku||nu vimcu su'o re cilta le jivbu greku||lo nu vimcu lo paxyjaitci le zbasu greku|
|קושר||nu jgela'a||nu cupra lo jgena tezu'e lo nu vo'e ba vitno fi lo djedi be li su'opa[1]||lo nu jgela'a lo slasi victerlu'i bo dakli|
|מתיר||nu to'e jgela'a||nu to'e lasna lo jgena poi da pu cupra tezu'e lo nu ke'a vitno||lo nu to'e lasna lo bu'uzda skori[2]|
|תופר||nu fenso||nu jongau da de ta'i lo nu pilno fu'e mu'a lo snipa .a lo dinko .a lo nipsri .a lo plopijne fu'o tezu'e lo vitno be fi lo djedi be li su'opa||lo nu seltelgau lo xa'arvau|
|קורע||nu gasnu lo nu vlika'a||ga nu to'e fenso gi nu ka'argau fe da poi na'o se cikre ta'i la'o .xy תופר .xy||lo nu vimcu lo gubnoi lo bitmu[3]|
|terpra le pilka be le zasni brori'imalsi to pare selgu'a toi|
|צד צבי||nu kavbu lo mirli||nu fanva lo nu lo cilce danlu cu zifre muvdu||lo nu ga kavbu lo sfani lo jbini be re canko gi kavbu lo do bakni poi pu klama fi lo cagdaidi'u[4][5][6]|
|שוחט||nu catra||nu catra lo jmive||lo nu marxa lo cakcinki[7]|
|מפשט||nu kapyvi'u||nu vimcu lo skapi be lo na'e se jukpa danlu ri||lo nu go'i|
|מעבד||nu stogau lo danlu skapi lo ka norfusra sepi'o loi xukmi||nu go'i lo pilka .e lo cidja||lo nu jirgau lo clazme loi silnyjau je vanslami|
|משרטט||nu linji terxra||nu gaga terxra gi sraku ba'argau lo'i linji tezu'e lo nu bregau fi lo nu ciska gi nu go'i lo'i tarmi korbi ku tezu'e lo nu bregau fi lo nu katna||lo nu sraku ba'argau lo pelji lo cukla sepi'o lo xandegycalku|
|ממחק||nu xulgau||nu xulgau ja spali ja pejgau be lo viknu na'e cidja bo litki||lo nu spali lo cutci|
|מחתך||nu katna||nu katna fi lo jai seldji tarmi ja nilcla||lo nu kargau lo tanxe be lo zbiple vi'i lo pagbu se katna barna|
|כותב||nu ciska||nu ciska su'ore lerfu .a lo sinxa||lo nu pirlarfi'i .e lo nu spebi'o to ri nibli lo nu ciska lo spebi'o ke flalu selci'a toi|
|מוחק||nu tolci'a||nu tolci'a ja daspo su'ore lerfu .a lo sinxa||nu kargau lo tanxe poi terci'a ta'i lo nu le lerfu cu binxo lo porpi|
|בונה||nu di'uzba||nu zbasu ja cikre ja jongau be da lo jorne be lo loldi||lo nu pejgau lo santa to ki'u lo du'u lo santa cu simsa lo dinju lo ka bandu zo'e lo tcima toi|
|סותר||nu di'uspo||nu dukti la'o xy. בונה xy.||lo nu vimcu lo canko julne le greku|
|מכה בפטיש||nu darxi fi lo mruli||nu binxo lo na'e tutci lo tutci||lo nu tratytongau lo kanjunla punsarlu kei .a lo nu dragau lo'i nu'o tonga be fi lo zgitci|
|lo nu bevri da pa canlu pa bi'u canlu|
|מוציא||nu bevri||to ko viska lo lo cnita toi||lo nu bevri lo selmri lo nenri be lo zdani lo selmri tanxe|
- lo nu cupra lo jgenrbo cu selcru
- lo nu to'e lasna lo cutci poi snuti ckaji lo ka se jgena cu selcru to ki'u lo nu tu'a lo jgena cu na pu jai se zu'edji toi
- lo nu kargau lo cidja tanxe cu selcru
- lo nu kavbu lo ckape danlu .a lo danlu poi lo prenu cu tirpa cu selcru
- lo nu klacpe lo do gerku lo zdani cu selcru va'o lo nu le gerku cu zifre klama
- so'o masno danlu be mu'u lo cakyrespa ma'i le flalu cu ckaji lo ka ru'i se kavbu .iseki'u curmi lo nu lo bropre cu lafti ja kavbu ra ca le surdei
- lo nu catra lo ckape danlu no'u mu'a lo vindu since cu selcru
jicmu [stika ti]
flalu fu la toras. fa'u le bropijgi'a [stika ti]
ni'o le dzena brogi'a pu fendi lo se tolcru selgu'a lo remei .i so'i selgu'a goi tyty. cu se tolcru la toras. no'u va'i la cevn. .i lo drata goi tyby. cu se tolcru la brogi'a tezu'e lo nu bandu tyty. lo nu lo prenu cu snuti no'e tinbe tu'a tyty. .i mu'i ra lo bropijgi'a cu tolcru lo selzu'e poi simsa gi'a setese nibli be lo tcaci gi'a cafne rinka vau tyty. .imu'a lo nu selma'e lo xirma cu tolcru mu'i lo nu lo brogi'a cu xanka lo nu lo prenu la'acu'i cu vimcu cei broda lo jimca lo tricu tezu'e lo nu darxi le xirma tezu'e lo nu sutygau ri .i lo nu broda cu me la'o gy. קוצר gy. .iji'a mu'a lo nu cpare lo tricu la'acu'i cu rinka lo nu snuti broda .i le re selgu'a klesi cu dunli tolcru .iki'u lo velsfa be sera'a loremei cu simxu frica .i ko viska la'e lu velsfa li'u |
# la mu'e cuxna lo bradi
sei notci le nomoi pagbu cu ba'e .ai cfipu .i ku'i .ai fe lo tcidu cu tolsatci si'o lo dunku .e lo jai va'o nu le fikpre cu cirko lo ka sanji cu fasnu .i .e'o jungau va'o na'ebo la'e di'u da'i
ni'o ni'o no mo'o
ni'o zvati zi'o .i manku je za'a na'e se jvinu se vanbi .i viska co cmaci se pensi se tarmi .i ku'i cmaci natfe co dumnatfe cfipu .i co'u jinvi co du'u ga lo cmaci gi lo zasti ja xanri cu ka'e jai te ni'i drani .i ja'o djuno no da
ni'o co'a se kanla .ue .i sanji zi'o ce'e pu pe'e je lo du'u se kanla ku ce'e ca .i ku'i na ka'e kanla viska .i srera bo cmaci je pensi viska za'o .i za'a vanbi ke milxe dacti farvi vau ku'i .i surla ba'e je xanka .i lo nu zi'o binxo zi'o cu cinri je se terpa je cizra .i za'a .ua senva .i ku'i cikna binxo tadji na'e djuno
ni'o drata menli klama .i vi be'u se'i zvati .i lu ba klama fa mi do te zu'e lo nu cuxna .i bredi fa ko li'u bu'a .i zo bu'a zo'u za'o cfipu .i ju'o ru'e drata menli cliva
ni'o ze'u na'e fasnu .i pensi troci co sevzi ranji .i nandu co go'i .i ji'a nandu co nu pensi .i morsi smadi .i lo morsi na ka'e pensi
ni'o lo xekri mo'u klama .i ca gi lo nu pensi cu nandu jdika gi lo xekri cu cusku lu ba zi binxo le po'o se dapma .i xu terpa li'u
ni'o spuda fi lu .uanai mo doi li'u .i pu troci je ku'i .o'unai fliba lo zmadu .i pu lo za'u re'u nu troci kei le xekri cu cusku lu menli gi'e gonai sevzi gi pruxi .i lo sevzi lo pruxi zo'u ka'e ponse .i ba cuxna ca la fasnu no'i xu terpa li'u
ni'o ze'a pensi na'ebo lo te tavla .i troci co pensi da .ije na djuno lo du'u da mo kau .i zo sevzi srana
no'i spuda fi lu terpa ma .i lo mo cu vi zasti li'u .i xekri cusku lu terpa lo darno .i ja'a no da zvati zasti .i ku'i zvati lo drata fa lo se dunku li'u
ni'o na spuda gi'e te preti fi lu ba'e mo li'u .i le preti cu claxu lo sarcu .i ku'i xekri jimpe
ni'o xekri spuda fi lu vu'e nai du doi li'u
ni'o se ja'e tu'a zo doi suksa facki lo du'u ma kau se claxu .i cusku lu my. li'u ce'o .ii lu my. mo du dy. li'u ce'o .oicairo'e zoi zoi ba'e mmmmm zoi
ni'o lu ba'e mi li'u se lausku mi .i ca bo cikna binxo
ni'o coi tcidu mi'e ta'o la .djeimz. .u'u mi ba'o na'e sanji do .i so'e roi ku mi xendo zmadu .i ta'o nai lo nu cikna .ui .ii bu'onai zo'u mi smaji cusku fi mi fe lu do mo du mi doi xekri li'u gi'e cisma fi'o se gleki lo nu di'a se menli mi .i mi se pi'o le kanla .ui di'a viska .i se vanbi lo zasti dacti no'u lo mi kumfa .o'usai .i lo nu mi xlali senva lo simsa be la'e de'u cu cafne gi'e slabu gi'e ku'i za'o se terpa
ni'o ky. vasru lo ckana noi na se cpana mi noi cpana le loldi ku'o ku'o .e lo jubme noi simlu lo ka pu'o zi fagri kei gi'e va'i se danmo .i mi sanli gi'e cortu lo xadni trixe .i ca'o bo le patfu cu kargau le vorme noi ta'o .ue ru'e ke'a ji'a se danmo .i lo ka se danmo cu preja lo'i mi se ponse tu'a lo ckana .i ta'o nai le patfu cu cusku lu do lausku spuda ma li'u .i py. na'e cinmo se voksa .i ri noroi pu xanka fi'o zgana mi .i lo du'u go'i cu nibli lo du'u py. cinmo tsali la'e lu ri'e nai li'u kei .a lo du'u cinmo no da mi .i mi terpa lo nu da'i facki lo se nibli
ni'o mi spuda fi lu .y. ba'e mi nanca li mu li'u to ja'a nanca .i cu'u so'e se slabu be mi mi mutce be fi tu'a lo mi se nanca be'o mencre .i la'a mi mencre zmadu do toi .i py. cu cusku zo je'e gi'e cliva .i zi bo le mamta cu nerkla gi'e punji lo sanmi le jubme gi'e cliva .i mi sutra jgari lo le sanmi ku palta se zu'e lo nu py. na'e cpana lo se danmo jubme .i .uu lo rirni cu na'e za'a sanji lo du'u danmo .i mi terpa nalzu'e lo nu djuno
ni'o ba za bo mi ckule klama .i mi na se pendo gi'e ku'i pendo te frati ca le so'a terjbe .i lo mi se pendo simlu cu dunda lo cakla .e lo sampu se kelci vu'o noi la'a krasi se dunda lo rirni .i .i'u .uicu'i cilre no cnino gi'e tavla mi po'o ba lo so'u re'u nu rinsa .i mi du'e .ienai roi pensi je nai tavla .i lo drata tadni ba lo nu facki la'e di'u cu troci sisti .uiru'e .i se'a ro'a mi ba'e ze'e pu je ca je ba na'e nitcu lo za'i kansa
ni'o citka no da vi lo ckule .i ri'a tu'a lo ckule cidja mi binxo co bilma lo za'i ru'i se cliva lo ciblu lo kanla to so'o da rinka toi .i mi nalmuvdu zutse fi'o kansa no ba'e .o'u da ze'u pi ro lo ve vimcu djedi .i lo nu cadzu se ka'a lo se xabju zo'u mi mutce xagji .i re lo kanla cu se cortu ri'a ma .i mi se vanbi lo dukse se gusni .i ca'e lo solri roroi jai crori'a fi ky. to lo cfipu cu na jai se curmi mi toi .i mi de'a jundi gi'e ku'i ca'o cadzu
ni'o za bo mi suksa facki lo du'u zvati lo stodi .oi .i lo drata ke prenu zvati be lo klaji cu ze'u canci .i ca'o bo mi za'o stodi zvati cadzu gi'e fengu binxo .i lo jamfu cu .ua.iicai se danmo .i mi bajra troci gi'e suksa zvati lo drudi noi se stuzi lo na se djuno .i mi farlu jibni gi'e ba zi bo muvdu sisti
ni'o lo se voksa be lo crori'a je senva bo slabu be'o noi za'a trixe mi cu cusku lo fange noi se'o palci gi'e xebni mi .e lo du'u mi zasti .i .ii lo danre cu cargau mi fo vy. gi'e co'a xrani .i vy. cusku lo fange be fi lo drata fi'o nilcladu lo zmadu
tomisemEnlilomUtcesecOrtunoisezgAnalona'esesEvzibemi.i.oicairo'elEbnadagi'edUndadenoidUnkudrAta.isEnvaxEkriklAmagi'ebAndusImlugi'ecUskulutisnUraca'e.ikoze'edArnodoi.ionai.iunaicaila.sIros.li'utoi
ni'o mi ca'o farlu gi'e ku'i gau la xekri .i'ocai ro'oro'i cu masno binxo .i xy. cusku fo .ue lo mi menli fe lu ko bredi .i la .siros. zmadu mi lo ka vlipa kei gi'e traji ckape do .i .a'o jmive doi li'u .i canci
ni'o .oi .uanai mi se menli lo se galfi be la .siros. ru'a .i lo ca'e vajrai ku fa'u so'a lo drata cu slabu fa'u cunso bo frica mi .i sa'e mu'a mi stodi lo ka djica ja djuno ma kau kei .enai lo ka jinvi ma kau lo no'e slabu .i ta'o ra'u nai lo prenu cu .o'u ru'e di'a zvati gi'e cadzu mo'i pa'o mi .i ja'o mi mucti
ni'o mi na djuno lo du'u mi ma kau zvati .a lo du'u dargu lo se xabju fo ma kau .i mi ta'e je di'i klama lo ckule lo zdani fi'o kansa no da soi vo'e vo'i .i ku'i mi se slabu lo go'i po'o ve klama
ni'o .o'a mi na jai se fanta lo nabmi .i mu'a mi puzu se xrani fo lo za'i pa lo tuple cu sepli mi kei fi'o se frati lo nu mi lebna lo tuple lo simsa be mi bei lo ka ma kau xadni se tarmi ce'u .i fu'i lo nu na djuno lo jai frili cu no'e nabmi .i ku'i sarcu fa lo nu pensi
ni'o mi sisku le cnino .o'onai menli lo da'i sidju .i my. cizra gi'e ju'o cu'i tolnei .ii mi .i ku'i my. na'e vlipa gi'e za slabu binxo .i do na'e se slabu mi gi'e se ni'i bo na jimpe lo du'u ma kau te frica noi fadni simlu fi so'e na'ebo mi .i lo cinri ja sidju zo'u ku'i mi facki lo du'u ka'e ganse lo menli be na'ebo mi fi'o jvinu lo se cinmo be lo nalralju pagbu be mi .i mi ze'a litru lo cunso gi'e ca'o bo viska lo menli noi na jarco fi mi fe lo du'u ma kau se pensi zi'e noi ku'i so'o ke'a melbi zmadu ro dacti se zgana be mi .i lo vanbi menli cu
sa .i .ue.u'e menli gi'e ba'e simsa mi .i mi noroi pu viska lo go'i .i mi kanla catlu lo go'e se menli noi se jvinu lo no'e makcu je fetsi .i se birka pa da fi'o ve xrani lo za'a puzu kanro binxo .i mi co'a mo'i fa'a cadzu
ni'o .ua mi tengau lo mi menli lo menli be lo bi'u nai se menli goi my. .i lo nu mucti pencu cu crori'a .i ca bo lo mi ka ganse lo dacti vanbi cu se cirko
ni'o my. poi mucti cu cikna binxo gi'e viska mi .i frati lo nu terpa gi'e co'a kucli lo du'u zvati ma kau
ni'o .oi lo prenu cu darxi my. gi'e minde fi lo nu muvdu .i mi co'u tengau to .oiro'e mi ze'i ganse tu'a my. toi gi'e menli pencu lo darxi noi .ueru'e jibni mi .i dy. mutce terpa gi'e morsi jibni .i mi gasnu lo za'i na ka'e terpa kei te zu'e je se gau lo nu lebna to ju'o nai na'e lebna cpacu toi fi'o simsa la .siros. lo si'o mi ma kau zvati .e lo si'o dargu le zdani fo ma kau .i dy. crori'a be mi se cfipu gi'e farlu gi'e se kansa mi lo nu cortu .i lo vanbi prenu ku ji'a terpa je se cfipu gi'e se mu'i bo mo'i to'o plipe .i se ri'a ru'a gi dy. binxo co sanji tu'a mi gi mi co'a dacti binxo .i lo prenu .iidai poi se zvati mi cu cortu cladu bo bacru .i mi catra dy. tu'a lo menli gi'e mucti ve denpa .i my. .o'e.auro'a jai se cirko
ni'o ta'o lo nu catra cu na'e .uacu'i te cinmo mi .i ju'o pu'o lo nu mi binxo kei mi cinmo .i ja'o mi nu'o ta'e zercatra cu'i
ni'o ta'o nai mi baza zvati le zdani .i mi ba lo nu pensi lo tadji cu mucti binxo vi lo vorme bu'u nai .a'i ru'e lo drata .i mi nerkla ti'u lo jibni be lo fadni fi'o ze'u se pensi my. gi'e na rinsa ja se rinsa le rirni
|
# bangrklingo
.i lo bangrklingo no'u la klingon. rutni bangu .i se finti la'ogy. Marc Okrand gy. noi bauskepre ku'o mu'i tu'a le ranmi pe la star.trek. .i datni tu'i la'ogy. www.kli.org gy.
|
pongu'e
ni'o la pongu'e no'u la'o py 日本 py cu stuna xazdo gugde fi'o selsruri la pasifik. .e le ponxamsi .e la'o py フィリピン海 py .e le sunjugyxamsi .e la'o py オホーツク海 py .i le pongu'e cu lamji la korias. .e le rukygu'e .e le jugygu'e .e la tai'uan. .i
ni'o pa le ralju gundi bo gugde no'u lu gugde cerni bo murse solri li'u cu vasru ciki'o le daplu .e le merli be li cizezebici bei le kurfa ki'otre .i vo le traji barda daplu pe le pongu'e cu se cmene la xokaidos. jo'u la xoncus. jo'u la cikokus. jo'u la kiucus .i le daplu pe la riukius. noi ke'a vasru la .okina,uas. cu nanstici le ralju daplu |
# le pluta po'u le mleca se litru
re lo pluta cu farna se fendi (farselfed?) joi tricu
.i mi litru le mleca se litru
.i la'e di'u pu gasnu
ko'a goi la'e di'u se cusku la rabrt. frast.
.i ko'a se fanva la cein. .e ko la lojban. le glibau
|
# batgyrl
.i la batgyrl (e. Batgirl) ke goi batman cu dc.comics.
|
dansu
ni'o le dansu cu remna muvda tepi'o le cusku tadji .a le jikca .a le pruxi .a le tigni gi'e skicu le nalvoksa cusku fi'o jbini le remna .a le danlu mu'a le bifce dansu .a le cinse dansu .i le dansu cu skicu le muvdu be le naldanlu be'o .e su'o le morna zgike .i le remna poi dansu cu selcmene le dansu gasnu .i le zbadansularcu cu larcu le zbasu dansu .i
ckupau pagbu |
# sidbo
la lojban. mi pu daspo .i mi na ba ka'e cilre lei bangu poi frica be la lojban. (le di'u nunpi'o be zo be cu gerna na'e drani)
de'u ja'a gerna drani .i ri cizra po'o
li'a do ba'o banli farvi .iocai
|
# baupla fuzykamni
la baupla fuzykamni goi byfy cu kamni lo nu platu fi la .lojban. .i byfy fuzme lo nu banro lo selci'a co skicu be le lojbo te karbi kei .e lo nu cikre fi lo nu baupli mu'u lo ka na nabmi .i byfy co'a kamni ca lo 2002moi .i la .camgusmis. ca jatna byfy
|
bercribe
ni'o dei ci'arvelski lo danlu .i le targri zo'u ko viska la'e lu la bercribe li'u
ni'oni'o lo bercribe cu tolzi'o cribe la'o ly. Ursus maritimus .ly. .i lo nakni makcu cu ki'ogra li 300 bi'i 600 .ije lo fetsi makcu cu ki'ogra li 150 bi'i 300 .i lo kerfa cu tu'urke'a je dilsmigu'iselgre gi'e simlu lo ka blabi ja rujyska gi'eja'e mipri fo lo nu selga'esmi .i lo rotsu rasysenta joi kresenta cu bandu fi lo ka lenku |
# rarna ciska
.i mi se xanri le tcini .e le fasnu .i mi ciska
.i le nanmu le tricu cu crepu fe zo'e
.i lo danlu le nanmu cu ca co'a se zgana gi'e pu ca'o viska
.i le nanmu cu klama lo stuzi be lo danlu
.i le nanmu cu facki le du'u lo danlu cu mirli je lorxu je kanba je xirma je cinfo je tirxu cei broda
.i le broda cu pluka le nanmu lo zu'o crepu vau
|
# banli vlile carna xamsi brife de'i 1780moi nanca
ni'o lo banli vlile carna xamsi brife de'i le 1780moi cu me la .atlantik. sopcatra vlile carna xamsi brife goi ko'a du'o lo citri vreji .i ji'i 22ki'o le remna morsi cu cabna lo nu le brife cu litru la martenik. ce la seint.iusteicys. ce la barbeidos. .i ki'o le remna morsi cu fasnu fi'o zvati le xamsi sefta .i
## brife fasnu
ni'o lo nu ko'a pevdarxi la karebi,an. cu cabna lo nu merko jecta vlile binxo fasnu .ije ko'a pevdarxi lo'i brito je fraso bilni bloti girzu noi ke'a simxu lo damba be fi le jitro be ky .i gy poi ke'a seljatna le me la djordj.rodnis. brito bloti jatna noi ke'a falnu klama la nu,iork. lo me la .endis. stici cu preja je selxrani ri'a lo brife fasnu .i le nu selklama cu cabna le nu le me la rodins. bloti jatna cu facki le du'u bi le pare jamna bloti poi ry pu cliva ke'a cu mulno seldaspo gi'e sopybende djacu bo morsi .i
ni'o le brito facki noi ke'a krati tepi'o le za'i daspo cu skicu le du'u le brife fasnu cu stali jibni la barbeidos. ru'i re le djedi .i lo za'i le daspo cu traji xlali cu krinu le nu le facki cu pensi le du'u le terdi desku fasnu cu kansa le brife fasnu .i lo daplu cu sojmulno selmarxa .i so'o pareroi le finpe kalte bloti cu fliba le nu xruti fo le kalte klama .i so'o le lanzu poi ke'a xabju le daplu cu cirko le lanzu cmima ri'a le brife fasnu .i
## steci fatci
ni'o le pe le 1780moi ku me la atlantik. vlile carna xamsi brife citsi cu cizra le ka le citsi cu vasru ci le brife fasnu poi ke'a rinka su'o ki'o le remna morsi .ije ro le ci fasnu cu cabna le 10moi masti .i
ni'o le du'u le solri barna klani cu snada le traji galtu cu cabna le 1780moi .i
ni'o le drata me la atlantik. brife fasnu cu rinka barda klani remna morsi fi'o vasru le me la metc. vlile carna xamsi brife .e le me la gaulveston. vlile carna xamsi brife de'i le 1900moi .i ku'i le me la katrinas. vlile carna xamsi brife cu catra me'i le reki'o remna .i
## drata skucripu
- liste le ralju midju terdi carna brife
- liste le me la atlantik. vlile carna xamsi brife
|
tabra
ni'o lei tabra cu klesi le'i zgitci .i lo tabra cu jinme .i lo dzena jirnytabra cu se zbasu lo jirna ta'i lo nu kakpa fi lo moltu'u .i sance lepu'u le ctebi cu slilu desku ri'alenu vasxu .i le di'u pruce cu rinka lenu lei vacri poi nenri le tabra cu slilu .i lo dzena tabra varkamju cu stodi le nilcla .iku'i piso'e loi cabna tabra varkamju cu cenba le nilcla ri'a tu'a lo sakli .a lo batke
ni'o tabra fa |
# dunra
le dunra cu cmima le vo citsi .i lo'e dunra cu lenkymau temci .i le si'o dunra cu dukti le si'o crisa
.i vu da ze'e dunra .i a'unaicai
|
# lo .uniks.
ni'o la .uniks. no'u la'o gy. Unix .gy. noi fukyzifpo'e se cmene zoi gy. UNIX .gy. girzu lo ka kakne tu'a za'u pa lo skami pruce je za'u pa lo sampli kei lo samcmu poi se krasi le .uniks. pe la me .abu ty. joibu ty. ku ku goi ko'a .i ca'e lo te go'i cu .uniks. .i ko'a co'a se favgau ca li pa so ze no'o la .ken. .tampsn. je la .denis. .ritci. je lo drata va le lanli stuzi pe la .bel. .labz.
ni'o la .bel. .sistym. .ai dai cu pilno ko'a ca le krasi .i ku'i la me .abu ty. joibu ty. ba za curmi lo nu lo na cmima be by sy. cu pilno lo .uniks. .i le nu go'i cu rinka so'o nu finti lo lanli ja se vecnu mupli be fi lo .uniks. .i mu'a la .iuniversitis. .yv. .kaliforniias. .berklis. fa'u la .maikrosaft. fa'u la me .ibu by my. ku fa'u la .syn. .maikrosistyms. pu finti la me by sy dy. ku fa'u la .ziniks. fa'u la me .abu .ibu xy. ku fa'u la .solaris. .i la me .abu ty. joibu ty. ca li pa so so no'o vecnu le nu fukyzifpo'e la .uniks. kei la .novel. .i ny. vecnu le cuntu be ny. be'o pe la .uniks. la .santas. .kruz. .apyreicyn. ca li pa so so mu .i dunda le nu fukyzifpo'e kei la .open. .grup. noi nutli girzu je cu curmi lo nu pilno lo se fukyzifpo'e kei lo nu lo samcmu cu jvamapti la .singl. .uniks. .spesifikeicyn. .i ba'o li re no pa vo la .mako'es. ne la .apl. cu traji lo ni pilno kei fo lo .uniks.
ni'o lo .uniks. cu ckaji lo ka lo tarmi cu se fendi po'u le .uniks. tadji .i .ubu ty. se smuni lo du'u lo samcmu cu sabji loi sampla be fi pa sampu je xamgu bo se ciksi be'o noi na'o simxu benji fu pa datnyvei ciste to no'u le .uniks. datnyvei ciste toi je noi ka'e se gumgau te zu'e lo nu sazri fi lo pluja kei se pi'o pa minde bangu no'u le .uniks. .cel. .i le .uniks. cu drata lo lidne be ri lo du'u pa moi lo samcmu be ka'e za'u lo skami klesi .i lo nu la me cy. ca'a samplabau fi pi ji'i ro .ubu cu rinka lo nu le .uniks. cu samcmu za'u skami klesi ka'e
|
bangu
ni'o lo bangu cu ciste lo gerna lo viska ja tirna ja pencu sinxa lo ka se smuni .i lo remna bangu cu se pilno lo nu skicu lo se lifri .i lo remna bacru bangu cu se skicu fo le sinxa ciste to le ciste cu vitci terdjuno la'o gy. lexemes gy. toi .e le gerna to javni toi fi'o kakne le nu jmina je galfi sinxa |
# le panoki'omoi nu viska la puzi nunstika
cu se gasnu mi teka'a ti poi papri
|
# liste be lo merja'a
ni'o le merja'a cu catni le nu bapli merko bo flalu .i
ni'o le di'e cu liste le merja'a .i [na gendra]
1. la djorj. .uacentyn no'u la'o gy. George Washington gy.
2. la djan. edymyz. no'u la'o gy. John Adams gy.
3. la tomas. djefyrsyn. no'u la'o gy. Thomas Jefferson gy.
4. la djeimyz. madison. no'u la'o gy. James Madison gy.
5. la djeimyz. mynro. no'u la la'o gy. James Monroe gy.
6. la djan. kuinsi. edymyz. no'u la'o gy. John Quincy Adams gy.
7. la endru. djaksyn. no'u la'o gy. Andrew Jackson gy.
8. la marten. ven. biyren. no'u la'o gy. Martin Van Buren gy.
9. la uiliam. xarisyn. no'u la'o gy. William Harrison gy.
10. la djan. tailyr. la'o gy. John Tyler gy.
11. la djeimyz. polk. no'u la'o gy. James Polk gy.
12. la zakari. teilyr. no'u la'o gy. Zachary Taylor gy.
13. la milyrd. filmor. no'u la'o gy. Millard Fillmore gy.
14. la frenklen. piyrs. no'u la'o gy. Franklin Pierce gy.
15. la djeimyz. biukanen. no'u 'o gy. James Buchanan gy.
16. la .eibry'am. .linken. no'u la'o gy. Abraham Lincoln gy.
17. la .endru. djansen. no'u la'o gy. Andrew Johnson gy.
18. la .iuLESes. grant. no'u la'o gy. Ulysses Grant gy.
19. la rytyrfyrd. xeiz. no'u la'o gy. Rutherford Hayes gy.
20. la djeims. garfiyld. no'u la'o gy. James Garfield gy.
21. la tcestyr. .arsur. no'u la'o gy. Chester Arthur gy.
22. la grovyr. klivlend. no'u la'o gy. Grover Cleveland gy.
23. la bendjamen. xerisyn. no'u la'o gy. Benjamin Harrison gy.
24. la grovyr. klivlend. no'u la'o gy. Grover Cleveland gy.
25. la uiliam. mekenli. no'u la'o gy. William McKinley gy.
26. la tiodor. rosyvelt. no'u la'o gy. Theodore Roosevelt gy.
27. la .uiliam. taft. no'u la'o gy. William Taft gy.
28. la .uydros. .uilsun. no'u la'o gy. Woodrow Wilson gy.
29. la .uaren. harden. no'u la'o gy. Warren Harding gy.
30. la kalven. kulidj. no'u la'o gy. Calvin Coolidge gy.
31. la xyrbyrt. xuvyr. no'u la'o gy. Herbert Hoover gy.
32. la franklen. rosyvelt. no'u la'o gy. Franklin Roosevelt gy.
33. la xeris. trumen. no'u la'o gy. Harry Truman gy.
34. la duait. .aizenhauyr. no'u la'o gy. Dwight Eisenhower gy.
35. la djan. kenedi. no'u la'o gy. John Kennedy gy.
36. la lindyn. djansen. no'u la'o gy. Lyndon Johnson gy.
37. la ritcyrd. niksyn. no'u la'o gy. Richard Nixon gy.
38. la djeryld. foyrd. no'u la'o gy. Gerald Ford gy.
39. la djimis. kartyr. no'u la'o gy. Jimmy Carter gy.
40. la RANyld.REIgen no'u la'o gy. Ronald Reagan gy.
41. la djorj. xyrbyrt. ualker. buc. no'u la'o gy. George H. W. Bush gy.
42. la bil.klenton. no'u la'o gy. Bill Clinton gy.
43. la djorj. ualker. buc. no'u la'o gy. George W. Bush gy.
44. la byRAK.obamas. no'u la'o gy. Barack Obama gy.
45. la danyld.trymp. no'u la'o gy. Donald Trump gy.
|
Subsets and Splits
No community queries yet
The top public SQL queries from the community will appear here once available.